ဂိလဒ်ကျောင်း—အနှစ် ၆၀ ရှိ ခရစ်ယာန်သာသနာပြုသင်တန်း
ဂိလဒ်ကျောင်း—အနှစ် ၆၀ ရှိ ခရစ်ယာန်သာသနာပြုသင်တန်း
“သမ္မာကျမ်းစာကို ကျွန်မတို့ အပတ်တကုပ်လေ့လာလို့ ယေဟောဝါနဲ့ ပိုနီးကပ်လာပြီး ကိုယ်တော်ရဲ့အဖွဲ့အစည်းအကြောင်းကို ပိုသိရှိလာတယ်။ အဲ့ဒါက တိုင်းတစ်ပါးမှာ တာဝန်ထမ်းဆောင်ဖို့ ကျွန်မတို့ကို ကြိုတင်ပြင်ဆင်ပေးလိုက်တာပဲ။” ပထမအကြိမ်သင်တန်းဆင်းတစ်ဦးက ကင်းမျှော်စင် သမ္မာကျမ်းစာ ဂိလဒ်ကျောင်းတွင် သူတက်ရောက်ခဲ့သည့် လေ့လာမှုအစီအစဉ်ကို အထက်ပါအတိုင်း ဖော်ပြခဲ့ခြင်းဖြစ်သည်။ ဂိလဒ်ကျောင်းစတင်ဖွင့်လှစ်ခဲ့သည့် လွန်ခဲ့သောအနှစ် ၆၀ ကတည်းက ခရစ်ယာန်သာသနာပြုများကို စေလွှတ်လျက်ရှိသည်။ ၁၁၄ ကြိမ်မြောက် သင်တန်းဆင်းပွဲကို ၂၀၀၃၊ မတ် ၈ ရက်နေ့တွင် နယူးယောက်မြို့၊ ပက်တာစင်ရှိ ကင်းမျှော်စင်ပညာပေးဌာန၌ ကျင်းပခဲ့၏။ ခန်းမနှင့် ဆက်သွယ်ရေးဂြိုဟ်တုတပ်ထားသော ဒေသများတွင် စုရုံးရောက်ရှိနေကြသူ ၆,၄၀၄ ဦးတို့သည် ဟောပြောချက်များ၊ လူတွေ့မေးမြန်းခန်းများနှင့် အုပ်စုတစ်စုနှင့်ဆွေးနွေးပွဲများ ပါဝင်သည့် ဤအစီအစဉ်ကို အာရုံစိုက်နားဆင်ခဲ့ကြသည်။
အုပ်ချုပ်ရေးအဖွဲ့ဝင် သီအိုဒေါရ် ဂျဲရက်စ်သည် သဘာပတိဖြစ်၏။ သူ၏အဖွင့်မှတ်ချက်များက အာရှ၊ ကရစ်ဘီယံ၊ ဗဟိုအမေရိက၊ တောင်အမေရိကနှင့် ဥရောပတို့မှ ဧည့်သည်များပါရှိသည့် အပြည်ပြည်ဆိုင်ရာ ပရိသတ်အသီးသီးကို အာရုံစိုက်စေခဲ့သည်။ ညီအစ်ကိုဂျဲရက်စ်သည် ၂ တိမောသေ ၄:၅ ကိုအခြေပြု၍ ဂိလဒ်သင်တန်းဆင်း ခရစ်ယာန်သာသနာပြုများ၏ အဓိကလုပ်ငန်းမှာ ခရစ်ယာန် “သာသနာပြုဆရာ ဆောင်ရွက်ရသောအမှုကို ဆောင်ရွက်” ရန်ဖြစ်သည်ဟု အလေးအနက်ပြောခဲ့သည်။ ခရစ်ယာန်သာသနာပြုများသည် သမ္မာကျမ်းစာကို လူတို့အား သင်ပေးခြင်းဖြင့် အမှန်တရားကို သက်သေခံနေကြသည်။
ကျောင်းသားများသည် နောက်ဆုံးသွန်သင်ချက်ရရှိ
