1-2. Ġeħova meta jaċċetta l-​qima tagħna?

 X’JIĠIK f’moħħok meta tismaʼ l-​kelma “qima”? Forsi timmaġina ħu li qabel jorqod jinżel għarkopptejh u jiftaħ qalbu maʼ Ġeħova permezz tat-​talb. Jew forsi familja li qed tieħu pjaċir tagħmel il-​qima bħala familja.

² It-​tnejn li huma qed jagħtu qima lil Ġeħova. Imma Ġeħova se jaċċetta l-​qima tagħhom? Jekk huma qed jippruvaw jagħmlu dak li jixtieq hu, iħobbuh, u jirrispettawh, iva se jaċċettaha. Aħna nħobbuh ħafna lil Ġeħova u nafu li hu jixraqlu l-​qima tagħna. Għalhekk, irridu nagħmlu dan bl-​aħjar mod.

3. X’se nikkunsidraw f’dan l-​artiklu?

³ F’dan l-​artiklu se nitgħallmu dwar liema qima Ġeħova aċċetta fi żminijiet Bibliċi u se nikkunsidraw tmien modi kif Ġeħova jridna nqimuh illum. Hekk kif nagħmlu dan, nistgħu naħsbu kif aħna personalment nistgħu ntejbu l-​qima tagħna lil Ġeħova biex intuh l-​aħjar. Se naraw ukoll għala meta nqimu lil Ġeħova b’mod tajjeb se nkunu ferħanin.

4. Il-​qaddejja li kienu jqimu lil Ġeħova qabel Ġesù ġie fuq l-​art, kif urew li kienu jirrispettawh u jħobbuh?

⁴ Irġiel leali bħal Abel, Noè, Abraham, u Ġob urew ir-​rispett u l-​imħabba tagħhom għal Ġeħova. Kif? Huma  obdewh, kellhom il-​fidi fih, u għamlu sagrifiċċji għalih. Il-​Bibbja ma tgħidilniex dak kollu li għamlu. Imma jidher ċar li huma għamlu l-​almu tagħhom biex jogħġbuh, u hu aċċetta l-​qima tagħhom. Iktar tard, permezz taʼ Mosè, Ġeħova ta l-​Liġi lill-​Iżraelin. Din il-​Liġi kien fiha ħafna regoli kif Ġeħova riedhom iqimuh.

5. Ġeħova kif irid li l-​Kristjani jqimuh?

⁵ Wara l-​mewt u l-​irxoxt taʼ Ġesù, Ġeħova ma stenniex li n-​nies jibqgħu jobdu l-​Liġi Mosajka. (Rum. 10:4) Il-​Kristjani ġew taħt liġi ġdida, “il-​liġi tal-​Kristu.” (Gal. 6:2) Huma setgħu jobdu din il-​“liġi” mhux billi jiftakruha bl-​amment u jobdu lista taʼ regoli, imma billi jimitaw l-​eżempju taʼ Ġesù u japplikaw it-​tagħlim tiegħu. Illum, il-​Kristjani wkoll jagħmlu l-​almu tagħhom biex isegwu lil Kristu ħalli jogħġbu lil Ġeħova u ‘jsibu serħan.’—Mt. 11:29.

6. Kif nistgħu nibbenefikaw minn dan l-​artiklu?

⁶ Hekk kif nikkunsidraw it-​tmien modi kif inqimu lil Ġeħova, staqsi lilek innifsek, ‘Xi progress għamilt f’din il-​ħaġa?ʼ Tistaʼ tistaqsi wkoll, ‘Nistaʼ ntejjeb il-​qima tiegħi biex nagħti lil Ġeħova l-​aħjar?’ Forsi int kuntent b’dak li qed tagħmel bħalissa, imma tajjeb li titlob lil Ġeħova biex jgħinek tara x’tistaʼ tagħmel aħjar.

7. Ġeħova kif iħossu meta jismaʼ t-​talb mill-​qalb tagħna?

⁷ Aħna nqimu lil Ġeħova meta nitolbuh. Il-​Bibbja tqabbel it-​talb tagħna mal-​inċens li kien jiġi preparat b’mod tajjeb biex jiġi offrut fit-​tabernaklu u iktar tard fit-​tempju. (Salm 141:2) Dan l-​inċens kien jagħmel riħa tfuħ li kienet togħġob lil Ġeħova. Bl-​istess mod, Ġeħova “jieħu pjaċir” bit-​talb mill-​qalb tagħna anke jekk nużaw kliem sempliċi ħafna. (Prov. 15:8; Dt. 33:10) Allura nistgħu nkunu ċerti li Ġeħova jieħu pjaċir meta aħna ngħidulu li nħobbuh u napprezzaw dak li jagħmel għalina. Hu jridna ngħidulu dak li jinkwetana, x’nixtiequ issa, u l-​affarijiet li nixtiequ fil-​futur. Qabel titkellem maʼ Ġeħova permezz tat-​talb, ikun tajjeb li taħseb ftit dwar dak li tkun se tgħidlu. Meta tagħmel hekk, se tkun qed toffri l-​aħjar “inċens” lil Missierek tas-​sema.

