တခြား​ပုဂ္ဂိုလ်တွေဟာ ကလေးတို့​ထက်​ကော၊ တို့​ထက်​ကော ပို​အဆင့်မြင့်​တယ်၊ ပို​ကြီးမြတ်​တယ်၊ ပို​ခွန်အားကြီး​တယ်​ဆိုတာ ကလေးတို့ သဘောတူ​ကြ​မှာ သေချာ​တယ်။ တို့ထက် ဘယ်သူ ကြီးမြတ်တယ်​လို့ ပြော​မ​လဲ။— ယေ​ဟော​ဝါ​ဘုရား ဖြစ်တယ်။ ဘုရားသားတော် ကြီးမြတ်​တဲ့​ဆရာ​ကော။ သူ​လည်း​ပဲ တို့​တစ်​တွေ​ထက် ပို​အဆင့်မြင့်သလား။— မြင့်​တာ​ပေါ့။

ယေရှုဟာ ကောင်းကင်ဘုံမှာ ဘုရားသခင်နဲ့​အတူ နေ​ခဲ့​တယ်​လေ။ နာမ်ဝိညာဉ်သား၊ ကောင်းကင်တမန် ဖြစ်ခဲ့တယ်။ တခြား ကောင်းကင်တမန်တွေ၊ နာမ်ဝိညာဉ်သား​တွေကို​ကော ဘုရားသခင် ဖန်ဆင်း​ခဲ့သလား။— ဟုတ်​တယ်၊ သန်း​ကုဋေကုဋာ ဖန်ဆင်းခဲ့​တယ်။ ဒီ​ကောင်းကင်​တမန်တွေ​လည်း တို့​တစ်​တွေ​ထက် အဆင့်အတန်း ပို​မြင့်​တယ်၊ ပို​လည်း တန်ခိုးကြီး​တယ်။—ဆာလံ ၁၀၄:၄။ ဒံယေလ ၇:၁၀။

မာရိ​ဆီ လာပြီး စကား​ပြောခဲ့တဲ့ ကောင်းကင်တမန်​ရဲ့ နာမည်ကို မှတ်မိသလား။— ဂါဗြေလ။ သူက မာရိ​ရဲ့ ကလေး​ဟာ ဘုရားသခင်ရဲ့ သားတော် ဖြစ်မယ်​လို့ ပြောခဲ့တယ်​လေ။ ဘုရားသခင်​ဟာ နာမ်​ဝိညာဉ် သားတော်​ရဲ့ အသက်ကို မာရိ​ဗိုက်​ထဲ ထည့်​ပေးခဲ့တယ်။ ဒီလိုနဲ့ ယေရှုဟာ ကမ္ဘာ​ပေါ်မှာ ကလေးလေး တစ်ယောက်​အနေနဲ့ ဖွားမြင်​လာနိုင်​ခဲ့​တာ​ပေါ့။—လုကာ ၁:၂၆၊ ၂၇။

ဒီ​အံ့သြစရာ​အဖြစ်​ကို ယုံကြည်သလား။ ယေရှုဟာ ကောင်းကင်ဘုံမှာ ဘုရားသခင်နဲ့​အတူ နေ​ခဲ့​တယ်​ဆိုတာ​ကို​ကော ယုံကြည်သလား။— ကောင်းကင်မှာ နေခဲ့​တယ်လို့ ယေရှု ပြောတယ်။ အဲဒီ​အကြောင်း​တွေကို ယေရှု ဘယ်လို သိသလဲ။ ဂါဗြေလ ပြောခဲ့တာ​တွေကို ယေရှု ကလေးဘဝ​တုန်း​က မာရိ ပြော​ပြခဲ့​မှာ​ပဲ။ ယောသပ်​က​လည်း ယေရှုရဲ့ ဖေဖေ​အရင်း​ဟာ ဘုရားသခင် ဖြစ်တယ်​ဆို​တာ ပြော​ပြခဲ့​မှာ​ပဲ။

