“Il-​Barka tal-​Mulej Iġġib l-​Għana”

ILKOLL kemm aħna rridu li niġu mberkin. The American Heritage College Dictionary jgħid li l-​barkiet iġibu “l-​ferħ, l-​hena, jew ir-​riżq.” Peress li Jehovah hu d-​Donatur taʼ “kull ħaġa tajba li tingħata u kull don perfett,” kull barka vera u dejjiema ġejja mill-​Ħallieq kollu mħabba tagħna. (Ġakbu 1:17) Hu jferraʼ l-​barkiet fuq il-​bnedmin kollha, anki fuq dawk li ma jafuhx. Ġesù qal dwar Missieru: “Hu jtallaʼ x-​xemx tiegħu sew fuq il-​ħżiena u sew fuq it-​tajbin, u jniżżel ix-​xita sew fuq min hu tajjeb u sew fuq min m’huwiex.” (Mattew 5:45) Madankollu, Jehovah juri interess speċjali f’dawk li jħobbuh.—Dewteronomju 28:​1-14; Ġob 1:1; 42:12.

Is-salmista kiteb: “Ebda ġid ma jiċħad il-​Mulej lil min jimxi bis-​sewwa.” (Salm 84:12 [84:11, NW]) Iva, dawk li jaqdu lil Jehovah għandhom ħajja għanja mimlija skop. Huma jafu li “l-​barka tal-​Mulej iġġib l-​għana, u xejn ma jżid magħha t-​taħbit tagħna.” Il-​Bibbja tgħid ukoll: “Dawk li [Jehovah] ibierek jiksbu l-​art.” (Proverbji 10:22; Salm 37:22, 29) X’barka se tkun din!

Kif nistgħu nirċievu l-​barka taʼ Jehovah? L-​ewwelnett, għandna bżonn nikkultivaw kwalitajiet li jogħġbuh. (Dewteronomju 30:16, 19, 20; Mikea 6:8) Dan narawh fl-​eżempju taʼ tliet qaddejja taʼ Jehovah li kienu jgħixu ħafna żmien ilu.

Jehovah Ibierek lill-​Qaddejja Tiegħu

Noè spikka bħala qaddej taʼ Jehovah. F’Ġenesi 6:8 naqraw: “Noè sab ħniena quddiem il-​Mulej.” Għala? Għax Noè kien ubbidjenti. Ir-​rakkont jgħid: “Noè . . . kien jimxi sewwa maʼ Alla.” Noè segwa l-​prinċipji taʼ tjieba taʼ Jehovah u obda l-​kmandi tiegħu. Fi żmien meta d-​dinja kienet miżgħuda bil-​vjolenza u l-​korruzzjoni, Noè kien imqanqal biex ‘jagħmel kull ma ordnalu Alla.’ (Ġenesi 6:9, 22) Bħala riżultat, Jehovah urieh kif jibni “arka biex isalva l-​familja tiegħu.” (Lhud 11:7) B’dan il-​mod, Noè u l-​familja tiegħu—u permezz tagħhom ir-​razza umana—salvaw mill-​qerda taʼ dik il-​ġenerazzjoni. U Noè miet bit-​tama li jiġi rxoxtat bil-​prospett taʼ ħajja taʼ dejjem fuq art magħmula ġenna. X’barkiet għonja rċieva!

Abraham ukoll kellu kwalitajiet li kienu jogħġbu lil Jehovah. Fosthom, l-​iktar waħda li spikkat kienet il-​fidi. (Lhud 11:​8-​10) Abraham ħalla warajh il-​ħajja komda li kellu f’Ur u iktar tard f’Ħaran, minħabba li kellu fidi fil-​wegħda taʼ Jehovah li ż-​żerriegħa tiegħu kienet se titkattar u kienet se tkun taʼ barka għall-​ġnus kollha. (Ġenesi 12:​3, 4 [12:2, 3, NW]) Minkejja snin twal taʼ prova, il-​fidi tiegħu ġiet premjata meta twieled ibnu Iżakk. Permezz tiegħu, Abraham sar l-​antenat taʼ Iżrael, il-​ġens magħżul t’Alla, u eventwalment tal-​Messija. (Rumani 4:19-21) Iktar minn hekk, hu “l-​missier taʼ dawk kollha li jemmnu,” u beda jissejjaħ il-​“ħabib taʼ Alla.” (Rumani 4:11; Ġakbu 2:23; Galatin 3:7, 29) X’ħajja mimlija skop għex, u kemm ġie mbierek bil-​kbir!

