နှစ်ခြင်းခံ​ပြီး နောက်ပိုင်း​နှစ်တွေ​အတွင်း ယေရှုကို လူသိ​များ​လာတယ်။ ထောင်နဲ့​ချီတဲ့ ဂျူးတွေဟာ ယေရှု​လုပ်တဲ့ အံ့ဖွယ်​အမှုတွေ​ကို မြင်ခဲ့​ပြီး နေရာအနှံ့​အပြား​မှာ ပြော​ကြတယ်။ အခု ဂျေရုဆလင်​မြို့မှာ တဲ​နေ​ပွဲတော်​တက်ဖို့ ရောက်လာတဲ့​လူ အတော်များများ ယေရှုကို ရှာနေ​ကြတယ်။

ယေရှုနဲ့​ပတ်သက်ပြီး တစ်ယောက်​တစ်မျိုး ပြော​နေကြ​တယ်။ တချို့က “ဒီ​လူဟာ သူတော်ကောင်း​ပဲ၊” တချို့ကျတော့ “ဘယ်က​လာ သူတော်ကောင်း ဟုတ်​ရမှာ​လဲ။ လူတွေကို လှည့်စား​နေတဲ့​သူပဲ” ဆိုပြီး အမျိုးမျိုး ပြော​ကြတယ်။ (ယောဟန် ၇:၁၂) ပွဲတော်​အစပိုင်း​နေ့တွေမှာ အဲဒီလို တီးတိုး​ပြော​နေကြတာ။ ဒါပေမဲ့ ဂျူး​ခေါင်းဆောင်​တွေကို ကြောက်လို့ ဘယ်သူမှ လူသိရှင်ကြား မ​ပြောရဲ​ကြဘူး။

ပွဲတော်​ချိန်​တစ်ဝက်​လောက်​မှာ ယေရှု ဗိမာန်တော်ကို တက်လာပြီး သွန်သင်​ပေးတယ်။ သူ့ရဲ့ သွန်သင်​နိုင်စွမ်း​ကို လူတွေ သိပ်​အံ့သြ​ကြတယ်။ သူက ဘယ်​ရဗ္ဗိ​ကျောင်း​မှ တက်ခဲ့​တာ​မဟုတ်ဘူး။ ဒါကြောင့် “ဒီ​လူက ဘာသာရေး​ကျောင်း​တွေ မတက်ခဲ့ဘဲနဲ့ ကျမ်းစာ​အသိပညာ ဘာလို့ ဒီလောက်​ကြွယ်ရတာလဲ” လို့​ပြော​ကြတယ်။—ယောဟန် ၇:၁၅။

ယေရှု​က “ကျွန်တော် သင်ပေး​နေတာ​တွေဟာ ကျွန်တော့်ရဲ့​တရား မဟုတ်ဘူး။ ကျွန်တော့်ကို စေလွှတ်​လိုက်တဲ့​အရှင်ရဲ့ တရား​တွေ​ပဲ။ အဲဒီ​အရှင်ရဲ့​အလိုတော်ကို ဆောင်​ချင်တဲ့​သူ​ဆိုရင် ဒီ​တရားဟာ ဘုရားသခင်ဆီကလား၊ ကျွန်တော့်သဘော​အတိုင်း သင်ပေး​နေတာလား​ဆိုတာ သိ​လိမ့်မယ်” လို့​ပြောတယ်။ (ယောဟန် ၇:၁၆၊ ၁၇) ယေရှုရဲ့ သွန်သင်ချက်တွေ​ဟာ ဘုရား​ပညတ်​နဲ့ ကိုက်ညီတယ်။ ဒါကြောင့် ယေရှုဟာ သူ​ဂုဏ်​တက်ဖို့ လုပ်​နေတာ မဟုတ်ဘဲ ဘုရားကို ဂုဏ်တင်​နေမှန်း ထင်ရှား​ပါတယ်။

