၁-၂။ (က) ဧဖက် ၆:၁၆ အရ “ယုံကြည်ခြင်း ဒိုင်းလွှား​ကြီး” ကို ကျွန်တော်တို့ ဘာကြောင့် လိုအပ်​သလဲ။ (ခ) ဘယ်​မေးခွန်းတွေ​ကို ဆွေးနွေး​ကြ​မလဲ။

သင့်​မှာ “ယုံကြည်ခြင်း ဒိုင်းလွှား​ကြီး” ရှိသလား။ (ဧဖက် ၆:၁၆ ကိုဖတ်ပါ။) ရှိ​မှာ သေချာ​တယ်။ ဒိုင်းလွှား​က ကိုယ်ခန္ဓာ​ကို ကာကွယ်​ပေး​သလို ကျွန်တော်တို့​ရဲ့ ယုံကြည်ခြင်း​က လောက​စနစ်​ရဲ့ အကျင့်ပျက်မှု၊ အကြမ်းဖက်မှု​နဲ့ ဘုရား​တရားမဲ့ အခြေအနေတွေ​ကနေ ကာကွယ်​ပေး​တယ်။

^၂ ကျွန်တော်တို့​ဟာ “နောက်ဆုံး​ကာလ” မှာ အသက်​ရှင်​နေ​တဲ့​အတွက် ယုံကြည်ခြင်း အမြဲ စမ်းသပ်​ခံ​ရ​လိမ့်​မယ်။ (၂ တိ. ၃:၁) ကိုယ့်​ရဲ့ ယုံကြည်ခြင်း​ ဒိုင်းလွှား ခိုင်ခံ့​မှု ရှိ​မရှိ ဘယ်လို စစ်ဆေး​နိုင်​မလဲ၊ ဆက်​ခိုင်ခံ့​အောင် ဘာ​လုပ်​နိုင်​မလဲ​ဆိုတဲ့ မေးခွန်းတွေ​ကို ဆွေးနွေး​ကြ​စို့။

၃။ စစ်သားတွေ​ဟာ ဒိုင်းလွှား​ကို ဘာ​လုပ်​ဖို့ လို​သလဲ။ ဘာကြောင့်​လဲ။

^၃ ကျမ်းစာ​ခေတ်​က စစ်သားတွေ​ရဲ့ ဒိုင်းလွှား​ကို သားရေ​နဲ့ ဖုံးအုပ်​ထား​လေ့​ရှိ​တယ်။ စစ်သားတွေ​က ဒိုင်းလွှား​ရဲ့ သားရေတွေ ကြာရှည်​ခံ​ပြီး သတ္တု​အပိုင်းတွေ သံချေး​မတက်​အောင် ဆီ​သုတ်လိမ်း​ပေး​တယ်။ ဒိုင်းလွှား ပျက်​နေ​ရင် ပြန်​ပြင်​တယ်။ ဒါမှ တိုက်ပွဲ​အတွက် အမြဲ အသင့်​ဖြစ်​နေ​မယ်။ ဒီ​ဥပမာ​က ကျွန်တော်တို့​ရဲ့ ယုံကြည်ခြင်း​နဲ့ ဘယ်လို သက်ဆိုင်​သလဲ။

၄။ သင့်​ရဲ့ ယုံကြည်ခြင်း ဒိုင်းလွှား​ကို ဘာကြောင့် စစ်ဆေး​ရ​မလဲ။ ဘယ်လို စစ်ဆေး​သင့်​သလဲ။

