၁။ ကျွန်တော်​တို့ တစ်ဦးချင်း​စီ​ကို ယေဟောဝါ စိတ်ဝင်စား​တယ်လို့ ဘာကြောင့် ပြော​နိုင်​သလဲ။

ကျွန်တော်​တို့ တစ်ဦးချင်း​စီ​ကို ယေဟောဝါ ဆွဲဆောင်​ထား​တယ်။ (ယော. ၆:၄၄) ဒါက ဘာကို ဆိုလို​သလဲ။ ကမ္ဘာ​ပေါ်​က သန်း​ထောင်ချီ​ ရှိတဲ့ လူတွေကို စစ်ဆေး​ရင်း မိမိကို စိတ်နှလုံး အကြွင်းမဲ့ ချစ်​လာနိုင်မယ့် သင့်ကို သတိထား​မိတယ်၊ တန်ဖိုး​ထား​တယ်​ဆို​တဲ့ သဘော​ပဲ။ (၁ ရာ. ၂၈:၉) သင့်ကို ယေဟောဝါ သိတယ်၊ နားလည်တယ်၊ ချစ်တယ်။ တကယ့်ကို အားရှိစရာ​ပါ​ပဲ။

၂။ သိုး​တစ်ကောင်​ချင်း​စီ​ကို ယေဟောဝါ စိတ်ဝင်စား​ကြောင်း ယေရှု ဘယ်လို ဥပမာ​ပေး​သလဲ။

^၂ ယေဟောဝါ​က သင့်ကို ဂရုစိုက်​သလို ညီအစ်ကို/မ အားလုံး​ကိုလည်း ဂရုစိုက်​တယ်။ အဲဒီ​အချက်​ကို နားလည်အောင် ယေရှု​က ယေဟောဝါ​ကို သိုးထိန်း​နဲ့ နှိုင်းယှဉ်ခဲ့​တယ်။ သိုး​အကောင် ၁၀၀ မှာ တစ်ကောင် လမ်းလွဲ​သွား​ရင် သိုးထိန်း ဘာလုပ်​မလဲ။ “၉၉ ကောင်​ကို တောင်​ပေါ်မှာ ထားခဲ့​ပြီး လမ်းလွဲ​သွားတဲ့ သိုး​တစ်ကောင်​ကို သူ ထွက်​ရှာ​မယ်။” သိုး​ကို ပြန်တွေ့​တဲ့​အခါ လမ်းလွဲ​သွား​လို့ ကြိမ်းမောင်း​မယ့်​အစား သိပ်​ပျော်​မယ်။ သိုး​တိုင်း ယေဟောဝါ​အတွက် အရေးပါ​တယ်။ “ကောင်းကင်​မှာ စံမြန်း​တဲ့ အဖဘုရား​က ကလေး​ငယ်​နဲ့ တူ​တဲ့ ဟောဒီ​လူတွေကို တစ်ယောက်မှ မပျက်စီး​စေ​ချင်ဘူး” လို့ ယေရှု ပြော​တယ်။—မ. ၁၈:၁၂-၁၄။

၃။ ဒီ​ဆောင်းပါး​မှာ ဘာ​အကြောင်း ဆွေးနွေး​ကြ​မလဲ။

^၃ ညီအစ်ကို/မတွေ​ကို စိတ်ဓာတ်ကျ​အောင် လုပ်တဲ့​သူ ကျွန်တော်​တို့ ဘယ်တော့မှ မဖြစ်​ချင်ဘူး။ တခြား​သူတွေကို တိုက်မိ​လဲ​စေ​တာ​မျိုး မဖြစ်အောင် ဘယ်လို ရှောင်​မလဲ။ ကျွန်တော်​တို့ကို တစ်ယောက်ယောက် စိတ်​ထိခိုက်အောင် လုပ်ရင်​ကော။ အဲဒီ​အကြောင်း​တွေ​ကို ဒီ​ဆောင်းပါး​မှာ ဆွေးနွေး​ပါ​မယ်။ ဦးဆုံး၊ မဿဲ အခန်းကြီး ၁၈ မှာပါတဲ့ ‘ကလေး​ငယ်​နဲ့ တူ​တဲ့ လူတွေ’ အကြောင်း လေ့လာ​ကြည့်​ရအောင်။

