‘ယေဟောဝါနှင့် ကိုယ်တော်၏တန်ခိုးတော်ကို ရှာကြလော့’
‘ယေဟောဝါနှင့် ကိုယ်တော်၏တန်ခိုးတော်ကို ရှာကြလော့’
“ထာဝရဘုရားသည် အထံတော်၌ စုံလင်သောစိတ်နှလုံးရှိသူတို့ဘက်တွင် တန်ခိုးပြတော်မူခြင်းငှာ၊ မျက်စိတော်သည် လျင်မြန်၍ မြေကြီးတစ်ပြင်လုံးကို တစ်ပြိုင်နက် နှံ့အောင်ကြည့်ရှုလျက်ရှိ၏။”—၂ ရာဇဝင်ချုပ် ၁၆:၉၊ သမ္မာ။
၁။ တန်ခိုးဟူသည် အဘယ်နည်း၊ ယင်းကို လူသားတို့ မည်သို့အသုံးချခဲ့ကြပြီနည်း။
တန်ခိုးဟူသည် ထိန်းချုပ်ပိုင်ခွင့်ရှိခြင်း၊ အာဏာရှိခြင်း သို့မဟုတ် အခြားသူများအပေါ် ဩဇာညောင်းခြင်း; အကျိုးဆက်တစ်ခုကို ဆောင်ရွက်နိုင်စွမ်း သို့မဟုတ် ပေါ်ထွက်စေနိုင်စွမ်းရှိခြင်း; ကာယအင်အားကြီးမားမှု (ခွန်အား); သို့မဟုတ် စိတ်ပိုင်း သို့မဟုတ် အကျင့်အကြံပိုင်း စွမ်းအားထက်မြက်မှုကဲ့သို့သော အဓိပ္ပာယ်အမျိုးမျိုးရှိနိုင်သည်။ တန်ခိုးအာဏာအသုံးချခြင်းနှင့်ပတ်သက်လာလျှင် လူသားတို့၏မှတ်တမ်းမှာ မကောင်းလှပေ။ သားရဲများ၏လက်ထဲရှိ တန်ခိုးအာဏာနှင့်ပတ်သက်ပြီး သမိုင်းဆရာတစ်ဦးဖြစ်သူ လော့ဒ် အက်တန်က ဤသို့ဆိုသည်– “တန်ခိုးအာဏာသည် အကျင့်ပျက်စေပြီး အကြွင်းမဲ့တန်ခိုးအာဏာသည် လုံးလုံးအကျင့်ပျက်သွားစေသည်။” ယနေ့ခေတ်သမိုင်းတွင် လော့ဒ် အက်တန်၏စကား အများအားဖြင့်မှန်ကန်ကြောင်းပြသည့် နမူနာများနှင့်ပြည့်လျက်ရှိသည်။ ၂၀ ရာစုအတွင်း လူတို့သည် ယခင်မည်သည့်ရာစုထက်မဆို “မိမိအကျိုးပျက်အောင် တစ်ယောက်ကိုတစ်ယောက်အုပ်စိုး” ခဲ့ပြီ။ (ဒေ. ၈:၉) အကျင့်ပျက်သောအာဏာရှင်များသည် မိမိတို့၏တန်ခိုးအာဏာကို အကြီးအကျယ်အလွဲသုံးစားပြုကြပြီး သန်းနှင့်ချီသောလူ့အသက်များကို သေစေခဲ့ကြသည်။ မေတ္တာ၊ ဉာဏ်ပညာနှင့် တရားမျှတမှုတို့ဖြင့် ထိန်းချုပ်ထားခြင်းမရှိသော တန်ခိုးအာဏာသည် အန္တရာယ်ရှိသည်။
၂။ ဘုရားသခင်၏ အခြားဂုဏ်ရည်တော်များသည် မိမိ၏တန်ခိုးတော်ကို ယေဟောဝါအသုံးပြုပုံအပေါ် မည်သို့အကျိုးသက်ရောက်ကြောင်း ရှင်းပြပါ။
၂ လူသားအများစုနှင့်မတူဘဲ ဘုရားသခင်သည် မိမိ၏တန်ခိုးတော်ကို ကောင်းကျိုးအတွက်အသုံးပြုတော်မူသည်။ “ထာဝရဘုရားသည် အထံတော်၌ စုံလင်သောစိတ်နှလုံးရှိသူတို့ဘက်တွင် တန်ခိုးပြတော်မူခြင်းငှာ၊ မျက်စိတော်သည် လျင်မြန်၍ မြေကြီးတစ်ပြင်လုံးကို တစ်ပြိုင်နက် နှံ့အောင်ကြည့်ရှုလျက်ရှိ၏။” (၂ ရာဇဝင်ချုပ် ၁၆:၉၊ သမ္မာ) ယေဟောဝါသည် မိမိ၏တန်ခိုးတော်ကို အထိန်းအချုပ်ရှိသောနည်းလမ်းဖြင့် ညွှန်ကြားတော်မူသည်။ စိတ်ရှည်တော်မူခြင်းကြောင့် ဆိုးသွမ်းသူများအား နောင်တရစေခွင့်ပေးရန် အရေးယူမှုကို ဘုရားသခင်ရုပ်သိမ်းထားသည်။ မေတ္တာ၏လှုံ့ဆော်မှုကြောင့် ဖြောင့်မတ်သူ၊ မဖြောင့်မတ်သူ လူအမျိုးမျိုးတို့အပေါ် နေထွက်စေသည်။ နောက်ဆုံးတွင် တရားမျှတမှုက သေလမ်းကိုဖန်တီးသည့် စာတန်ကို ပယ်ရှင်းပစ်ဖို့ ကိုယ်တော်၏ အကန့်အသတ်မရှိတန်ခိုးတော်ကို အသုံးပြုရန် လှုံ့ဆော်ပေးမည်ဖြစ်သည်။—မဿဲ ၅:၄၄၊ ၄၅; ဟေဗြဲ ၂:၁၄; ၂ ပေတရု ၃:၉။
၃။ ဘုရားသခင်၏ အကြီးမြင့်ဆုံးတန်ခိုးတော်သည် ကိုယ်တော်ကို ယုံကြည်ကိုးစားရန် အကြောင်းရင်းတစ်ခု အဘယ်ကြောင့်ဖြစ်ရသနည်း။
