ဝိညာဉ်​ရေး နှလုံး​ရပ်တန့် ခြင်း​ကို သင်​ရှောင်နိုင်

အားအင်​အပြည့်​နှင့် ကျန်းမာ​ရေး​အလွန်​ကောင်း​ပုံ​ရှိသည့် ကမ္ဘာ့​အဆင့်မီ​အားကစားသမား​တစ်ဦး​သည် လေ့ကျင့်​ချိန်​အတွင်း ရုတ်တရက်​မူး​လဲ​ကာ သေဆုံး​ခဲ့​သည်။ ထို​အားကစားသမား​မှာ အသက် ၂၈ နှစ်​သာ​ရှိသေး​သည့် နှစ်ကြိမ်​တိုင်တိုင် အိုလံပစ်​ရွှေ​တံဆိပ်​ဆု​ရသူ ရေခဲပြင်​စ​ကိတ်​စီး​သ​မား စ​ယီရ်​ဂျေး ဂ​ရီ​န်​ကော​ဖ်​ဖြစ်​ပြီး သူ၏​ကျော်ကြား​မှု​မှာ ထွန်း​ပေါက်ခါစ​ရှိသေး​စဉ် ချက်ချင်း​ပျောက်ကွယ်​သွား​သည်။ ဝမ်းနည်းစရာ​ပါ​တကား! အကြောင်းရင်း​ကား​အဘယ်နည်း။ နှလုံး​ရပ်သွား​ခြင်း​ဖြစ်သည်။ သူသည် နှလုံး​ရောဂါ​ရှိသည့်​လက္ခဏာ ဘာမျှ​မပြ​သောကြောင့် သူ၏​သေဆုံးမှု​သည် လုံးဝ​မထင်မှတ်​စ​ရာ​ဖြစ်​ခဲ့​၏။ သို့​တိုင် သူ၏​နှလုံး​မှာ ကြီး​နေပြီး သွေးလွှတ်ကြော​များ အကြီးအကျယ်​ပိတ်​နေသည်​ဟု စစ်ဆေး​သူများ​က တွေ့ ရှိခဲ့​သည်။

လက္ခဏာ​မပြ​ဘဲ​နှလုံး​ရပ်သွား​တတ်​သော်လည်း ယင်းသည်​ဖြစ်​တော​င့်​ဖြစ်​ခဲ​သည်​ဟု ဆေး​ဘက်​ဆိုင်ရာ​အာဏာပိုင်​များ​က​ဆို​သည်။ အမှန်​မှာ မောဟိုက်​ခြင်း၊ အဝ​လွန်​ခြင်း​နှင့် ရင်ဘတ်​အောင့်​ခြင်း​စ​သော သတိပေး​လက္ခဏာများ​နှင့် ဖြစ်​ရသည့်​အကြောင်းရင်း​များ​ကို လျစ်လျူရှု​တတ်ကြ​သည်။ ရလဒ်​ကား နှလုံး​ရပ်​ချိန်​၌​အသက်​မပါ​သည့်​တိုင် လူအများသည် ကျန်ရှိ​သော​အသက်တာတွင် အကြီးအကျယ်​ကျန်းမာ​ရေး​ဆုတ်ယုတ်​သွားလေ့​ရှိ၏။

ယနေ့ ဆေး​ဘက်​ဆိုင်ရာ​သဘော​ထိုင်​ချက်​မှာ နှလုံး​ရပ်တန့်ခြင်း​ကို​ကာကွယ်​ရန် ဓာတ်စာ​နှင့် ဘဝ​ပုံစံ​ကို အမြဲ​သတိထား​ရမည့်​အပြင် မှန်မှန်​ဆေးစစ်​ဖို့​လို​သည်​ဟု​ဖြစ်သည်။ * ဤသို့​သော​လုပ်ဆောင်မှုများ​နှင့်အတူ လိုအပ်သော​နေရာတွင် အမှန်တကယ်​ပြုပြင်​ပြောင်းလဲ​လို​စိတ်​ရှိ​ခြင်း​တို့သည် နှလုံး​ရပ်တန့်ခြင်း​၏ ဝမ်းနည်းဖွယ်​အကျိုးဆက်များ​ကို လျော့နည်း​သွားစေရန် များစွာ​ထောက်ကူ​ပါ​လိမ့်​မည်။

သို့သော် ပို​၍​ပင်​ဂရုစိုက်​သင့်​သည့် နှလုံး​၏​အသွင်​နောက်​တစ်မျိုး​ရှိသေး​သည်။ “နှလုံး​သည် အသက်​၏​အခြေအမြစ်​ဖြစ်သော​ကြောင့် သင်၏​နှလုံးကို အထူးသဖြင့်​စောင့်ရှောက်​လော့” ဟု​သမ္မာကျမ်းစာ​က ကျွန်ုပ်​တို့ကို​သတိပေး​သည်။ (သု. ၄:၂၃) မှန်​၏၊ ဤ​ကျမ်းချက်​သည် အထူးသဖြင့် ပုံဆောင်​နှလုံးကို ရည်ညွှန်း​နေခြင်း​ဖြစ်သည်။ ပကတိ​နှလုံးကို​ကာကွယ်​ရန် သတိရှိ​ဖို့​လိုအပ်​လျှင် ဝိညာဉ်​ရေး​သေစေနိုင်​သော ရောဂါ​များ​မှ ပုံဆောင်​နှလုံးကို ကာကွယ်​လို​သော် ပို​၍​ပင်​သတိ​ရှိဖို့​အရေးကြီး​သည်။

