၁။ ဉာဏ်ပညာ​ကို ဘယ်လို ရ​နိုင်သလဲ။ ဘာ​အကျိုး ခံစားရ​နိုင်သလဲ။

ယေဟောဝါဟာ ဉာဏ်ပညာ​ရဲ့ ပင်ရင်း​ဖြစ်ပြီး တခြား​သူတွေကို ရက်ရော​စွာ ဝေမျှပေး​တယ်။ “တစ်ယောက်ယောက်​က ဉာဏ်ပညာ​လို​နေရင် ဘုရား​သခင်​ဆီ တောင်း​မြဲ​တောင်း​ပါ။ ကဲ့ရဲ့​တာမျိုး မလုပ်ဘဲ လူ​အားလုံးကို ရက်ရက်ရောရော ပေး​တတ်တဲ့ ဘုရား​သခင်​က တောင်း​တဲ့​သူ​ကို ဉာဏ်ပညာ ပေး​လိမ့်မယ်” လို့ ယာကုပ် ၁:၅ မှာ ပြောထားတယ်။ ဘုရား​သခင်​ဆီက ဉာဏ်ပညာရ​တဲ့ နည်းတစ်နည်း​က ဆုံးမမှု​ကို လက်ခံခြင်း​ပါပဲ။ ဉာဏ်ပညာ​ဟာ ကိုယ်ကျင့်တရား​နဲ့ ဘုရားရေးရာ အန္တရာယ်​တွေကနေ ကာကွယ်​ပေး​နိုင်တယ်။ (ပညာ. ၂:၁၀-၁၂) ဒါက ‘ထာဝရ​အသက်​ရစေ​ပြီး ဘုရားသခင့်​မေတ္တာ ခံစားရ​စေ’ တယ်။—ယု. ၂၁။

၂။ ဘုရားသခင့်​ဆုံးမမှု​ကို ဘယ်လို တန်ဖိုးထား​တတ်လာ​သလဲ။

^၂ ကျွန်တော်တို့ရဲ့ အပြစ်​လုပ်ချင်​စိတ်၊ ကြီးပြင်းလာ​ပုံ​နဲ့ တခြား​အချက်​တွေကြောင့် ဆုံးမမှု​ကို လက်ခံဖို့၊ အကောင်းမြင်​ဖို့ ခက်ခဲ​နိုင်တယ်။ ဘုရား​မေတ္တာကို ဖော်ပြ​တဲ့ ဆုံးမမှု​ရဲ့ အကျိုးကျေးဇူး​တွေ ခံစားရ​မှ တန်ဖိုး​နားလည်​လာကြတယ်။ “ငါ့​သား၊ ယေဟောဝါ​ဆုံးမ​တာကို မငြင်းပယ်​ပါနဲ့။ . . . ယေဟောဝါ​ကလည်း ချစ်​ရတဲ့​သူတွေကို ပဲ့ပြင်​တတ်တယ်” လို့ ပညာအလိမ္မာ ၃:၁၁၊ ၁၂ မှာ ပြောထားတယ်။ ကျွန်တော်တို့ရဲ့ ကောင်းကျိုး​ကို ယေဟောဝါ လိုလား​ကြောင်း မမေ့​ပါနဲ့။ (ဟီဘရူး ၁၂:၅-၁၁ ကို​ဖတ်ပါ။) ကျွန်တော်တို့​အကြောင်း အပြည့်အဝ သိတဲ့အတွက်  ဘုရားသခင်ရဲ့ ဆုံးမမှု​ဟာ အမြဲ တော်သင့်​မှန်ကန်​တယ်။ ဆုံးမမှု​ရဲ့ ကဏ္ဍ​လေးခု​ကို သုံးသပ်ကြည့်​ကြစို့– (၁) ကိုယ့်ကိုယ်ကိုယ် ဆုံးမမှု၊ (၂) မိဘ​ရဲ့ ဆုံးမမှု၊ (၃) အသင်းတော်ရဲ့ ဆုံးမမှု၊ (၄) ဆုံးမမှု​ထက် ပိုဆိုး​တဲ့ နာကျင်မှု​တို့ ဖြစ်တယ်။

