အမည်တစ်ခု၏ နောက်ကွယ်တွင် ရှိသောအရာ

အီသီယိုးပီးယားအမျိုးသမီးတစ်ဦးသည် သားယောက်ျားလေးတစ်ဦးကို မွေးဖွား လိုက်၏။ သို့သော် ကလေးသည် မလှုပ်မယှက်ဖြစ်နေကြောင်း တွေ့သောအခါ သူ၏ ဝမ်းသာမှုမှာ ဝမ်းနည်းမှုအဖြစ် ပြောင်းလဲသွားသည်။ သို့သော် ကလေး၏အဘွားသည် ပျော့အိနေသော ကလေး၏ခန္ဓာကိုယ်ကို ရေချိုးပေးလိုက်သောအခါ ကလေးမှာ ရုတ်တရက်လှုပ်ရှားလိုက်ပြီး အသက်ရှူလာကာ ထငိုလေတော့သည်။ ကလေးအဖေ၏အမည်မှာ “အံ့ဖွယ်အမှု” ဟုအဓိပ္ပာယ်ရှိသည်။ ထိုအမည်ကို အခြားအမ်ဟာရစ်စကား တစ်လုံး ဖြည့်စွက်ကာ အံ့ဖွယ်အမှုဖြစ်လေပြီဟုအဓိပ္ပာယ်ရှိသောအမည်ဖြင့် ကလေးကိုမှည့်ခေါ်လေသည်။

ဘရွန်ဒီနိုင်ငံတွင် လူငယ်တစ်ဦးသည် မိမိကိုသတ်လိုသည့်စစ်သားများလက်မှ ထွက်ပြေးနေရသည်။ လယ်ကွင်းတစ်ခုတွင် ပုန်းနေစဉ် သူက မိမိကို ဘုရားသခင်ကယ်တင်လျှင် မိမိ၏သားဦးကို “ဘုရားသခင်သည် ကယ်တင်ရှင်ဖြစ်၏” ဟုအဓိပ္ပာယ်ရှိသော မာနီရာကီဇာဟုမှည့်ခေါ်မည်ဟု ကတိပြုလေ၏။ သူသည် လွတ်မြောက်သွားပြီး နောက်ငါးနှစ်အကြာတွင် သူ၏သားဦးကို ထိုအမည်ဖြင့်မှည့်ခေါ်လေ၏။

သတ်သတ်မှတ်မှတ်အဓိပ္ပာယ်ရှိသောအမည်ဖြင့် ကလေးများကို အမည်ပေးခြင်းမှာ အချို့အတွက် ထူးဆန်းမည်ဖြစ်သော်လည်း ယင်းဓလေ့သည် ရှေးအချိန်မှ မြစ်ဖျားခံပါသည်။ အမှန်မှာ ကျမ်းစာတွင် ထိုသို့သောအမည်များ ရာနှင့်ချီ၍ရှိပါသည်။ လူပုဂ္ဂိုလ်အသီးသီး၏အမည်များ၏ အဓိပ္ပာယ်ကို သိရှိနားလည်ခြင်းက သင့်ကျမ်းစာဖတ်ရှုခြင်းကို ပို၍အကျိုးရှိစေပါလိမ့်မည်။ ဥပမာအချို့ကို သုံးသပ်ကြည့်ကြစို့။

ဟေဗြဲကျမ်းစာစောင်များမှ အဓိပ္ပာယ်ပြည့်ဝသောအမည်များ

ကျမ်းစာတွင်မှတ်တမ်းတင်ထားသော ဦးဆုံးအမည်များမှတစ်ခုမှာ “ခန့်ထားသော” ဟုအဓိပ္ပာယ်ရှိသည့် ရှေသဖြစ်သည်။ ရှေသ၏မိခင်ဧဝသည် ထိုအမည်ကို အဘယ်ကြောင့်ရွေးချယ်ရကြောင်း ဤသို့ဆို၏– “ကာဣနသတ်သောအာဗေလကိုယ်စား တစ်ပါးသောအနွယ်ကို အကျွန်ုပ်အဖို့ ဘုရားသခင်ခန့်ထားတော်မူပြီ။” (ကမ္ဘာဦး ၄:၂၅) ရှေသမှဆင်းသက်လာသူလာမက်သည် သူ၏သားကို “အနားယူခြင်း” သို့မဟုတ် “သက်သာစေခြင်း” ဟုအဓိပ္ပာယ်ရှိသည့်နောဧဟု မှည့်ခေါ်လေသည်။ ‘ဤသူသည်ကား ယေဟောဝါကျိန်တော်မူသောမြေ၌လုပ်၍ ပင်ပန်းစွာခံရသောငါတို့အား သက်သာစေ . . . လိမ့်မည်’ ဖြစ်သောကြောင့် သူ၏သားကို ထိုအမည်ပေးရခြင်းဖြစ်သည်ဟု လာမက်ပြောပြသည်။—ကမ္ဘာဦး ၅:၂၉။