ယေရှု နှစ်ခြင်းခံ​တဲ့အခါ​မှာ ဘုရားသခင်​က ကောင်းကင်​က​နေ ‘သူ​ဟာ ငါ့ရဲ့​ချစ်သား​ပဲ’ ဆို​ပြီးတော့​တောင် ပြောခဲ့တာ​ပဲ။ (မဿဲ ၃:၁၇) မသေဆုံးခင် တစ်ညမှာ ယေရှု​က “အဖ၊ ဒီ​လောက မတည်ရှိ​ခင် အဖ​ရဲ့  ဘေးနား​မှာ ကျွန်တော် ခံစားခဲ့​ရတဲ့ ဘုန်းအသရေ​မျိုး​ကို အခု​လည်း အဖ​ရဲ့ ဘေးနား​မှာ ပြန်​ခံစားခွင့်​ပေးပါ” ဆို​ပြီး ဆုတောင်း​ခဲ့​တယ်။ (ယောဟန် ၁၇:၅) ဟုတ်​တယ်​ကွဲ့၊ ကောင်းကင်ဘုံမှာ ဘုရားသခင်နဲ့​အတူ ပြန်​နေထိုင်​ဖို့ ပြန်​ခေါ်ယူပါ​ဆို​ပြီး ယေရှု ဆုတောင်း​နေတာ​လေ။ ကောင်းကင်ဘုံမှာ ဘယ်လို နေလို့​ရနိုင်​မှာ​လဲ။— သူ့ကို ယေ​ဟော​ဝါ​ဘုရားက မမြင်နိုင်တဲ့ နာမ်ဝိညာဉ်​ပုဂ္ဂိုလ်၊ ဒါမှမဟုတ် ကောင်းကင်တမန်​ဖြစ်အောင် ပြန်​လုပ်ပေး​မှ နေလို့​ရနိုင်​မယ်။

အခု ကလေးတို့​ကို အရေးကြီးတဲ့ မေးခွန်း​တစ်ခု မေး​ချင်​တယ်။ ကောင်းကင်တမန်​အားလုံး ကောင်းတဲ့​သူတွေ​ချည်း​ပဲ​လား။ ဘယ်လို ထင်သလဲ။— ဟုတ်​တယ်၊ ဟို​အရင်တုန်းက​တော့ အားလုံး​ဟာ ကောင်းတဲ့​သူတွေ​ချည်း​ပါပဲ။ သူတို့ကို ယေ​ဟော​ဝါ ဖန်ဆင်းခဲ့​လို့​ပဲ။ ဘုရားသခင် လုပ်သ​မျှ​ဟာ ကောင်းတာ​တွေ​ချည်း​ပဲ။ နောက်ပိုင်း​ကျ​တော့ ကောင်းကင်တမန်​တစ်ပါး ဆိုး​သွားခဲ့တယ်။ ဘယ်လို​ ဖြစ်သွားသလဲ။

အဖြေ ရဖို့ ပထမ လူယောက်ျား​နဲ့ လူ​မိန်းမ၊ အာဒံနဲ့ ဧဝ​တို့​ကို ဘုရားသခင် ဖန်ဆင်း​ခဲ့​တဲ့​အချိန်ကို ပြန်​သွားရမယ်။ လူ​တချို့က အာဒံနဲ့ ဧဝ​တို့​အကြောင်း​ဟာ ယုံ​တမ်း​စကား​ပါလို့ ပြော​ကြ​တယ်။ ဒါပေမဲ့ ကြီးမြတ်​တဲ့​ဆရာ​က တကယ့်​ဖြစ်ရပ်​ဆို​တာ ကောင်းကောင်း သိတယ်။

ဘုရားသခင်​က အာဒံနဲ့ ဧဝ​တို့​ကို ဖန်ဆင်းပြီး လှပတဲ့ ဧဒင်​ဥယျာဉ်၊ ပရဒိသုမှာ နေရာချ​ပေးခဲ့တယ်။ သားသမီး အများကြီး မွေးဖွား​ပြီး မိသားစုကြီး​တစ်ခု​အနေနဲ့ ပရဒိသုမှာ အမြဲတမ်း နေ​သွား​နိုင်တယ်။ ဒါပေမဲ့ အရေးကြီးတဲ့​အချက်တစ်ချက်​ကို သိထား​ရမယ်။ ဒီ​အကြောင်းကို ရှေ့​ပိုင်း​မှာ ပြောခဲ့​ပြီးပြီ။ မှတ်မိ​သေး​လား​ဆို​တာ ကြည့်ရအောင်။

