FIL-​ĦAJJA taʼ kuljum nagħmluha maʼ diversi personalitajiet. Dan taʼ spiss iġibilna ferħ u fehmiet ġodda. Iżda xi drabi, dan iqajjem ukoll nuqqas taʼ qbil, li kultant jistaʼ jkun serju u kultant jistaʼ ma jkun xejn ħlief daqsxejn t’argument żgħir fil-​ħajja tagħna taʼ kuljum. Ikun x’ikun, il-​mod kif naġixxu meta jkollna nuqqas taʼ qbil jistaʼ jeffettwana mentalment, emozzjonalment, u spiritwalment.

Meta nagħmlu kulma nistgħu sabiex insolvu nuqqas taʼ qbil b’mod xieraq se ngawdu ħajja aħjar u relazzjonijiet iktar paċifiċi m’oħrajn. Proverbju antik jgħid: “Ħajjet il-​ġisem hi l-​qalb il-​ħiemda.”—Qwiel 14:30, Saydon.

F’kuntrast qawwi maʼ dan għandna din il-​verità: “Bħal belt miftuħa u bla ħitan, hekk hu l-​bniedem li ma jitrażżanx.” (Proverbji 25:28) Min minna jixtieq ikun kontrollat minn ħafna ħsibijiet ħżiena? Dawn mhux biss iġagħluna naġixxu b’modi xejn xierqa, iżda fl-​aħħar mill-​aħħar jistgħu wkoll ikunu taʼ ħsara kemm għalina u kemm għal oħrajn. Tweġibiet mimlijin rabja u mhux kontrollati jistgħu jagħmlu eżatt hekk. Fil-​Priedka taʼ fuq il-​Muntanja, Ġesù ħeġġiġna neżaminaw l-​attitudni tagħna, li tistaʼ tinfluwenza l-​mod kif nittrattaw kwalunkwe nuqqas taʼ qbil li jistaʼ jkollna m’oħrajn. (Mattew 7:3-5) Minflok ma noqogħdu nikkritikaw lil ħaddieħor, irridu naħsbu dwar kif nistgħu niżviluppaw u nżommu ħbiberiji maʼ wħud li għandhom ħarsa u sfond differenti.

L-​Attitudni Tagħna

Sabiex insolvu xi nuqqas li nindunaw bih jew inkella jkun ġara veru, irridu nagħrfu li aħna suġġetti għal ħsibijiet u attitudnijiet ħżiena. Dan hu l-​ewwel pass. L-​Iskrittura tfakkarna li lkoll ‘nidinbu u niċċaħħdu mill-​glorja taʼ Alla.’ (Rumani 3:23) Iżjed minn hekk, l-​abbiltà tagħna li nagħrfu bejn it-​tajjeb u l-​ħażin tistaʼ tgħinna nifhmu li l-​problema mhux ġejja mill-​persuna l-​oħra. F’konnessjoni maʼ dan, ejja nikkunsidraw l-​esperjenza taʼ Ġona.

Fi qbil maʼ l-​istruzzjoni taʼ Jehovah, Ġona mar lejn il-​belt taʼ Ninwè biex jippriedka lin-​nies t’hemmhekk dwar il-​ġudizzju t’Alla li dalwaqt kien ġej fuqhom. Ir-​riżultat kien wieħed mill-​isbaħ, għax il-​belt kollha taʼ Ninwè nidmet u poġġiet fidi f’dak Alla veru. (Ġona 3:5-10) Jehovah ħass li l-​attitudni kollha ndiema tagħhom kien jixirqilha l-​maħfra, u għalhekk ħafrilhom. “Iżda dan xejn li xejn m’għoġbu lil Ġona, u inkorla.” (Ġona 4:1) It-tweġiba taʼ Ġona għall-​ħniena taʼ Jehovah tgħaġġibna. Ġona kellu għalfejn ikun irrabjat maʼ Jehovah? Mid-​dehra, Ġona kien moħħu fis-​sentimenti tiegħu stess, billi ħaseb li kien tilef l-​istima li l-​komunità kellha lejh. Hu naqas li japprezza l-​ħniena taʼ Jehovah. Bil-​ħlewwa, Jehovah ppermetta li Ġona jesperjenza lezzjoni li  għenitu jbiddel l-​attitudni tiegħu u jara l-​valur mill-​aqwa tal-​ħniena t’Alla. (Ġona 4:7-11) Jidher biċ-​ċar li kienet l-​attitudni taʼ Ġona li riedet tinbidel u mhux dik taʼ Jehovah.

