“ကိုယ်တော်၏အချိန် မစေ့မရောက်သေး”
“ကိုယ်တော်၏အချိန် မစေ့မရောက်သေး”
“ကိုယ်တော်၏အချိန် မစေ့မရောက်သေးသောကြောင့် အဘယ်သူမျှမဖမ်းမဆီးကြ။”—ယောဟန် ၇:၃၀။
၁။ အဘယ်အကြောင်းရင်းနှစ်ခုက ယေရှု၏လုပ်ဆောင်မှုအစီအစဉ်ကို ထိန်းချုပ်ခဲ့သနည်း။
ယေရှုခရစ်က “လူသားသည် သူတစ်ပါးကိုစေစားခြင်းငှာမလာ၊ သူတစ်ပါးအစေကိုခံခြင်းငှာလည်းကောင်း၊ မိမိအသက်ကိုစွန့်၍ လူများကိုရွေးခြင်းငှာလည်းကောင်း ကြွလာသည်” ဟူ၍မိမိ၏တမန်တော်များကို မိန့်တော်မူခဲ့၏။ (မဿဲ ၂၀:၂၇၊ ၂၈) ရောမဘုရင်ခံ ပုန္တိပိလတ်ကို ကိုယ်တော်ဤသို့ဆိုခဲ့သည်– “[အမှန်] တရားဘက်၌သက်သေခံခြင်းငှာ ငါသည်မွေးဖွားခြင်းကိုခံ၍ ဤလောကသို့ကြွလာပြီ။” (ယောဟန် ၁၈:၃၇) ယေရှုသည် မိမိအဘယ်အတွက် အသေခံရမည်ဖြစ်ကြောင်းနှင့် မသေဆုံးမီ အဘယ်လုပ်ငန်းကို မိမိလုပ်ဆောင်ဖို့လိုကြောင်း သိထားတော်မူ၏။ မိမိ၏တာဝန်ကို အချိန်မည်မျှကြာကြာ ထမ်းဆောင်ရမည်ကိုလည်း ကိုယ်တော်သိတော်မူ၏။ မေရှိယအဖြစ် ကမ္ဘာပေါ်တွင်ကိုယ်တော်၏အမှုဆောင်ချိန်မှာ သုံးနှစ်ခွဲသာကြာဖို့ဖြစ်သည်။ ထိုအမှုဆောင်ချိန်သည် ကြိုတင်ဟောထားသော ၇၀ ခုမြောက် ပုံဆောင်သီတင်းပတ်၏အစ (စီ.အီး. ၂၉ ၌) ယော်ဒန်မြစ်တွင် ရေနှစ်ခြင်းခံခြင်းဖြင့်စခဲ့ပြီး ထိုသီတင်းပတ်အလယ်ပိုင်း (စီ.အီး. ၃၃ ၌) ညှဉ်းဆဲရာနှက်တိုင်ပေါ်သေဆုံးခြင်းဖြင့် ကုန်ဆုံးခဲ့သည်။ (ဒံယေလ ၉:၂၄-၂၇; မဿဲ ၃:၁၆၊ ၁၇; ၂၀:၁၇-၁၉) ထို့ကြောင့် ယေရှု၏ မြေကြီးပေါ်လုပ်ဆောင်မှုအစီအစဉ်တစ်ရပ်လုံးကို အကြောင်းရင်းနှစ်ခုက အဓိက ထိန်းချုပ်ခဲ့သည်– ကိုယ်တော်ကြွလာရသည့်ရည်ရွယ်ချက်နှင့် အသင့်တော်ဆုံးအချိန်ကိုရွေးခြင်းဖြစ်သည်။
၂။ ခရစ်ဝင်ကျမ်းများတွင် ယေရှုခရစ်ကို မည်သို့ပုံဖော်ခဲ့သနည်း၊ မိမိ၏တာဝန်ကိုသိရှိကြောင်း ကိုယ်တော်မည်သို့တင်ပြခဲ့သနည်း။
၂ ခရစ်ဝင်ကျမ်းမှတ်တမ်းများက ယေရှုခရစ်ကို ပါလက်စတိုင်းအနှံ့ ခရီးဆန့်ကာ ဘုရားသခင့်နိုင်ငံတော်သတင်းကောင်းကိုကြေညာလျက် တန်ခိုးကြီးသောအမှုများပြုလုပ်ခဲ့သည့် တက်ကြွစွာလှုပ်ရှားသူအဖြစ် ရေးသားဖော်ပြခဲ့ကြသည်။ ယေရှု၏ အစောပိုင်း အင်တိုက်အားတိုက် အမှုဆောင်ချိန်အတောအတွင်း ကိုယ်တော်နှင့်ပတ်သက်၍ဤသို့ဆို၏– “ကိုယ်တော်၏အချိန် မစေ့မရောက်သေး။” ယေရှုကိုယ်တော်တိုင်က “ငါ့အချိန်မပြည့်စုံသေး” ဟုမိန့်ဆိုခဲ့သည်။ မိမိ၏အမှုဆောင်ချိန်ပြီးဆုံးခါနီးတွင် “အချိန်ရောက်လာပြီ” ဟူသောအသုံးအနှုန်းကို ကိုယ်တော်အသုံးပြုခဲ့သည်။ (ယောဟန် ၇:၉၊ ၃၀; ၁၂:၂၃) ကိုယ်တော်၏ယဇ်သကာသေခြင်းအပါအဝင် ကိုယ်တော်ရထားသည့် အလုပ်တာဝန်အတွက် အချိန်နာရီနှင့်ပတ်သက်ပြီး ယေရှုသိရှိထားမှုက ကိုယ်တော်မိန့်ဆို၊ လုပ်ဆောင်ခဲ့ရာတို့ကို အကျိုးသက်ရောက်မှုရှိရမည်။ ယင်းကို သိနားလည်ထားခြင်းက ကိုယ်တော်၏ကိုယ်ရည်ကိုယ်သွေးနှင့် စဉ်းစားတွေးခေါ်ပုံတို့ကို ထိုးထွင်းသိမြင်နိုင်ပြီး ‘ခြေရာကို’ ပို၍နီးကပ်စွာ “လျှောက်လိုက်” ရန် အထောက်အကူရနိုင်သည်။—၁ ပေတရု ၂:၂၁။