 အာဒံနဲ့ ဧဝ​အနေနဲ့ ဧဒင်​ဥယျာဉ်​ထဲ​က အပင်​တွေ​ရဲ့ အသီး​တွေကို စိတ်ကြိုက် စားလို့​ရ​တယ်လို့ ယေ​ဟော​ဝါ ပြောပြ​ထားတယ်။ ဒါပေမဲ့ အပင်​တစ်ပင်​ရဲ့ အသီး​ကို​တော့ မစား​ရ​ဘူး​တဲ့။ စား​ရင် ဘာဖြစ်​မယ်​ဆို​တာ​လည်း ဘုရားသခင် ပြော​ထားတယ်။ “မင်း သေ​ကို သေ​ရမယ်” ဆို​ပြီး ပြောခဲ့တယ်။ (ကမ္ဘာဦး ၂:၁၇) ဒီတော့ အာဒံနဲ့ ဧဝ​တို့ ဘယ်အချက်ကို သိထားရ​မလဲ။—

နာခံမှု အရေးကြီးတယ်​ဆိုတဲ့ အချက်​ပဲ​ကွဲ့။ ဟုတ်​တယ်၊ အသက်ရှင်ရေး​ဟာ ယေ​ဟော​ဝါ​ဘုရားကို နာခံ​တဲ့​အပေါ်မှာ မူတည်​တယ်​လေ။ အာဒံနဲ့ ဧဝ​အနေနဲ့ ဘုရားသခင်ကို နာခံ​ပါ့​မယ်​လို့ ပြော​ရုံ​လောက်​နဲ့ မပြီး​ဘူး။ နာခံ​မှု​ကို အလုပ်နဲ့ ပြ​ရမယ်။ ဘုရားသခင်​စကားကို နားထောင်​ရင် ဘုရားသခင်ကို ချစ်​တယ်၊ ဘုရားသခင်ရဲ့ အုပ်ချုပ်မှုကို လိုချင်​တယ်​ဆိုတာ ပြ​ရာ​ရောက်​တာ​ပေါ့။ အဲဒီလို​ဆို​ရင် ပရဒိသု​မှာ ထာဝစဉ် နေထိုင်​သွား​နိုင်မယ်​ပေါ့။ ဒါပေမဲ့ အဲဒီ​အပင်​ရဲ့ အသီး​ကို စား​မယ်​ဆိုရင် ဘာ​ပြ​ရာ​ရောက်​မ​လဲ။—

ဘုရားသခင် ပေး​ထားတာ​တွေ​အတွက် ကျေးဇူးကန်း​ရာ ရောက်​မှာ​ပေါ့။ ကလေးတို့သာ အဲဒီမှာ​ရှိခဲ့ရင် ယေ​ဟော​ဝါ​ရဲ့ စကားကို နားထောင်​ကြ​မလား။— အစပိုင်းမှာ​တော့ အာဒံနဲ့ ဧဝ​တို့ နားထောင်​ခဲ့​ကြ​တယ်။ ဒါပေမဲ့ နောက်ပိုင်း​ကျ​တော့ သူတို့​ထက် အဆင့်​မြင့်​တဲ့ ပုဂ္ဂိုလ်​တစ်​ဦး​က ဧဝကို လှည့်စား​ခဲ့​တယ်။ ဧဝကို ယေ​ဟော​ဝါ​ရဲ့ စကား နားမထောင်​အောင် လုပ်လိုက်​တယ်။ အဲဒီ​ပုဂ္ဂိုလ် ဘယ်သူ​လဲ၊ သိသလား။—

 မြွေ​တစ်ကောင်က ဧဝကို လာ​စကားပြော​တယ်လို့ ကျမ်းစာက ဆို​တယ်​ကွဲ့။ ဒါပေမဲ့ မြွေ စကား​မပြောတတ်ဘူး​ဆို​တာ ကလေးတို့ သိပါ​တယ်။ ဒါဆို​ရင် ဘယ်လို ပြောသလဲ။— ကောင်းကင်တမန်​တစ်ပါး​က မြွေ စကားပြော​နေသလို​ဖြစ်အောင် လုပ်လိုက်တာ​လေ။ တကယ်​ဆို​ရင် အဲဒီ​ကောင်းကင်တမန်​က စကားပြော​နေတာကွဲ့။ အဲဒီ​ကောင်းကင်တမန်​ဟာ မကောင်းတာတွေ စ​ကြံစည်​ခဲ့​တယ်။ အာဒံနဲ့ ဧဝတို့ရဲ့ ကိုးကွယ်​မှု​ကို လိုချင်​ခဲ့​တယ်။ သူ​ခိုင်း​တာ​ကို လုပ်​စေချင်တယ်။ ဘုရားသခင်ရဲ့ နေရာကို လု​ချင်​တာ​လေ။