၃။ ကလေး​တစ်ယောက် ကိုယ့်ကိုယ်ကိုယ် ဘယ်လို ဆုံးမ​တတ်လာ​သလဲ။ ဥပမာ​ပေးပါ။

^၃ ကိုယ့်ကိုယ်ကိုယ် ဆုံးမခြင်း​မှာ အပြုအမူနဲ့ အတွေးအခေါ်​ကို ထိန်းချုပ်ခြင်း ပါဝင်တယ်။ ကိုယ့်ကိုယ်ကိုယ် ဆုံးမခြင်း​ဟာ မွေးရာပါ မဟုတ်ဘူး။ သင်ယူ​ရမယ်။ ဥပမာ၊ ကလေး​တစ်ယောက် စက်ဘီး​စီး​သင်​စမှာ မိဘက ထိန်းပေး​လေ့ရှိတယ်။ ဒါပေမဲ့ ထိန်း​တတ်လာ​ပြီ​ဆိုရင်တော့ ခဏတစ်ဖြုတ် လွှတ်​ပေးတယ်။ လုံးဝ​စီး​တတ်​သွား​ပြီ​ဆိုရင်တော့ စိတ်ချလက်ချ လွှတ်​ပေး​လိုက်တယ်။ အဲဒီလိုပဲ “ယေဟောဝါ မိန့်မှာ​တဲ့​အတိုင်း” စိတ်ရှည်ရှည်၊ စွဲစွဲမြဲမြဲ “ဆုံးမ​သွန်သင်” တဲ့အခါ ကလေးတွေ ကိုယ့်ကိုယ်ကိုယ် ဆုံးမ​တတ်လာ​ပြီး ပညာရှိ​လာတယ်။—ဧ. ၆:၄။

၄၊ ၅။ (က) ကိုယ့်ကိုယ်ကိုယ် ဆုံးမခြင်း​ဟာ “စရိုက်သစ်” ရဲ့ အစိတ်အပိုင်း ဘာကြောင့် ဖြစ်သလဲ။ (ခ) “ခုနစ်ကြိမ် လဲ​ရင်တောင်” ဘာကြောင့် လက်မလျှော့​သင့်သလဲ။

^၄ အရွယ်ရောက်​မှ ယေဟောဝါ​အကြောင်း သိလာ​သူတွေ​လည်း အလားတူ​ပဲ။ သူတို့ ကိုယ့်ကိုယ်ကိုယ် ဆုံးမ​တတ်​သူတွေ ဖြစ်​ကောင်း​ဖြစ်နိုင်တယ်။ ဒါပေမဲ့ ခရစ်ယာန်​လမ်းစဉ်​မှာ​တော့ မရင့်ကျက်​သေး​ဘူး။ “စရိုက်သစ်” ကို ဝတ်ဆင်​ဖို့၊ ခရစ်တော်​ကို တုပ​ဖို့ သင်ယူ​ရင်း တဖြည်းဖြည်း ရင့်ကျက်​လာပါလိမ့်မယ်။ (ဧ. ၄:၂၃၊ ၂၄) အဲဒီလို တိုးတက်​နိုင်အောင် ကိုယ့်ကိုယ်ကိုယ် ဆုံးမ​ဖို့ အရေးကြီးတယ်။ ဒါက ‘ဘုရားတရားမဲ့​တာ​တွေ၊ လောကရဲ့ မကောင်းတဲ့ အလိုဆန္ဒ​တွေကို ငြင်းပယ်​တတ်အောင်၊ လက်ရှိ လောက​စနစ်​မှာ ချင့်ချိန်​တတ်အောင်၊ ဖြောင့်မတ်​တဲ့ လမ်းစဉ်​အတိုင်း နေထိုင်​တတ်အောင်၊ ဘုရားတရား ကိုင်းရှိုင်း​တတ်အောင်’ ကူညီပေးတယ်။—တိ. ၂:၁၂။

^၅ ကျွန်တော်တို့​အားလုံး​ဟာ အပြစ်သား​တွေပါ။ (ဒေ. ၇:၂၀) ဒါပေမဲ့ အမှား​တစ်ခု လုပ်မိ​ရုံ​နဲ့ ကိုယ့်ကိုယ်ကိုယ် မဆုံးမ​တဲ့​သဘော၊ လုံးဝ ရှုံးနိမ့်​သွားတဲ့​သဘော မဟုတ်ပါဘူး။ “ဖြောင့်မတ်သူ​က ခုနစ်ကြိမ် လဲ​ရင်တောင် ပြန်​ထ​လိမ့်မယ်” လို့ ပညာအလိမ္မာ ၂၄:၁၆ မှာ ပြောတယ်။ ပြန်​ထ​နိုင်ဖို့ ဘာက ကူညီပေး​မ​လဲ။ ကိုယ့်​အစွမ်းအစ မဟုတ်ဘဲ ဘုရားသခင့် စွမ်းအားတော်​ပါပဲ။ (ဖိလိပ္ပိ ၄:၁၃ ကို​ဖတ်ပါ။) စွမ်းအားတော် အရည်အသွေး​တွေ​ထဲမှာ ကိုယ့်ကိုယ်ကိုယ် ဆုံးမခြင်း​နဲ့ အနီးကပ် ဆက်စပ်​နေတဲ့ ချုပ်တည်းခြင်း​လည်း ပါဝင်တယ်။

