၁၊ ၂။ (က) ဘယ်​ကြီးလေး​တဲ့ အရေးကိစ္စ​ကို လူသား​အားလုံး ရင်ဆိုင်​နေရ​သလဲ။ (ခ) အဲဒီ​ကိစ္စ​ကို သဘောပေါက်​ဖို့ ဘာကြောင့် အရေးကြီး​သလဲ။

လူများစွာ​အတွက် ငွေ​ဟာ ကြီးမားတဲ့​အရေးကိစ္စ ဖြစ်တယ်။ ပစ္စည်းဥစ္စာ စုဆောင်း​ဖို့၊ ပိုင်ဆိုင်​တာ​တွေ ထိန်းသိမ်း​ထား​ဖို့​ပဲ အာရုံစိုက်​ကြ​တယ်။ တချို့က​တော့ မိသားစု၊ ကျန်းမာရေး၊ အောင်မြင်မှု​တွေကို ကြီးမားတဲ့​အရေးကိစ္စ​အဖြစ် ရှုမြင်​ကြ​တယ်။

^၂ ဒါပေမဲ့ လူသားတွေ ရင်ဆိုင်​နေရတဲ့၊ သိပ်​ကြီးလေး​တဲ့ အရေးကိစ္စ​က​တော့ ယေဟောဝါရဲ့ အချုပ်အခြာအာဏာ သံသယ​ကင်းရှင်းရေး​ပါပဲ။ ဒီ​အရေးကြီး​ကိစ္စ​ကို မျက်ခြည်မပြတ်​သွား​အောင် ဂရုစိုက်​ရမယ်။ ဘယ်လိုနည်းနဲ့ မျက်ခြည်ပြတ်​သွား​နိုင်သလဲ။ နေ့စဉ် လုပ်ဆောင်​ရမယ့်​အရာတွေ​ကိုပဲ အာရုံစိုက်​လွန်း​လို့ ဘုရားသခင့် အချုပ်အခြာအာဏာ​ သံသယ​ကင်းရှင်းရေး​ရဲ့ အရေးကြီးမှု​ကို မေ့လျော့​သွားနိုင်တယ်။ ဘဝပြဿနာ​တွေကြောင့် အဲဒီ​ကိစ္စ​ကြီး မှေးမှိန်​သွားနိုင်တယ်။ ဒါပေမဲ့ ယေဟောဝါရဲ့ အချုပ်အခြာအာဏာ​ သံသယ​ကင်းရှင်းရေး​ကို သဘောပေါက်​လေ ဘဝပြဿနာ​တွေကို ရင်ဆိုင်ဖို့ ပိုအသင့်​ဖြစ်​လေ​ပါပဲ။ ယေဟောဝါနဲ့​လည်း ပို​ရင်းနှီး​စေပါလိမ့်မယ်။

၃။ ဘုရားသခင့် အုပ်ချုပ်မှု​နဲ့ပတ်သက်ပြီး စာတန် ဘယ်လို စွပ်စွဲ​သလဲ။

^၃ စာတန်​မာရ်နတ်​ရဲ့ လုပ်ရပ်​ကြောင့် ယေဟောဝါရဲ့ အချုပ်အခြာအာဏာ ဖြောင့်မှန်မှု​ နဲ့ပတ်သက်တဲ့ မေးခွန်း​ပေါ်လာတယ်။ ဘုရားသခင့် အုပ်ချုပ်​မှု ပျက်​ယွင်း​နေတယ်၊ ဖန်ဆင်းရာ​တွေကို အကောင်းဆုံး​အရာတွေ မပေး​ဘဲ ထိမ်ချန်​ထားတယ်​လို့ စာတန် စွပ်စွဲ​တယ်။ လူသားတွေ ကိုယ့်ဘာသာကိုယ် အုပ်ချုပ်​ရင် ပို​ပျော်ရွှင်​ကောင်းစား​မယ်လို့ မာရ်နတ် ဆိုလိုတယ်။ (က. ၃:၁-၅) ဘယ်​လူသား​မှ ဘုရားသခင်​အပေါ် သစ္စာ​မ​စောင့်သိ​ချင်ဘူး၊ ဘယ်သူ​မဆို အတော်အတန် ဖိအားပေး​ခံရ​ရင် ယေဟောဝါရဲ့ အုပ်ချုပ်မှုကို ငြင်းပယ်​လိမ့်မယ်​လို့လည်း စာတန် စွပ်စွဲ​တယ်။ (ယောဘ ၂:၄၊ ၅) မာရ်နတ်​ရဲ့ စိန်ခေါ်မှု​ကြောင့် ဘုရား​အုပ်ချုပ်မှု​မပါ​ရင် ဆင်းရဲဒုက္ခ ခံစားရမယ်​ဆိုတဲ့ အမှန်တရားကို ကိုယ်တွေ့ခံစား​ဖို့ ယေဟောဝါ ခွင့်ပြု​ခဲ့တယ်။

