Nagħmlu l-​Ġid fiż-​Żmien tal-​Bżonn

L-​APPOSTLU Pawlu qal: “Ħa nagħmlu l-​ġid maʼ kulħadd, l-​iktar maʼ qrabatna fil-​fidi.” (Galatin 6:10) Ix-​Xhieda taʼ Jehovah madwar id-​dinja b’mod diliġenti jipprovaw japplikaw dan il-​prinċipju f’ħajjithom, billi jagħmlu l-​ġid maʼ kulħadd, speċjalment maʼ sħabhom fit-​twemmin. Dan jintwera darba wara l-​oħra fiż-​żmien tal-​bżonn. Ejja nikkunsidraw eżempji reċenti minn tliet pajjiżi.

F’Diċembru tas-​sena 2002, uragan qawwi laqat lil Gwam bi rjieħ b’forza taʼ iktar minn 300 kilometru fis-​siegħa. Ħafna djar spiċċaw imħarbtin, waqt li oħrajn inqerdu għalkollox. Kongregazzjonijiet lokali malajr organizzaw gruppi taʼ nies biex jgħinu lill-​familji tax-​Xhieda taʼ Jehovah li ntlaqtu l-​iktar. Il-​fergħa fi Gwam ipprovdiet il-​materjali u l-​ħaddiema biex jirranġaw id-​djar imħarbtin, u anki l-​fergħa tal-​Ħawajj tat l-​appoġġ tagħha. Fi ftit ġimgħat, grupp taʼ mastrudaxxi wasal mill-​Ħawajj biex jgħin fix-​xogħol tal-​bini, u biex jgħinuhom, xi aħwa lokali ħadu l-​vaganzi mix-​xogħol. L-​ispirtu ferrieħi taʼ kooperazzjoni kien taʼ xiehda għal dawk kollha fil-​komunità.

Fi Mjanmar, raħal viċin il-​belt taʼ Mandalay, nirien ħakmu l-​inħawi qrib is-​Sala tas-​Saltna. Fil-​viċin kien hemm dar t’oħt, li kienet inattiva, u l-​familja tagħha. Ir-​riħ kien qed jonfoħ fid-​direzzjoni tad-​dar tagħha, u għalhekk hi telqet tiġri lejn is-​sala titlob lill-​aħwa għall-​għajnuna. F’dak il-​ħin, is-​sala kienet qed tiġi rinnovata, u minħabba f’hekk kien hemm ħafna aħwa. Huma skantaw x’ħin rawha għax ma kinux jafu li kienet tgħix hemmhekk. L-​aħwa malajr għenu biex iġorru l-​affarijiet taʼ din il-​familja f’post taʼ kenn. Meta r-​raġel, li ma kienx xhud, semaʼ dwar in-​nirien, hu bla dewmien mar lura d-​dar u sab lill-​aħwa qed jieħdu ħsieb il-​familja tiegħu. Impressjonat u grat għall-​aħħar, hu serraħ moħħu għax il-​ħallelin spiss kienu jieħdu vantaġġ minn sitwazzjonijiet bħal dawn. Din l-​espressjoni taʼ qalb tajba mill-​aħwa qanqlet lill-​oħt u lil binha biex jerġgħu jassoċjaw mal-​kongregazzjoni Kristjana, u issa qed jattendu l-​laqgħat kollha.

Matul l-​aħħar sena taʼ servizz, ħafna fil-​Możambik iffaċċjaw il-​ġuħ minħabba nuqqas taʼ xita u ħsara fl-​uċuħ tar-​rabaʼ. L-​uffiċċju tal-​fergħa tax-​Xhieda taʼ Jehovah aġixxa malajr billi pprovda ikel għal dawk fil-​bżonn. L-​ikel tqassam fis-​Swali tas-​Saltna, kultant  wara l-​laqgħat tal-​kongregazzjoni. Oħt li hi ġenitur waħedha qalet: “Jien ġejt għal-​laqgħa dipressa għax ma kontx naf x’se nagħtihom jieklu lil uliedi meta rġajna lura d-​dar.” L-​għajnuna kollha mħabba li tawha l-​aħwa malajr inkuraġġietha. “Ħassejtni qisni rxoxtajt!” qalet hi.

Ix-Xhieda ‘jagħmlu l-​ġid’ b’mod spiritwali wkoll billi jaqsmu m’oħrajn il-​messaġġ tal-​Bibbja taʼ faraġ u tama. Huma jemmnu dak li kien jemmen ir-​raġel għaref taʼ żmien ilu: “Imma min jismaʼ [l-għerf divin] jgħix moħħu mistrieħ, bla ebda tfixkil, bla biżaʼ tal-​ħsara.”—Proverbji 1:33.

[Stampi f’paġna 31]

1, 2. It-​tqassim taʼ l-​ikel lil dawk fil-​bżonn fil-​Możambik

3, 4. L-​uragan fi Gwam qered ħafna djar

[Sorsi]

Tifel, xellug: Andrea Booher/FEMA News Photo; mara, fuq: AP Photo/Pacific Daily News, Masako Watanabe