သင်၏​သိစိတ်ကို စောင့်ရှောက်​လော့

ကွန်ပျူတာ​ပရိုဂရမ်​မှား​နေသည့် လေယာဉ်​တစ်စင်း​ကို​စီး​ရခြင်း​သည် အလွန်​ကြောက်စရာ​ပင်။ ယင်းအစား လေယာဉ်​၏​လမ်းညွှန်​စနစ်​ကို တစ်စုံ​တစ်ယောက်​က လက်​ဆော့​ထား​သည်၊ သို့​မဟုတ် အကြောင်းအချက်​များ​ကို တမင်တကာ​ဖျက်​ထား​သည်​ဟု စိတ်ကူး​ကြည့်​ကြ​ပါ! အလားတူ ပုံဆောင်​သဘောဖြင့် သင်၏​သိစိတ်ကို ထို​နည်း​ထပ်တူ​ဖြစ်စေ​ရန် တစ်ဦး​တစ်ယောက်​က​ကြိုးစား​လျက်​ရှိ၏။ သင်၏​ကိုယ်ကျင့်တရား​လမ်းညွှန်​စနစ်​ကို ပျက်ပြား​သွားစေရန် သူ​ဆုံးဖြတ်ထား​သည်။ သူ၏​ရည်ရွယ်ချက်မှာ သင်သည် ဘုရားသခင်​နှင့်​ဆန့်ကျင်ဖီလာ​သော​လမ်းကြောင်း​ပေါ် ရောက်သွား​စေရန်​ဖြစ်သည်!—ယောဘ ၂:၂-၅; ယောဟန် ၈:၄၄။

ဤ​ရက်စက်​သော​အဖျက်သမား​ကား မည်သူ​နည်း။ သမ္မာကျမ်းစာ​တွင် သူ့ကို “လူနေထိုင်ရာ​မြေတစ်ပြင်လုံး​ကို​လှည့်စား​သော . . . စာတန် . . . မူလ​မြွေ​နဂါး​ကြီး” ဟု​ခေါ်ဆို​ထား​သည်။ (ဗျာဒိတ် ၁၂:၉၊ က​ဘ) ဧဒင်ဥယျာဉ်​တွင် သူသည် ဧဝ​အား ဟုတ်မှန်​သ​ယောင်​ယောင် ကျိုးကြောင်း​ဆင်ခြင်မှု​ကို​သုံးပြီး သူသိ​ထား​သည့်​အမှန်တရားကို လျစ်လျူရှု​၍ ဘုရားသခင်​ကို​ပုန်ကန်​ရန် သွေးဆောင်​သောအခါ သူ၏​လှုပ်ရှားမှု​ကို​တွေ့မြင်​ခဲ့​ကြ​ရသည်။ (ကမ္ဘာဦး ၃:၁-၆၊ ၁၆-၁၉) ထို​အချိန်​ကတည်းက စာတန်​သည် လူသားထု​တစ်ရပ်လုံး​ကို ဘုရားသခင်​နှင့်​ရန်ဘက်ပြု​စေရန် သွေးဆောင်​လှည့်ဖြား​သော​အဖွဲ့အစည်း​များ ဖြစ်ပေါ်​လာဖို့ ဉာဏ်​ဆင်​ခဲ့​၏။ ဤ​အဖွဲ့အစည်း​များ​တွင် အပြစ်ဆိုဖွယ်​အရှိဆုံး​မှာ မှောက်မှားသော​ဘာသာရေး​ဖြစ်သည်။—၂ ကောရိန္သု ၁၁:၁၄၊ ၁၅။

မှောက်မှားသော​ဘာသာရေး​က သိစိတ်ကို ပျက်ပြား​စေ

ဗျာဒိတ်ကျမ်း​တွင် မှောက်မှားသော​ဘာသာရေး​ကို မဟာ​ဗာဗုလုန်​ဟု​ခေါ်ဆို​ထား​သည့် ပုံဆောင်​ပြည့်တန်ဆာ​အဖြစ် တွေ့မြင်​ရ၏။ သူ၏​သွန်သင်ချက်​များသည် လူများစွာ​၏ ကိုယ်ကျင့်တရား​သိစိတ်​များ​ကို မှား​မှားယွင်း​ယွင်း​ဖြစ်စေ​ပြီး ယုံကြည်ချက်​မတူညီ​သူတို့ကို မုန်းတီး​၍ အကြမ်းဖက်​ရက်စက်​စွာ​ပြုမူ​စေ​ခဲ့ပြီ။ အမှန်​မှာ ဗျာဒိတ်ကျမ်း​အရ ဘုရားသခင်​အား ဝတ်ပြု​ကိုးကွယ်​သူများ​အပါအဝင် “မြေကြီး​ပေါ်မှာ​အသတ်ခံရ​သော​သူ​ရှိသမျှ​တို့၏” အသွေး​အတွက် အဓိက​တာဝန်ခံ​ရမည့်​သူ​ကား မှောက်မှားသော​ဘာသာရေး​ဖြစ်သည်ဟု ကိုယ်တော်​သတ်မှတ်​ထား​တော်​မူ​ပြီ။—ဗျာဒိတ် ၁၇:၁-၆; ၁၈:၃၊ ၂၄၊ က​ဘ။