ဒီ​နောက် ယေရှု​က “မောရှေ​က ခင်ဗျားတို့ကို ပညတ်​ကျမ်း​ပေးခဲ့တယ် မဟုတ်လား။ ဒါပေမဲ့ ခင်ဗျားတို့ တစ်ယောက်မှ ပညတ်​ကျမ်း​ကို မလိုက်နာ​ဘူး။ ကျွန်တော့်ကိုသတ်ဖို့ ဘာလို့ ကြံစည်နေ​ကြတာလဲ” လို့​မေးတယ်။ လူတချို့ဟာ ဂျေရုဆလင်​မြို့က မဟုတ်​ကြဘူး။ တခြား​ဒေသက​လာတဲ့ ဧည့်သည်တွေ​ဖြစ်လို့ အဲဒီလို ကြံစည်နေ​တာ​ကို မသိကြဘူး။ ယေရှု​လို ဆရာ​တစ်ယောက်ကို ဘာဖြစ်လို့ သတ်ဖို့ ကြံစည်နေ​တာလဲ​ဆိုတာ​ သူတို့ စဉ်းစားလို့​မရဘူး။ ဒါကြောင့် ယေရှု​ဘက်က တစ်ခုခု​မှား​နေလို့ အခုလို ကြံစည်​တာ​ဖြစ်မယ်​ဆိုပြီး ထင်နေ​ကြတယ်။ သူတို့က “ခင်ဗျားဟာ နတ်ဆိုး​ပူး​နေတဲ့​သူပဲ။ ခင်ဗျားကိုသတ်ဖို့ ဘယ်​သူ​ ကြံစည်နေ​လို့​လဲ” ဆိုပြီး ပြော​ကြတယ်။—ယောဟန် ၇:၁၉၊ ၂၀။

တကယ်တော့ လွန်ခဲ့တဲ့ တစ်နှစ်​ခွဲ​လောက်​တုန်း​က ဥပုသ်​နေ့မှာ လူတစ်ယောက်ကို ကုသ​ပေးလို့ ဂျူး​ခေါင်းဆောင်​တွေ ယေရှုကို သတ်ချင်​နေကြတာ။ အခု ယေရှု​က အကျိုးအကြောင်း​နဲ့ ခိုင်ခိုင်​လုံလုံ​ ရှင်းပြ​ပြီး သူတို့ရဲ့ အစွန်းရောက် သဘောထားကို ဖော်​ထုတ်​ပြ​တယ်။ မောရှေ​ပညတ်​အရ သား​ယောက်ျားလေးကို ရှစ်​ရက်​မြောက်​နေ့မှာ အရေဖျားဖြတ်​ပေး​ရတယ်။ ဥပုသ်​နေ့​ဖြစ်ရင်​တောင် အရေဖျားဖြတ်​ကြ​တာ​ပဲ​ဆိုပြီး ယေရှု​ထောက်ပြ​တယ်။ ပြီးတော့ “မောရှေ​ပညတ်ကို မချိုးဖောက်​ချင်​လို့ ဥပုသ်​နေ့မှာ ခင်ဗျားတို့ အရေဖျားဖြတ်​ကြတယ်​ဆိုရင် ကျွန်တော်က ဥပုသ်​နေ့မှာ လူတစ်ယောက်ကို ဒေါင်ဒေါင်မြည် ကျန်းမာ​အောင် လုပ်ပေး​လိုက်တာ ခင်ဗျားတို့ ဒေါသ​ထွက်​စ​ရာ​လား။ အပြင်ပန်း​ကိုပဲ​ကြည့်ပြီး အကဲမဖြတ်​ပါ​နဲ့​တော့။ မှန်မှန်ကန်ကန် အကဲဖြတ်​ကြပါ” လို့​ပြောတယ်။—ယောဟန် ၇:၂၃၊ ၂၄။

အခြေအနေကို ကောင်းကောင်းသိ​နေတဲ့ ဂျေရုဆလင်​မြို့သားတွေ​က “မင်းအရာရှိ​တွေ သတ်ဖို့​ရှာနေ​တာ ဒီ​လူ​ပဲ မဟုတ်လား။ ဒါပေမဲ့ ကြည့်ပါ​ဦး။ သူ ပေါ်ပေါ်ထင်ထင်​ပဲ ဟောပြောနေ​တယ်။ သူတို့ ဘာမှလည်း မပြော​ကြပါ​လား။ သူ့ကို ခရစ်တော်​ဆိုပြီး တကယ် ထင်​သွား​ကြ​လို့​များလား” ဆိုပြီး​ပြော​ကြတယ်။ အဲဒီ​လူတွေက ယေရှုဟာ ခရစ်တော်​ဖြစ်မှန်း ဘာကြောင့် မယုံ​ကြတာလဲ။ “သူ​ဘယ်က​လာ​မှန်း ကျုပ်တို့​သိသား​ပဲ။ ခရစ်တော် ပေါ်ထွန်း​တဲ့အခါ​ကျရင်​တော့ ဘယ်က​လာ​မှန်း ဘယ်သူမှ သိ​မှာ​မဟုတ်ဘူး” လို့ ပြောတယ်။—ယောဟန် ၇:၂၅-၂၇။