၃ ကျွန်ုပ်တို့ကောင်းကင်ခမည်းတော်၏ အံ့သြဖွယ်တန်ခိုးတော်သည် ကိုယ်တော်၏ကတိတော်များနှင့် ကိုယ်တော်၏ကာကွယ်မှုအပေါ်ပါ ယုံကြည်ကိုးစားရန် အကြောင်းရင်းဖြစ်သည်။ ကလေးငယ်တစ်ယောက်သည် ဖခင်ဖြစ်သူ၏လက်ကို မြဲမြဲဆုပ်ကိုင်ထားချိန်တွင် မိမိ၏ဖခင်သည် မိမိအပေါ်အဘယ်အန္တရာယ်ကိုမျှ ကျရောက်စေခွင့်ပြုမည်မဟုတ်ကြောင်းကို သိထား၍ လူစိမ်းများကြားတွင် လုံခြုံမှုရှိသည်။ အလားတူစွာ “ကယ်တင်ခြင်းငှာတန်ခိုးကြီးသော” အရှင် ကျွန်ုပ်တို့၏ကောင်းကင်ခမည်းတော်နှင့်အတူ ကျွန်ုပ်တို့လျှောက်လှမ်းကြမည်ဆိုလျှင် အစဉ်ခံရသောမည်သည့်အန္တရာယ်မဆိုမှ ကျွန်ုပ်တို့ကိုကာကွယ်မည်ဖြစ်သည်။ (ဟေရှာယ ၆၃:၁; မိက္ခာ ၆:၈) ထို့အပြင် ယေဟောဝါသည် ဖခင်ကောင်းပီသစွာ အမြဲကတိတည်တော်မူသည်။ ကိုယ်တော်၏ ‘နှုတ်မှထွက်သောစကားသည် အလိုရှိရာပြည့်စုံစေ၍ စေခိုင်းသောအမှု၌ အထမြောက်လိမ့်မည်’ ကို ကိုယ်တော်၏ အကန့်အသတ်မရှိတန်ခိုးတော်က အာမခံသည်။—ဟေရှာယ ၅၅:၁၁၊ သမ္မာ; တိတု ၁:၂။
၄၊ ၅။ (က) ဘုရင်အာသသည် ယေဟောဝါကို လုံးလုံးလျားလျားယုံကြည်ကိုးစားသောအခါ အဘယ်အကျိုးဆက်ဖြစ်ပေါ်ခဲ့သနည်း။ (ခ) ကျွန်ုပ်တို့ပြဿနာများအတွက် လူ့ဖြေရှင်းနည်းကို အားကိုးလျှင် မည်သို့ဖြစ်နိုင်သနည်း။
၄ ကျွန်ုပ်တို့သည် မိမိတို့၏ကောင်းကင်ခမည်းတော်၏အကာအကွယ်ကို မျက်ခြည်အပြတ်မခံရန်ဆုံးဖြတ်ဖို့ အဘယ်ကြောင့် ဤမျှအရေးကြီးရသနည်း။ အခြေအနေများ၏ ဖိစီးမှုကြောင့် ကျွန်ုပ်တို့၏စစ်မှန်သောလုံခြုံရာနေရာသည် အဘယ်နေရာဖြစ်သည်ကို မေ့လျော့သွားနိုင်သည့်အတွက်ဖြစ်သည်။ အများအားဖြင့် ယေဟောဝါကို ယုံကြည်ကိုးစားခဲ့သော ဘုရင်အာသ၏နမူနာတွင် ယင်းကို တွေ့မြင်ရသည်။ အာသစိုးစံချိန်အတွင်း အီသီယိုးပီးယားတပ်သားတစ်သန်းအင်အားရှိ စစ်တပ်သည် ယုဒပြည်ကို လာရောက်တိုက်ခိုက်ခဲ့သည်။ ရန်သူများဘက်မှ စစ်ရေးသာမည်ကိုသိရှိရာ အာသသည် ဤသို့ဆုတောင်းခဲ့သည်– “အိုထာဝရဘုရား၊ ကိုယ်တော်သည် လူများတို့တွင် အားနည်းသောသူကိုကယ်တင်ခြင်းငှာ တတ်နိုင်တော်မူသည်ဖြစ်၍၊ အိုအကျွန်ုပ်တို့၏ဘုရားသခင်ထာဝရဘုရား၊ ကယ်တင်တော်မူပါ။ အကျွန်ုပ်တို့သည် ကိုယ်တော်ကိုခိုလှုံ၍၊ နာမတော်ကိုအမှီပြုလျက်၊ ဤအလုံးအရင်းကြီးကို တိုက်ခြင်းငှာသွားပါ၏။ အိုထာဝရဘုရား၊ ကိုယ်တော်သည် အကျွန်ုပ်တို့၏ဘုရားသခင်ဖြစ်တော်မူ၏။ လူသည် ကိုယ်တော်ကိုနိုင်သောအခွင့် ရှိစေတော်မမူပါနှင့်။” (၂ ရာဇဝင်ချုပ် ၁၄:၁၁) ယေဟောဝါသည် အာသတောင်းဆိုသည့်အတိုင်း သူ့ကို ပြတ်ပြတ်သားသားအောင်ပွဲခံစေခဲ့သည်။
၅ သို့သော် နှစ်ပေါင်းများစွာ သစ္စာရှိရှိအမှုတော်ထမ်းပြီးနောက် ယေဟောဝါ၏ကယ်တင်ခြင်းတန်ခိုးတော်အပေါ် အာသ၏ယုံကြည်စိတ်ချမှု ယိမ်းယိုင်ခဲ့သည်။ မြောက်ပိုင်းဣသရေလနိုင်ငံ၏ စစ်ရေးခြိမ်းခြောက်မှုကို ဖယ်ရှားရန် ရှုရိအကူအညီကို သူမျှော်ကိုးခဲ့သည်။ (၂ ရာဇဝင်ချုပ် ၁၆:၁-၃) ရှုရိဘုရင်ဗင်ဟာဒဒ်ကို အာသပေးလိုက်သည့်တံစိုးလက်ဆောင်ကြောင့် ယုဒပြည်တွင်ကျရောက်မည့် ဣသရေလနိုင်ငံ၏ခြိမ်းခြောက်မှုကို ဖယ်ရှားပစ်နိုင်ခဲ့သော်လည်း ရှုရိနှင့်သူ မဟာမိတ်ဖွဲ့မှုက ယေဟောဝါအား ယုံကြည်စိတ်ချမှုမရှိကြောင်း တင်ပြသည်။ ပရောဖက်ဟာနန်က သူ့အား ဤသို့တဲ့တိုးမေးခဲ့သည်– “ကုရှ၊ လိဗုရဲမက်တို့သည် ရထား၊ မြင်းစီးသူရဲအမြောက်အမြားပါသော အလုံးအရင်းကြီးဖြစ်လျက်၊ ထာဝရဘုရားကို ဘုရင်မင်း ကိုးစားသောကြောင့် လက်တွင်းသို့အပ်နှင်းတော်မူခဲ့သည်မဟုတ်လော။” (၂ ရာဇဝင်ချုပ် ၁၆:၇၊ ၈၊ သမ) သို့ရာတွင် အာသသည် ဤအပြစ်ဖော်ပြဆုံးမမှုကို လက်မခံခဲ့ချေ။ (၂ ရာဇဝင်ချုပ် ၁၆:၉-၁၂) ပြဿနာများရင်ဆိုင်ရချိန်တွင် လူ့စွမ်းအားကို ယုံစားခြင်းသည် မလွဲမသွေစိတ်ပျက်ရမည်ဖြစ်သောကြောင့် လူ့ဖြေရှင်းနည်းများကို အားမကိုးဘဲ ဘုရားသခင်ကို ယုံကြည်စိတ်ချကြောင်း တင်ပြကြပါစို့။—ဆာလံ ၁၄၆:၃-၅။