“သင်တို့ကို​သတ်​သော​သူ​မည်​သည်​ကား ဘုရား[သခင်] ဝတ်​ကို​ငါ​ပြု​ပြီ​ဟု မိမိ​ထင်မှတ်​သော​အချိန်ကာလ​ရောက်​လိမ့်​မည်” ဟူ၍​ယေရှု​မိန့်ဆိုခဲ့​ချိန်​တွင် မှောက်မှားသော​ဘာသာရေး​သည် လူ​အချို့​၏ ကိုယ်ကျင့်တရား​အိမ်မြှောင်​ကို မည်မျှ​တိုင်​ပျက်ပြား​စေမည်​အကြောင်း တပည့်တော်​များ​အား သတိပေး​ခဲ့​သည်။ ဤ​အကြမ်းဖက်​သူများ​သည် ကိုယ်ကျင့်တရား တကယ်​ကင်းမဲ့​နေသည်​တကား! ဤ​သူတို့သည် “ခမည်းတော်​ကို​မသိ၊ ငါ့ကို​လည်း​မသိ” ဟု​ယေရှု​မိန့်တော်မူ၏။ (ယောဟန် ၁၆:၂၊ ၃) ထိုစကား​များ​ကို ယေရှု​မိန့်တော်မူ​ပြီး များ​မကြာမီ​အချိန်တွင် ကိုယ်တော်တိုင်​သည် သူတို့၏​ပြစ်မှု​ကို သူတို့၏​သိစိတ်​ဖြင့် ချိန်ညှိ​ပေး​နိုင်​ခဲ့​ကြ​သည့် ဘာသာရေး​ခေါင်းဆောင်​အချို့​၏ စေခိုင်း​ချက်​ဖြင့် အသတ်ခံခဲ့ရ​၏။ (ယောဟန် ၁၁:၄၇-၅၀) ယင်း​နှင့်​ခြားနား​သည်​ကား ယေရှု၏​စစ်မှန်သော​နောက်လိုက်​များသည် အချင်းချင်းချစ်​ကြ​ခြင်း​အားဖြင့် ခွဲခြား​သတ်မှတ်​ခံရ​မည်​ဟု ကိုယ်တော်​မိန့်တော်မူ​ခဲ့​သည်။ သူတို့၏​ရန်သူများ​ကို​ပင် ချစ်​နိုင်​သည်​အထိ သူတို့၏​မေတ္တာသည် ကျယ်ပြန့်​သည်။—မဿဲ ၅:၄၄-၄၈; ယောဟန် ၁၃:၃၅။

လူများစွာ​၏​သိစိတ်ကို မှောက်မှားသော​ဘာသာရေး​က ပျက်ပြား​စေသည့် နောက်တစ်နည်း​မှာ ရေပန်းစား​ရာ မည်သည့်​ကိုယ်ကျင့်တရား​ကို​မဆို သို့​မဟုတ် ကိုယ်ကျင့်တရား​မဲ့​ခြင်း​ကို လိုက်လျော​ခြင်း ဖြစ်သည်။ ယင်းကို​တင်ကူး​၍ တမန်​တော်​ပေါလု​က ဤသို့​ဆို​ခဲ့​သည်– “နောင်​ကာလ​၌​လူတို့သည် စင်ကြယ်သော [ဆုံးမ​စကား] ကို​နာမခံ​လို၊ ယား​သော​နား​ရှိ​လျက် ကိုယ်​သဘော​အတိုင်း များပြား​သော​ဆရာ​တို့ကို​ရှာ​လိမ့်​မည်။”—၂ တိမောသေ ၄:၃၊ က​ဘ။

