အခန်း ၅
ဘုရားသခင့်မိတ်ဆွေများ ပရဒိသု၌ နေထိုင်ကြမည်
ပရဒိသုသည် ယခုကျွန်ုပ်တို့နေထိုင်သောလောကနှင့် တူမည်မဟုတ်ပါ။ မြေကြီးပေါ်တွင် ဆင်းရဲခြင်းနှင့်ဝမ်းနည်းခြင်း၊ နာကျင်ခြင်းဝေဒနာတို့ဖြင့်ပြည့်နေစေဖို့ ဘုရားသခင်တစ်ခါမျှအလိုမရှိခဲ့ပါ။ အနာဂတ်တွင် ဘုရားသခင်သည် မြေကြီးကိုပရဒိသုဖြစ်စေပါလိမ့်မည်။ ပရဒိသုသည် အဘယ်အရာနှင့်တူမည်နည်း။ ကျမ်းစာကမည်သို့ဆိုသည်ကို ကြည့်ကြပါစို့–
လူကောင်းများ။ ပရဒိသုသည် ဘုရားသခင့်မိတ်ဆွေများ၏ နေအိမ်ဖြစ်မည်။ သူတို့သည် အချင်းချင်းတို့အတွက် ကောင်းမွန်ရာများကိုပြုကြမည်။ ဘုရားသခင်၏ဖြောင့်မတ်သောနည်းလမ်းအတိုင်း သူတို့အသက်ရှင်ကြလိမ့်မည်။—သုတ္တံ ၂:၂၁။
အစားအစာပေါများခြင်း။ ပရဒိသုတွင် ငတ်မွတ်ခြင်းရှိမည်မဟုတ်။ သမ္မာကျမ်းစာက “မြေကြီးပေါ်တွင် အသီးအနှံ [သို့မဟုတ်၊ အစားအစာ] များစွာရှိလိမ့်မည်” ဟုဆိုသည်။—ဆာလံ ၇၂:၁၆၊ ကဘ။
ကောင်းမွန်သောနေအိမ်များနှင့် ပျော်စရာကောင်းသောအလုပ်အကိုင်။ မြေကြီးပရဒိသုပေါ်တွင် အိမ်ထောင်စုတိုင်းသည် ကိုယ်ပိုင်နေအိမ်ရှိကြလိမ့်မည်။ လူတိုင်း စစ်မှန်သောပျော်ရွှင်မှုရစေမည့် အလုပ်အကိုင်ကိုလုပ်ကိုင်ကြလိမ့်မည်။—ဟေရှာယ ၆၅:၂၁-၂၃။
ကမ္ဘာချီငြိမ်သက်မှု။ စစ်တိုက်၍ စစ်ပွဲ၌သေဆုံးခြင်း ရှိတော့မည်မဟုတ်။ ဘုရားသခင့်နှုတ်ကပါဌ်တော်က “[ဘုရားသခင်သည်] စစ်မှုကိုငြိမ်းစေတော်မူ” မည်ဟုဖော်ပြ၏။—ဆာလံ ၄၆:၈၊ ၉။
ကောင်းသောကျန်းမာရေး။ ကျမ်းစာကဤသို့ကတိပြုသည်– “[ပရဒိသု၏] မြို့သားကလည်း၊ ‘ငါနာသည်ဟုမဆိုရ။’” (ဟေရှာယ ၃၃:၂၄) ထို့အပြင် မည်သူမျှခြေဆွံ့ခြင်း သို့မဟုတ် မျက်စိကန်းခြင်း သို့မဟုတ် နားမကြားခြင်း သို့မဟုတ် စကားအခြင်းဖြစ်တော့မည်မဟုတ်။—ဟေရှာယ ၃၅:၅၊ ၆။
နာကျင်ခြင်း၊ ဝမ်းနည်းခြင်းနှင့် သေခြင်းတို့အဆုံးတိုင်ခြင်း။ ဘုရားသခင့်နှုတ်ကပါဌ်တော်က ဤသို့ဆိုသည်– “နောက်တစ်ဖန် သေဘေးမရှိရ။ စိတ်မသာညည်းတွားခြင်း၊ အော်ဟစ်ခြင်း၊ ပင်ပန်းခြင်းလည်းမရှိရ။ အကြောင်းမူကား၊ ရှေးဖြစ်ဖူးသောအရာတို့သည် ရွေ့သွားကြပြီ။”—ဗျာဒိတ် ၂၁:၄။
လူဆိုးများရှိတော့မည်မဟုတ်။ ယေဟောဝါက ဤသို့ကတိပြုထားသည်– “အဓမ္မလူတို့မူကား ပြည်တော်မှပယ်ရှင်းခြင်း၊ လွန်ကျူးသောသူတို့သည် နုတ်ပစ်ခြင်းကိုခံရကြလိမ့်မည်။”—သုတ္တံ ၂:၂၂။
လူတို့သည် တစ်ဦးနှင့်တစ်ဦး ချစ်ခင်လေးစားကြမည်။ မတရားမှု၊ ဖိနှိပ်မှု၊ တပ်မက်မှုနှင့် မုန်းတီးမှုတို့ရှိတော့မည်မဟုတ်ပါ။ လူတို့သည် စည်းလုံး၍ ဘုရားသခင်၏ဖြောင့်မတ်သောနည်းလမ်းများနှင့်အညီ နေထိုင်ကြလိမ့်မည်။—ဟေရှာယ ၂၆:၉။