Jistaʼ jkun li xi drabi aħna wkoll ikollna bżonn inbiddlu l-​attitudni tagħna stess lejn xi kwistjoni? L-​appostlu Pawlu jwissina: “Fittxu li tistmaw lil xulxin.” (Rumani 12:10) X’ried ifisser hawnhekk? F’dan l-​aspett, hu qed jinkuraġġina biex inkunu raġunevoli u nittrattaw lil Kristjani oħrajn b’rispett profond u b’dinjità. Dan jinkludi li nagħrfu li kull individwu għandu d-​dritt li jagħżel għalih innifsu. Pawlu jfakkarna wkoll: “Kull wieħed għandu t-​tagħbija tiegħu x’jerfaʼ.” (Galatin 6:5) Għaldaqstant, qabel ma n-​nuqqas taʼ qbil joħloq firda, kemm ikun għaqli li nikkunsidraw jekk l-​attitudni tagħna stess għandhiex bżonn tinbidel! Irridu naħdmu iebes sabiex nirriflettu l-​ħsieb taʼ Jehovah u nżommu l-​paċi m’oħrajn li tassew iħobbu lil Alla.—Isaija 55:8, 9.

Il-​Mod Kif Nittrattaw is-​Sitwazzjoni

Immaġina żewġt itfal żgħar jiġġieldu għall-​istess ġugarell. Kull wieħed minnhom jiġbdu lejh kemm jiflaħ sabiex jieħdu hu. Huma u jissaraw jistgħu jitlewmu bejniethom sakemm fl-​aħħar wieħed minnhom iċedi jew xi ħaddieħor iwaqqafhom.

Ir-rakkont tal-Ġenesi jgħidilna li Abraham semaʼ li kien hemm xi argument bejn ir-​rgħajja tiegħu u dawk taʼ neputih Lot. Abraham ħa l-​inizjattiva biex javviċina lil Lot u jgħidlu: “Ma għandux ikun hemm ġlied bejni u bejnek, u bejn ir-​rgħajja tiegħi u r-​rgħajja tiegħek, għax aħna aħwa.” Abraham kien determinat li ma jħalli l-​ebda konflitt iħassar ir-​relazzjoni tagħhom. Sa liema punt? Hu kien lest li jissagrifika d-​dritt li kellu, bħala l-​akbar fosthom, biex jagħżel l-​ewwel. Kien preparat li jċedi. Għalhekk, Abraham ħalla lil Lot jagħżel fejn xtaq jieħu lil dawk taʼ daru u l-​merħla tiegħu. Imbagħad, Lot għażel in-​naħa kollha rabaʼ saqwi taʼ Sodoma u Gomorra, u Abraham u Lot infirdu fil-​paċi.—Ġenesi 13:5-12.

Lesti aħna li naġixxu bil-​mod li aġixxa bih Abraham, sabiex inżommu relazzjonijiet paċifiċi m’oħrajn? Dan l-​episodju Bibliku jipprovdilna mudell eċċellenti li għandna nimitawh meta niġu biex nittrattaw xi nuqqas taʼ qbil. Abraham appella: “Ma għandux ikun hemm ġlied.” Ix-​xewqa ġenwina t’Abraham kienet li jaslu għal soluzzjoni paċifika. Żgur illi stedina bħal din biex inżommu l-​paċi tgħinna nwarrbu fil-​ġenb kwalunkwe nuqqas taʼ qbil. Imbagħad, Abraham ikkonkluda bl-​espressjoni “għax aħna aħwa.” Għala kellhom jissagrifikaw relazzjoni prezzjuża bħal din minħabba xi preferenza persunali jew kburija? Abraham żamm ċar f’moħħu x’kien l-​iktar importanti. Hu għamel dan b’rispett u b’unur lejh innifsu, u fl-​istess ħin onora lil neputih.

Filwaqt li jistgħu jqumu xi sitwazzjonijiet li jkun hemm bżonn li xi ħaddieħor jintervieni sabiex jissolva n-​nuqqas taʼ qbil, kemm ikun aħjar jekk kwistjoni tiġi solvuta privatament! Ġesù jinkuraġġina biex nieħdu l-​inizjattiva f’li nagħmlu paċi maʼ ħutna, u jekk ikun hemm bżonn nitolbu skuża. a (Mattew 5:​23, 24) Dan jirrikjedi l-​umiltà, imma Pietru kiteb: “Ilbsu l-​umiltà maʼ xulxin għax ‘Alla jeqfilhom lill-​kburin, imma lill-​umli jagħtihom il-​grazzja.’” (1 Pietru 5:5) Il-​mod kif nittrattaw m’adoraturi sħabna jeffettwa direttament ir-​relazzjoni tagħna m’Alla.—1 Ġwann 4:20.

Ġewwa l-​kongregazzjoni Kristjana, jistaʼ jkun  meħtieġ li ma niħdux raġun fuq xi ħaġa sabiex inżommu l-​paċi. Numru kbir minn dawk li issa qed jassoċjaw max-​Xhieda taʼ Jehovah ngħaqdu mal-​familja t’adoraturi veri t’Alla f’dawn l-​aħħar ħames snin. X’ferħ iġibilna dan! Żgur li l-​imġiba tagħna teffettwa kemm lilhom kif ukoll lil oħrajn fil-​kongregazzjoni. Din hija raġuni tajba għala għandna naħsbu bir-​reqqa meta niġu biex nagħżlu d-​divertiment, il-​passatempi, l-​attivitajiet soċjali, jew ix-​xogħol tagħna. Irridu nikkunsidraw kif ħaddieħor jistaʼ jħares lejna. Jistaʼ xi ħadd jitfixkel minħabba xi ħaġa li nkunu għamilna jew għax kliemna jinftiehem ħażin?

