၁၊ ၂။ (က) ဘု​ရား​ဆီ​က ဘယ်​အဖိုး​တန်​ဆု​လက်​ဆောင်​ကို ကျွန်​တော်​တို့ ရ​ရှိ​ထား​သလဲ။ (ခ) အခု​အချိန်​မှာ ကျမ်း​စာ​မူ​တွေ​ကို ​ဆင်​ခြင်​သုံးသပ်​နိုင်​စွမ်း​ရှိ​ဖို့ ဘာ​ကြောင့် သိပ်​အရေး​ကြီး​သလဲ။

ကောင်း​ကင်​ဖခင်​ဟာ ကျွန်​တော်​တို့​ကို တန်​ဖိုး​မဖြတ်​နိုင်​တဲ့ အသက်​ဆု​လက်​ဆောင် ပေး​ထား​တယ်။ ဒါ​ကြောင့် ဘု​ရား​ရဲ့ အရည်​အသွေး​တွေ​ကို တု​ပနိုင်​စွမ်း​ရှိ​တဲ့ အသိ​ဉာဏ်​ရှိ လူ​သား​တွေ​အဖြစ်​ အသက်​ရှင်​နိုင်​ကြ​တယ်။ (ကမ္ဘာဦး ၁:၂၇) ဒီ​အဖိုး​တန်​ဆု​လက်​ဆောင်​ကြောင့် ကျွန်​တော်​တို့​ဟာ ကျမ်း​စာ​မူ​တွေ​ကို ဆင်​ခြင်​သုံးသပ်​နိုင်​ကြ​တယ်။ ကျမ်း​စာ​မူ​တွေ​ကို လိုက်​နာ​မယ်​ဆို​ရင် “အမှား​အမှန် ခွဲ​ခြား​သိ​နိုင်​အောင် လေ့ကျင့်​ထား​တဲ့” “ပိုင်း​ခြား​သိ​မြင်​နိုင်​စွမ်း” ရှိ​သူ​တွေ၊ ယေဟောဝါ​ကို​ချစ်​တဲ့ ရင့်​ကျက်​သူ​တွေ ဖြစ်​လာ​နိုင်​တယ်။​—ဟီ​ဘ​ရူး ၅:၁၄။

^၂ အခု​အချိန်​မှာ ကျမ်း​စာ​မူ​တွေ​ကို ​ဆင်​ခြင်​သုံးသပ်​နိုင်​စွမ်း​ရှိ​ဖို့ သိပ်​အရေး​ကြီး​တယ်။ အကြောင်း​က​တော့ ဒီ​လော​က​ကြီး​ဟာ အလွန် ရှုပ်​ထွေး​လာ​တဲ့​အတွက် ဘဝ​မှာ ကြုံ​တွေ့​နိုင်​တဲ့ အခြေ​အနေ​တိုင်း​ကို ဖြေရှင်း​နိုင်​တဲ့ စည်း​မျဉ်း​ဥ​ပဒေ​တွေ ရှိ​နိုင်​မှာ မဟုတ်​လို့​ပဲ။ ဒီ​အချက်​ကို ဆေး​သိ​ပ္ပံ​ပညာ​က ကောင်း​စွာ ဖော်ပြတယ်။ အထူး​သဖြင့် သွေး​ပါ​ဝင်​တဲ့ ဆေး​ဝါး​တွေ၊ ဆေး​ကု​ထုံး​တွေ​နဲ့​ပတ်​သက်​တယ်။ ဒါ​ဟာ ယေဟောဝါ​ကို နာ​ခံ​ချင်​သူ​တွေ​အတွက် အရေး​ကြီး​ကိစ္စ ဖြစ်​တယ်။ သက်​ဆိုင်​ရာ ကျမ်း​စာ​မူ​တွေ​ကို နား​လည်​ထား​မယ်​ဆို​ရင် အမှား​အမှန်​သိ​စိတ် ကြည်​လင်​စေ​တဲ့၊ ဘု​ရားရဲ့​မေတ္တာ အမြဲခံစား​ရ​စေ​တဲ့ ပညာ​ရှိ​ဆုံး​ဖြတ်​ချက်​တွေ ချ​နိုင်​တယ်။ (ပညာ​အလိမ္မာ ၂:၆-၁၁) အဲဒီ​မူ​တ​ချို့​ကို သုံးသပ်​ကြည့်​ကြ​စို့။

၃၊ ၄။ ကျမ်း​စာ​မှာ သွေး​ရဲ့​ မြင့်​မြတ်​မှု​ကို ဘယ်​အချိန်​မှာ ဦး​ဆုံး ဖော်ပြခဲ့​သလဲ။ ဒါ​ဟာ ဘယ်​အခြေ​ခံ အမှန်​တ​ရား​တွေ​အပေါ် အခြေ​ပြု​သလဲ။

^၃ အာ​ဗေ​လ​ကို ကာ​အိ​န​ သတ်​ပြီး​နောက် မကြာ​ခင် အသက်​နဲ့ သွေး​ရဲ့ ဆက်​စပ်​ မှု၊ အသက်​နဲ့ သွေး​ရဲ့ မြင့်​မြတ်​မှု​ကို ယေဟောဝါ ဦး​ဆုံး​ဖော်ပြခဲ့​တယ်။ “မင်း​ညီ​ရဲ့​သွေး​က မြေကြီး​ထဲ​က​နေ ငါ့​ကို အော်​ဟစ်​နေ​ပြီ” လို့ ကာ​အိ​န​ကို ဘု​ရား ပြော​တယ်။ (ကမ္ဘာဦး ၄:၁၀) ယေဟောဝါ​ရဲ့​အမြင်​မှာ အာ​ဗေ​လ​ရဲ့​သွေး​ဟာ ရက်ရက်​စက်​စက်​ အသတ်​ခံ​ခဲ့ရ​တဲ့ သူ့​အသက်​ကို ကိုယ်​စား​ပြု​တယ်။ ဒါ​ကြောင့် အာ​ဗေ​လ​ရဲ့​သွေး​ဟာ လက်​စား​ချေ​ပေး​ဖို့ ဘု​ရား​ကို အော်​ဟစ်​တယ်​လို့ ပြော​နိုင်​တယ်။​—ဟီ​ဘ​ရူး ၁၂:၂၄။