၄။ အချုပ်အခြာအာဏာ အရေးကိစ္စ​ကို ဘာကြောင့် ဖြေရှင်း​ရ​မလဲ။

^၄ စာတန့်​စွပ်စွဲချက် မှား​ကြောင်း ယေဟောဝါ သိတယ်။ ဒါဆို​ရင် သက်သေပြ​ဖို့ စာတန်​ကို ဘုရားသခင် ဘာကြောင့် အချိန်ပေး​နေရ​သလဲ။ ဒီကိစ္စ​မှာ အသိဉာဏ်​ရှိ ဖန်ဆင်းရာ​အားလုံး ပါဝင်ပတ်သက်​နေတယ်။ (ဆာလံ ၈၃:၁၈ ကိုဖတ်ပါ။) ယေဟောဝါရဲ့ အုပ်ချုပ်မှုကို ပထမ​လူသား​မောင်နှံ ငြင်းပယ်​ခဲ့တယ်။ အဲဒီအချိန်ကစပြီး တခြားသူ​များစွာ​လည်း ငြင်းပယ်​ခဲ့ကြတယ်။ ဒါကြောင့် မာရ်နတ်​ရဲ့ စွပ်စွဲချက် ဟုတ်မှန်​နေ​မလား​လို့ တချို့ တွေးမိ​နိုင်တယ်။ လူသားတွေ၊ ကောင်းကင်တမန်​တွေရဲ့ စိတ်ထဲ ဒီ​ပြဿနာ မဖြေရှင်း​သေး​သ​ရွေ့ နိုင်ငံ၊ လူမျိုး၊ မိသားစု၊ လူတွေ သဘောထားကွဲ​လွဲ​နိုင်တယ်။ ယေဟောဝါရဲ့ အချုပ်အခြာအာဏာ သံသယ​ကင်းရှင်း​သွားတဲ့​အခါမှာ​တော့ ကိုယ်တော့် ဖြောင့်မတ်​တဲ့ အုပ်ချုပ်မှုကို အားလုံး ထာဝစဉ် လက်အောက်ခံ​ကြပါ​လိမ့်မယ်။ စကြဝဠာ​တစ်ခုလုံး ပြန်​ငြိမ်းချမ်း​လာပါလိမ့်မယ်။—ဧ. ၁:၉၊ ၁၀။

၅။ ယေဟောဝါရဲ့ အချုပ်အခြာအာဏာ​ဘက် ရပ်တည်​ရာမှာ ကျွန်တော်တို့ရဲ့ အခန်းကဏ္ဍ​က ဘာလဲ။

^၅ ဘုရားသခင့် အချုပ်အခြာအာဏာ​ရဲ့ ဖြောင့်မှန်မှု သံသ​ယ​ကင်းရှင်း​သွားပါလိမ့်မယ်။ စာတန်​နဲ့ လူ့အုပ်ချုပ်မှု လုံးဝ ကျၡုံး​ပြီး ဖယ်ရှား​ခံရ​မယ်။ မေရှိယနိုင်ငံတော်​အားဖြင့် ဘုရားသခင့် အုပ်ချုပ်မှု အောင်မြင်​ပါလိမ့်မယ်။ ဘုရား​အုပ်ချုပ်မှု​ဘက် လူသားတွေ ရပ်တည်​နိုင်​ကြောင်း သမာဓိစောင့်​ထိန်း​သူတွေ သက်သေပြ​ကြ​ရမယ်။ (ဟေရှာ. ၄၅:၂၃၊ ၂၄) ယေဟော​ဝါရဲ့ အချုပ်အခြာအာဏာ​ကို သမာဓိ​ရှိရှိ ထောက်ခံသူ ဖြစ်ချင်​သလား။ ဖြစ်ချင်​မှာ သေချာ​ပါတယ်။ သမာဓိစောင့်​ထိန်း​သူ​ဖြစ်ဖို့ ကြီးမားတဲ့​အရေးကိစ္စ​ကို အာရုံစိုက်​ရမယ်။ အဲဒီ​ကိစ္စ​ရဲ့ အရေးကြီးမှု​ကို နားလည်​ရမယ်။