၆။ ကျမ်းစာ​လေ့လာ​ရတာ ဘယ်လိုနည်းနဲ့ လွယ်ကူ​လာ​နိုင်သလဲ။ (ဆောင်းပါး​အစမှာ​ပါတဲ့ ပုံကို ကြည့်ပါ။)

^၆ ကိုယ့်ကိုယ်ကိုယ် ဆုံးမ​နိုင်ဖို့ ဆုတောင်းခြင်း၊ ကျမ်းစာ လေ့လာခြင်း၊ တွေးတော​ဆင်ခြင်ခြင်း​က ကူညီ​ပေးပါ​လိမ့်မယ်။ ဒါပေမဲ့ ကျမ်းစာ လေ့လာဖို့ ခက်​နေရင်​ကော။ စိတ်ဓာတ်မကျ​ပါနဲ့။ နှုတ်မြွက်စကား​တော် ကျမ်းစာကို “အ​ငမ်း​မရ​လိုချင်​တဲ့​စိတ်” ဖြစ်အောင် ယေဟောဝါ ကူညီပေး​လိမ့်မယ်။ (၁ ပေ. ၂:၂) ဦးဆုံး၊ ကျမ်းစာ လေ့လာဖို့ ကိုယ့်ကိုယ်ကိုယ် ကြပ်မတ်​နိုင်အောင် ယေဟောဝါ​ဆီ ဆုတောင်း​ပါ။ ဆုတောင်းချက်​နဲ့အညီ လုပ်ဆောင်​ပါ။ နည်းနည်း​စီ လေ့လာ​ပါ။ ဒီလိုနဲ့ လေ့လာ​ရတာ ပိုလွယ်ကူ​ပြီး ပို​ပျော်ရွှင်​လာပါလိမ့်မယ်။ ယေဟောဝါ​အကြောင်း တိတ်ဆိတ်​စွာ တွေးတော​ဆင်ခြင်​ရတဲ့ အချိန်​တွေကို မြတ်နိုး​လာပါလိမ့်မယ်။—၁ တိ. ၄:၁၅။

၇။ ကိုယ့်ကိုယ်ကိုယ် ဆုံးမခြင်း​က ဘုရားရေးရာ​ပန်းတိုင် ရောက်အောင် ဘယ်လို ကူညီ​ပေးနိုင်သလဲ။

^၇ ကိုယ့်ကိုယ်ကိုယ် ဆုံးမခြင်း​က ဘုရားရေးရာ ပန်းတိုင်တွေ လိုက်မီ​စေတယ်။ ဖခင်​တစ်​ဦးရဲ့ အဖြစ်​ကို သုံးသပ်ကြည့်ပါ။ ဇွဲ​မရှိတော့​ဘူးလို့ ခံစားရ​တဲ့အခါ မှန်မှန်ရှေ့ဆောင် လုပ်ဖို့ ပန်းတိုင်​ထားပြီး အဲဒီ​အကြောင်း​ပါတဲ့ မဂ္ဂဇင်းတွေကို ဖတ်တယ်။ ဆုတောင်း​ တယ်။ ဒီနည်းနဲ့ ယုံကြည်ခြင်း ခိုင်ခံ့​လာပြီး ဖြစ်နိုင်တဲ့​အခါ အရန်ရှေ့ဆောင် လုပ်ဖို့ စီစဉ်​ခဲ့တယ်။ အခက်အခဲ​တွေ​ကြားမှာ ဆက်ကြိုးစား​ခဲ့လို့ နောက်ဆုံး မှန်မှန်ရှေ့ဆောင် ပန်းတိုင်​ကို ရောက်​ခဲ့တယ်။

၈-၁၀။ သားသမီး​တွေ ယေဟောဝါ​ကို ဝတ်ပြု​လာအောင် ပြုစုပျိုးထောင်​ဖို့ မိဘတွေ​ကို ဘာက ကူညီပေး​နိုင်မလဲ။ ဥပမာ​ပေးပါ။