^၄ နော​ဧ​ခေတ် ရေ​လွှမ်း​မိုး​ဘေး​ပြီး​နောက် ဘု​ရား​သခင်​ဟာ လူ​တွေ​ကို တိ​ရစ္ဆာန်ရဲ့​အသား စား​ခွင့်​ပြု​ခဲ့​ပေမဲ့ သွေး​ကို စား​ခွင့်​မပြု​ဘူး။ “သွေး​ဟာ အသက်​ဖြစ်​လို့ သွေး​ပါ​တဲ့​အသား​ကို​တော့ မစား​နဲ့။ ဒါ့​အပြင် တစ်​ယောက်​ယောက်​က မင်း​တို့​ကို သတ်​ခဲ့ရင် အသက်​ဖြစ်​တဲ့ သူ့​ရဲ့​သွေး​ကို ငါ​ပြန်​တောင်း​မယ်” လို့​ ဘု​ရား ပြော​တယ်။ (ကမ္ဘာဦး ၉:၄၊ ၅) ဒီ​အမိန့်​ဟာ ကျွန်​တော်​တို့​ခေတ်​အထိ နော​ဧ​ရဲ့​ သား​စဉ်​မြေး​ဆက်​အားလုံး​နဲ့ သက်​ဆိုင်​တယ်။ ဒီ​အမိန့်​က ကာ​အိ​န​ကို ဘု​ရား​ပြော​ခဲ့​တဲ့​စကား​မှာ​ပါ​တဲ့ အခြေ​ခံ​အမှန်​တ​ရား​ကို ထပ်​မံ​အတည်​ပြု​တယ်။ အဲဒီ​အမှန်​တ​ရား​က​တော့ သွေး​ဟာ သက်​ရှိ​အားလုံး​ရဲ့ အသက်​ကို ကိုယ်​စား​ပြု​တယ်​ဆို​တာ​ပဲ။ ဒါ့​အပြင် အသက်​ရဲ့ ရင်း​မြစ်​ဖြစ်​တဲ့ ယေဟောဝါ​ဟာ အသက်​နဲ့ သွေး​ကို မလေး​မြတ်​သူ​အားလုံး​ကို အရေး​ယူ​မယ်​ဆို​တဲ့ အမှန်​တ​ရား​ကို​လည်း ဖော်ပြတယ်။​—ဆာလံ ၃၆:၉။

၅၊ ၆။ သွေး​ဟာ မြင့်​မြတ်​ပြီး တန်​ဖိုး​ရှိ​ကြောင်း မော​ရှေ​ပညတ်​က ဘယ်​လို ဖော်ပြသလဲ။ (“ တိ​ရစ္ဆာန်တွေရဲ့​အသက်​ကို လေး​မြတ်​ခြင်း” လေး​ထောင့်​ကွက်​ကို​လည်း ကြည့်​ပါ။)

^၅ အဲဒီ​အခြေ​ခံ​အမှန်​တ​ရား​နှစ်​ခု​ကို မော​ရှေ​ပညတ်​မှာ တွေ့​နိုင်​တယ်။ ဝတ်​ပြု​ရာ ၁၇:၁၀၊ ၁၁ မှာ ဒီ​လို ဖတ်​ရ​တယ်– “သွေး​တစ်​မျိုး​မျိုး​ကို စား​ရင် စား​တဲ့​လူ​ကို ငါ​ငြင်း​ပယ်​ပြီး ပယ်​ရှင်း​မယ်။ သတ္တ​ဝါ​ရဲ့ အသက်​ဟာ သွေး​မှာ ရှိ​တယ်။ မင်း​တို့​ရဲ့​အပြစ်​ကို ဖြေဖို့ သွေး​ကို ပူ​ဇော်​ရာ​ပလ္လင်​ပေါ်​မှာ လောင်း​ရ​မယ်​လို့ ငါ​သတ်​မှတ်​ထား​ပြီ။ အသက်​ဟာ သွေး​မှာ​ရှိ​တဲ့​အတွက် အပြစ်​ကို​ဖြေပေး​နိုင်​တာ သွေး​ပဲ။” *​—“ သွေး​ရဲ့ အပြစ်​ဖြေနိုင်​စွမ်း” လေး​ထောင့်​ကွက်​ကို ကြည့်​ပါ။

^၆ သတ်​လိုက်​တဲ့ တိ​ရစ္ဆာန်ရဲ့​သွေး​ကို ပူ​ဇော်​ရာ​ပလ္လင်​ပေါ်​မှာ အသုံး​မပြု​ရင် မြေပေါ်  သွန်​ရ​မယ်။ ဒါ​ဟာ အသက်​ကို ပိုင်​ရှင်​ဆီ ပြန်​ပေး​အပ်​တဲ့​သဘော​ပဲ။ (တ​ရား​ဟော​ရာ ၁၂:၁၆။ ယေဇကျေလ ၁၈:၄) ဒါ​ပေမဲ့ အစ္စရေး​လူမျိုး​ဟာ သူတို့​စား​မယ့်​အသား​က​နေ သွေး​တစ်​စက်​မကျန် ဖယ်​ထုတ်​တဲ့​အထိ အစွန်း​ရောက်​ဖို့ မလို​ဘူး။ အစ္စရေး​တစ်ဦး​ဟာ တိ​ရစ္ဆာန်​ကို သတ်​ပြီး သွေး​ကို ထုတ်​လိုက်​တယ်​ဆို​ရင် အမှား​အမှန်​သိ​စိတ် ကြည်​လင်​စွာ စား​သုံး​နိုင်​တယ်။ ဒါ​ဟာ အသက်​ပေး​ရှင်​ကို လေး​စား​တယ်​ဆို​တာ ဖော်ပြရာ​ရောက်​တယ်။

၇။ သွေး​ရဲ့​ မြင့်​မြတ်​မှု​ကို လေး​စား​ကြောင်း ဒါဝိဒ် ဘယ်​လို​ဖော်ပြသလဲ။

 ^၇ “[ဘု​ရား​သခင်​နဲ့] စိတ်​သဘော​ထား​ချင်း ကိုက်​ညီ​သူ” ဒါဝိဒ်​ဟာ သွေး​ပညတ်​ရဲ့ နောက်​ကွယ်​မှာ​ရှိ​တဲ့ မူ​တွေ​ကို နား​လည်​တယ်။ (တမန်​တော် ၁၃:၂၂) တစ်​ခါ​က သူ အလွန်​ ရေ​ငတ်​နေ​တယ်။ သူ့​စစ်​သည် သုံး​ဦး​ဟာ ရန်​သူ့​စ​ခန်း​ကို ထိုး​ဖောက်​ပြီး ရေ​တွင်း​ထဲ​က ရေ​ကို ခပ်​ယူ​လာ​ကြ​တယ်။ ဒါဝိဒ် ဘယ်​လို တုံ့​ပြန်​သလဲ။ “ဒီ​ရေ​ဟာ ကိုယ့်​အသက်​ကို ရင်း​ပြီး သွား​ယူ​တဲ့​သူ​တွေရဲ့ သွေး​ပါ” လို့ သူ​ပြော​တယ်။ သူ့​အမြင်​မှာ ဒီ​ရေ​ဟာ သူ့​လူ​တွေ​ရဲ့ အသက်​သွေး​နဲ့ တူ​တယ်။ ဒါ​ကြောင့် ရေ​ငတ်​နေ​ပေမဲ့ မသောက်​ဘဲ “ယေဟောဝါ​ရှေ့​မှာ သွန်​ချ​လိုက်​တယ်။”​—၂ ရှ​မွေ​လ ၂၃:၁၅-၁၇။

