Mhuwiex faċli li tikkonvinċi raġel setgħan li l-​mogħdijiet tiegħu huma korrotti u li għandu bżonn jagħmel bidla. Kieku int, kont tiffaċċja individwu bħal dan kieku kont taf li kien qatel raġel biex jiġbor ġieħu?

Is-​Sultan David t’Iżrael tal-​qedem kien għamel adulterju maʼ Bat-​seba, u hi nqabdet tqila. Biex jaħbu dnubhom, David ordna li żewġha jiġi maqtul u mbagħad ħa lil Bat-​seba b’martu. Għaddew xhur sħaħ waqt li David għex ħajja doppja, u fl-​istess ħin wisq probabbli baqaʼ jaqdi d-​dmirijiet uffiċjali tiegħu. Imma Ġeħova ma ħalliex id-​dnubiet tas-​sultan jgħaddu qisu xejn mhu xejn. Hu bagħat lill-​profeta tiegħu Natan biex jiffaċċjah.

Kien inkarigu iebes. Poġġi lilek innifsek fiż-​żarbun taʼ Natan. Il-​lealtà lejn Ġeħova u ż-​żamma fis-​sod mal-​livelli divini bla dubju qanqlu lil Natan ifakkar lil David fi dnubietu. Il-​profeta kif setaʼ jagħmel dan u jikkonvinċi lis-​Sultan David li kellu bżonn jindem?

GĦALLIEM TATTIKU

Għala ma tiħux ftit minuti biex taqra t-​2 Samwel 12:1-​25? Immaġina li int kont minflok Natan hekk kif qal lil David din l-​istorja: “Kien hemm żewġt irġiel li kienu f’belt waħda, wieħed għani u l-​ieħor taʼ ftit mezzi. L-​għani kellu ħafna u ħafna nagħaġ u baqar; imma dak taʼ ftit mezzi ma kellu xejn ħlief ħarufa waħda, żgħira, li kien xtara. U kien qed irabbiha, u kienet qed tikber miegħu u maʼ wliedu, kollha flimkien. Mil-​loqma tiegħu kienet tiekol, u milli jkollu fit-​tazza tiegħu kienet  tixrob, u fi ħdanu kienet toqgħod, u għalih kienet saret qisha bintu. Darba waħda ġie xi ħadd iżur lir-​raġel għani, imma dan ma riedx jieħu min-​nagħaġ tiegħu u mill-​baqar tiegħu biex ilestihom għall-​vjaġġatur li kien daħal għandu. Għalhekk, ħa l-​ħarufa tar-​raġel taʼ ftit mezzi u lestieha għar-​raġel li kien daħal għandu.”—2 Sam. 12:1-​4.

David—li hu nnifsu qabel kien ragħaj—milli jidher emmen li din kienet sitwazzjoni vera. Kummentatur wieħed jissuġġerixxi: “Jistaʼ jkun li Natan kien imdorri jmur għandu biex jaqdi bħala avukat għal dawk imweġġgħin li ma setgħu jsibu l-​ebda rimedju ieħor, u David ħaseb li għalhekk kien ġie għandu issa.” Anke jekk dan kien il-​każ, kien jitlob lealtà lejn Alla kif ukoll kuraġġ biex Natan ikellem lis-​sultan kif għamel. L-​istorja li qal Natan inkorlat lil David. Hu esklama: “Daqskemm hu ħaj Ġeħova, ir-​raġel li għamel dan jistħoqqlu jmut!” Imbagħad Natan laqtu fil-​laħam il-​ħaj billi qallu: “Int hu dak ir-​raġel!”—2 Sam. 12:5-​7.

Aħseb dwar għala Natan għażel li jitkellem dwar il-​problema bil-​mod li għamel. Mhux faċli biex persuna li saret involuta emozzjonalment maʼ xi ħadd tara s-​sitwazzjoni tagħha mingħajr preġudizzju. Ilkoll kemm aħna għandna t-​tendenza li nivvintaw skużi biex niġġustifikaw lilna nfusna jekk nagħmlu xi ħaġa dubjuża. Imma t-​tixbiha taʼ Natan qanqlet lil David bla ma kien jaf biex jikkundanna l-​azzjonijiet tiegħu stess. Is-​sultan ra ċar daqs il-​kristall li l-​imġiba li ddeskriva Natan kienet taʼ min jistkerrahha. Iżda kien biss wara li David innifsu kkundannaha li Natan qal li t-​tixbiha applikat għas-​sultan. Imbagħad David setaʼ jara kemm kien serju d-​dnub li għamel. Dan għenu jkollu l-​attitudni tajba biex jaċċetta d-​dixxiplina. Hu għaraf li tabilħaqq kien ‘stmerr’ lil Ġeħova bl-​imġiba tiegħu maʼ Bat-​seba, u hu aċċetta t-​twiddib mistħoqq.—2 Sam. 12:9-​14; Salm 51, sopraskrizzjoni.