ဘုရားသခင့်အလိုတော်ကိုဆောင်ရွက်ဖို့ စိတ်ပိုင်းဖြတ်ထား
၃၊ ၄။ (က) ကာနရွာရှိ မင်္ဂလာပွဲတွင် အဘယ်အရာဖြစ်ပျက်သနည်း။ (ခ) ဘုရားသခင်၏သားတော်သည် စပျစ်ရည်မလောက်မငဖြစ်သွား၍ တစ်စုံတစ်ရာပြုလုပ်သင့်သည်ဟူသော မာရိ၏အကြံပေးချက်ကို အဘယ်ကြောင့်ကန့်ကွက်ခဲ့သနည်း၊ ယင်းမှ ကျွန်ုပ်တို့ အဘယ်သင်ခန်းစာရနိုင်သနည်း။
၃ အချိန်ကား စီ.အီး. ၂၉ ဖြစ်သည်။ ယေရှုသည် တပည့်ဦးများကို ကိုယ်တိုင်ရွေးချယ်ပြီးသည်မှာ ရက်အနည်းငယ်သာရှိသေးသည်။ ယခုသူတို့အားလုံး မင်္ဂလာပွဲတစ်ခုကိုတက်ရောက်ဖို့ ဂါလိလဲခရိုင်ရှိ ကာနရွာသို့လာကြသည်။ ယေရှု၏မိခင်မာရိလည်း ထိုတွင်ရှိနေသည်။ စပျစ်ရည်မလောက်မငဖြစ်လာသည်။ ကိုယ်တော်တစ်စုံတစ်ရာပြုလုပ်သင့်သည်ဟုယူဆလျက် မာရိက ‘သူတို့၌စပျစ်ရည်မရှိ’ ဟု သားဖြစ်သူကိုပြောလေ၏။ သို့သော် ယေရှုကဤသို့ဖြေကြားသည်– “အချင်းမိန်းမ၊ သင်သည် ငါနှင့်အဘယ်သို့ဆိုင်သနည်း။ ငါ့အချိန်မရောက်သေး။”—ယောဟန် ၁:၃၅-၅၁; ၂:၁-၄။
၄ “အချင်းမိန်းမ၊ သင်သည် ငါနှင့်အဘယ်သို့ဆိုင်သနည်း” ဟူသော ယေရှု၏တုံ့ပြန်မှုသည် အကြံပေး သို့မဟုတ် အဆိုပြုသည့်အရာကို ကန့်ကွက်ကြောင်းဖော်ပြသည့် ရှေးခေတ်မေးခွန်းပုံစံတစ်မျိုးဖြစ်သည်။ မာရိ၏စကားကို ယေရှုအဘယ်ကြောင့်ကန့်ကွက်ရသနည်း။ မှန်ပါသည်၊ ယခုကိုယ်တော့်အသက် ၃၀ ရှိပြီ။ လွန်ခဲ့သည့်သီတင်းပတ်အနည်းငယ်ကပင် ကိုယ်တော်နှစ်ခြင်းယူခဲ့ပြီး သန့်ရှင်းသောဝိညာဉ်တော်ဖြင့် ဘိသိက်ပေးခံရကာ “ဤလောက၏အပြစ်ကိုဆောင်သွားသော ဘုရားသခင်၏သိုးသငယ်” အဖြစ် နှစ်ခြင်းဆရာယောဟန်က မိတ်ဆက်ပေးခဲ့သည်။ (ယောဟန် ၁:၂၉-၃၄; လုကာ ၃:၂၁-၂၃) ယခု ကိုယ်တော်အား ညွှန်ကြားချက်သည် စေလွှတ်ရှင် အမြင့်မြတ်ဆုံးအာဏာပိုင်ထံမှသာ လာရမည်။ (၁ ကောရိန္သု ၁၁:၃) ယေရှုမြေကြီးပေါ် ကြွလာကာ လုပ်ဆောင်ရမည့်အလုပ်ကို ဆွေမျိုးအရင်းခေါက်ခေါက်ပင်ဖြစ်ပါစေ မည်သူတစ်ဦးတစ်ယောက်ကိုမျှ ဝင်စွက်ခွင့်မပြုနိုင်ပါ။ မာရိကိုအဖြေပေးရာ၌ ခမည်းတော်၏အလိုတော်ကိုဆောင်ရန်ဟူသော မိမိ၏စိတ်ပိုင်းဖြတ်ချက်ကို ယေရှုဖော်ပြခဲ့သည်! ကျွန်ုပ်တို့လည်း ဘုရားသခင်ထံ မိမိတို့၏ ‘ရှိသမျှတာဝန်’ ကိုကျေပွန်ရန် အလားတူစိတ်ပိုင်းဖြတ်နိုင်ကြပါစေ။—ဒေ. ၁၂:၁၃။
၅။ ယေရှုခရစ်သည် ကာနတွင် အဘယ်အံ့ဖွယ်အမှုပြုတော်မူသနည်း၊ ၎င်းက အခြားသူများအပေါ် အဘယ်အကျိုးသက်ရောက်သနည်း။
၅ သားဖြစ်သူ၏ဆိုလိုချက်ကို သဘောပေါက်လျက် မာရိသည် ချက်ချင်းစကားရုပ်သိမ်းလိုက်ပြီး အစေခံတို့အား “သူခိုင်းသမျှကိုပြုကြလော့” ဟူ၍ ညွှန်ကြားလေသည်။ ထို့နောက် ယေရှုသည် ၎င်းအခက်အခဲကိုဖြေရှင်းခဲ့သည်။ ကိုယ်တော်သည် အိုးစရည်းများကိုရေဖြည့်ရန် အစေခံများကိုခိုင်းစေလိုက်ပြီး ရေကို အကောင်းဆုံးစပျစ်ရည်ဖြစ်စေသည်။ ယင်းသည် ကိုယ်တော်အပေါ်၌ ဘုရားသခင့်ဝိညာဉ်တော်ရှိကြောင်း အရိပ်ပြသည့် ယေရှု၏အံ့ဖွယ်တန်ခိုးလုပ်ဆောင်မှုနိဒါန်းဖြစ်သည်။ ဤအံ့ဖွယ်အမှုကို တပည့်သစ်များမြင်တွေ့ကြသောအခါ သူတို့၏ယုံကြည်ခြင်းခိုင်ခံ့လာလေသည်။—ယောဟန် ၂:၅-၁၁။
ယေဟောဝါ၏အိမ်တော်အတွက် စိတ်အားထက်သန်ခြင်း