ယနေ့ ဘာသာရေး​ခေါင်းဆောင်​များသည် အိမ်ထောင်ဖက်​မဟုတ်​သူနှင့် ကာ​မဆက်ဆံ​ခြင်း​ကို ဘုရားသခင်​လက်သင့်ခံ​ပေမည်​ဟု ပြောဆိုခြင်း​ဖြင့် လူတို့၏​နား​ကို ယား​စေ​ကြသည်။ အခြားသူ​တို့​မူ လိင်​တူ​မေထုန်​ကို ခွင့်ပြု​ထား​ကြ​၏။ အမှန်​မှာ ခရစ်ယာန်​ဘုန်းကြီး​အချို့​ကိုယ်တိုင် လိင်​တူ​မေထုန်ပြု​သူများ​ဖြစ်​ကြသည်။ ဗြိတိသျှ​သတင်းစာ သည်​တိုင်းမ်​စ်​တွင် ဆောင်းပါး​တစ်ပုဒ်​က “လူသိရှင်ကြား လိင်​တူ​မေထုန်​ဆက်ဆံ​သူ ခရစ်ယာန်​ဘုန်းတော်ကြီး​ဆ​ယ့်​သုံးပါး” ကို ချာ့ခ်ျ​အော့ဖ်​အင်္ဂလန်​အသင်း​၏ အထွေထွေ​ကောင်စီ​ဝင်​များ​အဖြစ် ရွေးကောက်​ထား​ကြောင်း ဖော်ပြ​သည်။ ချာ့ခ်ျ​ခေါင်းဆောင်​များသည် သမ္မာကျမ်းစာ​ကျင့်ဝတ်​တရားကို စွန့်ပယ်​၍ သူတို့၏​ချာ့ခ်ျ​များ​က​လည်း ယင်းကို လုံးဝ​အရေးမယူ​သောအခါ သာ​သ​နာ့​နယ်ပယ်​ရှိသူတို့​သည် အဘယ်​စံနှုန်း​များ​ကို လိုက်နာ​ကြ​မည်​နည်း။ ယင်းကြောင့် သန်းနှင့်ချီ​သူတို့သည် လုံးဝ​ရှုပ်ထွေး​ကုန်​ကြသည်​မှာ အံ့အားသင့်​စ​ရာ​မဟုတ်​ချေ။

သမ္မာကျမ်းစာ​တွင်​သွန်သင်ထား​သည့် အချက်ပြ​မီး​ပြ​ကဲ့သို့​သော ကိုယ်ကျင့်တရား​နှင့် ဝိညာဉ်​ရေး​အမှန်တရား​များ​၏ ညွှန်ကြားမှု​ကို​ခံရ​ခြင်း​ကား တကယ်​ကောင်း​လေ​စွ! (ဆာလံ ၄၃:၃; ယောဟန် ၁၇:၁၇) ဥပမာ၊ မတရားမေထုန်​ပြုသူ​နှင့် သူ့​သား​အိမ်ရာ​ပြစ်မှားသူ​တို့သည် “ဘုရားသခင်​၏​နိုင်ငံတော်​ကို အမွေမခံ​ရ” ဟု သမ္မာကျမ်းစာ​က​သွန်သင်ထား​သည်။ (၁ ကောရိန္သု ၆:၉၊ ၁၀) “ပကတိ​ထုံးစံ​ကို​စွန့်​၍ ပကတိ​နှင့်​ဆန့်ကျင်ဘက်​ထုံးစံ​ကို” လိုက်​ကြသော အမျိုးသား​နှင့် အမျိုးသမီး​တို့သည် ဘုရားသခင့်​မျက်မှောက်​၌ “ရှက်ကြောက်​ဖွယ်​သော​အမှုကို” ပြု​ကြပြီ​ဟု​ဆို​ထား​သည်။ (ရောမ ၁:၂၆၊ ၂၇၊ ၃၂) ကိုယ်ကျင့်တရား​နှင့်​ဆိုင်သော ဤ​အမှန်တရား​များ​မှာ မစုံလင်သူ​များ​၏​ထုတ်လုပ်​ရာ​များ မဟုတ်​ချေ; ၎င်းတို့သည် ဘုရားသခင်​တစ်ခါမျှ မ​ပယ်ဖျက်​ခဲ့​သော ကိုယ်တော်​၏​မှုတ်သွင်းခံ​စံနှုန်း​များ​ဖြစ်၏။ (ဂလာတိ ၁:၈; ၂ တိမောသေ ၃:၁၆) သို့သော် သိစိတ်ကို ပျက်ပြား​သွားစေရန် အခြား​နည်း​များ စာတန်​၌​ရှိပါ​သည်။

