ကိုယ်​၌​စူးသော​ဆူး​များ​ကို သူတို့​ကိုင်တွယ်​ဖြေရှင်း​ခဲ့​ကြ

“ငါ့ကို​ဒဏ်ခတ်​သော စာတန်​၏​တမန်​တည်း​ဟူသော ငါ့​ကိုယ်​၌​စူးသော​ဆူး​ကို​ပေး​တော်​မူ​၏။”—၂ ကောရိန္သု ၁၂:၇။

၁။ ယနေ့ လူ​တို့​ရင်ဆိုင်​နေရ​သော ပြဿနာ​အချို့​ကား​အဘယ်နည်း။

သင်သည် အဆက်မပြတ်​ဖြစ်နေ​သော စုံစမ်း​နှောင့်ယှက်မှု​တစ်မျိုး​မျိုးကို ရင်ဆိုင်​နေရ​ပါသလော။ သို့​ဆိုလျှင် အသင်​တစ်ဦးတည်း​မဟုတ်ပါ။ ဤ “ခဲယဉ်း​သော​ကာလ” တွင် တည်ကြည်သော​ခရစ်ယာန်​များသည် ပြင်းထန်သော​ဆန့်ကျင်မှု၊ မိသားစု​ပြဿနာ​များ၊ ဖျားနာ​မှု၊ ငွေကြေး​အခက်အခဲ​များ၊ စိတ်​ဆင်းရဲမှု​များ၊ ချစ်​မြတ်နိုး​ရသူ​များ​သေဆုံး​ခြင်း​နှင့် အခြား​စိန်ခေါ်ချက်​များ​ကို ရင်ဆိုင်​နေကြ​ရသည်။ (၂ တိမောသေ ၃:၁-၅) တိုင်းနိုင်ငံ​အချို့​တွင် အစာ​ရှားပါးမှု​နှင့် စစ်မက်​များ​၏ ခြိမ်းခြောက်​မှု​ကို လူများစွာ​ခံစား​နေကြ​ရသည်။

၂၊ ၃။ ကျွန်ုပ်​တို့​ရင်ဆိုင်​ကြုံတွေ့​နေရ​သော ဆူး​နှင့်​တူ​သည့်​ပြဿနာ​များ​ကြောင့် အဘယ်​အပျက်သဘောထား​များ ပေါ်ပေါက်​လာနိုင်​သနည်း၊ ယင်းသည် မည်သို့​အန္တရာယ်​ပြု​နိုင်​သနည်း။

^၂ ထိုသို့​သော​ပြဿနာ​များသည် အထူးသဖြင့် တစ်ပြိုင်တည်း​စု​ပြုံ​ရောက်လာ​ပါ​က လုံးလုံး​စိတ်ဓာတ်ကျ​စေနိုင်​သည်။ နယပုံပြင် ၂၄:၁၀ က “သင်သည် အမှုရောက်​သော​ကာလ​၌ စိတ်ပျက်​လျှင် အားနည်း​၏” ဟု​ဆို​ကြောင်း​သတိပြုပါ။ မှန်ပါသည်၊ ကျွန်ုပ်​တို့​ခံရ​သော​စုံစမ်း​နှောင့်ယှက်မှု​များ​ကြောင့် စိတ်ဓာတ်ကျ​ခြင်း​သည် အလွန်​လိုအပ်သော​ခွန်အား​မရှိစေ​ဘဲ အဆုံးတိုင်အောင်​ခံရပ်​ရန် ကျွန်ုပ်​တို့၏​စိတ်ပိုင်းဖြတ်​ချက်​ကို အားလျော့​သွား​စေနိုင်​သည်။ မည်သို့​အားဖြင့်​နည်း။

^၃ စိတ်ဓာတ်ကျ​ခြင်း​သည် အရှိ​ကို​အရှိအတိုင်း​ရှုမြင်​သုံးသပ်မှု ပျောက်ဆုံး​သွား​စေနိုင်​သည်။ ဥပမာ၊ ကျွန်ုပ်​တို့၏​အခက်အခဲ​များ​ကို ပုံကြီးချဲ့​ကာ မိမိကိုယ်ကို​သနား​လာဖို့ လွယ်ကူ​သည်။ အချို့​ဆိုလျှင် “ကျွန်တော့်​ကျ​မှ ဘာကြောင့်​ဒီလို​ဖြစ်​ရတာလဲ” ဟု​ပင် ဘုရားသခင်​ထံ​အော်ဟစ်​ပေမည်။ ဤသို့​သော​အပျက်သဘော အမြစ်စွဲ​လာ​ပါ​က ပျော်ရွှင်မှု​နှင့် ယုံကြည်​စိတ်ချမှု​တို့ လုံး​ပါး​ပါး​သွား​နိုင်​သည်။ ထို​အခါ ဘုရားသခင့်​ကျွန်​တစ်ဦး​သည် “ယုံကြည်ခြင်း​နှင့်​ဆိုင်၍ ကောင်းစွာ​သော​တိုက်လှန်​ခြင်း​ကို” မ​တိုက်​တော့​သည့်​အထိ စိတ်ဓာတ်ကျ​လာနိုင်​သည်။—၁ တိမောသေ ၆:၁၂။

၄၊ ၅။ ကိစ္စ​အချို့​တွင် စာတန်​သည် ကျွန်ုပ်​တို့၏​ပြဿနာ​များနှင့် မည်သို့​ပတ်သက်​သနည်း၊ သို့​တိုင် ကျွန်ုပ်​တို့သည် အဘယ်အရာကို​ယုံကြည်​စိတ်ချ​နိုင်​သနည်း။

