ဂျေရုဆလင်​မြို့​နား​မှာ ယေရှု​ရှိနေတုန်း ဂျူးတွေ သူ့​ဆီ​လာကြတယ်။ တချို့က သင်ယူ​ချင်​လို့၊ တချို့ကျတော့ ပညာ​စမ်း​ချင်​လို့ လာကြတာ။ သူတို့​ထဲမှာ ပညတ်​ကျမ်း​နှံ့စပ်သူ တစ်ယောက်က “ဆရာ၊ ထာဝရ​အသက်​ရဖို့ ကျွန်တော် ဘာလုပ်ရမလဲ” လို့​ မေးတယ်။—လုကာ ၁၀:၂၅။

တကယ်​သိချင်​လို့ မေး​တာ​ မဟုတ်မှန်း ယေရှု ရိပ်မိ​တယ်။ ဂျူးတွေ မကျေမနပ်​ဖြစ်စေ​မယ့် စကား​မျိုး ယေရှု​ပြော​အောင် ဒီ​လူ အကွက်​ဆင်​နေ​ပုံပဲ။ သူ့မှာ တိကျတဲ့​အဖြေ ရှိပြီးသား​ဆိုတာ ယေရှု​သိလို့ သူ့​အကြံ​ကို ဖော်ထုတ်​ဖို့ ပညာရှိရှိ ပြန်​ပြောတယ်။

ယေရှု​က “ပညတ်​ကျမ်းမှာ ဘာ​ရေးထားသလဲ။ ခင်ဗျား ဘယ်လို​ဖတ်ဖူးသလဲ” လို့​မေးလိုက်တယ်။ သူက ပညတ်တရားကို လေ့လာ​ထား​တော့ တရားဟောရာကျမ်း ၆:၅ နဲ့ ဝတ်ပြုရာကျမ်း ၁၉:၁၈ ကို ကိုးကား​ပြီး အခုလို ပြန်ဖြေ​တယ်– “‘ယေဟောဝါ​ဘုရားကို စိတ်စွမ်း​ရှိသမျှ၊ ကိုယ်စွမ်း​ရှိသမျှ၊ ခွန်အား​ရှိသမျှ၊ ဉာဏ်စွမ်း​ရှိသမျှနဲ့ ချစ်ပါ။’ ပြီးတော့ ‘လူလူချင်းကို ကိုယ်​နဲ့​ထပ်တူ ချစ်ပါ’ လို့ ရေးထား​ပါတယ်။” (လုကာ ၁၀:၂၆၊ ၂၇) ဒါက အဲဒီ​လူ မေးတဲ့​မေးခွန်းရဲ့ အဖြေ​လား။

ယေရှု​က “ခင်ဗျား​ဖြေတာ မှန်တယ်။ အဲဒီအတိုင်း အမြဲ​လုပ်ပါ။ အသက်​ရလိမ့်မယ်” လို့ သူ့ကို​ပြောလိုက်​တယ်။ ဒါပေမဲ့ ဆွေးနွေးခန်း​က ဒီလောက်​နဲ့​မပြီး​ဘူး။ အဲဒီ​လူက တိကျတဲ့​အဖြေ​လောက်​ကိုပဲ လိုချင်တာ​မဟုတ်ဘူး။ “သူ​ဖြောင့်မတ်တယ်​ဆိုတာ ပြ​ချင်” နေတာ။ သူ့​အမြင် မှန်ကန်ကြောင်း၊ တခြား​သူတွေကို သူ​မျှမျှတတ ဆက်ဆံ​ကြောင်း ယေရှု အတည်ပြု​ပေးတာကို လိုချင်​နေတာ။ ဒါကြောင့် “ကျွန်တော်​ချစ်​ရမယ့် လူသားချင်းဟာ ဘယ်သူ​လဲ” လို့​မေးတယ်။ (လုကာ ၁၀:၂၈၊ ၂၉) ဒီ​မေးခွန်း​က ရိုးရှင်း​တယ်လို့ ထင်ရ​ပေမဲ့ အဓိပ္ပာယ် လေးနက်​တယ်။ ဘာကြောင့်လဲ။