၄။ ‘ကလေး​ငယ်​နဲ့​တူ​တဲ့ လူတွေ’ ဆိုတာ ဘယ်သူတွေလဲ။

^၄ ‘ကလေး​ငယ်​နဲ့​တူ​တဲ့ လူတွေ’ ဆိုတာ ယေရှုရဲ့ တပည့်​အားလုံး​ကို ဆိုလိုတယ်။ ဘယ်​အသက်အရွယ်​ပဲ ရှိနေပါစေ သူတို့​အားလုံး​ဟာ ယေရှု သွန်သင်​ပေး​တာ​ကို “ကလေး​ငယ်​တွေ​လို” ခံယူ​ချင်​ကြတယ်။ (မ. ၁၈:၃) နောက်ခံ၊ ယဉ်ကျေးမှု၊ ရှုမြင်ပုံ၊ စရိုက်​တွေ မတူကြ​ပေမဲ့ ယေရှုကို ယုံကြည်​ကြတယ်။ ယေရှုလည်း သူတို့ကို သိပ်​ချစ်တယ်။—မ. ၁၈:၆။ ယော. ၁:၁၂။

၅။ ကျေးကျွန် တစ်ယောက်ယောက်​ကို တိုက်မိ​လဲ​အောင်၊ ထိခိုက်အောင် လုပ်တဲ့​သူကို ယေဟောဝါ ဘယ်လို သဘောထား​သလဲ။

^၅ ‘ကလေး​ငယ်​နဲ့​တူ​တဲ့ လူတွေ’ အားလုံး ယေဟောဝါ​အတွက် တန်ဖိုး​ရှိတယ်။ ယေဟောဝါ​ရဲ့ ခံစားချက်​ကို နားလည်​ဖို့ ကလေး​တွေ​အပေါ် ထား​တဲ့ ကျွန်တော်​တို့​ရဲ့ ခံစားချက်​ကို စဉ်းစား​ကြည့်​ပါ။ ကလေး​တွေ​ဟာ ကျွန်တော်​တို့အတွက် တန်ဖိုး​ရှိတယ်။ လူကြီးတွေ​လို ခွန်အား၊ အတွေ့အကြုံ၊ စဉ်းစား​နိုင်စွမ်း မရှိတဲ့​အတွက် သူတို့ကို ကာကွယ်​ပေး​ချင်​တယ်။ သူတို့ကို မထိခိုက်​စေ​ချင်ဘူး။ တစ်ယောက်ယောက် ထိခိုက်အောင် လုပ်ရင် ကျွန်တော်​တို့ စိတ်ဆိုး​တယ်။ အဲဒီလိုပဲ ယေဟောဝါ​လည်း ကျွန်တော်​တို့ကို ကာကွယ်​ပေး​ချင်​တယ်။ မိမိ​ကျေးကျွန် တစ်ယောက်ယောက်​ကို တိုက်မိ​လဲ​အောင်၊ ထိခိုက်အောင် လုပ်တဲ့​သူကို ယေဟောဝါ စိတ်ဆိုး​တယ်။—ဟေရှာ. ၆၃:၉။ မာ. ၉:၄၂။

၆။ ၁ ကောရိန္သု ၁:၂၆-၂၉ အရ ယေရှုရဲ့ တပည့်​တွေ​ကို လောကက ဘယ်လို ရှုမြင်​သလဲ။

^၆ တခြား​ဘယ်​နည်းနဲ့ ယေရှုရဲ့ တပည့်​တွေ​ဟာ “ကလေး​ငယ်​နဲ့” တူ​သလဲ။ လောကက ချမ်းသာသူ၊ နာမည်ကြီး​သူ၊ ဩဇာ​အာဏာ​ ရှိသူတွေကို အထင်ကြီး​တယ်။ ယေရှုရဲ့ တပည့်​တွေ​က​တော့ အရေး​မပါတဲ့၊ မထင်ပေါ်တဲ့ “ကလေး​ငယ်” လို ဖြစ်နေ​ပုံ​ရတယ်။ (၁ ကောရိန္သု ၁:၂၆-၂၉ ကို​ဖတ်ပါ။) ဒါပေမဲ့ ယေဟောဝါ​က​တော့ အဲဒီလို မမြင်​ဘူး။