^၄ ယေဟောဝါ​ဘုရားသခင်​က ကျွန်ုပ်​တို့ကို စုံစမ်း​နှောင့်ယှက်​နေသည်​မဟုတ်​ကြောင်း သေချာ​ပါ​သည်။ (ယာကုပ် ၁:၁၃) ကျွန်ုပ်​တို့သည် ကိုယ်တော်​အား​တည်ကြည်​ဖို့ ကြိုးစား​နေကြ​သောကြောင့်​သာ စမ်းသပ်မှု​အချို့​ကို​ခံ​နေကြ​ရ၏။ အမှန်​မှာ ယေဟောဝါ​ကို​ဝတ်ပြုသူ​အားလုံး​သည် မိမိတို့​ကိုယ်ကို ကိုယ်တော်​၏​အဓိက​ရန်သူကြီး စာတန်​၏​ပစ်မှတ်​များ​ဖြစ်စေ​ကြသည်။ “ဤ​လောကကို​အစိုးရ​သော” ဆိုးသွမ်း​သည့် “ဘုရား[သခင်]” သည် သူ၏​ကျန်ကြွင်း​သော​အချိန်တို​လေး​တွင် ယေဟောဝါ​အား​ချစ်​မြတ်နိုးသူ​များ ကိုယ်တော့်​အလိုတော်ကို​မ​ဆောင်​တော့​ရန် ကြိုးပမ်း​လျက်​ရှိသည်။ (၂ ကောရိန္သု ၄:၄) စာတန်​သည် ကမ္ဘာ​တစ်ဝန်း​ရှိ ကျွန်ုပ်​တို့၏​ညီအစ်ကို​အသင်းအပင်း​တစ်ရပ်လုံး​အပေါ် ဆင်းရဲခြင်း​ဝေဒနာ​များ​ကို တတ်နိုင်​သမျှ ကျရောက်​စေ​သည်။ (၁ ပေတရု ၅:၉) ကျွန်ုပ်​တို့၏​ပြဿနာ​အားလုံး​ကို စာတန် တိုက်ရိုက်​ဖြစ်ပေါ်​စေ​သည်မဟုတ်​သော်လည်း ကျွန်ုပ်​တို့​ပို​၍​ပို​၍​အားလျော့​စေဖို့ ကျွန်ုပ်​တို့​ကြုံတွေ့​နေရ​သော ပြဿနာ​များ​ကို​အသုံးချ​နိုင်​သည်။

^၅ စာတန် သို့​မဟုတ် သူ၏​လက်နက်များ​သည် မည်မျှ​ပင်​တန်ခိုး​ကြီး​ပါ​လေ​စေ သူ့ကို​ကျွန်ုပ်​တို့​အောင်နိုင်​ပါ​သည်! ယင်းကို ကျွန်ုပ်​တို့​မည်သို့​စိတ်ချ​နိုင်​သနည်း။ ကျွန်ုပ်​တို့​အကျိုးအတွက် ယေဟောဝါ​ဘုရားသခင်​တိုက်ခိုက်​ပေး​သောကြောင့်​ပင်။ ကိုယ်တော်​သည် မိမိ၏​ကျေးကျွန်​များ​အား စာတန်​၏​နည်း​ဗျူဟာ​များ​ကို​သိရှိ​စေ​ခဲ့ပြီ။ (၂ ကောရိန္သု ၂:၁၁) အမှန်ဆိုလျှင် သမ္မာကျမ်းစာ​က စစ်မှန်သော​ခရစ်ယာန်​များ​ခံရ​သော စုံစမ်း​နှောင့်ယှက်မှု​အတော်များများကို ဖော်ပြ​သည်။ တမန်​တော်​ပေါလု​နှင့်​ပတ်သက်​၍ သမ္မာကျမ်းစာ​က “ကိုယ်​၌​စူးသော​ဆူး” အသုံးအနှုန်း​ကို​သုံး​ထား​သည်။ အဘယ်ကြောင့်​နည်း။ ထိုစကား​စု​ကို ဘုရားသခင့်​နှုတ်မြွက်တော် မည်သို့​ရှင်းပြသည်​ကို ကြည့်​ကြပါစို့။ ထို​အခါ စုံစမ်း​နှောင့်ယှက်မှု​များ​ကို ရင်ဆိုင်​ကျော်လွှား​နိုင်​ဖို့ ကျွန်ုပ်​တို့​တစ်ဦးတည်း​သာ ယေဟောဝါ​၏​အကူအညီ လိုအပ်ခြင်း​မဟုတ်​ကြောင်း တွေ့မြင်​ရ​ပါ​လိမ့်​မည်။

 စမ်းသပ်မှု​များ ဆူး​များနှင့်​တူ​ပုံ

၆။ “ကိုယ်​၌​စူးသော​ဆူး” ဟု​ဆို​ရာ​တွင် ပေါလု​သည် အဘယ်အရာကို​ဆိုလို​သနည်း၊ ထို​ဆူး​သည် အဘယ်အရာ​ဖြစ်​နိုင်​သနည်း။

^၆ အပြင်းအထန်​စမ်းသပ်ခံ​ရသော ပေါလု​သည် ဤသို့​ရေးသား​ရန် မှုတ်သွင်းခံ​ခဲ့​ရသည်– “ငါသည် ထောင်လွှား​သော​စိတ်​မရှိစေ​ခြင်း​ငှာ၊ ငါ့ကို​ဒဏ်ခတ်​သော စာတန်​၏​တမန်​တည်း​ဟူသော ငါ့​ကိုယ်​၌​စူးသော​ဆူး​ကို ပေး​တော်​မူ​၏။” (၂ ကောရိန္သု ၁၂:၇) ပေါလု​၏​ကိုယ်​၌​စူး​နေသော ဤ​ဆူး​ကား အဘယ်နည်း။ အရေဖျား​အောက် နက်ရှိုင်း​စွာ​ဝင်​နေသော​ဆူး​တစ်ချောင်း​သည် အမှန်ပင်​နာကျင်​ပေမည်။ ထို့​ကြောင့် ထို​တင်စား​သော​စကား​က ကာယရေး​ဖြစ်စေ၊ စိတ်ပိုင်း​ဆိုင်ရာ​ဖြစ်စေ၊ သို့​မဟုတ် နှစ်မျိုး​စ​လုံး​ပင်​ဖြစ်စေ ပေါလု​ကို​နာကျင်စေ​သော​အရာ တစ်စုံတစ်ခု​ကို​ဆိုလို​ပေမည်။ ပေါလု​သည် မျက်စိ​ရောဂါ သို့​မဟုတ် အခြား​ကာယရေး​ချို့ယွင်းမှု​တစ်မျိုး​မျိုးကို ခံစား​နေရ​ပေမည်။ သို့​မဟုတ်လျှင် အဆိုပါ​ဆူး​သည် ပေါလု​၏​တမန်​တော်​အရာ​ကို​မ​က သူ၏​ဟောပြောခြင်း​နှင့်​သွန်သင်ခြင်း​လုပ်ငန်း​ကို စောဒကတက်​သူများ​နှင့်​ပတ်သက်​နိုင်​ပေ​သည်။ (၂ ကောရိန္သု ၁၀:၁၀-၁၂; ၁၁:၅၊ ၆၊ ၁၃) မည်သည့်​အရာ​ပင်​ဖြစ်ပါ​လေ​စေ ထို​ဆူး​သည် ပေါလု​အား​နှောင့်ယှက်​နေပြီး ဖယ်ရှား​၍​မရ​ဖြစ်နေ​ပါ​သည်။

၇၊ ၈။ (က) ‘မပြတ်​ထိုးနှက်’ ဟူသော အသုံးအနှုန်း​က အဘယ်အရာကို​ဖော်ပြ​သနည်း။ (ခ) ယခု ကျွန်ုပ်​တို့ကို​စူး​နေသော မည်သည့်​ဆူး​မျိုးကို​မဆို ကိုင်တွယ်​နိုင်​ဖို့ အဘယ်ကြောင့်​အရေးကြီး​သနည်း။

