Inżul T’emerġenza!

KIF RAKKONTAT MINN CÉSAR MUÑOZ

Wara li gawdejt vaganza mill-​isbaħ inżur lill-​familja tiegħi fil-​belt taʼ Monterrey, il-​Messiku, kont lest biex immur lura lejn l-​uffiċċju tal-​fergħa tax-​Xhieda taʼ Jehovah fil-​Belt tal-​Messiku, fejn għandi l-​privileġġ li naqdi. Kien il-​Ħadd, l-​1 taʼ Diċembru, 2002. Kont fuq it-​Titjira 190 li telqet fis–7:00 p.m.

 WARA titjira tajba taʼ ftit inqas minn siegħa u nofs, l-​ajruplan beda nieżel. Fid-​daqqa u l-​ħin, telaʼ f’salt u lkoll inħsadna bil-​ħoss qawwi li kien ġej minn taħtna. Imbagħad, il-​kaptan ħabbar li l-​bibien minfejn joħorġu r-​roti taʼ l-​ajruplan ma setgħux jinfetħu. Kienu weħlu! Bil-​biżaʼ, xi passiġġieri bdew jibku. Oħrajn bdew jitolbu b’leħen għoli. Jien ma kontx naf x’se jiġri.

Il-kaptan għarrafna li kien se jkollu jagħmel xi ħaġa biex jiskossja u jiftaħ il-​bibien tar-​roti. Allura waqt li konna qed intiru fuq il-​Belt tal-​Messiku, il-​kaptan dam xi siegħa jġiegħel l-​ajruplan joqmos ’il fuq u ’l isfel u minn naħa għal oħra. Dan kien agħar minn kwalunkwe rikba li rkibt fil-​lunapark. Imma dan żgur li ma kienx pjaċevoli! Imbagħad il-​kaptan ħabbar: “Jiddispjaċina ninformawkom li l-​bibien ma nfetħux. L-​unika ħaġa li nistgħu nagħmlu hi li ninżlu b’emerġenza mingħajr roti.” Ilkoll ħarisna lejn xulxin b’ansjetà kbira fuqna għax bdejna nimmaġinaw l-​agħar ħaġa li setgħet tiġri.

Ngħatajna l-​istruzzjonijiet għal inżul t’emer­ġenza. Inżajna ż-​żarbun, neħħejna dak kollu li setaʼ jikkaġuna ġrieħi, u qgħadna fil-​pożizzjoni li ssuġġerewlna. Ħsibt li żgur se nikkraxxjaw fir-​runway! Dak il-​ħin, tlabt lil Alla Jehovah u ġiet fuqi kalma kbira.​—Filippin 4:​6, 7.

Ħafna drabi smajt li meta persuna tkun f’ħalq il-​mewt, f’moħħha tara xeni t’affarijiet li għamlet f’ħajjitha u jiġuha ħsibijiet dwar affarijiet li setgħet għamlet. Iddispjaċieni li lit-​tfajla li kienet bil-​qiegħda ħdejja ma kontx kellimtha dwar is-​Saltna u ddeċidejt li jekk insalva, dejjem kont se nieħu vantaġġ minn kull opportunità biex nagħti xiehda. Ukoll, analizzajt malajr is-​servizz tiegħi lil Jehovah.

Meta l-​ajruplan beda nieżel, stajt nara xi trakkijiet tat-​tifi tan-​nar, ambulanzi, u ħafna nies jistennew. Imbagħad ħassejna daqqa qawwija hekk kif l-​ajruplan ħabat maʼ l-​art fuq żaqqu. Hekk kif l-​ajruplan beda jitkaxkar, kien hemm ħafna xrar taʼ nar itir minħabba li l-​metall kien qed iħokk maʼ l-​art. Minnufih, it-​trakkijiet tat-​tifi tan-​nar li kienu fuq kull naħa tal-​passaġġ fejn niżel l-​ajruplan bdew jitfgħu ħafna ilma fuqu biex inaqqsulu s-​sħana.

Fl-aħħar, wara mumenti t’ansjetà kbira, l-​ajruplan waqaf. Aħna nfexxejna nċapċpu bil-​ferħ kif ukoll bis-​serħan kbir li ħassejna minħabba li l-​pilota kien irnexxielu jieħu ħsieb din l-​emerġenza. Imbagħad intqalilna biex noħorġu mill-​ajruplan mill-​ewwel. Malajr morna ħdejn il-​postijiet taʼ ħruġ u żżerżaqna ’l isfel mill-​għoli għal fuq il-​ħaxix fejn konna ħelsin mill-​periklu.

X’ħin kont ’il bogħod biżżejjed mill-​ajruplan u nitriegħed minħabba l-​effett taʼ din l-​esperjenza, stajt nara l-​ajruplan imxaqleb fuq ġenb wieħed fuq l-​art imwittija fejn niżel. Fortunatament, ftit kienu l-​passiġġieri li weġġgħu, u kellhom biss ġrieħi ħfief. Fl-​ambulanzi li kien hemm fil-​qrib, l-​oħrajn ngħataw attenzjoni medika minħabba x-​xokk emozzjonali.

Jien kont ippjanajt li nasal id-​dar madwar id–9:00 p.m., imma spiċċajt wasalt erbaʼ sigħat wara. Meta tqis kollox, jien grat li għadni ħaj! Din l-​esperjenza ġagħlitni nirrifletti. Kelli naċċetta kemm hi inċerta l-​ħajja. Vera tumilja ruħek meta tirrealizza li tistaʼ titlef kollox f’temp taʼ ftit minuti. Meta jkun jidher li m’intix se ssalva, jistaʼ jkun tard wisq biex tirranġa ħajtek jew iżżid maʼ l-​azzjonijiet tajbin tiegħek li Alla jkun jistaʼ jiftakar. Issa napprezzaha ħafna iktar l-​opportunità li għandi li nuża ħajti bil-​għaqal u nagħmel kull ġurnata tiswa fis-​servizz t’Alla tiegħi, Jehovah.​—Salm 90:12.