၆။ ယေရှုသည် ယေရုရှလင်မြို့ရှိ ဝတ်ပြုရာအိမ်တော်၌ တွေ့မြင်ရသည့်အရာကို အဘယ်ကြောင့် ခံပြင်းဒေါသထွက်သနည်း၊ ကိုယ်တော်အဘယ်သို့ အရေးယူလုပ်ဆောင်သနည်း။
၆ မကြာမီ စီ.အီး. ၃၀ နွေဦးရာသီရောက်လာပြီး ယေရှုနှင့် ကိုယ်တော်၏အပေါင်းပါတို့သည် ပသခါပွဲဆင်နွှဲရန် ယေရုရှလင်မြို့သို့သွားနေကြသည်။ ယေရုရှလင်မြို့တွင် ယခင်ကမိမိတို့တစ်ခါမျှ တွေ့မြင်ဖူးဟန်မတူသောနည်းဖြင့် မိမိတို့ခေါင်းဆောင်ပြုမူနေသည်ကို တပည့်တော်များတွေ့မြင်ကြသည်။ လောဘကြီးသော ဂျူးကုန်သည်များသည် ယဇ်ပူဇော်ဖို့တိရစ္ဆာန်များနှင့် ငှက်များကို ဗိမာန်တော်အတွင်းတွင်ပင် ရောင်းချနေကြသည်။ သူတို့သည် သစ္စာရှိဝတ်ပြုသူ ဂျူးများကို မတန်တဆဈေးတင်ရောင်းနေကြသည်။ ယေရှုသည် ခံပြင်းဒေါသထွက်ကာ တက်ကြွစွာအရေးယူလုပ်ဆောင်လေသည်။ ကြိုးမြွားနှင်တံပြုလုပ်ပြီးလျှင် ရောင်းချသူတို့ကို ပြင်သို့နှင်ထုတ်တော်မူ၏။ ငွေကြေးလဲလှယ်သူတို့၏ ဒ င်္ဂါးများကိုသွန်ချ၍ သူတို့စားပွဲများကိုလည်း မှောက်လှန်ပစ်တော်မူ၏။ “ဤဥစ္စာကိုယူသွားကြ” ဟူ၍ ချိုးငှက်ရောင်းသူတို့အားမိန့်တော်မူ၏။ ဤသို့စိတ်အားထက်သန်စွာ ယေရှုပြုတော်မူသည်ကို တပည့်တော်များတွေ့မြင်ကြသောအခါ “ကိုယ်တော်၏အိမ်တော်၌ စွဲလမ်းပူပန်ခြင်းစိတ် [“စိတ်စေတနာထက်သန်ခြင်း၊” ကဘ] သည် အကျွန်ုပ်ကိုစားပါ၏” ဟူသော ဘုရားသခင့်သားတော်နှင့်ပတ်သက်သော ပရောဖက်ပြုချက်ကို သတိရကြ၏။ (ယောဟန် ၂:၁၃-၁၇; ဆာလံ ၆၉:၉) ကျွန်ုပ်တို့လည်း လောကလိုအင်ဆန္ဒများက ကျွန်ုပ်တို့၏ဝတ်ပြုကိုးကွယ်မှုကို ညစ်ညမ်းစေရန် ခွင့်မပြုမိဖို့ စိတ်အားထက်သန်စွာ သတိပြုရှောင်ရှားရပေမည်။
၇။ (က) မေရှိယထံသွားရန် နိကောဒင်အား အဘယ်အရာကလှုံ့ဆော်ပေးသနည်း။ (ခ) ရှမာရိအမျိုးသမီးတစ်ဦးကို ယေရှုသက်သေခံခြင်းမှ ကျွန်ုပ်တို့အဘယ်အရာသင်ယူရသနည်း။
၇ ယေရုရှလင်မြို့၌ရှိစဉ် ယေရှုသည် အံ့ဖွယ်နိမိတ်လက္ခဏာများပြုတော်မူရာ များစွာသောသူတို့သည် ကိုယ်တော်၌ယုံကြည်လာကြသည်။ ဆဲန်ဟီဒရင်ခေါ် ဂျူးအထက်တရားရုံးအဖွဲ့ဝင်တစ်ဦးဖြစ်သူ နိကောဒင်ပင်လျှင် ယေရှုကိုစိတ်စွဲမှတ်သွားရာ ပို၍သိရှိဖို့ ကိုယ်တော်ထံ ညအချိန်လာလေသည်။ ထို့နောက် ယေရှုနှင့်တပည့်တော်များသည် “ယုဒပြည်၏ကျေးလက်” များတွင် ရှစ်လမျှနေထိုင်ကာ ဟောပြော၍ တပည့်ဖြစ်စေကြ၏။ သို့သော် နှစ်ခြင်းဆရာယောဟန် အကျဉ်းချခံရပြီးနောက် သူတို့သည် ယုဒပြည်မှထွက်၍ ဂါလိလဲသို့သွားကြ၏။ ရှမာရိနယ်ကိုဖြတ်သွားကြစဉ် ယေရှုသည် အခွင့်အရေးကို အမိအရယူကာ ရှမာရိအမျိုးသမီးတစ်ဦးကို စေ့စေ့စပ်စပ်သက်သေခံလေ၏။ ယင်းက များစွာသောရှမာရိလူတို့ ယုံကြည်သူများဖြစ်လာရန် လမ်းဖွင့်ပေးသည်။ ကျွန်ုပ်တို့လည်း ဘုရားသခင့်နိုင်ငံတော်အကြောင်း အခွင့်အရေးယူပြောဆိုဖို့ နိုးကြားနေကြပါစို့။—ယောဟန် ၂:၂၃; ၃:၁-၂၂; ၄:၁-၄၂; မာကု ၁:၁၄။
ဂါလိလဲနယ်တွင် ကျယ်ကျယ်ပြန့်ပြန့်သွန်သင်ခြင်း
၈။ ယေရှုသည် ဂါလိလဲနယ်တွင် အဘယ်လုပ်ငန်းကို အစပြုလုပ်ဆောင်သနည်း။