 ပုံဆောင်​နှလုံး​ရပ်တန့်ခြင်း​ကို ဆန်းစစ်ခြင်း

ပကတိ​နှလုံး​ရောဂါ​ကဲ့သို့ ဝိညာဉ်​ရေး​အရ နှလုံး​ရပ်တန့်ခြင်း​ကို ကာကွယ်​ရန် သေချာ​သည့်​နည်း​တစ်ခု​မှာ ဖြစ်​ရသည့်​အကြောင်းရင်း​များ​ကို သိရှိပြီး​နောက် ယင်း​တို့​နှင့်​ပတ်သက်​၍ တစ်စုံတစ်ရာ​လုပ်ဆောင်ဖို့ ခြေလှမ်းလှမ်း​ခြင်း​ဖြစ်သည်။ ထို့​ကြောင့် ပကတိ​နှင့်​ပုံဆောင်​နှလုံး​ရောဂါ ဖြစ်​ရခြင်း​အခြေခံ​အချက်​အချို့​ကို သုံးသပ်ကြည့်​ကြ​စို့။

ဓာတ်စာ။ အစာ​ဖျင်း​များသည် အရသာ​ရှိသော်လည်း ကျန်းမာ​ရေး​အတွက် အကျိုးမရှိ​ကြောင်း လူအများ​က​လက်ခံ​ကြသည်။ ထို​နည်း​ထပ်တူ စိတ်ပိုင်း​ဆိုင်ရာ​အစာ​ဖျင်း​များ​ကို အလွယ်တကူ​ရရှိနိုင်​၍ အလွန်​ဆွဲဆောင်မှု​ရှိ​မည်​ဖြစ်သော်လည်း ဝိညာဉ်​ရေးရာ​ကျန်းမာ​ရေး​ကို ထိခိုက်​စေ​၏။ တရား​မဝင်​လိင်ဆက်ဆံခြင်း​နှင့် မူးယစ်​ဆေးဝါး၊ အကြမ်းဖက်မှု​နှင့် မှော်အတတ်​တို့ကို လူထု​ဆက်သွယ်ရေး​မှ​တစ်ဆင့် လိမ္မာ​ပါးနပ်​စွာ​ကြော်ငြာ​သည့်​အရာများ​စွာ​ရှိသည်။ ဤသို့​သော​ဓာတ်စာ​ကို စိတ်ထဲ​ဖြည့်ပေး​လျှင် ပုံဆောင်​နှလုံးကို သေ​ဘေးသင့်​စေ​သည်။ ဘုရားသခင့်​နှုတ်မြွက်တော်​က ဤသို့​သတိပေး​သည်– “လောက​၌​ရှိသမျှ​သော​အရာ​တည်း​ဟူသော ကိုယ်ကာယ​တပ်မက်​ခြင်း၊ မျက်စိ​တပ်မက်​ခြင်း၊ လော[က]စည်းစိမ်​၌​ဝါကြွားခြင်း​တို့သည် ခမည်းတော်​နှင့်​မစပ်ဆိုင်၊ လောက​နှင့်​သာ​စပ်ဆိုင်​ကြ​၏။ လောက​နှင့်​လော[က]တပ်မက်​ခြင်း​သည် ရွေ့သွား​ကွယ်ပျောက်​တတ်၏။ ဘုရားသခင်​၏​အလိုတော်နှင့်​အညီ ကျင့်​သော​သူ​မူ​ကား၊ . . . ထာဝရ​တည်​၏။—၁ ယောဟန် ၂:၁၆၊ ၁၇။

သစ်သီးဝလံ​များနှင့် ဟင်းသီးဟင်းရွက်​စိမ်း​များ​ကဲ့သို့ ကျန်းမာ​စေသော​အစားအစာ​များသည် အစာ​ဖျင်း​စား​သူ​အတွက် နှစ်သက်စရာ​မဟုတ်​ချေ။ အလားတူ၊ မိမိ​စိတ်နှလုံး​ကို လောက​အစာ​ကျွေး​လေ့​ရှိသူ​အတွက် ကျန်းမာ​စေပြီး ကြေ​ခဲ​သော​ဝိညာဉ်​အစာ​သည် နှစ်သက်စရာ​ဖြစ်​မည်​မဟုတ်ပေ။ သူသည် အတန်ကြာ​အထိ ဘုရားသခင့်​နှုတ်မြွက်တော်​၏ “နို့” ကို​သာ သုံးဆောင်​နေ​ပေမည်။ (ဟေဗြဲ ၅:၁၃) သို့သော် အဆုံး​၌ သူသည် ခရစ်ယာန်​အသင်းတော်​နှင့်​ဓမ္မ​အမှု​တွင် အခြေခံ​ဝိညာဉ်​ရေး​တာဝန်​များ​ကို ထမ်းဆောင်​ရန် လိုအပ်​သည့်​ဝိညာဉ်​ရေး​ရင့်ကျက်မှု ရှိ​မည်​မဟုတ်​ချေ။ (မဿဲ ၂၄:၁၄; ၂၈:၁၉; ဟေဗြဲ ၁၀:၂၄၊ ၂၅) ထို​အခြေအနေ​မျိုး​ရှိသူ​အချို့​သည် မလှုပ်မရှား​သော​သက်သေခံ​များ​ဖြစ်လာ​သည့်​အထိ သူတို့၏​ဝိညာဉ်​ရေး​ခွန်အား​ကို ယုတ်လျော့သွား​စေ​ခဲ့​သတည်း!

