Immaġina din ix-​xena: Heather ilha xahrejn biss toħroġ maʼ Mike, imma tħossha bħallikieku ilha tafu ħajjitha kollha. Huma l-​ħin kollu jibagħtu l-​messaġġi lil xulxin, jitkellmu għal sigħat sħaħ fuq it-​telefown, u saħansitra jaħsbu u jitkellmu bl-​istess mod! Imma issa Mike irid iktar milli sempliċement jitkellem.

F’dawn l-​aħħar xahrejn, Mike u Heather m’għamlu xejn ħlief iżommu id xulxin u jbusu lil xulxin ħafif ħafif. Heather ma trid tagħmel xejn iżjed minn hekk. Imma lanqas ma trid titlef lil Mike. Ħadd ħliefu ma jġegħelha tħossha daqshekk sabiħa u speċjali. Bejnha u bejn ruħha, hi tirraġuna: ‘Barra minn hekk, jien u Mike inħobbu ’l xulxin . . . ’

Jekk int kbir biżżejjed biex toħroġ maʼ xi ħadd u kont fis-​sitwazzjoni taʼ Heather, kieku x’kont tagħmel?

Jekk tikser xi liġi tal-​fiżika, bħalma hi l-​liġi tal-​gravità, se tbati l-​konsegwenzi. L-​istess jistaʼ jingħad jekk tikser xi liġi morali, bħal-​liġi li tgħid: ‘Tbiegħdu miż-​żína,’ jew mill-​immoralità sesswali.—1 Tessalonikin 4:3.

Liema konsegwenzi se tbati jekk ma tobdix dan il-​kmand? Il-​Bibbja tgħid: “Min jipprattika ż-​żína qed jidneb kontra ġismu stess.” (1 Korintin 6:18) Dan kif inhu minnu?

 Xi riċerkaturi sabu li ħafna żgħażagħ li għamlu s-​sess qabel iż-​żwieġ normalment jesperjenzaw waħda jew iktar mill-​konsegwenzi li ġejjin.

• NIKET. Ħafna miż-​żgħażagħ li għamlu s-​sess qabel iż-​żwieġ jgħidu li wara ddispjaċiehom.

• NUQQAS TAʼ FIDUĊJA. Wara li jkollhom relazzjoni sesswali, kull wieħed mill-​imseħbin jgħid bejnu u bejn ruħu: ‘Min jaf maʼ min iktar għamel/għamlet is-​sess?’

• DIŻAPPUNT. Fil-​fond taʼ qalbhom, ħafna tfajliet jippreferu lil xi ħadd li jipproteġihom u mhux lil xi ħadd li jużahom. U ħafna ġuvintur iħossuhom inqas miġbudin lejn tfajla li tkun marret magħhom.

• Il-​konklużjoni: Jekk iċċedi għas-​sess qabel iż-​żwieġ tkun qed tbaxxi lilek innifsek għax tkun qed tarmi xi ħaġa prezzjuża. (Rumani 1:24) Ġismek hu prezzjuż wisq, ibżaʼ għalih!

Uri li għandek karattru sod biżżejjed biex titbiegħed mill-​immoralità sesswali. (1 Tessalonikin 4:3) Imbagħad, jekk xi darba tiżżewweġ, int tkun tistaʼ tagħmel is-​sess. U tkun tistaʼ tgawdih bis-​sħiħ, mingħajr ebda inkwiet, dispjaċir, u dubju li spiss huma r-​riżultat li jiġu minn relazzjoni sesswali qabel iż-​żwieġ.—Proverbji 7:22, 23; 1 Korintin 7:3.

• Taħseb li xi ħadd li verament iħobbok se jipperikola l-​benesseri fiżiċi u emozzjonali tiegħek?

• Xi ħadd li verament jimpurtah minnek sejjer jipperikola r-​relazzjoni tiegħek m’Alla?—Ebrej 13:4.