“လူသားချင်း” ဆိုတဲ့ အသုံးအနှုန်းဟာ ဂျူး​ထုံးစံတွေကို လိုက်နာသူ​တွေ​နဲ့​ပဲ ဆိုင်တယ်​လို့ ဂျူးတွေ ယူဆတယ်။ အဲဒီ​အယူအဆကို ဝတ်ပြုရာ ၁၉:၁၈ က ထောက်ခံ​နေ​ပုံပဲ။ ဂျူး​တစ်ယောက်ဟာ ဂျူး​မဟုတ်တဲ့ လူမျိုးခြားနဲ့ မပေါင်းဖော်​အပ်​ဘူးလို့​တောင် ပြော​ကြတယ်။ (တမန်တော် ၁၀:၂၈) ဒါကြောင့် အဲဒီ​လူနဲ့ ယေရှုရဲ့ တပည့်​တချို့က ဂျူး​အချင်းချင်း​ကို ကြင်ကြင်နာနာ ဆက်ဆံ​မယ်​ဆိုရင် သူတို့ဟာ ဖြောင့်မတ်သူတွေ​ပဲ​လို့ ထင်နေ​ကြတယ်။ ဂျူး​မဟုတ်​သူတွေကို​တော့ ကြင်ကြင်နာနာ မဆက်ဆံ​ကြဘူး။ “လူသားချင်း” ဆိုတဲ့ အသုံးအနှုန်း​က သူတို့နဲ့ မဆိုင်​လို့​ပဲ။

အဲဒီ​လူနဲ့ တခြား​ဂျူးတွေကို မထိခိုက်​စေ​ဘဲ သူတို့ရဲ့​အမြင်ကို ယေရှု ဘယ်လို တည့်မတ်​ပေးသလဲ။ ယေရှု ပုံပြင်​တစ်ပုဒ် ပြောပြတယ်– “လူတစ်ယောက်က ဂျေရုဆလင်​မြို့ကနေ ယေရိခေါ​မြို့ကို ဆင်း​သွားတဲ့အခါ လမ်းမှာ ဓားပြတွေနဲ့ တိုးတယ်။ ဓားပြတွေက သူ့​အဝတ်​ပါ​မကျန် ချွတ်ယူ​ကြတယ်။ သူ့ကို ရိုက်နှက်​ပြီး သေလုမြောပါး ဖြစ်​တော့​မှ ပစ်ထားခဲ့ကြ​တယ်။ တိုက်​တိုက်ဆိုင်​ဆိုင် ပုရောဟိတ်​တစ်ယောက် အဲဒီ​လမ်းအတိုင်း ဆင်းလာ​တယ်။ သူ့ကို​မြင်​တော့ လမ်း​တစ်ဖက်​ကို ရှောင်​သွားတယ်။ လေဝိ​အမျိုးသား တစ်ယောက်လည်း အဲဒီ​နေရာကို ရောက်လာပြီး သူ့ကို​မြင်​တော့ လမ်း​တစ်ဖက်​ကို ရှောင်​သွားတယ်။ ရှမာရိ​လူ တစ်ယောက်လည်း အဲဒီ​လမ်းအတိုင်း ခရီးနှင်​လာတယ်။ သူ့ကို​တွေ့​တဲ့အခါ သနား​သွားတယ်။”—လုကာ ၁၀:၃၀-၃၃။

ပုရောဟိတ်တွေနဲ့ ဗိမာန်တော်​အမှုထမ်း လေဝိ​အမျိုးသားတွေဟာ ယေရိခေါမြို့​မှာ နေထိုင်​မှန်း အဲဒီ​ကျမ်းတတ် ကောင်းကောင်း​သိတယ်။ ဗိမာန်တော်​ကနေ ပြန်လာတဲ့​အခါ ၁၄ မိုင်​လောက်​ရှိတဲ့ လမ်းခရီး​ကို ဆင်း​သွားရတယ်။ အဲဒီ​လမ်း​က အန္တရာယ်​များ​ပြီး ဓားပြ​တွေ​လည်း ရှိတယ်။ ပုရောဟိတ်​နဲ့ လေဝိ​အမျိုးသားဟာ လမ်းမှာ​ဒုက္ခ​ရောက်နေတဲ့ ဂျူး​တစ်ယောက်ကို တွေ့​မယ်​ဆိုရင် ကူညီပေးသင့်တယ် မဟုတ်လား။ ယေရှု​ပြောတဲ့ ပုံပြင်​ထဲမှာ​တော့ မကူညီ​ပေးခဲ့​ကြဘူး။ ဂျူးတွေ အထင်သေး​တဲ့ ရှမာရိ​လူက ကူညီပေး​ခဲ့​တယ်။—ယောဟန် ၈:၄၈။