 Ikkunsidra wkoll lir-​raġel leali Mosè. L-​iktar kwalità li spikkat milli kellu kienet l-​apprezzament lejn l-​affarijiet spiritwali. Mosè rrifjuta r-​rikkezzi kollha taʼ l-​Eġittu u “żamm iebes, daqs kemm kieku kien qiegħed jara lil Alla li ma jidhirx.” (Lhud 11:27) Wara 40 sena li qattaʼ f’Midjan, hu mar lura l-​Eġittu meta kien xiħ u ffaċċja b’kuraġġ lill-​akbar qawwa taʼ dak iż-​żmien, il-​Fargħun, sabiex jesiġi li jinħelsu ħutu. (Eżodu 7:1-7) Hu ra l-​għaxar kastigi, il-​frid tal-​Baħar l-​Aħmar, u l-​qerda taʼ l-​eżerċti tal-​Fargħun. Jehovah użah biex jagħti l-​Liġi lill-​Iżraelin u biex ikun il-​medjatur tal-​patt Tiegħu mal-​ġens il-​ġdid. Għal 40 sena, Mosè mexxa lill-​ġens taʼ Iżrael fix-​xagħri. Ħajtu kellha skop veru, u hu gawda barkiet taʼ servizz li kienu għonja u meraviljużi.

Il-​Barkiet taʼ Llum

Dawn ir-​rakkonti juruna li l-​ħajja taʼ dawk li jaqdu ’l Alla għandha skop veru. Meta l-​poplu taʼ Jehovah jiżviluppa kwalitajiet bħalma huma l-​ubbidjenza, il-​fidi, u l-​apprezzament lejn l-​affarijiet spiritwali jirċievi barkiet abbundanti.

Kif aħna mberkin? Sewwa, filwaqt li miljuni fil-​Kristjaneżmu qed ibatu minn ġuħ spiritwali, aħna jistaʼ jkollna “[wiċċna] jiddi minħabba t-​tjieba tal-​Mulej.” (Ġeremija 31:12) Permezz taʼ Ġesù u “l-​ilsir leali u diskret,” Jehovah  ipprovdielna provvista abbundanti taʼ ikel spiritwali li jgħinna nibqgħu fit-​“triq li tieħu għall-​ħajja.” (Mattew 7:13, 14; 24:45; Ġwann 17:3) Is-​sħubija mal-​fratellanza Kristjana tagħna hi barka kbira oħra. Fil-​laqgħat u f’okkażjonijiet oħrajn, li nkunu m’adoraturi sħabna li juru mħabba u jfittxu bil-​ħerqa li jilbsu “l-​bniedem il-​ġdid” iġibilna ferħ kbir. (Kolossin 3:8-10; Salm 133:1) Madankollu, l-​akbar barka li għandna hi l-​privileġġ prezzjuż taʼ relazzjoni persunali m’Alla Jehovah u li nsegwu l-​passi taʼ Ibnu, Kristu Ġesù.​—Rumani 5:​1, 8; Filippin 3:8.

Meta nimmeditaw fuq barkiet bħal dawn, nirrealizzaw kemm hu tassew prezzjuż is-​servizz tagħna lil Alla. Forsi tiġi quddiem għajnejna l-​parabbola taʼ Ġesù dwar negozjant li kien jivvjaġġa biex ifittex ġawhar mill-​ifjen. Ġesù qal dwar dan ir-​raġel: “Meta sab ġawhra tiswa ħafna, mar biegħ kull ma kellu u xtara lilha.” (Mattew 13:46) Żgur li hekk inħossuna dwar ir-​relazzjoni tagħna m’Alla, il-​privileġġ li naqduh, is-​sħubija Kristjana tagħna, it-​tama Kristjana tagħna, u l-​barkiet l-​oħrajn kollha li għandhom x’jaqsmu mal-​fidi tagħna. M’hemm xejn li hu iktar prezzjuż f’ħajjitna.

