အကြီးအကဲတို့ အခြားသူများကို လေ့ကျင့်ပေးလော့
အကြီးအကဲတို့ အခြားသူများကို လေ့ကျင့်ပေးလော့
ကမ္ဘာတစ်ဝန်းရှိ ယေဟောဝါသက်သေများ၏ အသင်းတော်များ၌ ကြီးကြပ်နိုင်မည့် အမျိုးသားများ အရေးတကြီးလိုအပ်လျက်ရှိသည်။ ဤလိုအပ်မှုတွင် အဓိကအကြောင်းရင်း သုံးခုရှိသည်။
ပထမအနေနှင့် ယေဟောဝါသည် ‘အားနည်းသောသူတစ်ယောက်ကို အားကြီးသောလူမျိုးဖြစ်’ စေမည်ဟူသည့် မိမိ၏ကတိတော်ကို ပြည့်စုံစေလျက်ရှိ၏။ (ဟေရှာယ ၆၀:၂၂) ကိုယ်တော်၏မခံစားထိုက်သော ကရုဏာတော်ကြောင့် လွန်ခဲ့သောသုံးနှစ်အတွင်း တပည့်အသစ် တစ်သန်းနီးပါးသည် ယေဟောဝါသက်သေများအဖြစ် နှစ်ခြင်းခံခဲ့ကြသည်။ ဤနှစ်ခြင်းခံပြီးခါစလူသစ်များကို ရင့်ကျက်သည့်ခရစ်ယာန်များဖြစ်လာကြစေရန် ကူညီပေးဖို့ အားကိုးရသောအမျိုးသားများလိုသည်။—ဟေဗြဲ ၆:၁၊ ၂။
ဒုတိယအနေနှင့် ဆယ်စုနှစ်ချီ အကြီးအကဲများအဖြစ် အမှုထမ်းဆောင်ခဲ့သူတချို့သည် အသက်အရွယ်ကြီးရင့်ခြင်း သို့မဟုတ် ကျန်းမာရေးအခက်အခဲများကြောင့် အသင်းတော်တာဝန်အချို့ကို လျှော့ထမ်းဆောင်နေကြရသည်။
တတိယအနေနှင့် ဇွဲရှိသောခရစ်ယာန်အကြီးအကဲတချို့သည် ယခု ဆေးရုံဆက်သွယ်ရေးကော်မတီ၊ ဒေသန္တရဆောက်လုပ်ရေးကော်မတီ သို့မဟုတ် အစည်းအဝေးခန်းမကော်မတီဝင်များအဖြစ် တာဝန်ထမ်းဆောင်လျက်ရှိကြ၏။ အချို့ကိစ္စများ၌ သူတို့၏အသင်းတော်တာဝန်တချို့ကို လက်လွှဲလိုက်ကြရသည်။
အရည်အချင်းပြည့်မီသည့် အမျိုးသားများ ထပ်ဆင့်လိုအပ်နေခြင်းကို မည်သို့ဖြည့်ဆည်းပေးနိုင်မည်နည်း။ လေ့ကျင့်ပေးခြင်းသည် သော့ချက်ဖြစ်၏။ “သစ္စာနှင့်ပြည့်စုံ၍ သူတစ်ပါးတို့ကိုသွန်သင်ခြင်းငှာ၊ တတ်စွမ်းနိုင်သော” သူတို့ကို လေ့ကျင့်ပေးရန် ခရစ်ယာန်အကြီးအကဲများကို သမ္မာကျမ်းစာက အားပေးထားသည်။ (၂ တိမောသေ ၂:၂) အဘိဓာန်တစ်အုပ်အရ “လေ့ကျင့်ပေးရန်” ဟူသောကိရိယာသည် “သင့်လျော်၊ အရည်အချင်းပြည့်မီ သို့မဟုတ် တတ်ကျွမ်းရန် သင်ကြားပေးခြင်း” ဟုအဓိပ္ပာယ်ရသည်။ အကြီးအကဲများသည် အရည်အချင်းပြည့်မီသော အခြားအမျိုးသားကို မည်သို့လေ့ကျင့်ပေးနိုင်ကြောင်း သုံးသပ်ကြည့်ကြစို့။