၈၊ ၉။ အသက်​နဲ့ သွေး​အပေါ် ဘု​ရား​ရဲ့ ရှု​မြင်​ပုံ​ဟာ ခ​ရစ်​ယာန်​အသင်း​တော် တည်​ထောင်​ချိန်​မှာ ပြောင်း​လဲ​ခဲ့​သလား။ ရှင်း​ပြပါ။

^၈ နော​ဧ​ခေတ် ရေ​လွှမ်း​မိုး​ဘေး​ပြီး​နောက် နှစ်​ပေါင်း ၂,၄၀၀ ခန့်​၊ ပညတ်​ပဋိ​ညာဉ် ပေး​ပြီး​နောက် နှစ်​ပေါင်း ၁,၅၀၀ ခန့်​​မှာ ယေဟောဝါ​ဟာ အစော​ပိုင်း ခ​ရစ်​ယာန်​အသင်း​တော်​ရဲ့ အုပ်​ချုပ်​ရေး​အဖွဲ့​ကို ဒီ​လို​ရေး​ဖို့ လှုံ့​ဆော်​တယ်– “လိုက်​နာ​ရ​မယ့် ဒီ​အရာတွေ​က​လွဲ​လို့ တ​ခြား​ဝန်​ကို ခင်​ဗျား​တို့​အပေါ် ထပ်​မတင်​ဖို့ သန့်​ရှင်း​သော စွမ်းအား​တော် အကူ​အညီ​နဲ့ ကျွန်​တော်​တို့ သဘော​တူ ဆုံး​ဖြတ်​နိုင်​ခဲ့​တယ်– ရုပ်​တု​ရှေ့ ပူ​ဇော်​ထား​တဲ့​အရာ၊ သွေး၊ လည်​ညှစ်​သတ်​ထား​တဲ့ တိ​ရစ္ဆာန်၊ လိင်​အကျင့်​ယို​ယွင်း​မှု​ကို အမြဲ ရှောင်​ကြဉ်​ကြ​ပါ။”​—တမန်​တော် ၁၅:၂၈၊ ၂၉။

^၉ သွေး​ဟာ မြင့်​မြတ်​တယ်၊ သွေး​ကို တ​လွဲ​သုံး​တာ​ဟာ ရုပ်​တု​ကိုးကွယ်​တာ၊ လိင်​အကျင့်​ယို​ယွင်း​တာ​လို ကိုယ်​ကျင့်​တ​ရား​အရ မှား​ယွင်း​တယ်​ဆို​တာ အစော​ပိုင်း အုပ်​ချုပ်​ရေး​အဖွဲ့ သိ​နား​လည်​မှန်း ရှင်း​နေ​ပါ​တယ်။ ဒါ​ကို ဒီ​နေ့ ခ​ရစ်​ယာန်​စစ်​တွေ​လည်း လက်ခံ​ကြ​တယ်။ ဒါ့​အပြင် သူတို့​ဟာ သွေး​နဲ့​ပတ်​သက်​ပြီး ဆုံး​ဖြတ်​ချက်​တွေ ချ​တဲ့​အခါ ကျမ်း​စာ​မူ​တွေ​ကို တွေး​တော​ဆင်​ခြင်​တဲ့​အတွက် ယေဟောဝါ​ရဲ့​စိတ်​ကို ရွှင်​လန်း​စေ​နိုင်​ကြ​တယ်။

၁၀၊ ၁၁။ (က) သွေး​သွင်း​တာ​နဲ့ သွေး​အစိတ်​အပိုင်း​လေး​ခု သွင်း​တာ​ကို ယေဟောဝါ​သက်​သေတွေ ဘယ်​လို ရှု​မြင်​ကြ​သလဲ။ (ခ) သွေး​နဲ့​ပတ်​သက်​တဲ့ ဘယ်​ကိစ္စတွေ​မှာ ခ​ရစ်​ယာန်​တွေရဲ့ သဘော​ထား ကွဲ​ပြား​နိုင်​သလဲ။

^၁၀ ‘သွေး​ကို ရှောင်​ကြဉ်’ တယ်​ဆို​တာ သွေး​မသွင်း​တာ၊ သွေး​မလှူ​တာ၊ သွေး​ကို သိမ်း​ဆည်း​မထား​တာ​ကို ဆိုလို​မှန်း ယေဟောဝါ​သက်​သေတွေ သိ​ကြ​တယ်။ သူတို့​ဟာ  ဘု​ရား​ပညတ်​ကို လေး​စား​တဲ့​အတွက် သွေး​နီ​ဥ၊ သွေး​ဖြူ​ဥ၊ သွေး​ဥ​မွှား၊ သွေး​ရည်​ကြည်​ဖြစ်​တဲ့ သွေး​ရဲ့ အဓိ​က​အစိတ်​အပိုင်း​လေး​ခု​ကို​လည်း လက်မခံ​​ကြ​ဘူး။

^၁၁ အခု​ခေတ်​မှာ အဲဒီ​သွေး​အစိတ်​အပိုင်း​လေး​ခု​ကို အပိုင်း​အစ​တွေ​အဖြစ် ထပ်​ဆင့် ခွဲ​ထုတ်​ယူ​ပြီး နည်း​အမျိုး​မျိုး​နဲ့ သုံး​နေ​ကြ​တယ်။ ခ​ရစ်​ယာန်​တစ်ဦး​ဟာ ဒီ​အပိုင်း​အစ​တွေ​ကို လက်ခံ​နိုင်​သလား။ ဒါ​တွေ​ကို “သွေး” အဖြစ် သူ​ရှု​မြင်​သလား။ ဒါ​နဲ့​ပတ်​သက်​လို့ တစ်ဦး​စီ ကိုယ်​ပိုင်​ဆုံး​ဖြတ်​ချက် ချ​ရ​မယ်။ ဒါ့​အပြင် ကိုယ့်​သွေး​ကို သို​လှောင်​ထား​ခြင်း​မဟုတ်​တဲ့ ဟီ​မို​ဒိုင်​ယာ​လစ်​စစ်​ (သွေး​ကို စက်​အတွင်း လည်​ပတ်​သန့်​စင်​ပြီး ကျောက်​ကပ်​ဆေး​ခြင်း)၊ သွေး​ကျဲ​စေ​ခြင်း၊ ဆဲလ်​ဆယ်​ထုတ်​ခြင်း​စ​တဲ့ ဆေး​ကု​ထုံး​တွေ​နဲ့​ပတ်​သက်​လို့​လည်း ကိုယ်​တိုင် ဆုံး​ဖြတ်​ရ​မယ်။​—“သွေး​အပိုင်း​အစ​တွေ​နဲ့ ခွဲ​စိတ်​ကု​သနည်း​တွေ” နောက်​ဆက်​တွဲ​ကို ကြည့်​ပါ

၁၂။ အမှား​အမှန်​သိ​စိတ်​နဲ့​ဆိုင်​တဲ့ ကိစ္စတွေ​ကို ကျွန်​တော်​တို့ ဘယ်​လို ရှု​မြင်​ပြီး ကိုင်​တွယ်​သင့်​သလဲ။

