X’inhi s-salvazzjoni?
It-tweġiba tal-Bibbja
It-termini “salva” u “salvazzjoni” kultant jintużaw minn kittieba tal-Bibbja biex jagħtu l-idea li persuna qed tiġi meħlusa minn xi periklu jew qerda. (Eżodu 14:13, 14; Atti 27:20) Iżda dawn it-termini spiss jirreferu għall-ħelsien mid-dnub. (Mattew 1:21) Ladarba l-mewt hi r-riżultat tad-dnub, uħud li jiġu salvati mid-dnub għandhom it-tama li jgħixu għal dejjem.—Ġwanni 3:16, 17. a
Kif tistaʼ tiġi salvat?
Biex tikseb is-salvazzjoni, għandek bżonn teżerċita l-fidi f’Ġesù u turi din il-fidi billi tobdi l-kmandi tiegħu.—Atti 4:10, 12; Rumani 10:9, 10; Ebrej 5:9.
Il-Bibbja turi li jrid ikollok għemejjel, jew atti t’ubbidjenza, biex turi li l-fidi tiegħek hi ħajja. (Ġakbu 2:24, 26) Madankollu, is-salvazzjoni mhijiex xi ħaġa li nistgħu niksbu bis-saħħa tagħna. Hi “l-għotja t’Alla” bbażata fuq “il-qalb tajba mhix mistħoqqa,” jew “il-grazzja,” tiegħu.—Efesin 2:8, 9; Il-Bibbja, Għaqda Biblika Maltija.
Tistaʼ titlifha s-salvazzjoni?
Iva. Bħalma bniedem li jiġi salvat milli jegħreq jistaʼ jaqaʼ jew jerġaʼ jaqbeż fl-ilma, bniedem li jkun ġie salvat mid-dnub imma li ma jibqax jeżerċita l-fidi jistaʼ jitlef is-salvazzjoni. Għal din ir-raġuni, il-Bibbja tħeġġeġ lill-Kristjani li rċivew is-salvazzjoni biex ‘jiġġieldu bl-aħrax għall-fidi.’ (Ġuda 3) Lil dawk li ġew salvati tagħtihom ukoll din it-twissija: “Ibqgħu wettqu s-salvazzjoni tagħkom bil-biżaʼ u t-tregħid.”—Filippin 2:12.
Min hu s-Salvatur—Alla jew Ġesù?
Il-Bibbja tidentifika lil Alla bħala s-sors ewlieni tas-salvazzjoni, u spiss tirreferi għalih bħala “Salvatur.” (1 Samwel 10:19; Isaija 43:11; Titu 2:10; Ġuda 25) Barra minn hekk, Alla uża diversi rġiel biex jeħles lill-ġens tal-Iżrael tal-qedem, u l-Bibbja ssejħilhom “salvaturi.” (Neħemija 9:27; Imħallfin 3:9, 15; 2 Slaten 13:5) b Bl-istess mod, ladarba Alla jipprovdi salvazzjoni mid-dnub permezz tas-sagrifiċċju bħala fidwa taʼ Ġesù Kristu, il-Bibbja tirreferi għal Ġesù bħala “Salvatur.”—Atti 5:31; Titu 1:4. c
Kulħadd se jiġi salvat?
Le, xi nies mhux se jiġu salvati. (2 Tessalonikin 1:9) Meta xi ħadd staqsa lil Ġesù, “Huma ftit dawk li jiġu salvati?” hu wieġeb: “Stinkaw kemm tifilħu biex tidħlu mill-bieb id-dejjaq, għax ngħidilkom, ħafna jipprovaw jidħlu imma ma jkunux jistgħu.”—Luqa 13:23, 24.
Ideat żbaljati dwar salvazzjoni universali
Idea żbaljata: L-1 Korintin 15:22 jgħallem li hemm salvazzjoni universali għax jgħid li “kulħadd għad jingħata l-ħajja fil-Kristu.”
Fatt: Il-kuntest taʼ dan il-vers jiddiskuti l-irxoxt. (1 Korintin 15:12, 13, 20, 21, 35) Allura l-frażi “kulħadd għad jingħata l-ħajja fil-Kristu” sempliċement tfisser li dawk kollha li jiġu rxoxtati jingħataw din il-barka permezz taʼ Ġesù Kristu.—Ġwanni 11:25.
Idea żbaljata: Titu 2:11 jgħallem li hemm salvazzjoni universali billi jgħid li Alla se jagħti “salvazzjoni lill-bnedmin kollha.”—GħBM.
Fatt: Il-kelma Griega tradotta “kollha” f’dan il-vers tistaʼ tfisser ukoll “kull xorta jew varjetà.” d B’hekk, il-fehma korretta taʼ Titu 2:11 hi li Alla qed jagħmel is-salvazzjoni disponibbli lil kull xorta taʼ bnedmin, inkluż nies “minn kull ġens u tribù u poplu u lsien.”—Rivelazzjoni 7:9, 10.
Idea żbaljata: It-2 Pietru 3:9 jgħallem li hemm salvazzjoni universali billi jgħid li Alla “ma jixtieqx li xi ħadd jinqered.”
Fatt: Alla jrid li nies isalvaw, imma ma jisforzahomx biex jaċċettaw il-provvediment tiegħu għas-salvazzjoni. “Jum il-ġudizzju” tiegħu se jinkludi “l-qerda taʼ nies bla devozzjoni lejn Alla.”—2 Pietru 3:7.
a Il-Bibbja tirreferi għal uħud bħala li huma “salvati” avolja s-salvazzjoni tagħhom mid-dnub u l-mewt għadha ma seħħitx.—Efesin 2:5; Rumani 13:11.
b Fil-versi ċitati, xi traduzzjonijiet jużaw kliem bħal “feddej” jew “ħellies” minflok “salvatur.” Madankollu, fit-test Ebrajk oriġinali tal-Bibbja, tintuża l-istess kelma għal dawn is-salvaturi umani kif tintuża postijiet oħra fil-Bibbja meta tirreferi għal Alla Ġeħova bħala Salvatur.—Salm 7:10.
c L-isem Ġesù ġej mill-isem Ebrajk Ġeħosugħa, li jfisser “Ġeħova Hu Salvazzjoni.”
d Ara Vine’s Complete Expository Dictionary of Old and New Testament Words. L-istess kelma Griega tidher f’Mattew 5:11, fejn hemm l-istqarrija taʼ Ġesù li n-nies kienu se jgħidu “kull xorta taʼ ħażen” kontra s-segwaċi tiegħu.
Tistaʼ Tara Wkoll
MISTOQSIJIET DWAR IL-BIBBJA MWEĠBIN
Is-sagrifiċċju taʼ Ġesù kif inhu “fidwa għal ħafna”?
Il-fidwa kif tipprovdi ħelsien mid-dnub?
MISTOQSIJIET DWAR IL-BIBBJA MWEĠBIN
Tgħallem il-Bibbja li ‘jekk tkun salvat darba, tkun salvat dejjem’?
Ġesù ta tixbiha li twieġeb il-mistoqsija.
MISTOQSIJIET DWAR IL-BIBBJA MWEĠBIN
Huwa Biżżejjed li Temmen f’Ġesù Biex Issalva?
Il-Bibbja tiddeskrivi lil xi wħud li jemmnu f’Ġesù imma li mhux se jiġu salvati. Dan kif jistaʼ jkun?
ESSENTIAL BIBLE TEACHINGS
Ġesù Għala Miet?
Jistaʼ jkun li smajt li hu miet għal dnubietna. Imma jistaʼ jkun li miljuni taʼ nies jibbenefikaw verament minn sagrifiċċju wieħed?