ယေဟောဝါ၏ပုံသက်သေကို လိုက်လျှောက်ကြလော့
ယေရှုခရစ်သည် ကိုယ်တော်၏လုပ်ငန်းတွင် အမှန်ပင် ‘သင့်လျော်ကာ အရည်အချင်းပြည့်မီပြီး တတ်ကျွမ်း’ ၏၊ ယင်းကိုအံ့သြစရာမလိုပေ! ယေဟောဝါဘုရားသခင်ကိုယ်တော်တိုင် ယေရှုကိုလေ့ကျင့်ပေးခဲ့၏။ ဤလေ့ကျင့်ပေးခြင်းအစီအစဉ်ကို အဘယ်အချက်များက အလွန်ထိရောက်စေသနည်း။ ယောဟန် ၅:၂၀ တွင်မှတ်တမ်းတင်ခဲ့သည့်အတိုင်း အချက်သုံးချက်ကို ယေရှုဤသို့ဖော်ပြသည်– “ခမည်းတော်သည် သားတော်ကို [၁] ချစ်တော်မူ၍ ပြုတော်မူသမျှတို့ကို သားတော်အား [၂] ပြတော်မူ၏။ . . . [၃] ဤမျှမက သာ၍ကြီးစွာသောအမှုအရာတို့ကို သားတော်အားပြတော်မူလိမ့်မည်။” ဤအချက်တစ်ချက်ချင်းစီကို ဆန်းစစ်ခြင်းက လေ့ကျင့်ပေးရခြင်း၏အကြောင်းရင်းကို ထိုးထွင်းသိမြင်စေပါလိမ့်မည်။
ဦးဆုံး “ခမည်းတော်သည် သားတော်ကို ချစ်တော်မူ” ၏ဟူသော ယေရှု၏စကားကိုမှတ်သားပါ။ ဖန်ဆင်းခြင်းစတင်ချိန်ကတည်းက ယေဟောဝါနှင့် ကိုယ်တော့်သားတော်တို့အကြား နွေးထွေးသောနှောင်ကြိုးရှိခဲ့သည်။ ယင်းဆက်ဆံရေးကို နယပုံပြင် ၈:၃၀ ကဤသို့ပေါ်လွင်စေသည်– “ငါ [ယေရှု] သည်ကျွေးမွေးတော်မူသောသားကဲ့သို့ [ယေဟောဝါဘုရားသခင်] အထံတော်ပါးတွင်နေ၍ [“အထူးမြတ်နိုးခံရသူဖြစ်လာ၏၊” ကဘ] အစဉ်မပြတ်မွေ့လျော်တော်မူရာဖြစ်၏။ ရှေ့တော်၌အစဉ်မပြတ်ကစားလျက်” နေ၏။ ယေဟောဝါသည် ယေရှုကို “အထူးမြတ်နိုး” ကြောင်း ယေရှုလုံးဝသံသယမရှိပါ။ ယေရှုသည် ခမည်းတော်၏အထံတော်ပါးတွင် ခစားလျက်နေစဉ် မိမိ၏ပျော်ရွှင်မှုကို ဖုံးကွယ်မထားချေ။ ခရစ်ယာန်အကြီးအကဲများနှင့် သူတို့လေ့ကျင့်ပေးနေသူတို့စပ်ကြား နွေးထွေးပွင့်လင်းသောဆက်ဆံရေးရှိမည်ဆိုလျှင် မည်မျှကောင်းလိုက်မည်ဖြစ်ခြင်း!