Agħti Lura lil Jehovah

Il-​fatt li nagħrfu lil Jehovah bħala d-​Donatur taʼ kull ħaġa tajba jqanqalna biex nuru apprezzament mill-​qalb għall-​barkiet li nirċievu. Kif nistgħu nagħmluh dan? Mod wieħed hu billi ngħinu lil oħrajn igawdu dawn l-​istess barkiet. (Mattew 28:19) F’iktar minn 230 pajjiż, ix-​Xhieda taʼ Jehovah qed jistinkaw biex iżuru lill-​ġirien tagħhom ħalli jagħmlu  preċiż dan. Waqt li jwettqu dan l-​inkarigu, huma jagħtu mir-​riżorsi limitati persunali tagħhom—il-​ħin, l-​enerġija, u l-​affarijiet materjali—sabiex jgħinu lil oħrajn “jaslu biex jagħrfu l-​verità.”—1 Timotju 2:4.

Ikkunsidra l-​pijunieri li joqogħdu fi Glendale, Kalifornja, l-​Istati Uniti taʼ l-​Amerika. Kull nhar taʼ Sibt fil-​għodu, jivvjaġġaw xi 100 kilometru ’l hemm u ’l hawn biex iżuru ħabs federali. Għalkemm ma jistgħux idumu iktar minn ftit sigħat mal-​priġunieri f’kull żjara, huma ma jaqtgħux qalbhom. Waħda minnhom tgħid: “Kemm huwa premjanti li taqdi f’dan it-​territorju uniku! Dan qed nagħmluh b’ferħ kbir. Tant sibna interess li diffiċli biex illaħħqu miegħu. Bħalissa qed nistudjaw maʼ ħames persuni, u erbgħa oħra talbuna studju tal-​Bibbja.”

Ministri Kristjani li huma żelużi jinsabu ferħanin li jistgħu joffru s-​servizzi tagħhom bla ħlas sabiex iwettqu dan ix-​xogħol li jsalva l-​ħajjiet. Huma jirriflettu l-​attitudni taʼ Ġesù, li qal: “B’xejn ħadtu, b’xejn agħtu.” (Mattew 10:8) Miljuni madwar id-​dinja qed jagħtu sehemhom f’servizz bħal dan mingħajr egoiżmu, u bħala riżultat, folol taʼ wħud taʼ qalb onesta qed iwieġbu u jsiru dixxipli. F’dawn l-​aħħar ħames snin biss, kważi 1.7 miljun ruħ iddedikaw ħajjithom lil Jehovah. Li tieħu ħsieb il-​bżonnijiet taʼ dan it-​tkabbir kontinwu jirrikjedi stampar taʼ Bibbji u pubblikazzjonijiet ibbażati fuq il-​Bibbja kif ukoll bini taʼ Swali tas-​Saltna ġodda u postijiet oħrajn fejn isiru l-​laqgħat. Minfejn jiġu l-​flus biex jiġu provduti dawn il-​bżonnijiet kollha? Kollha minn donazzjonijiet volontarji.

F’xi partijiet tad-​dinja, minħabba l-​qagħda ekonomika fqira, ħafna jissieltu sabiex jipprovdu l-​bżonnijiet li huma essenzjali għall-​ħajja tal-​familji tagħhom. Skond ir-​rivista New Scientist, biljun persuna tonfoq minn taʼ l-​inqas 70 fil-​mija mill-​paga għall-​ikel. Ħafna minn ħutna Kristjani jinsabu f’din is-​sitwazzjoni. Mingħajr l-​għajnuna t’adoraturi sħabhom, huma sempliċement ma jkunux jistgħu jaffordjaw affarijiet bħalma huma l-​pubblikazzjonijiet Kristjani jew Swali tas-​Saltna addattati.

