ခရစ်ယာန်များ အမှုဆောင်ခြင်းတွင် ပျော်ရွှင်မှုရရှိကြ
ခရစ်ယာန်များ အမှုဆောင်ခြင်းတွင် ပျော်ရွှင်မှုရရှိကြ
“ခံယူခြင်းထက် ပေးကမ်းခြင်း၌ ပျော်ရွှင်မှုသာ၍ရှိ၏။”—တမန်တော် ၂၀:၃၅၊ ကဘ။
၁။ ယနေ့ အဘယ်မှားယွင်းသောသဘောထားကို နေရာအနှံ့တွေ့မြင်ရသနည်း၊ ယင်းသည် အဘယ်ကြောင့်ထိခိုက်စေသောအရာဖြစ်သနည်း။
၁၉၀၀ ပြည့်လွန်နှစ်များ၏ နောက်ဆုံးဆယ်စုနှစ်များအတွင်း “ကိုယ်သာပထမဝါဒ” ဟူသောစကားလုံးကို မကြာခဏကြားရလေ့ရှိ၏။ အမှန်မှာ “ကိုယ်သာပထမဝါဒ” ဟူသည် “မိမိသာပဓာန” ဟုဆိုလိုပြီး တစ်ကိုယ်ကောင်းဆန်ခြင်းနှင့် အခြားသူအရေးထည့်မစဉ်းစားသော လောဘကြီးခြင်းတို့ ပေါင်းစပ်ထားသည့်သဘောထားဟု အဓိပ္ပာယ်သက်ရောက်သည်။ ၂၀၀၀ ပြည့်နှစ်တွင် ကိုယ်သာပထမဝါဒသည် လုံးဝပျောက်သွားမည်မဟုတ်ကြောင်း ကျွန်ုပ်တို့သေချာစွာဆိုနိုင်ပါသည်။ “ဒီထဲမှာ ငါ့အတွက် ဘာအကျိုးရှိမလဲ” သို့မဟုတ် “ဒီကနေ ငါဘာအမြတ်ရမလဲ” ဟူသောမေးခွန်းများကို အကြိမ်မည်မျှသင်ကြားဖူးသနည်း။ ယင်းသို့သောတစ်ကိုယ်ကောင်းဆန်သည့်သဘောထားက ပျော်ရွှင်မှုကိုမဖြစ်စေပါ။ ၎င်းသည် ယေရှု ဤသို့မိန့်တော်မူခဲ့သောမူနှင့် လုံးဝဆန့်ကျင်သည်– “ခံယူခြင်းထက် ပေးကမ်းခြင်း၌ ပျော်ရွှင်မှုသာ၍ရှိ၏။”—တမန်တော် ၂၀:၃၅၊ ကဘ။
၂။ ပေးကမ်းခြင်းက ပျော်ရွှင်မှုကိုဖြစ်စေကြောင်း မည်သို့သိမြင်ရသနည်း။
၂ ရယူခြင်းထက် ပေးကမ်းခြင်းက သာ၍ပျော်ရွှင်စေသည်မှာ အမှန်လော။ အမှန်ပင်။ ယေဟောဝါဘုရားသခင်နှင့်ပတ်သက်၍ စဉ်းစားကြည့်ပါ။ ကိုယ်တော်ထံ၌ “အသက်စမ်းရေတွင်းရှိပါ၏။” (ဆာလံ ၃၆:၉) ကျွန်ုပ်တို့ပျော်ရွှင်၍ အကျိုးဖြစ်ထွန်းစေရန် ကျွန်ုပ်တို့လိုအပ်သမျှကို ကိုယ်တော်ထောက်ပံ့ပေးထားသည်။ အမှန်မှာ ကိုယ်တော်သည် “ကောင်းမြတ်စုံလင်သောဆုကျေးဇူးရှိသမျှတို့” ၏ရင်းမြစ်ဖြစ်သည်။ (ယာကုပ် ၁:၁၇) ယေဟောဝါ၊ “ပျော်ရွှင်သောဘုရားသခင်” သည် အမြဲပေးကမ်းနေတော်မူ၏။ (၁ တိမောသေ ၁:၁၁၊ ကဘ) ကိုယ်တော်သည် မိမိများစွာချပေးသနားတော်မူသော ဖန်ဆင်းထားရာလူသားများကို ချစ်တော်မူ၏။ (ယောဟန် ၃:၁၆) လူ့မိသားစုတစ်စုကိုလည်း သုံးသပ်ကြည့်ပါ။ သင်သည် မိဘတစ်ဦးဖြစ်လျှင် ကလေးတစ်ဦးကိုမွေးမြူပျိုးထောင်ရန် မည်မျှအနစ်နာခံပေးဆက်ရကြောင်း သင်သိပေသည်။ ၎င်းပြင် ထိုကလေးသည် သင်၏စွန့်လွှတ်အနစ်နာခံမှုများကို နှစ်ပေါင်းများစွာ မသိမှတ်ဘဲနေသည်။ ဤအရာအားလုံးအတွက် သူကျေးဇူးတင်ကြောင်းမပြပေ။ သို့တိုင် သင်၏တစ်ကိုယ်ကောင်းမဆန်သောပေးဆက်မှုကြောင့် သင့်ကလေးကြီးထွားသန်မာလာသည်ကို တွေ့မြင်ရခြင်းက သင့်အား ပျော်ရွှင်စေသည်။ အဘယ်ကြောင့်နည်း။ အကြောင်းမှာ သင် သူ့ကိုချစ်သောကြောင့်တည်း။
၃။ ယေဟောဝါနှင့် ကျွန်ုပ်တို့၏ယုံကြည်သူချင်းတို့အမှုကိုဆောင်ရခြင်းသည် အဘယ်ကြောင့်ဝမ်းမြောက်ဖွယ်ဖြစ်သနည်း။
၃ အလားတူပင် မေတ္တာပေါ်အခြေခံသောပေးကမ်းခြင်းဖြင့် စစ်မှန်သောဝတ်ပြုရေးကို သိသာထင်ရှားစေသည်။ ကျွန်ုပ်တို့သည် ယေဟောဝါနှင့် ကျွန်ုပ်တို့၏ယုံကြည်သူချင်းတို့ကို ချစ်ခင်သောကြောင့် သူတို့၏အစေခံရန်၊ သူတို့အတွက် မိမိကိုယ်ကို ဝမ်းပန်းတသာပေးဆက်ကြ၏။ (မဿဲ ၂၂:၃၇-၃၉) တစ်ကိုယ်ကောင်းဆန်သောရည်ရွယ်ချက်များဖြင့် ဝတ်ပြုကိုးကွယ်သူမည်သူမဆိုမှာ ပျော်ရွှင်မှုမရှိဘဲ ဇာတ်သိမ်းရသည်။ သို့သော် တစ်ကိုယ်ကောင်းမဆန်၊ မိမိတို့ရရန်မျှော်လင့်ခြင်းထက် မိမိတို့ပေးဆက်နိုင်ရာကို သာ၍အာရုံစိုက်အမှုဆောင်သူတို့သည် စစ်မှန်သောပျော်ရွှင်မှုရကြ၏။ ကျွန်ုပ်တို့၏ဝတ်ပြုရေးနှင့်ဆက်နွှယ်သည့် ကျမ်းစကားအချို့ ကျမ်းစာထဲတွင် အသုံးပြုထားပုံကို သုံးသပ်ကြည့်ခြင်းဖြင့် ဤအမှန်တရားကို ခွဲခြားသိမြင်နိုင်သည်။ ဤစကားလုံးများထဲမှ စကားလုံးသုံးလုံးကို ဤဆောင်းပါးနှင့် နောက်ဆောင်းပါးတွင် ကျွန်ုပ်တို့ဆွေးနွေးသွားကြမည်။