ယူနိုက်တက်စတိတ်ဌာနခွဲကော်မတီဝင် ဂျွန် လာစန်သည် ယုံကြည်ခြင်းကို ခိုင်ခံ့စေသည့် “ဘုရားသခင်သည် ငါတို့ဘက်၌ရှိတော်မူလျှင် အဘယ်သူသည် ငါတို့တစ်ဖက်၌ နေနိုင်မည်နည်း” ဟူသော ဟောပြောချက်ဖြင့် ဆက်တိုက်ဟောပြောချက်တိုအစီအစဉ်ကို စတင်ခဲ့သည်။ (ရောမ ၈:၃၁) ဟောပြောသူက မိမိတို့တာဝန်များတွင် ကြုံတွေ့ရမည့် မည်သည့်အခက်အခဲကိုမဆို အောင်မြင်ကျော်လွှားရန် ကူညီပေးနိုင်သော ယေဟောဝါ၏တန်ခိုးတော်ကို လုံးလုံးလျားလျား ယုံကြည်စိတ်ချမှုရှိကြဖို့ ကျောင်းသားများအား ကျမ်းစာအခြေခံအချက်များ ရှင်းပြခဲ့၏။ ရောမ ၈:၃၈၊ ၃၉ ကိုအသုံးပြု၍ ညီအစ်ကိုလာစန်သည် ကျောင်းသားများအား ဤသို့သတိပေးခဲ့သည်– “သင်တို့အကျိုးအတွက် ဘုရားသခင်အသုံးပြုနေတဲ့ တန်ခိုးတော်ကို ခဏရပ်ပြီး စဉ်းစားသုံးသပ်ပါ၊ သင်တို့အပေါ်ထားတဲ့ ယေဟောဝါရဲ့ပုဂ္ဂိုလ်ရေးတွယ်တာမှုကို အဘယ်အရာကမှ ချိုးဖျက်လို့မရနိုင်ဘူးဆိုတာ သတိရပါ။”
နောက်ဟောပြောသူမှာ အုပ်ချုပ်ရေးအဖွဲ့ဝင် ဂိုင် ပီယပ်စ်ဖြစ်သည်။ “သင်တို့မျက်စိကို ဆက်ပျော်ရွှင်စေပါ” ဟူသော ဟောပြောချက်ကို သူရွေးချယ်ဟောပြောခဲ့သည်။ (လုကာ ၁၀:၂၃၊ ကဘ) သူက စစ်မှန်သောပျော်ရွှင်ခြင်းတွင် ယေဟောဝါ၊ ကိုယ်တော်၏ထာဝရရည်ရွယ်ချက်တို့ကို သိရှိခြင်းအပြင် သမ္မာကျမ်းစာပရောဖက်ပြုချက်များ ပြည့်စုံခြင်းကို မြင်တွေ့ရခြင်းပါဝင်သည်ဟု ရှင်းပြခဲ့သည်။ ကျောင်းသားများသည် မည်သည့်နေရာသို့ပင်သွားရပါစေ၊ မိမိတို့မျက်စိကို ဆက်ပျော်ရွှင်စေခြင်းအားဖြင့် စစ်မှန်သောပျော်ရွှင်မှုကို ထိန်းသိမ်းထားနိုင်ပါသည်။ ယေဟောဝါ၏ကောင်းမြတ်မှုကို နက်နက်ရှိုင်းရှိုင်း စဉ်းစားတွေးတောပြီး ကိုယ်တော်၏အလိုတော် ဆောင်ရွက်ခြင်းအပေါ် မိမိတို့၏စိတ်နှလုံးကို ဆက်၍အာရုံစိုက်ထားကြရန် ကျောင်းဆင်းများအား ညီအစ်ကိုပီယပ်စ်က အားပေးတိုက်တွန်းခဲ့သည်။ (ဆာလံ ၇၇:၁၂) ကျောင်းဆင်းများသည် အပြုသဘောထားကို ထိန်းထားခြင်းအားဖြင့် ကြုံတွေ့ရမည့် မည်သည့်ပြဿနာကိုမဆို ကျော်လွှားအောင်မြင်နိုင်ကြသည်။
