IMMAĠINAK qed tara film dwar xi ħadd famuż, forsi xi mużiċist li int tammira. Il-​film jibda b’xeni mit-​tfulija tiegħu, tarah qed jitgħallem idoqq u jipprattika fuq li jipprattika. Imbagħad tarah jagħmel kunċerti, jivvjaġġa f’ħafna pajjiżi, u jsir famuż mad-​dinja kollha. Imma hekk kif il-​film joqrob lejn tmiemu, tarah jixjieħ u mbagħad imut.

Dan il-​film hu storja vera taʼ xi ħadd reali li issa hu mejjet. Kemm jekk l-​individwu kien mużiċist, xjentist, atleta, jew xi ħadd famuż ieħor, l-​istorja bażikament kienet se tkun l-​istess. L-​individwu jistaʼ jkun li wettaq ħafna affarijiet, imma aħseb dwar kemm setaʼ wettaq iktar li kieku ma xjaħx u miet!

Kerha kemm hi kerha, din hi r-​realtà li hemm għalina lkoll. (Ekkleżjasti 9:5) Nipprovaw kemm nipprovaw, m’aħniex kapaċi neħilsu mill-​effetti tax-​xjuħija u l-​mewt. Apparti minn hekk, ħajjitna tistaʼ tispiċċa ħesrem b’xi aċċident jew b’xi marda kiefra. Bħalma hu deskritt fil-​Bibbja, aħna bħaċ-​ċpar taʼ filgħodu li “jidher għal ftit u mbagħad jgħib.”—Ġakbu 4:14.

Għal xi wħud, il-​ħajja tant tidher inċerta u bla skop li jirraġunaw, “ħa nieklu u nixorbu, għax għada mmutu.” (1 Korintin 15:32) Imma ma taqbilx li jekk tgħix b’dan il-​mod tkun qed taċċetta r-​realtà kerha tal-​mewt? Illum jew għada, u speċjalment meta tkun għaddej minn xi tbatija, int taf tistaqsi, ‘Din il-​ħajja biss hemm?’ Fejn tistaʼ ssib it-​tweġiba?

Ħafna llum iduru lejn ix-​xjenza. Il-​progress fix-​xjenza u fil-​mediċina għamluha possibbli li l-​bniedem jgħix iktar. U xi xjentisti qed jaħdmu biex itawlu l-​ħajja saħansitra iktar. Ikun xi jkun ir-​riżultat tal-​isforzi tagħhom, xorta nistaqsu: Għala nixjieħu u mmutu? Hemm tama li l-​mewt, l-​għadu tagħna, tiġi eliminata? L-​artikli li ġejjin se jikkunsidraw dawn is-​suġġetti u jwieġbu l-​mistoqsija, Din il-​ħajja biss hemm?