^၁၂ ကိုယ်​ပိုင်​ဆုံး​ဖြတ်​ရ​မယ့် ကိစ္စတွေ​ဟာ ယေဟောဝါ​အတွက် အရေး​မကြီး​ဘူး​လို့  ဆိုလို​သလား။ မဆိုလို​ဘူး။ အကြောင်း​က​တော့ ကိုယ်​တော်​ဟာ ကျွန်​တော်​တို့​ရဲ့ သဘော​ထား၊ စိတ်​လှုံ့​ဆော်​မှု​တွေ​ကို အလွန် စိတ်​ဝင်​စား​လို့​ပဲ။ (ပညာ​အလိမ္မာ ၁၇:၃ နဲ့ ၂၄:၁၂ ကို​ဖတ်​ပါ။) ဒါ​ကြောင့် ဆေး​ဝါး ဒါ​မှ​မဟုတ် ဆေး​ကု​ထုံး​တစ်​ခု​ခု​အကြောင်း ဆုတောင်း​ပြီး ရှာ​ဖွေ​လေ့​လာ​ပါ။ အဲဒီ​နောက် ကျမ်း​စာ​နဲ့ လေ့ကျင့်​ထား​တဲ့ အမှား​အမှန်​သိ​စိတ်​ကို နား​ထောင်​သင့်​တယ်။ (ရော​မ ၁၄:၂၊ ၂၂၊ ၂၃) တ​ခြား​သူ​တွေ​က ကျွန်​တော်​တို့​အတွက် မဆုံး​ဖြတ်​ပေး​သင့်​ဘူး။ ကျွန်​တော်​တို့​က​လည်း “ကျွန်​တော့်​နေ​ရာ​မှာ ခင်​ဗျား​သာ​ဆို​ရင် ဘယ်​လို​လုပ်​မလဲ” လို့​ မမေး​သင့်​ဘူး။ ဒီ​လို​ကိစ္စ​မျိုး​မှာ ခ​ရစ်​ယာန်​တစ်ဦး​စီ​ဟာ “ကိုယ့်​တာဝန်​ကိုယ် ထမ်း​ရ” မယ်။ *​—ဂလာ​တိ ၆:၅။ ရော​မ ၁၄:၁၂။ “ သွေး​ကို မြင့်​မြတ်​ရာ​အဖြစ် ငါ​ရှု​မြင်​သလား” လေး​ထောင့်​ကွက်​ကို ကြည့်​ပါ။

၁၃။ ယေဟောဝါ​ရဲ့ ပညတ်​တွေ​နဲ့ မူ​တွေ​က ကိုယ်​တော့်​အကြောင်း ဘာ​ဖော်ပြသလဲ။ ဥပမာ​ပေး​ပါ။

^၁၃ ကျမ်း​စာ​မှာ​ပါ​တဲ့ ပညတ်​နဲ့ မူ​တွေ​က ယေဟောဝါ​ဟာ ဉာဏ်​ပညာ​ရှိ​တဲ့ ပညတ်​ပေး​ရှင်၊ သား​သမီး​တွေ​ရဲ့ အကျိုး​ကို အလွန်​စိတ်​ဝင်​စား​တဲ့ မေတ္တာ​ရှိ​ဖခင် ဖြစ်​ကြောင်း ဖော်ပြတယ်။ (ဆာလံ ၁၉:၇-၁၁) ‘သွေး​ကို ရှောင်​ကြဉ်’ ပါ​ဆို​တဲ့ ပညတ်​ကို ကျန်း​မာ​ရေး​ဆိုင်​ရာ စည်း​မျဉ်း​တစ်​ခု​အဖြစ် ပေး​ထား​တာ မဟုတ်​ပေမဲ့ သွေး​သွင်း​ခြင်း​နဲ့​ဆက်​နွှယ်​တဲ့ ရော​ဂါ​တွေ​က​နေ ကျွန်​တော်​တို့​ကို ကာ​ကွယ်​ပေး​တယ်။ (တမန်​တော် ၁၅:၂၀) တ​ကယ်​တော့ ဆေး​ပညာ​လော​က​မှာ​ရှိ​တဲ့ လူ​များ​စွာ​ဟာ သွေး​မဲ့​ခွဲ​စိတ်​ကု​သတာ​ကို ခေတ်​သစ်​ဆေး​ကု​သမှု​ရဲ့ “အကောင်း​ဆုံး စံနှုန်း” အဖြစ် ယူ​မှတ်​ကြ​တယ်။ ခ​ရစ်​ယာန်​စစ်​တွေ​အတွက်​တော့ ဒါ​ဟာ ယေဟောဝါ​ရဲ့ အတိုင်း​အဆ​မဲ့ ဉာဏ်​ပညာ​နဲ့ ဖခင်​မေတ္တာ​ကို ထပ်​မံ အတည်​ပြု​ပေး​ခြင်း​သာ ဖြစ်​တယ်။​—ဟေ​ရှာ​ယ ၅၅:၉ ကို​ဖတ်​ပါ။ ယောဟန် ၁၄:၂၁၊ ၂၃။

၁၄၊ ၁၅။ (က) မိမိ​လူမျိုး​အပေါ်​ထား​တဲ့ ဘု​ရားရဲ့​မေတ္တာ​ကို ဘယ်​ပညတ်​တွေ​မှာ တွေ့​ရ​သလဲ။ (ခ) ဘေး​ကင်း​စေ​တဲ့ ဒီ​သတိ​ပေး​ချက်​တွေရဲ့ နောက်​ကွယ်​မှာ​ရှိ​တဲ့ မူ​တွေ​ကို သင် ဘယ်​လို ကျင့်​သုံး​နိုင်​သလဲ။

^၁၄ ရှေး​အစ္စရေး​လူမျိုး​ရဲ့ အကျိုး​ကို ဘု​ရား စိတ်​ဝင်​စား​ကြောင်း ကိုယ်​တော့်​ပညတ်​ တွေ​မှာ တွေ့​ရ​တယ်။ ဥပမာ၊ အစ္စရေးတွေ​ဟာ အိမ်​မိုး​ပေါ်​မှာ အလုပ်​အမျိုး​မျိုး လုပ်​ဆောင်​တဲ့​အတွက် မတော်​တ​ဆ​မှု မဖြစ်​ဖို့ အိမ်​မိုး​ပတ်​လည်​မှာ အကာ​အရံ​လုပ်​ရ​မယ်​လို့ ပညတ်​ထား​တယ်။ (တ​ရား​ဟော​ရာ ၂၂:၈။ ၁ ရှ​မွေ​လ ၉:၂၅၊ ၂၆။ နေဟမိ ၈:၁၆။ တမန်​တော် ၁၀:၉) ဒါ့​အပြင် ခွေ့​တတ်​တဲ့ နွား​ကို ချည်​ထား​ရ​မယ်​လို့ ပညတ်​ထား​တယ်။ (ထွက်​မြောက်​ရာ ၂၁:၂၈၊ ၂၉) ဒီ​ပညတ်​တွေ​ကို လျစ်​လျူ​ရှု​တာ​ဟာ သူ​တစ်ပါး​အကျိုး​ကို လုံး​ဝ​ ထည့်​မတွက်​ရာ​ရောက်​ပြီး သွေး​ပြစ်​သင့်​စေ​နိုင်​တယ်။