ယေဟောဝါပေးသည့် တန်ခိုးတော်ကို ရှာယူ
၆။ ကျွန်ုပ်တို့သည် အဘယ်ကြောင့် “ထာဝရဘုရားနှင့် တန်ခိုးတော်ကို ရှာ” သင့်သနည်း။
၆ ယေဟောဝါသည် မိမိ၏ကျေးကျွန်များကို တန်ခိုးပေးနိုင်သည့်အပြင် အကာအကွယ်လည်းပေးနိုင်သည်။ “ထာဝရဘုရားနှင့် တန်ခိုးတော်ကိုရှာကြ” ရန် သမ္မာကျမ်းစာက တိုက်တွန်းထားသည်။ (ဆာလံ ၁၀၅:၄) အဘယ်ကြောင့်နည်း။ ကိစ္စရပ်များကို ဘုရားသခင်၏ခွန်အားဖြင့် ကျွန်ုပ်တို့လုပ်ဆောင်ကြသည့်အခါ ကျွန်ုပ်တို့၏အစွမ်းကို အခြားသူများ၏ ဆိုးကျိုးအတွက်မဟုတ် ကောင်းကျိုးအတွက် အသုံးပြုမည်ဖြစ်သောကြောင့်တည်း။ ယင်းနှင့်ပတ်သက်၍ “ယေဟောဝါ၏တန်ခိုး” ဖြင့်အံ့ဖွယ်အမှုများစွာကို ပြုတော်မူခဲ့သည့် ယေရှုခရစ်၏စံနမူနာထက်ကောင်းသည့်စံနမူနာကို အဘယ်နေရာ၌မျှ ရှာ၍ရနိုင်မည်မဟုတ်ပါ။ (လုကာ ၅:၁၇၊ ကဘ) ယေရှုသည် သူဌေးဖြစ်ရန်၊ နာမည်ကျော်ကြားရန် သို့မဟုတ် ဘုန်းတန်ခိုးအရှိဆုံး ဘုရင်တစ်ပါးဖြစ်ရန်ပင် ကိုယ်တိုင်ဇောက်ချလုပ်ဆောင်နိုင်သည်။ (လုကာ ၄:၅-၇) သို့အစား ဘုရားသခင်ပေးထားသည့်တန်ခိုးကို ကိုယ်တော်သည် လေ့ကျင့်ပေးခြင်း၊ သွန်သင်ခြင်း၊ အကူအညီပေးခြင်း၊ ကုသပေးခြင်းတို့တွင် အသုံးပြုတော်မူခဲ့သည်။ (မာကု ၇:၃၇; ယောဟန် ၇:၄၆) ကျွန်ုပ်တို့အတွက် အလွန်ကောင်းသည့် စံနမူနာပင်တည်း!
၇။ ကျွန်ုပ်တို့သည် ကိုယ်ပိုင်အစွမ်းဖြင့်မဟုတ်ဘဲ ဘုရားသခင်၏ခွန်အားဖြင့် ကိစ္စရပ်များကိုဆောင်ရွက်သောအခါ အဘယ်အရေးပါသောအရည်အသွေးကို မွေးမြူကြသနည်း။
၇ ထို့အပြင် ကိစ္စရပ်များကို “ဘုရားသခင်ပေးသနားတော်မူသောအစွမ်းသတ္တိ” ဖြင့်လုပ်ဆောင်သောအခါ ယင်းက ကျွန်ုပ်တို့ကိုဆက်၍နှိမ့်ချစေသည်။ (၁ ပေတရု ၄:၁၁) အာဏာတန်ခိုးရှိရန် ကြိုးစားသူများသည် ပိုင်စိုးပိုင်နင်းလုပ်တတ်ကြသည်။ နမူနာတစ်ရပ်မှာ အာရှုရိဘုရင် အီစာ ဟက်ဒန်ဖြစ်ပြီး သူကဤသို့ ဝင့်ဝါစွာကြေညာခဲ့သည်– “ငါသည် တန်ခိုးရှင်၊ တန်ခိုးအရှိဆုံးအရှင်၊ ငါသည် သူရဲကောင်း၊ ငါသည် ကြီးမြတ်သူ၊ ငါသည် အလွန်ကြီးမြတ်သူဖြစ်သည်။” အလွန်ခြားနားစွာပင် ယေဟောဝါသည် “အစွမ်းသတ္တိရှိသောသူတို့ကို ရှက်ကြောက်စေခြင်းငှာ၊ လောကီအရာ၌အားနည်းသောသူတို့ကို ရွေးကောက်တော်မူ၏။” သို့ဖြစ်၍ ခရစ်ယာန်စစ်တစ်ဦးသည် ဝါကြွားလျှင် ယေဟောဝါ၌သာ ဝါကြွားသည်၊ အကြောင်းမှာ မိမိပြီးမြောက်အောင်မြင်ခဲ့သည့်အရာသည် မိမိအစွမ်းဖြင့်မဟုတ်ကြောင်း သိထားသောကြောင့်ဖြစ်သည်။ ‘ဘုရားသခင်၏ တန်ခိုးကြီးသောလက်တော်အောက်၌ ကိုယ်ကိုကိုယ်နှိမ့်ချ’ ခြင်းသည် စစ်မှန်သောချီးမြှောက်မှုကိုဖြစ်စေ၏။—၁ ကောရိန္သု ၁:၂၆-၃၁; ၁ ပေတရု ၅:၆။
၈။ ယေဟောဝါ၏တန်ခိုးတော်ရရှိရန် ကျွန်ုပ်တို့ဦးစွာ အဘယ်အရာလုပ်ဆောင်သင့်သနည်း။