^၄ ရှေးခေတ်​စစ်သားတွေ​လိုပဲ ကျွန်တော်တို့​လည်း တိုက်ပွဲ​အတွက် အမြဲ အသင့်​ဖြစ်​အောင် ယုံကြည်ခြင်း ဒိုင်းလွှား​ကို ပုံမှန် စစ်ဆေး​ပြီး ထိန်းသိမ်း​ရ​မယ်။  ခရစ်ယာန်တွေ​အနေနဲ့ ကျွန်တော်တို့​ဟာ ရန်သူ​နတ်ဆိုးတွေ​ကို တိုက်လှန်​နေ​ရ​တယ်။ (ဧ. ၆:၁၀-၁၂) ယုံကြည်ခြင်း ဒိုင်းလွှား​ကို ကျွန်တော်တို့​ကိုယ်စား ဘယ်သူ​မှ ထိန်းသိမ်း​ပေး​လို့ မရ​ဘူး။ စမ်းသပ်မှုတွေ​ကို ရင်ဆိုင်​ဖို့ အသင့်​ဖြစ်​မဖြစ် ဘယ်လို သိ​နိုင်​မလဲ။ ဘုရား​သခင့် အကူ​အညီ ရ​ဖို့ ဆုတောင်း​ပါ။ ကိုယ့်​ကို ဘုရား ရှုမြင်​သလို ရှုမြင်​နိုင်​အောင် ကျမ်းစာ ဖတ်​ပါ။ (ဟီ. ၄:၁၂) “ယေဟောဝါ​ကို စိတ်​နှလုံး​အကြွင်းမဲ့ ယုံကြည်​ကိုးစား​ပါ။ ကိုယ့်​ရဲ့ သိ​နားလည်​နိုင်​စွမ်း​ကို အားမကိုး​နဲ့” လို့ ကျမ်းစာ​မှာ ပြော​တယ်။ (ပညာ. ၃:၅၊ ၆) ဒါကို​ စိတ်​ထဲ ထားပြီး မကြာသေးခင်​က ချ​ခဲ့​တဲ့ ဆုံးဖြတ်ချက်တွေ​ကို ပြန်​သုံးသပ်​ပါ။ ဥပမာ၊ ငွေကြေး ခက်ခဲ​တဲ့​အခါ ဟီဘရူး ၁၃:၅ မှာ​ပါ​တဲ့ “မင်းတို့​ကို ငါ ဘယ်တော့​မှ ပစ်ထား​မှာ မဟုတ်​ဘူး။ ဘယ်တော့​မှ စွန့်ခွာ​မှာ မဟုတ်​ဘူး” ဆို​တဲ့ ယေဟောဝါ​ရဲ့ ကတိ​ကို သတိရ​သလား။ အဲဒီ​ကတိ​အတိုင်း ယေဟောဝါ ကူညီ​မယ်​ဆိုတာ စိတ်ချ​သလား။ စိတ်ချ​တယ်​ဆိုရင် သင့်​ရဲ့ ယုံကြည်ခြင်း ဒိုင်းလွှား အခြေအနေ​ကောင်း​နေတယ်။

၅။ ကိုယ့်​ယုံကြည်ခြင်း​ကို စစ်ဆေး​တဲ့​အခါ ဘာတွေ တွေ့​လာ​နိုင်​သလဲ။

^၅ ကိုယ့်​ယုံကြည်ခြင်း​ကို အသေ​အချာ စစ်ဆေး​လိုက်​တဲ့​အခါ သတိ​မထား​မိ​တဲ့ အားနည်းချက်တွေ​ကို တွေ့​လာ​နိုင်​တယ်။ ဥပမာ၊ စိုးရိမ်​ပူပန်မှုတွေ၊ အလိမ်​အညာတွေ၊ စိတ်ဓာတ်​ကျ​တာတွေ​ကြောင့် သင့်​ရဲ့ ယုံကြည်ခြင်း ထိခိုက်​နေ​မှန်း တွေ့​လာ​နိုင်​တယ်။ ဒါဆို​ရင် ပို​မဆိုး​အောင် ဘယ်လို ကာကွယ်​နိုင်​သလဲ။

