● Xi trid tikseb mill-​ħajja? Għandek stennijiet raġunevoli, jew toħlom dwar affarijiet li jmorru lil hinn mill-​abbiltà jew il-​mezzi tiegħek? Wieħed li osserva bir-​reqqa n-​natura umana ta dan il-​parir għaqli: “Aħjar tara b’għajnejk milli ssiefer bil-​ħsieb. Imma dan ukoll frugħa u ġiri wara r-​riħ.”—Koħèlet 6:9, Għaqda Biblika Maltija.

Dak ‘li naraw b’għajnejna’ jirreferi għaċ-​ċirkustanzi u r-​realtajiet preżenti tagħna. M’għandniex xi ngħidu, m’hemm xejn ħażin jekk nipprovaw intejbu ħajjitna. Madankollu, il-​punt li l-​Bibbja trid toħroġ hu li l-​għorrief ma jiġrux wara miri mhux realistiċi. Dawn jistgħu jkunu l-​fama, l-​għana, is-​sieħeb jew is-​sieħba ideali fiż-​żwieġ, jew is-​saħħa perfetta.

Iktar minn hekk, dawk li jilħqu ċerta mira, bħalma hu l-​għana materjali, għandhom mnejn xorta jixxennqu għal iktar. “Min iħobb il-​fidda ma jixbax bil-​fidda, u lanqas min iħobb l-​għana ma jixbaʼ bid-​dħul. Dan ukoll frugħa,” tgħid il-​Bibbja bla tlaqliq. (Ekkleżjasti 5:10) Għalhekk, dawk li huma għorrief spiritwalment jipprovaw jikkuntentaw b’dak li għandhom, dak ‘li jaraw b’għajnejhom.’ Iva, huma jirrikonoxxu din il-​verità: “Ma ġibna xejn magħna fid-​dinja, u ma nistgħu nieħdu xejn.”—1 Timotju 6:7.

Il-​bnedmin huma magħmulin b’tali mod li jiksbu l-​akbar hena meta jissodisfaw il-​bżonnijiet spiritwali tagħhom. (Mattew 5:3) Kif nistgħu nagħmlu dan? Ġesù Kristu qal: “Il-​bniedem mhux bil-​ħobż biss jgħix, imma wkoll b’kull kelma li toħroġ minn fomm Ġeħova.” (Mattew 4:4) Dan il-​kliem prezzjuż insibuh fil-​Bibbja, u hu disponibbli għal kulħadd.

Eżempju taʼ dan insibuh f’Salm 37:4. Dan jgħid: “Tgħaxxaq b’Ġeħova bil-​kbir, u hu jagħtik dak li tixtieq qalbek.” Bħala Alla li Jistaʼ Kollox, Ġeħova se jagħti lill-​aduraturi leali tiegħu affarijiet li ebda uman ma jistaʼ jagħti: saħħa perfetta, sigurtà materjali, u ħajja taʼ dejjem f’Ġenna fuq l-​art. (Luqa 23:43; Rivelazzjoni 21:3, 4) Aħna nkunu realistiċi jekk nafdaw f’dan il-​kliem.