နောက်ထပ်​အန္တရာယ်​မှာ အပြင်ပန်း​ရုပ်သွင်​သည် လှည့်စား​နိုင်​ခြင်း​ဖြစ်သည်။ ခရစ်ယာန်​တာဝန်​များ​ကို အပေါ်ယံ​လုပ်ဆောင်ခြင်း​သည် ရုပ်​ဝါဒ​ဆန်​သော​အမြင်​များ သို့​မဟုတ် အကျင့်​ယိုယွင်းခြင်း၊ အကြမ်းဖက်​ခြင်း၊ မှော်အတတ်​ပါရှိ​သည့် ဖျော်ဖြေမှု​တို့ကို တိတ်တဆိတ်​လိုက်စားခြင်း​ဖြင့် အားနည်း​သွား​သည့်​ပုံဆောင်​နှလုံး​၏ ချို့ယွင်းမှု​ကြီးထွား​လာ​ခြင်း​ကို ဖုံးကွယ်​ထား​ပေမည်။ ဤသို့​သော​ဝိညာဉ်​ရေး​ဓာတ်စာ​ပျက်​သည် ဝိညာဉ်​ရေး​ကို​လွန်​စွာ​မထိခိုက်​နိုင်​ပုံ​ပေါက်​သော်လည်း ယင်းသည် ပုံဆောင်​နှလုံးကို ပျက်စီး​စေနိုင်​သည်၊ ဓာတ်စာ​ဖျင်း​က ပကတိ​နှလုံးသွေး​လွှတ်​ကြော​များ​ကို မာ​ကျစ်​ပြီး ပျက်စီး​စေနိုင်​သည့်​နည်းတူ​ပင်။ မတော်လျော်​သော​ဆန္ဒ​များ​ကို နှလုံး​ထဲ​သို့ မဝင်​မိ​စေရန် ယေရှု​သတိပေး​ခဲ့​၏။ ကိုယ်တော်​က “ကိ​လေ​သာ​စိတ်​နှင့် သူ့​မယား​ကို​ကြည့်​သော​သူသည် စိတ်နှလုံး​ထဲ​၌ ထို​မိန်းမ​နှင့်​ပြစ်မှား​ပြီ” ဟု​မိန့်ဆိုခဲ့သည်။ (မဿဲ ၅:၂၈) မှန်​၏၊ ဝိညာဉ်​ရေး​ဓာတ်စာ​ဖျင်း​သည် ဝိညာဉ်​ရေး​နှလုံးကို​ရပ်သွား​စေနိုင်​သည်။ သို့​တိုင် နောက်ထပ်​ဆင်ခြင်​သုံးသပ်​စ​ရာ​များ​ရှိသေး​သည်။