၆။ သင့်တော်​တဲ့ စိုးရိမ်​ပူပန်မှု​တချို့​ကို ဥပမာ​ပေး​ပါ။

^၆ တချို့​စိုးရိမ်​ပူပန်မှုတွေ​ဟာ သင့်တော်​ပါ​တယ်။ ဥပမာ၊ ယေဟောဝါ​နဲ့ ယေရှု မနှစ်သက်​မှာ​ကို စိုးရိမ်​တာ​ဟာ သင့်တော်​တယ်။ (၁ ကော. ၇:၃၂) ကြီးလေး​တဲ့​အပြစ် ကျူးလွန်​ထား​မယ်​ဆိုရင် ဘုရား​နဲ့ ဆက်ဆံရေး​ကောင်း ပြန်​မရ​မှာ စိုးရိမ်​တတ်​ကြ​တယ်။ (ဆာ. ၃၈:၁၈) အိမ်ထောင်ဖက်၊ မိသားစုဝင်​နဲ့ ယုံကြည်သူချင်းတွေ​ရဲ့ အကျိုး​အတွက် ကျွန်တော်တို့ စိုးရိမ်​ကြ​တယ်။—၁ ကော. ၇:၃၃။ ၂ ကော. ၁၁:၂၈။

၇။ ပညာအလိမ္မာ ၂၉:၂၅ အရ လူကို ဘာကြောင့် မကြောက်​သင့်​သလဲ။

^၇ မသင့်တော်​တဲ့ စိုးရိမ်​ပူပန်မှု​က​တော့ ယုံကြည်ခြင်း​ကို ပျက်စီး​စေ​နိုင်​တယ်။ ဥပမာ၊ စားဝတ်​နေရေး​အတွက် အမြဲ တွေးပူ​မိ​နိုင်​တယ်။ (မ. ၆:၃၁၊ ၃၂) ဒါကြောင့် ရုပ်ပစ္စည်း ပိုင်ဆိုင်​ဖို့ အာရုံစိုက်​လာ​နိုင်​တယ်။ ငွေ​တပ်မက်​စိတ် ဝင်​လာ​နိုင်​တယ်။ ဒါဆိုရင် ယေဟောဝါ​အပေါ် ကျွန်တော်တို့​ရဲ့ ယုံကြည်ခြင်း အားနည်း​လာ​မယ်။ ဘုရား​နဲ့ ဆက်ဆံရေး ထိခိုက်​လာ​မယ်။ (မာ. ၄:၁၉။ ၁ တိ. ၆:၁၀) မသင့်တော်​တဲ့ စိုးရိမ်​ပူပန်မှု နောက်​တစ်မျိုး​ကတော့ လူတွေ​ရဲ့ မျက်နှာသာ​ရ​ဖို့ တွေးပူ​နေ​ခြင်း​ပဲ။ ယေဟောဝါ မနှစ်သက်​မှာ​ထက် လူတွေ လှောင်ပြောင်​မှာ၊ နှိပ်စက်​မှာ​ကို စိုးရိမ်​လာ​နိုင်​တယ်။ အဲဒီလို​မဖြစ်​အောင် ယုံကြည်ခြင်းနဲ့ ရဲစွမ်း​သတ္တိ ပေး​ဖို့ ယေဟောဝါ​ဆီ အသနားခံ​ရ​မယ်။—ပညာအလိမ္မာ ၂၉:၂၅ ကိုဖတ်ပါ။ လု. ၁၇:၅။

