“အဲဒီနေ့၊ အဲဒီအချိန်ကို ခင်ဗျားတို့ မသိတဲ့အတွက် သတိနဲ့ စောင့်နေကြပါ။”—မဿဲ ၂၅:၁၃။

“အဖဘုရား သတ်မှတ်ထားတဲ့ အချိန်ကို ခင်ဗျားတို့ မသိတဲ့အတွက် သတိနဲ့ စောင့်နေကြပါ။ နိုးနိုးကြားကြား ရှိနေကြပါ။”—မာကု ၁၃:၃၃။

ဒါကြောင့် ဒီလောကစနစ် အဆုံးတိုင်မယ့် အချိန် အတိအကျကို ဘယ်သူမှ မသိဘူး။ အဆုံးရောက်လာမယ့် ‘နေ့ နဲ့ အချိန်’ အတိအကျကိုတော့ ဘုရားသခင် “သတ်မှတ်ထား” ပြီးပြီ။ (မဿဲ ၂၄:၃၆) ဒါဆိုရင် အဆုံးရောက်လာမယ့်အချိန်ကို ဘယ်လိုမှ မသိနိုင်ဘူး ဆိုတဲ့ သဘောလား။ မဟုတ်ပါဘူး။ ယေရှုက တပည့်တွေကို အဆုံးရောက်လာဖို့ နီးပြီဆိုတာ သိစေတဲ့ အဖြစ်အပျက်တွေ ပြောခဲ့တယ်။

ဒီအဖြစ်အပျက်တွေက “လောကစနစ် နိဂုံးပိုင်းကို” ရောက်နေပြီဆိုတဲ့ နိမိတ်မှန်း သိစေတယ်။ ယေရှု ဒီလိုပြောခဲ့တယ်– “လူတစ်မျိုးနဲ့ တစ်မျိုး၊ တစ်နိုင်ငံနဲ့ တစ်နိုင်ငံ တိုက်ခိုက်ကြလိမ့်မယ်။ အစာခေါင်းပါးတာ၊ ငလျင်လှုပ်တာတွေ တစ်နေရာပြီး တစ်နေရာ ဖြစ်လိမ့်မယ်။” (မဿဲ ၂၄:၃၊ ၇) “ကပ်ရောဂါဘေးတွေ” ဖြစ်လိမ့်မယ်လို့လည်း ပြောတယ်။ (လုကာ ၂၁:၁၁) ယေရှု ကြိုပြောခဲ့တဲ့ အဖြစ်အပျက်တွေကို တွေ့နေရပြီလား။

အသေအပျောက်များတဲ့ စစ်ပွဲတွေ၊ အစာရှားပါးမှုတွေ၊ ငလျင်တွေ၊ ဆိုးရွားလှတဲ့ ကပ်ရောဂါတွေရဲ့ ဒဏ်ကို ယနေ့ လူတွေ ခံစားနေရတယ်။ ဥပမာ၊ ၂၀၀၄ ခုနှစ်တုန်းက အိန္ဒိယ သမုဒ္ဒရာမှာ လှုပ်ခတ်ခဲ့တဲ့ ငလျင်ကြောင့် ဆူနာမီ ဖြစ်ပေါ်လာပြီး လူပေါင်း ၂၂၅,၀၀၀ နီးပါး သေဆုံးခဲ့တယ်။ ကိုဗစ်-၁၉ ကပ်ရောဂါကြောင့် သုံးနှစ်အတွင်း ကမ္ဘာတစ်ဝန်းမှာ ၆.၉ သန်းနီးပါး သေဆုံးခဲ့တယ်။ ဒီအဖြစ်အပျက်တွေက ဒီလောကစနစ် ကုန်ဆုံးဖို့ နီးနေပြီဆိုတာ ဖော်ပြတယ်လို့ ယေရှု ပြောခဲ့တယ်။