လေ့ကျင့်ခန်း။ မလှုပ်မရှား​သော​ဘဝ​ပုံစံ​သည် ပကတိ​နှလုံး​ရပ်တန့်​စေနိုင်​သည်ကို အများ​သိ​ကြသည်။ ထို​နည်းတူ ဝိညာဉ်​ရေး​မလှုပ်မရှား​သော​ဘဝ​ပုံစံ​သည် ဆိုးရွား​သော​အကျိုးဆက်များ​ဖြစ်ပေါ်​စေနိုင်​၏။ ဥပမာ၊ လူတစ်ဦး​သည် ခရစ်ယာန်​ဓမ္မ​အမှု​တွင် တော်ရုံ​သင့်​ရုံ​ပါဝင်​သော်လည်း ယင်းကို သက်သာရာ နယ်ပယ်​ဟု​ခေါ်​ရမည့်​အထိ ကန့်သတ်​ထားပြီး “ရှက်ကြောက်​စ​ရာ​အကြောင်း​မရှိဘဲ [အမှန်တရား]ကို မှန်ကန်​စွာ​ပိုင်းခြား​တတ်သော ဆရာသမား​ဖြစ်” လာရန် ကြိုးစား​ခြင်း​မရှိဘဲ​နေ​ပေမည်။ (၂ တိမောသေ ၂:၁၅) သို့​မဟုတ် ခရစ်ယာန်​အစည်းအဝေး​အချို့​ကို တက်ရောက်​မည်​ဖြစ်သော်လည်း ၎င်း​တို့အတွက် ကြိုတင်​ပြင်ဆင်မှု​နှင့် ပါဝင်​ဖြေဆို​မှု​တို့ မပြု​လုပ်​ဘဲ​နေ​မည်။ သူ့မှာ ဝိညာဉ်​ရေး​ပန်းတိုင်​များ​မရှိ၊ ဝိညာဉ်​ရေးရာ​များ​ကို တောင့်တခြင်း၊ စိတ်အားကြီး​ခြင်း​မရှိဘဲ​နေ​ပေမည်။ ဝိညာဉ်​ရေးလေ့​ကျင့်​ခန်းမ​ရှိလျှင် တစ်ချိန်က​ရှိခဲ့​သည့် ယုံကြည်ခြင်း​ပင်​လျှင် နောက်ဆုံး​၌ အားနည်း​လာ​ကာ အသေ​ဖြစ်သွား​နိုင်​သည်။ (ယာကုပ် ၂:၂၆) ထို​ကဲ့သို့​မလှုပ်မရှား​သော ဝိညာဉ်​ရေး​ဘဝ​ပုံစံ​ရှိခဲ့​ကြ​ပုံ​ရသည့် ဟေဗြဲ​ခရစ်ယာန်​အချို့​ထံ တမန်​တော်​ပေါလု​စာရေး​ခဲ့​စဉ်​က ဤ​အန္တရာယ်ကို သတိပြု​စေ​ခဲ့​သည်။ ယင်းက သူတို့၏​ဝိညာဉ်​ရေး​ကို​ထိခိုက်​၍ ခိုင်မာ​သွား​စေနိုင်​သည့်​အကြောင်း သူ​သတိပေး​ခဲ့​ပုံ​ကို ဂရုပြုပါ။ “ညီအစ်ကို​တို့၊ သင်တို့သည် အသက်ရှင်​တော်​မူ​သော ဘုရားသခင့်​ထံ​တော်​မှ ထွက်သွား​သော​အားဖြင့် မယုံကြည်​တတ်၊ ဆိုးညစ်သော​စိတ်နှလုံး​မရှိစေ​ခြင်း​ငှာ သတိပြု​ကြလော့။ [မကောင်းမှု]၏​လှည့်ဖြားခြင်း​အားဖြင့် သင်တို့​စိတ်နှလုံး​မခိုင်မာ​စေခြင်း​ငှာ ယနေ့​ဟူ၍​ခေါ်ဝေါ်​သော​အချိန်၊ နေ့တိုင်း​အစဉ် အချင်းချင်း​တစ်ယောက်ကို​တစ်ယောက် တိုက်တွန်း​နှိုးဆော်​ကြလော့။”—ဟေဗြဲ ၃:၁၂၊ ၁၃။

ဖိစီးမှု။ ထို့​ပြင် ပကတိ​နှလုံး​ရပ်​ရခြင်း​၏ နောက်ထပ်​အဓိက​အကြောင်းရင်း​မှာ မတန်မရာ​ဖိစီးမှု​ခံရ​ခြင်း​ဖြစ်သည်။ အလားတူ​စွာ ဖိစီးမှု သို့​မဟုတ် “လော[က]စိုးရိမ်ခြင်း” သည်​ပုံဆောင်​နှလုံးကို အလွယ်တကူ​ပျက်စီး​စေသည့်​အပြင် ဘုရားသခင့်​အမှုတော်ထမ်း​ဆောင်ခြင်း​မှ လုံးဝ​ရပ်တန့်​သွား​သည့်​အထိ​ပင် ဖြစ်စေ​နိုင်၏။ ယင်း​နှင့်​ပတ်သက်​၍ ယေရှု၏​ဤ​သတိပေး​ချက်​သည် အချိန်သင့်​အခါသင့်​ဖြစ်သည်– “သင်တို့သည် ကိုယ်ကို​ကိုယ်​သတိပြု​ကြလော့။ သို့​မဟုတ် အစားအသောက်​လွန်ကြူး​ခြင်း၊ လော[က]စိုးရိမ်ခြင်း​အားဖြင့် စိတ်နှလုံး​ပင်ပန်း​လျက်​နေစဉ်​တွင် ထို​နေ့ရက်​သည် အမှတ်တမဲ့​သင်တို့​နှင့် တွေ့ကြုံ​လိမ့်​မည်။” (လုကာ ၂၁:၃၄၊ ၃၅) အချိန်​ကြာမြင့်စွာ​ဖုံးကွယ်​ထားသော အပြစ်​ကြောင့် စိတ်​ဆင်းရဲ​နေရ​မည်​ဆိုလျှင်​လည်း ထို​ဖိစီးမှု​သည် ကျွန်ုပ်​တို့၏​ပုံဆောင်​နှလုံးကို ထိခိုက်​စေနိုင်​သည်။ ထိုသို့​သော​စိတ်​ဆင်းရဲ​စ​ရာ​ဖိစီးမှု​နှင့်​ဆက်နွှယ်​သည့် နာကျင်မှုကို ရှင်ဘုရင်​ဒါဝိဒ်​ခံစား​ခဲ့​ရ​၍ သူက “[မကောင်းမှု]အပြစ်​ကြောင့် အရိုးများ​ထဲမှာ သက်သာခြင်း​မရှိပါ။ အကျွန်ုပ်​ပြု​မိ​သော [မကောင်းမှု]တို့သည် အကျွန်ုပ်​ခေါင်း​ကို​လွှမ်းမိုး၍ လေး​သော​ဝန်​ကဲ့သို့ အကျွန်ုပ်​မထမ်းနိုင်​အောင် လေး​ကြ​ပါ​၏” ဟု​ပြော​ခဲ့​သည်။—ဆာလံ ၃၈:၃၊ ၄။