ယေရှု၏လူထုအမှုဆောင်ခြင်း
၄။ ခရစ်ယာန်ဘောင်တွင် “လူထုအမှုဆောင်ခြင်း” ၏ဝိသေသလက္ခဏာကားအဘယ်နည်း။
၄ မူလဂရိစကား၌ ဝတ်ပြုရေးနှင့်ပတ်သက်၍ အရေးကြီးသောစကားလုံးတစ်လုံးမှာ လီတိုယိအာဖြစ်သည်၊ ကမ္ဘာသစ်ဘာသာပြန်ကျမ်းတွင် ယင်းကို “လူထုအမှုဆောင်ခြင်း” ဟု ဘာသာပြန်ထားသည်။ ခရစ်ယာန်ဘောင်၌ လီတိုယိအာမှ “လစ်တာဂျီ ” ဟူသောစကားလုံး မွေးဖွားလာ၏။ * သို့သော် စည်းကမ်းသတ်မှတ်ထားသော ခရစ်ယာန်ဘောင်၏ဝတ်တက်နည်းများမှာ အမှန်တကယ်အကျိုးဖြစ်စေသည့် လူထုအမှုဆောင်ခြင်းမဟုတ်ချေ။
၅၊ ၆။ (က) ဣသရေလတို့တွင် အဘယ်လူထုအမှုဆောင်ခြင်းရှိခဲ့သနည်း၊ အဘယ်အကျိုးများရရှိသနည်း။ (ခ) ဣသရေလတို့တွင်ဆောင်ရွက်ခဲ့သောအရာကို အဘယ်သာ၍ကြီးကျယ်ခမ်းနားသော လူထုအမှုဆောင်ခြင်းနှင့် အစားထိုးခဲ့သနည်း၊ အဘယ်ကြောင့်နည်း။
၅ တမန်တော်ပေါလုသည် ဣသရေလယဇ်ပုရောဟိတ်များကို ရည်ညွှန်းသည့် လီတိုယိအာနှင့်ဆက်စပ်နေသော ဂရိစကားလုံးတစ်လုံးကို အသုံးပြုခဲ့သည်။ သူဤသို့ပြောခဲ့သည်– “ယဇ်ပုရောဟိတ်မည်သည်ကား၊ နေ့တိုင်းဝတ် [“လူထုအမှုဆောင်ခြင်း၊” ကဘ] ပြုလျက် [လစ်တိုယိအာ၏ပုံစံတစ်ခုဖြစ်] အပြစ်ကိုမဖြေနိုင်သောယဇ်ကို အထပ်ထပ်အဖန်ဖန်ပူဇော်လျက်ရပ်နေရ၏။” (ဟေဗြဲ ၁၀:၁၁) လေဝိယဇ်ပုရောဟိတ်များသည် ဣသရေလတို့တွင် အလွန်တန်ဖိုးရှိလှသော လူထုအမှုဆောင်ခြင်းကို သယ်ပိုးထမ်းရွက်ပေးခဲ့ကြသည်။ သူတို့သည် ဘုရားသခင့်ပညတ်တော်ကိုသွန်သင်ပို့ချပေး၍ လူတို့၏အပြစ်များကျေအေးစေသော ယဇ်သကာများကို ပူဇော်ပေးခဲ့ကြ၏။ (၂ ရာဇဝင်ချုပ် ၁၅:၃; မာလခိ ၂:၇) ယဇ်ပုရောဟိတ်များနှင့် ပြည်သူလူထုတို့သည် ယေဟောဝါ၏ပညတ်ကိုလိုက်လျှောက်ကြသောအခါ ထိုနိုင်ငံသည် ရွှင်လန်းစရာအကြောင်းများရှိခဲ့သည်။—တရားဟောရာ ၁၆:၁၅။
၆ ပညတ်တရားအောက်၌ လူထုအမှုဆောင်ခြင်းမှာ ဣသရေလယဇ်ပုရောဟိတ်များအတွက် တကယ့်အခွင့်ထူးတစ်ရပ်ဖြစ်ခဲ့၏၊ သို့သော် သစ္စာမဲ့မှုကြောင့် ဣသရေလလူမျိုးတို့ ငြင်းပယ်ခံခဲ့ရသောအခါ သူတို့၏အမှုဆောင်ခြင်းမှာ ဘာမျှအရာမထင်တော့ချေ။ (မဿဲ ၂၁:၄၃) ယေဟောဝါသည် သာ၍ကြီးကျယ်ခမ်းနားသောအမှုတစ်ခုဖြစ်သော မဟာယဇ်ပုရောဟိတ်မင်းကြီး၊ ယေရှုအားဖြင့် လူထုအမှုဆောင်ခြင်းကို စီစဉ်တော်မူခဲ့သည်။ ကိုယ်တော်နှင့်ပတ်သက်၍ ကျွန်ုပ်တို့ ဤသို့ဖတ်ရသည်– “ယေရှုမူကား၊ . . . ထာဝရတည်သောကြောင့် မပြောင်းမလဲသောယဇ်ပုရောဟိတ်အရာ၌ ခန့်ထားလျက်ရှိ၏။ ထိုကြောင့်၊ အကြင်သူတို့သည် ယေရှုအားဖြင့် ဘုရားသခင့်အထံတော်သို့ ချဉ်းကပ်ကြ၏။ ထိုသူတို့၏အမှုကို ကိုယ်တော်သည်စောင့်လျက်၊ ကာလအစဉ်အသက်ရှင်သောကြောင့် သူတို့ကိုအစဉ်ကယ်တင်ခြင်းငှာ တတ်နိုင်တော်မူ၏။”—ဟေဗြဲ ၇:၂၄၊ ၂၅။
၇။ ယေရှု၏လူထုအမှုဆောင်ခြင်းက အဘယ်ကြောင့်အနှိုင်းမဲ့အကျိုးကျေးဇူးများကို ရရှိစေသနည်း။
