Iż-​Żgħażagħ Jistaqsu

“Cori għallmitni ħafna affarijiet li ma kontx naf qabel. Meta nkun magħha niltaqaʼ maʼ ħafna nies, nipprova affarijiet ġodda, u nieħu pjaċir kull fejn immorru. Il-​ħbiberija maʼ Cori letteralment biddlitli ħajti!”—Tara. a

Din it-​tip taʼ ħbiberija tinstemaʼ qisha tal-​ħolm? Jekk inhu hekk, taqtax qalbek. Jeżistu ħbieb potenzjali madwarek. Dan l-​artiklu se jgħinek tiskopri min huma.

‘JIEN imdawra bil-​ħbieb imma ħbieb m’għandix.’ Shayna, taʼ 21 sena, hekk tiddeskrivi l-​esperjenza taʼ li tkun fost ħafna nies mingħajr ma tħossok partikolarment qrib xi ħadd minnhom. Dan is-​sentiment jistaʼ jkun speċjalment il-​każ fost dawk fuq netwerk soċjali. “Jistaʼ jkollok ‘lista tal-​ħbieb’ żul minn hemm u tidher popolari u tal-​ġenn,” tgħid Serena, taʼ 22 sena, “imma fil-​verità dik il-​lista tistaʼ tkun mimlija kuntatti li ma jfissru xejn.” b

X’tippreferi jkollok int—mijiet taʼ nies fuq ‘il-​lista tal-​ħbieb’ tiegħek jew ftit ħbieb ġenwini? Għalkemm it-​tnejn li huma għandhom il-​vantaġġi tagħhom, ħabib veru jistaʼ jgħinek tgħaddi minn sfidi u jistaʼ wkoll jinkuraġġik tkun persuna aħjar. (1 Korintin 16:17, 18) Aħseb dwar il-​fatturi li ġejjin biex jgħinuk tara min fost sħabek jistaʼ diġà qed juri l-​kwalitajiet taʼ ħabib veru.

ĦABIB VERU HU TAʼ MIN JAFDAH

“Ħabibti kienet tgħidli s-​sigrieti tagħha u minħabba f’hekk, ħsibt li stajt nafdaha b’tiegħi. Allura darba minnhom għedtilha li kelli grazzja maʼ ġuvni. Illaħwa x’għamilt b’idejja! Mill-​ewwel qabdet u marret tgħid lil oħrajn!”—Beverly.

“Lil sieħbi Alan nistaʼ ngħidlu kollox u jien ċert li mhux se jmur iparla.”—Calvin.

Min minn dawn iż-​żgħażagħ kellu ħabib veru? Min mill-​ħbieb tiegħek tistaʼ tħossok komdu tiftaħ qalbek miegħu? c Il-​Bibbja tgħid li “ħabib veru jħobb il-​ħin kollu.”—Proverbji 17:17.

 Hawn taħt ikteb l-​ismijiet taʼ tnejn minn sħabek li wrew li huma taʼ min jafdahom.

1 ․․․․․

2 ․․․․․

ĦABIB VERU JAGĦMEL SAGRIFIĊĊJI PERSONALI

“F’xi ħin fi kwalunkwe ħbiberija, persuna waħda hi b’saħħitha iktar minn oħra. Ħabiba vera tagħraf meta int id-​dgħajfa u immedjatament tagħmel xi ħaġa biex tgħinek. Bla dubju, dik il-​ħabiba tkun ċerta li int se tagħmel l-​istess magħha meta hi jkollha bżonn.”—Kellie.

“Meta mietet ommi, kelli ħabiba ġdida. Konna għadna ma nafux ’il xulxin daqshekk, imma konna ftehemna biex immorru tieġ flimkien. Ġara li l-​funeral t’ommi kellu jsir l-​istess ġurnata tat-​tieġ. Bqajt imbellha meta ħabibti ġiet il-​funeral minflok ma marret it-​tieġ. Dak il-​ħin kont naf li hi kienet ħabiba taʼ veru!”—Lena.

Min fost il-​ħbieb tiegħek juri spirtu taʼ sagrifiċċju personali? Ħabib veru mhux se “jibqaʼ jfittex dak li jaqbel lilu, imma dak li jaqbel lil ħaddieħor.”—1 Korintin 10:24.

Hawn taħt ikteb l-​ismijiet taʼ tnejn minn sħabek li wrew li jagħmlu sagrifiċċji personali.

1 ․․․․․

2 ․․․․․

ĦABIB VERU JGĦINEK ISSIR PERSUNA AĦJAR

“Xi nies jippretendu li jien inkun leali lejhom jew li naqbel magħhom anke jekk dan ifisser li nagħmel kompromess bil-​valuri tiegħi jew li nagħmel xi ħaġa kontra l-​kuxjenza tiegħi. Dawn mhumiex ħbieb veri.”—Nadeine.

“Oħti hi l-​ikbar ħabiba tiegħi. Tgħinni nagħmel affarijiet li kieku nżomm lura milli nagħmilhom u tgħinni nkun iktar dħulija. Tgħidli l-​verità anke jekk din ma ddoqqx għal widnejja.”—Amy.

“Meta għaddejt minn perijodu iebes, il-​ħbieb tiegħi ma fissdunix; tawni pariri onesti. L-​oħrajn jew stennewni nsolvi l-​problema waħdi jew ipprovaw jaljenawni. Ma rrikonoxxewx li kien hemm problema.”—Miki.

“Il-​ħabiba tiegħi tara potenzjal li ħaddieħor ma jarax fija, u tinkuraġġini nwettaq il-​miri tiegħi. Tgħidhieli kif tħossha meta jkun hemm bżonn—u dan nieħu pjaċir ħafna bih!”—Elaine.

