‘နှုတ်မြွက်တရားတော်ကို ဟောပြောခြင်း’ ကလန်းဆန်းစေ
“ငါ့ထံသို့လာကြလော့။ ငါသည် လန်းဆန်းစေမည်”
‘နှုတ်မြွက်တရားတော်ကို ဟောပြောခြင်း’ ကလန်းဆန်းစေ
သူသည် အရေးကြီးတာဝန်နှင့်ပတ်သက်၍ အပြစ်ဆိုဖွယ်မရှိသူဖြစ်သည်။ သူ၏သွန်သင်နည်းများကား အလွန်အကျိုးသက်ရောက်လှသဖြင့် “ပရိသတ်အပေါင်းတို့သည် ဆုံးမ[သွန်သင်]ပေးတော်မူခြင်းကို အလွန်အံ့သြကြ” ၏။ (မဿဲ ၇:၂၈) ထို့ပြင် သူသည် မနားမနေဟောပြောသူတစ်ဦးလည်းဖြစ်သည်။ သူ၏အချိန်၊ ခွန်အားနှင့် ပေးနိုင်သမျှကို ဘုရားသခင့်နိုင်ငံတော်ဟောပြောခြင်းတွင် အဓိကမြှုပ်နှံထား၏။ မှန်ပါသည်၊ ယေရှုခရစ်တော်သည် ပြိုင်စံရှားဟောပြောသွန်သင်သူတစ်ဦးအဖြစ် ကိုယ်တော်၏နေရင်းပြည်တစ်လျှောက် ခရီးလှည့်လည်ခဲ့၏။—မဿဲ ၉:၃၅။
ယေရှု၏အရေးတကြီးတာဝန်မှာ ကိုယ်တော်၏တစ်ခေတ်တည်းသားများကို ‘ဘုရားသခင့်နိုင်ငံတော်သတင်းကောင်း’ ဟောပြောခြင်းနှင့် ကမ္ဘာချီဟောပြောခြင်းလုပ်ငန်းအတွက် ကိုယ်တော်၏တပည့်တော်များကို လေ့ကျင့်ပေးခြင်းဖြစ်သည်။ (မဿဲ ၄:၂၃; ၂၄:၁၄; ၂၈:၁၉၊ ၂၀) သူတို့၏ကြီးလေးသောဟောပြောခြင်းတာဝန်နှင့် ယင်းကိုအရေးတကြီးထမ်းဆောင်ရခြင်းအပြင် ဤလုပ်ငန်း၏ကြီးမားမှုတို့က မစုံလင်သော၊ ကန့်သတ်ချက်များရှိသော ကိုယ်တော်၏နောက်တော်လိုက်များကို ဝန်ပိစေမည်လော။
လုံးဝမပိစေပါ! လုပ်သားတိုးများလာစေရန် “စပါးရှင်” ယေဟောဝါဘုရားသခင်ထံ ဆုတောင်းဖို့ တပည့်တော်များကို ယေရှုသင်ပေးပြီးနောက် လူတို့ကိုသွန်သင်ဆုံးမကြရန် သူတို့အားစေလွှတ်ခဲ့သည်။ (မဿဲ ၉:၃၈; ၁၀:၁) ထို့နောက် ကိုယ်တော်က ဟောပြောခြင်းတာဝန်အပါအဝင် မိမိ၏နောက်တော်လိုက်တစ်ဦးဖြစ်ရခြင်းတာဝန်မှ လန်းဆန်းမှုနှင့် နှစ်သိမ့်မှု အမှန်တကယ်ရရှိမည်ဟု အာမခံတော်မူသည်။ “ငါ့ထံသို့လာကြလော့။ ငါသည် လန်းဆန်းစေမည်” ဟုယေရှုမိန့်ဆိုခဲ့၏။—မဿဲ ၁၁:၂၈၊ ကဘ။
ရွှင်လန်းမှုရင်းမြစ်