၇ ယေရှုသည် နောက်ဆက်ခံမည့်သူမရှိ၊ ထာဝရယဇ်ပုရောဟိတ်အဖြစ် အစဉ်တည်ရှိသွားသည်။ သို့ဖြစ်၍ ကိုယ်တော်သာလျှင် လူတို့ကို လုံးဝကယ်တင်နိုင်၏။ ဝတ်ပြုရေးအတွက် စီ.အီး. ၂၉ တွင်စတင်သက်ဝင်လှုပ်ရှားသည့် ယေဟောဝါ၏ကြီးမြတ်သောအစီအစဉ်ဖြစ်သည့် လူတို့လက်ဖြင့်လုပ်သော ဝတ်ပြုရာအိမ်တော်၌မဟုတ်ဘဲ ပုံဆောင်ဝတ်ပြုရာအိမ်တော်တွင် ထိုအနှိုင်းမဲ့လူထုအမှုဆောင်ခြင်းကို ကိုယ်တော် ဆောင်ကြဉ်းပေးတော်မူသည်။ ယခု ကိုယ်တော်သည် ထိုဝတ်ပြုရာအိမ်တော်၏အသန့်ရှင်းဆုံးအခန်းဖြစ်သော ကောင်းကင်တွင် အမှုတော်ထမ်းလျက်ရှိသည်။ ကိုယ်တော်သည် “လူမဆောက်ဘဲ ထာဝရဘုရားဆောက်တော်မူသော တဲတော်စစ်တည်းဟူသော၊ သန့်ရှင်းရာဌာန၌ ဘုရား [သခင်] ဝတ်ကိုပြုသောသူ [“လူထုအမှုဆောင်၊” ကဘ] [လစ်တိုဂိုးစ်] ဖြစ်တော်မူ၏။” (ဟေဗြဲ ၈:၂; ၉:၁၁၊ ၁၂) ယေရှုသည် အလွန်မြင့်မြတ်သောရာထူးရထားသော်ငြားလည်း ကိုယ်တော်သည် “လူထုအမှုဆောင်” ဖြစ်ဆဲပင်။ ကိုယ်တော်သည် မိမိ၏မြင့်မားသောအခွင့်အာဏာကို ရယူခြင်းအတွက်မဟုတ်ဘဲ ပေးကမ်းခြင်းအတွက် အသုံးပြုတော်မူသည်။ ၎င်းပြင် ထိုသို့သောပေးကမ်းခြင်းက ကိုယ်တော့်အားရွှင်လန်းစေ၏။ ယင်းသည် “မိမိရှေ့၌ထားသောဝမ်းမြောက်ခြင်း” ၏တစ်စိတ်တစ်ဒေသဖြစ်ပြီး မြေကြီးပေါ်ရှိကိုယ်တော်၏အသက်တာတစ်လျှောက်တွင် ကိုယ်တော်အားခံနိုင်ရည်ရှိရန် ၎င်းက ခွန်အားရှိစေခဲ့၏။—ဟေဗြဲ ၁၂:၂။
၈။ ပညတ်ပဋိညာဉ်ကိုအစားထိုးပစ်ရန် လူထုအမှုဆောင်ခြင်းတစ်ရပ်ကို ယေရှုမည်သို့လုပ်ဆောင်ခဲ့သနည်း။
၈ ယေရှု၏လူထုအမှုဆောင်ခြင်းနှင့်ပတ်သက်သည့် အခြားကဏ္ဍတစ်ခုရှိ၏။ ပေါလု ဤသို့ရေးသားခဲ့သည်– “ယေရှုသည် သာ၍မြတ်သောကတိတော်တို့၌တည်သော၊ သာ၍မြတ်သောပဋိညာဉ်တရား၏ အာမခံဖြစ်သည်နှင့်အညီ၊ သာ၍မြတ်သောဝတ်ပြုခြင်း [“လူထုအမှုဆောင်ခြင်း၊” ကဘ] အခွင့်အရာကို ရတော်မူ၏။” (ဟေဗြဲ ၈:၆) မောရှေသည် ယေဟောဝါနှင့် ဣသရေလလူမျိုးတို့၏ဆက်ဆံရေးအခြေခံဖြစ်သည့် ပဋိညာဉ်ကို ကြားဝင်စေ့စပ်ပေးခဲ့သည်။ (ထွက်မြောက်ရာ ၁၉:၄၊ ၅) ယေရှုသည် များစွာသောလူမျိုးတို့မှ ဝိညာဉ်တော်ဖွားဘိသိက်ခံခရစ်ယာန်များဖြင့် ဖွဲ့စည်းထားသည့် “ဘုရားသခင်၏ဣသရေလအမျိုး၊” လူမျိုးသစ်ကိုဖွားမြင်စေနိုင်ခဲ့သော ပဋိညာဉ်သစ်ကို ကြားဝင်စေ့စပ်ပေးခဲ့၏။ (ဂလာတိ ၆:၁၆; ဟေဗြဲ ၈:၈၊ ၉၊ ၁၃; ဗျာဒိတ် ၅:၉၊ ၁၀) ယင်းသည် အထူးကောင်းမွန်သော လူထုအမှုဆောင်ခြင်းတစ်ရပ်ပေတည်း! ကိုယ်တော်မှတစ်ဆင့် ယေဟောဝါနှစ်သက်လက်ခံစေသော ဝတ်ပြုကိုးကွယ်မှုကို ကျွန်ုပ်တို့ပေးဆက်နိုင်သည့် လူထုအမှုဆောင်ဖြစ်သော ယေရှုနှင့် ကျွန်ုပ်တို့သိကျွမ်းခွင့်ရခြင်းမှာ အလွန်ပျော်ရွှင်ကြည်နူးစရာပေ!—ယောဟန် ၁၄:၆။
ခရစ်ယာန်များလည်း လူထုအမှုဆောင်ကြ
၉၊ ၁၀။ ခရစ်ယာန်များဆောင်ရွက်ခဲ့ကြသော လူထုအမှုဆောင်ခြင်း၏အမျိုးအစားအချို့ကား အဘယ်နည်း။
၉ အဘယ်လူသား၏ လူထုအမှုဆောင်ခြင်းမျှ ယေရှု၏လူထုအမှုဆောင်ခြင်းလောက် ချီးမြှောက်ခံရခြင်းမရှိပါ။ သို့သော် ဘိသိက်ခံခရစ်ယာန်များသည် မိမိတို့၏ကောင်းကင်ဆုကျေးဇူးကို လက်ခံရရှိကြသောအခါ ယေရှု၏နံဘေးတွင် သူတို့နေရာရကာ ကောင်းကင်ရှင်ဘုရင်များနှင့် ယဇ်ပုရောဟိတ်များအဖြစ် ကိုယ်တော်၏လူထုအမှုဆောင်ခြင်း၌ ပါဝင်ကြသည်။ (ဗျာဒိတ် ၂၀:၆; ၂၂:၁-၅) ထို့ပြင် မြေကြီးပေါ်ရှိခရစ်ယာန်များသည် လူထုအမှုဆောင်ခြင်းကို မဖြစ်မနေလုပ်ဆောင်ကြပြီး ထိုသို့ပြုလုပ်ရာ၌ သူတို့များစွာရွှင်လန်းဝမ်းမြောက်ကြ၏။ ဥပမာ၊ ပါလက်စတိုင်း၌ အငတ်ဘေးဆိုက်နေသောအခါ ယုဒနယ်ရှိ ဂျူးခရစ်ယာန်များ၏ ဘေးသင့်မှုမှသက်သာရာရစေရန် ဥရောပရှိညီအစ်ကိုများထံမှ တမန်တော်ပေါလုက အလှူပစ္စည်းများကို သယ်ပို့ပေးခဲ့သည်။ ယင်းသည် လူထုအမှုဆောင်ခြင်းတစ်ရပ်ဖြစ်သည်။ (ရောမ ၁၅:၂၇; ၂ ကောရိန္သု ၉:၁၂) ယနေ့ ခရစ်ယာန်များသည် အလားတူ အမှုဆောင်ခြင်းကို ပျော်ရွှင်ကြရာ မိမိတို့၏ညီအစ်ကိုများ ဆင်းရဲထိခိုက်မှု၊ သဘာဝဘေးဒဏ်များ သို့မဟုတ် အခြားကပ်ဘေးများသင့်သောအခါ ချက်ချင်းထောက်ပံ့ကူညီပေးကြ၏။—သု. ၁၄:၂၁။