ဒါနဲ့ ဒီ​ကောင်းကင်တမန်​ဆိုး​က ဧဝ​စိတ်ထဲမှာ မကောင်း​တဲ့ အကြံအစည်​တွေ ထည့်​ပေးခဲ့တယ်။ ‘ဘုရားသခင်​က မင်း​တို့​ကို အမှန် မပြောဘူး။ အဲဒီ​အပင်​ရဲ့ အသီး​ကို စား​ရင် မင်း​တို့ သေ​မှာ မဟုတ်ပါဘူး။ ဘုရားသခင်​လို ပညာရှိ​လာမယ်’ ဆို​ပြီး မြွေ​က​နေ​တစ်ဆင့် ဧဝကို ပြောခဲ့တယ်။ အဲဒီ​စကားကို ကလေးတို့သာ ကြားခဲ့ရင် ယုံကြည်​လိုက်​မလား။—

ဧဝ​ဟာ ဘုရားသခင် မ​ပေးတဲ့ ဥစ္စာ​တစ်ခုခုကို လိုချင်​လာတယ်။ ဒါနဲ့ တားမြစ်​ထားတဲ့ အပင်​ရဲ့ အသီး​ကို စား​လိုက်တယ်။ ပြီးတော့ အာဒံ​ကို​လည်း တချို့ ပေး​လိုက်တယ်။ အာဒံ​က​တော့ မြွေ​ပြောတာကို မယုံ​ဘူး။ ဒါပေမဲ့ ဘုရားသခင်ကို ချစ်​တာ​ထက် ဧဝ​ကို ပို​ချစ်တယ်။ ဒါနဲ့ သူ​လည်း အဲဒီ​အပင်​ရဲ့ အသီး​ကို စား​လိုက်​ရော။—ကမ္ဘာဦး ၃:၁-၆။ ၁ တိမောသေ ၂:၁၄။

ဒါနဲ့ ဘာဖြစ်​သွား​ကြသလဲ။— အာဒံနဲ့ ဧဝ​တို့ဟာ မစုံလင်​တော့​ဘူး၊ အို​လာတယ်၊ ပြီးတော့ သေသွား​ကြ​တယ်။ သူတို့ မစုံလင်​တဲ့​အတွက် သူတို့ရဲ့ သားသမီး​အားလုံး​လည်း မစုံလင်​ကြ​လို့ တဖြည်းဖြည်း​နဲ့ အို​လာ​ပြီး သေသွား​ကြ​တယ်။ ဘုရားသခင် မ​လိမ်​ခဲ့​ဘူးကွဲ့။ အသက်ရှင်ခြင်း​ဟာ ဘုရားသခင်ရဲ့ စကားကို  နားထောင်ခြင်း​ပေါ်မှာ တကယ်ပဲ မူတည်​နေတယ်။ (ရောမ ၅:၁၂) ဧဝကို လိမ်​ခဲ့​တဲ့ ကောင်းကင်တမန်​ကို စာတန်​မာရ်နတ်​လို့ ခေါ်တဲ့​အကြောင်း၊ ဆိုး​သွား​တဲ့ တခြား ကောင်းကင်တမန်တွေကို​တော့ နတ်ဆိုး​တွေ​လို့ ခေါ်တဲ့​အကြောင်း ကျမ်းစာမှာ ဆို​ထား​တယ်။—ယာကုပ် ၂:၁၉။ ဗျာဒိတ် ၁၂:၉။