^၇ ထို​ဆူး​သည် ပေါလု​ကို​မပြတ်​ထိုးနှက်​နေကြောင်း​သတိပြုပါ။ စိတ်ဝင်စားစရာ​မှာ ဤ​တွင်​ပေါလု​အသုံးပြု​ထားသော ဂရိ​ကြိယာ​သည် “လက်​ဆစ်​များ” အတွက်​သုံး​သော​စကားလုံး​မှ ဆင်းသက်လာ​သည်။ ထိုစကား​လုံး​ကို မဿဲ ၂၆:၆၇ တွင်​စာသား​အတိုင်း​အသုံးပြု​ထား​၏၊ ၁ ကောရိန္သု ၄:၁၁ တွင်​မူ ပုံဆောင်​စကား​အရ အသုံးပြု​ထား​သည်။ ထို​အခန်းငယ်​များ​တွင် လက်သီး​ဖြင့်​အ​ထိုး​ခံရ​သည့်​သဘော သက်ရောက်​စေ​သည်။ ယေဟောဝါ​နှင့် ကိုယ်တော့်​ကျေးကျွန်​များ​ကို စာတန်​ခါးခါးသီးသီး​မုန်းတီး​သည်ကို​ထောက်၍ ပေါလု​အား ဆူး​တစ်ချောင်း မပြတ်​ထိုးနှက်​နေခြင်း​သည် စာတန်​အတွက်​အားရစရာ​ဖြစ်​မည်​မှာ သေချာ​သည်။ ယနေ့ ကျွန်ုပ်​တို့​တွင် အလားတူ ကိုယ်​၌​စူးသော​ဆူး နှောင့်ယှက်​သည့်​အခါ စာတန်​ထပ်တူ​နှစ်သက်​သဘောကျ​ပေ​လိမ့်​မည်။

^၈ ထို့​ကြောင့် ကျွန်ုပ်​တို့သည် ပေါလု​ကဲ့သို့ ယင်း​သို့​သော​ဆူး​များ​ကို မည်သို့​ကိုင်တွယ်​ရန် သိထားဖို့​လို​သည်။ ယင်းကို​သိထားခြင်း​သည် ကျွန်ုပ်​တို့​အသက်ရှင်ရေး​ဖြစ်သည်! ယေဟောဝါ​သည် ဆူး​ကဲ့သို့​သော​ပြဿနာ​များ ဘယ်​သောအခါ​မျှ မရှိတော့​မည့် ကမ္ဘာသစ်​တွင် ကျွန်ုပ်​တို့ကို ထာဝစဉ်​အသက်ရှင်​စေ​လို​ကြောင်း​သတိရပါ။ ဤ​အထူး​ကောင်းမွန်သော​ဆု​ကို ကျွန်ုပ်​တို့​ဆွတ်ခူး​နိုင်​စေရန် ဘုရားသခင်​၏​တည်ကြည်သော​ကျေးကျွန်​များသည် သူတို့​ကိုယ်​၌​စူးသော​ဆူး​များ​ကို ကိုင်တွယ်​ခဲ့​ကြောင်း ဖော်ပြ​သည့်​ပုံ​ဥပမာ​များစွာကို ကိုယ်တော်​၏​သန့်ရှင်းသော​နှုတ်မြွက်​စကားတော်၊ သမ္မာကျမ်းစာ​တွင် တင်ပြ​ထား​တော်​မူ​၏။ သူတို့သည် ကျွန်ုပ်​တို့​နည်းတူ မစုံလင်​သော သာမန်​လူများ​ဖြစ်​ကြသည်။ ဤမျှ​ကြီးမားသော “သက်သေအပေါင်း” မှ​အချို့​ကို​သုံးသပ်ကြည့်​ခြင်း​က “ငါ​တို့​မျက်မှောက်​၌​ထားသော ပန်း​တုံး​တိုင်​သို့​ရောက်​ခြင်း​ငှာ အား​မ​လျော့​ဘဲ​ပြေး” ရန်​အကူအညီ​ရနိုင်​ပေ​သည်။ (ဟေဗြဲ ၁၂:၁) သူတို့​ခံရပ်​ခဲ့​ရာ​များ​ကို စေ့စေ့​စဉ်းစား​ကြည့်​ခြင်း​ဖြင့် စာတန်​အသုံးပြု​နေသော မည်သည့်​ဆူး​ကို​မဆို ကျွန်ုပ်​တို့​ကိုင်တွယ်​နိုင်​ကြောင်း ယုံကြည်​စိတ်ချ​စေ​သည်။

မေဖိဗောရှက်​ခံရ​သော​ဆူး​များ

၉၊ ၁၀။ (က) မေဖိဗောရှက်​သည် သူ၏​ကိုယ်​၌​စူးသော​ဆူး မည်သို့​ရရှိခဲ့​သနည်း။ (ခ) ဘုရင်​ဒါဝိဒ်​သည် မေဖိဗောရှက်​အား အဘယ်​ကြင်နာ​မှု​ပြ​ခဲ့​သနည်း၊ ဒါဝိဒ်​ကို ကျွန်ုပ်​တို့​မည်သို့​တုပ​နိုင်​သနည်း။

^၉ ဒါဝိဒ်​၏​မိတ်ဆွေ ယောနသန်​၏​သား မေဖိဗောရှက်​ကို​သုံးသပ်ကြည့်​ပါ။ မေဖိဗောရှက် အသက်​ငါး​နှစ်အရွယ်​တွင် သူ၏​ဖခင်​ယောနသန်​နှင့် ဘိုးတော်​ရှောလုမင်း​တို့ အသတ်ခံရ​သည့်​သတင်း​ကြား​ခဲ့​ရ၏။ သူ၏​အထိန်း​တော်​မှာ ထိတ်လန့်​သွားလေသည်။ ထို​အခါ အထိန်း​သည် “သူ့ကို​ချီ​၍ . . . အလျင်အမြန် [“အလန့်တကြား၊” သမ္မာ] ပြေး​သောကြောင့် သူငယ်​သည်​ကျ​၍​ခြေဆွံ့​၏။” (၂ ဓမ္မ​ရာဇဝင် ၄:၄) ဤ​မသန်မစွမ်းမှု​သည် မေဖိဗောရှက်​ကြီးပြင်း​လာသော​အခါ အတော်ပင်​ခံရ​ခက်​သော ဆူး​ဖြစ်​ခဲ့​ပေမည်။

