IS-​SWALI tat-​tluq fl-​ajruporti internazzjonali taʼ Brisbane u Sydney, fl-​Awstralja, qatt ma raw daqshekk eċċitament! Grupp taʼ 46 persuna kien lest biex jitlaq bl-​ajru lejn il-​gżira xemxija taʼ Samoa. Hemmhekk kellhom jiltaqgħu maʼ 39 persuna oħra minn New Zealand, mill-​Ħawajj, u mill-​Istati Uniti. Il-​bagalji tagħhom kienu kemxejn strambi, għax kienu mimlijin għodod, bħal imrietel, srieraq, u trapani. Żgur li dawn m’humiex ix-​xorta t’affarijiet li wieħed normalment jieħu miegħu meta jmur għal btala f’xi gżira sabiħa tal-​Paċifiku! Imma l-​missjoni tagħhom kienet waħda mhux tas-​soltu.

Wara li ħallsu l-​passaġġ minn buthom, huma kienu se jqattgħu ġimagħtejn bħala volontieri bla ħlas fi programm taʼ bini. Dan il-​programm kien organizzat mill-​Uffiċċju taʼ l-​Inġinerija Reġjonali, fl-​uffiċċju tal-​fergħa taʼ l-​Awstralja tax-​Xhieda taʼ Jehovah. Il-​programm huwa ffinanzjat b’kontribuzzjonijiet volontarji. L-​għan tiegħu huwa li jinbnew Swali tas-​Saltna, Swali taʼ l-​Assembleat, djar missjunarji, u uffiċċji tal-​fergħa jew tat-​traduzzjoni fil-​gżejjer Paċifiċi. Dan il-​bini hu meħtieġ minħabba li l-​kongregazzjonijiet tax-​Xhieda taʼ Jehovah qegħdin jiffjorixxu ġmielhom f’dawn il-​gżejjer. Ejja niltaqgħu maʼ xi wħud minn dawn il-​ħaddiema, li anki f’pajjiżhom kienu jagħmlu parti mit-​timijiet li jieħdu ħsieb il-​bini tas-​Swali tas-​Saltna.

Max, li xogħlu huwa li jsaqqaf, ġej minn Cowra, fi New South Wales, l-​Awstralja. Hu miżżewweġ u għandu ħamest itfal. Arnold hu mill-​Ħawajj. Hu u martu għandhom żewġ subien, u hu jaqdi wkoll bħala pijunier, jew ministru full-time. Bħal Max, Arnold jaqdi bħala anzjan fil-​kongregazzjoni rispettiva tiegħu. Żgur li dawn l-​irġiel, bħall-​biċċa l-​kbira mill-​ħaddiema l-​oħrajn f’dan il-​programm, m’humiex volontieri għax għandhom il-​ħin x’jaħlu. Minflok, huma u l-​familji tagħhom jifhmu l-​bżonn, u jagħmlu dak kollu li jistgħu sabiex jgħinu.

Ħaddiema Multinazzjonali Jwettqu Xogħol Importanti

Post wieħed li kien jeħtieġ is-​snajjaʼ u l-​ħidma tagħhom kien Tuvalu, post imwarrab qrib l-​ekwatur u fil-​majjistral taʼ Samoa. Hemmhekk, imferrxin maʼ disaʼ gżejjer tal-​qroll hemm joqogħdu ma l-​10,500 ruħ. Id-​daqs taʼ kull gżira hu taʼ bejn wieħed u ieħor 2.5 kilometri kwadri. Sa l-​1994, il-​61 Xhud fil-​gżira kellhom bżonn urġenti taʼ Sala tas-​Saltna ġdida u uffiċċju tat-​traduzzjoni akbar.

 Il-​bini jrid jiġi ppjanat u mibni b’tali mod li jkun jiflaħ għall-​maltempati qliel u ċ-​ċikluni li spiss jaħkmu din il-​parti tropikali tal-​Paċifiku. Imma fil-​gżejjer m’huwiex faċli li ssib materjal taʼ kwalità tajba għall-​bini. X’kienet is-​soluzzjoni? L-​affarijiet kollha li kienu meħtiġin, minn materjal għas-​soqfa u pilastri sa għamara u purtieri, tojlits u viti taʼ l-​ilma, saħansitra skorfini u msiemer, intbagħtu bil-​baħar mill-​Awstralja bħala merkanzija.

Sakemm waslu l-​affarijiet, kien hemm grupp żgħir li pprepara l-​art minn qabel għall-​bini u għamel il-​pedament. Imbagħad ġew il-​ħaddiema internazzjonali biex jibnu, jiżbgħu u jlestu l-​bini bl-​għamara b’kollox.