ဘုရားသခင် ဖန်ဆင်းခဲ့​တဲ့ ကောင်းတဲ့ ကောင်းကင်တမန်​ဟာ ဘယ်လို ဆိုး​သွားခဲ့​တယ်​ဆိုတာ ကလေးတို့ နားလည်​နိုင်သလား။— မကောင်းတာတွေ​ကို စပြီး တွေးတော​ခဲ့လို့​ပဲ။ သူ​ဟာ အရေး​အကြီးဆုံး​ပုဂ္ဂိုလ် ဖြစ်ချင်​တယ်။ အာဒံနဲ့ ဧဝ​တို့​ကို ကလေးတွေ မွေးဖွား​ဖို့ ဘုရားသခင် မိန့်မှာ​ခဲ့​တာ​ကို သိလို့ အဲဒီ​ကလေးတွေ​အားလုံး ကိုးကွယ်​တာ​ကို လိုချင်​ခဲ့​တယ်။ မာရ်နတ်​ဟာ လူတိုင်းကို ယေဟော​ဝါ​ရဲ့ စကား နားမထောင်​အောင် လုပ်ချင်​တယ်။ ဒါနဲ့ သူက တို့​ရဲ့ ဦးနှောက်​ထဲမှာ မကောင်းတဲ့ အကြံအစည်​တွေကို ထည့်​ပေးဖို့ ကြိုးစား​တယ်။—ယာကုပ် ၁:၁၃-၁၅။

ဘယ်သူမှ ယေ​ဟော​ဝါ​ကို တကယ် မချစ်​ဘူးလို့ မာရ်နတ် ပြောတယ်။ တို့​ရော၊ ကလေးတို့​ပါ ဘုရားသခင်ကို မချစ်​ဘူး၊ ဘုရားသခင် ပြောတဲ့​အတိုင်း တကယ်တမ်း လုပ်ချင်​ကြ​တာ မဟုတ်ဘူးလို့ ​ပြောတယ်။ တို့​တစ်​တွေ ယေ​ဟော​ဝါ​စကားကို နားထောင်​တာ​ဟာ တို့​စိတ်တိုင်းကျ အခြေအနေ​မျိုးမှာ ရှိလို့သာ နားထောင်​တာ​တဲ့။ မာရ်နတ် ပြောတာ မှန်​ရဲ့​လား။ တို့​တစ်​တွေ သူ​ပြောတဲ့​အတိုင်း ဖြစ်နေ​ကြသလား။

မာရ်နတ်​ဟာ လိမ်ညာ​သူ ဖြစ်တယ်လို့ ကြီးမြတ်​တဲ့​ဆရာ​က ပြောခဲ့တယ်။ ယေရှုဟာ ယေ​ဟော​ဝါ​ကို နာခံ​ခြင်းအားဖြင့် ဘုရားသခင်ကို ချစ်ကြောင်း သက်သေ​ပြခဲ့တယ်။ ပြီးတော့ ယေရှုဟာ လွယ်​တဲ့အခါ​ကျ​မှ ဘုရားသခင်​စကားကို နားထောင်​တာ မဟုတ်ဘူး။ အချိန်တိုင်း​မှာ နားထောင်​ခဲ့​တယ်။ တခြား​လူတွေ​က ခက်​အောင်​လုပ်တဲ့​အခါမှာ​တောင်မှ နားထောင်​ခဲ့​တယ်။ သေ​တဲ့​အထိ ယေ​ဟော​ဝါ​အပေါ်မှာ သစ္စာ​ရှိခဲ့တယ်။ ဒါကြောင့်​လည်း ဘုရားသခင်​က သူ့ကို ထာဝစဉ် အသက်ရှင်ဖို့ ပြန်ရှင်​စေခဲ့တယ်။

တို့​တစ်​တွေ​ရဲ့ အကြီးဆုံး​ရန်သူ​ဟာ ဘယ်သူ ဖြစ်တယ်လို့ ကလေးတို့ ပြော​ကြ​မ​လဲ။—​ ဟုတ်တယ်​ကွဲ့၊ စာတန်​မာရ်နတ်​ပဲ။ ကလေးတို့ သူ့ကို မြင်နိုင်သလား။— မမြင်နိုင်​ဘူး။ ဒါပေမဲ့ သူ ရှိတယ်ဆိုတာ​ရယ်၊ တို့​ထက် ပို​အဆင့်မြင့်​တယ်၊ ပို​တန်ခိုးကြီး​တယ်​ဆိုတာ​ရယ်​ကို တို့​တစ်​တွေ သိ​ကြ​တယ်။ ဒါပေမဲ့ မာရ်နတ်​ထက် ဘယ်သူ ပို​အဆင့်မြင့်သလဲ။— ယေ​ဟော​ဝါ​ဘုရား​ပဲ​ပေါ့။ ဒါကြောင့် ဘုရားသခင်​ဟာ တို့​တစ်​တွေကို ကာကွယ်​နိုင်မှန်း တို့​သိ​ကြ​တယ်။