၈။ အလိမ်​အညာတွေ​ကို ဘယ်လို တုံ့ပြန်​သင့်​သလဲ။

^၈ “မုသား​ရဲ့ အဖ” စာတန်​ဟာ ယေဟောဝါ​နဲ့ ညီအစ်ကို​/​မတွေ​အကြောင်း အလိမ်​အညာတွေ ဖြန့်​ဖို့ မိမိ​ထိန်းချုပ်​ထား​သူတွေ​ကို သုံး​နေ​တယ်။ (ယော. ၈:၄၄) ဥပမာ၊ အယူ​ဖောက်ပြန်​သူတွေ​က ဝက်ဘ်ဆိုက်၊ တီဗီ​နဲ့ တခြား​ မီဒီယာတွေ​မှာ ယေဟောဝါ​ရဲ့ အဖွဲ့အစည်း​အကြောင်း အလိမ်​အညာတွေ ဖြန့်​နေ​တယ်။ အဲဒါတွေ​ဟာ စာတန် ပစ်ခတ်​တဲ့ “မီး​မြား​တွေ” ပဲ။ (ဧ. ၆:၁၆) ဒီလို​အလိမ်​အညာတွေ​ကို​ ဘယ်လို​ တုံ့ပြန်​သင့်​သလဲ။ လုံးဝ ရှောင်​သင့်​တယ်။ ဘာကြောင့်လဲ။ ယေဟောဝါ​နဲ့ ညီအစ်ကို​/​မတွေ​ကို ယုံကြည်​စိတ်ချ​လို့​ပဲ။ အယူ​ဖောက်ပြန်​သူတွေ​ကို ကျွန်တော်တို့  ဝေးဝေး ရှောင်​ကြ​တယ်။ ဘာ​အကြောင်း​နဲ့​မှ သူတို့​နဲ့ အငြင်း​အခုံ မလုပ်​ဘူး။ သူတို့ ဘာ​ပြော​သလဲ​ဆိုပြီး စပ်စု​တာ​မျိုး​တောင် မလုပ်​ကြ​ဘူး။

၉။ စိတ်ဓာတ်​ကျ​တာ​က ကျွန်တော်တို့​ကို ဘယ်လို ထိခိုက်​စေ​နိုင်​သလဲ။

^၉ စိတ်ဓာတ်​ကျ​တာ​က ယုံကြည်ခြင်း အားနည်း​စေ​နိုင်​တယ်။ တစ်ခါ​တလေ ပြဿနာတွေ​ကြောင့် စိတ်ဓာတ်​ကျ​မိ​နိုင်​တယ်။ အဲဒီ​ပြဿနာတွေ​ကို လျစ်လျူ​ရှု​လို့​လည်း မရ​ပြန်​ဘူး။ လျစ်လျူ​ရှု​လိုက်​ရင် တာဝန်​မသိ​တတ်​သူ ဖြစ်​သွား​မယ်။ ဒါပေမဲ့ ပြဿနာ​အကြောင်း​ပဲ တစ်ချိန်လုံး စဉ်းစား​မနေ​သင့်​ဘူး။ စဉ်းစား​နေ​ရင် ယေဟောဝါ ပေး​တဲ့ အံ့ဖွယ်​မျှော်လင့်ချက်​ကို မျက်ခြည်​ပြတ်​သွား​နိုင်​တယ်။ (ဗျာ. ၂၁:၃၊ ၄) စိတ်ဓာတ်​ကျ​ရင် အားလျော့​ပြီး ဘုရား​ကို ကျောခိုင်း​မိ​နိုင်​တယ်။ (ပညာ. ၂၄:၁၀) ကျွန်တော်တို့ အဲဒီလို​အဖြစ်​မျိုး ကြုံ​စရာ မလို​ပါ​ဘူး။

