နှစ်ပတ်လည်စည်းဝေးမှတ်တမ်း

စည်းလုံးမှုနဲ့ စိတ်လှုပ်ရှားဖွယ် စီမံကိန်းတွေကိုမြင်တွေ့ရတဲ့ အစည်းအဝေးတစ်ခု

ပဲင်စီလ်ဗေးနီးယားပြည်နယ်၊ ကင်းမျှော်စင် သမ္မာကျမ်းစာနဲ့ဝေစာအသင်းရဲ့ နှစ်ပတ်လည်အစည်းအဝေးတွေက အမြဲစိတ်လှုပ်ရှားစရာကောင်းပါတယ်။ ၂၀၁၁ ခုနှစ်၊ အောက်တိုဘာ ၁ ရက်၊ စနေနေ့မှာ ကျင်းပခဲ့တဲ့ ၁၂၇ ကြိမ်မြောက် နှစ်ပတ်လည်အစည်းအဝေးလည်း အဲဒီအတိုင်းပဲ။ ကမ္ဘာတစ်ဝန်းကလာတဲ့ ဖိတ်ခေါ်ခံရတဲ့ဧည့်သည်တွေဟာ အမေရိကန်ပြည်ထောင်စု၊ နယူးဂျာစီပြည်နယ်၊ ဂျာစီစီးတီးမှာရှိတဲ့ ယေဟောဝါသက်သေတွေရဲ့ စည်းဝေးပွဲခန်းမမှာ စုရုံးခဲ့ကြတယ်။

အုပ်ချုပ်ရေးအဖွဲ့ဝင် ညီအစ်ကိုဂဲရစ် လော့ရှ်က ပျော်ရွှင်နေတဲ့လူအုပ်ကို ကြိုဆိုပြီး အစီအစဉ်ကို စတင်ခဲ့တယ်။ ညီအစ်ကို ဂဲရစ် လော့ရှ်က ၈၅ နိုင်ငံကလာတဲ့ ကိုယ်စားလှယ်တွေကို သင်တို့ဟာ ကမ္ဘာပေါ်မှာရှိတဲ့ ဘယ်အဖွဲ့အစည်းထက်မဆို ပိုပြီးစည်းလုံးတဲ့ ထူးခြားတဲ့အပြည်ပြည်ဆိုင်ရာမိသားစုရဲ့ မိသားစုဝင်တွေဖြစ်တယ်လို့ ပြောခဲ့တယ်။ အဲဒီစည်းလုံးမှုက ကောင်းတဲ့သက်သေခံချက်တစ်ရပ်ဖြစ်ပြီး ယေဟောဝါကို ဂုဏ်တင်မှုဖြစ်စေတယ်။ အစည်းအဝေးမှာ တကယ်ပဲ စည်းလုံးမှုအကြောင်းကို ထပ်တလဲလဲဖော်ပြသွားတယ်။

မက္ကဆီကိုနိုင်ငံမှ မှတ်တမ်းကောင်း

အစီအစဉ်ရဲ့ပထမပိုင်းမှာ ယေဟောဝါလူမျိုးရဲ့စည်းလုံးမှုကို ဥပမာတွေနဲ့ ရှင်းပြသွားတယ်။ မက္ကဆီကိုဌာနခွဲနဲ့ အမေရိကအလယ်ပိုင်းမှာရှိတဲ့ ဌာနခွဲခြောက်ခုကို ပေါင်းလိုက်တဲ့ကိစ္စနဲ့ပတ်သက်ပြီး ဘော်လ်တဆာ ပါလာက မက္ကဆီကို ဗေသလအိမ်သားသုံးယောက်ကို လူတွေ့မေးမြန်းခဲ့တယ်။ ဒီပေါင်းစည်းမှုကြောင့် အခု မက္ကဆီကိုဗေသလမိသားစုမှာ နိုင်ငံအသီးသီး၊ ယဉ်ကျေးမှုအဖုံဖုံကလာတဲ့ ညီအစ်ကိုညီအစ်မတွေရှိလာလို့ အချင်းချင်းအားပေးတည်ဆောက်နိုင်ကြတယ်။ ဒါက ဘုရားသခင်ဟာ လူမျိုးရေးအတားအဆီးတွေကို ခဲဖျက်အကြီးကြီးနဲ့ ဖျက်လိုက်တာနဲ့တူတယ်။