^၈ ခရစ်ယာန်​မိဘတွေဟာ သားသမီးတွေကို ‘ယေဟောဝါ မိန့်မှာ​တဲ့​အတိုင်း ဆုံးမ​သွန်သင်’ ဖို့ အခွင့်ထူး ရထား​ကြ​တယ်။ (ဧ. ၆:၄) အထူးသဖြင့် ဒီနေ့ခေတ်မှာ တာဝန်​ကြီး​ပဲ။ (၂ တိ. ၃:၁-၅) ကလေးတွေဟာ အမှားအမှန် မ​ခွဲ​တတ်ကြ​ဘူး။ မွေးရာပါ အမှားအမှန်​သိစိတ် ရှိပေမဲ့ လေ့ကျင့်ပေးဖို့ လိုတယ်။ (ရော. ၂:၁၄၊ ၁၅) “ဆုံးမမှု” ဆိုတဲ့ ဂရိ​စကားလုံးက “သားသမီး ပြုစုပျိုးထောင်ခြင်း” လို့လည်း အဓိပ္ပာယ်​ရှိတယ်လို့ စာအုပ်တစ်အုပ်မှာ ဖော်ပြထားတယ်။

^၉ မေတ္တာပါပါ ဆုံးမခံ​ရတဲ့ ကလေးတွေဟာ လုံခြုံ​တယ်လို့ ခံစား​ကြရတယ်။ လွတ်လပ်မှုမှာ စည်းဘောင်​တွေ​ရှိကြောင်း၊ ကိုယ့်​ဆုံးဖြတ်ချက်​နဲ့ လုပ်ရပ်တွေ​မှာ အကျိုးဆက်​တွေ​ရှိကြောင်း သိလာ​ကြ​တယ်။ ဒါကြောင့် မိဘတွေဟာ ယေဟောဝါရဲ့​လမ်းညွှန်မှု​ကို မျှော်ကိုး​ဖို့ သိပ်​အရေးကြီးတယ်။ သားသမီး​ပျိုးထောင်​ခြင်းနဲ့​ဆိုင်တဲ့ အယူအဆ၊ နည်းလမ်းတွေ ယဉ်ကျေးမှု​တစ်ခုနဲ့​တစ်ခု၊ မျိုးဆက်​တစ်ခုနဲ့​တစ်ခု ကွာခြား​ကြောင်း မမေ့​ပါနဲ့။ မိဘတွေ ဘုရား​စကား နားထောင်​မယ်ဆိုရင် သားသမီး ပြုစုပျိုးထောင်​ပုံနဲ့ပတ်သက်ပြီး မှန်းဆ​နေစရာ၊ ကိုယ့်​အတွေ့အကြုံ ဒါမှမဟုတ် လူ့​အတွေးအခေါ်​ကို အားကိုး​နေစရာ မလို​တော့ဘူး။

^၁၀ နောဧ​အကြောင်း သုံးသပ်ကြည့်ပါ။ သင်္ဘော​ဆောက်​ဖို့ ယေဟောဝါ မိန့်မှာ​တဲ့အခါ တစ်ခါ​မှ မ​ဆောက်​ဖူးတဲ့​အတွက် ကိုယ့်​အတွေ့အကြုံ​ကို အားကိုး​ဖို့ မဖြစ်နိုင်ဘူး။ ယေဟောဝါ​ကို​ပဲ အားကိုး​ခဲ့ရတယ်။ ‘မှာ​ထားတဲ့​အတိုင်း လုပ်​ခဲ့တယ်။’ (က. ၆:၂၂) ရလဒ်အနေနဲ့ သင်္ဘော ဆောက်​နိုင်ခဲ့တယ်။ နောဧ​ဟာ ဘုရားသခင့် ဉာဏ်ပညာ​ကို ယုံကြည်ကိုးစား​တဲ့အတွက် အိမ်ထောင်ရေး​လည်း အောင်မြင်​ခဲ့တယ်။ သားသမီးတွေကို ကောင်းစွာ သွန်သင်​ပြီး ပုံသက်သေ​ကောင်း ပြခဲ့တယ်။ ရေ​လွမ်း​မိုး​ဘေး မတိုင်ခင် ဆိုးသွမ်း​တဲ့​ခေတ်​မှာ အဲဒီလို​လုပ်ဖို့ သိပ်​ခက်တယ်။—က. ၆:၅။