၁၀။ ညီအစ်မ​တစ်ယောက်​ရဲ့ စာ​ကနေ ဘာ​သိ​ရ​သလဲ။

^၁၀ အသည်း​အသန် ဖျား​နေ​တဲ့ ခင်ပွန်း​ကို ပြုစု​ရင်း ယုံကြည်ခြင်း​ကို ထိန်းသိမ်း​ခဲ့​တဲ့ အမေရိကန်​က ညီအစ်မ​တစ်ယောက်​အကြောင်း သုံးသပ်​ကြည့်​ပါ။ “ဖိစီးမှု​များ​ပြီး စိတ်ဓာတ်​ကျ​ပေမဲ့ ကျွန်မတို့​ရဲ့ မျှော်လင့်ချက် ခိုင်မာ​နေ​တယ်။ ယုံကြည်ခြင်း ခိုင်မြဲ​စေ​ဖို့၊ စိတ်​အား​တက်​စေဖို့ ယေဟောဝါ ပြင်ဆင်​ပေး​သမျှ​အတွက် သိပ်​ကျေးဇူး​တင်​တယ်။ ဒီလို​အကြံဉာဏ်​နဲ့ အားပေးမှု​ကို ကျွန်မတို့ လို​နေ​တာ။ ဒါ​က ကျွန်မတို့​ကို ရှေ့ဆက်​စေ​တယ်။ စာတန်​ကြောင့် ကြုံ​နေ​ရ​တဲ့ အခက်အခဲတွေ​ကို ခံရပ်​စေ​တယ်” လို့ ဌာနချုပ်​ကို စာရေး​တယ်။ စိတ်ဓာတ်​ကျ​မှု​ကို ဘယ်လို အောင်မြင်​နိုင်​ကြောင်း ဒီ​ညီအစ်မ​ရဲ့ စာ​ကနေ သိ​ရ​တယ်။ အခက်အခဲတွေ​ကို စာတန်​ရဲ့ စမ်းသပ်မှု​အဖြစ် ရှုမြင်​ပါ။ ယေဟောဝါ​ကို နှစ်သိမ့်​ပေး​ရှင်​အဖြစ် ယုံကြည်​ပါ။ ဘုရား ပြင်ဆင်​ပေး​ရာတွေ​ကို တန်ဖိုး​ထား​ပါ။

၁၁။ ကိုယ့်​ယုံကြည်ခြင်း အခြေအနေ​ကို သိ​နိုင်​ဖို့ ကိုယ့်ကိုယ်ကိုယ် ဘယ်​မေးခွန်းတွေ မေး​သင့်​သလဲ။

^၁၁ သင့်​ရဲ့ ယုံကြည်ခြင်း ဒိုင်းလွှား​မှာ ပြုပြင်​ဖို့ လို​နေ​တဲ့ အပိုင်းတွေ​ကို သတိထား​မိ​သလား။ လွန်​ခဲ့​တဲ့ လ​အနည်းငယ်​က မသင့်တော်​တဲ့ စိုးရိမ်​ပူပန်မှုတွေ​ကို ရှောင်​နိုင်​ခဲ့​သလား။ အယူ​ဖောက်ပြန်​သူတွေ​ရဲ့ အလိမ်​အညာတွေ​ကို နား​မထောင်​ဘဲ၊ အငြင်း​အခုံ မလုပ်​ဘဲ ရှောင်​နိုင်​ခဲ့​သလား။ စိတ်ဓာတ်​ကျ​တာ​ကို  အနိုင်​ယူ​ခဲ့​သလား။ ဒါဆိုရင် သင့်​ယုံကြည်ခြင်း အခြေအနေ​ကောင်း​နေ​တယ်။ ဒါပေမဲ့ စာတန်​ဟာ ကျွန်တော်တို့​ကို တိုက်​ဖို့ တခြား​လက်နက်တွေ သုံး​နေ​တဲ့​အတွက် အမြဲ သတိ​ရှိ​နေ​ရ​မယ်။ လက်နက်​တစ်ခု​ကို သုံးသပ်​ကြည့်​ကြ​စို့။

၁၂။ ရုပ်​ပစ္စည်း အဓိက​ထား​ခြင်း​က ဘာ​ဖြစ်​စေ​နိုင်​သလဲ။

^၁၂ ရုပ်​ပစ္စည်း အဓိက​ထား​ခြင်း​က အာရုံ​လွဲ​စေ​ပြီး ယုံကြည်ခြင်း ဒိုင်းလွှား​ကို လျစ်လျူ​ရှု​မိ​စေ​နိုင်​တယ်။ “စစ်မှု​ထမ်း​နေ​တဲ့​သူက စီးပွားရေး​လုပ်ငန်းတွေ​မှာ ပါဝင်​မှာ မဟုတ်​ဘူး။ စစ်သည်​အဖြစ် စာရင်း​သွင်း​ပေး​တဲ့​သူကို စိတ်​ကျေနပ်​စေ​ချင်​တာ​ကိုး” လို့ တမန်တော် ပေါလု ပြော​တယ်။ (၂ တိ. ၂:၄) ရောမ​စစ်သားတွေ​ဟာ စီးပွားရေး​လုပ်ငန်းတွေ​မှာ ပါဝင်​ခွင့် မရှိ​ဘူး။ ဒီ​တောင်းဆိုချက်​ကို မလိုက်နာ​ရင် ဘာဖြစ်​နိုင်​သလဲ။