အပန်းဖြေရာတွင် ရွေးချယ်​ပါ

လူတစ်ဦး​အား ဆိုးယုတ်​သော​အမှုကို အတင်းအကျပ်​ပြုလုပ်​စေခြင်း​မှာ တစ်​ကဏ္ဍ​ဖြစ်​ပြီး ထို​အပြစ်ကို​ကျူးလွန်​ရန် အလိုဆန္ဒ​ရှိစေဖို့ သူ့​အား​သွေးဆောင်ခြင်း​သည် အခြား​ကဏ္ဍ​တစ်ရပ်​ဖြစ်၏။ ယင်းသည် “ဤ​လောကကို​အစိုး​ရသော​မင်း၊” စာတန်​၏​ပန်းတိုင်​ပင်​ဖြစ်သည်။ မိုက်မဲ​သူ သို့​မဟုတ် အမှတ်တမဲ့​နေ​သူ—အထူးသဖြင့် တိုက်ခိုက်​ရ​အလွယ်ဆုံး လူငယ်များ—၏ စိတ်နှလုံး​တွင် သူ၏​ယုတ်ညံ့​သော​စိတ်ကူး​စိတ်​သန်း​များ​ကို အရာထင်​စေဖို့ ယုံမှား​သံသယဖြစ်ဖွယ်​ရှိ​စာပေ၊ ရုပ်ရှင်၊ တေးဂီတ၊ ကွန်ပျူတာ​ကစား​နည်း​များနှင့် အင်တာနက်​ရှိ​ညစ်ညမ်း​သည့်​အ​ပြာပုံ​များ​စ​သည့် နည်းလမ်းများ​ကို သူ​အသုံးပြု​သည်။—ယောဟန် ၁၄:၃၀; ဧဖက် ၂:၂။

“ကလေး​များ​အတွက် တီဗွီ​အစီအစဉ်များ​သည် အကြမ်း​အ​ဖက်​ဆုံး​ဖြစ်” ၍ “[အမေရိကန်​ပြည်ထောင်စု​ရှိ] လူငယ်များသည် အကြမ်းဖက်မှု ၁၀,၀၀၀ ခန့်​ကို နှစ်စဉ် ကြည့်ရှု​ကြ​ကြောင်း ခန့်မှန်း​ရ၏” ဟု ကလေး​ရောဂါ​များ​ဂျာနယ်​မှ အစီရင်ခံ​ချက်​တစ်ခု​က​ဆို​သည်။ အဆိုပါ​အစီရင်ခံ​ချက်​က​ပင် “ဆယ်ကျော်သက်​များသည် လိင်ဆိုင်ရာ​အညွှန်းများ၊ စောင်း​ချိတ်​ပြောဆိုမှု​များနှင့် ပြက်လုံး​များ ၁၅,၀၀၀ နီးပါး​ခန့်​ကို နှစ်စဉ်​ကြည့်ရှု​ကြ​ရသည်” ဟူ၍လည်း​ဖော်ပြ​သည်။ ရုပ်မြင်သံကြား​ကို လူအများ​ဆုံး​ကြည့်​ချိန်​တွင်​ပင် “တစ်​နာရီ​လျှင် လိင်ဆိုင်ရာ​ပြကွက် ၈ ကြိမ်​ကျော်​ရှိပြီး ယင်းသည် ၁၉၇၆ ခုနှစ်​က​ထက် လေးဆ​သာ၍​များ​ကြောင်း” ဖော်ပြ​သည်။ ထို​လေ့လာ​ဆန်းစစ်မှု​အရ “ရိုင်း​ပျ​ညစ်ညမ်း​သော​စကား​သည်လည်း တစ်မုဟုတ်ချင်း​တိုးပွား​များပြား​လာ​လျက်​ရှိ” ကြောင်းကို တွေ့ရှိ​ရသည်မှာ အံ့အားသင့်​စ​ရာ​မဟုတ်​ချေ။ သမ္မာကျမ်းစာ​နှင့် အခြား​လေ့လာ​သုံးသပ်ချက်​များစွာ​တို့​က​ပါ ယင်း​သို့​သော​အကြောင်းအရာကို အမြဲ​ခံယူ​နေခြင်း​သည် လူ​တို့ကို  သာ၍​ဆိုးရွား​သွား​စေ​သည်​ဟု သတိပေး​သည်။ သို့​ဖြစ်၍ သင်သည် ဘုရားသခင်​၏​အလိုတော်နှင့် အမှန်​တွေ့​လို​ပြီး မိမိကိုယ်ကို​အကျိုးပြု​လိုလျှင် ဤသို့​ဆို​သည့် နယပုံပြင် ၄:၂၃ ကို ဂရုပြုပါ– “နှလုံး​သည် အသက်​၏​အခြေအမြစ်​ဖြစ်သော​ကြောင့် သင်၏​နှလုံးကို အထူးသဖြင့်​စောင့်ရှောက်​လော့။”—ဟေရှာယ ၄၈:၁၇။

