1, 2. Għala jkun għaqli li tismaʼ mill-​Ħallieq tiegħek meta tkun qed tagħżel x’se tagħmel b’ħajtek? (Ara l-​ewwel stampi.)

JEKK int żagħżugħ jew żagħżugħa, probabbilment tingħata ħafna pariri dwar il-​futur tiegħek. L-​għalliema, il-​guidance teachers, jew oħrajn forsi jgħidulek li għandek bżonn edukazzjoni għolja jew karriera li se tgħinek tagħmel ħafna flus. Imma Ġeħova jagħtik parir differenti. Bla dubju, hu jridek tagħmel l-​aħjar li tistaʼ fl-​iskola, u b’hekk tkun tistaʼ taqlaʼ flus biżżejjed biex tgħix. (Kolossin 3:23) Imma hu jaf ukoll li meta tkun żagħżugħ, int għandek bżonn tieħu deċiżjonijiet importanti li se jeffettwaw il-​futur tiegħek. Għalhekk, hu jipprovdi prinċipji biex jiggwidak u jgħinek tgħix b’mod li jogħġob lilu f’dawn l-​aħħar jiem.—Mattew 24:14.

² Tinsiex, Ġeħova jaf kollox. Hu jaf x’se jiġri fil-​futur, u jaf eżatt kemm hu qrib it-​tmiem taʼ din is-​sistema. (Isaija 46:10; Mattew 24:3, 36) Ġeħova jaf ukoll lilek. Hu jaf x’se  jagħmlek ferħan u mdejjaq. Il-​pariri tan-​nies għandhom mnejn jinstemgħu tajbin, imma jekk mhumiex ibbażati fuq il-​Kelma t’Alla, mhumiex verament għaqlin.—Proverbji 19:21.

3, 4. Adam u Eva u t-​tfal tagħhom kif ġew effettwati meta semgħu minn parir ħażin?

³ Il-​pariri ħżiena ilhom jeżistu minn żmien żemżem. Satana kien l-​ewwel wieħed li ta parir ħażin lin-​nies. Hu qal lil Eva li hi u Adam kienu se jkunu iktar ferħanin jekk jiddeċiedu għalihom infushom kif jgħixu. (Ġenesi 3:1-​6) Imma Satana kien egoist! Hu ried li Adam u Eva, kif ukoll it-​tfal li kien se jkollhom, jobdu u jqimu lilu, u mhux lil Ġeħova. Imma Satana ma kien għamel xejn għalihom. Kien Ġeħova li tahom kulma kellhom. Hu tahom lil xulxin, il-​ġnien sabiħ fejn jgħixu, u ġisem perfett li setaʼ jibqaʼ għal dejjem.

⁴ B’dispjaċir, Adam u Eva m’obdewx lil Alla. Billi għamlu dan, qatgħu lilhom infushom mill-​Wieħed li kien tahom il-​ħajja. Ir-​riżultat kien diżastruż. Bħal fjuri li jinqatgħu minn maʼ pjanta, Adam u Eva bil-​mod xjaħu u mietu. Anki t-​tfal tagħhom batew, u dan jinkludi lilna lkoll. (Rumani 5:12) Il-​biċċa l-​kbira tan-​nies illum jinjoraw dak li jgħid Alla u jagħmlu biss dak li jridu. (Efesin 2:1-3) B’liema riżultat? Il-​Bibbja tgħid li “m’hemm ebda għerf” meta n-​nies jopponu lil Ġeħova.—Proverbji 21:30.

5. Ġeħova dwar xiex kien ċert, u kellu raġun?

⁵ Ġeħova kien ċert li kien se jkun hawn nies, inkluż ħafna żgħażagħ, li kienu se jkunu jridu jafuh u jaqduh. (Salm 103:17, 18; 110:3) Dawn iż-​żgħażagħ huma prezzjużi ħafna għal Ġeħova! Int wieħed minnhom? Mela żgur li qed tgawdi ħafna affarijiet tajbin mingħand Alla, u dan iżidlek il-​ferħ f’ħajtek. (Aqra Salm 103:5; Proverbji 10:22) Issa se niddiskutu erbgħa minn dawn l-​affarijiet. Dawn huma l-​ikel spiritwali, l-​aħjar tip taʼ ħbieb, miri taʼ ġid, u libertà vera.