၁၀ ပေါလုက ဤသို့ရေးသားသောအခါ သူသည် နောက်ထပ်လူထုအမှုဆောင်ခြင်းတစ်မျိုးကို ရည်ညွှန်းခြင်းဖြစ်သည်– “သင်တို့ဝတ် [“လူထုအမှုဆောင်ခြင်း၊” ကဘ] ပြု၍ပူဇော်ရာယုံကြည်ခြင်းအပေါ်တွင် သွန်းလောင်းရာအဖြစ် ပူဇော်ခံရလျှင် ငါသည် ဝမ်းမြောက်လျက် သင်တို့နှင့်အတူ ရွှင်လန်းမည်။” (ဖိလိပ္ပိ ၂:၁၇၊ သမ) ဖိလိပ္ပိအသင်းတော်သားများ၏ အကျိုးအလို့ငှာ ပေါလုကြိုးစားပမ်းစာလုပ်ဆောင်မှုသည် မေတ္တာနှင့် ဇွဲလုံ့လဖြင့်လုပ်ဆောင်ပေးသော လူထုအမှုဆောင်ခြင်းတစ်ရပ်ဖြစ်ခဲ့သည်။ ယနေ့ အလားတူ လူထုအမှုဆောင်ခြင်းတစ်ရပ်ကို အထူးသဖြင့် “သစ္စာနှင့်သတိပညာရှိသောကျွန်” အဖြစ်ထမ်းဆောင်နေကြသည့် ဘိသိက်ခံခရစ်ယာန်များက ဆောင်ရွက်ပေးနေကြပြီး အခန့်သင့်အချိန်၌ ဝိညာဉ်အစာကိုထောက်ပံ့ပေးလျက်ရှိသည်။ (မဿဲ ၂၄:၄၅-၄၇၊ သမ) ထိုမျှမက အုပ်စုလိုက်အနေဖြင့် ဤသူတို့သည် “သန့်ရှင်းသောယဇ်ပုရောဟိတ်မျိုး” ဖြစ်ကြပြီး “ယေရှုခရစ်အားဖြင့် ဘုရားသခင်နှစ်သက်တော်မူရာဓမ္မယဇ်ကို ပူဇော်” ရန်နှင့် “[သူတို့ကို] မှောင်မိုက်ထဲမှ အံ့ဖွယ်သောအလင်းတော်သို့ ခေါ်သွင်းတော်မူသောသူ၏ဂုဏ်ကျေးဇူးများကို ဖော်ပြ” ရန် တာဝန်အပ်နှင်းခံရကြသည်။ (၁ ပေတရု ၂:၅၊ ၉) ပေါလုကဲ့သို့ပင် မိမိ၏တာဝန်များကိုဖြည့်စွမ်းရာ၌ ‘သူတို့ကိုယ်နှိုက်သွန်းလောင်းခံရ’ လျှင်ပင် ထိုအခွင့်ထူးများတွင် သူတို့ဝမ်းမြောက်ကြသည်။ ထို့ပြင် သူတို့၏အပေါင်းပါများဖြစ်သော “အခြားသိုး” သည် သူတို့နှင့်အတူပူးပေါင်း၍ ယေဟောဝါနှင့် ကိုယ်တော်၏ရည်ရွယ်တော်မူချက်များကို လူအပေါင်းတို့အား ပြောပြခြင်းလုပ်ငန်း၌ပံ့ပိုးပေးကြသည်။ * (ယောဟန် ၁၀:၁၆; မဿဲ ၂၄:၁၄) အလွန်ခမ်းနားကြီးကျယ်၍ ရွှင်လန်းဖွယ်ရာ လူထုအမှုဆောင်ခြင်းတစ်ရပ်ပေတည်း!—ဆာလံ ၁၀၇:၂၁၊ ၂၂။
မြင့်မြတ်သောအမှုဆောင်ခြင်း၌ ပေးဆက်ကြ
၁၁။ ပရောဖက်မအန္နသည် ခရစ်ယာန်အားလုံးအတွက် ပုံသက်သေကောင်းကို မည်သို့ထားခဲ့သနည်း။
၁၁ ကျွန်ုပ်တို့၏ဝတ်ပြုရေးနှင့်ပတ်သက်သည့် နောက်ဂရိစကားလုံးတစ်လုံးဖြစ်သော လာထရီအာကို ကမ္ဘာသစ်ဘာသာပြန်ကျမ်း၌ “မြင့်မြတ်သောအမှုဆောင်ခြင်း” ဟုဘာသာပြန်ထားသည်။ မြင့်မြတ်သောအမှုဆောင်ခြင်းမှာ ဝတ်ပြုကိုးကွယ်မှုဆိုင်ရာ အပြုအမူများနှင့်ပတ်သက်သည်။ ဥပမာ၊ အသက် ၈၄ နှစ်အရွယ်ရှိ မုဆိုးမဖြစ်သောပရောဖက်မအန္နသည် “ဆုတောင်းခြင်းနှင့်အစာရှောင်ခြင်းအားဖြင့် နေ့ညမပြတ်ဘုရားဝတ် [“မြင့်မြတ်သောအမှုဆောင်ခြင်း၊” ကဘ] [လာထရီအာဟုဖော်ပြသောဂရိစကားလုံး] ကိုပြု၍ [ဝတ်ပြုရာအိမ်တော်] နှင့်မခွာဘဲနေ၏” ဟုဖော်ပြထားသည်။ (လုကာ ၂:၃၆၊ ၃၇) အန္နသည် ယေဟောဝါကို တောက်လျှောက်ဝတ်ပြုကိုးကွယ်ခဲ့၏။ သူသည် ကြီးငယ်မဟူ၊ ကျား၊ မ မရွေး ကျွန်ုပ်တို့အားလုံးအတွက် ပုံသက်သေကောင်းသူတစ်ဦးဖြစ်သည်။ ဝတ်ပြုရာအိမ်တော်၌ အန္နသည် ယေဟောဝါထံဆုတောင်းခြင်းနှင့် ဝတ်ပြုကိုးကွယ်ခြင်းကိုမှန်မှန်ပြုသကဲ့သို့ ကျွန်ုပ်တို့၏မြင့်မြတ်သောအမှုဆောင်ခြင်းတွင်လည်း ဆုတောင်းခြင်းနှင့် စည်းဝေးမှန်မှန်တက်ရောက်ခြင်းတို့ ပါဝင်သည်။—ရောမ ၁၂:၁၂; ဟေဗြဲ ၁၀:၂၄၊ ၂၅။