ယုံကြည်​စိတ်ချ​လွန်း​ခြင်း။ နှလုံး​ရပ်သွား​သူ​အများ​သည် သူတို့​နှလုံး​မ​ရပ်​မီ​ကလေး​တွင် သူတို့၏​နှလုံး​အခြေအနေ​နှင့်​ပတ်သက်ပြီး လွန်​စွာ​ယုံကြည်​စိတ်ချ​လွန်း​ခဲ့​သူများ​ဖြစ်​ကြသည်။ သူတို့သည် ကျန်းမာ​ရေး​စစ်ဆေး​ရန် မကြာခဏ ပျက်ကွက်​ကြသည် သို့​မဟုတ် ယင်းကို လုံးဝ​မလို​အပ်​ဟု​ပင် ပြက်ရယ်ပြု​ခဲ့​ကြ သည်။ ထို​နည်းတူ၊ အချို့​က မိမိတို့သည် ခရစ်ယာန်​များ​ဖြစ်နေ​ကြသည်​မှာ အတန်ကြာ​ပြီ​ဖြစ်၍ အဘယ်​အမှု​မျှ​မဖြစ်​နိုင်​တော့​ဟု ယူမှတ်​ကြ​ပေမည်။ သူတို့သည် ဘေးမသင့်​မီ​အထိ ဝိညာဉ်​ရေး​စစ်ဆေးခံ​ရန် သို့​မဟုတ် မိမိကိုယ်ကို​စစ်ဆေး​ရန် လျစ်လျူရှု​ခဲ့​ကြ​ပေမည်။ ယုံကြည်​စိတ်ချ​လွန်း​ခြင်း​နှင့်​စပ်လျဉ်း၍ တမန်​တော်​ပေါလု​ပြော​သော ဤ​ဆုံးမ​စကား​ကောင်း​ကို စိတ်ထဲ​စွဲမှတ်​ဖို့ အရေးကြီး​ပါ​သည်– “အကြင်သူသည် မိမိ​တည်ကြည်​လျက်​နေသည်​ဟု မိမိ​ထင်မှတ်​၏၊ ထို​သူသည် မလဲ​ခြင်း​ငှာ သတိပြု​စေ။” ကျွန်ုပ်​တို့၏​မစုံလင်မှု သဘောသဘာဝ​ကို ဝန်ခံ​ပြီး ကျွန်ုပ်​တို့၏​ဝိညာဉ်​ရေး​အခြေအနေ​ကို ပုံမှန်​စစ်ဆေးခြင်း​သည် ပညာရှိ​လမ်းစဉ်​ဖြစ်သည်။—၁ ကောရိန္သု ၁၀:၁၂; သု. ၂၈:၁၄။

သတိပေး​ချက်​များ​ကို လျစ်လျူ​မ​ရှု​နှင့်

သမ္မာကျမ်းစာ​က ပုံဆောင်​နှလုံး​အခြေအနေ​ကို အဓိက​ဦးစား​ထား​ပြောဆို​ရခြင်း​မှာ အကြောင်းကောင်း​ရှိပါ​သည်။ ယေရမိ ၁၇:၉၊ ၁၀ တွင်​ကျွန်ုပ်​တို့​ဤသို့​ဖတ်​ရသည်– “စိတ်နှလုံး​သည် ခပ်သိမ်း​သော​အရာ​ထက် စဉ်းလဲ​တတ်၏။ အလွန်​ယိုယွင်းသော​သဘော​ရှိ၏။ စိတ်နှလုံး​သဘောကို အဘယ်သူ​သိနိုင်​သနည်း။ ငါ​ထာဝရ​ဘုရား​သည် လူ​အသီးအသီး​တို့အား မိမိတို့​အကျင့်​အတိုင်း မိမိတို့​ခံထိုက်သော​အကျိုးအပြစ်​ကို​ပေးခြင်း​ငှာ နှလုံး​ကျောက်ကပ်​တို့ကို စေ့စေ့​စစ်ကြော​တတ်၏။” သို့သော် ကျွန်ုပ်​တို့၏​နှလုံးကို​စစ်ဆေးခြင်း​အပြင် လိုအပ်သော မိမိကိုယ်ကို​စစ်ဆေးခြင်း​ပြုလုပ်​ရာ​၌ ကျွန်ုပ်​တို့ကို​အကူအညီ​ဖြစ်စေ​သည့် မေတ္တာပါ​အစီအစဉ်များ​ကိုလည်း ယေဟောဝါ​ပြုလုပ်​ပေး​ထား​သည်။