Ovvjament, dan ma jfissirx li huma jinsabu kuntenti għax oħrajn qed iġorru t-​tagħbija għalihom. Iżda għandhom bżonn l-​għajnuna. Mosè, meta kien qed iħeġġeġ lill-​Iżraelin biex jagħmlu kontribuzzjonijiet materjali bħala turija taʼ gratitudni lejn Jehovah għall-​barkiet li kellhom, qal: “Kulħadd jagħti kemm jistaʼ skond il-​barka li jkun tak il-​Mulej, Alla tiegħek.” (Dewteronomju 16:17) B’hekk, meta Ġesù ra armla “titfaʼ biċċtejn żgħar tal-​flus” fit-​tempju, faħħarha mad-​dixxipli tiegħu. Għamlet dak kollu li setgħet. (Luqa 21:2, 3) Bl-​istess mod, il-​Kristjani f’kundizzjonijiet taʼ faqar jagħmlu dak kollu li jistgħu. U jekk ikun hemm in-​nieqes, jitpatta permezz tal-​kontribuzzjonijiet minn Kristjani sħabhom li m’humiex daqshekk fqar materjalment.—2 Korintin 8:​13-​15.

Meta nagħtu lura lil Alla b’modi bħal dawn, huwa importanti li jkollna motivazzjoni xierqa. (2 Korintin 8:12) Pawlu qal: “Kull wieħed għandu jagħti skond ma jidhirlu hu minn rajh, mhux fuq il-​qalb jew bilfors; għax Alla jħobb lil min jagħti bil-​ferħ.” (2 Korintin 9:7) Meta nagħtu b’xejn mill-​qalb, inkunu qed nappoġġaw it-​tkabbir teokratiku li qed isir bħalissa u nżidu l-​ferħ tagħna stess.—Atti 20:35.

Li nagħtu sehemna fix-​xogħol taʼ l-​ippridkar u nagħmlu kontribuzzjonijiet volontarji huma żewġ modi kif nistgħu nagħtu lura lil Jehovah għall-​barkiet li tana. U kemm hu inkuraġġanti li nafu li Jehovah jixtieq jitfaʼ l-​barka tiegħu fuq ħafna iktar uħud sinċieri li bħalissa forsi għadhom ma jafuhx! (2 Pietru 3:9) Għalhekk, ejja nkomplu nużaw ir-​riżorsi tagħna fis-​servizz t’Alla biex insibu lil dawk taʼ qalb onesta u ngħinuhom jiżviluppaw kwalitajiet bħalma huma l-​ubbidjenza, il-​fidi, u l-​apprezzament. B’dan il-​mod, se jkollna l-​ferħ taʼ li ngħinuhom ‘jipprovaw u jaraw kemm hu tajjeb il-​Mulej.’—Salm 34:9 (34:8, NW).

[Kaxxa f’paġna 28, 29]

Modi Kif Xi Wħud Jagħżlu li Jagħtu

KONTRIBUZZJONIJIET GĦAX-​XOGĦOL MAD-​DINJA KOLLHA

Ħafna jwarrbu, jew ifaddlu, ammont li jitfgħuh fil-​kaxxi tal-​kontribuzzjoni li fuqhom ikun hemm miktub: “Kontribuzzjonijiet għax-​Xogħol mad-​Dinja Kollha—Mattew 24:14.”

Kull xahar il-​kongregazzjonijiet jibagħtu dawn l-​ammonti jew lill-​kwartieri ġenerali tax-​Xhieda taʼ Jehovah fi Brooklyn, New York, jew lill-​uffiċċju tal-​fergħa lokali. Donazzjonijiet volontarji taʼ flus jistgħu jintbagħtu wkoll direttament lill-​Uffiċċju tat-​Teżorier, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, jew lill-​uffiċċju tas-​Soċjetà li jservi f’pajjiżek. Ġojjelli jew affarijiet prezzjużi oħrajn jistgħu jingħataw bħala donazzjoni wkoll. Maʼ dawn il-​kontribuzzjonijiet għandha tintbagħat ittra qasira li tistqarr li din hija għotja għalkollox.

ARRANĠAMENT TAʼ DONAZZJONI KUNDIZZJONALI

Il-​flus jistgħu jingħataw bħala donazzjoni b’arranġament speċjali li bih id-​donazzjoni tkun tistaʼ tingħata lura lid-​donatur, f’każ li jiġi bżonnha. Għal iktar informazzjoni, jekk jogħġbok ikkuntattja lill-​Uffiċċju tat-​Teżorier fl-​indirizz li ngħata diġà.