၈ ဘုရားသခင်၏ခွန်အားကို ကျွန်ုပ်တို့ မည်သို့ရယူနိုင်သနည်း။ ဦးဆုံးအနေနှင့် ခွန်အားပေးဖို့ ဆုတောင်းရမည်။ ဤသို့တောင်းဆိုသူများကို ခမည်းတော်သည် သန့်ရှင်းသောဝိညာဉ်တော်ပေးတော်မူမည်ဖြစ်ကြောင်း ယေရှုက မိမိ၏တပည့်တော်များကို အာမခံထားသည်။ (လုကာ ၁၁:၁၀-၁၃) ယေရှုအကြောင်း သက်သေခံခြင်းကို ရပ်တန်းကရပ်ပစ်ရန် မှာကြားသည့် ဘာသာရေးခေါင်းဆောင်တို့၏စကားကို နားမထောင်ဘဲ ဘုရားသခင်၏စကားကိုနားထောင်ဖို့ရွေးချယ်သောအခါ ခရစ်တော်၏တပည့်တော်များ ခွန်အားမည်သို့ရှိလာသည်ကို သုံးသပ်ကြည့်ပါ။ ယေဟောဝါ၏အကူအညီကို သူတို့တောင်းခံကြသောအခါ သူတို့၏စိတ်ရိုးမှန်သောဆုတောင်းချက်ကို နားညောင်းတော်မူပြီး သတင်းကောင်းကို ရဲရင့်စွာဆက်ဟောပြောရန် ဝိညာဉ်တော်က သူတို့ကိုတန်ခိုးပေးတော်မူခဲ့သည်။—တမန်တော် ၄:၁၉၊ ၂၀၊ ၂၉-၃၁၊ ၃၃။
၉။ ဝိညာဉ်ခွန်အား၏ ဒုတိယအရင်းအမြစ်ကို ဖော်ပြပါ၊ ယင်း၏စွမ်းအားထက်မြက်မှုကိုဖော်ပြရန် ကျမ်းစာပါနမူနာတစ်ခုကို ကိုးကားဖော်ပြပါ။
၉ ဒုတိယ၊ ကျွန်ုပ်တို့သည် ဝိညာဉ်ခွန်အားကို သမ္မာကျမ်းစာမှ ရယူနိုင်သည်။ (ဟေဗြဲ ၄:၁၂) ဘုရားသခင့်နှုတ်မြွက်စကားတော်၏တန်ခိုးကို ဘုရင်ယောရှိအုပ်စိုးစဉ်အတွင်း အထင်အရှားတွေ့ရသည်။ ဤယုဒဘုရင်သည် အယူမှားရုပ်ပုံများကို နိုင်ငံမှဖယ်ရှားလိုက်ပြီဖြစ်သော်လည်း ဗိမာန်တော်တွင် အမှတ်မထင်တွေ့လိုက်ရသည့် ယေဟောဝါ၏ပညတ္တိကျမ်းက ဤသန့်စင်ရေးအစီအစဉ်ကို အားစိုက်ခွန်စိုက်လုပ်ဆောင်ရန် လှုံ့ဆော်ပေးခံခဲ့ရသည်။ * ယောရှိကိုယ်တိုင် ပညတ္တိကျမ်းကို ပြည်သူတို့ရှေ့တွင်ဖတ်ပြပြီးနောက် လူမျိုးတစ်မျိုးလုံးသည် ယေဟောဝါနှင့် ပဋိညာဉ်ဖွဲ့ခဲ့ကြပြီး ရုပ်ပုံတိုက်ဖျက်ရေး၏ ဒုတိယအစီအစဉ်ကို ပို၍အင်တိုက်အားတိုက်လုပ်ဆောင်ခဲ့ကြသည်။ ယောရှိ၏ ပြန်လည်တည်ထောင်ရေးရလဒ်ကောင်းမှာ “လက်ထက်တော်ကာလပတ်လုံး သူတို့သည်မဖောက်ပြန်၊ . . . ထာဝရဘုရားနောက်တော်သို့ လိုက်လျက်နေကြ၏။”—၂ ရာဇဝင်ချုပ် ၃၄:၃၃။
၁၀။ ယေဟောဝါထံမှ ခွန်အားရယူနိုင်သည့် တတိယနည်းကား အဘယ်နည်း၊ ယင်းသည် အဘယ်ကြောင့်အရေးကြီးသနည်း။
၁၀ တတိယ၊ ကျွန်ုပ်တို့သည် ခရစ်ယာန်ပေါင်းသင်းမှုမှတစ်ဆင့် ယေဟောဝါထံတော်မှ ခွန်အားရကြသည်။ ‘မေတ္တာစိတ်ရှိစေခြင်း၊ ကောင်းသောအကျင့်ကိုကျင့်စေခြင်းငှာ၊ တိုက်တွန်းနှိုးဆော်’ ဖို့နှင့် တစ်ယောက်ကိုတစ်ယောက် အားပေးရန် အစည်းအဝေးများကို မှန်မှန်တက်ဖို့ ခရစ်ယာန်များကို ပေါလုတိုက်တွန်းခဲ့သည်။ (ဟေဗြဲ ၁၀:၂၄၊ ၂၅) ပေတရုသည် အကျဉ်းထောင်မှ အံ့ဖွယ်နည်းဖြင့်လွတ်မြောက်လာသောအခါ သူသည် ညီအစ်ကိုများနှင့်အတူနေလို၍ “လူများစုဝေး၍ဆုတောင်း” နေကြသော ယောဟန်မာကု၏မိခင်အိမ်သို့ သူတန်းသွားခဲ့သည်။ (တမန်တော် ၁၂:၁၂) သူတို့အားလုံးသည် ကိုယ့်အိမ်ကိုယ်နေကာ ဆုတောင်းနိုင်ကြမည်မှာသေချာသည်။ သို့သော် ထိုခက်ခဲသောအချိန်အတွင်း အတူတကွဆုတောင်းကာ တစ်ယောက်ကိုတစ်ယောက်အားပေးဖို့ သူတို့ရွေးခဲ့ကြသည်။ ရောမမြို့သို့ပေါလုသွားသည့် အန္တရာယ်ထူပြောသော ခရီးရှည်ဆုံးခါနီးတွင် ပေါတရောလိမြို့မှ ညီအစ်ကိုအချို့နှင့်တွေ့ဆုံခဲ့သည့်အပြင် သူ့အားခရီးဦးကြိုပြုရန်လာကြသော အခြားသူတို့နှင့်လည်းထပ်တွေ့ခဲ့သည်။ သူ၏တုံ့ပြန်မှုကားအဘယ်နည်း။ “ပေါလုသည် ထိုသူတို့ကိုမြင်လျှင်၊ ဘုရားသခင်၏ကျေးဇူးတော်ကိုချီးမွမ်း၍ စိတ်သက်သာခြင်းသို့ရောက်လေ၏။” (တမန်တော် ၂၈:၁၃-၁၅) သူသည် ခရစ်ယာန်ချင်းတို့နှင့်အတူ တစ်ဖန်ရှိနေခြင်းဖြင့် ခွန်အားရရှိလာခဲ့သည်။ ကျွန်ုပ်တို့လည်း ခရစ်ယာန်ချင်းများနှင့်ပေါင်းသင်းခြင်းမှ ခွန်အားရရှိကြသည်။ တစ်ဦးနှင့်တစ်ဦး လွတ်လွတ်လပ်လပ်ပေါင်းသင်းနိုင်သမျှကာလပတ်လုံး အသက်လမ်းသို့ဦးတည်သည့် လမ်းကျဉ်းကို ကျွန်ုပ်တို့တစ်ဦးတည်းလျှောက်ရန် မကြိုးစားကြရပါ။—သု. ၁၈:၁; မဿဲ ၇:၁၄။
