IL-​MINISTERU tagħna huwa importanti u taʼ valur. Imma mhux lil kull min nippritkaw jifhem dan. Anki jekk in-​nies huma interessati f’dak li tgħid il-​Bibbja, mhux dejjem iħossu li hu neċessarju li jistudjaw il-​Kelma t’Alla magħna.

Ejja nieħdu lil Gavin bħala eżempju. Hu kien qed jattendi l-​laqgħat fis-​Sala tas-​Saltna, imma ma riedx studju tal-​Bibbja. Gavin jispjega li hu ftit li xejn kien jaf dwar il-​Bibbja u ma ried lil ħadd isir jaf b’dan. Kien jibżaʼ li jiġi mitlub jingħaqad maʼ reliġjon, u hu ma ried lil ħadd iqarraq bih. Int x’taħseb? Gavin kif setaʼ jiġi megħjun? Aħseb dwar l-​effett tajjeb li t-​tagħlim tal-​Bibbja jistaʼ jkollu fuq persuna. Ġeħova qal lill-​Iżraelin: “Dak li ngħid jien joqtor bħan-​nida, bħal irxiex fuq il-​ħaxix.” (Dewteronomju 31:19, 30; 32:2) Ejja nitgħallmu ftit dwar in-​nida u nqabbluha mal-​ministeru tagħna biex b’hekk inkunu nistgħu ngħinu b’mod effettiv lill-​“bnedmin taʼ kull xorta.”—1 Timotju 2:3, 4.

In-​nida hi ġentili. In-​nida tifforma bil-​mod il-​mod hekk kif l-​umdità fl-​arja tibda tinbidel fi qtar żgħir taʼ ilma. Il-​kliem taʼ Ġeħova kif “joqtor bħan-​nida”? Hu kellem lin-​nies tiegħu b’qalb tajba, b’mod ġentili, u b’mod li juri li jimpurtah minnhom. Aħna nimitaw lilu meta nuru rispett għal dak li jemmen ħaddieħor. Ninkuraġġuhom biex jirraġunaw magħhom infushom u jieħdu deċiżjonijiet għalihom infushom. Meta nuru interess persunali bħal dan, in-​nies ikunu iktar lesti jaċċettaw dak li ngħidulhom, u l-​ministeru tagħna jkun iktar effettiv.

In-​nida hi rifreskanti. Il-​ministeru tagħna jagħti serħan jew bħal speċi jirrifreska oħrajn meta naħsbu dwar modi differenti biex ngħinuhom jitgħallmu iktar dwar il-​verità. Ħu jismu Chris, li kien offra studju tal-​Bibbja lil Gavin, ma pprovax jisforzah jaċċetta bilfors. Minflok, hu prova jfittex modi differenti biex jgħin lil Gavin iħossu iktar komdu f’li jiddiskutu l-​Bibbja. Chris qal lil Gavin li hemm messaġġ importanti fil-​Bibbja u li jitgħallem dwar dan il-​messaġġ se jgħinu jifhem il-​laqgħat aħjar. Imbagħad, Chris spjegalu li l-​profezija tal-​Bibbja kkonvinċiet lilu personalment li l-​Bibbja hi taʼ min joqgħod fuqha. B’riżultat taʼ dan, huma kellhom ħafna diskussjonijiet dwar kif ċerti profeziji ġew imwettqin. Għal Gavin, dawn il-​konversazzjonijiet kienu rifreskanti, u fl-​aħħar hu aċċetta studju tal-​Bibbja.

In-​nida hi bżonjuża għall-​ħajja. Matul l-​istaġun sħun u xott fl-​Iżrael, għandu mnejn ma tagħmilx xita għal diversi xhur. Mingħajr in-​nida, il-​pjanti jinxfu u jmutu. Illum hawn nixfa spiritwali, sewwasew bħalma bassar Ġeħova. (Għamos 8:11) Hu wiegħed li l-​uħud midlukin se jkunu “bħal nida mingħand Ġeħova” hekk kif huma jippritkaw l-​aħbar tajba tas-​Saltna, appoġġjati min-​“nagħaġ oħrajn.” (Mikea 5:7; Ġwanni 10:16) Il-​messaġġ li nippritkaw huwa parti mill-​provvediment taʼ Ġeħova li jagħti l-​ħajja lil dawk li huma għatxana għall-​verità. Napprezzaw aħna dan il-​messaġġ?

In-​nida hi barka mingħand Ġeħova. (Dewteronomju 33:13) Il-​ministeru tagħna jistaʼ jkun barka, jew rigal, għal dawk li jwieġbu b’mod favorevoli. Studju tal-​Bibbja kien barka għal Gavin għax għenu jsib it-​tweġibiet għall-​mistoqsijiet kollha tiegħu. Hu malajr għamel progress, tgħammed, u issa jieħu pjaċir jaqsam l-​aħbar tajba tas-​Saltna flimkien maʼ martu Joyce.

Li nqabblu x-​xogħol tal-​ippritkar tagħna man-​nida jistaʼ wkoll jgħinna nifhmu li l-​isforzi personali tagħna fil-​ministeru huma taʼ valur. Il-​Malti jgħid: Bil-​qatra l-​qatra timtela l-​ġarra. Għaliex qed ngħidu hekk? Ftit qtar tan-​nida jgħin ftit, imma meta jkun hemm miljuni taʼ qtar tan-​nida, l-​art tixxarrab. B’mod simili, dak li nagħmlu fil-​ministeru jistaʼ jidher ftit f’għajnejna. Imma minħabba l-​isforzi li jsiru mill-​miljuni taʼ qaddejja taʼ Ġeħova f’daqqa, tingħata xhieda “lill-​ġnus kollha.” (Mattew 24:14) Il-​ministeru tagħna se jkun barka mingħand Ġeħova għal oħrajn? Iva, il-​messaġġ tagħna se jkun ġentili, rifreskanti, u bżonjuż għall-​ħajja, eżatt bħan-​nida!