^၁၀ နှစ်​အနည်းငယ်​ကြာသော် ဘုရင်​ဒါဝိဒ်​သည် ယောနသန်​အပေါ်​ထား​သည့် ကြီးမားသော​မေတ္တာ​ကြောင့် မေဖိဗောရှက်​ကို ချစ်ခင်​ကြင်နာ​မှု​တင်ပြ​ခဲ့​သည်။ ဒါဝိဒ်​သည် ရှောလု​ပိုင်ထိုက်​သမျှ​ကို သူ့​အား​လွှဲအပ်​၍ ၎င်း​နယ်မြေ​ကို ကြည့်ရှု​စောင့်ရှောက်​ဖို့ ရှောလု​၏​အစေအပါး​ဇိ​ဘ​အား တာဝန်​ပေး​ခဲ့​သည်။ ဒါဝိဒ်က “သင်သည်​နေ့တိုင်း​အစဉ် ငါ့​စားပွဲ​၌​စား​ရမည်” ဟူ၍လည်း မေဖိဗောရှက်​အား​မိန့်ဆိုခဲ့သည်။ (၂ ဓမ္မ​ရာဇဝင် ၉:၆-၁၀) ဒါဝိဒ်​၏​ချစ်ခင်​ကြင်နာ​မှု​သည် မေဖိဗောရှက်​အတွက် နှစ်သိမ့်မှု​ဖြစ်​ခဲ့​ပြီး သူ၏​မသန်စွမ်းမှု​ဝေဒနာ​ကို သက်သာ​စေ​ခဲ့​မည်​မှာ သေချာ​သည်။ အမှန်တကယ်​လက်တွေ့ကျ​သော သင်ခန်းစာ​ပါ​တကား! ကျွန်ုပ်​တို့​လည်း ကိုယ်​၌​စူးသော​ဆူး​ဒဏ်​ကို ခံ​နေရသူ​များ​အပေါ် ကြင်နာ​မှု​တင်ပြ​သင့်​သည်။

၁၁။ ဇိ​ဘ​သည် မေဖိဗောရှက်​နှင့်​ပတ်သက်​၍ အဘယ်အရာကို အခိုင်အမာ​ပြောဆို​သနည်း၊ သို့သော် သူ၏​အဆို​သည် လိမ်လည်မှု​ဖြစ်​ကြောင်း မည်သို့​သိရှိ​နိုင်​သနည်း။ (အောက်ခြေမှတ်ချက်ကို​ရှု။)

^၁၁ နောက်ပိုင်း​တွင် မေဖိဗောရှက်​သည် ကိုယ်​၌​စူးသော အခြား​ဆူး​တစ်ခု​ကို​ခံရ​ပြန်​သည်။ သူ၏​ကျွန်​ဇိ​ဘ​သည် ဘုရင်​ဒါဝိဒ်​ရှေ့တော်၌ သူ့ကို ပုတ်ခတ်​ပြောဆို​ခဲ့​၏၊ ထို​အချိန်တွင် ဒါဝိဒ်​သည် မိမိ ၏​သား အဗရှလုံ​၏​ပုန်ကန်မှု​ရန်ကို​ရှောင်​ဖို့ ယေရုရှလင်​မြို့မှ ထွက်ပြေး​နေရ​သည်။ ဇိ​ဘ​က မေဖိဗောရှက်​သည် နိုင်ငံတော်​ကို​ကိုယ်တိုင်​ရယူဖို့​မျှော်လင့်ချက်​ဖြင့် ယေရုရှလင်​မြို့၌ သစ္စာမဲ့​စွာ​နေရစ်​သည်​ဟု​ဆို​သည်။ * ဒါဝိဒ်​သည် ဇိ​ဘ​၏​အသရေ​ဖျက်​စကား​ကို​ယုံပြီး မေဖိဗောရှက်​နှင့်​ဆိုင်​သမျှ​ဥစ္စာ​အားလုံး​ကို ထို​လူလိမ်​အား လွှဲပြောင်းပေး​ခဲ့​သည်!—၂ ဓမ္မ​ရာဇဝင် ၁၆:၁-၄။

၁၂။ မေဖိဗောရှက်​သည် သူ၏​အခြေအနေ​ကို မည်သို့​တုံ့ပြန်​ခဲ့​သနည်း၊ သူသည် ကျွန်ုပ်​တို့အတွက် အဘယ်​ပုံသက်သေ​ကောင်း​ပြ​ခဲ့​သနည်း။

^၁၂ သို့သော် နောက်ဆုံး မေဖိဗောရှက်​သည် ဒါဝိဒ်​နှင့်​တွေ့ဆုံ​သောအခါ အဖြစ်မှန်​ကို ရှင်ဘုရင်​အား ပြောပြ​လိုက်​သည်။ သူသည် ဒါဝိဒ်​ထံ​သွားဖို့​ပြင်ဆင်​နေစဉ် ဇိ​ဘ​က ကိုယ်စားလှယ်​အ​ဖြစ်သွား​ပေး​မည်​ဟု လှည့်စား​ခဲ့​သည်။ ဤ​အမှား​ကို ဒါဝိဒ်​ပြုပြင်​ခဲ့​သလော။ တစ်စိတ်​တစ်​ဒေသ​သာ​ပြုပြင်​ခဲ့​သည်။ ပစ္စည်း​ကို ထို​သူ​နှစ်ဦး​အား ခွဲဝေ​ယူ​စေ​ခဲ့​သည်။ ဤ​ကား မေဖိဗောရှက်​ကိုယ်​၌​စူးသော အခြား​ဆူး​တစ်ချောင်း ဖြစ်​နိုင်​ဖွယ်​ရှိသည်။ ယင်းကြောင့် သူ​အကြီးအကျယ်​စိတ်ဓာတ်ကျ​ဆင်း​ခဲ့​ပါသလော။ ဒါဝိဒ်​၏​ဆုံးဖြတ်ချက်​သည် မတရား​ပါ​ဟု သူ​အပြစ်​ဆို​ကန့်ကွက်​ခဲ့​သလော။ ထိုသို့​မပြု​ဘဲ ရှင်ဘုရင်​၏​အလိုဆန္ဒကို နှိမ့်ချစွာ​လက်ခံခဲ့သည်။ သူသည် အကောင်း​ကို​ရှုမြင်​ပြီး ဣသရေလ​နိုင်ငံ​၏​ရှင်ဘုရင်​မှန်သည် ဘေးမ​သီ​ရန်​မ​ခ​ပြန်ရောက်​လာ​သည့်​အတွက် ဝမ်းမြောက်​ခဲ့​သည်။ မေဖိဗောရှက်​သည် မသန်မစွမ်း​ဖြစ်​ခြင်း၊ ကုန်းချော​ခံရ​ခြင်း​နှင့် စိတ်ဓာတ်ကျ​ခြင်း​တို့ကို​ခံရပ်​ခဲ့​ခြင်း​ဖြင့် အကောင်းဆုံး​ပုံသက်သေ​ကို အမှန်ပင်​တင်ပြ​ခဲ့​သည်။—၂ ဓမ္မ​ရာဇဝင် ၁၉:၂၄-၃၀။