အဲဒီလိုပြောင်းလဲပြီးတဲ့နောက် အသင်းတော်တိုင်းမှာ လုံခြုံစိတ်ချရတဲ့ အီးမေးလ်ဆက်သွယ်မှုရှိထားလို့ သီးခြားဒေသတွေမှာနေထိုင်တဲ့သူတွေတောင် ဌာနခွဲရုံးနဲ့ တိုက်ရိုက်ဆက်သွယ်နိုင်တယ်။ ဒါက ဌာနခွဲရုံးမရှိတော့တဲ့ နိုင်ငံတွေက ကြေညာသူတွေကို ယေဟောဝါရဲ့အဖွဲ့အစည်းအဝင် ဖြစ်နေသေးတယ်လို့ ခံစားရစေတယ်။

ဂျပန်နိုင်ငံမှ နောက်ဆုံးအချက်အလက်

ဂျပန်ဌာနခွဲရုံးက ဂျိန်းမ်စ်လင်တန်က ၂၀၁၁၊ မတ်လမှာဖြစ်ပွားခဲ့တဲ့ ငလျင်နဲ့ ဆူနာမီလှိုင်းဒဏ်ခံစားခဲ့ရတဲ့ ဒေသမှာနေထိုင်တဲ့ ကျွန်ုပ်တို့ရဲ့ညီအစ်ကို၊ ညီအစ်မတွေရဲ့ ထိခိုက်မှုတွေအကြောင်း ပြောပြခဲ့တယ်။ သက်သေခံများစွာက သူတို့ချစ်မြတ်နိုးရသူတွေကိုရော၊ သူတို့ရဲ့ပိုင်ဆိုင်ရာတွေကိုပါ ဆုံးရှုံးခဲ့ကြရတယ်။ ဘေးမသင့်တဲ့ဒေသမှာနေထိုင်တဲ့ သက်သေခံတွေက အိမ် ၃,၁၀၀ ကျော်ကိုဆောက်ပေးခဲ့ပြီး ရာနဲ့ချီတဲ့ကားတွေကို စီစဉ်ပေးခဲ့ကြတယ်။ ဒေသန္တရဆောက်လုပ်ရေးကော်မတီတွေကစေလွှတ်တဲ့ စေတနာ့ဝန်ထမ်းတွေဟာ ညီအစ်ကိုညီအစ်မတွေရဲ့အိမ်တွေကို မနားတမ်းပြုပြင်ပေးခဲ့ကြတယ်။ စေတနာ့ဝန်ထမ်း ၁,၇၀၀ ကျော်က အကူအညီလိုအပ်တဲ့နေရာတိုင်းမှာ လုပ်ဆောင်ခဲ့ကြတယ်။ စေတနာ့ဝန်ထမ်း ၅၇၅ ယောက်က ဝတ်ပြုရာခန်းမတွေ ပြန်လည်ပြုပြင်ရာမှာ ပါဝင်ကူညီခဲ့ကြပြီး အဲဒီအထဲမှာ အမေရိကန်ပြည်ထောင်စုကလာတဲ့ စေတနာ့ဝန်ထမ်းအဖွဲ့တစ်ဖွဲ့လည်း ပါဝင်တယ်။

သဘာဝဘေးဒဏ်ခံစားခဲ့ရသူတွေကို နှစ်သိမ့်ပေးဖို့၊ သူတို့ရဲ့ယုံကြည်ခြင်းကို ခိုင်ခံ့စေဖို့ အများကြီးလုပ်ဆောင်ခဲ့ကြတယ်။ အကြီးအကဲ ၄၀၀ ကျော်က ဘေးဒဏ်သင့်ညီအစ်ကိုညီအစ်မတွေဆီသွားပြီး သိုးထိန်းလည်ပတ်မှုလုပ်ခဲ့ကြတယ်။ ကမ္ဘာ့ဌာနချုပ်က ဇုန်ကြီးကြပ်မှူးနှစ်ဦးက ညီအစ်ကိုညီအစ်မတွေကို အားပေးဖို့အတွက် ဘေးဒဏ်သင့်ဒေသကိုရောက်လာလို့ အုပ်ချုပ်ရေးအဖွဲ့ရဲ့စိုးရိမ်မကင်းဖြစ်မှုကို အထင်အရှားမြင်တွေ့ရတယ်။ ကမ္ဘာတစ်ဝန်းက သက်သေခံတွေရဲ့ စိုးရိမ်ကြောင်းဖော်ပြချက်တွေကလည်း တကယ့်နှစ်သိမ့်မှု ဖြစ်ခဲ့တယ်။