၁၂။ ကျွန်ုပ်တို့၏ မြင့်မြတ်သောအမှုဆောင်ခြင်း၏ အဓိကကဏ္ဍတစ်ခုကားအဘယ်နည်း၊ ယင်းသည်လည်း အဘယ်ကြောင့် လူထုအမှုဆောင်ခြင်းဖြစ်သနည်း။
၁၂ တမန်တော်ပေါလုက ဤသို့ရေးသားခဲ့ရာ၌ ကျွန်ုပ်တို့၏မြင့်မြတ်သောအမှုဆောင်ခြင်း၏ အဓိကကဏ္ဍတစ်ခုကို ဖော်ပြပေးခဲ့သည်– “ငါသည် သင်တို့ကို မခြားမလပ်အောက်မေ့၍ အစဉ်မပြတ်ဆုတောင်း . . . သည်ဟု သားတော်၏ဧဝံဂေလိတရားကိုဟောလျက်၊ အမှုတော် [“မြင့်မြတ်သောအမှုဆောင်ခြင်း၊” ကဘ] ကို စိတ်ဝိညာဉ်နှင့်တကွငါဆောင်ရွက်၍ ငါကိုးကွယ်သောဘုရားသခင်သည် ငါ၏သက်သေခံဖြစ်တော်မူ၏။” (ရောမ ၁:၉) မှန်ပါသည်၊ သတင်းကောင်းဟောပြောခြင်းသည် ယင်းကို ကြားနာသောသူတို့ထံ လူထုအမှုဆောင်ခြင်းတစ်ရပ်မျှသာမဟုတ်ဘဲ ယေဟောဝါအား ဝတ်ပြုကိုးကွယ်ခြင်း၏ အပြုအမူတစ်ရပ်လည်းဖြစ်သည်။ ကျွန်ုပ်တို့သည် တုံ့ပြန်မှုကောင်းရသည်ဖြစ်စေ၊ မရသည်ဖြစ်စေ ဟောပြောခြင်းလုပ်ငန်းသည် ယေဟောဝါထံသို့ပေးဆက်ကြသည့် မြင့်မြတ်သောအမှုဆောင်ခြင်းဖြစ်၏။ ကျွန်ုပ်တို့ချစ်မြတ်နိုးကြသည့် ကောင်းကင်ခမည်းတော်၏ အထူးကောင်းမွန်သောအရည်အသွေးများနှင့် အကျိုးဖြစ်ထွန်းစေသည့်ရည်ရွယ်တော်မူချက်များကို အခြားသူတို့အားပြောပြရန် ကျွန်ုပ်တို့ကြိုးစားအားထုတ်နေခြင်းက အမှန်ပင်ကြီးမြတ်သောရွှင်လန်းမှုကို ဖြစ်စေသည်တကား!—ဆာလံ ၇၁:၂၃။
မည်သည့်နေရာတွင် မြင့်မြတ်သောအမှုကို ကျွန်ုပ်တို့ ထမ်းရွက်ကြသနည်း
၁၃။ ယေဟောဝါ၏ဝိညာဉ်ရေးဆိုင်ရာ ဝတ်ပြုရာအိမ်တော်ရှိအတွင်းရင်ပြင်၌ မြင့်မြတ်သောအမှုဆောင်ခြင်းကို ပြုကြသူတို့အတွက် မျှော်လင့်ချက်ကားအဘယ်နည်း၊ သူတို့နှင့်အတူ မည်သူတို့ဝမ်းမြောက်ရွှင်လန်းကြသနည်း။
၁၃ ဘိသိက်ခံခရစ်ယာန်များသို့ ပေါလုဤသို့ရေးသားခဲ့သည်– “ငါတို့သည် မလှုပ်နိုင်သောနိုင်ငံကိုရသည်ဖြစ်၍၊ ခန့်ညားကြောက်ရွံ့သောသဘောနှင့် နှစ်သက်တော်မူဖွယ်ဝတ် [“မြင့်မြတ်သောအမှုဆောင်ခြင်း၊” ကဘ] ကို ဘုရားသခင်အားပြုနိုင်ကြမည်အကြောင်း၊ ကျေးဇူးတော်ကိုစွဲလမ်းကြကုန်အံ့။” (ဟေဗြဲ ၁၂:၂၈၊ သမ္မာ) ဘိသိက်ခံတို့သည် ဘုရားသခင့်နိုင်ငံတော်ကို အမွေခံရမည်အကြောင်း စိတ်ချရသည့်မျှော်လင့်ချက်နှင့်အတူ အကြီးမြတ်ဆုံးအရှင်ကို ဝတ်ပြုကိုးကွယ်ကြစဉ် ယုံကြည်ခြင်း၌ မရွေ့လျော့မတိမ်းယိမ်းဘဲရှိနေကြသည်။ ယေဟောဝါ၏ဝိညာဉ်ရေးဆိုင်ရာ ဝတ်ပြုရာအိမ်တော်ရှိ သန့်ရှင်းရာအခန်းနှင့် အတွင်းရင်ပြင်တို့၌သာ ကိုယ်တော်အတွက် မြင့်မြတ်သောအမှုဆောင်ခြင်းကိုပေးဆက်နိုင်ကြသေးရာ အသန့်ရှင်းဆုံးအခန်းဖြစ်သောကောင်းကင်၌ ယေရှုနှင့်အတူအမှုဆောင်ရန် မျှော်လင့်တကြီးဖြင့် သူတို့စောင့်မျှော်ကြ၏။ သူတို့၏အပေါင်းပါများဖြစ်ကြသော အခြားသိုးအတန်းအစားမှာ သူတို့၏အံ့ချီးဖွယ်မျှော်လင့်ချက်၌ ထိုသူတို့နှင့်အတူဝမ်းမြောက်ရွှင်လန်းကြသည်။—ဟေဗြဲ ၆:၁၉၊ ၂၀; ၁၀:၁၉-၂၂။
၁၄။ ယေရှု၏လူထုအမှုဆောင်ခြင်းမှ လူအုပ်ကြီးသည် မည်သို့အကျိုးကျေးဇူးရရှိကြသနည်း။