^၁၅ အဲဒီ​ပညတ်​တွေ​နောက်​ကွယ်​မှာ ရှိ​တဲ့ မူ​တွေ​ကို ဘယ်​လို ကျင့်​သုံး​နိုင်​သလဲ။ ကိုယ်​အသုံး​ပြု​တဲ့​ယာဉ်၊ ယာဉ်​မောင်း​ပုံ​မောင်း​နည်း၊ အိမ်​မွေး​တိ​ရစ္ဆာန်၊ နေ​အိမ်၊ အလုပ်​ခွင်၊ အပန်း​ဖြေမှု ရွေး​ချယ်​တာ​တွေ​နဲ့ ပတ်​သက်​လို့ စဉ်း​စား​ကြည့်​ပါ။ နိုင်​ငံ​တ​ချို့​မှာ လူငယ်​တွေ​ဟာ မလို​အပ်​တဲ့ စွန့်​စား​မှု​တွေ လုပ်​ကြ​လို့ မတော်​တ​ဆ​မှု ဖြစ်​ပြီး သေဆုံး​ကြ​ရ​တယ်။ ဒါ​ပေမဲ့ ဘု​ရားရဲ့​မေတ္တာ အမြဲခံစား​ချင်​တဲ့ လူငယ်​တွေ​ဟာ အသက်​ကို တန်​ဖိုး​ထား​ကြ​တယ်။ သည်း​ထိတ်​ရင်​ဖို​ဖြစ်​အောင် အန္တရာယ်​ရှိ​တဲ့​လုပ်​ရပ်တွေ​ကို လုပ်​ဆောင်​ကြ​မှာ မဟုတ်​ဘူး။ လူငယ်​ဘဝ​ဟာ အန္တရာယ်​ကင်း​တယ်​ဆို​တဲ့ မိုက်​ရူး​ရဲ​ဆန်​ဆန်​အတွေး​မျိုး မရှိ​ဘူး။ အန္တရာယ်​ဖြစ်​စေ​တဲ့​အရာတွေ​ကို ရှောင်​တဲ့​အတွက် လူငယ်​ဘဝ​ရဲ့ ပျော်​ရွှင်​မှု​ကို သူတို့ ခံစား​ကြ​ရ​တယ်။​—ဒေ​သနာ ၁၁:၉၊ ၁၀။

၁၆။ ဘယ်​ကျမ်း​စာ​မူ​ဟာ ကိုယ်​ဝန်​ဖျက်​ချ​တာ​နဲ့ သက်​ဆိုင်​သလဲ။ (အောက်​ခြေ​မှတ်​ချက်​ကို​လည်း ကြည့်​ပါ။)

^၁၆ မမွေး​သေး​တဲ့ က​လေး​ရဲ့ အသက်​တောင် ဘု​ရား​အမြင်​မှာ တန်​ဖိုး​ရှိ​တယ်။ ရှေး​အစ္စရေး​နိုင်​ငံ​မှာ လူ​တစ်ဦး​ဟာ ကိုယ်​ဝန်​ဆောင်​အမျိုး​သမီး​ကို ထိ​ခိုက်​မိ​လို့ မိ​ခင်​ဖြစ်​စေ၊ က​လေး​ဖြစ်​စေ သေဆုံး​ရင် သူ့​ကို လူ့​အသက်​သတ်​သူ​လို့ ဘု​ရား ယူ​မှတ်​တယ်။ သူ​ဟာ “အသက်​အတွက် အသက်” ပြန်​လျော်​ပေး​ရ​မယ်။ * (ထွက်​မြောက်​ရာ ၂၁:၂၂၊ ၂၃ ကို​ဖတ်​ပါ။) ဒါ​ဆို​ရင် ကိုယ်​ကျိုး​အတွက်၊ လိင်​အကျင့်​ယို​ယွင်း​ဖို့​အတွက် နှစ်​စဉ် သန္ဓေ​သား​များ​စွာ ဖျက်​ချ​နေ​တာ​ကို မြင်​တဲ့​အခါ ယေဟောဝါ ဘယ်​လို ခံစား​ရ​မလဲ။

၁၇။ ဘု​ရား​ရဲ့ စံနှုန်း​တွေ​ကို မသိ​ခင် ကိုယ်​ဝန်​ဖျက်​ချ​ဖူး​သူ​ကို သင် ဘယ်​လို နှစ်​သိမ့်​ပေး​မလဲ။

^၁၇ ဒါ​ပေမဲ့ ကျမ်း​စာ​အမှန်​တ​ရား မသိ​ခင်​က ကိုယ်​ဝန်​ဖျက်​ချ​ဖူး​တဲ့ အမျိုး​သမီး​တစ်ဦး​ နဲ့​ပတ်​သက်​လို့​ကော။ သူ ဘု​ရား​ရဲ့​ကရု​ဏာ ခံစား​ရ​မှာ မဟုတ်​ဘူး​လို့ ဆိုလို​သလား။ မဆိုလို​ဘူး။ စစ်​မှန်​တဲ့​နောင်​တ​ရ​သူ​ဟာ ယေရှု​ရဲ့​သွေး​ကို အခြေ​ပြု​ပြီး ယေဟောဝါ​ရဲ့ ခွင့်​လွှတ်​မှု ခံစား​ရ​နိုင်​တယ်။ (ဆာလံ ၁၀၃:၈-၁၄။ ဧဖက် ၁:၇) ခ​ရစ်​တော်​ကိုယ်​တိုင်​က  “ကျွန်​တော်​လာ​တာ ဖြောင့်​မတ်​သူ​တွေ​အတွက် မဟုတ်​ဘူး။ အပြစ်​သား​တွေ နောင်​တ​ရ​စေ​ဖို့ လာ​တာ” လို့​ပြော​တယ်။​—လုကာ ၅:၃၂။

၁၈။ သွေး​ထွက်​သံ​ယို​ဖြစ်​စေ​တဲ့ အဓိ​က​အကြောင်း​ကို ကျမ်း​စာ​က ဘယ်​လို ဖော်ပြသလဲ။