 တရားရေးအောင်ပွဲများ

ဗြိတိန်ဌာနခွဲရုံးက စတီဗင် ဟာဒီက မကြာသေးခင်ကအနိုင်ရခဲ့တဲ့ တရားရေးအောင်ပွဲတွေအကြောင်း ပြောပြတဲ့အခါ ပရိသတ်က အသေအချာ အာရုံစိုက်နားထောင်ခဲ့တယ်။ ဥပမာ၊ ပြင်သစ်အစိုးရက ပြင်သစ်မှာ ကျွန်ုပ်တို့အသုံးပြုတဲ့ တရားဝင်အဖွဲ့အစည်းထံကနေ အခွန်အဖြစ် အမေရိကန်ဒေါ်လာ ၈၂ သန်း တောင်းဆိုခဲ့တယ်။ ဒါပေမဲ့ ဥရောပလူ့အခွင့်အရေးဆိုင်ရာတရားရုံးက ဒီအမှုဟာ ဥပဒေနဲ့မညီဘူးဆိုပြီး ဆုံးဖြတ်ခဲ့တယ်။ အဲဒီဆုံးဖြတ်ချက်မှာ သက်သေခံတွေက အခွန်ရှောင်ဖို့ ကြိုးစားတာမဟုတ်ကြောင်း၊ ပြင်သစ်အစိုးရက ဘာသာရေးလွတ်လပ်ခွင့်နဲ့ပတ်သက်ပြီး လူတွေကို ကာကွယ်ပေးတဲ့ ဥရောပပဋိညာဉ်စာတမ်းရဲ့ အပိုဒ် ၉ ပါအချက်ကို ချိုးဖောက်ကြောင်း၊ အစိုးရက သက်သေခံတွေကို ဘာသာရေးအဖွဲ့အစည်းတစ်ခုအနေနဲ့ အသိအမှတ်မပြုလိုကြောင်း၊ သူတို့ရဲ့တရားဝင်အဖွဲ့အစည်းကို ဖျက်သိမ်းပစ်လိုကြောင်း၊ ဒီဘာသာကို နိုင်ငံကနေပပျောက်သွားအောင်လုပ်ဖို့ ကြိုးစားခဲ့ကြောင်းနဲ့ သက်သေခံတွေကို ဆန့်ကျင်ပုတ်ခတ်ရာမှာ ထိခိုက်နစ်နာစေတဲ့အသုံးအနှုန်းတွေ အသုံးပြုခဲ့ကြောင်း ဖော်ပြထားတယ်။

လူ့အခွင့်အရေးဆိုင်ရာဥရောပတရားရုံးက အာမေးနီးယားနိုင်ငံမှာရှိတဲ့ ယေဟောဝါသက်သေတွေရဲ့ အမှုတစ်ခုကိုလည်း အနိုင်ပေးခဲ့တယ်။ ၁၉၆၅ ခုနှစ်ကစပြီး လူ့အခွင့်အရေးဆိုင်ရာ ဥရောပတရားရုံးက ဥရောပပဋိညာဉ်စာတမ်းအရ စစ်မှုထမ်းခြင်းနဲ့ပတ်သက်တဲ့ အစိုးရအမိန့်ကို လူပုဂ္ဂိုလ်တစ်ဦးစီအနေနဲ့ ငြင်းဆိုပိုင်ခွင့်မရှိကြောင်း ဆုံးဖြတ်ခဲ့တယ်။ ဒါပေမဲ့ လူတစ်ဦးရဲ့ ခိုင်မာတဲ့ ဘာသာရေးယုံကြည်ချက်တွေကြောင့်ဆိုရင် စစ်မှုထမ်းတာကိုငြင်းဆိုဖို့ ဥရောပပဋိညာဉ်စာတမ်းက ခွင့်ပြုတယ်လို့ အဲဒီရုံးရဲ့ အမြင့်ဆုံးအခွင့်အာဏာရှိတဲ့ အထက်တရားရုံးက ဆုံးဖြတ်ခဲ့တယ်။ ဒီဆုံးဖြတ်ချက်ကို အာမေးနီးယားနိုင်ငံအပြင် အဇာဘိုင်ဂျန်နဲ့ တူရကီတို့လို နိုင်ငံတွေကလည်း လိုက်နာရမှာဖြစ်တယ်။