ထို့နောက် နေ့စဉ်သင်ကြားပေးခဲ့သော သင်တန်းပို့ချသူနှစ်ဦးက သင်တန်းဆင်းများကို နှုတ်ဆက်အားပေးစကားပြောခဲ့သည်။ လောရဲန့်စ် ဘိုဝင်န်က သူ၏ဟောပြောချက်ခေါင်းစဉ်တွင် “သင်သည် ဘုန်းအသရေထင်ရှားရန် ကြိုးစားနေသလော” ဟုမေးခွန်းထုတ်ခဲ့သည်။ လူအများစုက ဘုန်းအသရေဟူသည် ချီးမြှောက်ခံရခြင်း၊ ဂုဏ်တင်ခံရခြင်းနှင့် ထူးထူးချွန်ချွန်ဖြစ်ခြင်းတို့နှင့် ဆက်စပ်နေသည်ဟု ထင်မြင်ကြ၏။ သို့ရာတွင် စစ်မှန်သောဘုန်းအသရေဖြစ်သည့် တန်ဖိုးကြီးဘဏ္ဍာမှာ ယေဟောဝါနှင့် အသရေရှိသော ဆက်ဆံရေးရရှိခြင်းဖြစ်သည်ဟု ဆာလံဆရာအာသ နားလည်သဘောပေါက်လာခဲ့၏။ (ဆာလံ ၇၃:၂၄၊ ၂၅) သမ္မာကျမ်းစာကို အဓိပ္ပာယ်ရှိရှိ အဆက်မပြတ်လေ့လာခြင်းဖြင့် ယေဟောဝါနှင့်ရင်းနှီးသောဆက်ဆံရေးကို ထိန်းသိမ်းထားရန် ကျောင်းဆင်းများကို အားပေးခဲ့သည်။ ကောင်းကင်တမန်တို့သည် ခရစ်တော်အားဖြင့် ယေဟောဝါ၏ရည်ရွယ်ချက် အကောင်အထည်ဖော်ခြင်းနှင့်စပ်လျဉ်း၍ အသေးစိတ်အချက်အလက်များကို “စေ့စေ့ကြည့်ရှု စဉ်းစားချင်သော စေတနာစိတ်ရှိကြ၏။” (၁ ပေတရု ၁:၁၂) သူတို့သည် မိမိတို့ခမည်းတော်၏ဘုန်းတော်ကို ရောင်ပြန်ဟပ်နိုင်ရန် ကိုယ်တော့်အကြောင်းကို ဖြစ်နိုင်သရွေ့ များများသင်ယူလိုကြသည်။ ထို့နောက် ဟောပြောသူသည် တန်ဖိုးဖြတ်မရသော ဘဏ္ဍာကို ရှာတွေ့ရန် အခြားသူများအား ကူညီပေးခြင်းဖြင့် မိမိတို့၏ခရစ်ယာန်သာသနာပြုတာဝန်များတွင် ယေဟောဝါ၏ဘုန်းတော်ထင်ရှားစေဖို့ ကျောင်းသားများကို တိုက်တွန်းခဲ့၏။
ကျောင်းမော်ကွန်းထိန်း ဝေါလ်လေးစ် လစ်ဗာရန်စ်သည် “နက်နဲသောအရာ၌ ဘုရားသခင်၏ဉာဏ်ပညာကို ပြသကြလော့” ဟူသော အကြောင်းအရာဖြင့် အဖွင့်ဟောပြောချက်အစီအစဉ်ကို နိဂုံးချုပ်ခဲ့သည်။ (၁ ကောရိန္သု ၂:၇) တမန်တော်ပေါလု၏ ခရစ်ယာန်သာသနာပြုလုပ်ငန်းစဉ်အတွင်း သူပြောခဲ့သော ဤဘုရားသခင့်ဉာဏ်ပညာဟူသည် အဘယ်နည်း။ ယင်းသည် ကမ္ဘာ့ငြိမ်သက်မှုနှင့် စည်းလုံးမှုတို့ကို ဆောင်ကြဉ်းပေးရန် ယေဟောဝါ၏ပညာရှိ၍ တန်ခိုးကြီးမားလှသော နည်းလမ်းများဖြစ်၏။ ဤဉာဏ်ပညာသည် ယေရှုအပေါ် ဗဟိုပြုသည်။ ပေါလုသည် လူမှုရေးခရစ်ဝင်တရားကို ဟောပြောမည့်အစား အာဒံအပြစ်၏အကျိုးဆက်များကို ဘုရားသခင် မည်သို့ပြုပြင်မည်ကို လူတို့သိရှိလာရန် ကူညီပေးခဲ့သည်။ (ဧဖက် ၃:၈၊ ၉) ဟောပြောသူသည် ပရိသတ်ကို ဤသို့တိုက်တွန်းခဲ့သည်– “ယေဟောဝါဟာ မိမိရဲ့ရည်ရွယ်ချက် ဘယ်လိုဖြစ်မြောက်အောင် ဆောင်ရွက်ပေးမယ်ဆိုတာ သိရှိလာဖို့ လူတွေကို ကူညီပေးရတဲ့ ခရစ်ယာန်သာသနာပြုတာဝန်ကို အခွင့်ထူးတစ်ရပ်အနေနဲ့ ရှုမြင်ခဲ့တဲ့ ပေါလုလို သင်တို့ရဲ့လုပ်ငန်းတော်အခွင့်ထူးကို အသုံးပြုပါ။”