^၁၈ ကျွန်​တော်​တို့​ဟာ တ​ခြား​သူ​တွေ​ကို အန္တရာယ်​ဖြစ်​အောင် မလုပ်​ရုံ​သာ​မက သွေး​ထွက်​သံ​ယို​ဖြစ်​စေ​တဲ့ မုန်း​တီး​မှု​ကို စိတ်​ထဲ​က​နေ အမြစ်​မကျန် ထုတ်​ပစ်​ဖို့ ယေဟောဝါ လို​လား​တယ်။ “ညီ​အစ်​ကို​ကို မုန်း​တဲ့​သူ​ဟာ လူ့​အသက်​ကို သတ်​တဲ့​သူ ဖြစ်​တယ်” လို့ တမန်​တော်​ယောဟန် ရေး​ခဲ့​တယ်။ (၁ ယောဟန် ၃:၁၅) အဲဒီ​လို​လူ​ဟာ မိမိ​ညီ​အစ်​ကို​ကို ကြည့်​မရ​ဖြစ်​ရုံ​မက သေစေ​ချင်​တယ်။ သူ​ဟာ မလို​တ​မာ​စိတ်​ကြောင့် အသရေ​ဖျက်​တဲ့​စကား​တွေ ပြော​ဆို​မယ် ဒါ​မှ​မဟုတ် မဟုတ်​မမှန် စွပ်​စွဲ​ပြော​ဆို​မယ်။ မဟုတ်​မမှန် စွပ်​စွဲ​ပြော​ဆို​သူ​ဟာ ယေဟောဝါ​ရဲ့ ပြစ်​ဒဏ်​စီ​ရင်​ခြင်း ခံ​ရ​လိမ့်​မယ်။ (ဝတ်​ပြု​ရာ ၁၉:၁၆။ တ​ရား​ဟော​ရာ ၁၉:၁၈-၂၁။ မဿဲ ၅:၂၂) ဒါ​ကြောင့် ကျွန်​တော်​တို့​ရဲ့​စိတ်​ထဲ​မှာ ရှိ​နေ​နိုင်​တဲ့ မလို​မုန်း​တီး​မှု မှန်​သမျှ​ကို​ ထုတ်​ပစ်​ဖို့ အလွန်​အရေး​ကြီး​တယ်။​—ယာကုပ် ၁:၁၄၊ ၁၅။ ၄:၁-၃။

၁၉။ ကျမ်း​စာ​မူ​တွေ​အတိုင်း လိုက်​နာ​သူ​ဟာ ဆာလံ ၁၁:၅ နဲ့ ဖိ​လိပ္ပိ ၄:၈၊ ၉ စ​တဲ့ ကျမ်း​ချက်​တွေ​ကို ဘယ်​လို ရှု​မြင်​သလဲ။

^၁၉ ယေဟောဝါ​နည်း​တူ အသက်​ကို တန်​ဖိုး​ထား​သူ​တွေ၊ ဘု​ရား​သခင့်​မေတ္တာ အမြဲခံစား​ချင်​သူ​တွေ​ဟာ အကြမ်း​ဖက်​မှု​ပုံ​စံ မှန်​သမျှ​ကို​လည်း ရှောင်​ကြ​တယ်။ “အကြမ်း​ဖက်​မှု နှစ်​သက်​သူ​ကို [ယေဟောဝါ] မုန်း​တယ်” လို့ ဆာလံ ၁၁:၅ မှာ ပြော​တယ်။ ဒီ​ကျမ်း​ချက်​ဟာ ဘု​ရား​ရဲ့ ပင်​ကို​စ​ရိုက်​အကြောင်း ဖော်ပြနေ​ရုံ​မက အသက်​နဲ့​ပတ်​သက်​တဲ့ မူ​တစ်​ခု ဖြစ်​တယ်။ အကြမ်း​ဖက်​မှု​ဖြစ်​စေ​တဲ့ ဖျော်​ဖြေမှု​​မှန်​သမျှ​ကို ရှောင်​ဖို့​လည်း ဘု​ရား​ကို ချစ်​မြတ်​နိုး​သူ​တွေ​ကို လှုံ့​ဆော်​ပေး​တယ်။ အလား​တူ၊ ယေဟောဝါ​ဟာ “ငြိမ်သက်​ခြင်း​ရဲ့ ဘု​ရား​သခင်” ဖြစ်​တယ်​ဆို​တဲ့ အချက်​က ကိုယ်​တော့်​ကျေး​ကျွန်​တွေ​ကို ငြိမ်သက်​ခြင်း ရှိ​စေ​တဲ့ ချစ်​ဖွယ်​ကောင်း​တဲ့​အရာ၊ အသရေ​ရှိ​တဲ့​အရာ၊ ချီး​မွမ်း​ဖွယ်​အရာ​တွေ​နဲ့ စိတ်​နှလုံး​ထဲ ပြည့်​နေ​စေ​ဖို့ လှုံ့​ဆော်​ပေး​တယ်။​—ဖိ​လိပ္ပိ ၄:၈၊ ၉ ကို​ဖတ်​ပါ။

၂၀-၂၂။ လော​က​နဲ့​ပတ်​သက်​ရင် ခ​ရစ်​ယာန်တွေ​ရဲ့ ရပ်​တည်​ချက်​ဟာ ဘာ​လဲ။ ဘာ​ကြောင့်​လဲ။

^၂၀ စာ​တန့်​လော​က​တစ်​ခု​လုံး​ဟာ ဘု​ရား​အမြင်​မှာ သွေး​ပြစ်​ကျူး​လွန်​နေ​တယ်။  ကျမ်း​စာ​မှာ ကြမ်း​ကြုတ်​တဲ့​သား​ရဲ​အဖြစ် ပုံ​ဖော်​ထား​တဲ့ လော​က​နိုင်​ငံ​ရေး​စ​နစ်​တွေ​ဟာ ယေဟောဝါ​ရဲ့ ကျေး​ကျွန်​တွေ​အပါ​အဝင် လူ​သန်း​ပေါင်း​များ​စွာ​ကို သတ်​ဖြတ်​နေ​တယ်။ (ဒံယေလ ၈:၃၊ ၄၊ ၂၀-၂၂။ ဗျာဒိတ် ၁၃:၁၊ ၂၊ ၇၊ ၈) စီး​ပွား​ရေး​နဲ့ သိ​ပ္ပံ​ပညာ​ဟာ သား​ရဲ​လို အာ​ဏာ​ရှင်​တွေ​နဲ့​ ပူး​ပေါင်း​ပြီး အဖျက်​စွမ်းအား​ကြီး​တဲ့ လက်​နက်​တွေ တီ​ထွင်​ထုတ်​လုပ်​တဲ့​အတွက် အမြတ်​အစွန်း​ အများ​ကြီး ရ​ရှိ​နေ​တယ်။ ‘တစ်​လော​က​လုံး​က ဆိုး​ညစ်​သူ​ရဲ့ ဩ​ဇာ​အောက်​မှာ ရှိ​နေ​တယ်’ ဆို​တဲ့​စကား​ဟာ မှန်​လိုက်​တာ။​—၁ ယောဟန် ၅:၁၉။