ဆောက်လုပ်ရေးစီမံကိန်းများ

နောက်ဟောပြောသူက အုပ်ချုပ်ရေးအဖွဲ့ဝင် ဂိုင် ပီယပ်စ်ဖြစ်ပြီး သူက တက်ရောက်သူအားလုံးဟာ နယူးယောက်ပြည်နယ်မှာလုပ်ဆောင်မယ့် ဆောက်လုပ်ရေးစီမံကိန်းတွေကို အလွန် စိတ်ဝင်စားကြကြောင်း အသိအမှတ်ပြုပြောဆိုခဲ့တယ်။ ဝေါလ်ကီးလ်၊ ပက်တာစင်ရဲ့ တိုးတက်မှုနဲ့ မကြာသေးခင်ကမှ နယူးယောက်မှာဝယ်ယူထားတဲ့ ဝါးရစ်ခ်နဲ့ တက်စီးဒိုးမှာရှိတဲ့ မြေနေရာတွေကို ရိုက်ကူးထားတဲ့ ဗီဒီယိုကိုပြပြီး ဟောပြောခဲ့တယ်။ ဝေါလ်ကီးလ်မှာဆောက်မယ့် လူနေအိပ်ခန်းအဆောက်အအုံအသစ်ဟာ ၂၀၁၄ ခုနှစ်မှာ ပြီးစီးမှာဖြစ်တဲ့အတွက် နောက်ထပ် အခန်း ၃၀၀ ပိုရှိလာမှာဖြစ်တယ်။

ဝါးရစ်ခ်မှာရှိတဲ့ ၂၄၈ ဧကကျယ်တဲ့မြေနေရာမှာ အဆောက်အအုံတွေ ဆောက်လုပ်ဖို့ အစီအစဉ်တွေဆွဲထားတယ်။ “ဝါးရစ်ခ်နဲ့ပတ်သက်ပြီး ယေဟောဝါရဲ့အလိုတော် ဘယ်လိုရှိမယ်ဆိုတာ သေချာမသိသေးပေမဲ့ အဆောက်အအုံဆောက်ဖို့ အားလုံးအဆင်သင့်ဖြစ်နေကြောင်း၊ ဒီမြေနေရာကိုဝယ်ထားတာက ယေဟောဝါသက်သေတွေရဲ့ ကမ္ဘာ့ဌာနချုပ်ကို ဝါးရစ်ခ်ကိုပြောင်းရွှေ့ဖို့ဖြစ်ကြောင်း” ပြောခဲ့တယ်။ ဆောက်လုပ်နေစဉ်အတောအတွင်းမှာ ဝါးရစ်ခ်ရဲ့မြောက်ဘက် ခြောက်မိုင်အကွာမှာတည်ရှိတဲ့ ဧက ၅၀ ကျယ်တဲ့မြေနေရာမှာ လိုအပ်တဲ့ စက်ပစ္စည်းတွေနဲ့ ဆောက်လုပ်ရေးပစ္စည်းတွေကို ခဏထားမှာဖြစ်တယ်။ “ဆောက်လုပ်ဖို့ခွင့်ပြုချက်ရတာနဲ့ ဒီစီမံကိန်းတစ်ခုလုံးကို လေးနှစ်အတွင်း အပြီးသတ်နိုင်ဖို့ မျှော်လင့်တယ်” လို့ ညီအစ်ကို ပီယပ်စ်က ပြောခဲ့တယ်။ “အဲဒီနောက် ဘရွတ်ကလင်ကအဆောက်အအုံကို ရောင်းချနိုင်မှာဖြစ်တယ်။”

ကြီးစွာသောဒုက္ခ အရမ်းနီးနေပြီလို့ အုပ်ချုပ်ရေးအဖွဲ့က မယူမှတ်တော့ဘူးလားဆိုပြီး ညီအစ်ကို ပီယပ်စ်က မေးခွန်းထုတ်ခဲ့တယ်။ “လုံးဝမဟုတ်ပါဘူး။ ကြီးစွာသောဒုက္ခကြောင့် ကျွန်တော်တို့ရဲ့စီမံကိန်း ပျက်သွားတယ်ဆိုရင်လည်း ကောင်းပါတယ်၊ တကယ့်ကို ကောင်းပါတယ်” လို့ အဖြေပေးခဲ့တယ်။

ဟောက်သောခြင်္သေ့ကို သတိပြုပါ

အုပ်ချုပ်ရေးအဖွဲ့ဝင် နောက်တစ်ဦးဖြစ်တဲ့ စတီဗင် လက်တ်က ‘သင်တို့သည် သတိရှိလျက် နိုးကြားနေကြလော့။ သင်တို့၏ရန်သူ စာတန်သည် ဟောက်သောခြင်္သေ့ကဲ့သို့ တစ်ဦးတစ်ယောက်ကို မျိုရန် လှည့်လည်ရှာဖွေလျက်ရှိ၏’ ဆိုတဲ့ ၁ ပေတရု ၅:၈ ကိုဆွေးနွေးခဲ့တယ်။ ခြင်္သေ့တွေရဲ့စရိုက်အတော်များများက ပေတရုဖော်ပြခဲ့တဲ့ စာတန်ရဲ့စရိုက်တွေနဲ့ တူတယ်လို့ ညီအစ်ကိုလက်တ်က ဖော်ပြခဲ့တယ်။