နေဟမိ​သည် မိမိ၏​စုံစမ်း​နှောင့်ယှက်မှု​များ​ကို ကိုင်တွယ်​ဖြေရှင်း​ခဲ့

၁၃၊ ၁၄။ ယေရုရှလင်​မြို့ရိုး​ကို ပြန်လည်​တည်ဆောက်​ဖို့ နေဟမိ​ပြန်လာ​သောအခါ အဘယ်​ဆူး​များ​စူးခြင်း​ကို သူ​ခံ​ခဲ့​ရသနည်း။

^၁၃ ဘီ.စီ.အီး. ငါး​ရာစု​တွင် မြို့ရိုး​မရှိသော​ယေရုရှလင်​မြို့​သို့ နေဟမိ​ပြန်လာ​သောအခါ သူ​ခံ​ခဲ့​ရသော​ပုံဆောင်​ဆူး​များ​ကို စဉ်းစား​ကြည့်​ပါ။ မြို့တော်​သည် အမှန်တကယ် အကာအကွယ်မဲ့​ဖြစ်နေ​ပြီး ပြည်တော်ပြန်​ဂျူး​တို့သည် ယောင်​ချာ​ချာ​နှင့် လက်​မှိုင်​ကျနေ​ကြ​ကာ ယေဟောဝါ​မျက်မှောက်​တော်​တွင် သန့်ရှင်းမှု​မရှိ​ဖြစ်နေ​ကြသည်​ကို သူ​တွေ့ရှိ​ခဲ့​သည်။ ယေရုရှလင်​မြို့ရိုး​ကို ပြန်​တည်ဆောက်​ဖို့ ဘုရင်​အာတဇေရဇ်​၏​အမိန့်တော်ကို နေဟမိ​ရထား​သော်လည်း သူ၏​တာဝန်​ကို အနီးတစ်ဝိုက်​မှ​ဘုရင်ခံ​များ​က လွန်​စွာ​မနှစ်မြို့​ကြောင်း မကြာမီ​သူသိ​ရှိခဲ့​ရ၏။ သူတို့သည် “ဣသရေလ​အမျိုးသား​တို့၏​အကျိုးကို ပြုစု​ခြင်း​ငှာ လူတစ်ယောက်​လာ​ကြောင်းကို . . . ကြား​သော် အလွန်​နှလုံး​မ​သာ​ရှိကြ​၏။”—နေဟမိ ၂:၁၀။

^၁၄ ထို​တိုင်းတစ်ပါး​မှ​ဆန့်ကျင်သူ​များသည် နေဟမိ​၏​လုပ်ငန်း ရပ်တန့်​သွား​စေဖို့ အာဏာ​ကုန်​ကြိုးစား​ခဲ့​ကြသည်။ နေဟမိ​အား​စိတ်ဓာတ်ကျ​စေရန် သူတို့​စေလွှတ်​သော​သူလျှို​များ၊ သူတို့၏​ခြိမ်းခြောက်​မှုများ၊ လိမ်လည်မှု၊ ကုန်းချော​မှု၊ ကြိမ်းမောင်း​မှုများ​သည် သူ၏​ကိုယ်​၌ မပြတ်​စူးသော​ဆူး​များ​ကဲ့သို့​ဖြစ်​ခဲ့​ပေမည်။ ထို​ရန်သူ​တို့၏ ဉာဏ်​နီ​ဉာဏ်​နက်​များ​ကြောင့် အရှုံးပေး​ခဲ့​သလော။ မပေးခဲ့​ပါ! အားလျော့​စိတ်ပျက်ခြင်း​မရှိဘဲ ဘုရားသခင်​ကို အပြည့်အဝ​ယုံကြည်​စိတ်ချ​ခဲ့​သည်။ သို့ဖြင့် ယေရုရှလင်​မြို့ရိုး ပြန်လည်​တည်ဆောက်​ပြီး​ခြင်း​က နေဟမိ​ကို ယေဟောဝါ မေတ္တာပါ​စွာ​ထောက်မ​ကူညီ​ခဲ့​ကြောင်း အခိုင်အမာ​သက်သေထူ​ခဲ့​သည်။—နေဟမိ ၄:၁-၁၂; ၆:၁-၁၉။

၁၅။ ဂျူး​များ​စပ်ကြား​ရှိ အဘယ်​ပြဿနာ​များ​က နေဟမိ​ကို​အလွန်​စိတ်​အနှောင့်အယှက်​ပေး​ခဲ့​သနည်း။

 ^၁၅ ဘုရင်ခံ​တစ်ဦး​အနေ​နှင့် နေဟမိ​သည် ဘုရားသခင့်​လူမျိုးတော်​အလယ်တွင် ပြဿနာ​များစွာကို​လည်း ရင်ဆိုင်ခဲ့​ရ၏။ ၎င်း​အခက်အခဲ​များသည် ယေဟောဝါ​နှင့်​လူမျိုးတော်​၏ ဆက်ဆံ​ရေး​ကို​ထိခိုက်​သောကြောင့် သူ့ကို​အလွန်​အနှောင့်အယှက်​ပေး​သော ဆူး​များနှင့်​တူ​သည်။ သူဌေး​သူကြွယ်​များသည် အတိုး​ကြီး​စား​နေကြ​ပြီး သူတို့၏​ဆင်းရဲသော​ညီအစ်ကို​များ​မှာ​မူ အကြွေးဆပ်​ဖို့​သာမက ပါးရှား​အခွန်ဆက်​ဖို့​ပါ သူတို့၏​လယ်ယာ​ကို​ဆုံးရှုံး​ရ​ကြ​၍ သားသမီး​များ​ကို​ပင် ကျွန်​အဖြစ် ရောင်းချ​ကြ​ရသည်။ (နေဟမိ ၅:၁-၁၀) ဂျူး​များစွာ​သည် ဥပုသ်​ပညတ်​ကို​ချိုးဖောက်​နေကြ​ပြီး လေဝိ​သားများ​နှင့် ဝတ်ပြုရာ​အိမ်တော်ကို​ထောက်ပံ့ဖို့ ပျက်ကွက်​နေကြ၏။ ထို့​ပြင် အချို့​တို့​မှာ “အာဇုတ်​အမျိုး၊ အမ္မုန်​အမျိုး၊ မောဘ​အမျိုးသမီး” တို့​နှင့်​စုံဖက်​နေကြ၏။ ယင်းက နေဟမိ​အတွက် အလွန်​စိတ်နာ​စ​ရာ​ဖြစ်သည်​တကား! သို့သော် ဤ​ဆူး​တစ်ခု​မျှ သူ့ကို​လက်မလျှော့​စေ​ခဲ့​ပါ။ သူသည် ဘုရားသခင့်​ဖြောင့်မတ်​သော​ပညတ်​များ​ကို ဇွဲရှိ​ရှိ​စွဲကိုင်​သူ​တစ်ဦး​အဖြစ် အခက်အခဲ​များ​ကို ထပ်ခါတလဲ ရင်ဆိုင်​နိုင်နင်း​ခဲ့​သည်။ နေဟမိ​နည်းတူ ကျွန်ုပ်​တို့သည် မတည်​ကြည်​သူတို့၏​အမူအကျင့်​ကြောင့် ယေဟောဝါ​အား တည်ကြည်မှု​မပျက်​ကြ​စို့​နှင့်။—နေဟမိ ၁၃:၁၀-၁၃၊ ၂၃-၂၇။