၁၄ သို့သော် အခြားသိုးများအတွက်ကော အသို့နည်း။ တမန်တော်ယောဟန် ကြိုတင်မြင်တွေ့ခဲ့သကဲ့သို့ ဤနောက်ဆုံးကာလတွင် သူတို့ထဲမှ လူအုပ်ကြီးပေါ်ထွက်လာ၍ “သူတို့သည် . . . မိမိတို့ဝတ်လုံကို သိုးသငယ်၏အသွေး၌လျှော်၍ဖြူစေသောသူဖြစ်ကြသတည်း။” (ဗျာဒိတ် ၇:၁၄) ဆိုလိုသည်မှာ သူတို့၏အပေါင်းပါများဖြစ်ကြသောဘိသိက်ခံခရစ်ယာန်များကဲ့သို့ ယေရှု၏လူထုအမှုဆောင်ခြင်း၊ လူသားထုအကျိုးအတွက် ကိုယ်တော်၏စုံလင်သောလူ့အသက်တာကို ပူဇော်ခြင်းတို့၌ သူတို့ယုံကြည်ကြောင်းတင်ပြခြင်းဖြစ်သည်။ အခြားသိုးတို့သည် “[ယေဟောဝါ၏] ပဋိညာဉ်ကို စွဲလမ်းသောသူ” ဖြစ်ကြသောကြောင့် သူတို့သည် ယေရှု၏လူထုအမှုဆောင်ခြင်းမှ အကျိုးကျေးဇူးကိုလည်းရရှိကြသည်။ (ဟေရှာယ ၅၆:၆) မှန်ပါသည်၊ သူတို့သည် ပဋိညာဉ်သစ်တွင်ပါဝင်ကြသူများမဟုတ်၊ သို့သော် ယင်းနှင့်ပတ်သက်သည့်ပညတ်များကို လိုက်နာခြင်းနှင့် ၎င်းမှတစ်ဆင့် စီစဉ်ထားသော အစီအစဉ်တို့နှင့် ပူးပေါင်းဆောင်ရွက်ခြင်းတို့အားဖြင့် ယင်းကို သူတို့စွဲလမ်းကြ၏။ သူတို့သည် ဘုရားသခင်၏ဣသရေလလူတို့နှင့်ပေါင်းသင်း၍ ဝိညာဉ်ရေးရာတစ်စားပွဲတည်းတွင်စားသောက်လျက် ယင်း၏အဖွဲ့ဝင်များနှင့် အတူတကွလုပ်ဆောင်နေကြကာ လူအများရှေ့ဘုရားသခင်ကိုချီးမွမ်းလျက်ရှိပြီး ကိုယ်တော်အားနှစ်သက်စေသည့် ဝိညာဉ်ရေးရာယဇ်များကိုပူဇော်နေကြသည်။—ဟေဗြဲ ၁၃:၁၅။
၁၅။ လူအုပ်ကြီးသည် မြင့်မြတ်သောအမှုဆောင်ခြင်းကို မည်သည့်နေရာတွင် လုပ်ဆောင်ကြသနည်း၊ ဤကောင်းချီးမင်္ဂလာက သူတို့အပေါ် မည်သို့သက်ရောက်မှုရှိသနည်း။
၁၅ သို့ဖြစ်၍ လူအုပ်ကြီးသည် “ဖြူသောဝတ်လုံကိုဝတ်ဆင်လျက် . . . ပလ္လင်တော်ရှေ့ သိုးသငယ်ရှေ့မှာရပ်နေကြ” သည်ကိုတွေ့မြင်ရ၏။ ထိုမျှမက “ဘုရားသခင်၏ပလ္လင်တော်ရှေ့မှာ နေရာကိုရ၍၊ [ဝတ်ပြုရာအိမ်တော်] ၌ ဘုရားဝတ် [“မြင့်မြတ်သောအမှုဆောင်ခြင်း၊” ကဘ] ကို နေ့ညမပြတ်ပြုရကြ၏။ ပလ္လင်ပေါ်မှာထိုင်တော်မူသောသူသည် သူတို့တွင်ကျိန်းဝပ်တော်မူမည်။” (ဗျာဒိတ် ၇:၉၊ ၁၅) ဣသရေလအချိန်က ဘာသာပြောင်းဝင်သူများသည် ရှောလမုန်ဝတ်ပြုရာအိမ်တော်၏ အပြင်ဘက်ရင်ပြင်တွင် ဝတ်ပြုကိုးကွယ်ခဲ့ကြရသည်။ ထိုနည်းတူ လူအုပ်ကြီးသည် ယေဟောဝါအား ကိုယ်တော့်ဝိညာဉ်ရေးဝတ်ပြုရာအိမ်တော်၏ အပြင်ဘက်ရင်ပြင်တွင် ဝတ်ပြုကိုးကွယ်ကြသည်။ ထိုတွင်အမှုဆောင်ရခြင်းက သူတို့ကိုဝမ်းမြောက်ရွှင်လန်းစေ၏။ (ဆာလံ ၁၂၂:၁) သူတို့၏ဘိသိက်ခံအပေါင်းပါတို့မှ နောက်ဆုံးသောသူသည် သူ၏ကောင်းကင်အမွေကိုလက်ခံရရှိပြီးနောက်၌ပင် ယေဟောဝါ၏လူမျိုးတော်အဖြစ် ကိုယ်တော်ထံ မြင့်မြတ်သောအမှုဆောင်ခြင်းကို ဆက်လက်ပေးဆက်ကြမည်။—ဗျာဒိတ် ၂၁:၃။
နှစ်သက်လက်ခံဖွယ်မဟုတ်သည့် မြင့်မြတ်သောအမှုဆောင်ခြင်း
၁၆။ မြင့်မြတ်သောအမှုဆောင်ခြင်းနှင့်ပတ်သက်၍ အဘယ်သတိပေးချက်ပေးထားသနည်း။
၁၆ ရှေးဣသရေလအချိန်က မြင့်မြတ်သောအမှုဆောင်ခြင်းကို ယေဟောဝါ၏ပညတ်များနှင့်အညီ ပေးဆက်ခဲ့ကြရသည်။ (ထွက်မြောက်ရာ ၃၀:၉; ဝတ်ပြုရာ ၁၀:၁၊ ၂) အလားတူ ယနေ့ ကျွန်ုပ်တို့၏မြင့်မြတ်သောအမှုဆောင်ခြင်းကို ယေဟောဝါအားနှစ်သက်လက်ခံစေလိုလျှင် လိုက်နာစောင့်ထိန်းရမည့် တောင်းဆိုချက်များရှိသည်။ ထိုအတွက်ကြောင့် တမန်တော်ပေါလုက ကောလောသဲအသင်းသားများထံ ဤသို့ရေးခဲ့သည်– “ငါတို့သည် . . . သင်တို့အဖို့အလိုငှာ အစဉ်မပြတ်ဆုတောင်း . . . လျက်နေကြ၏။ ဆုတောင်းသောအချက်ဟူမူကား၊ သင်တို့သည် ကောင်းသောအကျင့်အမျိုးမျိုးတည်းဟူသော အသီးကိုသီးခြင်း၊ ဘုရားသခင်ကိုသိသောဉာဏ်တိုးပွားခြင်းရှိသဖြင့် . . . သခင်ဘုရားနှင့်ထိုက်လျောက်စွာကျင့်၍ အရာရာ၌နှစ်သက်တော်မူစေခြင်းငှာ၊ ပညာအမျိုးမျိုး၊ ဓမ္မဉာဏ်အမျိုးမျိုးအားဖြင့် အလိုတော်ကို အကုန်အစင်နားလည်ပါမည်အကြောင်း ဆုတောင်း . . . ၏။” (ကောလောသဲ ၁:၉-၁၁) ဘုရားသခင်ကိုဝတ်ပြုကိုးကွယ်ရန် လျောက်ပတ်သောနည်းလမ်းဖြစ်မဖြစ်ကို ဆုံးဖြတ်ရန်မှာ ကျွန်ုပ်တို့မဟုတ်ပေ။ တိကျမှန်ကန်သောကျမ်းစာအသိပညာ၊ ဝိညာဉ်ရေးရာနားလည်သဘောပေါက်မှုနှင့် ဘုရားသခင်ရေးရာဉာဏ်ပညာတို့မှာ မရှိမဖြစ်လိုအပ်သည်။ သို့မဟုတ်လျှင် အမှားကြီးမှားသွားနိုင်၏။