8. Liema opportunitajiet għandna biex infaħħru lil Alla?

⁸ Aħna nqimu lil Ġeħova meta nfaħħruh. (Salm 34:1) Aħna nfaħħru lil Ġeħova billi ngħidu lil oħrajn kemm inħobbuh u nammiraw il-​kwalitajiet sbieħ tiegħu u dak li ħalaq. Jekk nieħdu l-​ħin biex naħsbu dwar l-​affarijiet tajbin kollha li Ġeħova għamel għalina u napprezzawhom, se jkollna ħafna raġunijiet biex infaħħruh. Barra minn hekk, meta nippritkaw se jkollna l-​opportunità li “noffru dejjem sagrifiċċju taʼ tifħir lil Alla, jiġifieri, il-​frott tax-​xofftejn.” (Ebr. 13:15) Bħalma għandna naħsbu sew x’se ngħidu meta nitolbu lil Ġeħova, nagħmlu tajjeb li naħsbu sew x’se ngħidu qabel nippritkaw. Aħna nixtiequ nagħtuh l-​aħjar “sagrifiċċju taʼ tifħir” lil Ġeħova. Għalhekk, meta naqsmu l-​verità m’oħrajn, nitkellmu mill-​qalb.

9. X’barkiet ingawdu meta nattendu l-​laqgħat Kristjani? Agħti eżempju personali.

⁹ Aħna nqimu lil Ġeħova meta nattendu l-​laqgħat. Ġeħova kien qal lill-​poplu  t’Iżrael: “Tliet darbiet fis-​sena kull raġel minn fostkom għandu jidher quddiem Ġeħova Alla tiegħek fil-​post li jagħżel hu.” (Dt. 16:16) Huma kellhom iħallu d-​djar u l-​għelieqi tagħhom waħedhom, imma Ġeħova wegħedhom: “Ħadd ma jkun jixtieq artek meta titlaʼ biex tara wiċċ Ġeħova Alla tiegħek.” (Eżo. 34:24) Minħabba li l-​Iżraelin fdaw kompletament f’Ġeħova, huma attendew il-​festi kull sena. B’hekk ibbenefikaw b’ħafna modi. Pereżempju, huma tgħallmu iktar dwar il-​Liġi t’Alla, kellhom iċ-​ċans jaħsbu dwar l-​affarijiet li tahom Ġeħova, u gawdew il-​kumpanija taʼ xulxin. (Dt. 16:15) Aħna ngawdu barkiet simili meta nagħmlu dak li nistgħu biex nattendu l-​laqgħat Kristjani. Ukoll aħseb kemm Ġeħova ikun kuntent meta tipprepara biex fil-​qosor tagħmel kummenti sbieħ.

10. Il-​kant għala hu parti importanti mill-​qima tagħna?

¹⁰ Aħna nqimu lil Ġeħova meta nkantaw maʼ ħutna. (Salm 28:7) L-​Iżraelin kienu jqisu l-​kant bħala parti importanti mill-​qima tagħhom. Is-​Sultan David għażel 288 Levita biex ikantaw fit-​tempju. (1 Kron. 25:1, 6-​8) Illum, aħna nistgħu nuru li nħobbu lil Ġeħova billi nkantaw għanjiet taʼ tifħir. M’hemmx għalfejn inkunu kantanti tajbin biex nagħmlu dan. Aħseb ftit dwar dan: Meta nitkellmu “lkoll nitfixklu ħafna drabi,” imma dan ma jwaqqafnix milli nitkellmu fil-​kongregazzjoni u fil-​ministeru. (Ġak. 3:2) Bl-​istess mod, aħna xorta nistgħu nkantaw għanjiet taʼ tifħir lil Ġeħova anke jekk naħsbu li ma nkantawx tajjeb.

11. Kif jurina Salm 48:13, għala għandna nsibu l-​ħin fl-​iskeda tagħna biex nagħmlu l-​qima bħala familja?

¹¹ Aħna nqimu lil Ġeħova meta nistudjaw il-​Kelma tiegħu u ngħallmu lit-​tfal tagħna dwaru. Fis-​Sabat l-​Iżraelin ma kinux jaħdmu u kienu jużaw din il-​ġurnata biex isaħħu l-​ħbiberija tagħhom maʼ Ġeħova. (Eżo. 31:16, 17) Uħud leali fosthom għallmu lit-​tfal tagħhom dwar Ġeħova u l-​affarijiet tajbin li kien jagħtihom. Illum, irridu nsibu l-​ħin fl-​iskeda tagħna biex naqraw u nistudjaw il-​Kelma t’Alla. Din hija parti mill-​qima tagħna lil Ġeħova u dan se jgħinna biex nersqu eqreb lejh. (Salm 73:28) U meta nistudjaw flimkien bħala familja, nistgħu ngħinu lit-​tfal tagħna jkollhom ħbiberija mill-​qrib maʼ Missierna tas-​sema.—Aqra Salm 48:13.