“သစ္စာ​နှင့်​သတိပညာ​ရှိသော​ကျွန်” မှ​တစ်ဆင့် ကျွန်ုပ်​တို့ကို အချိန်တန်​နှိုးဆော်ချက်​များ ပေး​လျက်​ရှိသည်။ (မဿဲ ၂၄:၄၅၊ သ​မ) ဥပမာ၊ ကျွန်ုပ်​တို့၏​ပုံဆောင်​နှလုံး​က လှည့်စား​နိုင်​သည့် အဓိက​နည်း​တစ်နည်း​မှာ လောက​စိတ်ကူး​များ​ဖြစ်သည်။ ယင်း​တို့​မှာ ယုတ္တိမရှိ​သော​စိတ်ကူး​များ၊ စိတ်ကူးယဉ်​အိပ်မက်များ၊ ရောက်​တတ်​ရာ​ရာ​စိတ်​ပျံ့လွင့်​မှုများ​ဖြစ်သည်။ ယင်း​တို့သည် အထူးသဖြင့် မစင်ကြယ်​သော​အတွေးအခေါ်​များ​ကို ဖြစ်ပေါ်​စေ​လျှင် အလွန်​အန္တရာယ်​ရှိ​နိုင်​သည်။ သို့​ဖြစ်၍ ယင်း​တို့ကို လုံးဝ​ငြင်းပယ်​သင့်​သည်။ ယေရှု​နည်းတူ မတရားမှုကို ကျွန်ုပ်​တို့​မုန်းတီး​ကြ​မည်​ဆိုလျှင် လောက​စိတ်ကူး​များ​မှ ကျွန်ုပ်​တို့​နှလုံးကို ကာကွယ်​မည်​ဖြစ်သည်။—ဟေဗြဲ ၁:၈၊ ၉။

ထို့​ပြင် ခရစ်ယာန်​အသင်းတော်​မှ မေတ္တာ​ရှိသော​အကြီးအကဲ​များ​၏ အကူအညီကို ကျွန်ုပ်​တို့​ရရှိကြ​၏။ သူတစ်ပါး​က မိမိ​အတွက်​စိုးရိမ်​ပူပန်​ပေးခြင်း​ကို အမှန်​ကျေးဇူး​တင်စရာ​ဖြစ်သော်လည်း နောက်ဆုံး​တွင် ကျွန်ုပ်​တို့၏​ပုံဆောင်​နှလုံးကို ကြည့်ရှု​ပြုစု​ရမည့်​တာဝန်​သည် ကျွန်ုပ်​တို့​တစ်ဦးစီ၏​တာဝန်ဖြစ်​သည်။ ကျွန်ုပ်​တို့​တစ်ဦးစီ​သည် “ခပ်သိမ်း​သော​အရာ​ကို​စုံစမ်း” ရန်​နှင့် “ယုံကြည်ခြင်း၌​တည်​သလော၊ မတည်​သလော​ဟု ကိုယ်ကို​ကိုယ်​စစ်ကြော” ရန်ဖြစ်​၏။—၁ သက်သာလောနိတ် ၅:၂၁; ၂ ကောရိန္သု ၁၃:၅။

နှလုံးကို​ကာကွယ်​လော့

“လူသည် မျိုးစေ့ကြဲ​သည်​အတိုင်း အသီးအနှံ​ကို​ရိတ်​ရ​လိမ့်​မည်” ဟူသော ကျမ်းစာမူ​သည် ပုံဆောင်​နှလုံး​၏​ကျန်းမာ​ရေး​နှင့်​လည်း သက်ဆိုင်​သည်။ (ဂလာတိ ၆:၇) များသောအားဖြင့် မထင်မှတ်​ဘဲ ဝိညာဉ်​ရေး​ဘေးသင့်​ခဲ့​ရခြင်း​မှာ ညစ်ညမ်း​သော​ရုပ်ပုံ​နှင့်​စာပေ​များ​ကို​ကြည့်ရှု​ခြင်း၊ ရုပ်ပစ္စည်း​များ​ကို အလွန်အမင်း​အရေးပေး​ခြင်း​နှင့် ထင်ပေါ်​ကျော်ကြား​ရန် သို့​မဟုတ် အခွင့်အာဏာ​ရရှိရန်​ကြိုးစား​ခြင်း​စ​သော ဝိညာဉ်​ရေး​ပျက်ပြား​စေသည့်​အရာများ​ကို ကြာမြင့်စွာ​တိတ်တဆိတ်​လိုက်စား​ခဲ့​ခြင်း​ကြောင့်​ဖြစ်​ပေမည်။