ထို့နောက် ဂိလဒ်သင်တန်းပို့ချသူနောက်တစ်ဦး မာ့ခ် နူမဲရ်သည် သင်တန်းသားအချို့နှင့် အားတက်တရောဆွေးနွေးမှုတစ်ခုကို ကြီးကြပ်ခဲ့သည်။ “ဘုရားသခင့်နှုတ်မြွက်စကားတော်ကို လေ့လာခြင်းက ထက်သန်သောခရစ်ယာန်ဓမ္မအမှုဆောင်များ ဖြစ်လာစေ” ဟူသော ဟောပြောချက်သည် ရောမ ၁၀:၁၀ မှပေါလု၏စကားများကို ပေါ်လွင်စေခဲ့သည်။ ကျောင်းတက်နေစဉ်အတွင်း ပျော်ရွှင်ခဲ့ရသော လယ်ကွင်းလုပ်ငန်းတော် တွေ့ကြုံမှုများစွာကို သင်တန်းသားများ ပြောပြခဲ့ကြ၏။ ကျွန်ုပ်တို့သည် ဘုရားသခင့်နှုတ်မြွက်စကားတော်ကို လေ့လာဆင်ခြင်သုံးသပ်သောအခါ ယေဟောဝါဘုရားသခင်နှင့် ကိုယ်တော်၏နိုင်ငံတော်တို့နှင့်ပတ်သက်သည့် အံ့ဖွယ်အရာများသည် ကျွန်ုပ်တို့နှလုံးတွင် ပြည့်လာပြီး သူတစ်ပါးအား ပြောပြလာကြမည်ဖြစ်ကြောင်း သူတို့၏တွေ့ကြုံမှုများက ဖော်ပြခဲ့သည်။ ကျောင်းသားများသည် ကင်းမျှော်စင်ပညာပေးဌာနတွင် ငါးလတာနေထိုင်စဉ်အတွင်း အနီးအနားအသင်းတော်များ၏ နှံ့စပ်စွာအမှုဆောင်ပြီးသော ဒေသများရှိ စိတ်ဝင်စားသူများနှင့် အိမ်တွင်းကျမ်းစာသင်အံမှု ၃၀ ကျော်ကို စတင်ကျင်းပခဲ့သည်။
ရင့်ကျက်သူတို့၏မြွက်ကြားသံများ ထွက်ပေါ်လာ
ကျောင်းသားများသည် ကျောင်းချိန်ကာလအတွင်း ယူနိုက်တက်စတိတ် ဗေသလမိသားစုဝင်များနှင့် ပေါင်းသင်းခြင်းမှ အကျိုးရရှိခဲ့ကြသည်။ ဌာနခွဲအမှုထမ်းဝင်များဖြစ်ကြသော ရောဘတ် စီရန်ကိုနှင့် ရောဘတ် ပီ. ဂျွန်ဆင်တို့သည် ကင်းမျှော်စင်ပညာပေးဌာနတွင် ယခုလောလောဆယ် အထူးသင်တန်းတက်နေကြသော နယ်လှည့်ကြီးကြပ်မှူးများအပါအဝင် ယေဟောဝါ၏နှစ်ကြာသစ္စာရှိကျေးကျွန်အချို့နှင့် လူတွေ့မေးမြန်းခန်းများ ပြုလုပ်ခဲ့ကြသည်။ လူတွေ့မေးမြန်းခံရသူအားလုံးသည် တစ်ချိန်က ခရစ်ယာန်သာသနာပြုများအဖြစ် အမှုဆောင်ခဲ့ကြသော ဂိလဒ်ကျောင်းဆင်းများဖြစ်ကြသည်။ ကျောင်းသားများ၊ သူတို့၏မိသားစုများနှင့် မိတ်ဆွေများသည် အတွေ့အကြုံရှိသော ဤဝိညာဉ်ရေးလူများထံမှ အားတက်ဖွယ် ဉာဏ်ပညာစကားကို ကြားခဲ့ကြရသည်။