လောကစနစ် အဆုံးမတိုင်ခင် အချိန်ကာလကို “နောက်ဆုံးကာလ” လို့ ကျမ်းစာက ဆိုတယ်။ (၂ ပေတရု ၃:၃၊ ၄) တိမောသေ ဒုတိယစောင် ၃:၁-၅ အရ နောက်ဆုံးကာလမှာ လူတွေဟာ ကိုယ်ကျင့်တရား ပျက်ပြားလာမယ်။ (“ လောကစနစ် အဆုံးမတိုင်မီ” လေးထောင့်ကွက်ကို ကြည့်ပါ။) အတ္တကြီး၊ လောဘကြီး၊ ခက်ထန်ကြမ်းကြုတ်၊ မေတ္တာကင်းမဲ့တဲ့ လူစားတွေကို မြင်နေရသလား။ အဲဒါတွေက ဒီလောကစနစ် ကုန်ဆုံးတော့မယ့် အချိန်မှာ အသက်ရှင်နေရတယ်ဆိုတဲ့ အထောက်အထားတွေပါပဲ။

နောက်ဆုံးကာလ ဘယ်လောက် ကြာရှည်မလဲ။ “အချိန် နည်းနည်းပဲ” လို့ ကျမ်းစာက ဆိုတယ်။ “ကမ္ဘာမြေကို ဖျက်ဆီးတဲ့သူတွေကို” ဘုရားသခင် “ဖျက်ဆီး” ပါတော့မယ်။—ဗျာဒိတ် ၁၁:၁၅-၁၈။ ၁၂:၁၂။

ဆိုးယုတ်တဲ့ လက်ရှိ လောကစနစ်ကို ဖျက်ဆီးမယ့် နေ့ရက်နဲ့ အချိန်ကို ဘုရားသခင် သတ်မှတ်ထားပြီးပြီ။ (မဿဲ ၂၄:၃၆) ဒါပေမဲ့ သတင်းကောင်းကတော့ ဘုရားသခင်က “ဘယ်သူ့ကိုမှ မပျက်စီးစေချင်” ဘူး။ (၂ ပေတရု ၃:၉) ဘုရားက မိမိရဲ့ စံနှုန်းတွေနဲ့အညီ အသက်ရှင်နေထိုင်ဖို့ လူသားတွေကို အခွင့်အရေး ပေးထားတယ်။ အကြောင်းကတော့ ကျွန်တော်တို့ကို ဒီလောကစနစ် အဆုံးကနေ ကယ်တင်ပြီး သာယာလှပတဲ့ ပရဒိသု ကမ္ဘာသစ်မှာ အသက်ရှင် နေထိုင်စေချင်လို့ပါပဲ။

ဘုရားသခင့် နိုင်ငံတော် အုပ်ချုပ်မှုအောက် ကမ္ဘာသစ်မှာ နေထိုင်ခွင့် ရစေဖို့ ကမ္ဘာချီ သွန်သင်ခြင်း အစီအစဉ်တစ်ခုကို ဘုရားသခင် စီစဉ်ပေးထားတယ်။ ဘုရားသခင့် နိုင်ငံတော်အကြောင်း သတင်းကောင်းကို “လူနေထိုင်ရာ မြေတစ်ခွင်လုံး” မှာ ဟောပြောကြလိမ့်မယ်လို့ ယေရှု ပြောခဲ့တယ်။ (မဿဲ ၂၄:၁၄) ကမ္ဘာတစ်ဝန်းက ယေဟောဝါသက်သေတွေဟာ ကျမ်းစာမျှော်လင့်ချက်အကြောင်း ဟောပြောသွန်သင်ရာမှာ နာရီပေါင်း သန်းချီ သုံးနေတယ်။ အဆုံးမရောက်ခင်အထိ ဒီဟောပြောခြင်း ကင်ပိန်းကို ကမ္ဘာတစ်ဝန်းမှာ လုပ်ဆောင်မယ်လို့ ယေရှု ပြောခဲ့တယ်။

လူ့အုပ်ချုပ်မှု ကုန်ဆုံးမယ့်အချိန် နီးနေပြီ။ သတင်းကောင်းကတော့ ဒီလောက အဆုံးတိုင်တဲ့အခါ သင် ကယ်တင်ခံရပြီး ဘုရား ကတိပေးထားတဲ့ သာယာလှပတဲ့ ကမ္ဘာမြေကြီးမှာ အသက်ရှင်ခွင့် ရနိုင်ပါတယ်။ အဲဒီကမ္ဘာသစ်မှာ အသက်ရှင်ခွင့်ရအောင် ဘာလုပ်နိုင်သလဲဆိုတာ နောက်ဆောင်းပါးမှာ ဖော်ပြထားပါတယ်။