လူကြိုက်များ​သော တေးဂီတ​များစွာ​သည်လည်း သိစိတ်ကို ပျက်စီး​စေ​တတ်​သည်။ အနောက်​တိုင်းနိုင်ငံ​များစွာ​တွင် ရေပန်း​စား၍ အရောင်း​အ​သွက်​ဆုံး​သီချင်းများ​ကို​သီဆို​သော အဆိုကျော်​တစ်ဦး​သည် “ထိတ်လန့်​တုန်လှုပ်​သွားစေရန် အထူး​ကြိုးစား” တတ်​ကြောင်း ဩစတြေးလျ​မှ သည်​ဆန်း​ဒေး​မေးလ်​သတင်းစာ​ပါ အစီရင်ခံ​ချက်​တစ်ခု​က သတိပေး​သည်။ “သူ၏​သီချင်းများ​သည် ဆေးခြောက်၊ သွေးသား​နီး​သူ​ချင်း ကာ​မဆက်ဆံ​မှု​နှင့် ဗလက္ကာရပြု​မှု​ကို အမွှမ်းတင်” သည့်​အပြင် “သူ၏​ဇနီး​ကို သတ်​ပြီး အလောင်းကို ရေကန်​ထဲ ပစ်ချ​၏​ဟု သီဆို” ကြောင်း အဆိုပါ​ဆောင်းပါး​က​ဖော်ပြ​သည်။ အခြား​သီချင်း​စာသား​များ​မှာ ဤ​တွင်​ဖော်ပြ​ရန် အလွန်​ညစ်ညမ်း​လွန်း​သည်။ သို့​တိုင် သူ၏​တေးသီချင်း​ကြောင့် သူ​ဂုဏ်တင်​ချီးမြှင့်​ခံ​ခဲ့​ရသည်။ တေးဂီတ​ဖြင့် သကာ​ရည်​လူး​ထားသော အထက်​ဖော်ပြ​ပါ ဘေးသင့်​စေသော​အကြံအစည်​များ​ကို သင်၏​စိတ်နှလုံး​ထဲ ပျိုး​ကြဲ​လို​မည်​လော။ ထိုသို့​ပြု​လို​မည်​မဟုတ်​ဟု​မျှော်လင့်​သည်၊ အကြောင်း​မှာ ထိုသို့​ပြုသူ​တို့သည် သူတို့၏​သိစိတ်ကို ညစ်ညူး​သွား​စေ​၍ အဆုံး​တွင် သူတို့​အထဲ​၌ “ဆိုးညစ်သော​စိတ်နှလုံး” ရှိစေ​ရာ ဘုရားသခင့်​ရန်သူများ​ဖြစ်သွား​စေ​သည်။—ဟေဗြဲ ၃:၁၂; မဿဲ ၁၂:၃၃-၃၅။

သို့​ဖြစ်၍ အပန်းဖြေမှု​ကို ပညာရှိရှိ​ရွေးချယ်​ပါ။ သမ္မာကျမ်းစာ​က ကျွန်ုပ်​တို့ကို ဤသို့​တိုက်တွန်း​ထား​သည်– “ညီအစ်ကို​တို့၊ သမ္မာတရား​နှင့်​ဆိုင်သော​အကျင့်၊ လျောက်ပတ်​သော​အကျင့်၊ ဖြောင့်မတ်​သော​အကျင့်၊ စင်ကြယ်သော​အကျင့်၊ သူတစ်ပါး​နှစ်သက်ဖွယ်သော​အကျင့်၊ ချီးမွမ်းဖွယ်​သော​အကျင့်​ရှိသမျှ​တို့ကို​လည်းကောင်း၊ ပါရမီ [အရည်အသွေး]တစ်ပါးပါး၊ ကောင်းသော​သတင်း​တစ်ပါးပါး​နှင့်​ဆိုင်သော အကျင့်​တို့ကို​လည်းကောင်း နှလုံး​သွင်း​ကြလော့။”—ဖိလိပ္ပိ ၄:၈။

