“ဉာဏ်ပညာကို ရှာ၍ရသောသူသည် မင်္ဂလာရှိ၏”
“ဉာဏ်ပညာကို ရှာ၍ရသောသူသည် မင်္ဂလာရှိ၏”
သူသည် ကဗျာဆရာ၊ ဗိသုကာဆရာ၊ ဘုရင်တစ်ပါးဖြစ်ခဲ့သည်။ သူသည် နှစ်စဉ်ဝင်ငွေဒေါ်လာသန်းပေါင်း ၂၀၀ ကျော်ရှိရာ ကမ္ဘာပေါ်တွင် အခြားမည်သည့်ဘုရင်ထက်မဆို သာ၍ချမ်းသာကြွယ်ဝခဲ့သည်။ ထိုသူသည် သူ၏ဉာဏ်ပညာကြောင့်လည်း ထင်ပေါ်ကျော်ကြားခဲ့၏။ လည်ပတ်ရောက်ရှိလာသောဘုရင်မတစ်ပါးသည် အလွန်ဘဝင်ခိုက်သွားကာ ဤသို့ဆိုခဲ့သည်– “ယခုမူကား အရင်ကြားသောစကားသည် တစ်ဝက်ကိုမျှမမီ။ ကိုယ်တော်၏ပညာနှင့် ကိုယ်တော်၏စည်းစိမ်သည် အကျွန်ုပ်ကြားရသောသတင်းကို လွန်ကဲပါ၏။” (၃ ဓမ္မရာဇဝင် ၁၀:၄-၉) ဤသည်ကား ရှေးဣသရေလရှင်ဘုရင်ရှောလမုန်၏ အနေအထားဖြစ်ခဲ့သည်။
ရှောလမုန်တွင် ပစ္စည်းဥစ္စာရော ဉာဏ်ပညာပါရှိခဲ့သည်။ ထိုအရာနှစ်ခုအနက် အဘယ်အရာသည် အမှန်ပင်မရှိမဖြစ်လိုအပ်သည်ကို သူစီရင်ဆုံးဖြတ်ရန် ထူးခြားသောစွမ်းရည်ရှိသည်။ သူက ဤသို့ရေးသားခဲ့သည်– “ဉာဏ်ပညာကိုရှာ၍ရသောသူသည် မင်္ဂလာရှိ၏။ အကြောင်းမူကား ပညာကုန်သွယ်ခြင်းသည် ငွေကုန်သွယ်ခြင်းထက် သာ၍ကောင်း၏။ ပညာကုန်သွယ်၍ရသောအမြတ်လည်း ရွှေစင်ထက်သာ၍ကောင်း၏။ ပညာသည် ပတ္တမြားထက်သာ၍ အဖိုးထိုက်ပေ၏။ နှစ်သက်ဖွယ်သမျှသောအရာတို့သည် ထိုရတနာကိုမပြိုင်နိုင်ကြ။”—သု. ၃:၁၃-၁၅။
သို့သော် ဉာဏ်ပညာကို အဘယ်နေရာတွင် တွေ့ရှိနိုင်မည်နည်း။ ယင်းသည် ပစ္စည်းဥစ္စာထက် အဘယ်ကြောင့်သာ၍အဖိုးထိုက်ရသနည်း။ ၎င်း၏နှစ်သက်ဖွယ်ကောင်းသော ထူးခြားချက်များကား အဘယ်နည်း။ ရှောလမုန်ရေးသော နယပုံပြင်ကျမ်း၏ ၈ ခုမြောက်အခန်းကြီးတွင် စိတ်ဝင်စားဖွယ်နည်းဖြင့် အဆိုပါမေးခွန်းများကို ဖြေဆိုပေးသည်။ ထိုတွင် ဉာဏ်ပညာကို စကားပြောဆိုပြုမူနိုင်ဘိသကဲ့သို့ သရုပ်ဖော်ထားသည်။ ထို့ပြင် ဉာဏ်ပညာကိုယ်နှိုက်က ၎င်း၏မေတ္တာရပ်ခံချက်ကိုသာမက တန်ဖိုးကိုပါ ဖော်ပြသည်။
‘ကြွေးကြော်လျက်ရှိ၏’
နယပုံပြင်အခန်းကြီး ၈ [သမ္မာ] သည်အဖြေမလိုသော ဤမေးခွန်းဖြင့်စတင်ခဲ့သည်– “ပညာ [“ဉာဏ်ပညာ၊” ကဘ] သည်ခေါ်၍ ဉာဏ် [“ပိုင်းခြားသိမြင်မှု၊” ကဘ] သည်မိမိအသံကို လွှင့်သည်မဟုတ်လော။” * မှန်သည်၊ ဉာဏ်ပညာနှင့်ပိုင်းခြားသိမြင်မှုသည် ဟစ်ခေါ်နေ၏၊ သို့သော် မှောင်သောနေရာများတွင် ချောင်းမြောင်းစောင့်နေပြီး