၆။ ယေဟောဝါရဲ့ အချုပ်အခြာအာဏာ သံသယ​ကင်းရှင်းရေး ဘယ်လောက် အရေးကြီး​သလဲ။

^၆ အထက်​မှာ ဖော်ပြခဲ့တဲ့​အတိုင်း ယေဟောဝါရဲ့ အချုပ်အခြာအာဏာ သံသယ​ကင်းရှင်းရေး​ဟာ လူသားတွေ ပါဝင်​ပတ်သက်​နေတဲ့ အရေးကြီးတဲ့​ကိစ္စ ဖြစ်တယ်။ တစ်ဦးတစ်ယောက်​ရဲ့ ပျော်ရွှင်မှု​ထက် ပို​အရေးကြီးတယ်။ ဒီလို​ပြော​လို့ ကျွန်တော်တို့ရဲ့ ကယ်တင်ခြင်း​က အရေး​မကြီး​ဘူး၊ ကျွန်တော်တို့​ကို ယေဟောဝါ ဂရုမစိုက်​ဘူးလို့ ဆိုလို​သလား။ မဆို​လို​ပါဘူး။ ဘာကြောင့်လဲ။

၇၊ ၈။ ဘုရားသခင့် အချုပ်အခြာအာဏာ သံသယ​ကင်းရှင်းရေး​မှာ ကတိတော်​တွေ ပြည့်စုံခြင်း ဘာကြောင့် ပါဝင်​သလဲ။

^၇ လူသားတွေ​ကို ယေဟောဝါ ချစ်မြတ်နိုး​တယ်၊ တန်ဖိုးထား​တယ်။ ကျွန်တော်တို့ ထာဝရ​ကယ်တင်ခြင်း ရဖို့ သားတော်​ရဲ့​သွေး​ကို တလိုတလား အသုံးပြု​ခဲ့တယ်။ (ယော. ၃:၁၆။ ၁ ယော. ၄:၉) ယေဟောဝါ​သာ ကတိ​ပျက်​ရင် ဘုရားက ကောင်းတာ​တွေကို ထိမ်ချန်​ပြီး မတရားနည်း​နဲ့ အုပ်ချုပ်​တဲ့ မုသာ​သမား​ဖြစ်တယ်​ဆိုတဲ့ စာတန်ရဲ့ စွပ်စွဲချက်​တွေ မှန်​သွားပါလိမ့်မယ်။ “ခရစ်တော် ရောက်ရှိ​မယ်ဆို​တဲ့ ကတိ​က ဘယ်မှာ​လဲ။ ဘိုးဘေး​တွေ သေခြင်း​မှာ အိပ်ပျော်​ချိန်​ကတည်းက ဘာမှ မပြောင်းလဲ​ပါဘူး။ လူ​ကို ဘုရားသခင် ဖန်ဆင်း​ခဲ့​ချိန်​တုန်းက​လိုပဲ အရာအားလုံး​ဟာ အဲဒီ​အတိုင်း ဆက်​ဖြစ်နေ​တာပဲ” လို့ ကဲ့ရဲ့လှောင်ပြောင်​တဲ့ ဆန့်ကျင်သူ​တွေလည်း မှန်​သလို ဖြစ်သွား​မယ်။ (၂ ပေ. ၃:၃၊ ၄) ဒါကြောင့် အချုပ်အခြာအာဏာ သံသယ​ကင်းရှင်းရေး​မှာ နာခံ​မှု​ရှိတဲ့ လူသားတွေ​ရဲ့ ကယ်တင်ခြင်း ပါဝင်ဖို့ ယေဟောဝါ အသေအချာ လုပ်ဆောင်​ပါလိမ့်မယ်။ (ဟေရှာယ ၅၅:၁၀၊ ၁၁ ကိုဖတ်ပါ။) ဒီ့​အပြင် ယေဟောဝါရဲ့ အချုပ်အခြာအာဏာ​ ဟာ မေတ္တာ​ပေါ် အခြေခံ​တယ်။ ဒါကြောင့် သစ္စာရှိကျေးကျွန်​တွေကို အမြဲ မေတ္တာ​ရှိမယ်၊ တန်ဖိုးထား​မယ်​ဆိုတာ စိတ်ချ​နိုင်ပါတယ်။—ထွ. ၃၄:၆။