^၂၁ ယေရှု​ရဲ့ နောက်​လိုက်​တွေ​ဟာ “လော​က​နဲ့ မပတ်​သက်” ဘဲ နိုင်​ငံ​ရေး၊ စစ်​ရေး​မှာ လုံး​ဝ ကြား​နေ​တဲ့​အတွက် တစ်ဦး​ချင်း​ဖြစ်​စေ၊ အုပ်​စု​လိုက်​ဖြစ်​စေ သွေး​ပြစ် ကျူး​လွန်​ရာ​မှာ မပါ​ဝင်​ကြ​ဘူး။ * (ယောဟန် ၁၅:၁၉။ ၁၇:၁၆) ဒါ့​အပြင် တ​ခြား​သူ​တွေ​က သူတို့​ကို ညှဉ်း​ပန်း​နှိပ်​စက်​တဲ့​အခါ ခ​ရစ်​တော်​ကို တု​ပတဲ့​အနေ​နဲ့ ကြမ်း​တမ်း​စွာ မတုံ့​ပြန်​ကြ​ဘူး။ ရန်​သူ​တွေ​ကို မေတ္တာ​ပြတဲ့​အပြင် ဆုတောင်း​ပေး​ကြ​တယ်။​—မဿဲ ၅:၄၄။ ရော​မ ၁၂:၁၇-၂၁။

^၂၂ ခ​ရစ်​ယာန်​စစ်​တွေ​ဟာ သွေး​ပြစ်​အများ​ဆုံး​ကျူး​လွန်​တဲ့ ကမ္ဘာ့​အယူ​မှား​ဘာ​သာ​ ရေး​အင်​ပါ​ယာ “မဟာ​ဗာ​ဗု​လုန်” နဲ့ လုံး​ဝ မပတ်​သက်​ကြ​ဘူး။ “ပရော​ဖက်​တွေ၊ သန့်​ရှင်း​သူ​တွေ​နဲ့ မြေကြီး​ပေါ်​မှာ ကွပ်​မျက်​ခံ​ရ​သူ​အားလုံး​ရဲ့ သွေး​ကို ဒီ​မြို့​မှာ တွေ့​ရ​တယ်” လို့​ကျမ်း​စာ ဆို​တယ်။ ဒါ​ကြောင့် “ငါ့​လူ​တို့၊ . . . သူ့​ဆီ​က​နေ ထွက်​သွား​ကြ” လို့ ကျွန်​တော်​တို့​ကို သတိ​ပေး​ထား​တယ်။​—ဗျာဒိတ် ၁၇:၆။ ၁၈:၂၊ ၄၊ ၂၄။

၂၃။ မဟာ​ဗာ​ဗု​လုန်​က​နေ ထွက်​တယ်​ဆို​တာ ဘာ​ကို ဆိုလို​သလဲ။

^၂၃ မဟာ​ဗာ​ဗု​လုန်​က​နေ ထွက်​တယ်​ဆို​တာ အသင်း​ဝင်​အဖြစ်​က​နေ နုတ်​ထွက်​တာ​ထက်​မက ပါ​ဝင်​တယ်။ မှား​ယွင်း​တဲ့​ဘာ​သာ​က လက်ခံ​အား​ပေး​တဲ့ လိင်​အကျင့်​ယို​ယွင်း​ခြင်း၊ နိုင်​ငံ​ရေး​မှာ စွက်​ဖက်​ခြင်း၊ စည်း​စိမ်​ဥစ္စာ​ကို လော​ဘ​တ​ကြီး ရှာ​ဖွေ​ခြင်း​စတဲ့ အကျင့်​ဆိုး​တွေ​ကို မုန်း​တီး​တာ​လည်း ပါ​ဝင်​တယ်။ (ဆာလံ ၉၇:၁၀ ကို​ဖတ်​ပါ။ ဗျာဒိတ် ၁၈:၇၊ ၉၊ ၁၁-၁၇) အဲဒီ​အကျင့်​တွေ​ကြောင့် သွေး​ပြစ်​ကျူး​လွန်​မှု ဖြစ်​ပွား​လေ့​ရှိ​တယ်။

၂၄၊ ၂၅။ (က) သွေး​ပြစ်​ကျူး​လွန်​ခဲ့​ပေမဲ့ နောင်​တ​ရ​သူ​တစ်ဦး​ကို ဘယ်​အရာ​အပေါ် အခြေ​ပြု​ပြီး ဘု​ရား ကရု​ဏာ​ပြနိုင်​သလဲ။ (ခ) ဒါ​က ကျမ်း​စာ​ခေတ်​မှာ​ရှိ​တဲ့ ဘယ်​အစီ​အစဉ်​ကို သတိ​ရ​စေ​သလဲ။

^၂၄ ကျွန်​တော်​တို့​တစ်ဦး​စီ​ဟာ စစ်​မှန်​တဲ့​ဝတ်​ပြု​ရေး​မှာ မပါ​ဝင်​ခင် စာ​တန့်​စ​နစ်​ကို တစ်​နည်း​နည်း​နဲ့ ထောက်​ခံ​ခဲ့​ကြ​တယ်။ ဒါ​ကြောင့် အတိုင်း​အတာ​တစ်​ခု​အထိ သွေး​ပြစ်​သင့်​ခဲ့​ကြ​တယ်။ ဒါ​ပေမဲ့ ကျွန်​တော်​တို့ အကျင့်​အကြံ​ကို ပြု​ပြင်​ပြောင်း​လဲ​တယ်၊ ခ​ရစ်​တော်​ရဲ့ ရွေး​ဖိုး​ပူ​ဇော်​သက္ကာ​ကို ယုံ​ကြည်​တယ်၊ မိမိ​တို့​အသက်​တာ​ကို ဘု​ရား​ဆီ ဆက်​ကပ်​အပ်​နှံ​ခဲ့​တယ်။ ဒါ​ကြောင့် ဘု​ရား​ရဲ့​ကရု​ဏာ​နဲ့ ကာ​ကွယ်​မှု ခံစား​ကြ​ရ​တယ်။ (တမန်​တော် ၃:၁၉) ဒီ​ကာ​ကွယ်​မှု​က ကျမ်း​စာ​ခေတ်​မှာ​ရှိ​တဲ့ ခိုလှုံ​ရာ​မြို့​တွေ​ကို ပြန်​သတိ​ရ​စေ​တယ်။​—တော​လည်​ရာ ၃၅:၁၁-၁၅။ တ​ရား​ဟော​ရာ ၂၁:၁-၉။