တစ်ကိုယ်ရည်မနူးမနပ်လူငယ်တစ်ဦးကို သွေးဆောင်စကားများတီးတိုးပြောဆိုသည့် အကျင့်ပျက်အမျိုးသမီးနှင့်လုံးဝမတူချေ။ (သု. ၇:၁၂) “လမ်းနား၊ မြင့်ရာအရပ်များ၌လည်းကောင်း၊ လမ်းဆုံ၌လည်းကောင်းရပ်နေ၏။ မြို့ဝင်ရာတံခါး၊ တံခါးဝများ၌ ကြွေးကြော်” လျက်ရှိ၏။ (သု. ၈:၁-၃၊ သမ္မာ) အသံအောင်ပြီး,ပြတ်သားသော ဉာဏ်ပညာ၏အသံကို လူအများရှိရာ ဂိတ်များ၊ လမ်းဆုံများ၊ မြို့အဝင်ဝများတို့တွင် ကျယ်လောင်စွာပီပီပြင်ပြင်ကြားရသည်။ လူတို့သည် ထိုအသံကို အလွယ်တကူကြားပြီး တုံ့ပြန်နိုင်ကြသည်။
မှုတ်သွင်းခံဘုရားသခင့်နှုတ်မြွက်စကားတော် သမ္မာကျမ်းစာတွင် မှတ်တမ်းတင်ထားသော ဘုရားရေးရာဉာဏ်ပညာကိုရရှိလိုသူ ကမ္ဘာပေါ်မှလူတိုင်းနီးပါး ရနိုင်သည်ကို မည်သူငြင်းနိုင်မည်နည်း။ “သမ္မာကျမ်းစာသည် သမိုင်းတွင် အကျယ်ပြန့်ဆုံးဖတ်ရှုသည့် စာအုပ်တစ်အုပ်ဖြစ်သည်” ဟုကမ္ဘာ့စာအုပ်စွယ်စုံကျမ်းကဆိုသည်။ ယင်းကဤသို့ထပ်လောင်းဆိုသည်– “အခြားမည်သည့်စာအုပ်ထက်မဆို သမ္မာကျမ်းစာ၏မိတ္တူများစွာကို ဖြန့်ချိခဲ့ပြီ။ သမ္မာကျမ်းစာကို အခြားမည်သည့်စာအုပ်ထက်မဆို အကြိမ်ရေပို၍၊ ဘာသာစကားပို၍လည်း ဘာသာပြန်ဆိုခဲ့ပြီ။” သမ္မာကျမ်းစာတစ်အုပ်လုံး သို့မဟုတ် ၎င်း၏အစိတ်အပိုင်းများကို ဘာသာစကားနှင့်လူမျိုးစုငယ်ဘာသာစကား ၂,၁၀၀ ကျော်ဖြင့်ရရှိနိုင်သောကြောင့် လူ့မိသားစု ၉၀ ရာခိုင်နှုန်းကျော်သည် ဘုရားသခင့်နှုတ်မြွက်စကားတော် အနည်းဆုံးတစ်စိတ်တစ်ပိုင်းကို သူတို့၏ကိုယ်ပိုင်ဘာသာစကားဖြင့် ရရှိနိုင်ကြပြီဖြစ်သည်။
ယေဟောဝါသက်သေများသည် ကျမ်းစာသတင်းတရားကို နေရာတိုင်းတွင် လူသိရှင်ကြားကြေညာလျက်ရှိကြသည်။ နိုင်ငံပေါင်း ၂၃၅ နိုင်ငံတွင် သူတို့သည် ဘုရားသခင့်နိုင်ငံတော်သတင်းကောင်းကို တက်ကြွစွာဟောပြောကာ ဘုရားသခင့်နှုတ်မြွက်စကားတော်တွင် တွေ့ရှိရသည့် အမှန်တရားကို လူတို့အား သွန်သင်ပေးလျက်ရှိသည်။ သူတို့၏ကျမ်းစာအခြေပြုဂျာနယ်များဖြစ်သော ဘာသာစကားပေါင်း ၁၄၀ ဖြင့်ထုတ်ဝေသည့် ကင်းမျှော်စင် နှင့်ဘာသာစကားပေါင်း ၈၃ ဘာသာဖြင့်ပုံနှိပ်သည့် နိုးလော့! အသီးသီးတို့ကို သန်းပေါင်း ၂၀ ကျော် ဖြန့်ချိလျက်ရှိကြသည်။ ဉာဏ်ပညာသည် လူအများရှိရာနေရာများတွင် အမှန်ပင်ကျယ်လောင်စွာကြွေးကြော်နေပါသည်တကား!