ယေရှုဖော်ပြသော ဒုတိယအချက်မှာ ခမည်းတော်သည် “ပြုတော်မူသမျှတို့ကို သားတော်အားပြတော်မူ” ခြင်းဖြစ်သည်။ ဤစကားများသည် နယပုံပြင် ၈:၃၀ တွင်ဖော်ပြထားချက်ကို ထောက်ခံ၏၊ တစ်နည်းကား စကြဝဠာကို ဖန်ဆင်းနေစဉ် ယေရှုသည် ယေဟောဝါ၏ “အထံတော်ပါး၌” ရှိသည်။ (ကမ္ဘာဦး ၁:၂၆) အလွန်ကောင်းသည့် ထိုပုံသက်သေကိုလိုက်လျှောက်ကာ အကြီးအကဲများသည် ဓမ္မအမှုထမ်းများနှင့်အတူ အနီးကပ်လုပ်ဆောင်ပြီး သူတို့၏တာဝန်များကို အရည်အသွေးရှိရှိ မည်သို့ထမ်းဆောင်နိုင်ကြောင်း ပြသပေးနိုင်သည်။ သို့ရာတွင် ခန့်အပ်ခံရခါစ ဓမ္မအမှုထမ်းများသာ အဆင့်ဆင့်လေ့ကျင့်ပေးမှုလိုသည် မဟုတ်ချေ။ ကြီးကြပ်မှူးအရာကို နှစ်ချီကြိုးစားတက်လှမ်းခဲ့ကြသော်လည်းခန့်အပ်မခံရသေးသည့် သစ္စာရှိညီအစ်ကိုများကော အသို့နည်း။ (၁ တိမောသေ ၃:၁) ထိုသူတို့ တိုးတက်ရန် မည်သို့ကြိုးစားနိုင်ကြောင်း သိရှိစေဖို့ အကြီးအကဲများသည် သက်ဆိုင်သည့်အကြံဉာဏ်ကိုပေးသင့်သည်။
ဥပမာ၊ ဓမ္မအမှုထမ်းတစ်ဦးသည် မိမိတာဝန်များကိုထမ်းဆောင်ရာ၌ ယုံကြည်အားထားရကာ တိကျသေချာပြီး အသိစိတ်ရှိရှိလုပ်ဆောင်တတ်ပေမည်။ သွန်သင်သူကောင်းတစ်ဦးလည်း ဖြစ်ပေမည်။ အသင်းတော်၌ ကဏ္ဍအတော်များများကို အကောင်းဆုံးလုပ်ဆောင်နေပေမည်။ သို့ရာတွင် ခရစ်ယာန်ချင်းများနှင့် ဆက်ဆံရာတွင် ကြမ်းတမ်းကြောင်း သူသတိမပြုမိဘဲနေပေမည်။ အကြီးအကဲများသည် “ပညာ၏နူးညံ့သိမ်မွေ့” သောသဘောကိုတင်ပြဖို့လိုသည်။ (ယာကုပ် ၃:၁၃) အကြီးအကဲဖြစ်သူသည် ဓမ္မအမှုထမ်းအားစကားပြောဆိုကာ အခက်အခဲကိုဖော်ပြပြီး သက်ဆိုင်သည့်ဥပမာများပေးကာ တိုးတက်ဖို့ လက်တွေ့ကျသောအကြံဉာဏ်များပေးလျှင် ကြင်နာမှုပြရာရောက်မည်မဟုတ်ပေလော။ အကြီးအကဲသည် ‘ဆားအားဖြင့်ငန်သောအရသာနှင့်ပြည့်စုံစေလျက်’ ဂရုတစိုက်ပြောဆိုမည်ဆိုလျှင် သူ့စကားကို ကောင်းစွာလက်ခံလာဖွယ်ရှိသည်။ (ကောလောသဲ ၄:၆) ဓမ္မအမှုထမ်းအနေနှင့်လည်း သူရရှိသည့် သွန်သင်ချက်မှန်သမျှကို လိုလိုလားလားရှိခြင်းနှင့် လက်ခံခြင်းအားဖြင့် အကြီးအကဲ၏တာဝန်ကို ပို၍ပျော်မွေ့ဖွယ်ဖြစ်စေပေမည်။—ဆာလံ ၁၄၁:၅။
