“L-​Għajnuna Tiegħi Ġejja Mingħand Ġeħova”

Is-​Sagrifiċċji Persunali Jġibu l-​Barka taʼ Ġeħova

RAĠEL jivvjaġġa bir-​rota fil-​qalba tal-​foresta tal-​Kamerun. Għal sigħat sħaħ, hu jgħaddi minn toroq mgħarrqin u mit-​tajn, filwaqt li jiffaċċja l-​periklu biex imur isaħħaħ lil oħrajn. Sabiex jgħallmu lil grupp iżolat, żewġ aħwa fiż-​Żimbabwe jimxu 15-il kilometru minn xmajjar li qegħdin ifuru, u jżommu l-​ħwejjeġ u ż-​żraben tagħhom bilanċjati sew fuq rashom sabiex ma jixxarrbulhomx. Xi mkien ieħor, mara tqum fl-​erbgħa taʼ fil-​għodu biex iżżur infermiera u tistudja magħha għaliex din tistaʼ twarrab siegħa għall-​istudju fil-​għodu kmieni biss.

X’hemm komuni f’dawn it-​tliet eżempji? Lindividwi huma kollha ministri full-time tax-​Xhieda taʼ Ġeħova u jieħdu sehem fix-​xogħol li jgħallmu l-​verità tal-​Bibbja. Fosthom hemm pijunieri regulari u speċjali, missjunarji, indokraturi li jivvjaġġaw, u eluf taʼ volontieri fid-​djar taʼ Betel madwar id-​dinja. U s-​sagrifiċċju persunali huwa l-​karatteristika li tagħmilhom differenti. *

Motiv Xieraq

Ix-​Xhieda taʼ Ġeħova qegħdin jagħtu kas it-​twissija li l-​appostlu Pawlu ta lil Timotju: “Agħmel l-​almu tiegħek biex tidher quddiem Alla bħala bniedem approvat, ħaddiem li m’għandux minn xiex jistħi, billi timmaniġġa sew il-​kelma tal-​verità.” (2 Timotju 2:15) Imma xi jqanqal lil mijiet t’eluf taʼ Xhieda biex jaqdu bħala ministri full-time?

Meta l-​ministri full-time jiġu mistoqsijin il-​għala qegħdin iħabirku fis-​servizz taʼ Ġeħova, it-​tweġiba tagħhom tinvolvi mħabba għal Alla u għall-​bnedmin sħabhom. (Mattew 22:​37-39) Dan huwa verament xieraq, għaliex mingħajr imħabba bħala l-​motiv, kwalunkwe ammont taʼ sforz li jsir ikun għalxejn.—1 Korintin 13:​1-3.

Servizz li Jirrikjedi Sagrifiċċju Persunali

Il-​Kristjani dedikati kollha aċċettaw l-​istedina taʼ Ġesù: “Jekk xi ħadd irid jiġi warajja, ħa jiċħad lilu nnifsu u jerfaʼ z-​zokk tat-​tortura tiegħu u jibqaʼ miexi warajja.” (Mattew 16:24) Il-​fatt li niċħdu lilna nfusna jfisser li nissottomettu ruħna minn jeddna biex inkunu taʼ Ġeħova u Ġesù Kristu kif ukoll biex inkunu mmexxijin minnhom. Għal ħafna, dan wassalhom biex jagħmlu servizz taʼ sagrifiċċju persunali fil-​ministeru full-time.

Ħafna Xhieda jagħmlu sforzi kbar biex iżidu fis-​servizz tagħhom lil Ġeħova. Ikkunsidra lil Júlia, pijuniera regulari taʼ 56 sena f’São Paulo, il-​Brażil. “Ħu Ċiniż ċempilli biex jistaqsini jekk ridtx nitgħallem iċ-​Ċiniż,” tiftakar hi. “Minħabba l-​età tiegħi, ma kontx qed naħseb biex nitgħallem lingwa ġdida. Imma wara ftit jiem, aċċettajt l-​isfida. Illum, kapaċi nagħmel preżentazzjonijiet Skritturali biċ-​Ċiniż.”