“လူသားတို့အား အသံကိုငါလွှင့်၏”
တင်စားထားသောဉာဏ်ပညာသည် ဤသို့စတင်ဆိုသည်– “အချင်းလူတို့ သင်တို့အားငါခေါ်၏။ လူသားတို့အား အသံကိုငါလွှင့်၏။ ဉာဏ်တိမ်သောသူတို့ ပညာတရား [“အလိမ္မာဉာဏ်”၊ ကဘ] ကိုနားလည်ကြလော့။ လူမိုက်တို့ ထိုးထွင်းသောဉာဏ်ရှိကြလော့။”—သု. ၈:၄၊ ၅။
ဉာဏ်ပညာ၏ခေါ်သံသည် လူသားထုတစ်ရပ်လုံးထံသို့ဖြစ်၏။ ၎င်း၏ဖိတ်ခေါ်ချက်သည် လူခပ်သိမ်းနှင့်သက်ဆိုင်သည်။ မလိမ္မာသူများကိုပင် အလိမ္မာဉာဏ် သို့မဟုတ် အမြော်အမြင်ရရှိဖို့နှင့် မိုက်မဲသူတို့သည် နားလည်သောစိတ်ရရှိဖို့ ဖိတ်ခေါ်လျက်ရှိ၏။ အမှန်မှာ၊ သမ္မာကျမ်းစာသည် လူခပ်သိမ်းအတွက်စာအုပ်တစ်အုပ်ဖြစ်သည်ကို ယေဟောဝါသက်သေများ ယုံကြည်ကြသောကြောင့် ကျမ်းစာတွင်ပါရှိသည့် ဉာဏ်ပညာစကားများကိုရှာဖွေကြရန် သူတို့တွေ့ဆုံသမျှလူတိုင်းကို မျက်နှာမလိုက်ဘဲကြိုးစားအားပေးကြသည်။
‘ငါ့နှုတ်ထွက်စကားသည် အမှန်တရားဖြစ်’
ဉာဏ်ပညာက ၎င်း၏မေတ္တာရပ်ခံချက်ကို ဤသို့ကမ်းလှမ်းသည်– “နားထောင်ကြ။ မြတ်သောစကားကို ငါပြောမည်။ မှန်သောတရားစကားကို ငါနှုတ်မြွက်မည်။ ငါ့နှုတ်ထွက်စကားသည် [အမှန်] တရားနှင့်သာဆိုင်၍ ငါ့နှုတ်ခမ်းတို့သည် [မကောင်းမှု]ကိုစက်ဆုပ်ရွံရှာ၏။ ငါဟောပြောသမျှသောစကားတို့သည် ဖြောင့်မတ်၍ ကောက်သောသဘော၊ ဖောက်ပြန်သောသဘောနှင့်ကင်းစင်ကြ၏။” မှန်ပါသည်၊ ဉာဏ်ပညာ၏သွန်သင်ချက်များသည် အလွန်ကောင်းမွန်မှန်ကန်ကာ ဖြောင့်မတ်တည်ကြည်၏။ ယင်းတို့တွင် မရိုးမသား သို့မဟုတ် ကောက်ကျစ်မှု လုံးလုံးမရှိချေ။ “နားလည် [“ပိုင်းခြားသိမြင်၊” ကဘ] သောသူ၌ အလုံးစုံရှင်းလင်း၍ ပညာကိုရသောသူတို့အား ဟုတ်မှန်ကြ၏။”—သု. ၈:၆-၉။