၇။ ညီအစ်ကို/မတွေ​နဲ့​ပတ်သက်ပြီး ယေဟောဝါ ကျွန်တော်​တို့ကို ဘယ်လို သဘောထား ရှိစေ​ချင်​သလဲ။

^၇ နှစ်ပေါင်း​များစွာ အမှုဆောင်​လာ​သူ​ဖြစ်စေ၊ လူသစ်​ဖြစ်စေ ကျေးကျွန်​အားလုံး​ကို ယေဟောဝါ ချစ်တယ်။ ညီအစ်ကို/မအားလုံး ယေဟောဝါ​အတွက် အရေးပါ​သလို ကျွန်တော်​တို့အတွက်​လည်း အရေးပါ​သင့်တယ်။ ညီအစ်ကို/မတချို့​ကိုပဲ မဟုတ်ဘဲ “ညီအစ်ကို အသင်းအပင်း တစ်ရပ်လုံး​ကို ချစ်” သင့်တယ်။ (၁ ပေ. ၂:၁၇) သူတို့ကို အတတ်နိုင်ဆုံး ဂရုစိုက်​ကာကွယ်​ပေး​သင့်တယ်။ ကိုယ့်​ကြောင့် တစ်ယောက်ယောက် စိတ်ထိခိုက်​သွားတယ်​ဆိုရင် ‘ဒီလောက်​လေး​တော့ ခွင့်လွှတ်​သင့်ပါတယ်၊ အဖြစ်မသည်း​သင့်ဘူး’ လို့ တွေး​ပြီး ဂရုမစိုက်​တာ​မျိုး မလုပ်သင့်​ဘူး။ တချို့က ကိုယ့်​နောက်ခံ​ကြောင့် သိမ်ငယ်စိတ် ဝင်ပြီး စိတ်ထိခိုက်​လွယ်​တာ ဖြစ်​နိုင်တယ်။ တချို့က​လည်း အမှန်တရား​ထဲမှာ လူသစ် ဖြစ်လို့ တခြား​သူတွေရဲ့ အမှား​ကို ခွင့်လွှတ်​ဖို့ သင်ယူ​နေရ​တုန်း ဖြစ်​နိုင်တယ်။ ဘယ်လိုပဲ​ ဖြစ်ပါစေ ပြန်​သင့်မြတ်​ဖို့ အတတ်နိုင်ဆုံး ကြိုးစား​သင့်တယ်။ ကိုယ်​ဟာ တခြား​သူတွေ​ကြောင့် မကြာခဏ စိတ်ဆိုး​တတ်​သူ ဖြစ်တယ်​ဆိုရင် ဒါဟာ မကောင်းတဲ့ စရိုက် ဖြစ်​မှန်း အသိအမှတ်​ပြုပြီး ပြုပြင်​ဖို့ ကြိုးစား​သင့်တယ်။ ကိုယ်တိုင် စိတ်​ငြိမ်သက်​အောင်၊ တခြား​သူတွေနဲ့​လည်း ဆက်ဆံ​ရေး​ ကောင်း​အောင် အဲဒီလို လုပ်သင့်တယ်။

၈။ ယေရှု​ခေတ်​က လူတွေရဲ့ ဘယ်​သဘောထား​က တပည့်​တွေ​ကို ဩဇာ​လွှမ်းမိုး​ခဲ့​သလဲ။

^၈ “ကောင်းကင်​နိုင်ငံ​မှာ ဘယ်သူ အကြီးမြတ်ဆုံး ဖြစ်​မလဲ” ဆိုပြီး တပည့်​တွေ မေးလို့ “ကလေး​ငယ်” အကြောင်း ယေရှု ပြော​တာ ဖြစ်တယ်။ (မ. ၁၈:၁) ယေရှု​ခေတ်​က ဂျူး​များစွာ​ဟာ ရာထူး​အဆင့်အတန်း​တွေ​ကို သိပ်​အလေးထား​ကြတယ်။ “လူများစွာ​ရဲ့ ဘဝမှာ ရိုသေ​လေးစား​ခံရ​ဖို့၊ နာမည်​ကျော်ကြား​ဖို့​က အရေးကြီးဆုံး​ပဲ” လို့ ပညာရှင်​တစ်ယောက် ပြော​တယ်။