အပေါင်းအသင်း​များသည် သင့်​သိစိတ်​အပေါ် သက်ရောက်မှု​ရှိ

ငယ်​စဉ်​က နီး​လ်​နှင့် ဖရန့်​ဇ်​တို့သည် စိတ်ရင်းမှန်​သော​ခရစ်ယာန်​များနှင့် တည်ဆောက်မှု​ရှိ​ရှိ ပေါင်းသင်း​ခဲ့​ကြ​၏။ * သို့သော် အတန်​ကြာသော် “မကောင်းတဲ့​အပေါင်းအသင်းတွေ​နဲ့ ကျွန်တော်​စ​ပေါင်း​လာတယ်” ဟု နီး​လ်​ပြောပြ​သည်။ အဆုံး​ရလဒ်​မှာ သူ့ကို များစွာ​နောင်တ​ရစေ​သည့် ရာဇဝတ်မှု​နှင့် ထောင်ကျ​သွားခြင်း​တို့​ဖြစ်သည်။ ဖရန့်​ဇ်​သည်လည်း အလားတူ​ပင်။ “လောက​လူငယ်တွေရဲ့​အကျင့် မ​ကူးစက်​ဘဲ သူတို့နဲ့​ပေါင်း​နိုင်​မယ်​လို့ ကျွန်တော်​ထင်​ခဲ့​တာ” ဟု​ဝမ်းနည်း​စွာ​သူ​ပြောပြ​သည်။ “ဒါပေမဲ့ ဂလာတိ ၆:၇ ပြော​သလိုပဲ ‘ဘုရားသခင်​ဟာ မထီမဲ့မြင်​ပြုခြင်း​ကို မခံ​ဘူး၊ လူဟာ မျိုးစေ့ကြဲ​တဲ့​အတိုင်း ရိတ်​ရတာပဲ။’ ကျွန်တော်​မှား​ပြီး ယေဟောဝါ​မှန်တယ်​ဆိုတာ ခက်ခက်ခဲခဲ​သိလာတယ်။ ကျွန်တော်​ကျူးလွန်​ခဲ့​တဲ့​အမှား​အတွက် တစ်သက်တစ်ကျွန်း​အပြစ်ဒဏ်​စီရင်ခံ​ရပြီ။”

နီး​လ်​နှင့် ဖရန့်​ဇ်​တို့​ကဲ့သို့​သော​သူတို့သည် ပြစ်မှုကျူးလွန်​ခြင်း​ကို ည​တွင်​ချင်း​ပြု​မည်​မဟုတ်; အစပိုင်း​တွင် သူတို့ စဉ်းစား​ပင် စဉ်းစားမိ​လိမ့်​မည်​မဟုတ်​ချေ။ မသိမသာ​အဆင့်ဆင့်​ရွေ့​လျော့​သွားခြင်း​ဖြစ်​ပြီး ဦးဆုံး​မှာ မကောင်းသော​အပေါင်းအသင်း ဖြစ်လေ့ဖြစ်ထ​ရှိသည်။ (၁ ကောရိန္သု ၁၅:၃၃) ဆေးခြောက် သို့​မဟုတ် အရက်​ကို အလွဲသုံးစား​ပြုခြင်း​လိုက်ပါ​လာပေမည်။ အမှန်​မှာ သိစိတ်ကို “အရက်​၌​ပျော်ဝင်​နိုင်သော ပင်ကိုစရိုက်​တစ်စိတ်​တစ်ပိုင်း” အဖြစ် ဖော်ပြ​ထားခြင်း​မှာ ဆီလျော်​လှ​ပေ​၏။ ထို​မှ​တစ်ဆင့် ပြစ်မှု​ပြု​ရန် သို့​မဟုတ် အကျင့်​ယိုယွင်း​ရန် ခြေလှမ်း​စိပ်စိပ်​သာ​ကျန်​တော့​သည်။

