Proklamaturi tas-​Saltna Jirrapportaw

L-​APPOSTLU Pawlu kien raġel taʼ fidi straordinarja, u hu inkuraġġixxa lill-​kredenti sħabu biex huma wkoll jikkultivaw din il-​fidi. Hu qal: “Kull min jersaq lejn Alla jeħtieġlu jemmen li Alla jeżisti u li hu jagħti l-​ħlas xieraq lil dawk li jfittxuh.” (Lhud 11:6) Dawn l-​esperjenzi mill-​Możambik juru kif Jehovah jippremja fidi soda u jwieġeb talb sinċier.

• Waħda oħt armla mill-​provinċja taʼ Niassa, fit-​tramuntana tal-​pajjiż, kienet imħassba dwar kif hi u s-​sitt uliedha kien se jirnexxilhom jattendu għall-​Konvenzjoni Distrettwali “Il-​Mod taʼ Ħajja t’Alla.” L-​uniku sors taʼ qligħ tagħha kien li tbigħ xi oġġetti fis-​suq lokali, imma meta bdiet toqrob id-​data tal-​konvenzjoni, il-​flus li kellha kienu jservu biss biex tixtri biljetti tal-​ferrovija bla ritorn għaliha u għall-​familja tagħha. Madankollu, hi ddeċidiet li tpoġġi l-​fiduċja tagħha fil-​provvedimenti taʼ Jehovah u kompliet bil-​pjanijiet tagħha biex tkun preżenti għall-​konvenzjoni.

Hi telgħet fuq il-​ferrovija flimkien mas-​sitt uliedha. Waqt il-​vjaġġ il-​kunduttur talabha l-​biljetti. Billi nnota l-​beġġ tagħha, hu staqsieha x’tip taʼ identifikazzjoni din kienet. L-​oħt qaltlu li l-​beġġ kienet qed tidentifikaha bħala delegata għall-​konvenzjoni distrettwali tax-​Xhieda taʼ Jehovah. “Fejn se tkun din il-​konvenzjoni?” staqsieha l-​kunduttur. Wara li sar jaf li l-​konvenzjoni kienet se tkun fil-​provinċja viċina taʼ Nampula, madwar 300 kilometru ’l bogħod, b’sorpriża għaliha hu żammilha biss nofs il-​prezz normali tal-​biljetti! Imbagħad, bin-​nofs l-​ieħor tal-​prezz li kienet ħallset, taha l-​biljetti tar-​ritorn għaliha u għall-​familja tagħha. Kemm kienet ferħana talli poġġiet il-​fiduċja tagħha f’Jehovah!—Salm 121:​1, 2.

• Għal madwar 25 sena, mara reliġjuża ħafna kienet titlob lil Alla biex juriha l-​mod it-​tajjeb kif għandha tqimu. Il-​knisja li kienet tattendi kienet tħallat iċ-​ċerimonji reliġjużi mar-​ritwali tradizzjonali, u hi kienet tiddubita jekk din il-​forma taʼ qima kinitx togħġob lil Alla.

Hi tirrakkonta: “Jien dejjem bqajt niftakar fil-​kliem taʼ Ġesù mniżżel f’Mattew 7:7: ‘Itolbu, u jingħatalkom; fittxu, u ssibu; ħabbtu, u jiftħulkom.’ B’din l-​iskrittura f’moħħi, jien kont nitlob regolarment lil Alla biex imexxini lejn il-​verità. Darba waħda l-​kappillan tal-​knisja tagħna staqsa lil kulmin kien jaħdem fis-​suq lokali biex iġib miegħu ċertu ammont taʼ flus flimkien maʼ xi oġġetti milli kienu jbigħu sabiex ikun jistaʼ jberikhom. Jien din it-​talba qistha bħala xi ħaġa mhux skritturali, u għalhekk ma ħadt xejn miegħi. Meta l-​kappillan ra li ma ħadtlux ‘offerta,’ hu beda jinsultani quddiem il-​membri kollha tal-​knisja. Dak in-​nhar irrealizzajt li dan ma kienx il-​mod li bih Alla jixtieq li jiġi meqjum, u għalhekk tlaqt mill-​knisja. Sadanittant, jien bqajt nippersisti fit-​talb biex insib il-​verità.

“Fl-​aħħar, għamilt il-​kuraġġ u kkuntattjajt qarib li hu wieħed mix-​Xhieda taʼ Jehovah. Hu offrieli fuljett, u kif qrajtu mill-​ewwel irrealizzajt li Alla kien qed iwieġeb it-​talb tiegħi. Maż-​żmien, is-​sieħeb tiegħi wkoll beda japprezza l-​veritajiet Bibliċi, u llegalizzajna ż-​żwieġ tagħna. Madankollu, iktar tard żewġi marad sew. Imma sa mewtu, hu baqaʼ jinkuraġġini biex nippersevera fil-​mogħdija tal-​verità sabiex b’hekk inkunu nistgħu nerġgħu niltaqgħu fil-​Ġenna taʼ l-​art.

“Jien nibqaʼ grata għal dejjem lejn Jehovah talli wieġeb it-​talb tiegħi u talli wrieni l-​mod it-​tajjeb kif għandi nqimu. It-​talb tiegħi ġie mwieġeb ukoll billi rajt lit-​tmint itfal kollha tiegħi jsiru qaddejja dedikati taʼ Jehovah.”