ထိုဖိတ်ခေါ်ချက်မှာ တကယ်ကိုထောက်ထားစာနာ၊ မေတ္တာပါပြီး ကြင်နာမှုရှိလှသည်တကား! ယေရှုသည် မိမိ၏နောက်တော်လိုက်များကို အလိုက်သိသိနားလည်ဂရုစိုက်တော်မူကြောင်း ဖော်ပြသည်။ ကိုယ်တော်၏တပည့်တော်များသည် ဘုရားသခင့်နိုင်ငံတော် “သတင်းကောင်း” ဟောပြောခြင်းတာဝန်ကို ထမ်းဆောင်ရာတွင် လန်းဆန်းမှု အမှန်တကယ်ရရှိကြသည်။ သူတို့သည် ထိုလုပ်ငန်းကြောင့် စစ်မှန်သောရွှင်လန်းအားရမှုရရှိကြ၏။—ယောဟန် ၄:၃၆။
ယေရှု ကမ္ဘာပေါ်မကြွလာမီ နှစ်ပေါင်းများစွာကပင် ဘုရားသခင်၏မြင့်မြတ်သောလုပ်ငန်းတော်၏ အမှတ်အသားတစ်ခုမှာ ရွှင်လန်းခြင်းဖြစ်ကြောင်း သမ္မာကျမ်းစာကဖော်ပြသည်။ ၎င်းကို ဆာလံဆရာ ဤသို့သီဆိုချိန်တွင် ဖော်ပြခဲ့သည်– “မြေကြီးသားအပေါင်းတို့ ထာဝရဘုရား[သခင်]အား ကြွေးကြော်ကြလော့။ ထာဝရဘုရား[သခင်]၏အမှုတော်ကို ဝမ်းမြောက်စွာဆောင်ရွက်ကြလော့။ ရွှင်လန်းစွာသီချင်းဆိုလျက် အထံတော်သို့ဝင်ကြလော့။” (ဆာလံ ၁၀၀:၁၊ ၂) ယနေ့ လူမျိုးအပေါင်းသည် ယေဟောဝါ၌ ရွှင်လန်းလျက်ရှိကြပြီး သူတို့၏ချီးမွမ်းထောမနာပြုသံသည် အောင်ပွဲခံတပ်၏အားရရွှင်လန်းသံနှင့်တူသည်။ ဘုရားသခင်ကို အမှန်တကယ်ဆက်ကပ်အပ်နှံထားသူများသည် “ရွှင်လန်းစွာသီချင်းဆိုလျက်” အထံတော်ရှေ့ တိုးဝင်လာကြ၏။ ထိုသို့ဖြစ်ခြင်းသည် အမှန်ပင် လျောက်ပတ်ပေသည်၊ အကြောင်းမှာ ယေဟောဝါသည် “ပျော်ရွှင်သောဘုရားသခင်” ဖြစ်ပြီး မိမိ၏ကျေးကျွန်များသည်လည်း ဆက်ကပ်အပ်နှံမှုနှင့်အညီ လုပ်ဆောင်မှုမှ ရွှင်လန်းမှုရရှိစေလိုသည်။—၁ တိမောသေ ၁:၁၁၊ ကဘ။
လန်းဆန်းကြသောအမှုဆောင်များ
လယ်ကွင်းအမှုဆောင်တွင် ကြိုးစားလုပ်ဆောင်ခြင်းသည် ကျွန်ုပ်တို့ကို မောပန်းစေမည့်အစား မည်သို့လန်းဆန်းမှုပေးသနည်း။ ယေဟောဝါ၏လုပ်ငန်းတော်ကို ယေရှုလုပ်ဆောင်ခြင်းသည် ကိုယ်တော့်အတွက် ပြန်လည်လန်းဆန်းစေသောအစာနှင့်တူ၏။ ကိုယ်တော်က “ငါ့ကိုစေလွှတ်တော်မူသောသူ၏ အလိုတော်ကိုဆောင်ခြင်း၊ သူ၏အမှုတော်ကိုပြီးစီးခြင်းအမှုသည် ငါ့စားစရာဖြစ်၏” ဟုမိန့်ဆိုသည်။—ယောဟန် ၄:၃၄။