ထို့​ကြောင့် နှလုံးကို​ကာကွယ်​ရန် မိမိ၏​ဝိညာဉ်​ရေး​အစာကို အမြဲ​ဂရုပြု​ဖို့​လို​သည်။ ဘုရားသခင့်​နှုတ်မြွက်တော်​ကို သုံးဆောင်ခြင်း​ဖြင့် စိတ်နှလုံး​ကို အာဟာရ​ဖြစ်စေ​ပါ။ အလွန်​အလွယ်တကူ​ရယူ​နိုင်​ပြီး အာသာပြေ​စေ​သော်လည်း ပုံဆောင်​နှလုံးကို​ထုံထိုင်း​စေသည့် စိတ်ပိုင်း​ဆိုင်ရာ​အစာ​ဖျင်း​ဖြစ်သော​အရာများ​ကို ရှောင်ကြဉ်ပါ။ ဆာလံဆရာ​သည် အလွန်​သင့်တော်​လျောက်ပတ်—ဆေး​ဘက်​ဆိုင်ရာ​နှင့်​လည်း​ကိုက်ညီ—သော​ပုံ​ဥပမာတစ်ခု​ဖြင့် ဤသို့​သတိပေး​သည်– “သူတို့​နှလုံး​သည် ဆီ​ဥ​ကဲ့သို့​ခဲ​လျက်​ရှိ၏။”—ဆာလံ ၁၁၉:၇၀။

နှစ်​ရှည်​လ​များ​လျှို့ဝှက်​ထားသော​အပြစ်​များ ရှိ​မည်​ဆိုလျှင်​လည်း သင်၏​ပုံဆောင်​နှလုံးသွေး​လွှတ်​ကြော​များ မ​ပိတ်​စေရန် ယင်း​တို့ကို အမြစ်ပါ​မကျန်​ရှင်းပစ်​ဖို့ ကြိုးစား​ပါ။ ဤ​လောကသည် စွဲမက်​စ​ရာ​ဖြစ်လာ​ပြီး ပျော်ရွှင်​အားရစရာ​များစွာ​ရှိ​ပုံ​ရမည်​ဆိုလျှင် တမန်​တော်​ပေါလု​ရေးသားခဲ့​သော ဤ​ပညာရှိ​ဆုံးမ​စကား​ကို တွေးတော​ဆင်ခြင်​ပါ။ “ညီအစ်ကို​တို့၊ ငါ​ဆိုသည်ကား ကျန်ကြွင်း သော​ကာလ​သည် ကျဉ်းကျပ်​သည်​ဖြစ်၍ . . . ဤ​လောကကို​သုံး​သော​သူသည် မ​သုံး​သကဲ့သို့​ဖြစ်​ရမည်။ အကြောင်း​မူ​ကား ဤ​လောက​၏​အဆင်းသဏ္ဌာန်​သည် ရွေ့သွား​ကွယ်ပျောက်​တတ်၏။” (၁ ကောရိန္သု ၇:၂၉-၃၁) ရုပ်ပစ္စည်း​ကြွယ်ဝမှု​သည်လည်း သင့်အတွက်​ဆွဲဆောင်မှု​ဖြစ်လာ​မည်​ဆိုလျှင် ယောဘ​၏​ဤ​စကား​များ​ကို နှလုံး​သွင်း​ပါ– “ငါသည် ရွှေ​ကိုကိုး​စား၍ ရွှေ​စင်​အား ‘သင်သည် ငါ​ခိုလှုံရာ​ဖြစ်၏’ ဟု​ဆို​မိ​သော်လည်း​ကောင်း ရာဇ​ဝတ်​ခံထိုက်သော​အပြစ်ရှိ​၏။ အထက်​အရပ်၌​ရှိတော်မူသော ဘုရားသခင်​ကို ငြင်းပယ်​ရာ​ရောက်​၏။”—ယောဘ ၃၁:၂၄၊ ၂၈; ဆာလံ ၆၂:၁၀; ၁ တိမောသေ ၆:၉၊ ၁၀။

ကျမ်းစာ​အခြေခံ​ဆုံးမ​စကား​ကို လျစ်လျူရှု​လေ့​ရှိ​ခြင်း​၏​အန္တရာယ်ကို ဖော်ပြ​ရန် ကျမ်းစာ​က​ဤသို့​သတိပေး​သည်– “အထပ်ထပ်​ဆုံးမခြင်း​ကို​ခံ​သော်လည်း မိမိ​လည်ပင်း​ကို ခိုင်မာ​စေသော​သူသည် ကိုးကွယ်​ရာ​မရ၊ ရုတ်တရက်​ပျက်စီး​လိမ့်​မည်။” (သု. ၂၉:၁) ယင်းအစား၊ ကျွန်ုပ်​တို့၏​ပုံဆောင်​နှလုံးကို ကောင်းစွာ​ဂရုစိုက်​ခြင်း​အားဖြင့် ရိုးရှင်း​သော​ဘဝ​ပုံစံ​အတိုင်း အသက်ရှင်​နေထိုင်ခြင်း​မှ​ရရှိ​သည့် ပျော်ရွှင်မှု​နှင့် ငြိမ်သက်မှု​ကို ခံစားရ​မည်။ ၎င်းကို စစ်မှန်သော​ခရစ်ယာန်​ဘာသာ​တရား​၏​လမ်းစဉ်​အဖြစ် အမြဲ​ထောက်ခံ​ခဲ့​ပေ​ပြီ။ တမန်​တော်​ပေါလု​သည် ဤသို့​ရေးသား​ရန် မှုတ်သွင်းခံ​ခဲ့​ရ၏– “ရောင့်ရဲသော​စိတ်ပါ​လျှင် ဘုရား[သခင်]ဝတ်၌​မွေ့လျော်ခြင်း​သည် ကြီးစွာ​သော​အကျိုး​စီးပွား​မှန်​၏။ အကြောင်း​မူ​ကား ငါ​တို့သည် ဤ​လောက​ထဲ​သို့ အဘယ်အရာမျှ​မပါဘဲ​လာ​သည်​ဖြစ်၍ ထွက်သွား​လျှင်​လည်း အဘယ်အရာကို​မျှ​ယူ၍​မသွား​နိုင်​ဟု ထင်ရှား​လျက်​ရှိ၏။ သို့​ဖြစ်၍ စား​ရန်၊ ဝတ်​ရန်​ရှိသမျှ​နှင့် ရောင့်ရဲ​လျက်​နေကြ​ကုန်​အံ့။”—၁ တိမောသေ ၆:၆-၈။