၁၁။ သာမန်ထက် ‘လွန်ကဲသောတန်ခိုးတော်’ အထူးသဖြင့်လိုအပ်သည့် အခြေအနေအချို့ကို ဖော်ပြပါ။
၁၁ ပုံမှန်ဆုတောင်းခြင်း၊ ဘုရားသခင့်နှုတ်မြွက်စကားတော်ကို လေ့လာခြင်းနှင့် ယုံကြည်သူချင်းတို့နှင့် ပေါင်းသင်းခြင်းတို့ကို ပြုလုပ်ခြင်းဖြင့် ကျွန်ုပ်တို့သည် ‘သခင်ဘုရားအားဖြင့်လည်းကောင်း၊ အစွမ်းသတ္တိတော်အားဖြင့်လည်းကောင်း ခွန်အား’ ရကြ၏။ (ဧဖက် ၆:၁၀၊ သမ) ကျွန်ုပ်တို့အားလုံးသည် ‘သခင်ဘုရားအားဖြင့် ခွန်အား’ အမှန်လိုအပ်သည်။ အချို့သူများသည် အားအင်ဆုတ်ယုတ်စေသောရောဂါများကို ခံစားကြရပြီး အခြားသူများမူ သက်ကြီးဘဝ၏ပျက်ယွင်းမှုများ သို့မဟုတ် တစ်သက်လုံးပေါင်းသင်းလာသည့်အဖော်ကိုဆုံးရှုံးရခြင်းကို ကြုံတွေ့ ကြရသည်။ (ဆာလံ ၄၁:၃) အခြားသူများသည် မယုံကြည်သောအိမ်ထောင်ဖက်၏ အတိုက်အခံပြုမှုကို ခံရပ်ကြရသည်။ မိဘများ၊ အထူးသဖြင့် ကြင်ဖော်မဲ့မိဘများသည် မိသားစုကို ကျွေးမွေးပြုစုရင်း ဝမ်းစာရေးအတွက် အချိန်ပြည့်အလုပ်လုပ်ရခြင်းသည် အလွန်ပင်ပန်းသောတာဝန်တစ်ခုဖြစ်ကြောင်း ခံစားရပေမည်။ ခရစ်ယာန်လူငယ်များသည် ရွယ်တူချင်းဖိအားကို ကြံ့ကြံ့ခံရန်၊ မူးယစ်ဆေးဝါးနှင့် အကျင့်ပျက်မှုကို တွန်းလှန်နိုင်ရန် ခွန်အားလိုသည်။ အဆိုပါစိန်ခေါ်ချက်များကို ရင်ဆိုင်ကျော်လွှားနိုင်ဖို့ သာမန်ထက် ‘လွန်ကဲသောတန်ခိုးတော်’ ကိုယေဟောဝါထံတော်မှတောင်းဆိုရန် မည်သူမျှတုံ့ဆိုင်းမနေသင့်ပါ။—၂ ကောရိန္သု ၄:၇၊ သမ။
‘မောသောသူတို့အား၊ ခွန်အားကိုပေးခြင်း’
၁၂။ ယေဟောဝါသည် ခရစ်ယာန်ဓမ္မအမှုတွင် ကျွန်ုပ်တို့ကို မည်သို့ထောက်မပေးတော်မူသနည်း။
၁၂ ထို့ပြင် ယေဟောဝါ၏ကျေးကျွန်များသည် အမှုတော်ဆောင်ရွက်ကြသောအခါ သူတို့ကို ကိုယ်တော်ခွန်အားပေး၏။ ဟေရှာယ၏ပရောဖက်ပြုချက်တွင် ကျွန်ုပ်တို့ ဤသို့ဖတ်ရသည်– “ထိုဘုရားသခင်သည် မောသောသူတို့အား ခွန်အားကိုပေးတော်မူ၏။ နွမ်းနယ်သောသူတို့အား အစွမ်းသတ္တိနှင့်ပြည့်စုံသောအခွင့်ကိုပေးတော်မူ၏။ . . . ထာဝရဘုရားကိုမျှော်လင့်သောသူတို့မူကား၊ အားပြည့်ကြလိမ့်မည်။ ရွှေလင်းတကဲ့သို့ မိမိတို့အတောင်ကိုအသစ်ပြုပြင်ကြလိမ့်မည်။ ပြေးသော်လည်းမပင်ပန်း၊ ခရီးသွားသောအခါမမောရကြ။” (ဟေရှာယ ၄၀:၂၉-၃၁) တမန်တော်ပေါလုကိုယ်တိုင် သူ၏ဓမ္မအမှုကိုဆောင်ရွက်ရန် ခွန်အားရရှိခဲ့သည်။ ရလဒ်အနေနှင့် သူ၏ဓမ္မအမှုသည် ထိရောက်အကျိုးဖြစ်ထွန်းခဲ့သည်။ သက်သာလောနိတ်ရှိခရစ်ယာန်များအား သူက ဤသို့ရေးသားလိုက်သည်– “ငါတို့ဟောပြောသောဧဝံဂေလိတရားသည် သင်တို့၌ စကားသက်သက်ဖြစ်သည်မဟုတ်။ တန်ခိုးနှင့်လည်ကောင်း၊ သန့်ရှင်းသောဝိညာဉ်တော်နှင့်လည်းကောင်း၊ ဝိစိကိစ္ဆာ[စိတ်နှစ်ခွဖြစ်ခြင်း] မရှိဘဲအမှန်သိခြင်းနှင့်လည်းကောင်း ပြည့်စုံသောတရားဖြစ်၏။” (၁ သက်သာလောနိတ် ၁:၅) သူ၏ဟောပြောသွန်သင်ခြင်းတွင် တန်ခိုးပါသောကြောင့် နားထောင်သူများ၏အသက်တာကို အကြီးအကျယ်ပြောင်းလဲစေ၏။
၁၃။ အတိုက်အခံများကြားတွင် ခံရပ်နိုင်ရန် အဘယ်အရာက ယေရမိကို ခွန်အားရှိစေသနည်း။