အလားတူပင် ယနေ့ စိတ်ထက်သန်စွာဟောပြောသောခရစ်ယာန်များသည် ‘နှုတ်မြွက်တရားတော်ကို ဟောပြော’ စဉ်ရွှင်လန်းမှုရရှိကြသည်။ (၂ တိမောသေ ၄:၂) ဟောပြောခြင်းလုပ်ငန်းတွင် လစဉ်နာရီ ၇၀ ကျော်ပါဝင်သော လူလတ်ပိုင်းခရစ်ယာန်အမျိုးသမီး ကော်နီက ဤသို့ပြောပြသည်– “ခရစ်ယာန်ဓမ္မအမှုမှာ တစ်နေ့လုံးပါဝင်ပြီးနောက် ကျွန်မမောပန်းနေပေမဲ့ ပျော်ရွှင်အားရနေတယ်။”
ဘုရားသခင့်နိုင်ငံတော်သတင်းတရားကို တလိုတလားလက်မခံကြလျှင်ကော အသို့နည်း။ ကော်နီက ဤသို့ဆက်ပြော၏– “တုံ့ပြန်မှုက ဘယ်လိုပဲဖြစ်နေပါစေ၊ ခရစ်ယာန်ဓမ္မအမှုမှာပါဝင်ရလို့ ကျွန်မ တစ်ခါမှဝမ်းမနည်းခဲ့ဘူး။ ယေဟောဝါနှစ်သက်ရာကို ကျွန်မပြုလုပ်နေတယ်ဆိုတာ ကျွန်မသိတဲ့အပြင် အမှန်တရားအကြောင်း ပြောပြရတာကို ကျွန်မဝမ်းသာတယ်၊ အဲဒီလိုကျွန်မဟောပြောတဲ့အတွက် ကျမ်းစာထဲမှာပါတဲ့ အံ့ဖွယ်မျှော်လင့်ချက်ဟာ ကျွန်မနှလုံးထဲမှာ အမြစ်စွဲသွားတယ်။”
ဘုရားသခင်နှင့်ပတ်သက်သည့် တိကျမှန်ကန်သောအသိပညာကို လူတို့သိရှိရန် ကူညီပေးခြင်းသည် မိမိတို့၏ဘဝကို အဓိပ္ပာယ်ရှိစေသည်ဟု အခြားသူများက သတိပြုမိကြသည်။ ဟောပြောခြင်းလုပ်ငန်းတွင် လစဉ်နာရီ ၅၀ ကျော်မှန်မှန်ပါဝင်သော အမျိုးသမီးငယ်မဲလောန်နီက ဤသို့ပြောသည်– “ခရစ်ယာန်ဓမ္မအမှုဟာ ကျွန်မရဲ့ဘဝကို ညွှန်ကြားပြီး ရည်ရွယ်ချက်ရှိစေတဲ့အတွက် လန်းဆန်းစေတယ်။ လုပ်ငန်းတော်မှာ ကျွန်မပါဝင်တဲ့အခါ ကိုယ်ရေးကိုယ်တာပြဿနာတွေ၊ နေ့တိုင်းခံစားနေရတဲ့ ဖိစီးမှုတွေဟာ ဘာမှမဟုတ်သလိုဖြစ်သွားတယ်။”
ယေဟောဝါသက်သေများ၏ စိတ်ထက်သန်သော အမှုဆောင်တစ်ဦးဖြစ်သူ မီလီစီင်တ်က ဤသို့ပြောပြသည်– “လူတွေအတွက် ဘုရားသခင့်ရည်ရွယ်ချက်အကြောင်း၊ မြေကြီးပေါ်မှာ ပရဒိသုဘယ်လိုပြန်တည်ထောင်လာမယ့်အကြောင်း အခြားသူတွေကို ကျွန်မပြောပြရတဲ့ရက်တိုင်းကို ခရစ်ယာန်ဓမ္မအမှုက တန်ဖိုးရှိစေတယ်။ အဲဒါက ကျွန်မကို နေ့စဉ်နေ့တိုင်း ယေဟောဝါဟာ တကယ့်ပုဂ္ဂိုလ်ဖြစ်လာစေပြီး အခြားဘယ်နည်းနဲ့မှမရနိုင်တဲ့ ငြိမ်သက်မှုနဲ့ အတွင်းပျော်ရွှင်မှုကိုလည်း ရစေပါတယ်။”
လန်းဆန်းလာသော ခံယူသူများ
