IL-​FIDI għandha qawwa kbira. Pereżempju, għalkemm Satana jrid joqtolna spiritwalment, il-​fidi tgħinna ‘nitfu l-​vleġeġ tan-​nar kollha tal-​Ħażin.’ (Efes. 6:16) Bil-​fidi nistgħu nissaportu problemi li jidhru kbar daqs il-​muntanji. Ġesù qal lid-​dixxipli tiegħu: “Jekk ikollkom fidi mqar daqs żerriegħa tal-​mustarda, tgħidu lil din il-​muntanja, ‘Inqalaʼ minn hawn u mur hemm,’ u din tmur.” (Mt. 17:20) Peress li nafu li l-​fidi tistaʼ ssaħħaħ il-​ħbiberija tagħna maʼ Ġeħova, għandna naħsbu dwar dawn il-​mistoqsijiet: X’inhi l-​fidi? Il-​kundizzjoni taʼ qalbna kif teffettwa l-​fidi tagħna? Kif nistgħu nsaħħu l-​fidi tagħna? U f’min għandu jkollna fidi?—Rum. 4:3.

Il-​fidi hi iktar milli sempliċement nemmnu dak li tgħid il-​Bibbja, għax anke “d-​demonji jemmnu [li Alla jeżisti] u jirtogħdu.” (Ġak. 2:19) Allura, x’inhi l-​fidi?

Il-​Bibbja tiddeskrivi l-​fidi bħala li għandha żewġ aspetti. L-​ewwel, “il-​fidi hi l-​istennija garantita t’affarijiet li nittamaw għalihom.” (Ebr. 11:1a) Jekk għandek fidi, int temmen b’mod sod li kulma jgħid Ġeħova hu veru u se jseħħ. Pereżempju, Ġeħova qal lill-​Iżraelin li bħalma huma ma setgħux iwaqqfu x-​xemx milli titlaʼ, bl-​istess mod hu ma setax jikser il-​patt tiegħu maʼ David. (Ġer. 33:20, 21) Int qatt tibżaʼ li x-​xemx ma tibqax titlaʼ, u b’hekk ma jibqax ikun hawn lejl u nhar? Żgur li le. Jekk int ċert li x-​xemx se titlaʼ kuljum, għandek int tiddubita li l-​Ħallieq taʼ dawn l-​affarijiet se jwettaq il-​wegħdi tiegħu? Żgur li le!—Is. 55:10, 11; Mt. 5:18.

It-​tieni, il-​fidi hi “t-​turija evidenti taʼ realtajiet li ma jidhrux,” jew l-​evidenza konvinċenti t’affarijiet li ma jidhrux bl-​għajnejn u madankollu huma reali. (Ebr. 11:1b) B’liema mod? Ejja ngħidu li tifel jistaqsik, ‘Kif taf li l-​arja teżisti?’ Għalkemm qatt ma rajt l-​arja, int forsi ssemmilu affarijiet li juru li l-​arja teżisti, bħal li nieħdu n-​nifs, li naraw il-​weraq itiru bir-​riħ, u affarijiet oħra. Meta t-​tifel ikun konvint minn dan, hu jifhem li hu possibbli li jemmen f’xi ħaġa li ma jistax jara. B’mod simili, il-​fidi hi bbażata fuq evidenza li nistgħu naraw.—Rum. 1:20.

Peress li l-​fidi hi bbażata fuq l-​evidenza, biex persuna jkollha l-​fidi għandha l-​ewwel tikseb “għarfien eżatt dwar il-​verità.” (1 Tim. 2:4) Imma l-​għarfien mhux biżżejjed. L-​appostlu Pawlu kiteb: “Bil-​qalb wieħed jeżerċita l-​fidi.” (Rum. 10:10) Persuna m’għandhiex biss temmen il-​verità imma tapprezzaha wkoll. B’hekk biss se tkun motivata biex teżerċita l-​fidi, jiġifieri, li taġixxi fi qbil mal-​verità. (Ġak. 2:20) Persuna li ma tapprezzax mill-​qalb il-​verità forsi tirrifjuta saħansitra evidenza konvinċenti peress  li ma tkunx trid tbiddel it-​twemmin tagħha jew tkun trid tagħmel dak li tixtieq hi. (2 Pt. 3:3, 4; Ġuda 18) Kien għalhekk li fi żminijiet Bibliċi mhux kull min ra l-​mirakli żviluppa l-​fidi. (Num. 14:11; Ġw. 12:37) L-​ispirtu qaddis t’Alla jipproduċi l-​fidi f’dawk biss li verament iħobbu dak li hu veru.—Gal. 5:22; 2 Tess. 2:10, 11.