သူတို့၏အကြံဉာဏ်တွင် ဤအချက်များပါသည်– “ခရစ်ယာန်ဓမ္မအမှုမှာ၊ အသင်းတော်မှာ ဖြစ်နိုင်သရွေ့ အလုပ်များနေပါ။” “ကိုယ်ကိုကိုယ် သိပ်အလေးမပေးပါနဲ့။ ခရစ်ယာန်သာသနာပြုတစ်ယောက်အနေနဲ့ သင့်ရဲ့ရည်ရွယ်ချက်အပေါ် အာရုံစိုက်ထားပြီး သင်တာဝန်ကျရာအရပ်ကို သင့်အိမ်အဖြစ် ရှုမြင်ပါ။” မည်သည့်ဒေသတွင်ပင် တာဝန်ထမ်းဆောင်ရပါစေ၊ ဂိလဒ်သင်တန်းက ခရစ်ယာန်အမှုဆောင်တစ်ဦး ကောင်းမှုပြုလာနိုင်ဖို့ အရည်အချင်းပြည့်မီစေပုံကို တခြားအကျိုးရှိမှတ်ချက်များဖြင့် ဖော်ပြခဲ့သည်။ မှတ်ချက်တချို့မှာ ဤသို့ဖြစ်သည်– “ကျွန်တော်တို့ အတူတကွ ပူးပေါင်းလုပ်ဆောင်ရမယ်ဆိုတာ သိရှိလာခဲ့ကြတယ်။” “ယဉ်ကျေးမှုဓလေ့အသစ်ကို ကျွန်တော်တို့လက်ခံတတ်ဖို့ ကျောင်းကနေ ကူညီပေးခဲ့တယ်။” “ကျမ်းချက်တွေကို ရှုထောင့်အမျိုးမျိုးနဲ့ အသုံးပြုတတ်ဖို့ ကျွန်တော်တို့ကို သင်ပေးတယ်။”
နှစ်ကြာအုပ်ချုပ်ရေးအဖွဲ့ဝင် ဂျွန် အီး. ဘားရ်သည် ဤအစီအစဉ်၏ အဓိကဟောပြောချက်ကို ပေးခဲ့သည်။ သူ၏ကျမ်းဆိုင်ရာအဓိကအချက်မှာ “သူတို့၏အသံသည် မြေတစ်ပြင်လုံး၌ နှံ့ပြားလေပြီ” ဖြစ်၏။ (ရောမ ၁၀:၁၈) ယနေ့ ဘုရားသခင်၏လူမျိုးတော်သည် ဤစိန်ခေါ်ချက်ကို ရင်ဆိုင်နိုင်ခဲ့ပြီလောဟူ၍ သူမေးခွန်းထုတ်ခဲ့သည်။ အမှန်ပင် ရင်ဆိုင်နိုင်ခဲ့ပါပြီ! ၁၈၈၁ ခုနှစ်ကတည်းက ကင်းမျှော်စင် မဂ္ဂဇင်းကိုဖတ်လာခဲ့ကြသော စာဖတ်ပရိသတ်များအား “သင်တို့သည် ဟောပြောနေကြသလော” ဟုမေးခဲ့သည်။ ထို့နောက် ဟောပြောသူသည် ယူ.အက်စ်.အေ. အိုဟိုင်အိုပြည်နယ်၊ စီဒါပွိုင့်တွင်ကျင်းပခဲ့သည့် ၁၉၂၂ စည်းဝေးကြီး၏ “ဘုရင်နှင့် သူ၏နိုင်ငံတော်ကို ကြေညာကြ!” ဟူသော သမိုင်းဝင်ဖိတ်ခေါ်ချက်ကို ပရိသတ်အားလုံးအား အမှတ်ရစေခဲ့သည်။ အချိန်ကုန်လွန်လာသည်နှင့်အမျှ ဘုရားသခင့်သစ္စာရှိကျေးကျွန်များ၏ စိတ်ထက်သန်မှုသည် အံ့ဖွယ်ဘုရားသခင့်နိုင်ငံတော်အမှန်တရားကို လူမျိုးအပေါင်းအား ကြေညာရန် လှုံ့ဆော်ပေးခဲ့သည်။ ယေဟောဝါအား