သို့​ဆိုလျှင် ထို​ပထမ​ခြေလှမ်း​ကို အဘယ်ကြောင့်​ယူ​မည်​နည်း။ သို့​ပြု​မည့်​အစား ဘုရားသခင်​ကို​အမှန်တကယ်​ချစ်​မြတ်နိုးသူ ပညာရှိ​တို့ နှင့်​ပေါင်းဖော်​ပါ။ သူတို့သည် သင်၏​သိစိတ်ကို ခိုင်ခံ့​စေရန် ကူညီပေး​လိမ့်​မည်၊ သို့ဖြင့် ယင်းသည် သင့်ကို​လျောက်ပတ်​စွာ​လမ်းပြ​ပေး​ကာ များစွာသော​ဝမ်းနည်းခြင်း​နှင့် ကင်းဝေး​စေ​လိမ့်​မည်။ (သု. ၁၃:၂၀) ထောင်ကျ​နေဆဲ​ဖြစ်​ကြ​သည့် နီး​လ်​နှင့် ဖရန့်​ဇ်​တို့သည် မိမိတို့၏​သိစိတ်ကို ကောင်းစွာ​လေ့ကျင့်ပေး​၍ တကယ်​တန်ဖိုး​ထား​အပ်သော ဘုရားသခင်​၏​ဆုကျေးဇူး​တစ်ခု​အဖြစ် ယခု​တွေ့မြင်​လာ​လေ​ပြီ။ ထို့​ပြင် သူတို့သည် သူတို့၏​ဘုရားသခင်၊ ယေဟောဝါ​နှင့် ဆက်ဆံ​ရေး​ကောင်း​စေရန် ကြိုးစား​နေကြ​သည်။ ပညာ​ရှိပါ၊ သူတို့၏​အမှား​မှ သင်ခန်းစာ​ယူပါ။—သု. ၂၂:၃။

သင်၏​သိစိတ်ကို ဂရုစိုက်​လော့

ဘုရားသခင်​ကို​ချစ်ခြင်း၊ ယုံကြည်ခြင်း​နှင့်​တကွ ကိုယ်တော့်​အား ကြောက်ရွံ့​ခြင်း​ကို ကျွန်ုပ်​တို့​တည်ဆောက်​ကြသောအခါ ကျွန်ုပ်​တို့၏​သိစိတ်ကို ဂရုစိုက်​လို​ကြောင်း တင်ပြ​ရာ​ကျ​သည်။ (သု. ၈:၁၃; ၁ ယောဟန် ၅:၃) ဤ​သြဇာလွှမ်း​မိုး​မှုများ​ကင်းမဲ့​သော သိစိတ်​သည် ကိုယ်ကျင့်တရား​ခိုင်မြဲ​လေ့​မရှိကြောင်း သမ္မာကျမ်းစာ​က ဖော်ပြ​သည်။ ဥပမာ၊ ဆာလံ ၁၄:၁ က “ဘုရားသခင်​မရှိ” ဟု မိမိတို့၏​စိတ်နှလုံး​ထဲ​၌ ပြောဆို​ကြ​သူများ​အကြောင်း ဖော်ပြ​သည်။ ယုံကြည်ခြင်း​ကင်းမဲ့မှု​က သူတို့၏​အမူအကျင့်ကို မည်သို့​ထိခိုက်​သနည်း။ ထို​အခန်းငယ်​က ဤသို့​ဆက်​ပြောပြ​သည်– “သူတို့သည် ဆွေးမြေ့​ယိုယွင်း​၍ စက်ဆုပ်ဖွယ်​သော​အမှုကို ပြု​တတ်ကြ​၏။”

ဘုရားသခင်​၌ စစ်မှန်သော​ယုံကြည်ခြင်း​မရှိသူ​တို့​မှာ သာ၍​ကောင်းသော​အနာဂတ်​အတွက် ခိုင်မြဲ​သော​မျှော်လင့်ချက်လည်း​မရှိ​ချေ။ သို့​ဖြစ်၍ သူတို့သည် လက်ရှိ​အချိန်​အတွက်သာ အသက်ရှင်ပြီး ကာ​မ​ဂုဏ်​ခံစား​ပျော်ပါး​ကြသည်။ သူတို့၏​အတွေးအမြင်​မှာ “စား​ကြ​ကုန်​အံ့၊ သောက်​ကြ​ကုန်​အံ့၊ နက်ဖြန်​သေရ​ကြ​မည်” ဖြစ်သည်။ (၁ ကောရိန္သု ၁၅:၃၂) အခြား​တစ်ဖက်​တွင်​မူ ထာဝရ​အသက်ဆု​ကို မျက်ခြည်မပြတ်​သူတို့သည် တဒင်္ဂ​မျှ​ဖြစ်သော လောက​အပျော်အပါး​များ​ကြောင့် လမ်းကြောင်း​ပြောင်း​မသွား​ချေ။ တိကျ​မှန်ကန်သော လမ်းပြ​ကွန်ပျူတာ​တစ်လုံး​ကဲ့သို့​ပင် သူတို့၏​လေ့ကျင့်​ခံ​ထား​သည့် သိစိတ်​က ဘုရားသခင်​အား တည်ကြည်​စွာ​နာခံခြင်း လမ်းကြောင်း​ပေါ်​ရှိနေ​စေရန် သူတို့ကို ဆက်လက်​လမ်းညွှန်​ပေး​သည်။—ဖိလိပ္ပိ ၃:၈-၁၀။