ဉာဏ်ပညာက ဤသို့တိုက်တွန်းသည်မှာ သင့်လျော်လှ၏– “ငွေအရင် ငါ့နည်း [“ဆုံးမသွန်သင်ခြင်း၊” ကဘ] ကိုလည်းကောင်း၊ မြတ်သောရွှေအရင် ပညာအတတ်ကိုလည်းကောင်းခံယူကြလော့။” ဤသို့မေတ္တာရပ်ခံခြင်းသည် ဆီလျော်လှ၏၊ “အကြောင်းမူကား ပညာ [“ဉာဏ်ပညာ၊” ကဘ] သည်ပတ္တမြားထက်သာ၍မြတ်၏။ နှစ်သက်ဖွယ်သမျှသောအရာတို့သည် ထိုရတနာကိုမပြိုင်နိုင်ကြ” ချေ။ (သု. ၈:၁၀၊ ၁၁) အဘယ်ကြောင့်နည်း။ အဘယ်အရာက ဉာဏ်ပညာကို ပစ္စည်းဥစ္စာထက် သာ၍အဖိုးထိုက်စေသနည်း။
“ငါပေးသောအကျိုးသည် ရွှေထက်မက . . . မြတ်၏”
နားထောင်သူကို ဉာဏ်ပညာကပေးသနားသော ဆုကျေးဇူးများကား ရွှေ၊ ငွေ၊ သို့မဟုတ် ပတ္တမြားတို့ထက် သာ၍အဖိုးထိုက်ပေသည်။ အဆိုပါဆုကျေးဇူးများကိုဖော်ပြကာ ဉာဏ်ပညာက ဤသို့ဆိုသည်– “ငါ့ဉာဏ်ပညာသည် [ကောင်းသော]သတိ [“အလိမ္မာဉာဏ်၊” ကဘ] နှင့်ပေါင်း၍ လိမ္မာသောသိပ္ပံအတတ်များ [“စဉ်းစားဆင်ခြင်နိုင်စွမ်းအသိပညာ၊” ကဘ] ကိုဖော်တတ်၏။ ထာဝရဘုရားကိုကြောက်ရွံ့သောသဘောကား [မကောင်းမှု]ကိုမုန်းသောသဘောတည်း။ မာနထောင်လွှားခြင်း၊ စော်ကားခြင်း၊ မကောင်းသောလမ်းသို့လိုက်ခြင်း၊ ကောက်သောစကားဖြင့်ပြောဆိုခြင်းတို့ကို ငါမုန်း၏။”—သု. ၈:၁၂၊ ၁၃။
ဉာဏ်ပညာသည် မိမိကိုပိုင်ဆိုင်သူအား အလိမ္မာဉာဏ်နှင့်ထိုးထွင်းနိုင်စွမ်းကို ပေးသည်။ “ထာဝရဘုရားကိုကြောက်ရွံ့သောသဘောသည် ပညာ [“ဉာဏ်ပညာ၊” ကဘ] ၏မူလအမြစ်ဖြစ်” သောကြောင့် ဘုရားရေးရာဉာဏ်ပညာရှိသူသည် ဘုရားသခင်ကို ရိုသေလေးစားကျိုးနွံတတ်၏။ (သု. ၉:၁၀) ထို့ကြောင့် သူသည် ယေဟောဝါမုန်းရာများကို မုန်းသည်။ မာနကြီးခြင်း၊ မောက်မာခြင်း၊ မကောင်းသောအကျင့်နှင့် ကောက်ကျစ်သောနှုတ်သည် ကိုယ်တော်နှင့်အလှမ်းကွာဝေးလှသည်။ မကောင်းမှုကိုမုန်းတီးခြင်းသည် အခွင့်အာဏာ၏ပျက်စီးစေသောအကျိုးဆက်မှ ကာကွယ်ပေးသည်။ ခရစ်ယာန်အသင်းတော်တွင် တာဝန်ရှိသူများသာမက အိမ်ထောင်ဦးစီးများသည် ဉာဏ်ပညာကိုကြိုးစားရှာဖွေရန် မည်မျှအရေးကြီးလေစွ!