တစ်စုံတစ်ခုကို ကြိုဟောရန် ဘုရားသခင်ကိုယ်တိုင် လူအချို့၏အမည်များကို ပြောင်းလဲခဲ့သည်။ ဥပမာ၊ “အဘသည် ချီးမြှောက်ခံရပြီ” ဟုအဓိပ္ပာယ်ရှိသော အာဗြံကို “လူမျိုးများစွာ၏အဘ” ဟုအဓိပ္ပာယ်ရှိသောအာဗြဟံဟု ဘုရားသခင်ပြောင်းလဲပေးခဲ့သည်။ အာဗြဟံသည် သူ၏အမည်အတိုင်း လူအမျိုးအနွယ်များစွာ၏ဖခင်ဖြစ်လာသည်။ (ကမ္ဘာဦး ၁၇:၅၊ ၆) အာဗြဟံ၏ဇနီးစာရဲကိုလည်း သုံးသပ်ကြည့်ပါ။ သူ၏အမည်မှာ “ရန်လိုခြင်း” ဟုအဓိပ္ပာယ်ရှိနိုင်သည်။ ဘုရားသခင်သည် သူ့ကို “မင်းသမီး” ဟုအဓိပ္ပာယ်ရှိသည့် “စာရာ” ဟုအမည်ပြောင်းပေးလိုက်ချိန်တွင် သူအလွန်ပျော်မည်ပင်။ ထိုအမည်အတိုင်း သူသည် ဘုရင်တို့၏ဘေးမတစ်ဦးဖြစ်လာခဲ့သည်။—ကမ္ဘာဦး ၁၇:၁၅၊ ၁၆။

ကလေးအချို့၏အမည်ကိုလည်း ဘုရားသခင်ရွေးပေးခဲ့သည်။ ဥပမာ၊ ကိုယ်တော်သည် အာဗြဟံနှင့်စာရာအား သူတို့၏သားကို “ရယ်မောခြင်း” ဟုအဓိပ္ပာယ်ရှိသည့် ဣဇာက်ဟုအမည်ပေးရန် မိန့်မှာခဲ့သည်။ ၎င်းအမည်ကြောင့် ထိုသစ္စာရှိမောင်နှံသည် ဇရာအရွယ်တွင် သားတစ်ဦးရမည်ဟူသော သတင်းကြားချိန်၌ မိမိတို့တုံ့ပြန်ခဲ့ပုံကို အစဉ်အမှတ်ရပါလိမ့်မည်။ အာဗြဟံနှင့်စာရာသည်  ဘုရားသခင်၏ သစ္စာရှိကျေးကျွန်တစ်ဦးအဖြစ် ကြီးပြင်းလာသော ချစ်လှစွာသောသားဣဇာက်နှင့်အတူ နေထိုင်စဉ် ထိုအမည်သည် သူတို့ကိုဆက်၍ပျော်ရွှင်ရယ်မောမှုများ ဆောင်ကြဉ်းပေးခဲ့မည်မှာ မလွဲဧကန်ပင်။—ကမ္ဘာဦး ၁၇:၁၇၊ ၁၉; ၁၈:၁၂၊ ၁၅; ၂၁:၆။

ဣဇာက်၏ချွေးမရာခေလသည် သူ၏သားအငယ်ဆုံးကို အလွန်ထူးခြားသောအမည်တစ်ခုမှည့်ခဲ့၏။ ရာခေလသည် သေအံ့ဆဲဆဲအချိန်တွင် ထိုသားကို “ငါ့ညည်းတွားမြည်တမ်းခြင်း၏သား” ဟုအဓိပ္ပာယ်ရှိသည့် ဗေနောနိအမည်ဖြင့်မှည့်လေ၏။ ပူဆွေးကျန်ရစ်သူ ခင်ပွန်းယာကုပ်သည် နောက်ပိုင်းတွင် ထိုအမည်ကို “ညာလက်ရုံး၏သား” ဟုအဓိပ္ပာယ်ရှိသော ဗင်ယာမိန်ဟု မသိမသာပြောင်းလဲပေးလိုက်သည်။ ထိုအမည်သည် မျက်နှာသာရအနေအထားကိုသာမက ထောက်မကူညီပေးမည့်အခြေအနေကိုလည်း ဖော်ပြနေသည်။—ကမ္ဘာဦး ၃၅:၁၆-၁၉; ၄၄:၂၀။