X’nistgħu nitgħallmu minn dan? Il-​mira t’għalliem tal-​Bibbja hi li jgħin lis-​semmiegħa tiegħu jaslu għall-​konklużjoni t-​tajba. Natan irrispetta lil David, u għalhekk kellmu bit-​tattika. Natan kien jaf li f’qalbu David ħabb is-​sewwa u l-​ġustizzja. Għalhekk, uża storja li kien jaf li kienet se tinfluwenza lil raġel b’dawn il-​kwalitajiet. Aħna wkoll nistgħu ngħinu lill-​individwi sinċieri jifhmu l-​ħarsa taʼ Ġeħova. Kif? In-​nies għandhom idea ġenerali taʼ x’inhu tajjeb. Aħna nistgħu ngħinuhom jużaw l-​għarfien tagħhom stess taʼ x’inhu tajjeb mingħajr ma nġegħluhom jaħsbu li aħna aħjar minnhom jew li għandna d-​dritt li ngħidulhom x’għandhom jagħmlu. Il-​Bibbja, u mhux l-​opinjoni persunali tagħna, hi l-​awtorità tagħna fejn jidħol dak li hu tajjeb u dak li hu ħażin.

Iktar minn kull ħaġ’oħra, il-​lealtà lejn Alla għenet lil Natan iċanfar lil sultan setgħan. (2 Sam. 12:1) Lealtà simili se tagħtina l-​kuraġġ biex nibqgħu nżommu sod mal-​prinċipji ġusti taʼ Ġeħova.

WIEĦED LI ĦABREK GĦALL-​QIMA PURA

Milli jidher, Natan u David kienu ħbieb sew għax David semma wieħed minn uliedu s-​subien Natan. (1 Kron. 3:1, 5) L-​ewwel darba li jissemma Natan fil-​Bibbja, hu jkun maʼ David. It-​tnejn ħabbew lil Ġeħova. Nafu li s-​sultan fada fl-​opinjoni taʼ Natan għax qal lill-​profeta bix-​xewqa li jibni tempju għal Ġeħova. David qal: “‘Ara, issa, jien qed ngħammar f’dar taċ-​ċedri waqt li l-​arka taʼ l-​Alla l-​veru qiegħda f’nofs id-​drapp tat-​tined.’ U Natan qal lis-​sultan: ‘Kulma għandek f’qalbek—mur u agħmlu, għaliex Ġeħova qiegħed miegħek.’”—2 Sam. 7:2, 3.

Bħala aduratur leali taʼ Ġeħova, Natan b’entużjażmu approva l-​pjan taʼ David biex jibni l-​ewwel ċentru permanenti tal-​qima pura fuq l-​art. Però, f’dik l-​okkażjoni milli jidher Natan esprima s-​sentimenti tiegħu stess minflok ma tkellem f’isem Ġeħova. Dak il-​lejl, Alla bagħat lill-​profeta tiegħu biex iwassal messaġġ differenti lis-​sultan: David ma kellux jibni t-​tempju taʼ Ġeħova. Il-​wieħed li kellu jagħmel dan kien se jkun wieħed mill-​ulied subien taʼ David. Imma Natan ħabbar li Alla kien qed jagħmel patt maʼ David, u li fil-​qosor it-​tron tiegħu kien se jkun “stabbilit fis-​sod għal żmien indefinit.”—2 Sam. 7:4-​16.