“အကြံပေးနိုင်သောအခွင့်နှင့် ပညာရတနာ [“လက်တွေ့ကျဉာဏ်ပညာ၊” ကဘ] သည်ငါ၌ရှိ၏။ ငါသည် ဉာဏ်ဖြစ်၍ အစွမ်းသတ္တိနှင့်ပြည့်စုံ၏။ ငါ့အားဖြင့် ရှင်ဘုရင်တို့သည် စိုးစံရသောအခွင့်၊ မင်းအရာရှိတို့သည် ဆုံးဖြတ်ရသောအခွင့်ရှိကြ၏။ ငါ့အားဖြင့် မင်းသား၊ မှူးမတ်၊ တရားသူကြီးအပေါင်းတို့သည် အစိုးရသောအခွင့်ရှိကြ၏” ဟုဉာဏ်ပညာကဆက်၍ဆိုသည်။ (သု. ၈:၁၄-၁၆) ဉာဏ်ပညာ၏အသီးတွင် ရှင်ဘုရင်များ၊ အထက်အရာရှိများနှင့် မှူးမတ်များ အလွန်လိုအပ်သောအရာများဖြစ်သည့် ထိုးထွင်းသိမြင်မှု၊ သိနားလည်မှုနှင့် အစွမ်းသတ္တိတို့ပါဝင်သည်။ အခွင့်အာဏာရရှိထားသူများနှင့် သူတစ်ပါးကိုဆုံးမရသူများအတွက် ဉာဏ်ပညာသည် မရှိမဖြစ်လိုအပ်သည်။
စစ်မှန်သောဉာဏ်ပညာကို အားလုံးအလွယ်တကူရရှိနိုင်သော်လည်း ယင်းကို လူတိုင်းမတွေ့ရှိချေ။ အချို့ဆိုလျှင် သူတို့ရှေ့တွင်မြင်နေရလျက်ပင် ယင်းကိုငြင်းပယ်ကြသည် သို့မဟုတ် ရှောင်ဖယ်သွားကြသည်။ “ငါ့ကိုချစ်သောသူတို့ကို ငါချစ်၏။ ငါ့ကိုကြိုးစား၍ရှာသောသူတို့သည် တွေ့တတ်ကြ၏။” (သု. ၈:၁၇) ဉာဏ်ပညာကို စိတ်အားထက်သန်စွာ ရှာဖွေသူများသာ ၎င်းကိုတွေ့ခွင့်ရသည်။
ဉာဏ်ပညာ၏လမ်းစဉ်များသည် ဖြောင့်မတ်မှန်ကန်ပေ၏။ ယင်းကိုကြိုးစားရှာဖွေသူများအား အကျိုးပေး၏။ ဉာဏ်ပညာက ဤသို့ဆိုသည်– “ငါ၌စည်းစိမ်နှင့် ဂုဏ်အသရေရှိ၏။ မြဲသောစည်းစိမ်နှင့် ဖြောင့်မတ်ခြင်း . . . ရှိ၏။ ငါပေးသောအကျိုးသည် ရွှေထက်မက ရွှေစင်ထက်သာ၍မြတ်၏။ ငါကြောင့်ရသောအခွန်ဘဏ္ဍာသည် ငွေတော်ထက်သာ၍မြတ်၏။ ငါသည် ဖြောင့်မတ်ခြင်းလမ်း၊ တရားသဖြင့်စီရင်ခြင်းလမ်းအလယ်၌ လျှောက်သွားသည်ဖြစ်၍ ငါ့ကိုချစ်သောသူတို့သည် အမွေခံရသောအခွင့်နှင့် သူတို့ဘဏ္ဍာတိုက်ပြည့်ဝစေသောအခွင့်ကို ငါပေးတတ်၏။”—သု. ၈:၁၈-၂၁။