၁၇။ (က) မောရှေအချိန်၌ မြင့်မြတ်သောအမှုဆောင်ခြင်းသည် မည်သို့လွဲချော်သွားခဲ့ကြသနည်း။ (ခ) ယနေ့ မြင့်မြတ်သောအမှုဆောင်ခြင်းသည် မည်သို့လမ်းလွဲသွားနိုင်သနည်း။
၁၇ မောရှေအချိန်က ဣသရေလလူတို့ကို သတိရပါ။ ကျွန်ုပ်တို့ ဤသို့ဖတ်ရသည်– “ဘုရားသခင်သည် မျက်နှာတော်ကိုလွှဲ၍၊ ကောင်းကင်တန်ဆာများတို့အားဝတ်ပြု [“မြင့်မြတ်သောအမှုဆောင်၊” ကဘ] စေခြင်းငှာ ထိုသူတို့ကိုစွန့်ပစ်ထားတော်မူ၏။” (တမန်တော် ၇:၄၃) ထိုဣသရေလလူတို့သည် သူတို့၏အကျိုးအလို့ငှာ ယေဟောဝါ၏တန်ခိုးပါသောဆောင်ရွက်ချက်များကို တွေ့မြင်ခဲ့ကြသည်။ သို့တိုင် သူတို့အတွက် အခွင့်ကောင်းဟုယူမှတ်ချိန်တွင် အခြားဘုရားသခင်များထံသို့ လှည့်သွားကြလေသည်။ သူတို့သစ္စာမရှိခဲ့ကြချေ၊ ကျွန်ုပ်တို့၏မြင့်မြတ်သောအမှုဆောင်ခြင်းကို ဘုရားသခင်အား နှစ်သက်စေလိုလျှင် သစ္စာစောင့်ရမည်ဖြစ်သည်။ (ဆာလံ ၁၈:၂၅) မှန်ပါသည်၊ ယနေ့ အချို့သည် ကြယ်များ သို့မဟုတ် ရွှေနွားရုပ်များဝတ်ပြုကိုးကွယ်ရန် ယေဟောဝါထံတော်မှလှည့်သွားကြမည်၊ သို့သော် အခြားသောရုပ်ကိုးကွယ်မှုပုံစံများလည်း ရှိသည်။ ယေရှုက “လောကစည်းစိမ်” အစေခံခြင်းကိုသတိပေးထားပြီး ပေါလုက လောဘလွန်ကြူးခြင်းကို ရုပ်ကိုးကွယ်ခြင်းဟု ခေါ်ဆိုထားသည်။ (မဿဲ ၆:၂၄; ကောလောသဲ ၃:၅) စာတန်သည် မိမိကိုယ်ကို ဘုရားသခင်တစ်ပါးအဖြစ်တင်မြှောက်ထားသည်။ (၂ ကောရိန္သု ၄:၄) ထိုသို့သောရုပ်ပိုင်းကိုးကွယ်မှုမျိုးများမှာ ပျံ့နှံ့လျက်ရှိပြီး ကျော့ကွင်းတစ်ခုဖြစ်သည်။ ဥပမာ၊ ယေရှုနောက်လိုက်ဖြစ်သည်ဟုဆိုပြီး တကယ့်ဘဝပန်းတိုင်မှာ ချမ်းသာကြွယ်ဝဖို့ သို့မဟုတ် သူ၏အမှန်တကယ်ကိုးစားမှုမှာ ကိုယ့်ကိုယ်ကိုနှင့် ကိုယ့်ယူဆချက်များ၌သာဖြစ်သူတစ်ဦးကို သုံးသပ်ကြည့်ပါ။ အမှန်အားဖြင့် မည်သူ၏အမှုကို သူဆောင်ရွက်နေခြင်းဖြစ်သနည်း။ ယေဟောဝါ၏နာမတော်၌ ကျိန်ဆိုခဲ့ကြသော်လည်း သူတို့၏ကြီးမားသောလုပ်ဆောင်မှုများသည် မသန့်ရှင်းသော . . . ပုံများကြောင့်ဖြစ်သည်ဟု အမွှမ်းတင်ခဲ့ကြသည့် ဟေရှာယခေတ်ကဂျူးများနှင့် သူသည် မည်မျှကွာခြားပါမည်နည်း။—ဟေရှာယ ၄၈:၁၊ ၅။
၁၈။ မြင့်မြတ်သောအမှုဆောင်ခြင်းကို အတိတ်နှင့် ယနေ့တွင် မည်သို့မှားယွင်းစွာဆောင်ရွက်ခဲ့ကြသနည်း။
၁၈ ယေရှုက ဤသို့လည်းသတိပေးခဲ့သည်– “သင်တို့ကိုသတ်သောသူမည်သည်ကား၊ ဘုရားဝတ် [“မြင့်မြတ်သောအမှုဆောင်ခြင်း၊” ကဘ] ကိုငါပြုပြီဟု မိမိထင်မှတ်သောအချိန်ကာလရောက်လိမ့်မည်။” (ယောဟန် ၁၆:၂) တမန်တော်ပေါလုဖြစ်လာသော ရှောလုသည် ‘သတေဖန်၏ကွပ်မျက်ခံရသောအမှုကို နှစ်သက်ခဲ့’ ပြီး ‘သခင်၏တပည့်တော်တို့တစ်ဖက်၌ ခြိမ်းခြောက်၍၊ အသေသတ်ခြင်းငှာပြင်းစွာအသက်ရှုခဲ့’ ချိန်တွင် မိမိသည် ဘုရားသခင်၏အမှုဆောင်နေခြင်းဖြစ်ကြောင်း မှတ်ယူထားခဲ့မည်မှာ သေချာသည်။ (တမန်တော် ၈:၁; ၉:၁) ယနေ့ လူမျိုးစုသန့်စင်မှုနှင့် အမျိုးဖြုတ်သတ်ဖြတ်မှုတို့ကို ကျူးလွန်သူအချို့ကလည်း ဘုရားသခင်ကိုဝတ်ပြုခြင်းဖြစ်သည်ဟုဆိုကြ၏။ ဘုရားသခင်ကိုဝတ်ပြုသည်ဟု ဆိုကြသူများစွာရှိသည်၊ သို့သော် အမှန်မှာ သူတို့၏ဝတ်ပြုကိုးကွယ်မှုသည် လူမျိုးရေးစိတ်ဓာတ်၊ အမျိုးမြတ်စိတ်ဓာတ်၊ စည်းစိမ်ချမ်းသာ၊ မိမိကိုယ်နှိုက်ဖြစ်သောဘုရားများ သို့မဟုတ် နတ်ဘုရားတစ်ပါးပါးထံ ဦးတိုက်နေခြင်းဖြစ်သည်။