12. X’nitgħallmu mill-​mod kif Ġeħova qies ix-​xogħol taʼ dawk li ħadmu biex jagħmlu l-​affarijiet tat-​tabernaklu?

¹² Aħna nqimu lil Ġeħova meta nibnu u nieħdu ħsieb il-​postijiet għall-​qima. Il-​Bibbja tgħid li x-​xogħol li sar biex għamlu t-​tabernaklu u l-​affarijiet taʼ ġo fih kien “xogħol qaddis.” (Eżo. 36:1, 4) Anke llum, Ġeħova jqis ix-​xogħol biex jinbnew is-​Swali tas-​Saltna u bini ieħor bħala parti mill-​qima tagħna. Xi aħwa jqattgħu ħafna ħin jagħmlu dawn l-​affarijiet. Aħna żgur li napprezzaw ix-​xogħol li jagħmlu dawn l-​aħwa biex jgħinu fix-​xogħol tas-​Saltna. Bla dubju, huma jieħdu sehem ukoll fix-​xogħol tal-​ippritkar. Xi wħud minnhom jaf ikunu jixtiequ jaqdu bħala pijunieri. L-​anzjani juru li jappoġġjaw ix-​xogħol tal-​kostruzzjoni billi jħallu lill-​aħwa li jaħdmu iebes jaqdu bħala  pijunieri jekk ikunu jikkwalifikaw. Sew jekk aħna kapaċi biex ngħinu fix-​xogħol tal-​kostruzzjoni u sew jekk le, ilkoll nistgħu nżommu l-​postijiet nodfa u f’kundizzjoni tajba.

13. Kif għandna nqisu d-​donazzjonijiet li nagħtu biex ngħinu fix-​xogħol tas-​Saltna?

¹³ Aħna nqimu lil Ġeħova meta ngħinu fix-​xogħol tas-​Saltna bid-​donazzjonijiet tagħna. Meta l-​Iżraelin kienu jattendu għall-​festi, huma kellhom jieħdu xi rigali għal Ġeħova magħhom. (Dt. 16:16) Huma kellhom jagħtu affarijiet skont iċ-​ċirkostanzi tagħhom. B’dan il-​mod, urew li kienu qed japprezzaw dak li Ġeħova kien qed jagħmel għalihom. Kif nistgħu nuru li nħobbu lil Ġeħova u li napprezzaw dak kollu li qed jagħmel għalina? Mod wieħed hu billi nagħtu donazzjonijiet biex nappoġġaw il-​kongregazzjoni u x-​xogħol taʼ madwar id-​dinja skont iċ-​ċirkostanzi tagħna. L-​appostlu Pawlu kiteb: “Jekk l-​ewwel ikun hemm ir-​rieda, din tkun speċjalment aċċettabbli skond dak li jkollu l-​individwu, mhux skond dak li ma jkollux.” (2 Kor. 8:4, 12) Ġeħova japprezza dak kollu li nistgħu nagħtu, anke jekk ikun ftit.—Mk. 12:42-​44; 2 Kor. 9:7.

14. Skont Proverbji 19:17, Ġeħova kif iqis l-​għajnuna li nagħtu lill-​aħwa?

¹⁴ Aħna nqimu lil Ġeħova meta ngħinu lill-​aħwa li jkollhom bżonn l-​għajnuna. Ġeħova wiegħed li kien se jippremja lill-​Iżraelin li għenu b’mod ġeneruż lill-​foqra. (Dt. 15:7, 10) Iva, kull darba li ngħinu ħu jew oħt li jkollha bżonn l-​għajnuna, Ġeħova jqisu bħala rigal għalih. (Aqra Proverbji 19:17.) Pereżempju, meta l-​Kristjani minn Filippi bagħtu rigal lil Pawlu, li kien fil-​ħabs, hu sejjaħlu “sagrifiċċju aċċettabbli li jogħġob lil Alla.” (Flp. 4:18) Aħseb dwar l-​aħwa fil-​kongregazzjoni tiegħek u staqsi lilek innifsek, ‘Hemm xi ħadd li nistaʼ ngħinu?’ Ġeħova jieħu pjaċir meta jarana nużaw il-​ħin, l-​enerġija, l-​abbiltà, u l-​affarijiet materjali li għandna biex ngħinu lil ħutna. Hu jqis dan bħala parti mill-​qima tagħna.—Ġak. 1:27.

