TFAJLA li kienet isservi f’bar, li kienet tidgħi, tisker, u tieħu d-​drogi, kif irnexxielha tbiddel ħajjitha? Wieħed li qabel kien politikant u li kien jobgħod ir-​reliġjon għala sar ministru t’Alla? Liema sfidi kellu jegħleb għalliem tal-​kumbattiment fil-​korp tal-​pulizija Russa biex isir wieħed mix-​Xhieda taʼ Ġeħova? Aqra x’għandhom x’jgħidu dawn l-​individwi.

“Jien u Ommi Rġajna Għandna Relazzjoni Tajba maʼ Xulxin.”—NATALIE HAM

SENA TAT-​TWELID: 1965

POST TAT-​TWELID: AWSTRALJA

STORJA: KIENET TIEĦU D-​DROGI

IL-​PASSAT TIEGĦI: Trabbejt f’Robe, belt żgħira magħrufa għas-​sajd, fin-​Nofsinhar tal-​Awstralja. F’komunitajiet bħal dawn, in-​nies jassoċjaw flimkien fil-​lukanda taʼ din il-​belt. Peress li l-​ġenituri jqattgħu ħafna ħin fil-​lukanda, uliedhom jitrabbew f’ambjent fejn hemm l-​abbuż tal-​alkoħol, kliem ħażin, u duħħan tas-​sigaretti.

Sakemm kelli 12-​il sena, kont inpejjep, kelli vokabolarju vast taʼ kliem ħażin, u kont il-​ħin kollu niġġieled m’ommi. Meta kelli 15-​il sena, il-​ġenituri tiegħi sseparaw u 18-​il xahar wara tlaqt mid-​dar. Kont nabbuża mill-​alkoħol, nieħu d-​drogi, u ngħix ħajja immorali. Ħassejtni rrabjata u konfuża. Peress li kont għamilt ħames snin nistudja l-​arti marzjali u ħadt taħriġ fuq kif in-​nisa għandhom jiddefendu lilhom infushom, ħassejt li stajt infendi għal rasi. Minkejja dan, meta kont inkun waħdi fil-​kwiet u kont noqgħod nirrifletti, kienu jaqbduni dwejjaq kbar u kont nitlob lil Alla biex jgħinni. Kont ngħidlu “titlobnix biex immur il-​knisja.”

Xi żmien wara, ħabib tiegħi li kien reliġjuż imma li ma kien jappartjeni lill-​ebda reliġjon partikulari tani Bibbja. Bħall-​ħbieb l-​oħrajn tagħna, hu kien jieħu d-​drogi. Iżda hu stqarr li kien sinċerament jemmen f’Alla u kkonvinċieni li għandi nitgħammed. Ħadni fi xmara fil-​viċin u għammidni. Minn dakinhar ’il quddiem, ħassejt li kelli relazzjoni speċjali m’Alla. Madankollu, qatt ma sibt ħin biex naqra l-​Bibbja.

KIF IL-​BIBBJA BIDDLITLI ĦAJTI: Fl-​1988, żewġ Xhieda ħabbtuli l-​bieb. Wieħed minnhom staqsieni, “Taf x’inhu l-​isem t’Alla?” Ix-​Xhud qrali Salm 83:18 mill-​Bibbja tiegħu. Din tgħid: “Biex in-​nies ikunu jafu li int, li ismek hu Ġeħova, int waħdek l-​Iktar Għoli fuq l-​art kollha.” Bqajt iċċassata! Wara li telqu, soqt 35 mil (56 km) biex insib ħanut li jbigħ kotba reliġjużi ħalli niċċekkja x’jgħidu traduzzjonijiet  oħrajn tal-​Bibbja, u mbagħad fittixt l-​isem t’Alla f’dizzjunarju. Peress li kkonvinċejt ruħi li l-​isem t’Alla hu Ġeħova, bdejt naħseb bejni u bejn ruħi jekk kienx hemm affarijiet oħrajn li ma kontx nafhom.

Ommi kienet qaltli li x-​Xhieda taʼ Ġeħova kienu nies strambi. Mill-​ftit li kont naf dwarhom, ħsibt li kienu wisq konservattivi u ma kinux jafu jieħdu pjaċir. Għaddieli minn moħħi li nagħmel tabirruħi li m’iniex hemm meta jiġu jżuruni. Iżda meta ġew biddilt fehmti. Stidinthom jidħlu ġewwa u mill-​ewwel bdejna nistudjaw il-​Bibbja.