၁၉။ (က) မိမိတို့၏မြင့်မြတ်သောအမှုဆောင်ခြင်းကို ကျွန်ုပ်တို့ မည်သို့ရှုမြင်ကြသနည်း။ (ခ) အဘယ်မြင့်မြတ်သောအမှုဆောင်ခြင်းမျိုးက ကျွန်ုပ်တို့ကို ရွှင်လန်းမှုဖြစ်စေမည်နည်း။
၁၉ ယေရှု ဤသို့မိန့်တော်မူခဲ့သည်– “သင်၏ဘုရားသခင်ထာဝရဘုရား [“ယေဟောဝါ၊” ကဘ] ကို ကိုးကွယ်ရမည်။ ထိုဘုရားသခင်ကိုသာ ဝတ် [“မြင့်မြတ်သောအမှုဆောင်ခြင်း၊” ကဘ] ပြုရမည်။” (မဿဲ ၄:၁၀) ကိုယ်တော်သည် စာတန်ကို မိန့်တော်မူခဲ့ခြင်းဖြစ်သည်၊ သို့သော် ကိုယ်တော်၏မိန့်တော်မူချက်ကို ကျွန်ုပ်တို့အားလုံး ဂရုစိုက်ရန် အလွန်အရေးကြီးလှသည်တကား! စကြဝဠာကို အကြွင်းမဲ့ပိုင်သအုပ်စိုးရှင်ထံ မြင့်မြတ်သောအမှုဆောင်ခြင်းသည် စိုးရွံ့တုန်လှုပ်ဖွယ်ကောင်းသည့် မြင့်မားသောအခွင့်ထူးတစ်ရပ်ဖြစ်သည်။ ထို့ပြင် ကျွန်ုပ်တို့၏ဝတ်ပြုကိုးကွယ်မှုနှင့်ဆက်စပ်နေသည့် လူထုအမှုဆောင်ခြင်းနှင့်ပတ်သက်၍ အဘယ်သို့ပြောနိုင်သနည်း။ ကျွန်ုပ်တို့ လူသားချင်းအကျိုးအတွက် ထိုသို့ပြုလုပ်ရခြင်းက ကြီးစွာသောပျော်ရွှင်မှုကိုဖြစ်စေသည့် ရွှင်လန်းဖွယ်လုပ်ငန်းတစ်ရပ်ဖြစ်သည်။ (ဆာလံ ၄၁:၁၊ ၂; ၅၉:၁၆) သို့တိုင် ထိုသို့သောအမှုဆောင်ခြင်းကို စိတ်နှလုံးအပြည့်၊ တော်မှန်သောနည်းလမ်းဖြင့် ပေးဆက်မှသာလျှင် စစ်မှန်သောပျော်ရွှင်မှုကိုဖြစ်စေသည်။ မည်သူများသည် ဘုရားသခင်ကိုလျောက်ပတ်စွာ အမှန်တကယ်ဝတ်ပြုနေကြသနည်း။ မည်သူတို့၏ မြင့်မြတ်သောအမှုဆောင်ခြင်းကို ယေဟောဝါလက်ခံတော်မူသနည်း။ ကျွန်ုပ်တို့၏ဝတ်ပြုမှုနှင့်ပတ်သက်သည့် တတိယကျမ်းစကားလုံးကို ကျွန်ုပ်တို့သုံးသပ်ကြည့်လျှင် ထိုမေးခွန်းများကို ကျွန်ုပ်တို့ဖြေဆိုနိုင်ကြသည်။ ယင်းကို နောက်ဆောင်းပါးတွင် ကျွန်ုပ်တို့သုံးသပ်သွားကြမည်။
[အောက်ခြေမှတ်ချက်များ]
^ အပိုဒ်၊ 4 ခရစ်ယာန်ဘောင်ဝတ်တက်နည်းများမှာ . . . ချာ့ခ်ျရှိ ကိုယ်တော်မြတ်ပွဲတော်ကဲ့သို့သော ယေဘုယျအားဖြင့် ဝတ်ပြုပွဲအစီအစဉ်များဖြစ်စေ၊ သတ်သတ်မှတ်မှတ်ဘာသာရေးထုံးတမ်းများဖြစ်စေ တစ်ခုခုဖြစ်သည်။
^ အပိုဒ်၊ 10 တမန်တော် ၁၃:၂ (ကဘ) ကအန္တိအုတ်မြို့မှ ပရောဖက်များနှင့် သွန်သင်ပို့ချသူတို့သည် ယေဟောဝါထံ “လူသူရှေ့အမှုဆောင်နေ” (လီတိုယိအာနှင့်ဆက်နွှယ်သောဂရိစကားလုံးတစ်လုံးကို ဘာသာပြန်ထားခြင်းဖြစ်) ခဲ့ကြကြောင်း ဖော်ပြထားသည်။ ဤလူထုအမှုဆောင်ခြင်း၌ လူအများရှေ့ဟောပြောခြင်းပါဝင်ဖွယ်ရှိသည်။
သင်မည်သို့ဖြေမည်နည်း
• ယေရှုသည် အဘယ်ကြီးကျယ်ခမ်းနားသည့်လူထုအမှုဆောင်ခြင်းကို ဆောင်ရွက်ခဲ့သနည်း။
• ခရစ်ယာန်များလုပ်ဆောင်ကြသော လူထုအမှုဆောင်ခြင်းကား အဘယ်နည်း။
• ခရစ်ယာန်တို့၏ မြင့်မြတ်သောအမှုဆောင်ခြင်းကားအဘယ်နည်း၊ မည်သည့်နေရာတွင် သူတို့ဆောင်ရွက်ကြသနည်း။
• ကျွန်ုပ်တို့၏မြင့်မြတ်သောအမှုဆောင်ခြင်းသည် ဘုရားသခင်အား နှစ်သက်စေဖို့ဆိုလျှင် အဘယ်အရာဆည်းပူးရယူကြရမည်နည်း။
[လေ့လာရန်မေးခွန်းများ]
[စာမျက်နှာ ၁၀ ပါ ရုပ်ပုံ]
မိဘများသည် ပေးကမ်းခြင်း၌ များစွာရွှင်လန်းကြ
[စာမျက်နှာ ၁၂, ၁၃ ပါ ရုပ်ပုံ]
ခရစ်ယာန်များသည် အခြားသူတို့ကို ကူညီပံ့ပိုးပေးသောအခါနှင့် သတင်းကောင်းကိုကြွေးကြော်သောအခါ၌ လူထုအမှုဆောင်ခြင်းကိုပြုကြ
[စာမျက်နှာ ၁၄ ပါ ရုပ်ပုံ]
ကျွန်ုပ်တို့၏မြင့်မြတ်သောအမှုဆောင်ခြင်းကို ဘုရားသခင်နှစ်သက်လက်ခံဖို့သေချာစေရန် တိကျမှန်ကန်သောအသိပညာနှင့် နားလည်မှုလိုအပ်