၉။ ယေရှုရဲ့ တပည့်​တွေ ဘာလုပ်ရမလဲ။

 ^၉ ဂျူး​များစွာ​မှာ ရှိနေတဲ့ အပြိုင်အဆိုင် စိတ်ဓာတ်​ကို တပည့်​တွေ စိတ်ထဲ​ကနေ အမြစ်ပါ​မကျန် ထုတ်ပစ်​ရမယ်ဆိုတာ ယေရှု သိတယ်။ ဒါ​ကြောင့် “ခင်ဗျား​တို့​ထဲမှာ အကြီးမြတ်ဆုံး​ဟာ အငယ်ဆုံး​လို ဖြစ်​ရမယ်။ ဦးဆောင်နေသူ​က​လည်း အလုပ်အကျွေးပြု​သူလို ဖြစ်​ရမယ်” လို့ ပြော​တယ်။ (လု. ၂၂:၂၆) ‘သူတစ်ပါး​က ကိုယ့်ထက်​ သာတယ်’ လို့ ကျွန်တော်​တို့ သဘောထား​မှ “အငယ်ဆုံး” သူလို ဖြစ်​နိုင်​မယ်။ (ဖိ. ၂:၃) အဲဒီလို သဘောထား မွေးမြူ​နိုင်​လေ တခြား​သူတွေကို တိုက်မိ​လဲ​အောင် လုပ်မိ​စ​ရာ အကြောင်း​ နည်း​လေ ဖြစ်​လိမ့်မယ်။

၁၀။ ပေါလု​ရဲ့ ဘယ်​ဆုံးမစကား​ကို နှလုံး​သွင်း​သင့်သလဲ။

^၁၀ ညီအစ်ကို/မ အားလုံး​ဟာ တစ်နည်း​မဟုတ် တစ်နည်း​နဲ့ ကျွန်တော်​တို့​ထက် သာတယ်။ သူတို့ရဲ့ အရည်အသွေးကောင်း​တွေ​ကို အာရုံစိုက်​မယ်​ဆိုရင် ကိုယ့်ထက် သာတယ်​ဆိုတာ မြင်တတ်​လာမယ်။ “သူတစ်ပါး​ထက် သာတယ်လို့ ကိုယ့်ကိုယ်ကိုယ် ဘာလို့​ ယူဆ​တာလဲ။ ခင်ဗျား​တို့ ရထား​သမျှ​ဟာ ဘုရားသခင်​ဆီက​ပဲ။ ဘုရားသခင်​ဆီက ရထားတာ​ဆိုရင် မရ​ထား​သလို​မျိုး ဘာလို့ ဝါကြွား​နေတာလဲ” ဆို​တဲ့ ပေါလု​ရဲ့ ဆုံးမစကား​ကို ကျွန်တော်​တို့ နှလုံး​သွင်း​သင့်တယ်။ (၁ ကော. ၄:၇) အာရုံစိုက်​ခံ​ချင်​တဲ့ သဘောထား၊ တခြားသူ​ထက် သာတယ်​ဆို​တဲ့ သဘောထားတွေကို ရှောင်​သင့်တယ်။ အဟောအပြော ကောင်း​တဲ့ ညီအစ်ကို​တွေ၊ ထိထိရောက်ရောက် ကျမ်းစာ​သင်ပေး​နိုင်​တဲ့ ညီအစ်မတွေ​ဟာ ကိုယ့်​လုပ်နိုင်စွမ်း​အတွက် ယေဟောဝါ​ကိုပဲ အမြဲ ဂုဏ်တင်​ချီးမွမ်း​သင့်တယ်။