Is-​Sultan David hu fost dawk li kellhom fidi soda. (Ebr. 11:32, 33) Madankollu, mhux kull membru tal-​familja tiegħu kellu fidi bħal din. Pereżempju, darba minnhom ħuh il-​kbir Eljab, wera nuqqas taʼ fidi meta b’rabja qal li David kellu mottivi ħżiena għala kien qed jinkwieta dwar l-​isfida taʼ Gulija. (1 Sam. 17:26-​28) Ħadd ma jitwieled bil-​fidi; lanqas hemm xi ħadd li jiritha mingħand il-​ġenituri, allura l-​fidi taʼ David kienet riżultat tal-​ħbiberija tiegħu m’Alla.

F’​Salm 27, David juri kif żviluppa fidi soda bħal din. (Vers 1) David immedita fuq l-​esperjenzi tal-​passat li kellu u fuq kif Ġeħova tratta mal-​avversarji tiegħu. (Versi 2, 3) Hu verament apprezza l-​arranġament taʼ Ġeħova għall-​qima. (Vers 4) David qiem lil Alla flimkien maʼ qaddejja oħra fit-​tabernaklu. (Vers 6) B’ħeġġa fittex lil Ġeħova bit-​talb. (Versi 7, 8) Ukoll David ried ikun struwit fit-​triq t’Alla. (Vers 11) Tant kienet importanti l-​kwalità tal-​fidi għal David li staqsa: “Fejn kont inkun li kieku ma kellix fidi?”—Vers 13. (nwt)

Int jistaʼ jkollok fidi bħal taʼ David jekk timita l-​attitudni mentali u d-​drawwiet deskritti f’​Salm 27. Peress li l-​fidi hi bbażata fuq għarfien eżatt, iktar ma nistudjaw il-​Kelma t’Alla u pubblikazzjonijiet ibbażati fuqha, iktar se jkun faċli li jkollna din il-​kwalità li l-​ispirtu t’Alla se jgħinna niżviluppaw. (Salm 1:2, 3) Meta tistudja, ħu l-​ħin biex timmedita. Il-​meditazzjoni hi l-​ħamrija fejn jikber l-​apprezzament. Hekk kif l-​apprezzament tiegħek għal Ġeħova jikber, int se tkun trid teżerċita l-​fidi billi tqimu fil-​laqgħat tal-​kongregazzjoni u titkellem dwar it-​tama tiegħek m’oħrajn. (Ebr. 10:23-25) Ukoll, aħna nuru li għandna l-​fidi meta nkomplu ‘nitolbu bla ma naqtgħu qalbna.’ (Lq. 18:1-8) Għalhekk, ‘itlob bla waqfien’ lil Ġeħova, u kun żgur li hu ‘jimpurtah minnek.’ (1 Tess. 5:17; 1 Pt. 5:7) Il-​fidi tqanqalna nagħmlu dak li hu sew, u meta nagħmlu s-​sew, il-​fidi tagħna tissaħħaħ.—Ġak. 2:22.

Fil-​lejl taʼ qabel ma miet, Ġesù qal lid-​dixxipli tiegħu: “Eżerċitaw il-​fidi f’Alla, eżerċitaw il-​fidi fija wkoll.” (Ġw. 14:1) Allura  hemm bżonn neżerċitaw, jew ikollna, fidi mhux biss f’Ġeħova imma wkoll f’Ġesù. Kif jistaʼ jkollok fidi f’Ġesù? Ejja nikkunsidraw tliet modi.