၈ ယေရှုသေဆုံးသည့် “အချိန်” မရောက်မီ ကိုယ်တော်၌ ကောင်းကင်ခမည်းတော်၏အမှုတော်ကို ဆောင်ရွက်စရာများစွာရှိသည်။ ယေရှုသည် သာ၍ကြီးမားသောအမှုဆောင်ခြင်းကို ယုဒပြည်နှင့် ယေရုရှလင်မြို့မှာထက် ဂါလိလဲနယ်တွင်စတင်လေသည်။ ကိုယ်တော်သည် “တရားဇရပ်တို့၌ ဆုံးမ [စကား] ပေးလျက်၊ [ဘုရားသခင့်] နိုင်ငံတော်နှင့်ယှဉ်သော ဧဝံဂေလိတရားကိုဟောလျက်၊ လူတို့တွင် အနာရောဂါအမျိုးမျိုးတို့ကို ငြိမ်းစေလျက်၊ ဂါလိလဲပြည်တစ်ပြည်လုံးကို . . . လှည့်လည်တော်မူ၏။” (မဿဲ ၄:၂၃) “နောင်တရကြလော့။ ကောင်းကင်နိုင်ငံတော်သည် တည်လုနီးပြီ” ဟူသော ကိုယ်တော်၏ အားမာန်အပြည့်ပါသည့်စကားသံများသည် ဂါလိလဲနယ်တစ်ခွင်လုံး ရိုက်ခတ်သွားခဲ့သည်။ (မဿဲ ၄:၁၇) လအနည်းငယ်အတွင်း နှစ်ခြင်းဆရာယောဟန်၏ တပည့်နှစ်ဦးသည် ယေရှုအကြောင်း ကိုယ်တွေ့မှတ်တမ်းယူဖို့ လာကြသောအခါ ကိုယ်တော်ဤသို့ဆိုသည်– “သင်တို့သည် ကြားရသမျှ၊ မြင်ရသမျှတို့ကို သွား၍ ယောဟန်အားကြားလျှောက်ကြလော့။ မျက်စိကန်းသောသူတို့သည် မျက်စိမြင်ရကြ၏။ ခြေမစွမ်းသောသူတို့သည် လှမ်းသွားရကြ၏။ နူနာစွဲသောသူတို့သည် သန့်ရှင်းခြင်းသို့ရောက်ရကြ၏။ နားပင်းသောသူတို့သည် နားကြားရကြ၏၊ သေသောသူတို့သည် ထမြောက်ခြင်းသို့ရောက်ရကြ၏။ ဆင်းရဲသားတို့သည်လည်း ဝမ်းမြောက်စရာသတင်းကိုကြားရကြ၏။ ငါ့ကြောင့်စိတ်မပျက်သောသူသည် မင်္ဂလာရှိ၏ဟု ပြန်ပြောတော်မူ၏။”—လုကာ ၇:၂၂၊ ၂၃။
၉။ ယေရှုခရစ်ထံသို့ အဘယ်ကြောင့် အုပ်လိုက်လာရောက်ကြသနည်း၊ ဤအချက်မှ အဘယ်သင်ခန်းစာ ထုတ်ယူနိုင်သနည်း။
၉ ‘ယေရှုနှင့်ပတ်သက်သော သတင်းတော်သည် ပတ်ဝန်းကျင်အရပ်တို့၌ အနှံ့အပြားကျော်စော’ ၍ဂါလိလဲပြည်၊ ဒေကာပေါလိပြည်၊ ယေရုရှလင်မြို့၊ ယုဒပြည်နှင့် ယော်ဒန်မြစ်တစ်ဖက်ကမ်းတို့မှ ကိုယ်တော်ထံသို့ အုပ်လိုက်ရောက်ရှိလာကြသည်။ (လုကာ ၄:၁၄၊ ၁၅; မဿဲ ၄:၂၄၊ ၂၅) သူတို့သည် ကိုယ်တော်၏အံ့ဖွယ်ကုသမှုများကြောင့်သာမကဘဲ အံ့ဖွယ်ကောင်းသည့်သွန်သင်ချက်များကြောင့်ပါ ကိုယ်တော်ထံလာကြခြင်းဖြစ်သည်။ ကိုယ်တော်၏သတင်းသည် စိတ်ဝင်စားဖွယ်ကောင်းပြီး အားတက်စေသည်။ (မဿဲ ၅:၁–၇:၂၇) ကိုယ်တော်၏စကားများသည် တင့်တယ်လျောက်ပတ်၍ နှစ်လိုဖွယ်ဖြစ်သည်။ (လုကာ ၄:၂၂) ကိုယ်တော်သည် ကျမ်းစာထဲမှ အခွင့်အာဏာရှိရှိဖြင့်ဟောတော်မူသောကြောင့် ပရိသတ်တို့သည် ‘ကိုယ်တော်၏သွန်သင်ပုံကို လွန်စွာအံ့သြကြကုန်၏။’ (မဿဲ ၇:၂၈၊ ၂၉; လုကာ ၄:၃၂) ထိုသို့သောပုဂ္ဂိုလ်တစ်ဦးထံ မည်သူဆွဲဆောင်မခံရဘဲနေမည်နည်း။ စိတ်နှလုံးရိုးဖြောင့်သူများ အမှန်တရားသို့ ဆွဲဆောင်ခံရမည်အကြောင်း ကျွန်ုပ်တို့လည်း သွန်သင်ခြင်းအတတ်ပညာကို ပြုစုပျိုးထောင်နိုင်ပါစေ။
၁၀။ နာဇရက်မြို့သားများသည် ယေရှုကိုသတ်ပစ်ဖို့ အဘယ်ကြောင့်ကြိုးပမ်းကြသနည်း၊ သူတို့အဘယ်ကြောင့် မအောင်မြင်သနည်း။