၁၃။ စစ်သား​တစ်ယောက်​ဟာ စီးပွားရေး​ကိစ္စ​မှာ ဘာကြောင့် မပါဝင်​သင့်​သလဲ။

^၁၃ စဉ်းစားကြည့်ပါ။ စစ်သား​တစ်စု မနက်ပိုင်း စစ်ရေး​လေ့ကျင့်​ချိန်မှာ တစ်ယောက်​က ပျက်ကွက်​နေ​တယ်။ သူ​က စျေး​မှာ အစားအသောက်​တွေ ရောင်း​နေ​တယ်။ ညနေပိုင်း​မှာ စစ်သားတွေ​ဟာ ချပ်ဝတ်​တန်ဆာတွေ​ကို စစ်ဆေး​ပြီး ဓား​သွေး​နေ​ချိန်​မှာ စျေး​ရောင်း​တဲ့ စစ်သား​က​တော့ နောက်​တစ်နေ့ ရောင်း​မယ့် အစား​အသောက်တွေ​ကို ပြင်ဆင်​နေ​တယ်။ နောက်​တစ်နေ့​မနက် ရန်သူတွေ ရုတ်တရက် လာ​တိုက်​တဲ့အခါ ဘယ်​စစ်သား​က တိုက်ပွဲ​ဝင်​ဖို့ အသင့်​ဖြစ်​ပြီး တပ်မှူး​ရဲ့ မျက်နှာသာ​ကို ရ​မလဲ။ သင့်​ဘေး​မှာ ဘယ်သူ့​ကို ရှိ​စေ​ချင်​မလဲ။ တိုက်ပွဲ​အတွက် ကြိုတင်​ပြင်ဆင်​ထား​တဲ့ စစ်သား​လား။ စျေး​ရောင်း​ဖို့ အလုပ်​များ​နေ​တဲ့ စစ်သား​လား။

၁၄။ ခရစ်တော်​ရဲ့ စစ်သားတွေ​အနေ​နဲ့ ကျွန်တော်တို့ ဘာကို တန်ဖိုးထား​ကြ​သလဲ။

^၁၄ စစ်သားကောင်းတွေ​လိုပဲ ကျွန်တော်တို့​လည်း တပ်မှူးတွေ ဖြစ်တဲ့ ယေဟောဝါ​နဲ့ ယေရှု​ရဲ့ မျက်နှာသာ ရ​ဖို့​ဆိုတဲ့ အဓိက​ပန်းတိုင်​ကနေ အာရုံ​မလွဲ​ကြ​ဘူး။ အဲဒါ​ကို စာတန့်​လောက ကမ်းလှမ်း​တဲ့​အရာ​မှန်​သမျှ​ထက် တန်ဖိုးထား​ကြ​တယ်။ ယေဟောဝါ​အတွက် အမှုဆောင်​ဖို့ အချိန်​နဲ့ ခွန်အား ရှိ​အောင်၊ ယုံကြည်ခြင်း ဒိုင်းလွှား​နဲ့ တခြား​ချပ်ဝတ်​တန်ဆာ တွေ အခြေအနေ​ကောင်း​နေ​အောင် ကြိုးစား​ကြ​တယ်။