၁၃ ကျွန်ုပ်တို့၏ရပ်ကွက်—တုံ့ပြန်မှုသိပ်မရှိဘဲ နှစ်နှင့်ချီ အကြိမ်ကြိမ်ဟောပြောခဲ့ဖွယ်ရှိသည့် ရပ်ကွက်—တွင် စိတ်ဝင်စားမှုမပြသည့်သဘောထားမျိုးကို ရင်ဆိုင်တွေ့ကြုံရသည့်အခါ စိတ်ပျက်အားလျော့လာတတ်ကြသည်။ ယေရမိသည် သူတွေ့ကြုံရသည့် အတိုက်အခံပြုမှု၊ ပြောင်လှောင်သရော်မှု၊ လျစ်လျူရှုမှုတို့ကြောင့် အလားတူ စိတ်ဓာတ်ကျခဲ့သည်။ “ငါသည် [ဘုရားသခင်၏စကား] တော်ကိုမကြားမပြော၊ နာမတော်ကိုအမှီပြု၍မဟောဘဲနေမည်” ဟုသူ့ကိုယ်သူပြောခဲ့သည်။ သို့သော်၊ သူနှုတ်ဆိတ်မနေနိုင်ပါ။ သူ၏သတင်းတရားသည် “[သူ၏] အရိုးတို့ ၌ချုပ်ထား၍၊ လောင်သောမီးကဲ့သို့” ဖြစ်သည်။ (ယေရမိ ၂၀:၉) ဤမျှအကြီးအကျယ်အတိုက်အခံကြုံခဲ့ရချိန်တွင် အဘယ်အရာက သူ့ကိုတန်ခိုးစွမ်းအားအသစ် ရရှိစေခဲ့သနည်း။ “ထာဝရဘုရားသည် ကြောက်မက်ဖွယ်သောသူရဲကဲ့သို့ အကျွန်ုပ်နှင့်အတူရှိတော်မူသည်” ဟုယေရမိပြောခဲ့သည်။ (ယေရမိ ၂၀:၁၁၊ သမ္မာ) ယေရမိသည် သူ့သတင်းတရား၏ အလွန်အရေးကြီးမှုနှင့် သူ၏ဘုရားသခင်ပေးတာဝန်အပေါ် တန်ဖိုးထားခြင်းတို့က ယေဟောဝါ၏တိုက်တွန်းအားပေးမှုကို သူ့အား မဆိုင်းမတွတုံ့ပြန်စေခဲ့သည်။
ထိခိုက်သောတန်ခိုးနှင့် ကုစားသောတန်ခိုး
၁၄။ (က) လျှာသည် မည်မျှအစွမ်းထက်သည့် အင်္ဂါဖြစ်သနည်း။ (ခ) လျှာကဖန်တီးနိုင်သည့် အပျက်အစီးကိုပြရန် နမူနာများပေးပါ။
၁၄ ကျွန်ုပ်တို့ပိုင်ဆိုင်သည့် တန်ခိုးအားလုံးသည် ဘုရားသခင်ထံမှ တိုက်ရိုက်ရလာခြင်းမဟုတ်ချေ။ ဥပမာ၊ လျှာသည် ထိခိုက်စေတတ်သကဲ့သို့ ကုစားနိုင်သည့် တန်ခိုးရှိသည်။ “လျှာသည် အသက်ရှင်စေရန်၊ သေစေရန်တန်ခိုးရှိ၏” ဟု ရှောလမုန်က သတိပေးသည်။ (သု. ၁၈:၂၁၊ သမ) ဧဝနှင့်တစ်ခဏတာ စာတန်ပြောလိုက်သည့်စကား၏ ရလဒ်များက စကားအားဖြင့် မည်မျှအကြီးအကျယ်ပျက်စီးစေနိုင်သည်ကို သက်သေထူသည်။ (ကမ္ဘာဦး ၃:၁-၅; ယာကုပ် ၃:၅) ကျွန်ုပ်တို့လည်း လျှာဖြင့် များစွာဖျက်ဆီးနိုင်သည်။ ငယ်ရွယ်သောမိန်းကလေးတစ်ဦး၏ ကိုယ်အလေးချိန်အကြောင်း ရှုတ်ချပြောဆိုခြင်းက သူ့အား အစာစားရမည်ကိုကြောက်သည့်လမ်းကြောင်းပေါ် တွန်းပို့ပေးလိုက်ရာကျသွားနိုင်သည်။ မစဉ်းစားမဆင်ခြင်ဘဲ သားပုပ်လေလွင့်စကားတစ်ခုခုကို တစ်ဆင့်ပြောဆိုခြင်းက တစ်သက်တာပေါင်းသင်းခဲ့သော မိတ်ဆွေအဖြစ်ကို ပျက်ပြားသွားစေနိုင်သည်။ မှန်ပါသည်၊ လျှာကို ထိန်းချုပ်ဖို့လိုသည်။
၁၅။ ကျွန်ုပ်တို့၏လျှာကို တည်ဆောက်ရန်နှင့် ကုစားရန် မည်သို့အသုံးပြုနိုင်သနည်း။
၁၅ သို့သော် လျှာသည် တည်ဆောက်တတ်သကဲ့သို့ ဖြိုဖျက်တတ်သည်။ သမ္မာကျမ်းစာပညာရှိစကားတစ်ခွန်းက ဤသို့– “သန်လျက်နှင့်ထိုးသကဲ့သို့ မစဉ်းစားဘဲ ပြောဆိုတတ်သောသူအချို့ရှိ၏။ ပညာရှိတို့၏လျှာမူကား အနာကိုငြိမ်းစေတတ်၏။” (သု. ၁၂:၁၈၊ သမ္မာ) ပညာရှိသောခရစ်ယာန်တို့သည် စိတ်ဓာတ်ကျသူများနှင့် ပူဆွေးကြေကွဲနေသူများကို နှစ်သိမ့်ပေးရန် လျှာ၏တန်ခိုးကို အသုံးပြုကြသည်။ စာနာတတ်သောစကားများသည် ထိခိုက်ပျက်စီးစေသော ရွယ်တူချင်းဖိအားကို တိုက်လှန်နေရကြသည့်ဆယ်ကျော်သက်များကို အားပေးနိုင်သည်။ ထောက်ထား၍ပြောဆိုသောလျှာသည် သက်ကြီးညီအစ်ကိုညီအစ်မများအား သူတို့ကိုလိုအပ်နေဆဲနှင့် ချစ်မြတ်နိုးခံရဆဲဖြစ်ကြောင်း စိတ်ချစေနိုင်သည်။ ကြင်နာသောစကားလုံးများက ဖျားနာသူများကို ရွှင်ပျလာစေနိုင်သည်။ ထိုထက်ကား နားထောင်လိုသူအားလုံးကို တန်ခိုးပါသော ဘုရားသခင့်နိုင်ငံတော်သတင်းဟောပြောရန် ကျွန်ုပ်တို့၏လျှာကို အသုံးပြုနိုင်သည်။ ဘုရားသခင်၏နှုတ်မြွက်စကားတော်တွင် ကျွန်ုပ်တို့၏နှလုံးရောက်နေမည်ဆိုလျှင် ယင်းကို ကြွေးကြော်နိုင်သည့်စွမ်းအား ကျွန်ုပ်တို့တွင်ရှိမည်ဖြစ်သည်။ သမ္မာကျမ်းစာက ဤသို့ဆိုသည်– “ကျေးဇူးကိုခံသင့်သောသူတို့အား ကျေးဇူးပြုရသောအခွင့် [“စွမ်းအား၊” ကဘ] ရှိလျှင် မပြုဘဲမနေနှင့်။”—သု. ၃:၂၇။