ဂုဏ်တင်ပြီး ချီးမွမ်းရန် စာပေစာတမ်းအားဖြင့်ဖြစ်စေ၊ နှုတ်အားဖြင့်ဖြစ်စေ မြေကြီးစွန်းတိုင်အောင် သတင်းကောင်းရောက်ရှိခဲ့ပြီ။ စိတ်လှုပ်ရှားဖွယ်နိဂုံးချုပ်တွင် ညီအစ်ကိုဘားရ်က မိမိတို့၏ကောင်းချီးများကို ရေတွက်ရန် ကျောင်းဆင်းများအား တိုက်တွန်းပြီး ဤသို့ဆိုသည်– “သင်တို့ရဲ့တာဝန်နဲ့ပတ်သက်ပြီး ယေဟောဝါကို နေ့စဉ်နဲ့အမျှ ဆုတောင်းတဲ့အခါ ‘သူတို့၏အသံသည် မြေတစ်ပြင်လုံး၌ နှံ့ပြားလေပြီ’ ဆိုတဲ့စကား ပြည့်စုံဖို့ သင်တို့လုပ်ဆောင်ရတဲ့အပိုင်းအတွက် လှိုက်လှိုက်လှဲလှဲ ကျေးဇူးတင်ပါ။”
ဤဟောပြောချက်ပြီးနောက် နှုတ်ခွန်းဆက်စာများ ဖတ်ကြားပြီး သဘာပတိသည် ကျောင်းဆင်းတစ်ဦးစီအား ဒီပလိုမာပေးခဲ့သည်။ ထို့နောက် ချစ်မြတ်နိုးရသောကျောင်းမှ ထွက်ခွာရချိန်တွင် ဝမ်းနည်းဝမ်းသာဖြစ်နေကြသော သင်တန်းသားများအတွက် သင်တန်းကိုယ်စားလှယ်တစ်ဦးက အုပ်ချုပ်ရေးအဖွဲ့နှင့် ဗေသလမိသားစုကို လိပ်မူထားသည့် လှိုက်လှဲသောသန္နိဋ္ဌာန်ကို ဖတ်ပြခဲ့၏၊ ထိုစာတွင် ယေဟောဝါကို “ယခုမှစ၍ အစဉ်အဆက်ကောင်းချီးပေးကြ” မည့်ကျောင်းဆင်းများ၏ ဆုံးဖြတ်ချက်ကို ဖော်ပြထားသည်။—ဆာလံ ၁၁၅:၁၈။
ဤကျောင်းဆင်းများသည် သူတို့၏ဒေသအသစ်တွင် နေသားကျကာ အနှစ် ၆၀ တိုင်တိုင် သွားရောက်လုပ်ဆောင်ခဲ့ကြသူများကဲ့သို့ ကမ္ဘာချီဟောပြောခြင်းလုပ်ငန်းတိုးတက်မှုတွင် ကောင်းစွာပါဝင်ကူညီနိုင်ကြပါစေကြောင်း ကျွန်ုပ်တို့ဆုတောင်းပေးပါသည်။
[စာမျက်နှာ ၂၇ ပါ ရုပ်ပုံ]
သင်တန်းဆိုင်ရာအချက်အလက်များ
ကိုယ်စားပြုနိုင်ငံအရေအတွက်– ၁၂
တာဝန်ပေးအပ်ခံရသည့် နိုင်ငံအရေအတွက်– ၁၆
ကျောင်းသား/သူအရေအတွက်– ၄၈
ပျမ်းမျှအသက်– ၃၄.၄
ပျမ်းမျှအမှန်တရားသက်တမ်း– ၁၇.၆
ပျမ်းမျှအချိန်ပြည့်အမှုဆောင် သက်တမ်း– ၁၃.၅
[စာမျက်နှာ ၂၈ ပါ ရုပ်ပုံ]
ဂိလဒ်ကင်းမျှော်စင်ကျမ်းစာကျောင်း၏ ၁၁၄ ကြိမ်မြောက်သင်တန်း
အောက်ပါစာရင်းတွင် အတန်းများကို ရှေ့တန်းမှ နောက်တန်းသို့ ရေတွက်ပြီး အမည်များကို လက်ဝဲမှ လက်ယာဘက်သို့ စီထားသည်။
(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D..