အခြား​တည်ကြည်သူ​များ ကိုင်တွယ်​ဖြေရှင်း​နိုင်​ခဲ့​ကြ

၁၆-၁၈။ ဣဇာက်နှင့်ရေဗက္က၊ ဟန္န၊ ဒါဝိဒ်​နှင့် ဟောရှေ​တို့သည် အိမ်ထောင်ရေး​ပဋိပက္ခ​များ​ကို မည်သို့​ခံစား​ခဲ့​ကြ​ရသနည်း။

^၁၆ သမ္မာကျမ်းစာ​တွင် ဆူး​များနှင့်​တူသော စိတ်ဓာတ်ကျ​ဖွယ်​အခြေအနေ​များ​ကို ကိုင်တွယ်​ဖြေရှင်း​နိုင်​ခဲ့​ကြ​သူတို့၏ ပုံ​နမူနာ​များစွာ​ပါရှိ​၏။ ဤ​ဆူး​များ​ဖြစ်ပေါ်​လာ​ရသည့် အကြောင်းရင်း​တစ်ခု​မှာ အများအားဖြင့် မိသားစု​ပြဿနာ​များ​ဖြစ်၏။ ဧသော​၏​ဇနီး​နှစ်ဦး​သည် သူ၏​မိဘများ​ဖြစ်သော “ဣဇာက်နှင့်ရေဗက္က​၌ စိတ်နှလုံး​ပူပန်​စ​ရာ​အကြောင်း​ဖြစ်​သတည်း။” ထို​ဇနီး​များ​ကြောင့် မိမိ​အသက်ကို ငြီးငွေ့​လှ​ပြီ​ဟု​ပင် ရေဗက္က​ဆို​ခဲ့​သည်။ (ကမ္ဘာဦး ၂၆:၃၄၊ ၃၅; ၂၇:၄၆) ဟန္န​မြုံ​သောကြောင့် မယား​ပြိုင်​ဖြစ်သူ ပေနိန္န​က သူ၏ “စိတ်ဆိုး​ညစ်​အောင် . . . အလွန်​နှောင့်ယှက်” ခဲ့​ပုံ​ကိုလည်း စဉ်းစား​ကြည့်​ပါ။ ဟန္န​သည် မိမိ၏​အိမ်​တွင် ဤသို့​သော​နှောင့်ယှက်မှု​ကို မကြာခဏ​ခံ​ခဲ့​ရ​ပေမည်။ ရှိလော​မြို့တွင်​ပွဲတော်​ကို မိသားစု​လိုက်​တက်ရောက်​စဉ်​၌​လည်း ပေနိန္န​သည် သူ့ကို ဆွေမျိုး​များနှင့် မိတ်ဆွေများ​ရှေ့ ပေါ်ပေါ်ထင်ထင် စိတ်​အနှောင့်အယှက်​ပေး​ခဲ့​မည် သေချာ​သည်။ ထိုသို့​ပြုခြင်း​က ဟန္န​၏​ကိုယ်​၌ ဆူး​ကို​ပို​စူး​စေ​သကဲ့သို့​ဖြစ်​ခဲ့​သည်။—၁ ဓမ္မ​ရာဇဝင် ၁:၄-၇။

^၁၇ သူ၏​ယောက္ခမ၊ ရှောလုမင်း​၏ အရူးအမူး​မနာလိုမှု​ကြောင့် ဒါဝိဒ်​ခံ​ခဲ့​ရသည်​များ​ကို စေ့စေ့​သုံးသပ်ကြည့်​ပါ။ ဒါဝိဒ်​သည် အသက်ဘေး​ကို​ရှောင်​ဖို့ အ​င်္ဂေဒိ​တော​ရှိ လိုဏ်ဂူ​များ​တွင်​နေထိုင်ခဲ့​ရ၏၊ မတ်စောက်​၍ အန္တရာယ်​ရှိသော ကျောက်ဆောင်​ထူပြော​သည့် တောင်ကြား​လမ်းများ​ကို​တက်​ခဲ့​ရသည်။ သူသည် ရှောလု​ကို အဘယ်​နည်းဖြင့်​မျှ မဆန့်ကျင်​ခဲ့​သဖြင့် ထို​မတရားမှု​မှာ သူ့​အတွက်​မခံ​ချိ​မခံ​သာ​စ​ရာ​ဖြစ်​ခဲ့​ပေမည်။ သို့​တိုင် ဒါဝိဒ်​သည် ရှောလု​၏​မနာလိုမှု​ကြောင့် ဝရမ်းပြေး​ဘဝဖြင့် နှစ်ချီ​နေထိုင်ခဲ့​ရသည်။—၁ ဓမ္မ​ရာဇဝင် ၂၄:၁၄၊ ၁၅; သု. ၂၇:၄။

^၁၈ ပရောဖက်​ဟောရှေ​၏ အိမ်ထောင်ရေး​ပဋိပက္ခ​ကို တွေးကြည့်​ပါ။ သူ၏​ဇနီးသည်​မှာ သူ့​သား​အိမ်ရာ​ပြစ်မှားသူ​ဖြစ်လာ​သည်။ သူ၏​အကျင့်​ယိုယွင်းမှု​သည် ဟောရှေ​၏​နှလုံးကို​စူးရှ​သော​ဆူး​ဖြစ်​ခဲ့​ပေမည်။ ထိုသို့​မတရားမေထုန်​ပြု​ခဲ့​၍ တရား​မဝင်​သည့်​ကလေး​နှစ်ဦး​ကို ဇနီး​ဖြစ်သူ မွေးဖွား​သောအခါ ပြင်းပြ​သော​စိတ်ဝေဒနာ​ကို သူ​ထပ်ဆင့်​ခံစား​ခဲ့​ရမည်​တကား!—ဟောရှေ ၁:၂-၉။