၁၅။ ကျွန်တော်တို့​ကို ပေါလု ဘယ်လို သတိ​ပေး​သလဲ။ ဘာကြောင့်​လဲ။

^၁၅ ကျွန်တော်တို့ အမြဲ သတိ​ရှိ​နေ​ရ​မယ်။ ဘာကြောင့်လဲ။ “ချမ်းသာဖို့ စိတ်​ပိုင်းဖြတ်​ထား​သူတွေ” ဟာ “ယုံကြည်ခြင်း​ကနေ လမ်းလွဲ​သွား” မယ်​လို့ တမန်တော် ပေါလု သတိပေး​ထား​လို့​ပဲ။ (၁ တိ. ၆:၉၊ ၁၀) “လမ်းလွဲ” ဆိုတဲ့ အသုံး​အနှုန်း​က မလိုအပ်​တဲ့ ပစ္စည်း​ဥစ္စာ​တွေ ပိုင်ဆိုင်​ဖို့ ကြိုးစား​ရင်း အာရုံ​လွဲ​သွား​နိုင်​ကြောင်း ဖော်ပြ​တယ်။ “မိုက်မဲ​ပြီး အန္တရာယ်​ရှိ​တဲ့ အလို​ဆန္ဒတွေ” ကျွန်တော်တို့ စိတ်​ထဲ ပေါ်​လာ​နိုင်​တယ်။ အဲဒီ​ဆန္ဒတွေ​ကို စိတ်​နှလုံး​ထဲ ဆက်​ရှိ​ခွင့်​ပြု​မယ့်​အစား စာတန် သုံး​နေ​တဲ့ လက်နက်တွေ​အဖြစ် ရှုမြင်​သင့်​တယ်။

၁၆။ မာကု ၁၀:၁၇-၂၂ မှာ​ပါ​တဲ့ မှတ်တမ်း​အရ ဘယ်​မေးခွန်းတွေ မေး​သင့်​သလဲ။

^၁၆ ရုပ်​ပစ္စည်းတွေ ဝယ်​ဖို့ ငွေကြေး​တတ်​နိုင်​တယ် ဆိုပါစို့။ မလိုအပ်​ပေမဲ့ လို​ချင်​တာ​ကို ဝယ်​တာ မှား​သလား။ မမှားပါ​ဘူး။ ဒါပေမဲ့ ကိုယ့်ကိုယ်ကိုယ် ဒီလို​မေး​ပါ– တစ်ခုခု​ကို ဝယ်​နိုင်​တယ်​ဆိုရင်တောင် ဒါ​ကို သုံး​ဖို့၊ ထိန်းသိမ်း​ဖို့ အချိန်​နဲ့ ခွန်အား ရှိ​ရဲ့​လား။ ပစ္စည်း​ဥစ္စာတွေ​ကို အလွန် စွဲလမ်း​နေ​သလား။ ရုပ်​ပစ္စည်း စွဲလမ်း​စိတ်​က ဘုရား​အမှုတော်​မှာ ပို​ပါဝင်​ဖို့ ယေရှု​ရဲ့ ဖိတ်ခေါ်ချက်​ကို ငြင်းပယ်​တဲ့ လူငယ်​ လို ဖြစ်​သွား​စေ​မလား။ (မာကု ၁၀:၁၇-၂၂ ကိုဖတ်ပါ။) ဘဝ​ကို ရိုးရိုး​ရှင်းရှင်း ထား​တာ၊ တန်ဖိုး​ရှိ​တဲ့ အချိန်​နဲ့ ခွန်အား​ကို အလိုတော် ထမ်းဆောင်ရာ​မှာ သုံးတာ​က ပို​ကောင်း​ပါ​တယ်။

၁၇။ ဘယ်​အချက်​ကို မမေ့​သင့်​သလဲ။

^၁၇ ကျွန်တော်တို့​ဟာ စစ်​မြေပြင်​မှာ တိုက်ပွဲ​ဝင်​နေ​ရ​ကြောင်း မမေ့​ပါ​နဲ့။ တိုက်ပွဲ​အတွက် နေ့တိုင်း အသင့်​ဖြစ်​နေ​ရ​မယ်။ (ဗျာ. ၁၂:၁၇) ယုံကြည်ခြင်း ဒိုင်းလွှား​ကို ကျွန်တော်တို့​ကိုယ်စား ညီအစ်ကို​/​မတွေ သယ်​ပေး​လို့ မရ​ဘူး။ ကိုယ်တိုင် မြဲမြဲ ကိုင်​ထား​ရ​မယ်။