၁၁။ သားသမီးတွေကို လေ့ကျင့်ပေး​ရာမှာ မိဘ​ရဲ့ ပုံသက်သေ ဘယ်လောက် အရေးကြီး​သလဲ။

^၁၁ မိဘတွေကော။ ဘုရား​သခင် “မှာ​ထားတဲ့​အတိုင်း” ဘယ်လို​လုပ်​နိုင်သလဲ။ ယေဟောဝါရဲ့​စကားကို နားထောင်ပါ။ ကျမ်းစာနဲ့ အဖွဲ့အစည်း​ကတစ်ဆင့် ယေဟောဝါ​ပေးတဲ့ လမ်းညွှန်ချက်ကို လိုက်နာ​ပါ။ အချိန်တန်​တဲ့အခါ သားသမီး​တွေ သင့်ကို ကျေးဇူးတင်​ပါလိမ့်မယ်။ ညီအစ်ကို​တစ်ယောက် ဒီလိုပြောတယ်– “ကျွန်တော့်ကို ပြုစုပျိုးထောင်​ခဲ့​ပုံ နည်းလမ်း​အတွက် မိဘတွေ​ကို သိပ်ကျေးဇူးတင်တယ်။ စိတ်နှလုံး ထိမိ​အောင် သူတို့ အတတ်နိုင်ဆုံး ကြိုးစား​ခဲ့ကြတယ်။ ဘုရားရေးရာ​ဘက်  ကျွန်တော် တိုးတက်လာ​တာ အဓိက,က သူတို့​ကြောင့်ပါ။” မိဘတွေ အတတ်နိုင်ဆုံး ကြိုးစား​တဲ့​ကြား သားသမီး​တချို့ ယေဟောဝါ​ကို စွန့်​သွား​ကြ​တယ်။ ဒါပေမဲ့ သားသမီးတွေကို အတတ်နိုင်ဆုံး အမှန်တရား သွန်သင်ပေး​ခဲ့တဲ့​အတွက် စိတ်ကြည်လင်​နိုင်ပါတယ်။ တစ်နေ့ ယေဟောဝါ​ဆီ ပြန်လှည့်​လာဖို့ မျှော်လင့်​နိုင်တယ်။

၁၂၊ ၁၃။ (က) သားသမီး​တစ်ယောက် နှင်ထုတ်​ခံရ​တဲ့အခါ ဘုရား​သခင်​ကို နာခံ​ကြောင်း မိဘတွေ ဘယ်လို ပြနိုင်သလဲ။ (ခ) မိဘတွေ ယေဟောဝါ​ကို နာခံတဲ့​အတွက် မိသားစု​တစ်စု ဘယ်လို အကျိုး​ရခဲ့​သလဲ။

^၁၂ နာခံမှု​နဲ့​ပတ်သက်​ရင် မိဘတွေ​အတွက် အခက်ခဲဆုံး စမ်းသပ်မှု​က​တော့ နှင်ထုတ်​ခံရတဲ့ သားသမီး​တွေနဲ့ ဆက်ဆံရေး​ပါပဲ။ နှင်ထုတ်​ခံ​ထားရတဲ့​သမီး အိမ်​က​နေ ထွက်သွား​တဲ့အခါ အမေ​ဖြစ်သူ ဒီလိုပြောတယ်– “သမီး​နဲ့ မြေးလေး​ကို ဆက်သွယ်​လို့ ရနိုင်​မယ့် ဟာကွက်​တွေကို အဖွဲ့အစည်း​စာပေ​တွေမှာ ရှာ​မိတယ်။ ဒါပေမဲ့ သမီး​က ကျွန်မတို့​နဲ့ မပတ်သက်​တော့ဘူး၊ ဝင်​မ​စွ​က်​နဲ့​တော့​လို့ ကျွန်မယောက်ျား ပြောတယ်။”