ခြင်္သေ့တွေက လူတွေထက် ပိုသန်မာ၊ ပိုလျင်မြန်တယ်။ စာတန်ကလည်း ကျွန်ုပ်တို့ထက် ပိုခွန်အားကြီးတဲ့အတွက် စာတန်ကို ကျွန်ုပ်တို့ရဲ့ကိုယ်ပိုင်ခွန်အားနဲ့ တိုက်ဖို့ မကြိုးစားသင့်ဘူး။ ယေဟောဝါရဲ့အကူအညီလိုတယ်။ (ဟေရှာ. ၄၀:၃၁) ခြင်္သေ့က အမှောင်ထဲကနေပြီး သားကောင်ကို ချောင်းတယ်၊ ဒါကြောင့် သားကောင်က စာတန်ကို မတွေ့ရဘူး။ ကျွန်ုပ်တို့က စာတန့်သားကောင် မဖြစ်ချင်ဘူးဆိုရင် သူ့ရဲ့တိုက်ခိုက်နည်းတွေကို သိမြင်နားလည်ဖို့လိုတယ်။ အန္တရာယ်မပြုနိုင်တဲ့ သမင် ဒါမှမဟုတ် အိပ်ပျော်နေတဲ့ မြင်းကျားငယ်လေးတစ်ကောင်ကို သတ်ဖြတ်တဲ့ခြင်္သေ့လိုပဲ  စာတန်က အကြင်နာကင်းမဲ့ပြီး ကျွန်ုပ်တို့ကို သတ်ပစ်ချင်တယ်။ ခြင်္သေ့ ကိုက်ဖြတ်စားသောက်လို့ ဝပြီဆိုရင် သားကောင်ဟာ တစ်စစီဖြစ်ပြီး ရုပ်ပျက်ဆင်းပျက်ဖြစ်သွားတယ်။ အဲဒီလိုပဲ ခရစ်ယာန်တစ်ယောက်က စာတန့်သားကောင်ဖြစ်သွားတယ်ဆိုရင် သူ့ရဲ့ “နောက်ဆုံးဖြစ်အင်” က “ရှေ့ဖြစ်အင်ထက် သာ၍ဆိုး” သွားတယ်။ (၂ ပေ. ၂:၂၀) ဒါကြောင့် ကျွန်ုပ်တို့သိရှိထားတဲ့ ကျမ်းစာမူတွေကို အခိုင်အမာကိုင်စွဲခြင်းဖြင့် စာတန်ကို ဆန့်ကျင်ဖို့လိုတယ်။—၁ ပေ. ၅:၉။

ယေဟောဝါရဲ့အိမ်တော်မှာ သင့်နေရာကို တန်ဖိုးထားပါ

“ကျွန်တော်တို့အားလုံးက ယေဟောဝါရဲ့အိမ်တော်မှာ နေရာကိုယ်စီရှိကြတယ်” ဆိုပြီး နောက်ဟောပြောသူတစ်ဦးဖြစ်တဲ့ အုပ်ချုပ်ရေးအဖွဲ့ဝင် ဆမ်မြူရယ် ဟာ့ဒ်က ပြောခဲ့တယ်။ အဓိပ္ပာယ်ကတော့ ယေရှုရဲ့ရွေးနုတ်ဖိုးကိုယုံကြည်တဲ့ ခရစ်ယာန်အားလုံးက ဘုရားသခင်လက်ခံတဲ့နည်းနဲ့ ကိုယ်တော့်ကိုဝတ်ပြုနိုင်ကြတယ်ဆိုတဲ့အချက်ဖြစ်တယ်။ ယေဟောဝါရဲ့အိမ်တော်မှာ နေရာတစ်နေရာစီရထားတာကို ကျွန်ုပ်တို့အားလုံး တန်ဖိုးထားလေးမြတ်သင့်တယ်။ ဒါဝိဒ်လိုပဲ ကျွန်ုပ်တို့ဟာ “ယေဟောဝါရဲ့အိမ်တော်မှာ တစ်သက်လုံးနေခွင့်ရ” လိုကြတယ်။—ဆာ. ၂၇:၄၊ ကဘ။