၁၁။ ဘုရင်ကြီး​နဲ့ အမှုထမ်း ပုံ​ဥပမာ​က​တစ်ဆင့် ယေရှု ဘာ​သင်ပေး​သလဲ။

^၁၁ တခြား​သူတွေကို တိုက်မိ​လဲ​အောင် မလုပ်ဖို့ နောက်လိုက်​တွေ​ကို သတိပေး​ပြီး​နောက် ဘုရင်ကြီး​နဲ့ အမှုထမ်း​အကြောင်း ပုံ​ဥပမာတစ်ခု ယေရှု ပြော​တယ်။ ဘုရင်ကြီး​က အမှုထမ်း​ရဲ့ အကြွေး​အားလုံး​ကို လျှော်ပစ်​လိုက်တယ်။ နောက်ပိုင်း၊ အဲဒီ​အမှုထမ်း​က အချင်းချင်းရဲ့ အကြွေး နည်းနည်းလေး​ကို​တော့ မရ​မက ပြန်​တောင်း​တယ်။ ဘုရင်ကြီး သိ​သွားတော့ မသနားတတ်​တဲ့ အမှုထမ်း​ကို ထောင်ချ​လိုက်တယ်။ သင်ခန်းစာ​က ဘာလဲ။ “ခင်ဗျား​တို့​က ကိုယ့်​ညီအစ်ကို​ကို ကြည်ကြည်ဖြူဖြူ ခွင့်​မလွှတ်​ဘူးဆို​ရင် ကောင်းကင်​အဖ​က​လည်း ခင်ဗျား​တို့ကို ခွင့်လွှတ်​မှာ မဟုတ်ဘူး” လို့ ယေရှု ပြော​တယ်။—မ. ၁၈:၂၁-၃၅။

၁၂။ ကျွန်တော်​တို့ ခွင့်​မလွှတ်​ဘူးဆို​ရင် တခြား​သူတွေကို ဘယ်လို ထိခိုက်​နိုင်​သလဲ။

^၁၂ အမှုထမ်း​ရဲ့ လုပ်ရပ်က ကိုယ်တိုင်​သာမက တခြား​သူတွေကိုပါ ထိခိုက်​စေတယ်။ ပထမ၊ အမှုထမ်း အချင်းချင်း​ကို မသနား​ဘဲ ‘အကြွေး မဆပ်မချင်း ထောင်ချ​လိုက်တယ်။’ ဒုတိယ၊ သူ့​လုပ်ရပ်က တခြား​သူတွေကိုလည်း ထိခိုက်​စေတယ်။ “တခြား​အမှုထမ်းတွေ မြင်တဲ့အခါ စိတ်မကောင်း ဖြစ်” ကြတယ်။ အဲဒီလိုပဲ ကျွန်တော်​တို့​ရဲ့ လုပ်ရပ်တွေ​က​လည်း တခြား​သူတွေကို ထိခိုက်​စေနိုင်​တယ်။ ကျွန်တော်​တို့ကို စိတ်​ထိခိုက်အောင် လုပ်​သူ တစ်ယောက်ယောက်​ကို ခွင့်​မလွှတ်​ဘူးဆို​ရင် ဘာဖြစ်​မလဲ။ ပထမ၊ ကိုယ် ခွင့်​မလွှတ်၊ ဂရုမစိုက်၊ မေတ္တာ မပြ​တာ​က သူ့ကို နာကျင်​စေတယ်။ ဒုတိယ၊ သူနဲ့ အဆင်မပြေတာ​ကို အသင်းတော်က တခြား​သူတွေ သတိထား​မိ​တဲ့​အခါ သူတို့လည်း အနေရခက်​နိုင်တယ်။