^၁၃ နောက်ပိုင်းမှာ သမီးကို အသင်းတော်​က ပြန်လက်ခံ​တယ်။ “အခု​ဆို သူ နေ့တိုင်း​လိုလို ဖုန်း​ခေါ်တယ်၊ စာ​ပို့​တယ်။ ကျွန်မတို့​လင်မယား ဘုရား​သခင်​ကို နာခံ​ခဲ့လို့ သူ​သိပ်​လေးစား​တယ်။ အခု​ဆို ဆက်ဆံရေး သိပ်ကောင်း​နေ​ပြီ” လို့ အမေ​ဖြစ်သူ ပြောတယ်။ သင့်​မှာ နှင်ထုတ်​ခံရတဲ့ သားသမီး ရှိမယ်​ဆိုရင် ‘ကိုယ့်ရဲ့​သိနားလည်နိုင်စွမ်း​ကို အားမကိုး​ဘဲ ယေဟောဝါ​ကို စိတ်နှလုံးအကြွင်းမဲ့ ယုံကြည်ကိုးစား’ မလား။ (ပညာ. ၃:၅၊ ၆) ယေဟောဝါရဲ့ ဆုံးမမှု​က အတိုင်းအဆမဲ့ ဉာဏ်​ပညာနဲ့ မေတ္တာကို ဖော်ပြ​ကြောင်း သတိရပါ။ သင့်​သားသမီး​အပါအဝင် လူအားလုံး​အတွက် သားတော်​ကို ပေးခဲ့​ကြောင်း မမေ့​ပါနဲ့။ ဘုရား​သခင်​က ဘယ်သူ့ကိုမှ မပျက်စီး​စေချင်ဘူး။ (၂ ပေတရု ၃:၉ ကို​ဖတ်ပါ။) ဒါကြောင့် ယေဟောဝါရဲ့ ဆုံးမ​လမ်းညွှန်မှု​ကို ယုံကြည်​ပါ။ နာကျင်ခံစား​ရ​ရင်တောင် ယေဟောဝါ​ပြောတဲ့​အတိုင်း လုပ်ပါ။ ဘုရားသခင့် ဆုံးမမှု​ကို မဆန့်ကျင်​ပါနဲ့၊ ပူးပေါင်းလုပ်ဆောင်​ပါ။

၁၄။ ‘သစ္စာရှိ​တဲ့ ဘဏ္ဍာစိုး’ ကတစ်ဆင့်​ပေးတဲ့ ယေဟောဝါရဲ့ လမ်းညွှန်မှု​က​နေ ဘယ်လို အကျိုး​ရရှိ​သလဲ။

^၁၄ ခရစ်ယာန်​အသင်းတော်ကို ဂရုစိုက်၊ ကာကွယ်၊ လမ်းညွှန်ပေး​မယ်လို့ ယေဟောဝါ ကတိ​ပေးထားတယ်။ နည်း​အမျိုးမျိုး​နဲ့ အဲဒီလို လုပ်ပေး​နေတယ်။ ဥပမာ၊ အသင်းတော်ကို သားတော် လက်အောက်မှာ ထားတယ်။ သားတော်​ကလည်း အချိန်တန်အစာ ကျွေး​ဖို့ ‘သစ္စာရှိ​တဲ့ ဘဏ္ဍာစိုး’ ကို ခန့်အပ်တယ်။ (လု. ၁၂:၄၂) နည်း​အမျိုးမျိုး​နဲ့ ပြင်ဆင်​ပေးတဲ့ အချိန်တန်အစာ​က​နေ အဖိုးတန်​လမ်းညွှန်မှု၊ ဆုံးမမှု​တွေ ရရှိတယ်။ ‘ဟောပြောချက်​တစ်ခု၊ မဂ္ဂဇင်း​ဆောင်းပါး​တစ်ခု​က ငါ့​အတွေးအခေါ်၊ လုပ်ရပ်​ကို ပြုပြင်​ဖို့ လှုံ့ဆော်ပေး​သလား’ လို့ ကိုယ့်ကိုယ်ကိုယ် မေးပါ။ လှုံ့ဆော်​ခံရပြီး ပြုပြင်​နေတယ်​ဆိုရင် ယေဟောဝါရဲ့ ပုံသွင်း ဆုံးမမှု​က​နေ အကျိုး​ရရှိ​နေတဲ့​အတွက် ဝမ်းသာ​လိုက်ပါ။—ပညာ. ၂:၁-၅။

၁၅၊ ၁၆။ (က) အကြီးအကဲ​တွေဆီကနေ ဘယ်လို အကျိုး​ရ​နိုင်သလဲ။ (ခ) အကြီးအကဲ​တွေကို ဘယ်လို ပျော်ရွှင်​စေနိုင်​သလဲ။