ဘုရားသခင့်နိုင်ငံတော်ဟောပြောသူများသည် ခရစ်ယာန်ဓမ္မအမှုကြောင့် အမှန်ပင်လန်းဆန်းလာပြီး အသက်ပေးသတင်းတရားကို လက်ခံသူများသည်လည်း ယင်းကြောင့် စိတ်ချမ်းမြေ့ရကြ၏။ ပေါ်တူဂီနိုင်ငံမှ ကျောင်းဆရာမတစ်ဦးသည် ခရစ်ယာန်သီလရှင်များနှင့် ခရစ်ယာန်ဘုန်းကြီးများ၏ လေ့ကျင့်သွန်သင်မှုကိုရရှိသော်လည်း သူ၏ဝိညာဉ်ရေးလိုအပ်မှုကို သူ၏ချာ့ခ်ျကမဖြည့်ဆည်းပေးဟု ခံစားခဲ့ရသည်။ သူ၏ကျမ်းစာမေးခွန်းများအတွက် အဖြေမရခဲ့ချေ။ ယေဟောဝါသက်သေတစ်ဦးနှင့် ကျမ်းစာသင်အံမှုမှန်မှန်ပြုလုပ်ခြင်းဖြင့် ကျမ်းစာထိုးထွင်းသိမြင်မှုတစ်ခုပြီးတစ်ခုကို သူရရှိခဲ့သည်။ ထိုကျောင်းဆရာမသည် တကယ်စိတ်အားတက်ကြွခဲ့၏။ “ကျွန်မရဲ့မေးခွန်းတွေကို ကျမ်းစာအထောက်အထားနဲ့ တစ်ခုပြီးတစ်ခု ကျေနပ်လက်ခံလောက်အောင် ဖြေဆိုပေးတဲ့ ဗုဒ္ဓဟူးနေ့တိုင်းကျင်းပတဲ့သင်အံမှုကို ကျွန်မစောင့်မျှော်ခဲ့တယ်။” ယနေ့ ဤအမျိုးသမီးသည် ဆက်ကပ်အပ်နှံပြီးသော ယေဟောဝါ၏ကျေးကျွန်တစ်ဦးဖြစ်နေပြီး အခြားသူများကိုလည်း ကျမ်းစာအမှန်တရားဖြင့် လန်းဆန်းစေလျက်ရှိ၏။
သို့ဖြစ်၍ ယေဟောဝါသက်သေများသည် သူတို့၏ဟောပြောခြင်းတာဝန် အရေးပါမှုနှင့် သူတို့၏ကမ္ဘာချီလယ်ကွင်း ကျယ်ဝန်းမှုတို့ကြောင့် ဝန်လေးလှသည်ဟု မခံစားရကြောင်း ထင်ရှားပါသည်။ စိတ်ဝင်စားမှုမရှိလျှင်ဖြစ်စေ၊ အတိုက်အခံပြုလုပ်လျှင်ဖြစ်စေ သူတို့စိတ်ဓာတ်မကျကြပါ။ သူတို့သည် ဘုရားသခင့်နိုင်ငံတော်ဟောပြောခြင်းတာဝန်ကို ကျေပွန်ဖို့ အားကြိုးမာန်တက်လုပ်ဆောင်ခဲ့ကြပြီ။ လူကိုတွေ့ရှိနိုင်သည့်နေရာများ—အမေရိကန်ပြည်ထောင်စုရှိ ကုန်တင်ကားရပ်ရာနေရာ (၁)၊ ကိုရီးယားလေဆိပ် (၂)၊ အင်းဒီစ်တောင်တန်း (၃)၊ လန်ဒန်ဈေး (၄)—တွင် သတင်းကောင်းဟောပြောကြသည်။ ယေရှု၏မျက်မှောက်ခေတ်နောက်တော်လိုက်များသည် ပင်ပန်းရကျိုးနပ်သောလုပ်ငန်းကို ကမ္ဘာတစ်ဝန်းတွင် ရွှင်လန်းစွာ ဆက်လက်လုပ်ဆောင်လျက်ရှိကြသည်။ ကိုယ်တော်၏ကတိတော်နှင့်အညီ သူတို့ကိုလန်းဆန်းစေပြီး အခြားသူများစွာတို့ကိုလည်း လန်းဆန်းစေရန် သူတို့ကို အသုံးပြုခဲ့သည်။—ဗျာဒိတ် ၂၂:၁၇။