Ġesù qal: “Ġens iqum kontra ġens, u saltna kontra saltna; u jkun hemm terremoti kbar, u f’post wara l-​ieħor ikun hemm mard li jittieħed u nuqqas taʼ ikel.” (Luqa 21:10, 11) Bħas-​sinjali li jifformaw il-​marki tas-​swabaʼ, dawn il-​ġrajjiet kollha flimkien jifformaw sinjal ċar. U bħalma l-​marki tas-​swabaʼ jidentifikaw persuna, dawn il-​ġrajjiet li jseħħu fl-​istess żmien jidentifikaw li “s-​saltna t’Alla tkun qrib.” Seħħew ġrajjiet bħal dawn f’daqqa? U qed jiġru madwar id-​dinja kollha? Ikkunsidra l-​evidenza.

1. GWERER

Fl-​1914 qamet gwerra li qatt ma kien hawn bħalha qabel! Spiss, l-​istorjografi jirreferu għall-​1914 bħala s-​sena li ġabet bidla fl-​istorja. Dan għax f’dik is-​sena bdiet l-​ewwel gwerra li involviet id-​dinja kollha. F’din il-​gwerra bdew jintużaw għall-​ewwel darba fuq skala kbira t-​tankijiet, il-​bombi mitfugħin mill-​ajruplani, il-​machine guns, il-​gass velenuż, u armi oħra qattiela. Warajha kien hemm it-​Tieni Gwerra Dinjija, li fiha bdew jintużaw il-​bombi atomiċi. Il-​bniedem ilu jiġġieled fil-​gwerer f’post jew ieħor mill-​1914 ’l hawn, u dawn il-​gwerer qatlu miljuni taʼ nies.

2. TERREMOTI

Il-​Britannica Academic tgħid li kull sena jkun hemm xi 100 terremot li jkunu kbar biżżejjed biex jagħmlu “ħsara kbira.” U l-​United States Geological Survey jirrapporta li “skont rekords li ilhom jinżammu (minn madwar l-​1900), nistennew minn tal-​inqas 16-​il terremot kull sena.” Illum hemm metodi aħjar kif isiru jafu bit-​terremoti, u xi wħud jemmnu li hu għalhekk li jidher li hemm iżjed terremoti issa. Iżda l-​fatt hu li terremoti kbar madwar id-​dinja qed jikkaġunaw li iżjed nies minn qatt qabel isofru u saħansitra jmutu.

 3. NUQQAS TAʼ IKEL

In-​nuqqas taʼ ikel jinsab mifrux madwar id-​dinja minħabba l-​gwerer, korruzzjoni, problemi serji fl-​ekonomija, użu ħażin tal-​agrikultura, jew nuqqas taʼ ppjanar għal temp estrem. Il-​World Food Programme rrapporta fit-​“2018 Year in Review”: “Madwar id-​dinja, 821 miljun ruħ m’għandhomx biżżejjed x’jieklu u 124 miljun minnhom qed imutu bil-​ġuħ.” Il-​fatt li n-​nies m’għandhomx biżżejjed x’jieklu wassal biex iżjed minn 3 miljun tifel u tifla jmutu kull sena. Fl-​2011, dan kien il-​kaġun taʼ xi 45 fil-​mija tal-​imwiet kollha tat-​tfal madwar id-​dinja.

4. MARD U EPIDEMIJI

Pubblikazzjoni tal-​World Health Organisation tistqarr: “Is-​seklu 21 diġà ġie nnotat għal epidemiji serji. Mard antik, bħall-​kolera, il-​pesta, u d-​deni tas-​suffejra, reġaʼ qiegħed fostna, u tfaċċa mard ġdid, bħas-​SARS, epidemija tal-​influwenza, MERS, Ebola u Zika.” L-aħħar waħda kienet il-pandemija tal-COVID-19. Għalkemm ix-​xjenzjati u t-​tobba tgħallmu ħafna dwar il-​mard, għadhom ma sabux kura għall-​mard kollu.

5. XOGĦOL TAʼ PPRITKAR MADWAR ID-​DINJA

Ġesù semma parti oħra mis-​sinjal meta bassar: “Din l-​aħbar tajba tas-​saltna tiġi pridkata fl-​art abitata kollha bħala xiehda lill-​ġnus kollha; u mbagħad jiġi t-​tmiem.” (Mattew 24:14) Waqt li d-​dinja għaddejja minn problemi tal-​biżaʼ, ’il fuq minn 8 miljun ruħ min-​nazzjonijiet kollha qed ixandru l-​aħbar tajba tas-​Saltna t’Alla f’240 pajjiż u b’iktar minn 1,000 lingwa. Qatt qabel ma seħħet ħaġa bħal din fl-​istorja tal-​bniedem.

Il-​ġrajjiet li jifformaw is-​sinjal li ta Ġesù qegħdin iseħħu llum. Għala għandna nkunu interessati f’dan il-​fatt? Għax Ġesù qal: “Meta taraw dawn l-​affarijiet iseħħu, kunu afu li s-​saltna t’Alla tkun qrib.”—Luqa 21:31.

Meta neżaminaw is-​sinjal li ta Ġesù u l-​kalkulazzjonijiet ibbażati fuq il-​Bibbja, nifhmu li Alla waqqaf is-​Saltna tiegħu fis-​sema fis-​sena 1914. a F’dak iż-​żmien hu għamel lil Ibnu, Ġesù Kristu, Sultan. (Salm 2:2, 4, 6-​9) Dalwaqt is-​Saltna t’Alla se tmexxi d-​dinja u se tneħħi l-​gvernijiet l-​oħrajn kollha. Imbagħad, se tagħmel l-​art ġenna biex il-​bnedmin jgħixu fiha għal dejjem.

Dalwaqt, il-​kliem tat-​talba li Ġesù għallimna bħala eżempju se jitwettaq: “Ħa tiġi saltnatek. Ħa jkun li trid int, kif fis-​sema, ukoll fuq l-​art.” (Mattew 6:10) Imma s-​Saltna x’wettqet minn meta bdiet tmexxi fl-​1914? U għal xiex nistgħu nħarsu ’l quddiem meta s-​Saltna biss tmexxi lill-​bnedmin?