ဉာဏ်ပညာ၏ အလွန်ထူးမြတ်သောအရည်အချင်းများနှင့် ဉာဉ်များဖြစ်သည့် ပညာသတိ၊ စဉ်းစားတွေးခေါ်နိုင်စွမ်း၊ နှိမ့်ချမှု၊ ထိုးထွင်းသိမြင်မှု၊ လက်တွေ့ကျအသိပညာနှင့် သိနားလည်မှုအပြင် စည်းစိမ်ဥစ္စာများနှင့်ဂုဏ်အသရေ ဆုကျေးဇူးများပါဝင်သည်။ ပညာရှိတစ်ဦးသည် ဖြောင့်မတ်သောနည်းဖြင့် ချမ်းသာကြွယ်ဝလာကာ ဝိညာဉ်ရေးအရလည်း ချမ်းသာပေမည်။ (၃ ယောဟန် ၂) ဉာဏ်ပညာသည် လူတစ်ဦးကို ဂုဏ်အသရေလည်းရှိစေသည်။ ထို့ပြင် သူသည် ဆည်းပူးလေ့လာရာမှ စိတ်ကျေနပ်မှုကိုရရှိပြီး စိတ်ငြိမ်သက်မှုနှင့် ဘုရားသခင်ရှေ့တွင် ကြည်လင်သောကိုယ်ကိုကိုယ်သိသောစိတ်လည်းရှိသည်။ မှန်ပါသည်၊ ဉာဏ်ပညာကိုတွေ့ရှိသူ၌ ပျော်ရွှင်မှုရှိ၏။ ဉာဏ်ပညာ၏အသီးသည် ရွှေစင်နှင့်လက်ရွေးစင်ငွေတို့ထက် အမှန်ပင်သာ၍မြတ်ပေသည်။
မည်သည့်နည်း၊ မည်သည့်စရိတ်ဖြင့်မဆို ချမ်းသာကြွယ်ဝခြင်းကို အလေးပေးနေကြသည့် ရုပ်ဝါဒဆန်သော ဤလောကတွင် ကျွန်ုပ်တို့နေထိုင်နေသောကြောင့် ဤအကြံဉာဏ်သည် တကယ်ပင်အချိန်သင့်အခါသင့်ပါတကား! ဉာဏ်ပညာသည် တကယ်ပင်အဖိုးထိုက်သည်ဟူသောအမြင်မျိုးကို မပျောက်ဆုံးစေကြစို့နှင့်၊ ပစ္စည်းဥစ္စာရရှိဖို့အတွက် မဖြောင့်မတ်သောနည်းများကို အသုံးမချကြစို့နှင့်။ စည်းစိမ်ရရှိရေးအတွက်သာဖြစ်သော ဉာဏ်ပညာပေးရာပြင်ဆင်ပေးချက်များဖြစ်သည့် ‘သစ္စာနှင့်သတိပညာရှိသောကျွန်’ စီမံပေးသော ကျွန်ုပ်တို့၏ခရစ်ယာန်အစည်းအဝေးများနှင့် သမ္မာကျမ်းစာနှင့်စာပေများကို ကိုယ်ပိုင်လေ့လာခြင်းတို့ကို လျစ်လျူမရှုကြစို့နှင့်။—မဿဲ ၂၄:၄၅-၄၇။
“[အဆုံးမဲ့]ကာလမှစ၍ ငါသည် [တင်မြှောက်] ခံပြီ”
နယပုံပြင်ကျမ်း၏ ၈ ခုမြောက်အခန်းကြီးတွင် တွေ့ရသည့်ဉာဏ်ပညာ၏ပြယုဂ်သည် အကောင်အထည်ဖော်၍မရသောဂုဏ်အင်္ဂါရပ်၏ ထူးခြားချက်များကို ရှင်းပြရုံမျှမဟုတ်ပါ။ ယင်းသည် ယေဟောဝါ၏အရေးပါဆုံးဖန်ဆင်းခြင်းကို ပုံဆောင်သဘောအရလည်း ရည်ညွှန်းသည်။ ဉာဏ်ပညာက ဤသို့ဆက်၍ဆိုသည်– “ထာဝရဘုရားသည် ရှေးအမှုတော်ကိုမပြုမီ ထွက်ကြွတော်မူစကပင် ငါ့ကိုပိုင်တော်မူ၏။ မြေကြီးမဖြစ်မီ ရှေ့ဦးစွာသောကာလ [အဆုံးမဲ့]ကာလမှစ၍ ငါသည် [တင်မြှောက်] ခံပြီ။ နက်နဲသောပင်လယ်မဖြစ်၊ ရေနှင့်ကြွယ်ဝသောစမ်းရေတွင်းမဖြစ်မီ ငါ့ကိုဖြစ်ပွားစေတော်မူ၏။ တောင်ကြီးမတည်၊ တောင်ငယ်မဖြစ်မီ၊ မြေကြီးနှင့်လယ်တောများကိုမဖန်ဆင်း၊ အဦးဆုံးသောမြေမှုန့်ကိုမျှမဖန်ဆင်းမီ ငါ့ကိုဖြစ်ဖွားစေတော်မူ၏။”—သု. ၈:၂၂-၂၆။