ဒါနဲ့ ဗိမာန်တော်မှာ​ပဲ ယေရှု အခုလို​ပြောတယ်– “ခင်ဗျားတို့ ကျွန်တော့်ကို သိတယ်။ ကျွန်တော် ဘယ်က​လာမှန်းလည်း သိတယ်။ ဒါပေမဲ့ ကျွန်တော်က ကိုယ့်သဘောနဲ့ကိုယ် လာတာ​မဟုတ်ဘူး။ ကျွန်တော့်ကို စေလွှတ်တဲ့​အရှင်ဟာ တကယ်​ရှိတယ်။ အဲဒီ​အရှင်ကို ခင်ဗျားတို့ မသိ​ဘူး။ ကျွန်တော်ကတော့ သိတယ်။ ကျွန်တော်ဟာ အဲဒီ​အရှင်ရဲ့ ကိုယ်စားလှယ်​ပဲ။ ကျွန်တော့်ကို သူ​စေလွှတ်​လိုက်တာ။” (ယောဟန် ၇:၂၈၊ ၂၉) အဲဒီလို ပြတ်ပြတ်သားသား ပြောလိုက်​တော့ ယေရှုကို​ဖမ်းဖို့ ကြိုးစား​ကြတယ်။ ထောင်ချ​ဖို့ ဒါမှမဟုတ် သတ်ပစ်ဖို့ ဖြစ်နိုင်တယ်။ ဒါပေမဲ့ ယေရှု​သေ​ဖို့ အချိန်​မကျ​သေး​လို့ ဘယ်သူမှ မဖမ်း​နိုင်ကြဘူး။

လူ​အ​တော်​များများ​ကတော့ ယေရှုကို ယုံကြည်သက်ဝင်​ကြတယ်။ ယုံလည်း ယုံကြည်သင့်တယ်။ ယေရှု​က ရေပေါ် လမ်းလျှောက်​တယ်။ လေမုန်တိုင်း​ကို ငြိမ်သက်​စေတယ်။ မုန့်​နဲ့​ငါး နည်းနည်း​လေး​နဲ့ လူ​ ထောင်ချီ​ကို အံ့ဖွယ်​နည်းနဲ့ ကျွေးမွေး​တယ်။ ဖျားနာသူ​ကို ကုသ​ပေးတယ်။ ခြေဆွံ့သူ လမ်း​ပြန်လျှောက်​အောင်၊ မျက်မမြင် ပြန်မြင်​လာ​အောင် လုပ်ပေးတယ်။ အနာကြီး​ရောဂါသည်​ကို ကုသ​ပေးတယ်။ လူသေ​ကို​တောင် အသက်ပြန်ရှင်​အောင် လုပ်ပေးတယ်။ မှန်ပါတယ်၊ အကြောင်းကောင်း​ရှိလို့ လူတွေက “ခရစ်တော် ပေါ်ထွန်း​လာ​ရင်တောင် ဒီ​လူ​လုပ်တာ​ထက် ပို​များတဲ့ အံ့ဖွယ်​အမှုတွေ​ကို လုပ်နိုင်မှာ မဟုတ်ဘူး” လို့​ပြော​ကြတယ်။—ယောဟန် ၇:၃၁။

ဒီလို​ပြော​နေတာကို ဖာရိရှဲတွေ ကြား​သွားတယ်။ ဒီ​အခါ ဖာရိရှဲတွေ​နဲ့ ပုရောဟိတ်ကြီးတွေက ယေရှုကို​ဖမ်းဖို့ အစောင့်​ရဲ​မက်​တချို့ကို လွှတ်လိုက်တယ်။