ညီအစ်ကို ဟာ့ဒ်က ဆာလံ ၉၂:၁၂-၁၄ ကိုကိုးကားပြီး ကျွန်ုပ်တို့ဘဝမှာ အောင်မြင်ဖြစ်ထွန်းဖို့ ယေဟောဝါ ကူညီပေးပုံကို ရှင်းပြခဲ့တယ်။ ဘုရားသခင်က ကျွန်ုပ်တို့ကို နှစ်သိမ့်ပေးတယ်၊ ကာကွယ်ပေးတယ်၊ လန်းဆန်းစေတဲ့ အမှန်တရားရေ ပေးတယ်။ အဲဒီအရာတွေအတွက် ယေဟောဝါကို ကျေးဇူးတင်ဖို့၊ ယေဟောဝါရဲ့အိမ်တော်မှာ ထာဝစဉ်နေပြီး ကိုယ်တော့်ကိုဝတ်ပြုခွင့်ရတာကို အားရကျေနပ်ဖို့ ပရိသတ်ကို အားပေးခဲ့တယ်။

ခရစ်ယာန်များ သမ္မာကျမ်းစာကို လေးမြတ်ကြ

နောက်ဟောပြောချက်မှာ အုပ်ချုပ်ရေးအဖွဲ့ဝင်တစ်ဦးဖြစ်သူ ဒေးဗစ် စပလန်က ခရစ်ယာန်တွေဟာ သမ္မာကျမ်းစာကို အမြဲလေးမြတ်တန်ဖိုးထားကြောင်း ရှင်းပြခဲ့တယ်။ ပထမရာစုက ခရစ်ယာန်တွေဟာ အရေဖျားလှီးခြင်းပြဿနာကို ဖြေရှင်းဖို့အတွက် ကျမ်းစာကို အားကိုးခဲ့ကြတယ်။ (တ. ၁၅:၁၆၊ ၁၇) ဒါပေမဲ့ ဂရိအတွေးအခေါ်နဲ့ လေ့ကျင့်ခံထားရတဲ့ ဒုတိယရာစုမှာရှိတဲ့ ခရစ်ယာန်အမည်ခံသူတွေကတော့ သမ္မာကျမ်းစာထက် သူတို့ရဲ့ကိုယ်ပိုင်အသိပညာကို စပြီးရှေ့တန်းတင်လာကြတယ်။ နောက်ပိုင်းမှာ တခြားသူတွေက ကျမ်းစာသွန်သင်ချက်တွေကို ချာ့ခ်ျဖခင်လို့ သူတို့ခေါ်ဆိုတဲ့သူတွေနဲ့ ဧကရာဇ်တွေရဲ့ အယူအဆတွေနဲ့ အစားထိုးလိုက်ကြပြီး မှားယွင်းတဲ့သွန်သင်ချက်အတော်များများကို သင်ပေးခဲ့ကြတယ်။

ညီအစ်ကို စပလန်က အမှန်တရားကိုကာကွယ်မယ့် စစ်မှန်တဲ့ကောင်းကင်အတန်းအစားတွေ မြေကြီးပေါ်မှာဆက်ရှိနေမယ်လို့ ယေရှုရဲ့ပုံဥပမာမှာ ပြောခဲ့တဲ့အချက်ကို ဖော်ပြသွားတယ်။ (မ. ၁၃:၂၄-၃၀) သူတို့က ဘယ်သူတွေလဲဆိုတာကိုတော့ ကျွန်ုပ်တို့ အတိအကျမပြောနိုင်ဘူး။ ဒါပေမဲ့ ရာစုနှစ်တွေတစ်လျှောက်မှာ ကျမ်းစာနဲ့မညီတဲ့ ယုံကြည်ချက်တွေနဲ့ အကျင့်အကြံတွေကို ရှုတ်ချပြောဆိုခဲ့သူများစွာရှိခဲ့တယ်။ သူတို့ထဲက တချို့ကတော့ ၉ ရာစုမှာအသက်ရှင်ခဲ့တဲ့ လီယွန်မြို့သား ခရစ်ယာန်ဂိုဏ်းချုပ်ဘုန်းတော်ကြီး အဂိုဘာ့ဒ်၊ ၁၂ ရာစုမှာအသက်ရှင်ခဲ့ကြတဲ့ ဘရိုင်မြို့က ပီတာ၊ လောင်စန်းမြို့က ဟင်နရီ၊ ဗာလ်ဒီဇ် (ဝါလ်ဒို)၊ ၁၄ ရာစုမှာအသက်ရှင်ခဲ့တဲ့ ဂျွန် ဝိကလိဖ်၊ ၁၆ ရာစုမှာ အသက်ရှင်ခဲ့တဲ့ ဝီလျံ တင်ဒေးလ်နဲ့ ၁၉ ရာစုမှာအသက်ရှင်ခဲ့တဲ့ ဟင်နရီ ဂရူးနဲ့ ဂျော့ခ်ျ စတောစ် တို့ဖြစ်တယ်။ မျက်မှောက်ခေတ် ယေဟောဝါသက်သေတွေဟာ သမ္မာကျမ်းစာစံနှုန်းတွေကို ဆက်စွဲကိုင်ပြီး သမ္မာကျမ်းစာကို အမှန်တရားရဲ့အုတ်မြစ်အဖြစ် အသိအမှတ်ပြုကြတယ်။ ဒါကြောင့် အုပ်ချုပ်ရေးအဖွဲ့က ၂၀၁၂ ခုနှစ်အတွက် နှစ်ချုပ်ကျမ်းချက်ကို “ကိုယ်တော်၏တရားစကားတော်သည် အမှန်တရားဖြစ်ပါ၏” ဆိုတဲ့ ယောဟန် ၁၇:၁၇ ကို ရွေးချယ်ခဲ့တာဖြစ်တယ်။