၁၃။ ရှေ့ဆောင် ညီအစ်မတစ်ယောက်​ရဲ့ အတွေ့အကြုံ​ကနေ ဘာ​သိရသလဲ။

^၁၃ ညီအစ်ကို/မတွေ​ကို ခွင့်လွှတ်​တဲ့​အခါ ကိုယ်တိုင်​ရော တခြား​သူတွေပါ အကျိုး​ရတယ်။ ခရစ်​စတယ်လို့ ခေါ်​တဲ့ ရှေ့ဆောင်​ ညီအစ်မအကြောင်း စဉ်းစား​ကြည့်​ပါ။ အသင်းတော်​ထဲ​က ညီအစ်မ တစ်ယောက်​ကြောင့် စိတ်ထိခိုက်​မိတယ်။ “သူ့ရဲ့ မကြင်နာ​တဲ့ စကား​တွေ​က တစ်ခါ​တလေ ဓားနဲ့ ထိုးသလိုပဲ။ အမှုဆောင်မှာ ကား​တစ်စီး​တည်း​တောင် အတူ မစီး​ချင်ဘူး။ စိတ်​ထက်သန်မှု​နဲ့ ပျော်ရွှင်မှု တဖြည်းဖြည်း ပျောက်ဆုံး​လာတယ်” လို့ ခရစ်​စတယ် ပြော​တယ်။ ကိုယ့်​ဘက်က အကြောင်း ရှိလို့ စိတ်ဆိုး​တာ​ပဲ​လို့ ခရစ်​စတယ် ယူဆတယ်။ ဒါပေမဲ့ စိတ်​နာကြည်း​တာ၊ ကိုယ့်​ခံစားချက်​ကိုပဲ ဦးစားပေး​တာ​မျိုး မလုပ်​ဘူး။ ၁၉၉၉၊ အောက်တိုဘာ  ၁၅ ရက်ထုတ် ကင်းမျှော်စင် “သင့်​စိတ်နှလုံး​ထဲ​မှ ခွင့်လွှတ်​လော့” ဆောင်းပါး​မှာ ပါတဲ့ ကျမ်းစာ​အကြံဉာဏ်​ကို နှိမ့်ချစွာ လိုက်နာ​ပြီး ညီအစ်မကို ခွင့်လွှတ်​လိုက်တယ်။ “ကျွန်မတို့​အားလုံး စရိုက်သစ်​ကို ဝတ်ဆင်​ဖို့ ကြိုးစား​နေကြောင်း၊ ကျွန်မတို့ကို ယေဟောဝါ နေ့တိုင်း ကြည်ကြည်ဖြူဖြူ ခွင့်လွှတ်​နေကြောင်း သိလာတယ်။ ရင်ထဲ​က အလုံး​ကြီး ကျ​သွား​သလို ခံစား​လိုက်ရတယ်။ ပြန်​ပြီး ပျော်ရွှင်​လာတယ်” လို့ ခရစ်​စတယ် ပြော​တယ်။

၁၄။ မဿဲ ၁၈:၂၁၊ ၂၂ အရ တမန်တော် ပေတရု​မှာ ဘယ်​အခက်အခဲ ရှိခဲ့​နိုင်​သလဲ။ ယေရှုရဲ့ အဖြေ​ကနေ ဘာ​သိရသလဲ။