^၈ ယေဟော​ဝါ့ အချုပ်အခြာအာဏာ​ရဲ့ အရေးကြီးမှု​ကို အသိအမှတ်ပြု​ခြင်းက ကျွန်တော်တို့ရဲ့ ကယ်တင်ခြင်း​ကို​ဖြစ်စေ၊ ဘုရားသခင်​ရှေ့ ကျွန်တော်တို့ရဲ့ တန်ဖိုး​ကို​ဖြစ်စေ မသေးသိမ်​စေ​ပါဘူး။ အချုပ်အခြာအာဏာ​နဲ့ ကယ်တင်ခြင်း​ကို တော်မှန်​စွာ ရှုမြင်​နေတာ​ပါ။ ဒီ​ကြီးမားတဲ့ အရေးကိစ္စ​ကို အာရုံစိုက်​ဖို့၊ ယေဟောဝါရဲ့ ဖြောင့်မတ်​တဲ့ အုပ်ချုပ်မှု​ဘက် ရပ်တည်​ဖို့ဆိုရင် တော်မှန်​တဲ့​အမြင်​ရှိ​ဖို့ အရေးကြီးတယ်။

၉။ ယောဘ​နဲ့ပတ်သက်ပြီး စာတန် ဘယ်လို စွပ်စွဲ​ခဲ့​သလဲ။ (ဆောင်းပါးအစမှာပါတဲ့ ရုပ်ပုံကို ကြည့်ပါ။)

^၉ တော်မှန်​တဲ့​အမြင်​ရှိ​ဖို့ လိုအပ်​ကြောင်း အစောဆုံး ရေးသားခဲ့​တဲ့ ယောဘ​ကျမ်း​မှာ ရှင်းရှင်းလင်းလင်း တွေ့ရတယ်။ ပြင်းထန်တဲ့ ဆင်းရဲဒုက္ခ ခံစားရ​တဲ့အခါ ဘုရားသခင်ကို ယောဘ ငြင်းပယ်​မယ်လို့ စာတန် စွပ်စွဲ​ခဲ့တယ်။ ယောဘ​ကို ဘုရားကိုယ်​တိုင် ညှဉ်းဆဲ​ဖို့ စာတန် အကြံပေး​ခဲ့တယ်။ ယေဟော​ဝါ အဲဒီလို​မလုပ်​ခဲ့​ပေ​မဲ့ “သူ​ပိုင်ဆိုင်သမျှ မင်း​လက်ထဲ​မှာ ရှိတယ်” လို့ပြော​ပြီး ယောဘ​ကို စမ်းသပ်ဖို့ စာတန်​ကို ခွင့်ပြု​ခဲ့တယ်။ (ယောဘ ၁:၇-၁၂ ကိုဖတ်ပါ။) အချိန်တို​အတွင်း ကျွန်​တွေ၊ သိုး​နွား​တိရစ္ဆာန်တွေနဲ့ ချစ်​ရတဲ့ သားသမီး​ဆယ်ယောက်​ကို ယောဘ ဆုံးၡုံး​ခဲ့ရတယ်။ ယောဘ​ဒုက္ခရောက်​တာ ဘုရားသခင်​ကြောင့်​လို့ ထင်​ရ​အောင် စာတန်​ လုပ်ဆောင်​ခဲ့တယ်။ (ယောဘ ၁:၁၃-၁၉) နာကျင်စေ​တဲ့ ရွံ​စရာ​အနာ​ဆိုး​နဲ့လည်း နှိပ်စက်​ခဲ့​ပြန်​တယ်။ (ယောဘ ၂:၇) သူ့​မိန်းမ​နဲ့ မိတ်ဆွေ အတုအယောင် သုံးယောက်​ရဲ့ စိတ်ပျက်​စရာ စကား​တွေကြောင့် ယောဘ ပို​စိတ်ဓာတ်ကျ​ခဲ့တယ်။—ယောဘ ၂:၉။ ၃:၁၁။ ၁၆:၂။

၁၀။ (က) ဘုရားသခင်​အပေါ် သမာဓိ​ရှိကြောင်း ပြဖို့ ယောဘ ဘာလုပ်ခဲ့သလဲ။ (ခ) ဘယ်နည်း​နဲ့ ယောဘ ပျက်ကွက်​ခဲ့​သလဲ။

^၁၀ ဘာ​ရလဒ် ရခဲ့​သလဲ။ စာတန့်​စွပ်စွဲချက် လုံးဝ မှားယွင်း​ကြောင်း ထင်ရှား​သွားတယ်။ ဘုရားသခင်ကို ယောဘ ကျောမခိုင်း​ခဲ့ဘူး။ (ယောဘ ၂၇:၅) ဒါပေမဲ့ တစ်ခဏ​တော့ တော်မှန်​တဲ့​အမြင် ပျောက်ဆုံး​သွားတယ်။ မိမိ​ဖြောင့်မတ်​ကြောင်း ပြဖို့​ပဲ အာရုံစိုက်​ခဲ့​ပြီး ဒုက္ခရောက်​ရတဲ့ အကြောင်းရင်းကို​တောင် မေးမြန်းခဲ့​တယ်။ (ယောဘ ၇:၂၀။ ၁၃:၂၄) ယောဘ ခံစားရ​တာတွေကို ကြည့်ရင် သူ့​လုပ်ရပ်​ကို နားလည်​ပေးနိုင်​ပေ​မဲ့ ယောဘရဲ့ အတွေးအခေါ်​ကို တည့်မတ်ပေး​ဖို့ လိုအပ်​မှန်း ဘုရားသခင် သိတယ်။ ယောဘ​ကို ယေဟော​ဝါ ဘာ​ပြောခဲ့​သလဲ။