၁၀ သို့သော် ယေရှုအား ကြားနာသူအားလုံး ခံယူတတ်သူများမဟုတ်ကြပါ။ အစောပိုင်းအမှုဆောင်ချိန်တွင်ပင် မိမိ၏နေရင်းမြို့ဖြစ်သည့် နာဇရက်မြို့ တရားဇရပ်၌သွန်သင်သောအခါ ကိုယ်တော်ကိုသတ်ဖို့ကြိုးစားကြသည်။ မြို့သားများသည် ကိုယ်တော်၏ “တင့်တယ်လျောက်ပတ်သော နှုတ်ထွက်စကား” ကိုအံ့သြကြသော်လည်း အံ့ဖွယ်အမှုများကို သူတို့မြင်တွေ့လိုကြသည်။ သို့သော် ယေရှုသည် တန်ခိုးကြီးသောအမှုများစွာကို ထိုမြို့တွင်ပြုလုပ်မည့်အစား သူတို့၏အတ္တဆန်မှုနှင့် ယုံကြည်ခြင်းကင်းမဲ့မှုကို ဖော်ထုတ်ပြခဲ့သည်။ တရားဇရပ်၌ရှိသူအပေါင်းတို့သည် ဒေါသအမျက်ထွက်လျက် ယေရှုကိုကိုင်ဖမ်းကာ တောင်စောင်းမှ ဇောက်ထိုးတွန်းချပစ်ဖို့ ခေါ်ဆောင်သွားကြသည်။ သို့သော် ကိုယ်တော်သည် သူတို့လက်မှလွတ်၍ ဘေးကင်းစွာကြွသွားတော်မူ၏။ ကိုယ်တော်သေဆုံးရမည့် “အချိန်” မရောက်သေးပါ။—လုကာ ၄:၁၆-၃၀။
၁၁။ (က) ဘာသာရေးခေါင်းဆောင်အချို့သည် ယေရှုထံလာ၍ အဘယ်ကြောင့်နားထောင်ကြသနည်း။ (ခ) ယေရှုဥပုသ်ချိုးဖောက်သည်ဟု အဘယ်ကြောင့်စွပ်စွဲခံရသနည်း။
၁၁ ယေရှုဟောပြောရာသို့ ဘာသာရေးခေါင်းဆောင်များ—ကျမ်းတတ်များ၊ ဖာရိရှဲများ၊ ဇဒ္ဒုကဲများနှင့် အခြားသူများ—လည်းလာလေ့ရှိကြသည်။ သူတို့အထဲမှ များစွာသောသူတို့မှာ နားထောင်၍ သင်ယူဖို့မဟုတ်ဘဲ အမှားရှာ၍ ကိုယ်တော်အား ထောင်ချောက်ဆင်ရန် ကြိုးပမ်းလျက် ထိုတွင်ရောက်နေကြသည်။ (မဿဲ ၁၂:၃၈; ၁၆:၁; လုကာ ၅:၁၇; ၆:၁၊ ၂) သာဓကအနေနှင့် စီ.အီး. ၃၁၊ ပသခါပွဲအတွက် ယေရုရှလင်မြို့သို့ ကိုယ်တော်လည်ပတ်စဉ် ၃၈ နှစ်တိုင် ဖျားနာသူတစ်ဦးကို ကုသပေးသည်။ ဥပုသ်ချိုးဖောက်သည်ဟု ဂျူးဘာသာရေးခေါင်းဆောင်တို့က ယေရှုအားစွပ်စွဲကြသည်။ ကိုယ်တော်က “ငါ့ခမည်းတော်သည် ယခုတိုင်အောင်အလုပ်လုပ်တော်မူသည်ဖြစ်၍၊ ငါသည်လည်းလုပ်၏“ ဟုဖြေကြားသည်။ ယခု ကိုယ်တော်သည် ဘုရားသခင်အား ခမည်းတော်ဟုခေါ်ဆိုခြင်းဖြင့် မိမိကိုယ်ကို ဘုရားသခင့်သားတော်ဟုဆိုခြင်းအတွက် ဘုရားသခင်ကိုစော်ကားသည်ဟု ဂျူးတို့ကစွပ်စွဲကြ၏။ ယေရှုကိုသတ်ရန်ကြံစည်ကြ၏၊ သို့သော် ကိုယ်တော်နှင့် တပည့်တော်များသည် ယေရုရှလင်မြို့မှထွက်၍ ဂါလိလဲသို့သွားကြ၏။ ထိုနည်းတူ ဘုရားသခင့်နိုင်ငံတော်ဟောပြောခြင်းနှင့် တပည့်ဖြစ်စေခြင်းလုပ်ငန်းအတွက် ကျွန်ုပ်တို့၏ခွန်အားကိုပေးဆက်ကြစဉ် ဆန့်ကျင်သူများနှင့် မလိုအပ်ဘဲ ထိပ်တိုက်ရင်ဆိုင်ခြင်းကို ရှောင်ရှားခြင်းသည် ပညာရှိရာကျ၏။—ယောဟန် ၅:၁-၁၈; ၆:၁။
၁၂။ ယေရှုသည် ဂါလိလဲနယ်တွင် မည်မျှကျယ်ပြန့်စွာ ခရီးပေါက်ခဲ့သနည်း။
၁၂ ယေရှုသည် နောက်ထပ်တစ်နှစ်ခွဲခန့် မိမိ၏အမှုဆောင်ခြင်းအများစုကို ဂါလိလဲနယ်၌ လုပ်ဆောင်ပြီး ဂျူးတို့၏နှစ်ပတ်လည်ပွဲသုံးခုကို တက်ရောက်ဖို့အတွက်သာ ယေရုရှလင်မြို့သို့ လာရောက်သည်။ ကိုယ်တော်သည် ဂါလိလဲနယ်တွင် စုစုပေါင်းသုံးကြိမ် လှည့်လည်ဟောပြောသည်– ပထမအကြိမ်တွင် တပည့်သစ် ၄ ဦးနှင့်၊ ဒုတိယအကြိမ်တွင် တမန်တော် ၁၂ ပါးနှင့်ဖြစ်ပြီး တိုးချဲ့ခရီးစဉ်တွင် စေလွှတ်ခံရသော လေ့ကျင့်ပြီးသားတမန်တော်များနှင့်အတူဖြစ်သည်။ ဂါလိလဲနယ်၌ အမှန်တရားကို ကျယ်ကျယ်ပြန့်ပြန့်သက်သေခံရခြင်းပါတကား!—မဿဲ ၄:၁၈-၂၅; လုကာ ၈:၁-၃; ၉:၁-၆။
ယုဒနှင့် ပေရိယနယ်တို့တွင် ရဲရင့်စွာသက်သေခံခြင်း