6. Għala għandu jimpurtak dwar il-​bżonn spiritwali tiegħek, u Ġeħova xi pprovda biex jgħinek?

⁶ L-​annimali m’għandhomx il-​bżonn spiritwali, jiġifieri, huma ma jħossux il-​bżonn li jkunu jafu l-​Ħallieq tagħhom. Imma aħna differenti. (Mattew 4:4) Meta nisimgħu minn Alla, aħna niksbu l-​fehma, l-​għerf, u l-​ferħ. Ġesù qal: “Henjin dawk li huma konxji tal-​bżonn spiritwali tagħhom.” (Mattew 5:3) Alla jagħtina l-​Bibbja u juża “l-​ilsir leali u għaqli” biex jagħtina l-​pubblikazzjonijiet li jgħinuna nsaħħu l-​fidi tagħna. (Mattew 24:45) Aħna nsejħu dawn il-​pubblikazzjonijiet ikel spiritwali għax jagħtu n-​nutrimenti lill-​fidi tagħna u jsaħħu r-​relazzjoni tagħna maʼ Ġeħova. Aħna ngawdu varjetà kbira taʼ ikel spiritwali!—Isaija 65:13, 14.

7. L-​ikel spiritwali mingħand Alla kif jgħinek?

⁷ L-​ikel spiritwali jistaʼ jagħtik l-​għerf u l-​abbiltà biex taħseb b’mod ċar, u dawn jistgħu jipproteġuk b’ħafna modi. (Aqra Proverbji 2:10-14.) Pereżempju, dawn il-​kwalitajiet se jgħinuk  tagħraf il-​gideb, bħall-​gidba li m’hemmx Ħallieq jew il-​gidba li l-​flus u l-​affarijiet materjali se jagħmluk ferħan. Dawn il-​kwalitajiet se jgħinuk ukoll tevita xewqat jew drawwiet li jagħmlulek il-​ħsara. Għalhekk, agħmel dak kollu li tistaʼ biex issir għaref u taħseb b’mod ċar. Imbagħad se tara għalik innifsek li Ġeħova jħobbok u jrid l-​aħjar għalik.—Salm 34:8; Isaija 48:17, 18.

8. Għala għandek tersaq qrib Alla issa, u dan kif se jgħinek fil-​futur?

⁸ Dalwaqt, kull ħaġa fid-​dinja taʼ Satana se tiġi meqruda. Ġeħova biss se jkun jistaʼ jipproteġina u jipprovdilna l-​affarijiet li għandna bżonn, u dan jistaʼ jinkludi l-​ikla li jkun imiss. (Ħabakkuk 3:2, 12-19) Allura issa huwa ż-​żmien li tersaq qrib Ġeħova u ssaħħaħ il-​fiduċja tiegħek fih. (2 Pietru 2:9) Jekk tagħmel dan, imbagħad jiġri x’jiġri madwarek, int se tħossok bħalma ħassu David, li qal: “Qegħedt lil Ġeħova quddiemi l-​ħin kollu. Bih fuq leminti, m’iniex se nitħarrek.”—Salm 16:8.

9. (a) Bħalma naqraw f’​Ġwanni 6:44, x’jagħmel Ġeħova? (b) X’hemm speċjali meta tiltaqaʼ maʼ Xhieda oħra?

⁹ Meta tiltaqaʼ maʼ xi ħadd li mhux fil-​verità, kemm tkun taf dwaru verament? Forsi tkun taf x’jismu u kif jidher, imma probabbilment xejn iktar. Iżda dan ikun differenti meta tiltaqaʼ maʼ xi ħadd li hu fil-​verità. Int taf li hu jħobb lil Ġeħova. Taf li Ġeħova ra xi ħaġa tajba fih u ġibdu lejh biex ikun parti mill-​familja li tqimu. (Aqra Ġwanni 6:44.) Ikun minn fejn ikun jew trabba kif trabba, int tkun diġà taf ħafna dwaru, u hu jkun jaf ħafna dwarek!

10, 11. X’għandhom komuni n-​nies taʼ Ġeħova, u dan kif jeffettwak?

¹⁰ Hekk kif tiltaqaʼ maʼ Xhud ieħor, int taf li diġà għandkom l-​iktar affarijiet  importanti komuni bejnietkom. Int taf li anki jekk titkellmu lingwa differenti, intom titkellmu l-​istess “lingwa pura” tal-​verità. (Sofonija 3:9) Dan ifisser li t-​tnejn temmnu f’Alla, tgħixu bl-​istess livelli morali, u għandkom l-​istess tama għall-​futur. Dawn l-​affarijiet jgħinukom tafdaw lil xulxin u tibnu ħbiberija b’saħħitha li se tibqaʼ għal dejjem.

¹¹ Għalhekk, meta tqim lil Ġeħova, int tistaʼ tgħid li għandek l-​aqwa tip taʼ ħbieb. Int għandek ħbieb madwar id-​dinja kollha, anki jekk għadek ma ltqajtx magħhom! Tistaʼ taħseb f’xi ħadd li mhux Xhud taʼ Ġeħova u li jgawdi dan l-​istess rigal prezzjuż?