^၁၅ ဘုရားသခင့်​သိုးတော်စု​ကို ထိန်းကျောင်း​ဖို့ အကြီးအကဲ​တွေကိုလည်း “လက်ဆောင်” အဖြစ် ခရစ်တော် ပေးထားတယ်။ (ဧ. ၄:၈၊ ၁၁-၁၃) ဘယ်လို အကျိုး​ရ​နိုင်သလဲ။ တစ်နည်း​က အကြီးအကဲ​တွေရဲ့ ယုံကြည်ခြင်း​နဲ့ ပုံသက်သေ​ကောင်း​ကို တုပခြင်း၊ နောက်​တစ်နည်း​က သူတို့​ပေးတဲ့ ကျမ်းစာ အကြံပြုချက်​တွေကို နာခံခြင်း​ဖြစ်တယ်။ (ဟီဘရူး ၁၃:၇၊ ၁၇ ကို​ဖတ်ပါ။) ကျွန်တော်တို့ကို အကြီးအကဲ​တွေ ချစ်ကြောင်း၊ တိုးတက်စေ​ချင်​ကြောင်း သတိရပါ။ ဥပမာ၊ အစည်းအဝေး ပျက်​တာ၊ ဇွဲလျော့နည်း​လာ​တာကို သတိထား​မိ​တဲ့အခါ ချက်ချင်း အကူအညီ ပေးကြတယ်။ ကျွန်တော်တို့ ပြောတာကို နားထောင်​ပေးတယ်။ အားပေး​ပြီး သင့်တော်​တဲ့ ကျမ်းစာ​အကြံဉာဏ် ပေးကြတယ်။ အဲဒီလို ကူညီမှု​ကို ယေဟောဝါရဲ့ မေတ္တာ​အဖြစ် ရှုမြင်​သလား။

^၁၆ လိုအပ်​တဲ့ အကြံဉာဏ်​ပေးဖို့ အကြီးအကဲ​တွေအတွက်​လည်း မလွယ်​ပါဘူး။ ဥပမာ၊ ဘုရင်​ဒါဝိဒ်  ကြီးလေး​တဲ့ အပြစ်​ကို ဖုံးကွယ်​ဖို့ ကြိုးစား​တဲ့အခါ သူ့ကို ဆုံးမ​ဖို့ ပရောဖက်​နာသန်​အတွက် ဘယ်လောက် ခက်​မ​လဲ​ဆိုတာ မြင်ယောင်​ကြည့်ပါ။ (၂ ရှ. ၁၂:၁-၁၄) တမန်တော် ၁၂ ပါး​အဝင် ပေတရု ဂျူး​ညီအစ်ကို​တွေကို မျက်နှာ​လိုက်တဲ့​အခါ တည့်မတ်ပေး​ဖို့ တမန်တော်​ပေါလု​လည်း သတ္တိမွေး​ခဲ့ရ​မှာ​ပဲ။ (ဂ​လ. ၂:၁၁-၁၄) ဒါကြောင့် အကြီးအကဲ​တွေ ဝန်​ပေါ့​အောင် သင် ဘယ်လို ကူညီပေး​နိုင်မလဲ။ နှိမ့်ချ​ပါ။ ချဉ်းကပ်​ရလွယ်​သူ ဖြစ်ပါ။ ကျေးဇူးတင်​တတ်​ပါ။ သူတို့ရဲ့ အကူအညီ​ကို ဘုရားသခင့် မေတ္တာ​အဖြစ် ရှုမြင်​ပါ။ ဒါက သင့်ကို အကျိုးပြု​သလို သူတို့​ကိုလည်း ပျော်ရွှင်​စေပါလိမ့်မယ်။

၁၇။ အကြီးအကဲ​တွေရဲ့ မေတ္တာပါ ကူညီမှု​က​နေ ညီအစ်မ​တစ်ယောက် ဘယ်လို အကျိုး​ရခဲ့​သလဲ။

^၁၇ အတိတ်​ဟောင်း​ကြောင့် ညီအစ်မ​တစ်ယောက် ယေဟောဝါ​ကို ချစ်​ဖို့ အခက်တွေ့​ခဲ့တယ်။ သူ ဒီလိုပြောတယ်– “အတိတ်​ဒဏ်ရာ​နဲ့ တခြား​ကိစ္စတွေ​ကြောင့် စိတ်ဓာတ်ကျ​လာတဲ့အခါ အကြီးအကဲ​တွေနဲ့ ပြော​ရတော့​မယ်ဆို​တာ သိလာ​တယ်။ သူတို့ ကျွန်မကို မဝေဖန်​ဘဲ အားပေး​ကြ​တယ်။ အစည်းအဝေး​ပြီး​တိုင်း ဘယ်လောက်​ပဲ အလုပ်​များနေ​ပါစေ တစ်ယောက်​လောက်​တော့ လာ​နှုတ်ဆက်​တယ်။ ဘုရားသခင့် မေတ္တာနဲ့ မထိုက်တန်​ဘူးလို့ ခံစားခဲ့​ရပေမဲ့ အသင်းတော်​နဲ့ အကြီးအကဲ​တွေ​အားဖြင့် ယေဟောဝါ အကြိမ်ကြိမ် မေတ္တာ​ပြခဲ့တယ်။ ဘုရား စိတ်ပျက်​အောင် ဘယ်တော့မှ မ​လုပ်မိ​စေဖို့ ဆုတောင်း​တယ်။”