L-​opinjoni taʼ Natan dwar min kellu jibni t-​tempju ma kinitx fi qbil mar-​rieda t’Alla. Madanakollu, mingħajr tgergir, dan il-​profeta umli ċeda għall-​iskop taʼ Ġeħova u ħadem id f’id maʼ  dan l-​iskop. X’eżempju mill-​aħjar xi nsegwu jekk Alla jikkoreġi lilna b’xi mod! Nafu li Natan baqaʼ jkollu l-​favur t’Alla minħabba kif Ġeħova iktar tard użah bħala profeta. Infatti, jidher li Ġeħova nebbaħ lil Natan, flimkien maʼ Gad il-​viżjonarju, biex jiggwida lil David f’li jorganizza 4,000 mużiċist fis-​servizz tat-​tempju.—1 Kron. 23:1-​5; 2 Kron. 29:25.

DIFENSUR TAL-​ĦAKMA TAS-​SULTAN

Natan kien jaf li Salamun kellu jsir is-​sultan wara David. Għalhekk, Natan aġixxa fil-​pront meta Adonija pprova jaħtaf it-​tron matul l-​aħħar ftit snin taʼ David. It-​tattika u l-​lealtà reġgħu spikkaw fil-​mod kif aġixxa Natan. L-​ewwel, hu ħeġġeġ lil Bat-​seba biex tfakkar lil David bil-​ħalfa li għamel rigward li jaħtar lil binhom Salamun bħala sultan. Imbagħad, Natan innifsu daħal quddiem is-​sultan biex jistaqsi jekk David kienx għażel lil Adonija bħala s-​sultan li jmiss. Peress li rrealizza s-​serjetà tas-​sitwazzjoni, is-​sultan imdaħħal fiż-​żmien ikkmanda lil Natan u lil qaddejja leali oħrajn biex jidilku lil Salamun u jħabbru lilu sultan. L-​attentat t’Adonija biex jaħtaf il-​poter inġieb fix-​xejn.—1 Slat. 1:5-​53.

STORJOGRAFU MODEST

Ġeneralment, in-​nies jaqblu li Natan u Gad kitbu l-​1 Samwel kapitli 25 sa 31 kif ukoll it-​2 Samwel kollu. Rigward ir-​rakkonti mnebbħin li huma mniżżlin f’dawn il-​kotba, hemm miktub: “Issa l-​ġrajjiet taʼ David, is-​sultan, kemm taʼ l-​ewwel u kemm taʼ l-​aħħar, huma miktubin hemmhekk fost il-​kliem taʼ Samwel, il-​veġġent, u fost il-​kliem taʼ Natan, il-​profeta, u fost il-​kliem taʼ Gad, il-​viżjonarju.” (1 Kron. 29:29) Il-​Bibbja ssemmi wkoll li Natan kiteb dwar “il-​ġrajjiet taʼ Salamun.” (2 Kron. 9:29) Dan ifisser li Natan x’aktarx baqaʼ jaqdi fil-​palazz irjali wara l-​mewt taʼ David.

Ħafna minn dak li nafu dwar Natan għandu mnejn ġie miktub mill-​profeta nnifsu. Imma nistgħu nitgħallmu wkoll ħafna dwaru minn dak li ma kitibx. Natan milli jidher kien storjografu modest, u ma kienx interessat f’li jsir famuż. Fil-​kliem taʼ dizzjunarju tal-​Bibbja, hu jidher fir-​rakkont ispirat “bl-​ebda introduzzjoni u bl-​ebda informazzjoni dwar l-​antenati tiegħu.” Ma nafu xejn dwar il-​ħajja persunali taʼ Natan.

IMQANQAL MIL-LEALTÀ LEJN ĠEĦOVA

Mill-​ftit li nafu dwar Natan mill-​Iskrittura, jidher ċar li kien difensur leali imma żeluż tal-​arranġamenti divini. Alla Ġeħova inkarigah b’responsabbiltajiet serji. Immedita fuq il-​kwalitajiet taʼ Natan, bħal pereżempju, il-​lealtà lejn Alla u l-​imħabba għal-​livelli divini. Stinka biex timita kwalitajiet bħal dawn.

X’aktarx m’intix se tiġi mitlub iċċanfar slaten adulterużi jew twaqqaf il-​pjanijiet taʼ xi ħadd biex isir ħakkiem. Imma bl-​għajnuna t’Alla tistaʼ tkun leali lejh u tistaʼ tiddefendi dak li jgħid li hu tajjeb. Ukoll, tistaʼ tkun għalliem kuraġġuż, imma tattiku, tal-​verità u wieħed li jħabrek għall-​qima vera.

[Stampa f’paġna 25]

Bħala difensur tal-​ħakma tas-​sultan, Natan bit-​tattika kellem lil Bat-​seba