Wara kull studju, lill-​għarus tiegħi, Craig, kont ngħidlu dak kollu li tgħallimt. Maż-​żmien tant xebaʼ jismaʼ, li ħadli l-​ktieb li konna qed nistudjaw minn fuqu u beda jaqrah. Fi tliet ġimgħat, hu wasal għall-​konklużjoni li kien sab il-​verità dwar Alla. Jien u Craig eventwalment ma bqajniex nieħdu d-​drogi u nabbużaw mill-​alkoħol, u jien ma bqajtx naħdem fil-​bar. Sabiex inġibu ħajjitna fi qbil mal-​livelli tal-​Bibbja, iddeċidejna li niżżewġu.

KIF IBBENEFIKAJT: Qabel ma bdejna nistudjaw il-​Bibbja max-​Xhieda taʼ Ġeħova, jien u Craig konna kważi wasalna biex ninfirdu. Illum, Craig hu raġel tal-​familja eżemplari u għandna żewġt itfal ħelwin. Għandna wkoll ħbieb għeżież li jħaddnu l-​istess twemmin bħalna.

Għall-​ewwel, ommi kienet irrabjata meta saret taf li kont qed nassoċja max-​Xhieda taʼ Ġeħova. Madankollu, it-​tħassib tagħha kien ibbażat fuq ideat żbaljati. Issa jien u ommi rġajna għandna relazzjoni tajba maʼ xulxin. M’għadnix inħoss vojt ġewwa fija. Minflok, għandi direzzjoni u skop f’ħajti, u nħoss li l-​bżonnijiet spiritwali tiegħi qed jiġu sodisfati.—Mattew 5:3.

“Tgħallimt Ħafna Affarijiet mill-​Bibbja li Ssorprendewni.” —ISAKALA PAENIU

SENA TAT-​TWELID: 1939

POST TAT-​TWELID: TUVALU

STORJA: POLITIKANT

IL-​PASSAT TIEGĦI: Twilidt f’Nukulaelae, gżira mill-​isbaħ fil-​Paċifiku li issa tagħmel parti minn Tuvalu. Il-​ħajja fuq il-​gżejjer kienet dominata minn saċerdoti li rċivew it-​taħriġ reliġjuż tagħhom f’kulleġġ f’Samoa. In-​nies taʼ din il-​gżira kellhom id-​dmir li kuljum jitimgħu lis-​saċerdoti u lill-​familji tagħhom kif ukoll jipprovdulhom akkomodazzjoni. Fil-​fatt, kellhom jagħtuhom l-​aħjar minn kollox. Anki jekk in-​nies tal-​gżira ma kellhomx biżżejjed ikel għall-​familji tagħhom stess, huma kienu obbligati jipprovdu għas-​saċerdoti.

Is-​saċerdot li kien jgħix fuq il-​gżira fejn kont ngħix jien, kien jieħu ħsieb l-​iskola tar-​raħal u kien jgħallem ir-​reliġjon, il-​matematika, u ftit ġeografija. Għadni nġib quddiem għajnejja lis-​saċerdot li tant kien isawwat lill-​istudenti li kienu jispiċċaw mimlijin demm. Madankollu, ħadd ma kien jażżarda jipprotesta, lanqas il-​ġenituri stess.  Is-​saċerdot kien onorat bħallikieku kien Alla nnifsu.

Meta kelli għaxar snin, tlaqt mid-​dar biex immur fl-​unika skola tal-​gvern li kien hemm fl-​inħawi. Din kienet fuq gżira oħra. Meta ggradwajt, bdejt naħdem mal-​gvern. Dak iż-​żmien, il-​gżejjer kienu jagħmlu parti mill-​kolonja Britannika. Dawn kienu magħrufin bħala l-​gżejjer taʼ Gilbert u Ellice. Kont naħdem f’diversi dipartimenti qabel ma sirt editur tal-​gazzetta tal-​gvern li toħroġ kull ġimgħa. Kollox kien sejjer tajjeb sakemm ippubblikajt ittra taʼ qarrej li kkritika l-​mod kif kienu qed jintefqu l-​flus bi tħejjija għaż-​żjara tal-​Prinċep taʼ Wales. Il-​kittieb tal-​ittra uża isem falz, u dak li kien inkarigat fuqi ried bilfors ikun jaf l-​isem veru tal-​persuna. Jien irrifjutajt li ngħidulu, u din it-​tilwima kulħadd sar jaf biha.