တန်ခိုးကို တော်မှန်စွာအသုံးပြုခြင်း
၁၆၊ ၁၇။ အကြီးအကဲများ၊ မိဘများ၊ လင်သားများနှင့် ဇနီးသည်ဖြစ်သူများသည် ဘုရားသခင်ပေးသည့် အခွင့်အာဏာကို အသုံးပြုရာတွင် ယေဟောဝါအား မည်သို့တုပနိုင်သနည်း။
၁၆ ယေဟောဝါသည် အကြီးမြင့်ဆုံးတန်ခိုးရှင်ဖြစ်သော်လည်း အသင်းတော်ကို မေတ္တာဖြင့် အုပ်စိုးတော်မူသည်။ (၁ ယောဟန် ၄:၈) ခရစ်ယာန်ကြီးကြပ်မှူးတို့သည် ကိုယ်တော်အားတုပကြပြီး သူတို့၏အခွင့်အာဏာကို အလွဲသုံးခြင်းမဟုတ်သော အသုံးပြုခြင်းဖြင့် ဘုရားသခင်၏သိုးတော်စုကို မေတ္တာဖြင့် စောင့်ရှောက်ပေးသည်။ ကြီးကြပ်မှူးတို့သည် ရံဖန်ရံခါ ‘အပြစ်တင်ဆုံးမပေးခြင်း၊ အပြစ်ဖော်ပြဆုံးမခြင်းနှင့် တိုက်တွန်းခြင်း’ တို့ပြုရန်လိုသည်မှန်သော်လည်း ယင်းကို ‘ခပ်သိမ်းသောစိတ်ရှည်ခြင်းနှင့် သွန်သင်ခြင်းအတတ်ပညာတို့ဖြင့်’ ပြုလုပ်ကြသည်။ (၂ တိမောသေ ၄:၂၊ ကဘ) ထို့ကြောင့် အကြီးအကဲများသည် အသင်းတော်တွင် အခွင့်အာဏာရှိသူများထံ တမန်တော်ပေတရုရေးသားသည့် ဤစကားများကို မပြတ်ဆင်ခြင်စဉ်းစားကြသည်– “သင်တို့နှင့်အတူရှိသောဘုရားသခင်၏သိုးတော်စုကို ထိန်းခြင်းအမှုမှာ၊ အနိုင်ထိန်းရသောကြောင့်မဟုတ်၊ မစင်ကြယ်သောစီးပွားကို တပ်မက်သောကြောင့်မဟုတ်ဘဲ၊ အလိုလိုစေတနာစိတ်ရှိ၍ ကြည့်ရှုအုပ်ထိန်းကြလော့။ အသီးအသီးအုပ်သောအသင်းတော်တို့ကို အာဏာထား၍ အစိုးတရပြုသည်မဟုတ်ဘဲ၊ သိုးတော်စုရှေ့မှာ ပုံသက်သေကိုပြသောသူဖြစ်ကြလော့။”—၁ ပေတရု ၅:၂၊ ၃; ၁ သက်သာလောနိတ် ၂:၇၊ ၈။
၁၇ မိဘများနှင့် လင်သားများကို ယေဟောဝါက အခွင့်အာဏာပေးထားရာ ဤအာဏာတန်ခိုးကို သူတို့သည် အကူအညီပေးရေး၊ ပြုစုပျိုးထောင်ရေးနှင့် ယုယမြတ်နိုးရေးတို့အတွက် အသုံးပြုသင့်သည်။ (ဧဖက် ၅:၂၂၊ ၂၈-၃၀; ၆:၄) အခွင့်အာဏာကို မေတ္တာပါသောနည်းလမ်းဖြင့် အကျိုးရှိရှိအသုံးပြုနိုင်ကြောင်း ယေရှု၏စံနမူနာကပြသသည်။ ဆုံးမပဲ့ပြင်မှုသည် မျှတမှုရှိပြီး တစ်သမတ်တည်းဖြစ်လျှင် သားသမီးတို့သည် စိတ်ပျက်အားလျော့ကြမည်မဟုတ်ပေ။ (ကောလောသဲ ၃:၂၁) ခရစ်ယာန်လင်သားများသည် မေတ္တာရှေ့ထားဦးဆောင်ဦးရွက်ပြုပြီး ဇနီးသည်များကလည်း မိမိအား ဘုရားသခင်ပေးထားသည့် လုပ်ပိုင်ခွင့် သို့မဟုတ် ရပိုင်ခွင့်နယ်ပယ်ကို မကျော်ဘဲ လင်သား၏ဦးစီးမှုကို နက်ရှိုင်းစွာလေးစားမှုပြသောအခါ အိမ်ထောင်ရေးသည် ခိုင်မြဲသည်။—ဧဖက် ၅:၂၈၊ ၃၃; ၁ ပေတရု ၃:၇။
၁၈။ (က) ကျွန်ုပ်တို့၏အမျက်ဒေါသကိုထိန်းချုပ်ရာတွင် ယေဟောဝါ၏စံနမူနာတော်ကို မည်သို့တုပသင့်သနည်း။ (ခ) အခွင့်အာဏာရှိသူများသည် မိမိတို့ဂရုစိုက်စောင့်ရှောက်ရသူများတွင် အဘယ်အရာသက်ဝင်စေရန် ကြိုးစားသင့်သနည်း။