ရှမာရိ​လူက ဒဏ်ရာ​ရ​နေတဲ့ ဂျူး​ကို ဘယ်လို ကူညီ​ပေးခဲ့သလဲ။ ယေရှု အခုလို ဆက်ပြောတယ်– “သူ့​အနား​သွားပြီး ဒဏ်ရာတွေကို ဆီ​နဲ့​ဝိုင် လိမ်းပေး​တယ်။ ပတ်တီး​စည်းပေး​တယ်။ ပြီးတော့ မြည်းပေါ်​တင်၊ ဧည့်​ရိပ်သာ​ဆီ ခေါ်သွားပြီး ပြုစု​တယ်။ နောက်​တစ်နေ့မှာ ရှမာရိ​လူက ဧည့်​ရိပ်သာ​ပိုင်ရှင်​ကို ဒေနာရိ​နှစ်ပြား​ထုတ်ပေး​ပြီး ‘ဒီ​လူကို ပြုစု​ထား​ပေးပါ။ နောက်ထပ်​ကုန်ကျသမျှကို ကျွန်တော် ပြန်လာတဲ့​အခါ ပေး​ပါ့​မယ်’ လို့ မှာခဲ့တယ်။”—လုကာ ၁၀:၃၄၊ ၃၅။

 အတော်​ဆုံး​ဆရာ ယေရှု​က ဒီ​ပုံပြင်​ကို ပြော​ပြီးနောက် “အဲဒီ​လူ​သုံးယောက်မှာ ဓားပြ​တိုက်ခံ​ရသူ​ကို လူသားချင်း​ချစ်တဲ့ မေတ္တာပြ​တာ ဘယ်သူလို့ ခင်ဗျား​ထင်သလဲ” ဆိုပြီး စဉ်းစားစေတဲ့​ မေးခွန်း မေးလိုက်တယ်။ သူက “ရှမာရိ​လူ” လို့ မပြော​ချင်တဲ့​အတွက် “သနားစိတ်နဲ့ ကူညီတဲ့​သူပေါ့” လို့​ပြန်ဖြေ​တယ်။ ဒါနဲ့ ယေရှု​က “ခင်ဗျားလည်း သွားပြီး အဲဒီအတိုင်း လုပ်ပါ” လို့​ပြောပြီး ပုံပြင်​မှာပါတဲ့ သင်ခန်းစာ​ကို ဖော်ထုတ်ခဲ့​တယ်။—လုကာ ၁၀:၃၆၊ ၃၇။

တကယ့်ကို ထိရောက်တဲ့ သွန်သင်နည်း​ပါပဲ။ ဂျူး​မဟုတ်တဲ့​သူတွေလည်း လူသားချင်း​ပဲ​လို့ ယေရှု တဲ့တိုး​ပြောလိုက်ရင် အဲဒီ​လူနဲ့ တခြား​ဂျူးတွေ လက်ခံ​ပါ့မလား။ လက်ခံမယ် မထင်​ဘူး။ ဒါပေမဲ့ နားထောင်​သူတွေ နားလည်​နိုင်တဲ့ အသေးစိတ် အချက်အလက်​တွေ​သုံးပြီး ရိုးရှင်းတဲ့ ပုံပြင်​ပြောလိုက်တဲ့​အခါ “ကျွန်တော်​ချစ်​ရမယ့် လူသားချင်းဟာ ဘယ်သူ​လဲ” ဆိုတဲ့​မေးခွန်းရဲ့​အဖြေ ပေါ်​လာတယ်။ လူသားချင်း​ကို အမှန်တကယ်​ချစ်တဲ့​သူဟာ ကျမ်းစာ​မိန့်မှာ​တဲ့​အတိုင်း မေတ္တာနဲ့ ကြင်နာမှု​ပြ​တဲ့​သူပဲ။