၁၃၊ ၁၄။ (က) ဂျူးတို့သည် အဘယ်အခါသမယတွင် ယေရှုကိုဖမ်းဆီးဖို့ ရှာကြံနေကြသနည်း။ (ခ) တပ်မှူးတို့သည် ယေရှုကိုဖမ်းဆီးဖို့ အဘယ်ကြောင့်ပျက်ကွက်ကြသနည်း။
၁၃ စီ.အီး. ၃၂ ဆောင်းဦးချိန်ဖြစ်ပြီး ယေရှု၏ “အချိန်” ရောက်မလာသေးပါ။ သကေနေပွဲခံချိန်နီးပြီ။ ယေရှု၏မိတူဖကွဲညီများက “ဤအရပ်မှထွက်၍ ယုဒပြည်သို့ကြွပါ” ဟုတိုက်တွန်းကြ၏။ သူတို့က ယေရှုကို ယေရုရှလင်မြို့ရှိ ပွဲတော်သို့စုရုံးလာသူများအား အံ့ဖွယ်တန်ခိုးများ ပြစေလိုကြသည်။ သို့ရာတွင် အန္တရာယ်ကို ယေရှုကြိုမြင်သည်။ ထို့ကြောင့် “ငါမသွားသေး၊ ငါ့အချိန်မပြည့်စုံသေး” ဟုညီများကိုပြောသည်။—ယောဟန် ၇:၁-၉။
၁၄ ယေရှုသည် ဂါလိလဲနယ်တွင် အတန်ကြာ အချိန်ဆွဲနေပြီး ယေရုရှလင်မြို့သို့ “မထင်မရှားကြွတော်မူ၏။” ဂျူးတို့က ‘ထိုသူသည် အဘယ်မှာရှိသနည်း’ ဟုဆိုလျက် ပွဲတော်၌ ကိုယ်တော်အား အမှန်ပင်ရှာဖွေနေကြသည်။ ပွဲတော်တစ်ဝက်တိုင်သောအခါ ယေရှုသည် ဝတ်ပြုရာအိမ်တော်သို့သွား၍ ရဲရင့်စွာစတင်သွန်သင်တော့သည်။ ဤတွင် ကိုယ်တော်ကိုထောင်သွင်းရန် သို့မဟုတ် သတ်ပစ်ရန်အကြံနှင့် ဖမ်းဆီးဖို့အခွင့်ရှာကြသည်။ သို့သော် “ကိုယ်တော်၏အချိန် မစေ့မရောက်သေး” သဖြင့် သူတို့မအောင်မြင်ကြပါ။ ယခု များစွာသောသူတို့သည် ယေရှုကိုယုံကြည်လာကြသည်။ ကိုယ်တော်အားဖမ်းဆီးရန် ဖာရိရှဲများစေလွှတ်လိုက်သော တပ်မှူးများက “ထိုသူဟောပြောသကဲ့သို့ အဘယ်သူမျှမဟောစဖူးပါ” ဟုဆိုလျက် လက်ချည်းသက်သက်ပြန်လာကြ၏။—ယောဟန် ၇:၉-၁၄၊ ၃၀-၄၆။
၁၅။ ဂျူးတို့သည် အဘယ်ကြောင့် ယေရှုကိုပစ်ဖို့ ကျောက်ခဲများကောက်ကြသနည်း၊ နောက်ထပ် အဘယ်ဟောပြောခြင်းကင်ပိန်းကို ကိုယ်တော်စတင်လုပ်ဆောင်သနည်း။
၁၅ ပွဲတော်အတွင်း ဝတ်ပြုရာအိမ်တော်၌ ကိုယ်တော်၏ခမည်းတော်အကြောင်းသွန်သင်နေစဉ် ယေရှုနှင့် အတိုက်အခံပြုသည့်ဂျူးများအကြား ပဋိပက္ခဆက်ဖြစ်နေသည်။ ပွဲတော်နောက်ဆုံးနေ့တွင် လူသားဘဝမတိုင်မီအသက်တာနှင့်ပတ်သက်သော ယေရှု၏ဖော်ပြချက်ကို ဂျူးများအမျက်ထွက်ကာ ကိုယ်တော့်ကိုပစ်ဖို့ ကျောက်ခဲများကိုကောက်ယူကြ၏။ သို့သော် ကိုယ်တော်တိမ်းရှောင်ကာ အနာတရမဖြစ်ဘဲလွတ်မြောက်သွားသည်။ (ယောဟန် ၈:၁၂-၅၉) ယေရှုသည် ယေရုရှလင်မြို့ပြင်၌နေထိုင်ကာ ယုဒပြည်တွင် သက်သေခံခြင်းကင်ပိန်းကို ကြပ်ကြပ်မတ်မတ်စတင် လုပ်ဆောင်တော်မူ၏။ တပည့်တော် ၇၀ ကိုရွေးချယ်၍ သွန်သင်ပေးပြီးနောက် ရပ်ကွက်သို့ နှစ်ယောက်တစ်တွဲစီစေလွှတ်လိုက်သည်။ သူတို့သည် ယေရှုနှင့်တမန်တော်များ သွားမည့်နေရာတိုင်း၊ မြို့တိုင်းသို့ ကြို၍သွားကြ၏။—လုကာ ၁၀:၁-၂၄။
၁၆။ အပ်နှံပွဲကျင်းပစဉ်အတွင်း အဘယ်အန္တရာယ်မှ ယေရှုလွတ်မြောက်ခဲ့ပြီး အဘယ်လုပ်ငန်းဖြင့် တစ်ဖန်အလုပ်များပြန်သနည်း။