အထက်တွင်ဖော်ပြထားသောဉာဏ်ပညာ၏ပြယုဂ်သည် ကျမ်းစာတွင် ‘နှုတ်မြွက်စကားတော်” နှင့်စပ်လျဉ်း၍ဖော်ပြထားချက်နှင့် အမှန်ပင်ကိုက်ညီပါသည်တကား! ‘အစအဦး၌ နှုတ်မြွက်စကားတော်ရှိ၏။ နှုတ်မြွက်စကားတော်သည် ဘုရားသခင်နှင့်အတူရှိ၏။ နှုတ်မြွက်စကားတော်သည်လည်း ဘုရားသခင်တစ်ပါးဖြစ်တော်မူ၏’ ဟူ၍ တမန်တော်ယောဟန်ရေးခဲ့သည်။ (ယောဟန် ၁:၁) တင်စားထားသည့်ဉာဏ်ပညာသည် ဘုရားသခင်၏သားတော် ယေရှုခရစ်၏လူသားဘဝမတိုင်မီအသက်တာကို ပုံဆောင်သဘောအရကိုယ်စားပြုသည်။ *
ယေရှုခရစ်သည် “ဝေနေယျသတ္တဝါအပေါင်းတို့တွင်လည်း သားဦးဖြစ်တော်မူ၏။ အကြောင်းမူကား ထိုသားတော်သည် ကောင်းကင်ပေါ်၊ မြေကြီးပေါ်မှာရှိသမျှသော ရူပအရာ၊ အရူပအရာ၊ . . . ခပ်သိမ်းသောအရာတို့ကို ဖန်ဆင်းတော်မူ၏။” (ကောလောသဲ ၁:၁၅၊ ၁၆) ဉာဏ်ပညာ၏ပြယုဂ်က ဤသို့ဆက်၍ဆိုသည်– “[ယေဟောဝါသည်] မိုးကောင်းကင်ကိုပြင်တော်မူသောအခါ ငါရှိ၏။ သမုဒ္ဒရာမျက်နှာကို ကန့်ကွက်သောအမှု၊ အထက်မိုးတိမ်ကိုတည်စေသောအမှု၊ နက်နဲသောအရပ်၌ စမ်းရေပေါက်တို့ကို ခိုင်ခံ့စေသောအမှု၊ သမုဒ္ဒရာ၌ကန့်ကွက်သောအပိုင်းအခြားကို ရေမလွှမ်းရမည်အကြောင်း စီရင်သောအမှု၊ မြေကြီးတိုက်မြစ်တည်သောအမှုတို့ကို ပြီးစီးစေတော်မူသောအခါ ငါသည် ကျွေးမွေးတော်မူသောသားကဲ့သို့ အထံတော်ပါးတွင်နေ၍ အစဉ်မပြတ်မွေ့လျော်တော်မူရာဖြစ်၏။ ရှေ့တော်၌ အစဉ်မပြတ်ကစားလျက်၊ ဖန်ဆင်းတော်မူသောမြေကြီးတစ်ပြင်လုံးတွင် ရွှင်လန်းလျက် လူသားတို့နှင့်ပေါင်းဖော်၍ ပျော်ပါးလျက်နေ၏။” (သု. ၈:၂၇-၃၁) ယေဟောဝါ၏သားဦးသည် မိမိခမည်းတော်ဘေးတွင်ရှိပြီး ကောင်းကင်၊ မြေကြီးကိုဖန်ဆင်းသည့် ပြိုင်ဘက်ကင်းဖန်ဆင်းရှင် ကိုယ်တော်နှင့်အတူ တက်ကြွစွာအလုပ်လုပ်ခဲ့သည်။ ယေဟောဝါဘုရားသခင်သည် ဦးဆုံးလူကိုဖန်ဆင်းသောအခါ ကိုယ်တော်၏သားတော်သည် လုပ်သားချုပ်အဖြစ် ထိုစီမံချက်တွင် ကိုယ်တော်နှင့်အတူ တွဲဖက်လုပ်ဆောင်ခဲ့သည်။ (ကမ္ဘာဦး ၁:၂၆) ယင်းကြောင့် ဘုရားသခင်၏သားတော်သည် လူသားတို့ကို အလွန်စိတ်ဝင်စားပြီး ချစ်ခင်ခြင်းကိုပင် အံ့ဩစရာမဟုတ်ပေ!