Ftit wara li ġara dan, tlaqt minn mal-​gvern u tajtha għall-​politika. Irbaħt elezzjoni fʼNukulaelae u ġejt maħtur bħala Ministru tal-​Kummerċ u Riżorsi Naturali. Iktar tard, meta n-​nies mill-​gżejjer taʼ Kiribati u taʼ Tuvalu (li qabel kienu magħrufin bħala Gilbert u Ellice) kienu waslu biex jiksbu l-​indipendenza mill-​Britannja, il-​gvernatur offrieli l-​kariga taʼ kap tal-​amministrazzjoni taʼ Tuvalu. Madankollu, ma ridtx nagħti l-​impressjoni li għandi konnessjoni mal-​ħakma kolonjali. Għalhekk, irrifjutajt l-​offerta u mingħajr ebda appoġġ ħriġt għall-​elezzjoni ġenerali biex nilħaq ministru fil-​gvern. Però ma ġejtx elett. Wara dan, erġajt lura maʼ marti lejn il-​gżira fejn trabbejt u ddeċidejt li ngħix ħajja normali fir-​raħal tiegħi.

KIF IL-​BIBBJA BIDDLITLI ĦAJTI: Fil-​gżejjer, il-​ġurnata tal-​Ħadd kienet meqjusa bħala s-​Sabat u kulħadd kien iqisha bħala ġurnata qaddisa, minbarra jien. Din kienet il-​ġurnata tiegħi biex noħroġ bid-​dgħajsa u biex nistad. Ma ridtx li nkun magħruf bħala bniedem reliġjuż. Missieri qalli li kemm hu u kemm oħrajn kienu diżappuntati bl-​aġir tiegħi. Imma jien kont determinat li ma nħallix il-​knisja tinfluwenzani.

F’wieħed mill-​vjaġġi tiegħi lejn Funafuti—il-​gżira li fuqha hemm il-​belt kapitali taʼ Tuvalu—ħija iżgħar minni stidinni biex immur miegħu għal waħda mil-​laqgħat tax-​Xhieda taʼ Ġeħova. Iktar tard, wieħed missjunarju li kien Xhud tani turrun rivisti tat-​Torri tal-​Għassa u Stenbaħ! biex naqrahom. Tani wkoll ktieb li kien jikxef l-​oriġini pagani tad-​duttrini li kienu jgħallmu ħafna mill-​hekk imsejħin knejjes Kristjani. Dan il-​ktieb qrajtu kemm-​il darba. Tgħallimt ħafna affarijiet mill-​Bibbja li ssorprendewni, inkluż il-​fatt li l-​Kristjani mhumiex obbligati josservaw is-​Sabat taʼ kull ġimgħa. a Dawn il-​punti għedthom lil marti, u mill-​ewwel ma baqgħetx tmur il-​knisja.

Madankollu, kont ħlift li bl-​ebda mod ma ninvolvi ruħi fir-​reliġjon. Għaddew kważi sentejn, imma ma stajtx ninsa l-​affarijiet li kont tgħallimt. Għadda ż-​żmien u ktibt lil dak il-​missjunarju taʼ Funafuti, u għedtlu li kont lest li nagħmel bidla. Hu telaʼ fuq il-​vapur li kien imiss jitlaq u ġie jgħinni nitgħallem iktar dwar il-​Bibbja. Missieri kien irrabjat ferm meta skopra li ridt insir wieħed mix-​Xhieda taʼ Ġeħova. Imma għedtlu li tant kont tgħallimt affarijiet dwar il-​Bibbja mingħand ix-​Xhieda li d-​deċiżjoni tiegħi kont diġà ħadtha.

KIF IBBENEFIKAJT: Fl-​1986, tgħammidt bħala wieħed mix-​Xhieda taʼ Ġeħova, u marti tgħammdet sena wara. Iż-​żewġt ibniet tagħna wkoll tgħallmu dak li tgħid il-​Bibbja u ddeċidew li jsiru Xhieda taʼ Ġeħova.

Issa għandi l-​pjaċir ngħid li jien nagħmel parti minn grupp reliġjuż, li bħall-​Kristjani tal-​ewwel seklu, ma jagħmilx distinzjoni bejn il-​klassi tal-​kleru u klassi tal-​lajċi. (Mattew 23:8-​12) Ukoll, dan il-​grupp isegwi b’umiltà l-​eżempju taʼ Ġesù u jipprietka lil oħrajn dwar il-​gvern tas-​Saltna t’Alla. (Mattew 4:17) Kemm jien grat lejn Ġeħova talli ppermettieli nsir naf il-​verità dwaru u dwar il-​poplu tiegħu!