၁၁၊ ၁၂။ ဘာကို နားလည်​လာဖို့ ယောဘ​ကို ယေဟောဝါ ကူညီ​ပေးခဲ့သလဲ။ ယောဘ ဘယ်လို တုံ့ပြန်​ခဲ့​သလဲ။

^၁၁ ယောဘ အခန်းကြီး ၃၈ က​နေ ၄၁ မှာ ယောဘ​ကို ဘုရား​သခင် ပြောတဲ့​စကား​တွေ တွေ့နိုင်တယ်။ ဒုက္ခရောက်​ရတဲ့ အကြောင်းရင်းကို ဘုရားသခင် အတိအကျ ပြောတာ​မျိုး​တော့ မဖတ်​ရဘူး။ ဒုက္ခရောက်​ရတဲ့ အကြောင်းရင်းကို ရှင်းပြ​ဖို့ ယေဟောဝါ အဓိက ပြောဆို​နေတာ မဟုတ်ဘူး။ ရှင်းပြ​မယ်ဆိုရင် ဘုရားသခင်​က ရှင်း​ချက်​ထုတ်​နေ​သလို ဖြစ်သွား​မယ်။ ဘုရားသခင်ရဲ့ ကြီးမြတ်မှု​နဲ့ ယှဉ်​ရင် ယောဘ  ဘာမှ​အရေးမပါ​ကြောင်း နားလည်ဖို့ ယေဟောဝါ ပြောခဲ့​တာပါ။ ထည့်​စဉ်းစား​ရမယ့် ပို​အရေးကြီးတဲ့​ကိစ္စတွေ​ရှိမှန်း သိလာ​အောင် ယောဘ​ကို ကူညီပေး​ခဲ့တယ်။ (ယောဘ ၃၈:၁၈-၂၁ ကိုဖတ်ပါ။) ဒီလိုနဲ့ ယောဘ တော်မှန်​တဲ့​အမြင် ပြန်​ရခဲ့တယ်။

^၁၂ ပြင်းထန်တဲ့​စမ်းသပ်မှုကို​ ယောဘ ခံရပ်​ပြီး​တဲ့အခါ တဲ့တိုး​ဆုံးမ​တာ​က ယေဟောဝါ ရက်စက်​ရာကျ​သလား။ မကျ​ပါဘူး။ ယောဘ အဲဒီလို မယူဆ​ခဲ့ဘူး။ ဒုက္ခသုက္ခ​တွေ​ကြားမှာ ယောဘ ကျေးဇူးတင်​လေးမြတ်​စွာ ပြောဆိုခဲ့တယ်။ “ပြောခဲ့တဲ့​စကား​တွေကို ပြန်ရုပ်သိမ်း​ပါတယ်။ မြေမှုန့်​နဲ့ ပြာ​ထဲမှာ​ထိုင်ပြီး နောင်တရ​ပါ​ပြီ” လို့တောင် ပြောခဲ့တယ်။ ယေဟော​ဝါရဲ့ တဲ့တိုး​ဆုံးမမှု ရလဒ်​ပါပဲ။ (ယောဘ ၄၂:၁-၆) အစောပိုင်း​မှာ လူငယ် ဧလိဟု​ရဲ့ ဆုံးမမှု​ကိုလည်း ယောဘ ခံ​ခဲ့ရတယ်။ (ယောဘ ၃၂:၅-၁၀) ဘုရားသခင်ရဲ့ ဆုံးမမှု​ကို ယောဘ လက်ခံပြီး အမြင် ပြောင်းလဲ​တဲ့အခါ စမ်းသပ်မှု​အောက် ယောဘ​သစ္စာရှိ​တာ​ကို နှစ်သက်​ကြောင်း တခြားသူတွေကို ယေဟောဝါ ပြောခဲ့တယ်။—ယောဘ ၄၂:၇၊ ၈။

၁၃။ ယောဘ စမ်းသပ်ခံရ​ပြီးနောက် အတော်ကြာ​တဲ့အထိ ယေဟော​ဝါရဲ့ ဆုံးမမှု​က ဘယ်လို အကျိုးပြု​ခဲ့​သလဲ။