၁၈၊ ၁၉။ ဆုံးမမှု​ထက် ပိုဆိုး​တဲ့ နာကျင်မှု​က ဘာလဲ။ ဥပမာ ပေးပါ။

^၁၈ ဆုံးမခံ​ရ​တဲ့အခါ နာကျင်မှု​ခံစားရ​ပေ​မဲ့ ဒီထက် ပိုဆိုး​တဲ့ နာကျင်မှု ရှိသေးတယ်။ ဆုံးမမှု​ကို ငြင်းပယ်ခြင်း​ရဲ့ ဆိုးကျိုး​တွေ​ပါပဲ။ (ဟီ. ၁၂:၁၁) ကာ​အိ​န​နဲ့ ဘုရင် ဇေဒကိ​အကြောင်း သုံးသပ်ကြည့်ပါ။ အာဗေလ​ကို ကာ​အိန သတ်ချင်​လောက်အောင် မုန်း​နေတဲ့​အတွက် ဘုရား​သခင်​က “ဘာ​လို့ ဒီလောက်​တောင် ဒေါသထွက်​ပြီး မျက်နှာ​ပျက်​နေရ​တာလဲ။ မင်း​သာ အခု​ကစပြီး ကောင်းတာ​လုပ်​မယ်ဆိုရင် မျက်နှာသာ​ပြန်​ရမှာပဲ။ ကောင်းတာ​မ​လုပ်​ရင်​တော့ အပြစ်​က မင်း​ကို ခုန်အုပ်​ချင်​လို့ တံခါးဝ​မှာ ချောင်း​နေတယ်။ အပြစ်​ကို မင်း အနိုင်ယူ​လိုက်ပါ” လို့ပြောတယ်။ (က. ၄:၆၊ ၇) ကာ​အိ​န နားမထောင်​ခဲ့တဲ့​အတွက် အပြစ်​က အနိုင်ယူ​သွားတယ်။ မလိုအပ်တဲ့ နာကျင်မှု​ဝေဒနာ​တွေ ခံစားခဲ့​ရတယ်။ (က. ၄:၁၁၊ ၁၂) ဘုရားသခင့်​ဆုံးမမှု​ကိုသာ လက်ခံခဲ့​ရင် အဲဒီလောက် နာကျင်ခံစား​ရမှာ မဟုတ်ဘူး။

^၁၉ ပျော့​ညံ့​တဲ့ မင်းဆိုး​ဇေဒကိ လက်ထက်​မှာ ဂျေရုဆလင်​မြို့​ဟာ တော်တော် အခြေအနေ ဆိုး​နေတယ်။ မကောင်းတဲ့ လမ်းစဉ်​ကို စွန့်ဖို့ ဇေဒကိ​ကို ပရောဖက် ယေရမိ အကြိမ်ကြိမ် တိုက်တွန်း​ပေ​မဲ့ နားမထောင်​တဲ့အတွက် ဘေးဆိုး​ကြုံ​ခဲ့ရတယ်။ (ယေ. ၅၂:၈-၁၁) ယေဟောဝါ​က ကျွန်တော်တို့ကို မလိုအပ်တဲ့ ဒုက္ခ​တွေ မခံစား​စေချင်ဘူး။—ဟေရှာယ ၄၈:၁၇၊ ၁၈ ကို​ဖတ်ပါ။

၂၀။ ဘုရားသခင့် ဆုံးမမှု​ကို လက်ခံသူ၊ ငြင်းပယ်​သူတွေ​အတွက် ဘယ်​အနာဂတ် ရှိ​သလဲ။

^၂၀ လောကမှာ​တော့ ဘုရားသခင့်​ဆုံးမမှု​ကို အထင်သေး၊ လှောင်ပြောင်​ကြ​တယ်။ ဒါပေမဲ့ အဲဒီ​သဘောထား​ရှိ​သူတွေ မကြာခင် ဆိုးကျိုး ခံစားရ​ပါလိမ့်မယ်။ (ပညာ. ၁:၂၄-၃၁) ဒါကြောင့် “ဆုံးမစကား​ကို နားထောင်ပါ။ ဉာဏ်ပညာ​ရှိပါ။” ပညာအလိမ္မာ ၄:၁၃ မှာ ဖော်ပြ​သလို “ဆုံးမမှု​ကို ကိုင်စွဲ​ထားပါ။ မလွှတ်​လိုက်​နဲ့။ ထိန်းသိမ်း​ထားပါ။ ဆုံးမမှု​ဟာ အသက်ရှင်​စေနိုင်​လို့ပဲ။”