^၁၄ ခွင့်လွှတ်​ရမယ်ဆိုတာ ကျွန်တော်​တို့ သိတယ်။ လုပ်သင့်လုပ်ထိုက်​ရာ​ပဲ ဆိုတာ​လည်း သိတယ်။ ဒါပေမဲ့ တကယ်​ ခွင့်လွှတ်​ဖို့​ကျ​တော့ ခက်​နေ​နိုင်တယ်။ တမန်တော် ပေတရု​လည်း အဲဒီလို ခက်​တဲ့​အချိန်တွေ ရှိခဲ့​နိုင်တယ်။ (မဿဲ ၁၈:၂၁၊ ၂၂ ကို​ဖတ်ပါ။) ကျွန်တော်​တို့ကို ဘာက ကူညီ​ပေး​နိုင်​သလဲ။ ပထမ၊ ကိုယ့်ကို ယေဟောဝါ ဘယ်လောက် ခွင့်လွှတ်​ကြောင်း စဉ်းစားပါ။ (မ. ၁၈:၃၂၊ ၃၃) ကျွန်တော်​တို့ ခွင့်လွှတ်​မှု မရ​ထိုက်​ပေမဲ့ ဘုရား ကြည်ကြည်ဖြူဖြူ ခွင့်လွှတ်​တယ်။ (ဆာ. ၁၀၃:၈-၁၀) တစ်ချိန်တည်း​မှာ ကျွန်တော်​တို့​လည်း “အချင်းချင်း ချစ်​ဖို့ တာဝန် ရှိတယ်။” ဒါ​ကြောင့် ခွင့်လွှတ်​ဖို့​ဆိုတာ ရွေးချယ်​လို့ ရတဲ့​အရာ မဟုတ်ဘူး။ လုပ်ကို လုပ်​ရမယ့် တာဝန် ဖြစ်တယ်။ (၁ ယော. ၄:၁၁) ဒုတိယ၊ ခွင့်လွှတ်​ရင် ဘာတွေ ဖြစ်လာ​မလဲ​ဆိုတာ စဉ်းစားပါ။ ကိုယ့်ကို ပြစ်မှား​သူကို ကူညီ​ပေး​ရာ ရောက်မယ်။ အသင်းတော် စည်းလုံး​မယ်။ ယေဟောဝါ​နဲ့ ရင်းနှီးတဲ့ ဆက်ဆံ​ရေး ဆက်​ထိန်းသိမ်း​နိုင်​မယ်။ ခေါင်း​ပေါ်​က ဝန်ထုပ်ကြီး ကျ​သွား​သလို ခံစား​ရမယ်။ (၂ ကော. ၂:၇။ ကော. ၃:၁၄) နောက်ဆုံး၊ ခွင့်လွှတ်​ဖို့ တောင်းဆို​ထား​တဲ့​ အရှင်​ဆီ ဆုတောင်း​ပါ။ ညီအစ်ကို/မတွေ​နဲ့ ဆက်ဆံ​ရေး ပျက်​အောင် လုပ်ဖို့ စာတန်​ကို အခွင့်မပေး​ပါ​နဲ့။ (ဧ. ၄:၂၆၊ ၂၇) စာတန့်​ထောင်ချောက်​ထဲ မကျ​ဖို့​ဆိုရင် ယေဟောဝါ​ရဲ့ အကူအညီ လိုအပ်​တယ်။

၁၅။ ကောလောသဲ ၃:၁၃ အရ ညီအစ်ကို/မ တစ်ယောက်ယောက်ရဲ့ လုပ်ရပ်​ကြောင့် စိတ်ထိခိုက်​နေရင် ဘာ​လုပ်သင့်သလဲ။

^၁၅ ယုံကြည်သူချင်း​ တစ်ယောက်​ရဲ့ လုပ်ရပ်​ကြောင့် စိတ်ထိခိုက်​ နေရင် ဘာ​လုပ်သင့်သလဲ။ ပြန်​သင့်မြတ်​ဖို့ အတတ်နိုင်ဆုံး ကြိုးစား​ပါ။ ယေဟောဝါ​ဆီ ထက်ထက်သန်သန် ဆုတောင်း​ပါ။ ကိုယ့်ကို စိတ်​ထိခိုက်အောင် လုပ်တဲ့​သူကို ကောင်းချီး​ပေးဖို့၊ သူ့ရဲ့ အရည်အသွေးကောင်း​တွေ မြင်​အောင် ကူညီ​ပေးဖို့ ဆုတောင်း​ပါ။ အဲဒီ​အရည်အသွေးကောင်း​တွေ ရှိလို့ သူ့ကို ယေဟောဝါ ချစ်တာ။ (လု. ၆:၂၈) သူ့​လုပ်ရပ်​ကို မမေ့နိုင်​ဘူးဆို​ရင် သူနဲ့ စကား​သွား​ပြော​ပြီး ဖြေရှင်း​ဖို့ ကြိုးစား​ပါ။ ကိုယ့်ကို ထိခိုက်အောင် တမင်​ ရည်ရွယ်ပြီး လုပ်တာ မဟုတ်ဘူးလို့ အမြဲ စဉ်းစားပါ။ (မ. ၅:၂၃၊ ၂၄။ ၁ ကော. ၁၃:၇) သူ့​ဘက်က စေတနာ​နဲ့ ပြော​မိ၊ လုပ်မိတာ​ဆို​တဲ့ စိတ်​မျိုး ထား​ပါ။ ဒါပေမဲ့ ပြန်​သင့်မြတ်​ဖို့ သူ ဆန္ဒ မရှိဘူး ဆိုရင်ကော။ “ဆက်​ပြီး သည်းခံ” ပါ။ လက်မလျှော့​ပါ​နဲ့။ (ကောလောသဲ ၃:၁၃ ကို​ဖတ်ပါ။) အရေးကြီးဆုံး​က​တော့ စိတ်​နာကြည်း မနေ​ပါ​နဲ့။ စိတ်​နာကြည်း​နေရင် ယေဟောဝါ​နဲ့ ဆက်ဆံ​ရေး ထိခိုက်​နိုင်တယ်။ ဘယ်အရာ​ကြောင့်​မှ တိုက်မိ​မလဲ​ပါစေ​နဲ့။ ဒီ​နည်း​အားဖြင့် တခြား​အရာ​တွေ​ထက် ယေဟောဝါ​ကို ပို​ချစ်​ကြောင်း သက်သေပြ​ရာ ရောက်​ပါ​လိမ့်မယ်။—ဆာ. ၁၁၉:၁၆၅။