အသင်းတော်အချို့တွင် အကြီးအကဲများသည် ဓမ္မအမှုထမ်းများကို လက်တွေ့ကျကျ မပြတ်တမ်းလေ့ကျင့်ပေးနေကြပါသည်။ ဥပမာ၊ လူနာ သို့မဟုတ် သက်ကြီးရွယ်အိုများထံ လည်ပတ်သွားသောအခါ အရည်အချင်းပြည့်မီသောဓမ္မအမှုထမ်းများကို ခေါ်သွားကြ၏။ ဤနည်းဖြင့် ဓမ္မအမှုထမ်းများသည် သိုးထိန်းလုပ်ငန်းအတွက် အတွေ့အကြုံရရှိလာကြသည်။ ဓမ္မအမှုထမ်းတစ်ဦးသည် မိမိ၏ဝိညာဉ်ရေးတိုးတက်မှုအတွက် လုပ်ကိုင်နိုင်စရာများစွာရှိသေးသည်။—“ဓမ္မအမှုထမ်းများလုပ်ဆောင်နိုင်သည့်အရာ” ခေါင်းစဉ်ရှိ အောက်ပါလေးထောင့်ကွက်ရှု။
ယေရှုလေ့ကျင့်ခံရမှု အလွန်ထိရောက်ရသည့် တတိယအချက်မှာ ယေဟောဝါသည် အနာဂတ်တိုးတက်မှုကိုရည်စူး၍ လေ့ကျင့်ပေးခြင်းဖြစ်သည်။ ခမည်းတော်သည် “ဤမျှမက သာ၍ကြီးစွာသောအမှုအရာတို့ကို” သားတော်အားပြတော်မူလိမ့်မည်ဟု ယေရှုပြောခဲ့သည်။ မြေကြီးပေါ်ရှိခဲ့ချိန်က ယေရှုရရှိသောအတွေ့အကြုံသည် နောက်နောင်ထမ်းဆောင်ရမည့်တာဝန်များအတွက် လိုအပ်မည့်အရည်အချင်းများကို မွေးမြူစေနိုင်ခဲ့သည်။ (ဟေဗြဲ ၄:၁၅; ၅:၈၊ ၉) ဥပမာ၊ ယေရှုသည် ကြီးလေးသောတာဝန်တစ်ရပ်ဖြစ်သည့် သေလွန်သူ သန်းပေါင်းများစွာတို့ကို ရှင်ပြန်ထမြောက်စေပြီး တရားစီရင်ရမည့်တာဝန်ကို မကြာမီရရှိမည်ဖြစ်သည်!—ယောဟန် ၅:၂၁၊ ၂၂။
ယနေ့ ဓမ္မအမှုထမ်းများကိုလေ့ကျင့်ပေးရာတွင် အကြီးအကဲများသည် အနာဂတ်လိုအပ်ရာများကိုရည်စူး၍ လေ့ကျင့်ပေးသင့်သည်။ လောလောဆယ်လိုအပ်ရာများအတွက် အကြီးအကဲများနှင့် ဓမ္မအမှုထမ်းများ အလုံအလောက်ရှိနေငြား အသင်းတော်အသစ်တစ်ခု တည်ထောင်လာမည်ဆိုလျှင်ကော။ အသင်းတော်အတော်များများ တည်ထောင်လာမည်ဆိုလျှင်ကော။ လွန်ခဲ့သောသုံးနှစ်အတွင်း ကမ္ဘာတစ်ဝန်းတွင် အသင်းတော်အသစ် ၆,၀၀၀ ကျော်ရှိခဲ့သည်။ ထိုအသင်းတော်အသစ်များအတွက် လိုအပ်သောအကြီးအကဲနှင့် ဓမ္မအမှုထမ်းအရေအတွက်မှာ နည်းနည်းနောနောမဟုတ်ချေ!
