Ħadt gost taqra l-​ħarġiet reċenti taʼ It-​Torri taʼ l-​Għassa? Mela, ara jekk tistax twieġeb il-​mistoqsijiet li ġejjin:

• Għala nistgħu nkunu ċerti li t-​twettiq tal-​profezija dwar “smewwiet ġodda u art ġdida” f’Isaija 65:17-19 kien jinvolvi iktar mir-​ritorn tal-​Lhud mill-​jasar?

Għax l-​appostli Pietru u Ġwanni, li kitbu l-​ittri tagħhom fl-​ewwel seklu E.K., indikaw li kien se jkun hemm twettiq fil-​futur, li jinvolvi barkiet oħra li għad iridu jseħħu. (2 Pietru 3:13; Apokalissi 21:1-4)—4/15, paġni 10-​12.

• X’jistaʼ jkun hemm wara l-​leġġendi tal-​Greċja tal-​qedem dwar l-​uħud nofshom bnedmin u nofshom allat vjolenti?

Dan jistaʼ jkun tirqim u tgħawwiġ tal-​fatt li qabel id-​Dilluvju xi anġli ħadu iġsma umani u għexu ħajjiet vjolenti u immorali fuq l-​art. (Ġenesi 6:1, 2)—4/15, paġna 27.

• X’inhuma xi ftit mill-​perikli li għandhom joqogħdu attenti għalihom il-​Kristjani maturi waqt it-​tiġijiet?

Huwa importanti li jiġi evitat it-​tbahrid, li jistaʼ jinqalaʼ jekk ikun hemm abbundanza t’alkoħol u żfin bla kontroll b’mużika tgħajjat. Jekk ma jkunx intqal biċ-​ċar li kulħadd jistaʼ jattendi għar-​riċeviment tat-​tieġ, dawk li ma jkunux mistidnin m’għandhomx jattendu. L-​għarus għandu jkun ċert li jkun hemm xi Kristjani responsabbli biex jaraw li ċ-​ċelebrazzjoni tispiċċa f’ħin raġunevoli.—5/1, paġni 19-​22.

• X’irid ifisser meta Salm 128:3 jsemmi li l-​ulied huma bħal “xitel taż-​żebbuġ” madwar il-​mejda?

Taʼ spiss is-​siġra taż-​żebbuġ tarmi minn isfel. Meta z-​zokk prinċipali taʼ siġra qadima ma jibqax jagħmel ħafna frott, madwarha jitilgħu friegħi ġodda li jistgħu jsiru zkuk b’saħħithom. B’mod simili, il-​ġenituri jistgħu jifirħu meta jkollhom ulied li jagħmlu l-​frott billi jaqdu lil Jehovah flimkien magħhom.—5/15, paġna 27.

• X’inhuma xi benefiċċji li t-​tfal jiksbu minn ambjent bnin fil-​familja?

Dan iservi bħala pedament biex l-​ulied ikollhom ħarsa xierqa lejn l-​awtorità, apprezzament lejn il-​valuri xierqa, u relazzjonijiet ferriħin m’oħrajn. Ambjent bħal dan jistaʼ jgħinhom ukoll biex jiżviluppaw ħbiberija m’Alla.—6/1, paġna 18.

• X’kien sar f’pajjiż fil-​Lvant Imbiegħed sabiex il-​Kristjani jifhmu li kollha huma aħwa?

Il-​kongregazzjonijiet kollha ġew imħeġġin biex ma jużawx titli għal ċerti wħud. Minflok, kulħadd għandu jitqies l-​istess bħal aħwa.—6/15, paġni 21, 22.

• Ix-​Xhieda taʼ Jehovah jaċċettaw mediċini magħmulin mid-​demm?

Aħna nemmnu li l-​kmand Bibliku ‘tbegħdu mid-​demm’ jeskludi għalkollox it-​trasfużjonijiet taʼ demm sħiħ jew tal-​komponenti primarji tiegħu (plażma, ċelluli ħomor, ċelluli bojod, u platelets). (Atti 15:28, 29) Inkwantu għall-​elementi magħmulin mill-​komponenti primarji, kull Kristjan jiddeċiedi personalment, billi jżomm f’moħħu dak li tgħid il-​Bibbja u r-​relazzjoni li għandu m’Alla.—6/15, paġni 29-​31.

• Huwa verament possibbli li nsibu serħan illum?

Iva. Permezz tal-​Bibbja, Ġesù Kristu qed jiggwida lin-​nies lejn il-​qima pura u l-​paċi deskritta f’Isaija 32:18. Barra minn hekk, dawk li qed jiksbu paċi bħal din għandhom il-​prospett li jgawdu paċi għal dejjem fuq l-​art fit-​twettiq taʼ Salm 37:11, 29.—7/1, paġna 7.

• Liema rwol kellu George Young fl-​istorja teokratika moderna?

B’seħħ mill-​1917, hu ta prova li kien wieħed li jġorr id-​dawl taʼ l-​aħbar tajba tas-​Saltna f’ħafna pajjiżi. Il-​ministeru tiegħu ħadu lejn il-​Kanada, il-​gżejjer tal-​Karibew, il-​Brażil u pajjiżi oħrajn taʼ l-​Amerika t’Isfel, l-​Amerika Ċentrali, Spanja, il-​Portugall, dik li qabel kienet l-​Unjoni Sovjetika, u l-​Istati Uniti taʼ l-​Amerika.—7/1, paġni 22-​7.

• X’irid ifisser meta l-​1 Korintin 15:29 jgħid li xi wħud “huma mgħammdin għall-​mejtin?”

Il-​punt hu li meta l-​Kristjani jiġu midlukin bl-​ispirtu qaddis, huma jiġu mgħaddsin f’korsa taʼ ħajja li twassal għall-​mewt tagħhom u mbagħad l-​irxoxt għal ħajja fis-​sema.—7/15, paġna 17.

• X’kien qed jagħmel l-​appostlu Pawlu matul dawk li ġew deskritti s-​snin siktin tiegħu?

Forsi hu għen biex jiġu stabbiliti jew imsaħħin il-​kongregazzjonijiet tas-​Sirja u ċ-​Ċiliċja. Ħafna mit-​tbatijiet imsemmijin fit-​2 Korintin 11:23-27 żgur li seħħew matul dan il-​perijodu, u dawn juru li hu kien qed iwettaq ministeru attiv.—7/15, paġni 26, 27.

• X’jistaʼ jgħinna biex inkunu raġunevoli dwar dak li nistennew?

Ftakar li Jehovah jifhimna. It-​talb jistaʼ jgħinna nibbilanċjaw il-​ħsieb tagħna, u juri li aħna modesti. Għajnuna oħra hi li niksbu ħarsa ġdida billi niftħu qalbna maʼ xi ħabib matur.—8/1, paġni 29, 30.