Inċidentalment, din l-​attività kollha f’Tuvalu qanqlet il-​korla taʼ membru tal-​kleru tal-​lokal. Dan ħabbar minn fuq ir-​radju li x-​Xhieda kienu qed jibnu t-​“Torri taʼ Babel”! Imma x’ġara fil-​fatt? “Meta kien qed jinbena t-​Torri taʼ Babel Bibliku, in-​nies sabu li ma setgħux jifhmu iktar lil xulxin għaliex Alla kien ħawdilhom il-​lingwa. Għalhekk, huma kellhom jabbandunaw il-​proġett tagħhom u jħallu t-​torri nofs leħja,” jgħid Graeme, wieħed mill-​ħaddiema volontieri. (Ġenesi 11:​1-9) “Meta x-​xogħol isir għal Alla Jehovah jiġri eżatt l-​oppost. Minkejja d-​differenzi fil-​lingwa u l-​kultura, il-​proġetti dejjem jitlestew.” Hekk ġara f’dan il-​każ ukoll. Kulma dam biex tlesta kienu ġimagħtejn biss. Tabilħaqq, 163 persuna, fosthom il-​mara tal-​prim ministru, attendew għaċ-​ċerimonja tad-​dedikazzjoni.

Doug, li kien qed jieħu ħsieb il-​proġett, qal hekk waqt li rrifletta fuq din l-​esperjenza: “Ħadt tassew pjaċir naħdem maʼ volontieri minn pajjiżi oħrajn. Għandna modi differenti kif nagħmlu l-​affarijiet, kliem tekniku differenti, u saħansitra sistemi taʼ kejl differenti, u madankollu, ma kellna l-​ebda problema minħabba f’dan.” Issa, wara li ħa sehem f’numru taʼ proġetti bħal dawn, hu setaʼ jżid: “Dan isaħħaħli l-​konvinzjoni tiegħi li bl-​appoġġ taʼ Jehovah n-​nies tiegħu jistgħu jagħmlu xogħol taʼ kostruzzjoni fi kwalunkwe post f’din id-​dinja, tkun kemm tkun imwarrba jew diffiċli l-​art għall-​bini. Veru, għandna ħafna nies tas-​sengħa, imma huwa l-​ispirtu taʼ Jehovah li jagħmel kollox possibbli.”

L-​ispirtu t’Alla jqanqal ukoll lill-​familji tax-​Xhieda f’dawn il-​gżejjer biex jilqgħu lill-​volontieri f’darhom u jipprovdulhom l-​ikel. Għal xi wħud minnhom dan ifisser sagrifiċċji kbar, imma dawk li jirċievu ospitalità bħal din japprezzawha ferm. Ken, minn Melbourne, l-​Awstralja, kien ħadem fuq proġett bħal dan fil-​Polineżja Franċiża. Hu josserva: “Ġejna hawnhekk bħala qaddejja, imma ġejna trattati taʼ rejiet.” Fejn ikun possibbli, ix-​Xhieda lokali jgħinu wkoll fix-​xogħol tal-​bini. Fil-​Gżejjer Solomon, in-​nisa għaġnu l-​konkos b’idejhom stess. Xi mitt raġel u mara telgħu fuq il-​muntanji li kienu mxarrbin ħafna bix-​xita, u niżżlu iktar minn 40 tunnellata njam. Anki ż-​żgħażagħ taw daqqa t’id. Wieħed ħaddiem minn New Zealand jgħid: “Niftakar ħu żagħżugħ tal-​post li kien iġorr  minn żewġ sa tliet xkejjer siment f’daqqa. Hu kien jinpala ż-​żrar minn fil-​għodu sa fil-​għaxija, xemx u xita.”

Il-parteċipazzjoni tax-​Xhieda lokali fix-​xogħol iġġib benefiċċju ieħor. Il-​fergħa tal-​Watch Tower Society f’Samoa tirrapporta: “L-​aħwa li jgħixu fuq il-​gżira tgħallmu ħafna snajjaʼ differenti. Dawn jistgħu jużawhom meta jiġu biex jibnu s-​Swali tas-​Saltna kif ukoll meta jkollhom bżonn jagħmlu xi tiswijiet jew jibnu xi ħaġa mill-​ġdid wara xi ċiklun. Jistgħu jsibuhom utli wkoll biex jaqilgħu l-​għajxien tagħhom f’komunità fejn ħafna jsibuha diffiċli jaqilgħu x’jieklu.”

Il-​Programm taʼ Bini Jagħti Xiehda Tajba

Colin kien Honiara fejn ra s-​Sala taʼ l-​Assemblea tal-​Gżejjer Solomon tinbena. Mimli stagħġib hu kiteb dan il-​messaġġ lill-​uffiċċju tal-​fergħa lokali tal-​Watch Tower Society b’Ingliż imfarrak: “Kulħadd flimkien u ħadd ma jgerger, qishom familja waħda.” Ftit taż-​żmien wara, meta mar lura f’Aruligo, ir-​raħal fejn kien jgħix xi 40 kilometru ’l bogħod, hu u l-​familja tiegħu bnew is-​Sala tas-​Saltna tagħhom stess. Imbagħad huma bagħtu messaġġ ieħor lill-​uffiċċju: “Is-​Sala tas-​Saltna tagħna hija lesta bil-​podju b’kollox. Meta jistaʼ jibda jkollna l-​laqgħat hawnhekk?” Malajr saru l-​arranġamenti, u iktar minn 60 persuna qed jattendu regolarment.