L-​uffiċċju tal-​fergħa tax-​Xhieda taʼ Ġeħova fil-​Perù jirrapporta: “Fis-​snin reċenti, mijiet taʼ pijunieri regulari marru jgħixu f’territorji mhux assenjati,  u wrew spirtu taʼ kuraġġ u sagrifiċċju persunali. Huma jmorru fi rħula mwarrba fejn m’hemmx kumditajiet bażiċi u l-​opportunitajiet għax-​xogħol huma limitati. Dawn l-​aħwa qegħdin jagħmlu dak kollu li hemm bżonn sabiex jibqgħu jaqdu fl-​inkarigi tagħhom. Imma l-​iktar ħaġa importanti hi li l-​attività tagħhom fil-​ministeru ġġib riżultati tajbin f’ħafna postijiet differenti. L-​indokraturi li jivvjaġġaw jirrapportaw li bl-​għajnuna taʼ dawn il-​pijunieri regulari li jagħmlu sagrifiċċju persunali ġew ifformati gruppi ġodda.”

Xi Kristjani ssograw ħajjithom biex jgħinu lil sħabhom fit-​twemmin. (Rumani 16:​3, 4) Indokratur tas-​circuit f’post imħarbat bil-​gwerra ġewwa l-​Afrika jirrapporta: “Qabel ma wasalna għall-​aħħar roadblock bejn it-​territorju okkupat mir-​ribelli u dak kontrollat mill-​gvern, jien u marti sfajna mdawrin b’erbaʼ kmandanti militari ribelli u l-​gwardji persunali tagħhom, li staqsewna dwar l-​identità tagħna. Meta ċċekkjaw il-​karta taʼ l-​identità tagħna, huma raw li konna mill-​inħawi kontrollati mill-​gvern, allura bdew jissuspettaw fina. Ġejt akkużat li kont spija. Għalhekk, iddeċidew li jitfgħuni f’ħofra. Jien spjegajt min konna, u eventwalment ħallewna mmorru.” Kemm kienu grati l-​kongregazzjonijiet li din il-​koppja għamlet sagrifiċċju persunali u rnexxielha żżurhom!

Minkejja d-​diffikultajiet li jgħaddu minnhom, l-​għadd taʼ ministri full-time qiegħed jiżdied mad-​dinja kollha. (Isaija 6:8) Dawn il-​ħaddiema bieżla jgħożżu l-​privileġġ tagħhom li jaqdu lil Ġeħova. Bi spirtu simili taʼ sagrifiċċju persunali, miljuni oħrajn illum qegħdin ifaħħru lil Ġeħova. Mill-​banda l-​oħra, hu jberikhom bil-​kbir. (Proverbji 10:22) Kunfidenti li qegħdin jiġu mberkin u appoġġati kontinwament, dawn il-​ħaddiema ħabrieka jirriflettu l-​attitudni tas-​salmista li kanta: “L-​għajnuna tiegħi ġejja mingħand Ġeħova.”​—Salm 121:​2, NW.

[Nota taʼ taħt]

[Kumment f’paġna 9]

“Il-​poplu tiegħek minn rajh joffri lilu nnifsu f’dak il-​jum li fih int tmexxi l-​eżerċtu tiegħek.”—SALM 110:3 (Karm Żammit)

[Kaxxa f’paġna 8]

ĠEĦOVA JGĦOŻŻ LILL-​QADDEJJA DEVOTI TIEGĦU

“Ibqgħu sodi, titħarrkux, waqt li dejjem ikollkom ħafna x’tagħmlu fix-​xogħol tal-​Mulej, għax tafu li t-​taħbit tagħkom fil-​Mulej m’huwiex għalxejn.”​—1 Korintin 15:58.

“Alla mhux inġust biex jinsa għemilkom u l-​imħabba li wrejtu għal ismu.”—Ebrej 6:10.