IN-​NIES

Il-​Bibbja tgħid: Alla ‘ma ħalaqhiex sempliċement għalxejn, imma għamilha biex tkun abitata.’ —ISAIJA 45:18.

L-​ART

Il-​Bibbja tgħid: “Ġenerazzjoni sejra, u ġenerazzjoni ġejja; imma l-​art tibqaʼ wieqfa għal dejjem.” —EKKLEŻJASTI 1:4.

DAN XI JFISSER? Il-​Bibbja turi li d-​dinja qatt mhu se tinqered u n-​nies dejjem se jibqgħu jgħixu fiha. Allura xi jfisser li se tispiċċa d-​dinja?

AĦSEB DWAR DAN: Il-​Bibbja tqabbel l-​aħħar tad-​dinja maʼ x’ġara fi żmien Noè. Dak iż-​żmien, id-​dinja kienet mimlija “bil-​vjolenza.” (Ġenesi 6:13) Imma Noè kien raġel tajjeb. Allura, Alla salva lil Noè u lill-​familja tiegħu, imma qered lin-​nies ħżiena fid-​dulluvju. Il-​Bibbja tgħid hekk dwar x’ġara fi żmien Noè: “Id-​dinja taʼ dak iż-​żmien inqerdet meta ġiet mgħarrqa bl-​ilma.” (2 Pietru 3:6) B’hekk spiċċat id-​dinja taʼ dak iż-​żmien. Imma xi nqered? Mhux id-​dinja, imma n-​nies ħżiena li kien hemm fiha. Allura, meta l-​Bibbja titkellem dwar l-​aħħar tad-​dinja, ma tkunx qed tgħid li l-​pjaneta se tinqered. Minflok, tgħid li se jispiċċaw in-​nies ħżiena u l-​mod taʼ ħajja li għamlu.

IL-​PROBLEMI U L-​ĦAŻEN

Il-​Bibbja tgħid: “Ftit ieħor biss, u l-​ħażin ma jkunx iktar; u int tħares bir-​reqqa fejn kien, u ma jkunx hemm. Imma l-​ġwejdin se jirtu l-​art, u bi sliem kotran jitgħaxxqu ferm.”—SALM 37:10, 11.

DAN XI JFISSER? Id-​dulluvju fi żmien Noè ma neħħiex il-​ħażen għalkollox. Wara d-​dulluvju, in-​nies ħżiena reġgħu għamlu l-​ħajja diffiċli għal kulħadd. Imma Alla dalwaqt se jneħħi l-​ħażen kollu. Se jiġri bħalma tgħid il-​Bibbja: “Il-​ħażin ma jkunx iktar.” Alla se juża s-​Saltna tiegħu biex ineħħi l-​ħażen kollu. Is-​Saltna t’Alla hi gvern fis-​sema li se tmexxi fuq in-​nies li jobdu lil Alla.

AĦSEB DWAR DAN: Il-​gvernijiet li hawn bħalissa, se jkunu lesti li jobdu s-​Saltna t’Alla? Il-​Bibbja turina li le. Huma se jieħdu deċiżjoni ħażina u jmorru kontra s-​Saltna t’Alla. (Salm 2:2) X’se jkun ir-​riżultat? Is-​Saltna t’Alla se tneħħi l-​gvernijiet kollha u “hi tibqaʼ wieqfa għal dejjem.” (Danjel 2:44) Għala hemm bżonn li jispiċċa l-​mod kif imexxu n-​nies?

Il-​Bibbja tgħid: “Triq il-​bniedem m’hijiex f’idejh. Lanqas min jimxi ma jistaʼ jidderieġi l-​passi tiegħu.”—ĠEREMIJA 10:23.

DAN XI JFISSER? Alla ma ħalaqx lin-​nies biex imexxu lilhom infushom. Huma ma jirnexxilhomx imexxu sew lil nies oħra u jsolvu l-​problemi li jkollhom.

AĦSEB DWAR DAN: Il-​Britannica Academic tgħid li l-​ebda gvern mhu kapaċi “jsolvi problemi bħal faqar, ġuħ, mard, diżastri naturali, gwerer u vjolenza.” Din tkompli: “Xi nies jaħsbu li l-​unika mod biex insolvu l-​problemi li għandna hu bi gvern wieħed fuq id-​dinja kollha.” Imma anki jekk il-​gvernijiet kollha jaqblu flimkien, huma xorta nies imperfetti li ma jistgħux isolvu l-​problemi kollha li semmejna. Is-​Saltna t’Alla biss għandha l-​qawwa biex issolvi l-​problemi kollha tad-​dinja għal dejjem.

Bħalma turina l-​Bibbja, in-​nies tajbin m’għandhomx għalfejn jibżgħu mill-​aħħar tad-​dinja. Dan għax l-​aħħar tad-​dinja jfisser it-​tmiem tal-​affarijiet ħżiena li hawn. Allura, aħna nħarsu bil-​quddiem għal meta Alla jġib dinja isbaħ u aħjar!

Dan meta se jiġri? L-​artiklu li jmiss fih it-​tweġiba tal-​Bibbja.