Jgħinuk ħbiebek tilħaq il-​potenzjal tiegħek, jew ikollok tagħlaq għajn waħda biex tingwalaha magħhom? Proverbji 13:20 jgħid: “Min qed jimxi maʼ l-​għorrief se jsir għaref, imma min qed jagħmilha maʼ l-​istupidi se jaħbatlu ħażin.”

Hawn taħt ikteb l-​ismijiet taʼ tnejn minn sħabek li għenuk issir persuna aħjar.

1 ․․․․․

2 ․․․․․

Ħares lejn l-​ismijiet li ktibt fit-​tliet sezzjonijiet t’hawn fuq. Jekk jidher isem xi ħadd fit-​tlieta li huma, dan hu ħabib veru! Mill-​banda l-​oħra, jekk sibtha bi tqila biex taħseb f’xi  ħadd li jilħaq il-​fatturi msemmijin, taqtax qalbek. Jistaʼ jkun li hemm ħbieb ġenwini potenzjali madwarek. Forsi sempliċement jieħu daqsxejn iktar żmien sa ma ssibhom. d Sadattant, agħmel l-​almu tiegħek li tkun ħabib tajjeb. “Jien dejjem nipprova nagħti sapport lil sħabi,” tgħid Elena, li għandha 20 sena. “Meta jkollhom bżonn qadja, noffri l-​għajnuna tiegħi. Meta jkollhom bżonn jitkellmu, nagħtihom widen. Meta jkollhom bżonn jibku, nappoġġahom.”

Forsi veru għandek mnejn ikollok ħafna ħbieb u dan hu aħjar milli tkun parti minn klikka. (2 Korintin 6:13) Imma ma tixtieqx ukoll ikollok ftit ħbieb veri li huma ‘mweldin għal meta jkun hemm in-​niket’? (Proverbji 17:17) Jean, taʼ 20 sena, tgħid: “Tajjeb li tkun taf ħafna nies, però jkun qisu jkollok gwardarobba mimlija ħwejjeġ li jidhru sbieħ fuq l-​ispallieri imma mhux kollha jiġuk. Dejjem tispiċċa tilbes l-​istess ftit affarijiet li taf li jixirqulek. U hekk tagħmel maʼ ħbieb tal-​qalb ukoll.”

Iktar artikli mis-​serje “Iż-​Żgħażagħ Jistaqsu” jistgħu jinstabu fil-​Websajt www.watchtower.org/ype

[Noti taʼ taħt]

[Kaxxa f’paġna 20]

AFFARIJIET LI JWASSLU GĦAL ĦBIBERIJA VERA

1. Immira għall-​kwalità, mhux il-​kwantità. “Sabiħ li tkun taf ħafna nies, imma anke fi grupp kbir ġeneralment tfittex lil dawk il-​ftit li tingwalaha magħhom l-​iktar.”—Karen.

2. Kun ħabib veru. “Jien nippretendi lealtà u fiduċja mingħand sħabi, allura nipprova nagħti dan lilhom.”—Evelyn.

3. Esprimi apprezzament. “Meta napprezza l-​ħbiberija taʼ xi ħadd, ngħidilhom b’kartolina jew b’xi rigal.”—Kellie.

[Kaxxa f’paġna 20]

GĦALA MA TISTAQSIX LILL-​ĠENITURI?

Meta kont tampari, x’esperjenzi taʼ ħbiberiji kellek? Qatt ġejt tradut minn xi ħabib? Jekk iva, x’tgħallimt mill-​esperjenza? Min wera li kien ħabib leali, u kif iltqajt miegħu?

[Kaxxa f’paġna 21]

PEDAMENT GĦAL ĦBIBERIJA

Ħbiberija tajba hi mibnija fuq pedament taʼ valuri komuni. Dan ifisser li l-​ħabib tiegħek jaqsam it-​twemmin spiritwali, morali, u etiku tiegħek.

Il-​fattur li jmiss, li jkollkom kwalitajiet li jaqblu, hu inqas importanti.

U spiss, interessi simili huma l-​inqas importanti. Wara kollox, tistaʼ tkun ħabib maʼ xi ħadd li l-​passatempi u t-​talenti tiegħu huma differenti minn tiegħek.

Twissija: Oqgħod attent minn ħbiberiji li huma bbażati fuq interessi simili biss. Jekk dan il-​ħabib ma jħaddanx l-​istess valuri tiegħek, ir-​relazzjoni aktarx tisfaxxa—jew agħar minn hekk, jistaʼ jdaħħlek fi problemi.

[Kaxxa/Stampi f’paġna 21]

DAK LI JGĦIDU DAWK TAMPAREK

“Jekk il-​livelli tiegħek huma għoljin wisq, mhux se jkollok ħbieb minħabba li tippretendi wisq minn oħrajn. Jekk il-​livelli tiegħek huma baxxi wisq, tikkuntenta ruħek b’min ikun—u dan mhuwiex tajjeb lanqas.”

“Xi nies fuq netwerks soċjali jidher li jimpurtahom iktar minn kemm għandhom ħbieb fil-​lista milli mir-​relazzjoni li għandhom maʼ dawk il-​ħbieb. Fejn tidħol il-​ħbiberija, il-​kwalità hija ħafna iktar importanti mill-​kwantità.”

“Meta persuna sseksek miegħi dwar il-​ħbieb l-​oħra tagħha, jien naf li hi jistaʼ jkun li qed tgħid l-​istess affarijiet dwari lilhom. Dan iġegħelni nħossni skomda. Ħabiba taʼ vera ma sseksikx.”

[Stampi]

Dominique

Lianne

Brieanne