လေ့ကျင့်မှုနဲ့ အမှုဆောင်ခြင်းအတွက် စိတ်လှုပ်ရှားဖွယ် အပြောင်းအလဲများ

အုပ်ချုပ်ရေးအဖွဲ့ဝင် အန်တိုနီ မောရစ်ရဲ့ ကြေညာချက်ထဲမှာ ခရစ်ယာန်သာသနာပြုတွေနဲ့ အထူးရှေ့ဆောင်တွေအတွက် အပြောင်းအလဲတွေကို ဖော်ပြခဲ့တယ်။ ၂၀၁၂၊ စက်တင်ဘာလကစပြီး ခရစ်ယာန်မောင်နှံများအတွက် ကျမ်းစာသင်တန်းကို ရွေးချယ်ထားတဲ့နိုင်ငံတွေမှာ ကျင်းပသွားမှာဖြစ်တယ်။ ပြီးခဲ့တဲ့အောက်တိုဘာလကစပြီး ဂိလဒ်သင်တန်းကျောင်းရဲ့ ရည်ရွယ်ချက်ကိုလည်း ပြောင်းလဲခဲ့ပါတယ်။ အခုဆိုရင် ဂိလဒ်သင်တန်းမတက်ရသေးတဲ့ ခရစ်ယာန်သာသနာပြုတွေ၊ အထူးရှေ့ဆောင်တွေ၊ နယ်လှည့်ကြီးကြပ်မှူးတွေ ဒါမှမဟုတ် ဗေသလအိမ်သားတွေအဖြစ် အထူးအချိန်ပြည့်လုပ်ငန်းတစ်မျိုးမျိုးမှာ အမှုဆောင်နေသူတွေဟာ ဂိလဒ်သင်တန်းမှာ လေ့ကျင့်ခံနိုင်ကြပြီဖြစ်တယ်။ ကျောင်းဆင်းတွေဟာ ဌာနခွဲရုံး၊ နယ်လှည့်လုပ်ငန်း ဒါမှမဟုတ် လူနေထူထပ်တဲ့ဒေသတွေမှာရှိတဲ့ အသင်းတော်တွေနဲ့အတူ ဟောပြောခြင်းလုပ်ငန်းမှာပါဝင်ပြီး ဘုရားသခင့်လူမျိုးကို အားပေးတည်ဆောက်ဖို့ အသုံးပြုခံရမှာဖြစ်တယ်။

ဒါ့အပြင် အထူးရှေ့ဆောင်တွေက ဝေးလံတဲ့ဒေသတွေနဲ့ သီးခြားနေရာဒေသတွေမှာ အသင်းတော်အသစ်တွေဖွင့်ဖို့ လုပ်ဆောင်ကြပါလိမ့်မယ်။ ၂၀၁၂၊ ဇန်နဝါရီ ၁ ရက်ကစပြီး တစ်ကိုယ်ရေညီအစ်ကိုများအတွက် ကျမ်းစာသင်တန်းနဲ့ ခရစ်ယာန်မောင်နှံများအတွက် ကျမ်းစာသင်တန်းရဲ့ သင်တန်းဆင်းတချို့ကို ဝေးလံတဲ့ဒေသတွေမှာ ဟောပြောခြင်းလုပ်ငန်း စတင်ဖို့နဲ့ တိုးချဲ့ဖို့အတွက် ယာယီအထူးရှေ့ဆောင်တွေအဖြစ် တာဝန်ခန့်အပ်မှာဖြစ်တယ်။ သူတို့တွေက တစ်ကြိမ်တာဝန်ခန့်အပ်မှုမှာ တစ်နှစ်ကနေ သုံးနှစ်အထိ အမှုဆောင်ရမှာဖြစ်တယ်။ ထိရောက်စွာလုပ်ဆောင်နိုင်သူတွေကို ဆက်အသုံးပြုမှာဖြစ်တယ်။