၁၈ မိသားစုနှင့် အသင်းတော်တွင် အခွင့်အာဏာရှိသူများသည် မိမိ၏အမျက်ဒေါသကိုထိန်းချုပ်ရန် အထူးဂရုစိုက်သင့်သည်၊ အကြောင်းမှာ အမျက်ဒေါသသည် မေတ္တာမသက်ဝင်စေဘဲ ကြောက်ရွံ့စိတ်ဝင်စေ၏။ ပရောဖက်နာဟုံက ဤသို့ဆိုသည်– “ထာဝရဘုရားသည် စိတ်ရှည်တော်မူ၏။ တန်ခိုးလည်းကြီးတော်မူ၏။” (နာဟုံ ၁:၃; ကောလောသဲ ၃:၁၉) မိမိတို့၏အမျက်ဒေါသကို ထိန်းချုပ်ခြင်းသည် ခွန်အားရှိခြင်း၏အမှတ်လက္ခဏာဖြစ်သည်၊ အမျက်ထွက်ခြင်းမူကား ပျော့ညံ့မှု၏လက္ခဏာဖြစ်သည်။ (သု. ၁၆:၃၂) မိသားစုတွင်ကော အသင်းတော်တွင်ပါ ယေဟောဝါကိုချစ်သည့်မေတ္တာ၊ တစ်ဦးအပေါ်တစ်ဦးချစ်သည့်မေတ္တာနှင့် မှန်ကန်သောမူများကိုမြတ်နိုးစိတ် သက်ဝင်စေရန် ပန်းတိုင်ထားကြရမည်။ မေတ္တာသည် အခိုင်မာဆုံးနှောင်ကြိုးနှင့် မှန်ရာကိုပြုလုပ်ရန် အပြင်းပြဆုံးလှုံ့ဆော်အားပေးမှုဖြစ်သည်။—၁ ကောရိန္သု ၁၃:၈၊ ၁၃; ကောလောသဲ ၃:၁၄။
၁၉။ အဘယ်စိတ်သက်သာစေသော အာမခံချက်ကို ယေဟောဝါပေးထားတော်မူပြီး ကျွန်ုပ်တို့မည်သို့တုံ့ပြန်သင့်သနည်း။
၁၉ ယေဟောဝါကို သိကျွမ်းခြင်းဟူသည် ကိုယ်တော်၏တန်ခိုးတော်ကို အသိအမှတ်ပြုခြင်းဖြစ်သည်။ ဟေရှာယမှတစ်ဆင့် ယေဟောဝါက ဤသို့မိန့်တော်မူသည်– “ထာဝရဘုရားသည် အစဉ်အမြဲတည်တော်မူသော ဘုရားသခင်ဖြစ်ကြောင်းကိုလည်းကောင်း၊ မြေကြီးစွန်းတိုင်အောင် ဖန်ဆင်းတော်မူသောအရှင်ဖြစ်ကြောင်းကိုလည်းကောင်း၊ မောတော်မူခြင်း၊ ပင်ပန်းတော်မူခြင်းမရှိ၊ စစ်၍မကုန်နိုင်သောဉာဏ်နှင့် ပြည့်စုံတော်မူကြောင်းကိုလည်းကောင်း သင်သည်မသိမကြားဖူးသလော။” (ဟေရှာယ ၄၀:၂၈) ယေဟောဝါ၏တန်ခိုးတော်သည် မကုန်ခန်းနိုင်ပေ။ ကျွန်ုပ်တို့သည် ကိုယ့်ကိုယ်ကိုအားမကိုးဘဲ ယေဟောဝါကို အားကိုးမည်ဆိုလျှင် ကိုယ်တော်သည် ကျွန်ုပ်တို့ကို ပစ်ထားမည်မဟုတ်။ ကိုယ်တော်က ဤသို့အာမခံထားသည်– “ငါသည် သင့်ဘက်မှာရှိ၏။ မကြောက်နှင့်။ သင်၏ဘုရားသခင်ငါသည် သင့်ကိုခိုင်ခံ့စေမည်။ သင့်ကိုစောင့်မမည်။ ငါ့လက်ယာလက်ဖြင့်ထောက်ပင့်မည်။” (ဟေရှာယ ၄၁:၁၀) ကိုယ်တော်၏မေတ္တာပါသော ဂရုစိုက်မှုကို ကျွန်ုပ်တို့မည်သို့တုံ့ပြန်သင့်သနည်း။ ယေရှုကဲ့သို့ပင် ကျွန်ုပ်တို့ကိုယေဟောဝါပေးသည့် မည်သည့် တန်ခိုးစွမ်းအားကိုမဆို အကူအညီပေးရန်၊ တည်ဆောက်ပေးရန်အတွက် အမြဲအသုံးပြုကြပါစို့။ ကျွန်ုပ်တို့၏လျှာကို ထိန်းချုပ်ခြင်းအားဖြင့် ထိခိုက်မှုမဖြစ်စေဘဲ ကုစားမှုဖြစ်ပါလေစေ။ ထို့အပြင် ကျွန်ုပ်တို့သည် ဝိညာဉ်ရေးဘက် အမြဲပင်နိုးကြားကာ ယုံကြည်ခြင်းတွင် ခိုင်မြဲပြီး မြင့်မြတ်တော်မူသော ဖန်ဆင်းရှင်ယေဟောဝါဘုရားသခင်၏တန်ခိုးဖြင့် ခွန်အားကြီးနိုင်ကြပါစေ။—၁ ကောရိန္သု ၁၆:၁၃။
[အောက်ခြေမှတ်ချက်များ]
^ အပိုဒ်၊ 9 ဂျူးများသည် လွန်ခဲ့သောရာစုနှစ်များစွာက ဗိမာန်တော်တွင်အပ်ထားသည့် မောရှေ၏ပညတ္တိကျမ်းမူရင်းကို တွေ့ရှိခဲ့ကြောင်းထင်ရှားသည်။
သင်ရှင်းပြနိုင်သလော
• ယေဟောဝါသည် မိမိ၏တန်ခိုးတော်ကို မည်သို့အသုံးပြုတော်မူသနည်း။
• အဘယ်နည်းများဖြင့် ယေဟောဝါ၏တန်ခိုးတော်ကို ကျွန်ုပ်တို့ရယူနိုင်သနည်း။
• လျှာ၏အစွမ်းတန်ခိုးကို မည်သို့အသုံးပြုသင့်သနည်း။
• ဘုရားသခင်ပေးသည့်အခွင့်အာဏာသည် ကောင်းချီးတစ်ရပ် မည်သို့ဖြစ်နိုင်သနည်း။
[လေ့လာရန်မေးခွန်းများ]
[စာမျက်နှာ ၁၅ ပါ ရုပ်ပုံ]
ယေရှုသည် အခြားသူများကိုကူညီရန် ယေဟောဝါ၏ ခွန်အားကို အသုံးပြုတော်မူခဲ့
[စာမျက်နှာ ၁၇ ပါ ရုပ်ပုံ]
ဘုရားသခင်၏နှုတ်မြွက်စကားတော်သာ ကျွန်ုပ်တို့နှလုံးထဲတွင်ရှိနေလျှင် ဘုရားသခင့်နှုတ်မြွက်စကားတော်ကို ကြွေးကြော်နိုင်သည့်အစွမ်း ကျွန်ုပ်တို့တွင် ရှိမည်