^၁၃ ယေဟောဝါရဲ့ ဆုံးမမှု​က ဆင်းရဲဒုက္ခ​တွေ ပြီးဆုံး​ပြီးနောက်​မှာတောင် ယောဘ​ကို ဆက်​အကျိုးပြု​ခဲ့တယ်။ ဘယ်နည်း​နဲ့​လဲ။ “ယေဟောဝါက ယောဘ​ကို ဘဝ​ရဲ့​အစောပိုင်း​နှစ်တွေ​ထက် နှောင်းပိုင်း​နှစ်တွေ​မှာ ပို​ကောင်းချီးပေး” ခဲ့တယ်။ “သား​ခုနစ်ယောက်၊ သမီး​သုံးယောက် ထပ်​ရ” တဲ့အတွက် အရင်​အခြေအနေ ပြန်​ဖြစ်ဖို့ အချိန်​ကြာ​ခဲ့မှာပဲ။ (ယောဘ ၄၂:၁၂-၁၄) စာတန့်​လက်ချက်​ကြောင့် သေဆုံး​ခဲ့တဲ့ သားသမီးတွေကို ယောဘ သတိရ​မှာ သေချာ​တယ်။ ဒုက္ခရောက်​ခဲ့တဲ့​အချိန်​အကြောင်း မကြာခဏ ပြန်တွေး​နေ​မိမှာ​ပဲ။ ဒုက္ခရောက်​ရတဲ့​အကြောင်းရင်းကို နားလည်​ပြီးနောက်​မှာတောင် ဒီလောက်​ဒုက္ခခံ​စရာ လိုအပ်​လို့​လား​ဆိုပြီး တွေးမိ​နိုင်တယ်။ ဘာပဲဖြစ်ဖြစ် ဘုရားသခင့် ဆုံးမမှု​ကို ပြန်တွေး​နိုင်တယ်။ ဒါက တော်မှန်​တဲ့​အမြင်​ကို ထိန်းသိမ်း​ထား​ဖို့၊ နှစ်သိမ့်မှု​ရဖို့ ယောဘ​ကို ကူညီပေး​ပါလိမ့်မယ်။—ဆာ. ၉၄:၁၉။

၁၄။ ယောဘရဲ့ အတွေ့အကြုံ​က​နေ ဘာသင်ယူနိုင်သလဲ။

^၁၄ ကျွန်တော်တို့လည်း ယောဘ​ကျမ်းက​နေ တော်မှန်​တဲ့​အမြင်​နဲ့ နှစ်သိမ့်မှု ရရှိနိုင်​တယ်။ ဒီ​အကြောင်းကို ယေဟောဝါ ထိန်းသိမ်း​ထားတာ “ကျွန်တော်တို့ကို သွန်သင်ဆုံးမ​ဖို့ ဖြစ်တယ်။ ကျမ်းစာက ကျွန်တော်တို့ကို ခံနိုင်ရည်​နဲ့ နှစ်သိမ့်​မှု​ပေးတဲ့​အတွက် မျှော်လင့်ချက် ရှိစေတယ်။” (ရော. ၁၅:၄) ဘာ​သင်ခန်းစာ ရသလဲ။ အဓိက​အားဖြင့် ယေဟော​ဝါရဲ့ အချုပ်အခြာအာဏာ သံသယ​ကင်းရှင်းရေး​ဆိုတဲ့ ကြီးမားတဲ့ အရေးကိစ္စ​ကို မျက်ခြည်ပြတ်​သွားတဲ့​အထိ ကိုယ့်​အရေး​မှာပဲ နစ်မြုပ်​မနေ​ဖို့​ပါပဲ။ ဒီ​အရေးကြီးတဲ့​ကိစ္စ​မှာ ကျွန်တော်​တို့ရဲ့ အခန်းကဏ္ဍ​က ခက်ခဲတဲ့ အခြေအနေ​အောက်မှာ​တောင် ယောဘ​လို သစ္စာရှိ​နေဖို့ ကူညီပေး​မှန်း သဘောပေါက်​ထားကြ​စို့။