၁၉။ အဘယ်​နှိပ်စက်​ညှဉ်းပန်းမှု​ကို ပရောဖက်​မိက္ခာ​ခံ​ခဲ့​ရသနည်း။

^၁၉ ကိုယ်​၌​စူးသော​ဆူး နောက်​တစ်မျိုး​မှာ နှိပ်စက်​ညှဉ်းပန်း​ခြင်း​ဖြစ်သည်။ ပရောဖက်​မိက္ခာ​၏​အတွေ့အကြုံကို သုံးသပ်ကြည့်​ပါ။ မင်းဆိုး​အာဟပ်​သည် ပရောဖက်​အတုအယောင်​များနှင့်​ပေါင်းသင်း​ကာ သူတို့၏​ဗြောင်ကျ​သော​လိမ်ညာ​စကား​ကို ယုံကြည်​ကြောင်း မိက္ခာ​တွေ့မြင်​ခဲ့​ရခြင်း​သည် သူ၏​ဖြောင့်မတ်​သော​စိတ်နှလုံး​ကို နာကျင်စေ​ခဲ့​ပေမည်။ မိက္ခာ​က ထို​ပရောဖက်​အားလုံး​သည် ‘လှည့်စား​တတ်သော​ဝိညာဉ်’ တန်ခိုး​ဖြင့်​ပြောဆို​နေကြောင်း အာဟပ်​ကို​လျှောက်​သောအခါ ထိပ်သီး​က​လိ​န်​ချုံ​က မည်သို့​ပြု​ခဲ့​သနည်း။ ‘မိက္ခာ​ကို​ပါး​ချ’ လေ​၏။ ထို​ထက်​ဆိုး​သည်​မှာ ဂိလဒ်​ပြည်​ရာ​မုတ်​မြို့​သို့​စစ်ချီ​ပါ​က လုံးဝ​အောင်မြင်​မည်​မဟုတ်​ဟူသော ယေဟောဝါ​၏​သတိပေး​ချက်​ကို အာဟပ်​တုံ့ပြန်​ခဲ့​ပုံ​ဖြစ်သည်။ မိက္ခာ​ကို ထောင်ချ​ပြီး ဆင်းရဲ​စွာ​စားသောက်​စေ​ဟု အာဟပ်​အမိန့်ထုတ်​ခဲ့​သည်။ (၃ ဓမ္မ​ရာဇဝင် ၂၂:၆၊ ၉၊ ၁၅-၁၇၊ ၂၃-၂၈) ယေရမိ​နှင့် သူ့ကို​သတ်​လို​စိတ်​ရှိ​သူများ သူ့ကို​ပြုမူ​ဆက်ဆံ​ခဲ့​ပုံ​ကိုလည်း ပြန်သတိရ​ပါ။—ယေရမိ ၂၀:၁-၉။

၂၀။ အဘယ်​ဆူး​များ​ကို နောမိ​ခံစား​ခဲ့​ရသနည်း၊ သူသည် မည်သို့​ဆုချ​ခံ​ခဲ့​ရသနည်း။

^၂၀ မိမိ​ချစ်​မြတ်နိုး​ရသူ​များ​ဆုံးရှုံး​ခြင်း ဝမ်းနည်းမှု​သည်လည်း ကိုယ်​၌​စူးသော​ဆူး​နှင့်​တူ​နိုင်​သည်။ နောမိ​သည် ခင်ပွန်း​သာမက သား​နှစ်ဦး​ကို သေခြင်း​၌​ဆုံးရှုံး​ရသည့်​နာကျင်မှုကို ခံစား​ခဲ့​ရ​ရှာ​သည်။ သူသည် ထို​ဆုံးရှုံးမှုကြီး​များ​ကို​ခံစား​နေရ​ဆဲ ဗက်လင်မြို့​သို့​ပြန်လာ​လေ​၏။ ထို​အခါ မိမိ​အား နောမိ​ဟု​မ​ခေါ်​ကြ​ဘဲ ခါးသီး​သော​အတွေ့အကြုံကို ရုပ်လုံးပေါ်​စေသည့် မာ​ရ​ဟူသော​အမည်​ဖြင့်​ခေါ်​ကြ​ရန် မိတ်ဆွေများ​အား​ပြော​ခဲ့​သည်။ သို့သော် အဆုံး​၌ သူ၏​ခံနိုင်ရည်​ကို ယေဟောဝါ​ဆုချ​၍ မေရှိယ​၏ မျိုး​စဉ်​မျိုးဆက်​တွင်​ပါဝင်သူ​တစ်ဦး​ဖြစ်လာ​သော မြေး​တစ်ဦး​ရစေ​ခဲ့​သည်။—ရုသ ၁:၃-၅၊ ၁၉-၂၁; ၄:၁၃-၁၇; မဿဲ ၁:၁၊ ၅။

၂၁၊ ၂၂။ ယောဘသည် ဆုံးရှုံးမှု​များ မည်သို့​ခံ​ခဲ့​ရသနည်း၊ သူ​မည်သို့​တုံ့ပြန်​ခဲ့​သနည်း။

^၂၁ ယောဘသည် သူ​ချစ်​ရသည့်​သားသမီး​ဆယ်ယောက် ရုတ်တရက် မ​ရှု​မလှ​သေဆုံး​သွား​ကြောင်း၊ သူ၏​တိရစ္ဆာန်​များနှင့် ကျွန်​အားလုံး​ကို​ဆုံးရှုံး​ကြောင်း ကြားသိ​ရသောအခါ မည်မျှ​ထိတ်လန့်​ချောက်ချား​သွား​မည်​ကို စဉ်းစား​ကြည့်​ပါ။ သူ့​အတွက် ရုတ်တရက် ကမ္ဘာ​ပျက်​သွား​သည့်​အလား​ဖြစ်၏! ထို့​ပြင် ဤ​ဆုံးရှုံးမှု​များ​ကြောင့် ယောဘ​မိန်းမော​တွေဝေ​နေစဉ်​ပင် စာတန်​သည် သူ့ကို​ဖျားနာစေ​သည်။ ယောဘ​ခံစားရ​သည့် ဆိုးဝါး​သော​ဖျားနာ​မှု​ကြောင့် မိမိ​သေဆုံး​ရတော့မည်​ဟု သူ​ယူမှတ်ခဲ့​ပေမည်။ အလွန်​မခံမရပ်​နိုင်​သည့်​အထိ နာကျင်​လာ​ရာ သေခြင်းက​သာ မိမိကို​သက်သာ​စေမည်​ဟု သူ​ယူမှတ်ခဲ့​သည်။—ယောဘ ၁:၁၃-၂၀; ၂:၇၊ ၈။