^၂၅ အဲဒီ​အစီ​အစဉ်​ဟာ ဘယ်​လို အကျိုး​ပြု​သလဲ။ အစ္စရေး​တစ်ဦး​ဟာ မတော်​တ​ဆ လူ​သတ်​မိ​ရင် ခိုလှုံ​ရာ​မြို့​ဆီ ထွက်​ပြေး​နိုင်​တယ်။ အရည်​အချင်း​ရှိ​တဲ့ တ​ရား​သူ​ကြီး​တွေ​က အမှု​စစ်​ဆေး​ပြီး​နောက် မတော်​တ​ဆ လူ​သတ်​မိ​သူ​ဟာ ပု​ရော​ဟိတ်​မင်း သေတဲ့​အထိ ခိုလှုံ​ရာ​မြို့​မှာ နေ​ရ​တယ်။ ပု​ရော​ဟိတ်​မင်း သေပြီး​နောက် သူ​ဟာ တ​ခြား​နေ​ရာ​မှာ လွတ်​လပ်​စွာ နေ​နိုင်​တယ်။ ဒါ​ဟာ ဘု​ရား ဘယ်​လောက် ကရု​ဏာ​ကြီး​တယ်၊ လူ့​အသက်​ကို ဘယ်​လောက် တန်​ဖိုး​ထား​တယ်​ဆို​တာ ထိ​ထိ​မိမိ ဖော်ပြလိုက်​တာ​ပဲ။ ရှေး​အချိန်​က ခိုလှုံ​ရာ​မြို့​တွေ​ဟာ အခု​ချိန်​မှာ ခ​ရစ်​တော်​ရဲ့ ရွေး​ဖိုး​ပူ​ဇော်​သက္ကာ​ကို အခြေ​ပြု​တဲ့ ဘု​ရားရဲ့​ပြင်​ဆင်​ပေး​ချက်​နဲ့ ဆင်​တူ​တယ်။ အဲ​ဒါ​ဟာ အသက်​နဲ့​သွေး​ရဲ့ မြင့်​မြတ်​မှု​နဲ့​ဆိုင်​တဲ့ ပညတ်​ကို ကျွန်​တော်​တို့ မတော်​တ​ဆ ချိုး​ဖောက်​မိ​ရင် သေဒဏ်​မခံ​ရ​အောင် ကာ​ကွယ်​ ပေး​တယ်။ အဲဒီ​ပြင်​ဆင်​ပေး​ချက်​ကို သင် တန်​ဖိုး​ထား​သလား။ တန်​ဖိုး​ထား​ကြောင်း ဘယ်​လို တင်​ပြနိုင်​သလဲ။ တစ်​နည်း​က​တော့ အကာ​အကွယ်​ပေး​တဲ့ အဲဒီ​ပြင်​ဆင်​ပေး​ချက်​ကို လက်ခံ​ဖို့ တ​ခြား​သူ​တွေ​ကို ဖိတ်​ခေါ်​ခြင်း ဖြစ်​တယ်။ အထူး​သဖြင့် “ကြီး​စွာ​သော​ဒုက္ခ” အလွန် နီး​ကပ်​နေ​လို့ ဖြစ်​တယ်။​—မဿဲ ၂၄:၂၁။ ၂ ကော​ရိန္သု ၆:၁၊ ၂။

၂၆-၂၈။ ကျွန်​တော်​တို့​ရဲ့ အခြေ​အနေ​နဲ့ ပရော​ဖက်​ယေဇကျေလ​ရဲ့ အခြေ​အနေ ဘယ်​လို ဆင်​တူ​သလဲ။ ဘု​ရား​ရဲ့​မေတ္တာ​ကို ဘယ်​လို​နည်း​နဲ့ အမြဲခံစား​နိုင်​မလဲ။

^၂၆ အခု​ခေတ် ဘု​ရား​လူမျိုး​ရဲ့ အခြေ​အနေ​ဟာ ရှေး​ပရော​ဖက် ယေဇကျေလ​ကို သတိ​ရ​စေ​တယ်။ အစ္စရေး​လူမျိုး​ကို ယေဟောဝါ​ရဲ့ သတိ​ပေး​ချက်​တွေ ကြေ​ညာ​ရ​တဲ့ ကင်း​စောင့်​အဖြစ် သူ တာဝန်​ပေး​အပ်​ခံ​ရ​တယ်။ “ငါ​ပြော​တာ​ကို မင်း ကြား​တဲ့​အခါ အဲဒီ​အတိုင်း သူတို့​ကို သတိ​ပေး​ရ​မယ်” လို့ ဘု​ရား​ပြော​တယ်။ ယေဇကျေလ​ဟာ တာဝန်​ပျက်​ကွက်​ရင် ဂျေရု​ဆ​လင်​မြို့ ဖျက်​ဆီး​ခံ​ရ​ချိန်​မှာ အသတ်​ခံ​ရ​သူ​တွေရဲ့ သွေး​အတွက် သူ့​မှာ တာဝန်​ရှိ​တယ်။ (ယေဇကျေလ ၃၃:၇-၉) ဒါ​ပေမဲ့ ယေဇကျေလ​ဟာ နာ​ခံ​မှု​ရှိ​လို့ သွေး​ပြစ်​မသင့်​ခဲ့​ဘူး။

^၂၇ အခု၊ ကျွန်​တော်​တို့​ဟာ စာ​တန့်​လော​က​တစ်​ခု​လုံး​ရဲ့ အဆုံး​ကို ရင်​ဆိုင်​နေ​ရ​တယ်။ ယေဟောဝါ​သက်​သေတွေ​ဟာ နိုင်​ငံ​တော်​သတင်း​နဲ့ ဘု​ရား “လက်​စား​ချေ​မယ့်​နေ့” အကြောင်း ဟော​ရ​တာ​ကို တာဝန်​အဖြစ်၊ အခွင့်​ထူး​အဖြစ် ယူ​မှတ်​ကြ​တယ်။ (ဟေ​ရှာ​ယ ၆၁:၂။ မဿဲ ၂၄:၁၄) ဒီ​အရေး​ကြီး​လုပ်ငန်း​မှာ သင် အပြည့်​အဝ ပါ​ဝင်​နေ​သလား။ တမန်​တော် ပေါလု​ဟာ ဟော​ပြော​ခြင်း​တာဝန်​ကို အလေး​အနက် သဘော​ထား​ခဲ့​တယ်။ ဒါ​ကြောင့် “တစ်​ယောက်​ယောက် ကယ်​တင်​ခြင်း မရ​ရင် ကျွန်​တော့်​အပြစ် မဟုတ်​ဘူး . . . ဘု​ရား​သခင်​ရဲ့ ရည်​ရွယ်​ချက်​မှန်​သမျှ မထိမ်​ချန်​ဘဲ ခင်​ဗျား​တို့​ကို ကျွန်​တော် ပြော​ပြခဲ့လို့​ပဲ” ဆို​ပြီး ​သူ​ပြော​နိုင်​ခဲ့​တယ်။ (တမန်​တော် ၂၀:၂၆၊ ၂၇) တု​ပထိုက်​တဲ့ ပုံသက်သေ​ကောင်း​ပါ​ပဲ။

^၂၈ ယေဟောဝါ​ရဲ့ နွေး​ထွေး​တဲ့ ဖခင်​မေတ္တာ​ကို အမြဲခံစား​နိုင်​ဖို့ အသက်​နဲ့ သွေး​ကို ယေဟောဝါ​နည်း​တူ ရှု​မြင်​ရုံ​ထက်​မက လုပ်​ဆောင်​ရ​မယ်။ ကျွန်​တော်​တို့​ဟာ ကိုယ်​တော့်​ရှေ့​မှာ သန့်​ရှင်း​စင်​ကြယ်​နေ​ဖို့​လည်း လို​တယ်။ ဒီ​အကြောင်း​ကို နောက်​အခန်း​မှာ သိ​ရ​ပါ​လိမ့်​မယ်။