FILWAQT li l-​għonja forsi jkollhom ċerti vantaġġi, il-​ġid hu barka mħallta, speċjalment fiż-​żminijiet perikolużi tagħna. (2 Timotju 3:1-​5) F’xi pajjiżi, in-​nies sinjuri, inkluż turisti li jidhru tat-​tajjeb, saru mira tal-​ħallelin u taʼ dawk li jaħtfu n-​nies biex jitolbu rahan.

F’pajjiż wieħed li qed jiżviluppa, rapport tal-​aħbarijiet stqarr: “Serq vjolenti, frodi, u ħtif taʼ nies jikkaġunaw mibegħda bejn is-​sinjuri u l-​foqra. Ir-​restoranti għandhom għassiesa armati; id-​djar tas-​sinjuri għandhom ħitan bil-​barbed wire, dwal qawwijin, kameras, u gwardji tas-​sigurtà.” Sitwazzjoni simili teżisti f’ħafna pajjiżi oħrajn.

Madankollu, il-​Bibbja tgħid, “il-​fqir ma jismaʼ qatt theddid.” Kif tistaʼ tibbenefika minn għerf prezzjuż bħal dan? Jekk toqgħod f’post magħruf għall-​kriminalità u l-​vjolenza jew jekk ikollok tivvjaġġa lejn xi post bħal dan, tiġbidx l-​attenzjoni lejk innifsek billi tagħti l-​impressjoni li int sinjur. Aħseb sew dwar x’tilbes u dak li ġġorr miegħek, speċjalment jekk l-​affarijiet li għandek jiġu nnotati. “Min hu prudenti jara l-​gwaj,” jgħid Proverbji 22:3, “imma dawk taʼ bla esperjenza jibqgħu sejrin u jkollhom iħallsu l-​piena.”

L-​għerf imniżżel fil-​Bibbja juri kemm il-​Ħallieq tagħna jieħu ħsiebna. Hu jrid li aħna nkunu protetti. Dan “l-​għerf hu protezzjoni,” jgħid Ekkleżjasti 7:12, għax “iżomm ħaj lil sidu.”