L-​ewwel, qis il-​fidwa bħala rigal personali mingħand Alla għalik. L-​appostlu Pawlu qal li hu ‘jgħix bil-​fidi fl-​Iben t’Alla, li ħabbu u ta lilu nnifsu għalih.’ (Gal. 2:20) Jekk għandek fidi f’Ġesù, int temmen b’mod sod li l-​fidwa tistaʼ tgħinek, li hi l-​bażi għall-​maħfra taʼ dnubietek, li tagħtik it-​tama taʼ ħajja taʼ dejjem, u li hi l-​ikbar prova li Alla jħobbok. (Rum. 8:32, 38, 39; Efes. 1:7) Dan se jsaħħek biex tkompli trażżan sentimenti negattivi dwarek innifsek.—2 Tess. 2:16, 17.

It-​tieni, ersaq qrib taʼ Ġeħova bit-​talb. Dan huwa possibbli biss bis-​saħħa tas-​sagrifiċċju taʼ Ġesù. Permezz tal-​fidwa, aħna nistgħu nitolbu lil Ġeħova “bil-​libertà tal-​kelma . . . sabiex insibu ħniena u qalb tajba mhix mistħoqqa għall-​għajnuna f’waqtha.” (Ebr. 4:15, 16; 10:19-22) It-​talb isaħħaħ id-​determinazzjoni tagħna biex nirreżistu t-​tentazzjoni li nidinbu.—Lq. 22:40.

It-​tielet, obdi lil Ġesù. L-​appostlu Ġwanni kiteb: “Min jeżerċita l-​fidi fl-​Iben għandu l-​ħajja taʼ dejjem; min ma jobdix lill-​Iben ma jarax il-​ħajja, imma l-​korla t’Alla tibqaʼ fuqu.” (Ġw. 3:36) Innota li Ġwanni għamel kuntrast bejn li neżerċitaw il-​fidi u li nkunu diżubbidjenti. Għalhekk, int teżerċita fidi f’Ġesù meta tobdih. Int tobdi lil Ġesù billi timxi wara “l-​liġi tal-​Kristu,” li hi dak kollu li għallem u kmanda. (Gal. 6:2) Int tobdi wkoll lil Ġesù billi ssegwi d-​direzzjoni li jipprovdi permezz ‘tal-​ilsir leali u għaqli.’ (Mt. 24:45) Meta tobdi lil Ġesù, int se jkollok is-​saħħa tissaporti problemi li jidhru perikolużi u tal-​biżaʼ daqs maltempata.—Mt. 7:24, 25.

Darba, raġel għajjat u qal: “Jien għandi fidi! Għinni fejn neħtieġ il-​fidi!” (Mk. 9:24) Hu kellu xi ftit fidi, imma kien modest u rrikonoxxa li kellu bżonn iktar fidi. Bħalu, ilkoll kemm aħna ngħaddu minn sitwazzjonijiet fil-​ħajja fejn ikollna bżonn iktar fidi. U lkoll kemm aħna nistgħu nsaħħu l-​fidi tagħna issa. Kif rajna, aħna nsaħħu l-​fidi tagħna meta nistudjaw il-​Kelma t’Alla u nimmeditaw fuqha. Dan se jkabbar l-​apprezzament tagħna għal Ġeħova. Il-​fidi tagħna se tissaħħaħ ukoll meta flimkien maʼ ħutna nqimu lil Ġeħova, ngħidu lil oħrajn dwar it-​tama tagħna, u nkomplu nitolbu. Iktar minn hekk, meta nsaħħu l-​fidi tagħna, aħna nirċievu l-​ikbar rigal possibbli. Il-​Kelma t’Alla tħeġġiġna: ‘Maħbubin, inbnew fuq il-​fidi l-​iktar qaddisa tagħkom sabiex iżżommu ruħkom fl-​imħabba t’Alla.’—Ġuda 20, 21.