L-appostlu Pawlu jfakkarna: “Kollox hu sewwa, iżda mhux kollox jaqbel; kollox jiswa, iżda mhux kollox jedifika. Ħadd ma għandu jqis qjiesu biss, iżda qjies ħaddieħor.” (1 Korintin 10:23, 24) Bħala Kristjani, aħna interessati ġenwinament f’li nibnu l-​imħabba u l-​unità tal-​fratellanza Kristjana.—Salm 133:1; Ġwann 13:34, 35.

Kliem li Jsaħħaħ

Il-​kliem jistaʼ jkollu effett qawwi u tajjeb. “Il-​kliem ħelu bħal xehda għasel, hu ħlewwa tar-​ruħ u saħħa tal-​ġisem.” (Proverbji 16:24) Ir-​rakkont taʼ meta Gidgħon evita li jinqalaʼ konflitt man-​nies taʼ Efrajm juri kemm dan il-​proverbju hu minnu.

Gidgħon, li kien involut bil-​kbir fil-​battalja kontra l-Midjanin, talab lit-tribù taʼ Efrajm biex jgħinu. Madankollu, wara li spiċċat il-​battalja, in-​nies taʼ Efrajm marru u gergru bl-​herra maʼ Gidgħon talli ma sejħilhomx fil-​bidunett tal-​battalja. Ir-​rakkont jgħid li huma “tlewwmu miegħu bl-​aħrax.” Gidgħon weġibhom: “X’għamilt jien ħdejkom? M’hux aħjar għanqud żgħir taʼ Efrajm mill-​ġabra sħiħa taʼ Abigħeżer? F’idejkom reħa Alla l-​prinċpijiet taʼ Midjan, Għoreb u Żeb; xi stajt nagħmel jien aqwa milli għamiltu intom?” (Mħallfin 8:1-3) Billi għażel kliemu tajjeb u tkellem b’mod kalm, Gidgħon evita dik li setgħet kienet gwerra diżastruża bejn it-​tribujiet. Għandu mnejn li dawk tat-​tribù taʼ Efrajm kellhom il-​problemi tal-​kburija u taʼ li jagħtu importanza żejda lilhom infushom. Madankollu, dan ma żammx lura lil Gidgħon milli jagħmel ħiltu sabiex ikun hemm il-​paċi. Nistgħu aħna nagħmlu l-​istess?

Oħrajn jistgħu jimtlew bir-​rabja u joħolqu ċerta mibegħda lejna. Agħraf is-​sentimenti tagħhom, u aħdem biex tifhem il-​ħarsa tagħhom. Stajna, b’xi mod jew ieħor, konna aħna stess il-​kaġun tas-​sentimenti tagħhom? Jekk inhu hekk, għax ma nammettux li konna aħna li ħloqna d-​diffikultà u nuru li ddispjaċiena talli kabbarna l-​problema? Ftit kliem maħsub sew jistaʼ jerġaʼ jsaħħaħ relazzjoni mħassra. (Ġakbu 3:4) Xi wħud li huma diżappuntati forsi kulma jkunu jeħtieġu hu li nqawwulhom qalbhom. Il-​Bibbja tinnota li “jekk ma jkunx hemm ħatab, jintefa n-​nar.” (Proverbji 26:20) Iva, kliem magħżul bir-​reqqa li jintqal bi spirtu xieraq jistaʼ ‘jtaffi l-​korla’ u jiswa biex isaħħaħ.—Proverbji 15:1.

L-appostlu Pawlu jirrikkmanda: “Jekk jistaʼ jkun, sakemm ikun ġej minnkom, għixu fil-​paċi maʼ kulħadd.” (Rumani 12:18) Veru li ma nistgħux nikkontrollaw is-​sentimenti t’oħrajn, imma nistgħu nagħtu s-​sehem tagħna sabiex ikollna l-​paċi. Minflok ma nkunu suġġetti għar-​reazzjonijiet imperfetti tagħna stess jew għal dawk t’oħrajn, nistgħu naġixxu issa biex napplikaw il-​prinċipji sodi tal-​Bibbja. Meta f’nuqqas taʼ qbil naġixxu bil-​mod kif jgħallimna Jehovah, dan se jirriżulta f’li jkollna paċi u ferħ dejjiema.—Isaija 48:17.

[Nota taʼ taħt]

[Stampa f’paġna 24]

Ninsistu aħna biex dejjem tgħaddi tagħna?

[Stampa f’paġna 25]

Abraham ta eżempju mill-​aħjar meta ċeda sabiex isolvi nuqqas taʼ qbil