Koppji li jirrispettaw lil xulxin jimpurtahom minn xulxin anki meta ma jaqblux fuq xi ħaġa. “Huma jevitaw li jidħlu f’sitwazzjoni fejn ħadd minnhom ma jkun lest li jċedi,” jgħid il-​ktieb Ten Lessons to Transform Your Marriage. “Dawn jibqgħu jitkellmu maʼ xulxin fuq kwalunkwe nuqqas taʼ qbil li jistaʼ jkollhom. Huma jisimgħu b’rispett l-​opinjoni taʼ xulxin u jsibu kompromess li jkun tajjeb għat-​tnejn.”

PRINĊIPJU BIBLIKU: “L-​imħabba . . . ma tfittixx l-​interessi tagħha.”—1 Korintin 13:4, 5.

“Li nirrispetta lil marti jfisser li napprezzaha u ma rrid nagħmel xejn li jkisser lilha jew liż-​żwieġ tagħna.”—Micah.

Mingħajr rispett, il-​konversazzjonijiet bejn il-​koppji jibdew jinkludu kritika, sarkażmu, u saħansitra tmaqdir—kwalitajiet li skont ir-​riċerkaturi huma l-​ewwel sinjali li jistgħu jwasslu għad-​divorzju.

“Li tagħmel kummenti li jweġġgħu, insinwazzjonijiet, jew li tkun sarkastiku dwar il-​mara tiegħek se jwassal biex hi ma tibqax kunfidenti fiha nfisha, titlef il-​fiduċja tagħha fik, u jitkisser iż-​żwieġ.”—Brian.

EŻAMINA LILEK INNIFSEK

Agħmel ġimgħa nnota kif titkellem u taġixxi. Imbagħad saqsi lilek innifsek:

• ‘Kemm-​il darba kkritikajt lil żewġi jew lil marti, u kemm-​il darba tajtha kumpliment?’

• ‘B’mod speċifiku, fejn urejt rispett lejn żewġi jew marti?’

IDDISKUTU DAN BĦALA KOPPJA

• Liema azzjonijiet u kliem se jgħinu lil kull wieħed minna jħossu rispettat?

• Liema azzjonijiet u kliem iġiegħlu lil kull wieħed minna jħossu mhux rispettat?

SUĠĠERIMENTI

• Ikteb tliet modi li fihom tixtieq li tintwera rispett. Għid lir-​raġel jew il-​mara tiegħek tagħmel l-​istess. Imbagħad agħtu n-​noti tagħkom lil xulxin u aħdmu fuq li turu rispett fl-​affarijiet li semmejtu.

• Agħmel lista tal-​kwalitajiet li tammira fil-​persuna l-​oħra fiż-​żwieġ. Imbagħad għidilha kemm tapprezza dawn il-​kwalitajiet.

“Li nirrispetta lil żewġi jfisser li bl-​azzjonijiet tiegħi nuri li napprezzah u li rridu jkun ferħan. M’hemmx għalfejn dejjem ikunu affarijiet kbar; spiss affarijiet żgħar li ngħid jew nagħmel juru li għandi rispett ġenwin lejh.”—Megan.

Fl-​aħħar mill-​aħħar, mhijiex kwistjoni taʼ li int tqis lilek innifsek li qed turi rispett, imma li żewġek jew martek tħossha rispettata.

PRINĊIPJU BIBLIKU: “Ilbsu sentimenti profondi taʼ mogħdrija, u qalb tajba, umiltà, ħlewwa, u sabar fit-​tul.”—Kolossin 3:12.