12. Liema miri taʼ ġid tistaʼ tagħmel?

¹² Aqra Ekkleżjasti 11:9, 10; 12:1. Għandek xi miri li qed tipprova tilħaq? Forsi għamilt mira li taqra l-​Bibbja kuljum jew li tagħti kummenti jew taħditiet aħjar fil-​laqgħat. Jew forsi qed tipprova tuża l-​Bibbja b’mod iktar effettiv fil-​ministeru. Kif tħossok meta tinnota li qed tagħmel progress jew oħrajn jinnotaw dan u jgħidulek? Int probabbilment tħossok ferħan, u hekk għandek tħossok! Għala? Għax int qed tagħmel dak li Ġeħova jridek tagħmel, bħalma għamel Ġesù.—Salm 40:8; Proverbji 27:11.

13. Li naqdu lil Alla għala huwa aħjar milli niffokaw fuq miri f’din id-​dinja?

¹³ Meta tiffoka fuq is-​servizz tiegħek lil Ġeħova, int tkun qed tagħmel xogħol li se jagħmlek ferħan u jagħtik skop f’ħajtek. Pawlu kiteb: “Ibqgħu sodi, titħarrkux, waqt li dejjem ikollkom ħafna x’tagħmlu fix-​xogħol tal-​Mulej, għax tafu li t-​taħbit tagħkom fil-​Mulej m’huwiex għalxejn.” (1 Korintin 15:58) Imma meta n-​nies jiffokaw fuq miri f’din id-​dinja, bħal li jagħmlu l-​flus jew li jsiru famużi, huma ma jkunux verament ferħanin. Anki jekk ikollhom suċċess, ħafna drabi jħossu nuqqas taʼ ferħ u sodisfazzjon. (Luqa 9:25) Nitgħallmu dan mill-​eżempju tas-​Sultan Salamun.—Rumani 15:4.

14. X’tistaʼ titgħallem mill-​esperiment taʼ Salamun?

¹⁴ Salamun, wieħed mill-​iktar irġiel sinjuri u taʼ qawwa li qatt għex, għamel esperiment. Hu qal lilu nnifsu: “Ħa nipprova nieħu gost, u ngawdi wkoll affarijiet tajbin.” (Ekkleżjasti 2:1-10) Għalhekk, Salamun bena djar lussużi, iddisinja ġonna mill-​isbaħ, u għamel dak kollu li xtaq. Kif ħassu wara? Ħassu sodisfatt u ferħan? Meta ħares lura lejn dak kollu li kien għamel, Salamun qal: “Ara, kollox kien frugħa.” Hu żied: “Ma kien hemm xejn taʼ vantaġġ.” (Ekkleżjasti 2:11) Se titgħallem int mill-​esperiment taʼ Salamun?

15. Għala għandek bżonn il-​fidi, u skont Salm 32:8 din kif se tgħinek?

¹⁵ Fil-​ħajja, xi nies jitgħallmu biss wara li jagħmlu l-​iżbalji u jbatu l-​konsegwenzi. Ġeħova ma jridx li dan jiġri lilek. Hu jrid li int tismaʼ minnu u tobdih. Dan jinvolvi l-​fidi, imma qatt mhu se jiddispjaċik għall-​għażliet li tagħmel f’ħajtek minħabba l-​fidi tiegħek.  U Ġeħova qatt mhu se jinsa ‘l-​imħabba li wrejt għal ismu.’ (Ebrej 6:10) Għalhekk, aħdem iebes biex tibni fidi b’saħħitha. Imbagħad int se tagħmel għażliet tajbin f’ħajtek u se tara għalik innifsek li Missierek tas-​sema jrid l-​aħjar għalik.—Aqra Salm 32:8.

16. Għala għandna napprezzaw il-​libertà u nużawha bil-​għaqal?

¹⁶ Pawlu kiteb: “Fejn hemm l-​ispirtu taʼ Ġeħova, hemm il-​libertà.” (2 Korintin 3:17) Ġeħova jħobbha l-​libertà, u hu ħalqek b’tali mod li int tkun tħobb il-​libertà wkoll. Imma hu jridek tuża l-​libertà tiegħek b’mod għaqli biex din tipproteġik. Forsi xi wħud tamparek jaraw il-​pornografija, jieħdu sehem fl-​immoralità sesswali, jirriskjaw ħajjithom f’xi sport estrem, jew jabbużaw mid-​droga jew l-​alkoħol. Għall-​bidu, dawn l-​affarijiet għandhom mnejn jidhru eċċitanti jew taʼ pjaċir, imma ħafna drabi jwasslu għal konsegwenzi koroh, bħal mard, vizzji, jew anki mewt. (Galatin 6:7, 8) Żgħażagħ li jieħdu sehem f’dawn l-​affarijiet forsi jaħsbu li huma liberi, imma mhumiex.—Titu 3:3.