15. Minkejja li jinvolvi l-​ħin u l-​isforz biex inqimu lil Ġeħova, għala mhux taʼ piż għalina?

¹⁵ Jinvolvi l-​ħin u rridu nagħmlu sforz biex inqimu lil Ġeħova kif jogħġob lilu. Imma dan mhux taʼ piż għalina. (1 Ġw. 5:3) Għala le? Aħna nqimu lil Ġeħova għax inħobbuh. Immaġina tifel żgħir li jixtieq jagħti xi ħaġa lil missieru. Forsi hu jagħmel sigħat ipinġi xi ħaġa għalih. It-​tifel ma jiddispjaċihx għall-​ħin li juża biex jagħmel din it-​tpinġija. Hu jħobbu lil missieru u kuntent li se jagħtih dan ir-​rigal. Bl-​istess mod, minħabba li aħna nħobbu lil Ġeħova, aħna nieħdu pjaċir nużaw il-​ħin u l-​enerġija tagħna biex inqimuh.

16. Skont Ebrej 6:10, Ġeħova kif iqis l-​isforzi li nagħmlu biex nogħġbuh?

¹⁶ Ġenituri li jħobbu lit-​tfal tagħhom jafu li t-​tfal ma jistgħux ituhom l-​istess rigal u li kapaċi jagħmlu affarijiet differenti. Bl-​istess mod, Missierna tas-​sema jaf dak li kull wieħed u waħda minna jistaʼ jagħmel. Forsi int tistaʼ tagħmel iktar minn dawk li taf u tħobb. Jew forsi ma tistax tagħmel daqs oħrajn minħabba l-​età, is-​saħħa, jew ir-​responsabbiltajiet tal-​familja. Taqtax qalbek. (Gal. 6:4)  Ġeħova mhux se jinsa dak li għamilt għalih. Sakemm int qed tagħmel l-​almu tiegħek b’intenzjoni tajba, Ġeħova se jkun kuntent bik. (Aqra Ebrej 6:10.) Hu jara dak li għandek f’qalbek. Ġeħova jridek tkun kuntent b’dak li tistaʼ tagħmel għalih.

17. (a) Jekk xi affarijiet mill-​qima tagħna nsibuhom diffiċli, x’nistgħu nagħmlu? (b) Kif ibbenefikajt minn waħda mill-​affarijiet li hemm fil-​kaxxa “ Żid il-​Ferħ Tiegħek”?

¹⁷ X’nistgħu nagħmlu jekk insibuha diffiċli biex nagħmlu xi affarijiet li għadna kif iddiskutejna, bħal li nistudjaw il-​Bibbja jew nippritkaw? Meta nagħmlu dawn l-​affarijiet taʼ spiss, x’aktarx li se nibdew nieħdu pjaċir nagħmluhom u nibbenefikaw iktar minnhom. Nistgħu nqabblu l-​qima tagħna maʼ xi eżerċizzju li nagħmlu jew xi strument tal-​mużika li nipprattikaw. Jekk nagħmlu dawn l-​affarijiet darba fill, żgur li mhux se nagħmlu progress fihom. Imma jekk nibdew nagħmluhom kuljum, x’se jiġri? Għall-​ewwel forsi nibdew nagħmluhom għal ftit minuti, imma mbagħad nidraw u nkunu nistgħu ntawlu l-​ħin. Meta naraw ir-​riżultat tajjeb tal-​isforzi li nagħmlu, x’aktarx li se nibdew nistennew il-​ħin jasal u se nieħdu iktar pjaċir nagħmluhom. Dan japplika wkoll għall-​qima tagħna.

18. X’inhi l-​iktar ħaġa importanti li nistgħu nagħmlu f’ħajjitna u x’jiġri jekk nagħmluha?

¹⁸ L-​iktar ħaġa importanti li nistgħu nagħmlu f’ħajjitna hi li nqimu lil Ġeħova. Meta nagħmlu dan, se nkunu ferħanin u se jkollna skop f’ħajjitna. Barra minn hekk, se jkollna t-​tama li nqimu lil Ġeħova għal dejjem. (Prov. 10:22) Anki bħalissa, Ġeħova jgħin lill-​qaddejja tiegħu meta jiffaċċjaw il-​problemi u għalhekk nħossuna fil-​paċi. (Is. 41:9, 10) Mela, għandna raġun inkunu ferħanin meta nqimu lil Missierna kollu mħabba li ‘jistħoqqlu jirċievi l-​glorja u l-​unur’ mingħand kulħadd.—Riv. 4:11.