မှန်ပါသည်၊ ဘုရားသခင်​ရေးရာ​ဆက်ကပ်​အပ်နှံခြင်း​လမ်းစဉ်၌​တည်မြဲ​ရန် အမြဲ​လေ့ကျင့်​နေ​မည်​ဆိုလျှင် ကျန်းမာ​ကြံ့ခိုင်​သော​ပုံဆောင်​နှလုံး အမှန်​ရှိ​လိမ့်​မည်။ ကျွန်ုပ်​တို့၏​ဝိညာဉ်​ရေး​ဓာတ်စာ​ကို မျက်ခြည်မပြတ်​ဂရုပြု​ခြင်း​ဖြင့် ကျွန်ုပ်​တို့၏​ဝိညာဉ်​ရေး​ကို ဘေးသင့်​စေ​မည့် ဤ​လောက​၏​ပျက်ပြား​သော​လမ်းစဉ်​များနှင့် အတွေးအခေါ်​များ ရှိ​ခွင့်ပြု​မည်​မဟုတ်​ချေ။ ထို​ထက်​အရေးကြီး​သည်​ကား၊ ယေဟောဝါ​၏​အဖွဲ့အစည်း​မှ​တစ်ဆင့် ကိုယ်တော်​၏​ပြင်ဆင်​ပေး​ချက်​များ​ကို ကျွန်ုပ်​တို့​လက်ခံခြင်း​အားဖြင့် ကျွန်ုပ်​တို့၏​ပုံဆောင်​နှလုံးကို မှန်မှန်​စစ်ဆေး​ကြည့်​ကြ​စို့​လေ။ ထိုသို့​ဝီရိယ​ရှိ​ရှိ​ပြုလုပ်ခြင်း​အားဖြင့် ဝိညာဉ်​ရေး​နှလုံး​ရပ်တန့်​သွားခြင်း​၏ ဝမ်းနည်းဖွယ်​အကျိုးဆက်များ​ကို​ရှောင်ရှား​ရန် များစွာ​အထောက်အကူ​ရ​ပါ​လိမ့်​မည်။

[အောက်ခြေ​မှတ်ချက်များ]

[စာမျက်နှာ ၁၀ ပါ အကျဉ်း​ဖော်ပြချက်]

ဓာတ်စာ​ဖျင်း​က သွေးလွှတ်ကြော​များ​ကို​မာ​ကျစ်​စေပြီး ပကတိ​နှလုံးကို ပျက်စီး​စေနိုင်​သကဲ့သို့ ဝိညာဉ်​ရေး​ဓာတ်စာ​ပျက်​သည် ပုံဆောင်​နှလုံးကို ပျက်စီး​စေနိုင်

[စာမျက်နှာ ၁၀ ပါ အကျဉ်း​ဖော်ပြချက်]

ဝိညာဉ်​ရေး​မလှုပ်မရှား​သော​ဘဝ​ပုံစံ​သည် ဆိုးရွား​သော​အကျိုးဆက်များ​ကို ဖြစ်ပေါ်​စေနိုင်

[စာမျက်နှာ ၁၁ ပါ အကျဉ်း​ဖော်ပြချက်]

“လော[က]စိုးရိမ်ခြင်း” သည်​ပုံဆောင်​နှလုံးကို အလွယ်တကူ​ပျက်စီး​စေနိုင်

[စာမျက်နှာ ၁၁ ပါ ရုပ်ပုံ]

ဝိညာဉ်​ရေး​ကျန်းမာ​မှု​ကို လျစ်လျူရှု​ခြင်း​သည် ဝေဒနာ​များစွာ​ရရှိ​စေနိုင်

[စာမျက်နှာ ၁၃ ပါ ရုပ်ပုံ]

ဝိညာဉ်​ရေး​အကျင့်ကောင်း​များ​ကို ပြုစု​ပျိုးထောင်​ခြင်း​သည် ပုံဆောင်​နှလုံးကို​ကာကွယ်​ပေး

[Picture Credit Line on page 9]

AP Photo/​David Longstreath