၁၆ စီ.အီး. ၃၂ ဆောင်းဦးရာသီတွင် ယေရှု၏ “အချိန်” နီးကပ်လာသည်။ အပ်နှံပွဲအတွက် ယေရုရှလင်မြို့သို့ ကိုယ်တော်ကြွလာသည်။ ကိုယ်တော်ကိုသတ်ပစ်ဖို့ ဂျူးများရှာကြံနေဆဲပင်။ ဝတ်ပြုရာအိမ်တော်ကနားပြင်၌ ယေရှုလမ်းလျှောက်နေစဉ် ကိုယ်တော်ကိုဝိုင်းရံလိုက်ကြသည်။ ဘုရားသခင်ကိုစော်ကားသည်ဟု တစ်ဖန်စွပ်စွဲလျက် ကိုယ်တော်ကိုသတ်ရန် ကျောက်ခဲများကောက်ကြ၏။ သို့သော် ယခင်အကြိမ်မှာကဲ့သို့ ယေရှုလွတ်မြောက်သွားသည်။ မကြာမီ ကိုယ်တော်ခရီးထွက်ကာ ယုဒပြည်မှ ယော်ဒန်မြစ်တစ်ဖက် ပေရိယခရိုင်တွင် တစ်မြို့မှတစ်မြို့၊ တစ်ရွာမှတစ်ရွာ သွန်သင်လျက်ရှိသည်။ ကိုယ်တော်အား လူများစွာယုံကြည်လာကြသည်။ သို့ရာတွင် ကိုယ်တော်ချစ်မြတ်နိုးသောမိတ်ဆွေ လာဇရုနှင့်ပတ်သက်သောသတင်းက ယုဒပြည်သို့ပြန်ခေါ်နေသည်။—လုကာ ၁၃:၃၃; ယောဟန် ၁၀:၂၀-၄၂။
၁၇။ (က) ပေရိယနယ်၌ဟောပြောနေစဉ် အဘယ်အရေးပေါ်သတင်းကို ယေရှုရရှိသနည်း။ (ခ) ကိုယ်တော့်လုပ်ရပ်၏ရည်ရွယ်ချက်နှင့် ဖြစ်ရပ်များအတွက် အသင့်တော်ဆုံးအချိန်တို့ကို ယေရှုသိထားကြောင်း အဘယ်အရာကပြသနည်း။
၁၇ အရေးပေါ်သတင်းမှာ ယုဒပြည် ဗေသနိရွာ၌နေထိုင်သူ လာဇရု၏အစ်မ မာရိနှင့်မာသတို့ထံမှဖြစ်၏။ သတင်းပို့သူက “သခင်၊ ကိုယ်တော်ချစ်တော်မူသောသူသည် နာလျက်နေပါသည်” ဟုဆို၏။ ယေရှုက “ထိုအနာသည် သေနာမဟုတ်။ ဘုရားသခင်၏ဘုန်းတော်ကို ထင်ရှားစေသောအနာဖြစ်၏။ ထိုအနာကြောင့် ဘုရားသခင်၏သားတော်သည် ဘုန်းထင်ရှားခြင်းရှိလိမ့်မည်” ဟုမိန့်ဆိုသည်။ ၎င်းရည်ရွယ်ချက်ဖြစ်မြောက်ရန် ယေရှုသည် ထိုအရပ်၌တမင် နှစ်ရက်ဆက်နေသည်။ ထို့နောက် “ယုဒပြည်သို့ တစ်ဖန်သွားကြကုန်အံ့” ဟုတပည့်တော်များကိုဆို၏။ မယုံကြည်စွာဖြင့် “အရှင်ဘုရား၊ ယုဒလူတို့သည် ယခုပင် ကိုယ်တော်ကိုခဲနှင့်ပစ်ခြင်းငှာ ရှာကြံလျက်ပင် ထိုအရပ်သို့တစ်ဖန်ကြွတော်မူဦးမည်လော” ဟုသူတို့တုံ့ပြန်ကြသည်။ သို့သော် ကျန်ရှိသော “နေ့အချိန်” သို့မဟုတ် မြေကြီးအမှုဆောင်ခြင်းအတွက် ဘုရားသခင်ကန့်သတ်ထားချိန် တိုတောင်းသည်ကို ယေရှုသိထားသည်။ မိမိအဘယ်အရာကို အဘယ်ကြောင့်ပြုလုပ်ရမည်ဖြစ်ကြောင်း ကိုယ်တော်အတိအကျသိရှိထားသည်။—ယောဟန် ၁၁:၁-၁၀။
မည်သူမျှလျစ်လျူမရှုနိုင်သော အံ့ဖွယ်အမှုတစ်ခု
၁၈။ ဗေသနိရွာသို့ ယေရှုရောက်သောအခါ ထိုတွင်အဘယ်အခြေအနေရှိသနည်း၊ ကိုယ်တော်ရောက်ရှိပြီးနောက် အဘယ်အရာဖြစ်ပျက်သနည်း။
၁၈ ဗေသနိရွာတွင် ယေရှုကိုဦးဆုံးလာတွေ့သူ မာသက “သခင်၊ ကိုယ်တော်ရှိတော်မူလျှင် ကျွန်မ၏မောင်မသေပါ” ဟုဆို၏။ မာရိနှင့် သူတို့အိမ်၌ရောက်နေသူများ လိုက်လာကြသည်။ သူတို့အားလုံးငိုနေကြသည်။ “အလောင်းကိုအဘယ်မှာထားကြသနည်း” ဟုယေရှုမေးသည်။ “သခင် ကြွ၍ကြည့်တော်မူပါ” ဟုသူတို့ဖြေကြ၏။ အောက်မေ့ရာဂူ—အဝတွင် ကျောက်တုံးဖြင့်ပိတ်ထားသောဂူ—သို့ သူတို့ရောက်ကြသောအခါ ယေရှုက “ကျောက်ကို ရွှေ့ကြလော့” ဟုဆိုသည်။ ယေရှုအဘယ်အရာပြုမည်ကို နားမလည်၍ မာသက “သခင်၊ ယခုဖြစ်လျှင် နံလိမ့်မည်။ လေးရက်ရှိပါပြီ” ဟုကန့်ကွက်၏။ သို့သော် ယေရှုက “သင်သည်ယုံလျှင် ဘုရားသခင်၏ဘုန်း . . . တော်ကို မြင်ရလိမ့်မည်၊ ငါပြောပြီမဟုတ်လော” ဟုမေးတော်မူ၏။—ယောဟန် ၁၁:၁၇-၄၀။
၁၉။ လာဇရုကို မထမြောက်စေမီ လူအများရှေ့ ယေရှုအဘယ်ကြောင့် ဆုတောင်းသနည်း။