၁၈။ ရှေးခေတ် စစ်သားတွေ​ဟာ ဒိုင်းလွှား​ကို ဘာကြောင့် မြဲမြဲ ကိုင်​ထား​ကြ​သလဲ။

^၁၈ ရှေးခေတ် စစ်သား​တစ်ယောက် ရွပ်ရွပ်​ချွံချွံ တိုက်ပွဲ​ဝင်​တဲ့အခါ ဂုဏ်ပြု​ခံ​ရ​တယ်။ ဒါပေမဲ့ ဒိုင်းလွှား မပါ​ဘဲ အိမ်​ပြန်​လာ​ရင်​တော့ ရှက်​စရာ​ပဲ။ “ဒိုင်းလွှား​ကို စွန့်ပစ်​ခဲ့​တာ​ဟာ အလွန်​ရှက်​စရာ​ပဲ” လို့ ရောမ​သမိုင်း​ပညာရှင် တက်စီတပ်စ် ရေး​တယ်။ ဒါကြောင့် စစ်သားတွေ​ဟာ ဒိုင်းလွှား​ကို စစ်​မြေပြင်​မှာ မြဲမြဲ ကိုင်​ထား​ကြ​တာ ဖြစ်​တယ်။

၁၉။ ယုံကြည်ခြင်း ဒိုင်းလွှား​ကို ဘယ်လို မြဲမြဲ ကိုင်​ထား​နိုင်​သလဲ။

^၁၉ ကျွန်တော်တို့​ဟာ အစည်းအဝေး မှန်မှန်​တက်​ခြင်း၊ ယေဟောဝါ​ရဲ့ နာမည်​နဲ့ နိုင်ငံတော်​အကြောင်း တခြား​သူတွေ​ကို ဟောပြော​ခြင်း​အားဖြင့် ယုံကြည်ခြင်း ဒိုင်းလွှား​ကို​ မြဲမြဲ ကိုင်​ထား​ကြ​တယ်။ (ဟီ. ၁၀:၂၃-၂၅) နေ့တိုင်း ကျမ်းစာ​ဖတ်​ပြီး လက်တွေ့​ကျင့်သုံး​နိုင်​ဖို့ ဆုတောင်း​ကြ​တယ်။ (၂ တိ. ၃:၁၆၊ ၁၇) အဲဒီလို​လုပ်​နေ​ရင် စာတန် သုံး​တဲ့ ဘယ်​လက်နက်​မှ ကျွန်တော်တို့​ကို ထာဝစဉ် ထိခိုက်​အောင် လုပ်​နိုင်​မှာ မဟုတ်​ဘူး။ (ဟေရှာ. ၅၄:၁၇) “ယုံကြည်ခြင်း ဒိုင်းလွှား​ကြီး” က ကျွန်တော်တို့​ကို ကာကွယ်​ပေး​ပါ​လိမ့်​မယ်။ ညီအစ်ကို​/​မတွေ​နဲ့​အတူ အခိုင်အမာ ရပ်တည်​ရင်း နေ့စဉ်​တိုက်ပွဲတွေ​ကို ကျွန်တော်တို့ အောင်မြင်​ကြ​ပါ​လိမ့်​မယ်။ စာတန်​နဲ့ သူ့​နောက်လိုက်တွေ​ကို အနိုင်ယူ​တဲ့ စစ်ပွဲ​မှာ ယေရှု​ဘက်​က ရပ်တည်​ခွင့်​ကို​လည်း ရ​ပါ​လိမ့်​မယ်။—ဗျာ. ၁၇:၁၄။ ၂၀:၁၀။