သင့်​သိစိတ်​၏ တန်ခိုး​အာနိသင်​နှင့် ယင်း​၏​တိကျ​မှန်ကန်မှု​ကို ထိန်းသိမ်း​ထား​ရန် ဘုရားသခင့်​စကားတော်​မှ ပုံမှန်​လမ်းညွှန်မှု လိုအပ်​သည်။ သမ္မာကျမ်းစာ​သည် ထိုသို့​သော​လမ်းညွှန်မှုကို​ပေး​ကြောင်း ဤ​ရုပ်လုံးဖော်​သည့်​အသုံးအနှုန်း​က ဆို​သည်– “သင်သည် လက်ယာဘက်၊ လက်ဝဲဘက်​သို့​လမ်းလွဲ​လျှင် ‘ဤ​မည်​သော​လမ်း​သည်​မှန်​၏။ ဤ​လမ်း၌​သွားလော့’ ဟု သင့်​နောက်​၌​ပြော​သော​စကားသံ​ကို ကိုယ်​နား​နှင့်​ကြား​ရ​လိမ့်​မည်။” (ဟေရှာယ ၃၀:၂၁) သို့​ဖြစ်၍ နေ့စဉ် ကျမ်းစာ​ဖတ်ရှုခြင်း​အတွက် အချိန်ဖယ်​ထား​ပါ။ သင်သည် မှန်ရာကို​ပြုလုပ်​ရန် ခက်ခက်ခဲခဲ​ကြိုးစား​ရသောအခါ သို့​မဟုတ် စိတ်ပူ​ပင်​စိုးရိမ်​ရသောအခါ ထိုစကား​များသည် သင့်ကို ခွန်အား​ပေး​၍ ထောက်မ​လိမ့်​မည်။ သင်သည် ယေဟောဝါ​ကို အပြည့်အဝ​ယုံကြည်​ကိုးစား​မည်​ဆိုလျှင် ကိုယ်ကျင့်တရား​နှင့် ဝိညာဉ်​ရေး​အရ သင့်ကို ကိုယ်တော်​လမ်းညွှန်​ပေး​လိမ့်​မည်​ဟု ယုံကြည်​စိတ်ချ​ပါ​လေ။ မှန်ပါသည်၊ ဤသို့​ရေးသားခဲ့​သော ဆာလံဆရာ​ကို တုပ​ပါ​လေ– “ငါသည် ထာဝရ​ဘုရား​ကို အစဉ်မပြတ်​မျက်မှောက်ပြု​၏။ . . . ငါ့​လက်ယာဘက်​၌​တည်ရှိ​တော်​မူ​သည်​ဖြစ်၍ ငါသည်​လှုပ်ရှားခြင်း​မရှိ​ရ။”—ဆာလံ ၁၆:၈; ၅၅:၂၂။

[အောက်ခြေမှတ်ချက်]

[စာမျက်နှာ ၅ ပါ ရုပ်ပုံ]

သမ္မာကျမ်းစာ​တွင် “မဟာ​ဗာဗုလုန်” အဖြစ်​ဖော်ပြ​ထား​သည့် မှောက်မှားသော​ဘာသာရေး​သည် များစွာသော​သူတို့၏​သိစိတ် ထုံထိုင်း​သွား​ရခြင်း​၏ တာဝန်ခံ​ဖြစ်

[Credit Line]

Priest blessing troops: U.S. Army photo

[စာမျက်နှာ ၆ ပါ ရုပ်ပုံ]

အကြမ်းဖက်မှု​နှင့် အကျင့်​ယိုယွင်းမှု​ကို ရှုစားခြင်း​သည် သင်၏​သိစိတ်ကို ပျက်ပြား​သွား​စေမည်

[စာမျက်နှာ ၇ ပါ ရုပ်ပုံ]

ဘုရားသခင့်​စကားတော်​မှ လမ်းညွှန်မှု​မှန်မှန်​ရရှိ​ခြင်း​က သင်၏​သိစိတ်ကို စောင့်ကြပ်​ပေး​လိမ့်​မည်