၁၅။ စမ်းသပ်မှု​အောက် သစ္စာရှိခြင်း​က ဘာကို ဖြစ်မြောက်​စေ​သလဲ။

^၁၅ ကျွန်တော်တို့ရဲ့ သစ္စာရှိမှု​အကြောင်း တွေးတောခြင်း​က ဘာကြောင့် နှစ်သိမ့်မှု ဖြစ်စေ​သလဲ။ စမ်းသပ်မှုတွေ​မှာ  ရည်ရွယ်ချက် ရှိလို့​ပါပဲ။ ယေဟောဝါ မနှစ်သက်​လို့ ဆင်းရဲဒုက္ခ​ခံရ​တာ မဟုတ်ဘူး။ ဘုရားသခင့် အချုပ်အခြာအာဏာ​ဘက် ရပ်တည်​ဖို့ အခွင့်အရေး ရရှိ​စေတယ်။ (ပညာ. ၂၇:၁၁) ခံနိုင်ရည်​က “ဘုရားသခင်ရဲ့ နှစ်သက်မှု​ကို ရစေ” ပြီး မျှော်လင့်ချက် ခိုင်မာ​စေတယ်။ (ရောမ ၅:၃-၅ ကိုဖတ်ပါ။) “ယေဟောဝါဟာ အလွန်​ချစ်ခင်​စာနာ​ပြီး ကရုဏာ​ကြီး” ကြောင်း ယောဘ​ကျမ်းက ပေါ်လွင်​စေတယ်။ (ယာ. ၅:၁၁) ဒါကြောင့် အချုပ်အခြာအာဏာ ထောက်ခံသူ​အားလုံးကို ဘုရားသခင် ဆုချ​မယ်​ဆိုတာ စိတ်ချ​နိုင်ပါတယ်။ ဒါကို သိရှိ​ထားခြင်း​က “ဝမ်းမြောက်​စွာ၊ စိတ်ရှည်​စွာ ခံရပ်နိုင်” ဖို့ ကူညီပေးတယ်။—ကော. ၁:၁၁။

၁၆။ ယေဟော​ဝါ့ အချုပ်အခြာအာဏာ သံသယ​ကင်းရှင်းရေး​ရဲ့ အရေးကြီးမှု​အကြောင်း ကိုယ့်ကိုယ်ကိုယ် ဘာကြောင့် သတိပေး​နေရ​မလဲ။

^၁၆ ယေဟောဝါရဲ့ အချုပ်အခြာအာဏာ သံသယ​ကင်းရှင်းရေး​ကို အာရုံစိုက်​နေဖို့ ခက်ခဲ​နိုင်တယ်။ တစ်ခါတလေ ပြဿနာတွေ များ​လွန်း​နေ​ပုံ ပေါက်​နိုင်တယ်။ သေးငယ်တဲ့ ပြဿနာ​ကို​တောင် တနုံ့နုံ့တွေး​နေရင် စိတ်ထဲ​မှာ ကြီးလာ​နိုင်တယ်။ ဒါကြောင့် ခက်ခဲတဲ့​အခြေအနေ​တွေမှာ ဘုရားသခင့် အချုပ်အခြာအာဏာ​ကို ထောက်ခံ​ခြင်း​ရဲ့ အရေးကြီးမှု​အကြောင်း ကိုယ့်ကိုယ်ကိုယ် ပုံမှန် သတိပေး​နေတာ ကောင်းတယ်။

၁၇။ ယေဟောဝါရဲ့ လုပ်ငန်းမှာ ပုံမှန် ပါဝင်​နေခြင်းက ကြီးလေး​တဲ့ အရေးကိစ္စ​ကို အာရုံစိုက်​နေဖို့ ဘယ်လို ကူညီ​ပေးနိုင်သလဲ။

^၁၇ ယေဟောဝါရဲ့ လုပ်ငန်းမှာ ပုံမှန် ပါဝင်ခြင်း​က ကြီးလေး​တဲ့ အရေးကိစ္စ​ကို အာရုံစိုက်​နေဖို့ ကူညီပေး​နိုင်တယ်။ ဥပမာ၊ ညီအစ်မ ရာ​နီး​ဟာ လေဖြတ်​ဝေဒနာ၊ နာတာရှည် ကင်ဆာရောဂါ ခံစားနေရ​တယ်။ ဆေးရုံမှာ ကုသ​မှု ခံယူ​နေရင်း ဆေးရုံ​ဝန်ထမ်း​တွေ၊ လူနာ​တွေ၊ ဧည့်သည်​တွေကို သက်သေခံတယ်။ ဆေးရုံ​အဆောင်​တစ်ခုမှာ နှစ်ပတ်​ခွဲ​အတွင်းမှာပဲ နာရီ​ပေါင်း ၈၀ သက်သေခံ​ခဲ့တယ်။ သေဆုံး​ခါနီး​မှာတောင် ယေဟောဝါရဲ့ အချုပ်အခြာအာဏာ အရေးကိစ္စ​ကို မျက်ခြည်မပြတ်​ခဲ့ဘူး။ ဒါကြောင့် စိတ်သောက​တချို့ သက်သာ​ခဲ့တယ်။