၁၉ လာဇရု၏သင်္ချိုင်းဂူအဝင်ဝတွင် ပိတ်ထားသောကျောက်တုံးကိုရွှေ့စဉ် ယေရှုသည် အသံကျယ်ကျယ်ဖြင့် ဆုတောင်းလေသည်၊ ယခုကိုယ်တော်ပြုတော့မည့်အမှုသည် ဘုရားသခင်၏တန်ခိုးတော်အားဖြင့်ဖြစ်ကြောင်း လူတို့ကိုသိစေဖို့ဖြစ်သည်။ ထို့နောက် အသံကျယ်စွာဖြင့် “လာဇရု ထွက်၍လာလော့” ဟုဟစ်ခေါ်သည်။ သူ၏ခြေလက်တို့သည် အဝတ်ဖြင့်ရစ်ပတ်လျက် မျက်နှာကိုလည်း ပဝါဖြင့်စည်းလျက်သား လာဇရုထွက်လာလေသည်။ ယေရှုက “သူ့ကိုဖြေ၍လွှတ်ကြလော့” ဟုမိန့်တော်မူ၏။—ယောဟန် ၁၁:၄၁-၄၄။
၂၀။ လာဇရုအား ယေရှုရှင်ပြန်ထမြောက်စေသည်ကို တွေ့မြင်သူများက မည်သို့တုံ့ပြန်ကြသနည်း။
၂၀ ဤအံ့ဖွယ်ရာကိုမြင်သောအခါ မာသနှင့် မာရိကိုနှစ်သိမ့်ရန် ရောက်နေကြသူ ဂျူးများစွာတို့သည် ယေရှုကို ယုံကြည်လာကြလေသည်။ အခြားသူများမူ ဖြစ်ပျက်သမျှကို ဖာရိရှဲများထံ သွားပြောပြကြသည်။ သူတို့၏တုံ့ပြန်မှုကော။ သူတို့နှင့်အတူ ယဇ်ပုရောဟိတ်အကြီးတို့သည် ချက်ချင်း ဆဲန်ဟီဒရင်တွင် အရေးပေါ်အစည်းအဝေးခေါ်လိုက်သည်။ မျက်ကလဲဆန်ပျာဖြစ်ကာ သူတို့ဤသို့ညည်းတွားကြသည်– “ငါတို့သည် အဘယ်သို့ပြုလျက်နေကြသနည်း။ ထိုသူသည် များစွာသောနိမိတ်လက္ခဏာတို့ကိုပြ၏။ သူ့ကိုဤသို့အလွတ်ထားလျှင် လူခပ်သိမ်းတို့သည် ယုံကြည်ကြလိမ့်မည်။ ရောမလူတို့သည်လည်းလာ၍ ငါတို့အရပ်ဌာနကိုလည်းကောင်း၊ ငါတို့အမျိုးကိုလည်းကောင်း သုတ်သင်ပယ်ရှင်းကြလိမ့်မည်။” သို့သော်ယဇ်ပုရောဟိတ်မင်းကယာဖက “သင်တို့သည် အလျှင်းမသိကြ။ ယုဒလူမျိုးအကုန်အစင်ပျက်စီးသည်ထက်၊ လူတစ်ယောက်သည် လူများတို့အတွက်သေသော် သာ၍ကောင်းသည်ကို သင်တို့သည်မဆင်ခြင်ပါတကား” ဟုသူတို့ကိုပြောသည်။ ထို့ကြောင့် ထိုနေ့မှစ၍ ယေရှုကိုသတ်ပစ်ရန် တိုင်ပင်ကြံစည်ကြ၏။—ယောဟန် ၁၁:၄၅-၅၃။
၂၁။ လာဇရုရှင်ပြန်ထမြောက်ခြင်းဆိုင်ရာ အံ့ဖွယ်အမှုသည် အဘယ်အရာ၏ရှေ့ပြေးနိမိတ်ဖြစ်သနည်း။
၂၁ ထိုသို့ယေရှုသည် ဗေသနိရွာသို့ နောက်ကျမှရောက်သွားခြင်းဖြင့် မည်သူမျှလျစ်လျူမရှုနိုင်သော အံ့ဖွယ်အမှုကို ပြုလုပ်နိုင်လေသည်။ လေးရက်ကြာသေနေသူတစ်ဦးကို ဘုရားသခင်ထံမှတန်ခိုးဖြင့် ယေရှုရှင်ပြန်ထမြောက်ပေးခဲ့သည်။ ဂုဏ်ရှိသောဆဲန်ဟီဒရင်ပင် သတိပြုမှတ်သားကာ အံ့ဖွယ်အမှုပြုသူအား သေဒဏ်စီရင်ဖို့ ဖိအားပေးခံရလေသည်! သို့ဖြင့် ၎င်းအံ့ဖွယ်အမှုသည် ယေရှု၏အမှုဆောင်ခြင်း၌ အရေးပါသောအလှည့်အပြောင်း၏ရှေ့ပြေးနိမိတ်—“ကိုယ်တော်၏အချိန် မစေ့မရောက်သေး” သောကာလမှ “အချိန်ရောက်လာ” သည့်ကာလသို့ ပြောင်းလဲခြင်းဖြစ်လေသည်။
သင်မည်သို့ဖြေဆိုမည်နည်း
• ယေရှုသည် ဘုရားသခင်ခန့်အပ်ထားသောအလုပ်ကို သိရှိထားကြောင်း မည်သို့တင်ပြခဲ့သနည်း။
• စပျစ်ရည်နှင့်ပတ်သက်သော မိခင်၏အကြံပေးချက်ကို ယေရှုအဘယ်ကြောင့်ကန့်ကွက်ခဲ့သနည်း။
• ဆန့်ကျင်သူများနှင့် ယေရှုဆက်ဆံလေ့ရှိပုံမှ ကျွန်ုပ်တို့အဘယ်အရာသင်ယူနိုင်သနည်း။
• လာဇရု၏ဖျားနာမှုကို တုံ့ပြန်ဆောင်ရွက်ရာ၌ ယေရှုအဘယ်ကြောင့် အချိန်ဆွဲထားသနည်း။
[လေ့လာရန်မေးခွန်းများ]
[စာမျက်နှာ ၁၂ ပါ ရုပ်ပုံ]
ယေရှုသည် ဘုရားသခင် ခန့်အပ်ထားသောတာဝန်၌ မိမိ၏ခွန်အားကို ပေးဆက်ခဲ့