Konsulent taʼ l-​Unjoni Ewropea ra l-​proġett f’Tuvalu, u lil wieħed mill-​ħaddiema qallu, “Naħseb li ma qed ngħidilkom xejn ġdid, imma għalija dan hu miraklu!” Waħda mara, li taħdem mal-​kumpanija tat-​telefon, staqsiet lil waħda mill-​volontieri: “Kif jirnexxilkom tkunu lkoll daqshekk ferħanin? Daqskemm hawn sħana!” Huma qatt ma kienu għadhom raw il-​Kristjanità fl-​azzjoni b’mod daqshekk prattiku u nieqes mill-​egoiżmu.

Sagrifiċċji Mingħajr Dispjaċir

“Min jiżraʼ ftit, jaħsad ftit; u min jiżraʼ ħafna, jaħsad ħafna,” tgħid il-​Bibbja fit-​2 Korintin 9:6. Il-​ħaddiema, il-​familji tagħhom, u l-​kongregazzjonijiet tagħhom qed ikomplu jiżirgħu b’mod ġeneruż billi jgħinu lix-​Xhieda sħabhom fil-​Paċifiku. “Il-​kongregazzjoni tiegħi ħallsitli terz mill-​passaġġ taʼ l-​ajru,” jgħid Ross, anzjan minn Kincumber, viċin Sydney. “U ħatni, li ġie wkoll, kompla żied $500 [Lm192].” Ħaddiem ieħor ħallas għall-​vjaġġ tiegħu billi biegħ il-​karozza li kellu. Jerġaʼ ieħor biegħ biċċa art. Kevin kellu bżonn taʼ $900 [Lm346] oħra. Għaldaqstant, iddeċieda li jbigħ is-​16-il ħamiema li kellu u li kienu ilhom għandu sentejn. Ħabib tiegħu sablu l-​bejgħ tagħhom u għalihom tawh Lm346 eżatt!

Danny u Cheryl ġew mistoqsijin jekk dan kollu kienx jiswa l-​passaġġi bl-​ajru u l-​flus li tilfu f’pagi, li bejn wieħed u ieħor ammontaw għal Lm2,308. Huma wieġbu: “Iva! Anki li kieku nfaqna d-​doppju, xorta waħda ma kien ikollna l-​ebda indiema.” Alan, minn Nelson, New Zealand, kompla: “B’dak li swieli biex immur Tuvalu, stajt mort l-​Ewropa u kien jibqagħli l-​flus. Imma kieku għamilt dan kien ikolli dawn il-​barkiet? Kont nagħmel tant ħbieb li ġejjin minn sfondi differenti? Jew kont nagħmel xi ħaġa għal ħaddieħor minflok għalija nnifsi? Le! Barra minn hekk, l-​aħwa fil-​gżira tawni bil-​wisq iżjed milli tajthom jien.”

Fattur importanti ieħor li jgħin biex il-programm ikun wieħed taʼ suċċess huwa l-​appoġġ li tagħti l-​familja. Xi nisa setgħu jmorru maʼ żwieġhom u saħansitra jkunu t’għajnuna fix-​xogħol. Iżda, xi nisa oħrajn iridu jieħdu ħsieb it-​tfal tagħhom li għadhom imorru l-​iskola, jew forsi għandhom xi negozju tal-​familja x’jieħdu ħsieb. “Is-​sagrifiċċju taʼ marti kien ferm akbar minn tiegħi, għax hi kienet lesta li tieħu ħsieb it-​tfal u d-​dar waqt li jien ma kontx hemm,” jgħid Clay. Bla dubju, l-​irġiel miżżewġin kollha li ma setgħux jieħdu lil marthom magħhom żgur li jaqblu mija fil-​mija maʼ dan!

Mindu tlesta l-​proġett f’Tuvalu, il-​ħaddiema volontieri bnew Swali tas-​Saltna, Swali taʼ l-​Assembleat, djar missjunarji, u uffiċċji tat-traduzzjoni fil-​Fiġi, f’Tonga, f’Papwa-Ginea Ġdida, f’New Caledonia, u f’postijiet oħrajn. Ħafna proġetti, inkluż xi wħud f’postijiet fix-​Xlokk taʼ l-​Asja, għadhom biss pjanijiet. Se jkun hemm biżżejjed ħaddiema?

Milli jidher din mhix se tkun problema. “Hawnhekk, kull min ħa sehem f’xi wieħed mill-​proġetti internazzjonali tal-​bini talab li nibagħtu għalih meta nkunu qed nippjanaw xi ieħor,” jirrapporta l-​uffiċċju tal-​fergħa tal-​Ħawajj. “Appena jmorru lura d-​dar, jibdew ifaddlu mill-​ġdid.” Kif jistaʼ l-​programm ma jkollux suċċess meta Jehovah jbierek tant bil-​kbir dedikazzjoni mhix egoista bħal din?

[Stampa f’paġna 9]

Materjal għall-​proġett

[Stampi f’paġna 9]

Il-​grupp taʼ ħaddiema fuq il-​post fejn se jsir il-​bini

[Stampi f’paġna 10]

Hekk kif intemmu l-​proġetti, fraħna b’dak li kien wettaq l-​ispirtu t’Alla