၁၈။ ညီအစ်မ​တစ်ယောက်​ရဲ့ တွေ့ကြုံမှု​က ယေဟောဝါရဲ့ အချုပ်အခြာအာဏာ​ဘက် ရပ်တည်ခြင်း​ရဲ့ အကျိုးကျေးဇူး​ကို ဘယ်လို ဖော်ပြသလဲ။

^၁၈ နေ့စဉ် ဖိအား​တွေ၊ အဆင်မပြေမှု​တွေ ကြုံရချိန်မှာလည်း ယေဟောဝါရဲ့ အချုပ်အခြာအာဏာ​ကို ကျွန်တော်တို့ အာရုံစိုက်​ချင်​ကြ​တယ်။ ဂျင်နီဖာ​ဟာ အိမ်ပြန်​ဖို့ လေယာဉ်​စောင့်​ရင်း လေဆိပ်​မှာ သုံးရက်​နေခဲ့ရ​တယ်။ လေယာဉ်​တစ်စင်း​ပြီး တစ်စင်း ခရီး​စဉ် ဖျက်သိမ်း​တယ်။ အထီးကျန်၊ ပင်ပန်း​တဲ့အတွက် ကိုယ့်ကိုယ်ကိုယ် သနား​မိ​နိုင်တယ်။ ဒါပေမဲ့ မိမိ​လို​ စိတ်ပျက်​စရာ အခြေအနေ ကြုံနေ​ရသူ​တွေကို ကူညီပေး​နိုင်မယ့် နည်းလမ်း​ကို သိ​ဖို့ ဆုတောင်း​ခဲ့တယ်။ ရလဒ်အနေနဲ့ လူများစွာ​ကို သက်သေ​ခံ​နိုင်ခဲ့​ပြီး စာပေများ​စွာ ဝေငှ​ခဲ့တယ်။ “ခက်ခဲတဲ့​အခြေအနေကြား ယေဟောဝါ ကောင်းချီးပေး​ပြီး နာမ​တော် ထင်ရှားစေ​နိုင်အောင် လိုအပ်တဲ့​ခွန်အား ပေးခဲ့တယ်” လို့ပြောတယ်။ ယေဟော​ဝါရဲ့ ရည်ရွယ်ချက်​ကို ဂျင်နီဖာ အာရုံစိုက်​ခဲ့တယ်။

၁၉။ ယေဟောဝါရဲ့ အချုပ်အခြာအာဏာ​ကိစ္စ​မှာ ဘုရား​လူတွေ ဘယ်ဘက်​မှာ ရပ်တည်​ကြ​သလဲ။

^၁၉ ယေဟောဝါရဲ့ အချုပ်အခြာအာဏာ​ကို နားလည်​သဘောပေါက်ခြင်း​က စစ်မှန်တဲ့​ဘာသာ​နဲ့ မှားယွင်းတဲ့​ဘာသာ​ကို ခွဲခြားသိရှိ​စေတယ်။ ဘုရားသခင့်​လူမျိုးဟာ အချုပ်အခြာအာဏာ​ကို ထောက်ခံ​ခဲ့တာ ကြာ​လှ​ပါ​ပြီ။ စစ်မှန်တဲ့ ဝတ်ပြုရေး​ကို ထောက်ခံသူ​တွေအနေနဲ့ ထပ်တူ​ကျမ်းစာ​အမြင်​ကို ထိန်းသိမ်းဖို့ ကျွန်တော်တို့​တစ်ဦးစီ ကြိုးစားအားထုတ်​သင့်တယ်။

၂၀။ အချုပ်အခြာအာဏာ​ကို ထောက်ခံဖို့ သင့်​ကြိုးစားအားထုတ်မှု​ကို ယေဟောဝါ ဘယ်လို သဘောထား​သလဲ။

^၂၀ သစ္စာရှိရှိ အမှုဆောင်ခြင်း၊ စမ်းသပ်မှု​တွေကို ခံရပ်ခြင်း​အားဖြင့် အချုပ်အခြာအာဏာ​ကို ထောက်ခံဖို့ သင့်​ကြိုးစားအားထုတ်မှု​ကို ယေဟောဝါ တန်ဖိုးထားကြောင်း စိတ်ချ​ပါ။ (ဆာ. ၁၈:၂၅) ယေဟောဝါရဲ့ အချုပ်အခြာအာဏာ​ကို ဘာကြောင့် စိတ်နှလုံး အကြွင်းမဲ့ ထောက်ခံ​သင့်​ကြောင်း၊ ဘယ်လို ထောက်ခံ​နိုင်​ကြောင်း နောက်​ဆောင်းပါးမှာ ဆွေးနွေးပါမယ်။