၂၀၁၁ ခုနှစ် နှစ်ပတ်လည်စည်းဝေးက ပျော်ရွှင်ဖွယ်ရာအခါသမယ ဖြစ်ခဲ့တယ်။ ကိုယ်တော့်ကို ဂုဏ်တင်ချီးမွမ်းမှုဖြစ်စေတဲ့ ကျွန်ုပ်တို့ရဲ့ဟောပြောခြင်းလုပ်ငန်းကို အရှိန်မြှင့်လုပ်ဆောင်နိုင်ဖို့နဲ့ ညီအစ်ကိုအသင်းအပင်းကို ပိုပြီးစည်းလုံးစေဖို့ ကျွန်ုပ်တို့ရဲ့အစီအစဉ်အသစ်တွေကို ယေဟောဝါကောင်းချီးပေးဖို့ မျှော်လင့်နေကြပါတယ်။

[စာမျက်နှာ ၁၈၊ ၁၉ ပါ လေးထောင့်ကွက်၊ ရုပ်ပုံများ]

သူတို့အကြောင်း ပိုသိရ

ဒီအစဉ်အစဉ်က ကွယ်လွန်သွားတဲ့ အုပ်ချုပ်ရေးအဖွဲ့ဝင်ကိုးဦးရဲ့ ဇနီးသည်တွေထဲက ငါးဦးကို လူတွေ့မေးမြန်းတဲ့အစီအစဉ်ဖြစ်တယ်။ ညီအစ်မ မာရီးနာ ဆစ်ဒလစ်၊ အိဒက်သ် စူတာ၊ မယ်လီတာ ဂျဲရက်စ်၊ မယ်လ်ဘာ ဘယ်ရီနဲ့ ဆစ်ဒနီ ဘာဘာတို့က အမှန်တရားကို ဘယ်လိုသင်ယူခဲ့ရတယ်၊ အချိန်ပြည့်လုပ်ငန်းကို ဘယ်လိုဝင်ရောက်လာတယ်ဆိုတာကို ပြောပြခဲ့တယ်။ တစ်ဦးစီက မမေ့ပျောက်နိုင်တဲ့ အမှတ်ရစရာတွေ၊ သူတို့ခင်ပွန်းတွေရဲ့ အရည်အချင်းကောင်းတွေနဲ့ အိမ်ထောင်ဖက်နဲ့အတူ ခံစားခဲ့ရတဲ့ ကောင်းချီးတွေအကြောင်း ပရိသတ်ကို ဝေမျှခဲ့တယ်။ ဒီလူတွေ့မေးမြန်းခန်းတွေကို နိဂုံးချုပ်တဲ့အခါ ပရိသတ်က “သစ္စာရှိအမျိုးသမီးများ၊ ခရစ်ယာန်ညီအစ်မများ” လို့ ခေါင်းစဉ်ရှိတဲ့ သီချင်းနံပါတ် ၈၆ ကိုသီဆိုခဲ့ကြတယ်။

[ရုပ်ပုံများ]

(ထိပ်) ဒန်နီယယ်နဲ့ မာရီးနာ ဆစ်ဒလစ်ခ်၊ ဂရန့်နဲ့ အိဒက်သ် စူတာ၊ သီအိုဒေါရ် နဲ့ မယ်လီတာ ဂျဲရက်စ်

(အောက်) လွိုက် နဲ့ မဲလ်ဘာ ဘယ်ရီ၊ ကယ်ရီနဲ့ ဆစ်ဒနီ ဘာဘာ

[စာမျက်နှာ ၁၆ ပါ မြေပုံ]

(ကားချပ်အပြည့်အစုံကို စာစောင်တွင်ကြည့်ပါ)

မက္ကဆီကိုဌာနခွဲရုံးရဲ့ ညွှန်ကြားမှုအောက်မှာ ဌာနခွဲခြောက်ခုကို ပေါင်းစည်းခဲ့

မက္ကဆီကို

ဂွါတီမာလာ

ဟွန်ဒူးရပ်စ်

အယ်ဆာဗေးဒေါ

နီကာရာဂွါ

ကော့စ်တာရီကာ

ပနားမား

[စာမျက်နှာ ၁၇ ပါ ရုပ်ပုံ]

နယူးယောက်၊ ဝါးရစ်ခ်မှာတည်ဆောက်မယ့် ယေဟောဝါသက်သေတွေရဲ့ ကမ္ဘာ့ဌာနချုပ် ပုံစံငယ်