အကြီးအကဲတို့၊ သင်တို့လေ့ကျင့်ပေးနေသူတို့နှင့် နွေးထွေးသောဆက်ဆံရေး ရှိခြင်းအားဖြင့် ယေဟောဝါ၏ပုံသက်သေကို အတုယူနေကြပါသလော။ သူတို့၏တာဝန်များကို မည်သို့မည်ပုံထမ်းဆောင်ရမည်ကို သွန်သင်ပေးနေကြပါသလော။ အနာဂတ်တွင် လိုအပ်မည့်အရာများကို သင်ထည့်စဉ်းစားမိပါသလော။ ယေရှုကိုယေဟောဝါလေ့ကျင့်ပေးခဲ့သည့် ပုံစံကို အတုယူခြင်းအားဖြင့် လူအများသည် ကောင်းချီးများစွာခံစားကြရပါလိမ့်မည်။
တာဝန်လွှဲအပ်ရန် မစိုးရိမ်ပါနှင့်
ကြီးလေးသောတာဝန်များစွာကို ထမ်းဆောင်နိုင်သောစွမ်းရည်ရှိ အကြီးအကဲများသည် သူတစ်ပါးကိုတာဝန်လွှဲအပ်ရန် တွန့်ဆုတ်ကောင်းတွန့်ဆုတ်ကြပေမည်။ တစ်ချိန်က တာဝန်လွှဲအပ်ခဲ့၍ ကျေနပ်မှုမရဘဲဖြစ်ဖူးမည်။ သို့နှင့် ‘အလုပ်တစ်ခုကိုကောင်းကောင်းပြီးမြောက်ချင်ရင် ကိုယ်တိုင်လုပ်မှဖြစ်မယ်’ ဟူသည့်သဘောထားဝင်လာခဲ့ပေမည်။ သို့သော် ဤသဘောထားက အတွေ့အကြုံနည်းသူတို့သည် အတွေ့အကြုံပိုရှိသူများထံမှ လေ့ကျင့်မှုရယူကြရမည်ဟူသည့် ကျမ်းစာ၌ဖော်ပြထားသော ယေဟောဝါ၏အလိုတော်နှင့် ကိုက်ညီပါသလော။—၂ တိမောသေ ၂:၂။
နယ်လှည့်ခရီးဖော်တစ်ဦးဖြစ်သည့် ယောဟန်မာကုသည် ပံဖုလိပြည်တွင် မိမိ၏တာဝန်ကိုစွန့်ပြီး အိမ်သို့ပြန်သွားခဲ့သည့်အခါ ပေါလုစိတ်ပျက်ခဲ့၏။ (တမန်တော် ၁၅:၃၈၊ ၃၉) သို့ရာတွင် ယင်းကြောင့် ပေါလုသည် အခြားသူများကိုလေ့ကျင့်ပေးရန် တွန့်ဆုတ်မနေခဲ့ပါ။ တခြားလူငယ်ညီအစ်ကို တိမောသေကို ရွေးချယ်လိုက်ပြီး သာသနာပြုလုပ်ငန်းအတွက် လေ့ကျင့်ပေးခဲ့သည်။ * (တမန်တော် ၁၆:၁-၃) ဗေရိမြို့တွင် သာသနာပြုများသည် ပြင်းထန်သောဆန့်ကျင်မှုကိုရင်ဆိုင်ခဲ့ရသဖြင့် ပေါလုအနေနှင့် ထိုတွင်ဆက်နေရန်မသင့်ခဲ့ပေ။ ထို့ကြောင့် အသင်းတော်အသစ်ကိုကြည့်ရှုရန် ရင့်ကျက်သောညီအစ်ကိုသိလနှင့် တိမောသေတို့အား တာဝန်လွှဲအပ်ပေးခဲ့သည်။ (တမန်တော် ၁၇:၁၃-၁၅) တိမောသေသည် သိလထံမှ များစွာသင်ယူခဲ့မည်မှာ သေချာပါသည်။ နောက်ပိုင်းတွင် တိမောသေသည် ထပ်ဆင့်တာဝန်ကို ထမ်းဆောင်နိုင်စွမ်းရှိလာသောအခါ သက်သာလောနိတ်အသင်းတော်သို့ သွားရောက်အားပေးရန် သူ့ကို ပေါလုစေလွှတ်ခဲ့သည်။—၁ သက်သာလောနိတ် ၃:၁-၃။
ပေါလုနှင့် တိမောသေတို့၏ဆက်ဆံရေးသည် အလုပ်သဘောအရမဟုတ်ခဲ့၊ အေးတိအေးစက်ဖြစ်မနေခဲ့ပါ။ သူတို့နှစ်ဦးစပ်ကြား နွေးထွေးသောနှောင်ကြိုးရှိခဲ့သည်။ ကောရိန္သုအသင်းတော်သို့ ပေါလုစာရေးရာတွင် ထိုနေရာသို့စေလွှတ်ရန်ရည်ရွယ်ထားသူ တိမောသေအား “သခင်ဘုရား၌သစ္စာရှိသော ငါ၏ချစ်သား” ဟုပေါလုဖော်ပြခဲ့သည်။ သူဤသို့ထပ်ဆင့်ဆို၏– “ငါသည် ခရစ်တော်၌ကျင့်သောအကျင့်ဓလေ့များကို သင်တို့သည်မှတ်မိစေခြင်းငှာ [တိမောသေ] သည် ပြသတိုက်တွန်းလိမ့်မည်။” (၁ ကောရိန္သု ၄:၁၇) ပေါလုထံမှရရှိသောလေ့ကျင့်ပေးမှုကို တိမောသေလက်ခံတုံ့ပြန်ကာ တာဝန်များကို အရည်အချင်းရှိရှိ ထမ်းဆောင်လာနိုင်ခဲ့သည်။ တိမောသေကို ပေါလုလေ့ကျင့်ပေးခဲ့သကဲ့သို့ လူငယ်ညီအစ်ကိုများအား အမှန်စိတ်ဝင်စားမှုပြသည့် အသက်ကြီးသူများ၏လေ့ကျင့်ပေးမှုမှ အကျိုးခံစားခဲ့ရသူများစွာသည် စွမ်းရည်ရှိသောဓမ္မအမှုထမ်း၊ အကြီးအကဲ သို့မဟုတ် နယ်လှည့်ကြီးကြပ်မှူးများ ဖြစ်လာခဲ့ကြပေပြီ။
အကြီးအကဲတို့၊ သူတစ်ပါးကိုလေ့ကျင့်ပေးလော့!
