TĦOSSOK mifni b’sentimenti qawwijin—forsi niket, rabja, jew riżentiment? Jekk inhu hekk, forsi ma jkollokx biżżejjed ħin jew enerġija biex tagħmel dak li hu veru importanti għalik. X’tistaʼ tagħmel dwar dan? *

Is-Sultan David esperjenza ħafna emozzjonijiet differenti—inkluż l-ansjetà u n-niket. X’għenu jibqaʼ għaddej? David ħalla l-affarijiet f’idejn Alla. (1 Samwel 24:12, 15) Ukoll, kiteb dwar is-sentimenti tiegħu. U peress li kien raġel taʼ fidi, talab spiss. *

Kif issemma fl-ewwel artiklu, Gregory jbati b’marda taʼ ansjetà. “L-inkwiet żejjed li kelli kien sproporzjonat u bla kontroll,” jgħid hu. Gregory kif reġaʼ kiseb kontroll? “Biex nerġaʼ nkun bilanċjat,” jgħid hu, “aċċettajt l-għajnuna kollha mħabba taʼ marti u sħabi. Ukoll, kellimt tabib u tgħallimt iżjed dwar il-marda tiegħi. Wara li għamilt xi tibdil f’ħajti, bdejt inħoss li kelli kontroll fuq il-marda tiegħi, u mhux hi kienet qiegħda tikkontrolla lili. Għalkemm għadu jkolli attakki tal-ansjetà, issa naf x’jikkaġunahom, u naf kif nimmaniġġa l-marda tiegħi.”

Jekk sentimenti negattivi jikkontrollawlek ħajtek, ipprova dan li ġej:

• Ikteb dwar is-sentimenti tiegħek fi djarju.

• Esprimi s-sentimenti tiegħek maʼ qarib jew ħabib tal-qalb.

• Taċċettax awtomatikament li s-sentimenti negattivi tiegħek huma tajbin. Pereżempju, staqsi lilek innifsek, ‘Hemm provi li juru li l-ħarsa tiegħi lejja nnifsi hi waħda bilanċjata?’

• Tibqax tħossok ansjuż, mimli rabja jew riżentiment. Minflok, uża l-enerġija tiegħek għal xi ħaġa iżjed produttiva. *

L-iktar ħaġa importanti: Spiss, is-sentimenti negattivi ma jkunux ir-riżultat taċ-ċirkustanzi tagħna imma taʼ kif inqisuhom.