၁၆။ ကျွန်တော်​တို့ တစ်ဦးချင်း​စီ​မှာ ဘာ​တာဝန် ရှိသလဲ။

^၁၆ “သိုးထိန်း​တစ်ယောက်တည်း” ရဲ့ လက်အောက်​မှာ “သိုး​တစ်အုပ်​တည်း” အဖြစ် ယေဟောဝါ​ကို စည်းလုံးစွာ အမှုဆောင်​ရတဲ့ အခွင့်ထူး​ကို ကျွန်တော်​တို့ တန်ဖိုး​ထား​တယ်။ (ယော. ၁၀:၁၆) “စည်းလုံးမှု​ကနေ အကျိုး​ရရှိ​နေတဲ့​အတွက် အဲဒါကို ထိန်းသိမ်း​ထား​ဖို့ တာဝန် ရှိတယ်” လို့ ယေဟောဝါ​ရဲ့ အလိုတော်​ ဆောင်​ဖို့ ဖွဲ့စည်းထားခြင်း စာအုပ်၊ စာမျက်နှာ ၁၆၅ မှာ ဆိုတယ်။ ဒါ​ကြောင့် “ညီအစ်ကို ညီအစ်မတွေ​ကို . . . ယေဟောဝါ မြင်​သလို မြင်တတ်ဖို့ လေ့ကျင့်” ရမယ်။ ကျွန်တော်​တို့အားလုံး​ဟာ ယေဟောဝါ​အတွက် တန်ဖိုး​ရှိတယ်။ ညီအစ်ကို/မတွေ​ကို သင် အဲဒီလိုပဲ သဘောထား​သလား။ သူတို့ကို ဂရုစိုက်၊ ကူညီ​ဖို့ သင် လုပ်ဆောင်သမျှကို ယေဟောဝါ သိ​ပြီး တန်ဖိုး​ထား​တယ်။—မ. ၁၀:၄၂။

၁၇။ သင် ဘာလုပ်ဖို့ ဆုံးဖြတ်ထား​သလဲ။

^၁၇ ညီအစ်ကို/မတွေ​ကို ကျွန်တော်​တို့ ချစ်တယ်။ ဒါကြောင့် “ညီအစ်ကို​အတွက် တိုက်မိ​လဲစရာ မဖြစ်စေဖို့၊ အတားအဆီး မဖြစ်စေဖို့ ဆုံးဖြတ်ထား​ပါ။” (ရော. ၁၄:၁၃) ညီအစ်ကို/မတွေ​ကို ကိုယ့်ထက် သာတယ်လို့ ယူမှတ်ပါ။ ကြည်ကြည်ဖြူဖြူ ခွင့်လွှတ်​ပါ။ တခြား​သူတွေ​ကြောင့် တိုက်မိ​မလဲ​ပါစေ​နဲ့။ အဲဒီအစား ‘ငြိမ်သက်ခြင်း​ ရှိစေတဲ့​အရာ၊ အားပေးမှု​ ဖြစ်စေ​တဲ့​အရာ​တွေ​ကို လုပ်ဆောင်ဖို့ အစွမ်းကုန် ကြိုးစား​ကြပါစို့။’—ရော. ၁၄:၁၉။