17, 18. (a) L-​ubbidjenza lejn Alla kif tagħmilna verament liberi? (b) B’liema mod kienu Adam u Eva iktar liberi min-​nies illum?

¹⁷ Mill-​banda l-​oħra, l-​ubbidjenza lejn Ġeħova hi taʼ benefiċċju għalina. Din tajba għal saħħitna u tagħmilna verament liberi. (Salm 19:7-​11) U meta tuża l-​libertà tiegħek bil-​għaqal, jiġifieri, meta tagħżel li tobdi l-​liġijiet u l-​prinċipji perfetti t’Alla, int turi kemm lil Alla u kemm lill-​ġenituri tiegħek li int persuna responsabbli. Il-​ġenituri tiegħek probabbilment se jafdawk iktar u jagħtuk iktar libertà. U Ġeħova jwiegħed li dalwaqt se jagħti lill-​qaddejja leali kollha tiegħu libertà perfetta, li l-​Bibbja ssejħilha “l-​libertà glorjuża taʼ wlied Alla.”—Rumani 8:21.

¹⁸ Din hija t-​tip taʼ libertà li gawdew Adam u Eva. Fil-​ġnien tal-​Għeden, kien hemm biss ħaġa waħda li Alla qalilhom li ma jistgħux jagħmlu. Ma kellhomx jieklu mill-​frott taʼ siġra partikolari. (Ġenesi 2:9, 17) Taħseb li Alla kien inġust jew strett iżżejjed meta tahom din il-​liġi? Dażgur li le! Aħseb f’kemm liġijiet għamlu n-​nies u sforzaw lil oħrajn biex jobdu. Imma Ġeħova lil Adam u Eva liġi waħda biss tahom.

19. X’qed jgħallmuna Ġeħova u Ġesù li se jgħinna nsiru liberi?

¹⁹ Ġeħova hu għaref ħafna fil-​mod kif jittrattana. Minflok ma jagħtina ħafna liġijiet, hu bil-​paċenzja jgħallimna nobdu l-​liġi tal-​imħabba. Hu jgħallimna ngħixu fi qbil mal-​prinċipji tiegħu u nobogħdu dak li hu ħażin. (Rumani 12:9) Fil-​Prietka taʼ fuq il-​Muntanja, Ibnu, Ġesù, għenna nifhmu għala  n-​nies jagħmlu affarijiet ħżiena. (Mattew 5:27, 28) U fid-​dinja l-​ġdida, bħala s-​Sultan tas-​Saltna t’Alla, Ġesù se jibqaʼ jgħallimna nqisu t-​tajjeb u l-​ħażin bil-​mod kif iqishom hu. (Ebrej 1:9) Ġesù se jagħtina wkoll ġisem u moħħ perfett. Immaġina kif se nħossuna meta lanqas biss se jkollna xewqa li nagħmlu affarijiet ħżiena u m’aħniex se nbatu minħabba li aħna imperfetti. Imbagħad, fl-​aħħar se ngawdu “l-​libertà glorjuża” li Ġeħova jwegħedna.

20. (a) Ġeħova kif juża l-​libertà tiegħu? (b) Int kif tistaʼ timitah?

²⁰ Fid-​dinja l-​ġdida, il-​libertà tagħna xorta se jkollha l-​limiti. B’liema mod? Aħna dejjem se jkollna bżonn niġu mmotivati mill-​imħabba tagħna għal Alla u oħrajn. Meta nħallu l-​imħabba tiggwidana, aħna nkunu qed nimitaw lil Ġeħova. Għalkemm Ġeħova għandu l-​libertà assoluta, hu jagħżel li jħalli l-​imħabba tiggwidah f’kull ħaġa li jagħmel, inkluż il-​mod kif jittrattana. (1 Ġwanni 4:7, 8) Allura, jagħmel sens li aħna nistgħu nkunu tassew liberi meta nimitaw lil Alla biss.

21. (a) Kif ħassu David dwar Ġeħova? (b) X’se niddiskutu fl-​artiklu li jmiss?

²¹ Tapprezza int l-​affarijiet tajbin kollha li tak Ġeħova? Hu tak l-​ikel spiritwali, l-​aħjar tip taʼ ħbieb, miri taʼ ġid, it-​tama taʼ libertà perfetta fil-​futur, u ħafna rigali sbieħ oħra. (Salm 103:5) Aktarx tħossok bħal David meta f’​Salm 16:11 talab: “Int tgħarrafni t-​triq tal-​ħajja. B’wiċċek timlieni bil-​ferħ; fuq lemintek nitgħaxxaq għal dejjem.” Fl-​artiklu li jmiss, se niddiskutu veritajiet prezzjużi oħra minn Salm 16. Dawn se jgħinuk tara kif int jistaʼ jkollok l-​aqwa ħajja possibbli!