IPPJANAR ĠENERUŻ

Minbarra l-​għotjiet għalkollox taʼ flus u donazzjonijiet kundizzjonali taʼ flus, hemm metodi oħrajn kif wieħed jagħmel għotjiet li jkunu taʼ benefiċċju għas-​servizz tas-​Saltna mad-​dinja kollha. Dawn jinkludu:

Assigurazzjoni: Is-​Soċjetà tistaʼ tiġi intitolata bħala l-​benefiċjarja tal-​polza t’assigurazzjoni fuq il-​ħajja jew fi pjan taʼ rtirar mix-​xogħol u pensjoni.

Kontijiet fil-​Bank: Kontijiet fil-​bank, ċertifikati taʼ depożitu, jew kontijiet individwali taʼ rtirar mix-​xogħol jistgħu jitpoġġew b’fedekommess għas-​Soċjetà jew jintgħamlu pagabbli mal-​mewt lilha, fi qbil mal-​ħtiġijiet lokali tal-​bank.

Ishma u Titoli: Jistgħu jingħataw ishma u titoli b’donazzjoni lis-​Soċjetà bħala għotja għalkollox.

Propjetà Immobbli: Propjetà immobbli li tistaʼ tinbiegħ tistaʼ tingħata bħala donazzjoni lis-​Soċjetà jew billi ssir għotja għalkollox jew billi l-​propjetà tinżamm tul il-​ħajja tad-​donatur, li jkun jistaʼ jkompli jgħix fiha matul ħajtu. Ikkuntattja lill-​uffiċju tas-​Soċjetà f’pajjiżek qabel ma tagħmel xi kuntratt biex tagħti l-​propjetà immobbli.

Testmenti u Fedekommessi: Jistgħu jitħallew xi propjetà jew flus lis-​Soċjetà permezz taʼ testment effettwat bil-​liġi, jew il-​Watchtower Society tistaʼ tissejjaħ bħala l-​benefiċjarja taʼ ftehim fedekommess. Fedekommess li jkun taʼ benefiċċju għal organizzazzjoni reliġjuża jistaʼ jipprovdi ċerti vantaġġi mit-​taxxi.

Bħalma jimplika t-​terminu “ppjanar ġeneruż,” dawn it-​tipi taʼ donazzjonijiet jirrikjedu tipikament xi ppjanar min-​naħa tad-​donatur. Is-​Soċjetà ħejjiet browxer bl-​Ingliż u bl-​Ispanjol intitolat Charitable Planning to Benefit Kingdom Service Worldwide biex tgħin lil individwi li jkunu jixtiequ jagħmlu xi forma taʼ ppjanar ġeneruż għall-​benefiċċju tax-​xogħol taʼmadwar id-​dinja tax-​Xhieda taʼ Jehovah. Il-​browxer inkiteb sabiex iwieġeb il-​ħafna mistoqsijiet rigward għotjiet, testmenti, u fedekommessi. Fih ukoll iktar informazzjoni utli dwar ippjanar taʼ propjetà, finanzi, u taxxi. U huwa disinjat biex jgħin lil individwi fl-​Istati Uniti li qed jippjanaw biex jagħmlu għotja speċjali issa jew li jħallu b’testment mal-​mewt l-​għażla taʼ l-​iktar metodu vantaġġuż u effiċjenti, fid-​dawl taċ-​ċirkustanzi tal-​familja tagħhom u dawk persunali. Tistaʼ tikseb dan il-​browxer billi tistaqsi għal kopja direttament miċ-​Charitable Planning Office.

Wara li qraw il-​browxer u kkonsultaw maċ-​Charitable Planning Office, ħafna setgħu jassistu lix-​Xhieda taʼ Jehovah mad-​dinja kollha u fl-​istess ħin jieħdu l-​massimu mill-​benefiċċji marbutin mat-​taxxi talli għamlu dan. Iċ-​Charitable Planning Office għandu jiġi informat bi kwalunkwe dokument li jkollu x’jaqsam maʼ xi arranġament minn dawn u jirċievi kopja tiegħu. Jekk int interessat f’xi wieħed minn dawn l-​arranġamenti taʼ ppjanar ġeneruż, għandek tikkuntattja liċ-​Charitable Planning Office, jew b’ittra jew bit-​telefon, fl-​indirizz t’hawn taħt jew taʼ l-​uffiċċju tax-​Xhieda taʼ Jehovah li jservi f’pajjiżek.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive,

Patterson, New York 12563-​9204

Telefon: (845) 306-​0707