“ငါ့စကားကိုကြား . . . သောသူသည် မင်္ဂလာရှိ [ပျော်ရွှင်]၏”
ဉာဏ်ပညာ၏ပြယုဂ်အဖြစ် ဘုရားသခင်၏သားတော်သည် ဤသို့မိန့်ဆိုသည်– “သို့ဖြစ်၍ ငါ့သားတို့ ငါ့စကားကိုနားထောင်ကြလော့။ ငါ၏လမ်းများကို စောင့်ရှောက်သောသူတို့သည် မင်္ဂလာရှိ [ပျော်ရွှင်]ကြ၏။ ငါဆုံးမခြင်းကိုမပယ်ကြနှင့်။ နားထောင်၍ပညာရှိကြလော့။ ငါ့စကားကိုကြား၍ ငါ့တံခါးနားမှာ နေ့တိုင်းစောင့်လျက်၊ တံခါးတိုင်နားမှာ မျှော်လင့်လျက်နေသောသူသည် မင်္ဂလာရှိ၏။ ငါ့ကိုရှာ၍တွေ့သောသူသည် အသက်ကိုတွေ့၏။ ထာဝရဘုရား၏ကျေးဇူးတော်ကိုလည်းခံရ၏။ ငါ့ကိုပြစ်မှားသောသူမူကား မိမိအသက်ဝိညာဉ်ကိုပြစ်မှား၏။ ငါ့ကိုမုန်းသောသူအပေါင်းတို့သည် သေခြင်းကိုချစ်ကြ၏။”—သု. ၈:၃၂-၃၆။
ယေရှုခရစ်သည် ဘုရားသခင့်ဉာဏ်ပညာ၏ပြယုဂ်ဖြစ်သည်။ “ထိုနက်နဲသောအရာ၌ ပညာဘဏ္ဍာ၊ ဉာဏ်ဘဏ္ဍာရှိသမျှတို့သည် ဝှက်ထားလျက်ရှိကြ၏။” (ကောလောသဲ ၂:၃) ထို့ကြောင့် ကိုယ်တော့်စကားကို ဂရုတစိုက်နားထောင်ပြီး ကိုယ်တော်၏ခြေရာကို အနီးကပ်လိုက်လျှောက်ကြစို့လေ။ (၁ ပေတရု ၂:၂၁) ‘ထိုသခင်မှတစ်ပါး ငါတို့ကိုကယ်တင်နိုင်သောသူ တစ်စုံတစ်ယောက်မျှမပေါ်မရှိ’ သောကြောင့် ကိုယ်တော်ကိုငြင်းပယ်ခြင်းသည် ကျွန်ုပ်တို့၏စိုးလ်ဝိညာဉ်ကိုပြစ်မှားပြီး သေခြင်းကိုချစ်ခြင်းပင်ဖြစ်သည်။ (တမန်တော် ၄:၁၂) မှန်သည်၊ ကျွန်ုပ်တို့၏ကယ်တင်ခြင်းအတွက် ဘုရားသခင်ပေးသနားထားသူအဖြစ် ယေရှုကိုလက်ခံကြစို့လေ။ (မဿဲ ၂၀:၂၈; ယောဟန် ၃:၁၆) သို့ဖြင့် ‘အသက်ကိုရှာတွေ့ပြီး ယေဟောဝါ၏ကျေးဇူးတော်ကိုခံရခြင်း’ မှရရှိမည့်ပျော်ရွှင်မှုကို ကျွန်ုပ်တို့ခံစားကြရလိမ့်မည်ဖြစ်သည်။
[အောက်ခြေမှတ်ချက်များ]
^ အပိုဒ်၊ 6 “ဉာဏ်ပညာ” အတွက်ဟေဗြဲစကားလုံးမှာ ဣတ္ထိလိင်ဖြစ်သည်။ ထို့ကြောင့် ဘာသာပြန်ကျမ်းအချို့က ဉာဏ်ပညာကိုညွှန်းသောအခါ ဣတ္ထိလိင်နာမ်စားကို အသုံးပြုကြသည်။
^ အပိုဒ်၊ 25 “ဉာဏ်ပညာ” အတွက် ဟေဗြဲစကားလုံးမှာ အမြဲတမ်းဣတ္ထိလိင်ဖြစ်ခြင်းသည် ဘုရားသခင့်သားတော်ကိုဖော်ပြရန် ဉာဏ်ပညာကိုအသုံးပြုခြင်းနှင့် မဆန့်ကျင်ပါ။ “ဘုရားသခင်သည် ချစ်ခြင်းမေတ္တာဖြစ်တော်မူ၏” ဟူသောဖော်ပြချက်တွင် “ချစ်ခြင်းမေတ္တာ” အတွက် ဂရိစကားလုံးသည်လည်း ဣတ္ထိလိင်ပင်ဖြစ်သည်။ (၁ ယောဟန် ၄:၈) သို့တိုင် ဘုရားသခင်အားရည်ညွှန်းရာတွင် ယင်းကိုအသုံးပြုသည်။
[စာမျက်နှာ ၂၆ ပါ ရုပ်ပုံ]
ဉာဏ်ပညာသည် တာဝန်ရှိအဆင့် ရရှိထားသူများအတွက် မရှိမဖြစ်လိုအပ်
[စာမျက်နှာ ၂၇ ပါ ရုပ်ပုံ]
ဉာဏ်ပညာပေးသည့် ပြင်ဆင်ပေးမှုများကို လျစ်လျူမရှုပါနှင့်