ဟေရှာယ ၆၀:၂၂ ပါပရောဖက်ပြုချက်သည် ယနေ့ အမှန်ပင်ပြည့်စုံနေသည်။ ယေဟောဝါသည် ‘အားနည်းသောသူတစ်ယောက်ကို အားကြီးသောလူမျိုးဖြစ်’ စေလျက်ရှိသည်။ ထိုလူမျိုးသည် “အားကြီး” မြဲအားကြီးနေရန် ကောင်းစွာစီစဉ်ဖွဲ့စည်းထားရမည်။ အကြီးအကဲတို့၊ ထပ်ဆင့်လေ့ကျင့်ပေးမှု လက်ခံယူနိုင်မည့် ဆက်ကပ်အပ်နှံထားသော အမျိုးသားများအား လေ့ကျင့်ပေးနိုင်မည့်နည်းလမ်းများကို သုံးသပ်ပါလေ။ ဓမ္မအမှုထမ်းတစ်ဦးစီအနေနှင့် တိုးတက်နိုင်ရန် သူပြုလုပ်ဆောင်ရွက်ရမည့်အရာမှန်သမျှကို ကောင်းစွာသိရှိပါစေ။ နှစ်ခြင်းခံပြီးသော အသင်ညီအစ်ကိုများလည်း သင်ရရှိသည့်ဂရုစိုက်မှုမှန်သမျှကို အကျိုးအများဆုံးဖြစ်ထွန်းစေပါ။ သင့်စွမ်းရည်၊ အသိပညာနှင့် အတွေ့အကြုံတိုးပွားစေရန် အခွင့်အရေးရသမျှကိုယူပါ။ ယေဟောဝါသည် ဤကဲ့သို့သောမေတ္တာပြည့်ဝသည့် ကူညီပေးမှုအစီအစဉ်ကို မုချကောင်းချီးပေးပါလိမ့်မည်။—ဟေရှာယ ၆၁:၅။
[အောက်ခြေမှတ်ချက်]
^ အပိုဒ်၊ 18 နောက်ပိုင်းတွင် ပေါလုသည် ယောဟန်မာကုနှင့်အတူ လက်တွဲအမှုဆောင်ခဲ့သည်။—ကောလောသဲ ၄:၁၀။
[စာမျက်နှာ ၃၀ ပါ လေးထောင့်ကွက်]
ဓမ္မအမှုထမ်းများလုပ်ဆောင်နိုင်သည့်အရာ
အကြီးအကဲများသည် ဓမ္မအမှုထမ်းများကိုလေ့ကျင့်ပေးသင့်သည်မှန်သော်လည်း ဓမ္မအမှုထမ်းများအနေနှင့် မိမိတို့၏ဝိညာဉ်ရေး တိုးတက်စေရန် လုပ်ဆောင်နိုင်စရာများရှိသည်။
—ဓမ္မအမှုထမ်းများသည် မိမိတို့၏တာဝန်များကို ထမ်းဆောင်ရာ၌ ဝီရိယရှိပြီး ယုံကြည်စိတ်ချရသူများဖြစ်သင့်သည်။ လေ့လာမှုအကျင့်ကောင်းများကိုလည်း ပျိုးထောင်သင့်၏။ တိုးတက်မှုသည် လေ့လာမှုနှင့် သိရှိထားရာများကို ကျင့်သုံးခြင်းအပေါ် များစွာမူတည်သည်။
—ဓမ္မအမှုထမ်းတစ်ဦးသည် ခရစ်ယာန်အစည်းအဝေးတစ်ခုတွင် ဟောပြောဖို့ပြင်ဆင်သောအခါ အကြောင်းအရာကို မည်သို့မည်ပုံတင်ဆက်ရမည်အကြောင်း စွမ်းရည်ရှိသောအကြီးအကဲတစ်ဦးအား မတွန့်မဆုတ်မေးမြန်းသင့်သည်။
—ဓမ္မအမှုထမ်းသည် ကျမ်းစာဟောပြောချက်တစ်ခုတင်ဆက်ပုံကို သတိထားကြည့်ရှုပေးဖို့နှင့် တိုးတက်မှုရှိစေရန် ပြုပြင်ရမည့်အရာများကို သွန်သင်ချက်ပေးဖို့ အကြီးအကဲတစ်ဦးအား တောင်းဆိုလိုပေမည်။
ဓမ္မအမှုထမ်းများအနေနှင့် အကြီးအကဲများ၏သွန်သင်ချက်ကို တောင်းဆိုပြီး လက်ခံကျင့်သုံးသင့်သည်။ ဤနည်းအားဖြင့် သူတို့၏တိုးတက်မှုသည် ‘လူအပေါင်းတို့ရှေ့ထင်ရှား’ ပါလိမ့်မည်။—၁ တိမောသေ ၄:၁၅။