 “Ix-​Xhieda Ma Pprovawx Jisforzawni Biex Nemmen xi Ħaġa bla Spjegazzjoni.”—ALEXANDER SOSKOV

SENA TAT-​TWELID: 1971

POST TAT-​TWELID: RUSSJA

STORJA: GĦALLIEM TAL-​KUMBATTIMENT

IL-​PASSAT TIEGĦI: Twelidt f’Moska, li dak iż-​żmien kienet il-​belt kapitali tal-​Unjoni Sovjetika. Il-​familja tiegħi kienet toqgħod fi blokk kbir taʼ appartamenti, u ħafna mill-​ġirien tagħna kienu jaħdmu flimkien fl-​istess fabbrika. Niftakar li dawn kienu jilmentaw li jien kont tifel imqareb ħafna u kienu jgħidu li għad immut żgħir jew nispiċċa l-​ħabs. Fil-​fatt, sakemm kelli għaxar snin kont diġà ġejt fl-​inkwiet mal-​pulizija.

Meta għalaqt it-​18-​il sena, inqbadt bil-​lieva u ntbgħatt naqdi bħala għassies mal-​fruntiera. Wara sentejn mort lura d-​dar u bdejt naħdem ġo fabbrika, imma x-​xogħol m’għoġobnix. Għalhekk, dħalt fil-​korp tal-​pulizija taʼ kontra r-​rewwixti u bdejt naħdem bħala għalliem tal-​kumbattiment bl-​idejn. Kont ngħinhom jaqbdu l-​kriminali f’Moska u mmur f’diversi postijiet madwar il-​pajjiż kollu fejn kien magħruf li jkun hemm il-​ġlied. It-​tensjoni ġewwa fija kienet qisha molla marsusa. Kultant, meta kont immur lura d-​dar, ma kontx norqod fl-​istess sodda maʼ marti għax kont nibżaʼ li nweġġagħha peress li kont noħlom ikrah.

KIF IL-​BIBBJA BIDDLITLI ĦAJTI: Meta bdejt nistudja l-​Bibbja max-​Xhieda taʼ Ġeħova skoprejt li l-​ħajja vjolenti li kont qed ngħix ma kinitx fi qbil mal-​livelli tal-​Bibbja. Rajt ukoll il-​bżonn li nieqaf inpejjep u nikkontrolla l-​ammont taʼ alkoħol li kont nixrob. Madankollu, irraġunajt li ma stajtx nibdel ix-​xogħol għax ma kellix snajjaʼ oħrajn li bihom stajt insib xogħol biex nipprovdi għall-​familja tiegħi. Ħassejt ukoll li qatt ma stajt nieħu sehem fl-​ippritkar, bħalma kienu jagħmlu x-​Xhieda.

Eventwalment, jien xorta bdejt nikkonvinċi ruħi li dak li kien hemm miktub fil-​Bibbja kien eżatt. Ksibt il-​faraġ mir-​rakkont taʼ Eżekjel 18:21, 22. Dan jgħid: “Jekk xi ħadd ħażin idur lura mid-​dnubiet kollha li għamel . . . , kulma għamel biex jikser il-​liġi ma jitfakkarx kontrih.”

Għoġobni l-​fatt li x-​Xhieda ma pprovawx jisforzawni biex nemmen xi ħaġa bla spjegazzjoni imma kienu jgħinuni nirraġuna fuq dak li kont nitgħallem. Ħadt turrun rivisti minn tagħhom, madwar 40, u qrajthom fi tliet ġimgħat. Dak li tgħallimt ikkonvinċieni li kont sibt ir-​reliġjon vera.

KIF IBBENEFIKAJT: Qabel ma bdejt nistudja l-​Bibbja, jien u marti konna kważi wasalna biex niddivorzjaw. Issa ż-​żwieġ tagħna tjieb. Marti bdiet tistudja l-​Bibbja meta bdejt nistudjaha jien u t-​tnejn li aħna ddeċidejna li naqdu lil Ġeħova flimkien. Issa l-​familja tiegħi hija iktar ferħana. Stajt ukoll insib xogħol li ma kienx imur kontra l-​prinċipji Bibliċi.

Għall-​bidu li bdejt nipprietka minn dar għal dar, kien ikolli tensjoni kbira fuqi—kienu jinġemgħu ġo fija l-​istess sentimenti li kont inħoss qabel xi rejd. Issa nħossni kunfidenti li nistaʼ nibqaʼ kalm, anki jekk xi ħadd jipprova jipprovokani. Maż-​żmien, jien tgħallimt inkun paċenzjuż man-​nies. Jiddispjaċini li ħlejt daqshekk żmien minn ħajti, imma issa nħoss li ħajti tassew għandha skop. Nieħu gost nuża saħħti biex naqdi lil Alla Ġeħova u ngħin lil oħrajn.

[Nota taʼ taħt]