^၂၂ ဤမျှ​နှင့်​မလုံလောက်​သေး​သည့်​အလား သူ၏​ဇနီးသည် သောက​ဝေဒနာ​ဖြင့် သူ့​ထံ​လာပြီး “ဘုရားသခင်​ကို​စွန့်ပယ်​၍​သေ​လော့” ဟု​ဆို​၏။ ၎င်း​သည် နာကျင်​ကိုက်ခဲ​နေသော​သူ၏​ကိုယ်​၌ အမှန်တကယ်​စူးရှ​သော​ဆူး​ပါ​တကား! ထို့နောက် ယောဘ​၏​အပေါင်းပါ​သုံးဦးသည် သူ့ကို​နှစ်သိမ့်​ပေး​မည့်​အစား သူ၏​လျှို့ဝှက်​အပြစ်​များ​ကြောင့် ဤသို့​ခံ​နေရ​သည်​ဟု စွပ်စွဲ​လျက် အနှစ်သာရ​မရှိသော​ကျိုးကြောင်း​ဆင်ခြင်မှု​များ​ဖြင့် သူ့ကို​တိုက်ခိုက်​ခဲ့​ကြသည်။ သူတို့၏​မှားယွင်းသော​အချေအတင်​စကား​များ​က သူ၏​ကိုယ်ထဲ ဆူး​များ​ကို​နက်​သည်ထက်​နက်​အောင် ထိုး​သွင်း​နေ​သကဲ့သို့​ဖြစ်​ခဲ့​သည်။ ဤမျှ​ဆိုးဝါး​သော​အရာများ​ကို မိမိ အဘယ်ကြောင့်​ခံစား​နေရ​ကြောင်း ယောဘ​မသိ​ခဲ့​ပါ; သူ၏​အသက်​မှာ​မူ ချမ်းသာရ​မည်​ကိုလည်း သူ​မသိ​ခဲ့​ကြောင်း သတိရပါ။ သို့​တိုင် “ယောဘသည် ဤ​အမှု​များနှင့်​တွေ့ကြုံ​သော်လည်း မ​မှားယွင်း။ ထာဝရ​ဘုရား[သခင်]ကိုလည်း အပြစ်မတင်​ဘဲ​နေ​၏။” (ယောဘ ၁:၂၂; ၂:၉၊ ၁၀; ၃:၃; ၁၄:၁၃; ၃၀:၁၇) ယောဘသည် ဆူး​များစွာကို တစ်ပြိုင်တည်း​အ​စူး​ခံ​ခဲ့​ရ​သော်လည်း အမြဲ​သမာဓိ​စောင့်သိ​ခဲ့​သည်။ အမှန်တကယ်​ပင် အားရှိစရာ​ပါ​တကား!

၂၃။ ကျွန်ုပ်​တို့​ဆွေးနွေး​တင်ပြ​ခဲ့​သော တည်ကြည်သူ​များသည် ကိုယ်​၌​စူးသော​ဆူး​အမျိုးမျိုးကို အဘယ်ကြောင့်​ခံနိုင်​ခဲ့​ကြ​သနည်း။

^၂၃ ရှေ့​ပိုင်း​မှ​ပုံသက်သေ​များသည် အားလုံး​မဟုတ်ပါ။ ကျမ်းစာ​တွင် မြောက်မြားစွာ​ရှိပါ​သေး​သည်။ တည်ကြည်သော​ဤ​ကျေးကျွန်​အားလုံး​သည် ပုံဆောင်​ဆူး​တစ်မျိုးစီ​၏​စူးခြင်း​ကို ခံ​ခဲ့​ရ​ကြသည်။ သူတို့​ရင်ဆိုင်ခဲ့​ရသော​ပြဿနာ​များ​မှာလည်း မျိုး​ပေါင်း​စုံ​လှ​လေ​ခြင်း! သို့​တိုင် သူတို့၌ တူညီသော​အရာတစ်ခု​ရှိသည်။ သူတို့​တစ်ဦးမျှ​သည် ယေဟောဝါ​အမှုတော်ထမ်း​ခြင်း​ကို မစွန့်​လွှတ်​ခဲ့​ကြ​ချေ။ သူတို့၏​စိတ်ဓာတ်ကျ​ဖွယ် စမ်းသပ်မှု​အားလုံး​ကြား ယေဟောဝါ​ပေးသနား​သော​ခွန်အား​ဖြင့် စာတန်​ကို သူတို့​အနိုင်ယူ​ခဲ့​ကြသည်။ မည်သို့​အားဖြင့်​နည်း။ နောက်​ဆောင်းပါး​က ဤ​မေးခွန်း​ကို​ဖြေဆို​ပေး​မည်၊ ကျွန်ုပ်​တို့​ကိုယ်​၌​စူးသော ဆူး​နှင့်​တူ​သည့်​အရာ​မှန်သမျှကို မည်သို့​ကိုင်တွယ်​ဖြေရှင်း​နိုင်​ကြောင်းကို​လည်း ဖော်ပြ​ပါ​လိမ့်​မည်။

[အောက်ခြေမှတ်ချက်]

သင်​မည်သို့​ဖြေဆို​မည်​နည်း

• ကျွန်ုပ်​တို့​ရင်ဆိုင်​ရသော​ပြဿနာ​များ​ကို ကိုယ်​၌​စူးသော​ဆူး​များနှင့် အဘယ်ကြောင့်​နှိုင်းယှဉ်​နိုင်​သနည်း။

• မေဖိဗောရှက်​နှင့် နေဟမိ​တို့​ခံ​ခဲ့​ရသော ဆူး​အချို့​ကား အဘယ်နည်း။

• ကိုယ်​၌​စူးသော​ဆူး​အမျိုးမျိုးကို အ​စူး​ခံ​ခဲ့​ကြသော သမ္မာကျမ်းစာ​မှ အမျိုးသား၊ အမျိုးသမီးများ​၏​ပုံသက်သေ​များ​အနက် အဘယ်သူ​၏​အကြောင်း​က သင့်ကို​အထူးသဖြင့်​စိတ်​လှုပ်ရှား​စေ​ခဲ့​သနည်း၊ အဘယ်ကြောင့်​နည်း။

[လေ့လာ​ရန်​မေးခွန်းများ]

[စာမျက်နှာ ၁၅ ပါ ရုပ်ပုံ]

မေဖိဗောရှက်​သည် မသန်မစွမ်း​ဖြစ်​ခြင်း၊ ကုန်းချော​ခံရ​ခြင်း​နှင့် စိတ်ဓာတ်ကျ​ခြင်း​တို့ကို ကိုင်တွယ်​ဖြေရှင်း​ခဲ့​ရ

[စာမျက်နှာ ၁၆ ပါ ရုပ်ပုံ]

နေဟမိ​သည် အတိုက်အခံ​ကြား စွဲစွဲမြဲမြဲ​ရပ်တည်ခဲ့