လူတစ်ဦး၏အင်္ဂါရုပ်ကို အခြေခံ၍လည်း အမည်ပေးလေ့ရှိသည်။ ဥပမာ၊ ဣဇာက်နှင့်ရေဗက္ကသည် တစ်ကိုယ်လုံးတွင် သိုးမွေးထည်တမျှထူသော အမွေးနီများအပြည့်ပါသည့်သားတစ်ဦး မွေးဖွားသောကြောင့် သူ့ကို ဧသောဟုအမည်ပေးခဲ့ကြသည်။ အဘယ်ကြောင့်နည်း။ ထိုဟေဗြဲအမည်မှာ “အမွေးအမျှင်ထူသော” ဟုအဓိပ္ပာယ်ရှိ၍ဖြစ်သည်။ (ကမ္ဘာဦး ၂၅:၂၅) ရုသဝတ္ထုတွင်မှတ်တမ်းတင်ထားသည့်အတိုင်း နောမိတွင် သားနှစ်ဦးရှိသည်။ တစ်ဦးမှာ “ချူချာသော၊ မကျန်းမမာသော” ဟုအဓိပ္ပာယ်ရသည့် မဟာလုန်ဖြစ်ပြီး နောက်တစ်ဦးမှာ “အားနည်းချည့်နဲ့သော” ဟုအဓိပ္ပာယ်ရသည့် ခိလျုန်ဖြစ်သည်။ ထိုအမည်များကို မွေးဖွားချိန်တွင် မှည့်ခြင်းလော၊ နောက်ပိုင်းမှ မှည့်ခေါ်ခြင်းလောဆိုသည်ကို မသိရသော်လည်း ထိုလူငယ်နှစ်ဦး အကြွေစောသည်ကိုကြည့်လျှင် ၎င်းအမည်များမှာ သင့်လျော်ပုံရသည်။—ရုသ ၁:၅။

ရေပန်းစားသော နောက်ဓလေ့တစ်ခုမှာ အမည်ပြောင်းခြင်းဖြစ်သည်။ ခင်ပွန်းနှင့်သားများ ဆုံးပါးပြီးနောက် ဆင်းရဲနွမ်းပါးကာ ဗက်လင်မြို့သို့ပြန်ရောက်လာသော နောမိသည် “ကျွန်ုပ်၏သာယာခြင်း” ဟုအဓိပ္ပာယ်ရှိသည့် ထိုအမည်ဖြင့် အခေါ်မခံလိုတော့ပေ။ ထို့ကြောင့် ‘နောမိဟူ၍မခေါ်ပါနှင့်။ [“ခါးသီးခြင်း” ဟုအဓိပ္ပာယ်ရှိသော] မာရဟူ၍ခေါ်ပါ။ အတိုင်းအဆမဲ့တန်ခိုးရှင်သည် ငါ့အား အလွန်ခါးသောအရာကိုပေးတော်မူပြီ’ ဟုသူဆိုခဲ့သည်။—ရုသ ၁:၂၀၊ ၂၁။

နောက်ဓလေ့တစ်ခုမှာ ထူးခြားသောအဖြစ်အပျက်တစ်ခုကို ဂုဏ်ပြုသောအားဖြင့် ကလေးကို အမည်ပေးခြင်းဖြစ်သည်။ ဥပမာ၊ ပရောဖက်ဟဂ္ဂဲ၏အမည်သည် “ပွဲခံချိန်၌မွေးဖွားသည်” ဟုအဓိပ္ပာယ်ရှိသည်။ *

ခရစ်ယာန်ခေတ်မှ ထူးခြားသောအမည်များ

ယေရှု၏အမည်သည် အလွန်လေးနက်သောအဓိပ္ပာယ်ရှိ၏။ ကိုယ်တော်မဖွားမြင်မီကပင် ကိုယ်တော်၏မိဘများအား “ထိုသားကို [“ယေဟောဝါသည် ကယ်တင်ခြင်းဖြစ်၏” ဟုအဓိပ္ပာယ်ရှိသော] ယေရှုဟု အမည်ပေးရမည်” ဟုကောင်းကင်တမန်တစ်ပါးမှတစ်ဆင့် ဘုရားသခင်မိန့်မှာပြီးဖြစ်သည်။ အဘယ်ကြောင့် နည်း။ “ထိုသူသည် သူ၏လူမျိုးကို အပြစ်တရားမှ ကယ်တင်လိမ့်မည်” ဟုကောင်းကင်တမန်က ယောသပ်ကိုဆို၏။ (မဿဲ ၁:၂၁) ယေရှုနှစ်ခြင်းခံချိန်၌ သန့်ရှင်းသောစွမ်းအားတော်ဖြင့် ဘိသိက်ပေးခံရပြီးနောက် ကိုယ်တော်၏အမည်တွင် “မေရှိယ” ဟူသောဟေဗြဲအမည် ထပ်ဆင့်လိုက်ပါလာသည်။ ထိုအမည်မှာ ဂရိစကားဖြင့် “ခရစ်တော်” ဖြစ်သည်။ ထိုအမည်နှစ်ခုစလုံးမှာ “ဘိသိက်ပေးခံရသူ” ဟုအဓိပ္ပာယ်ရှိသည်။—မဿဲ ၂:၄။

ယေရှုကိုယ်တိုင် မိမိတပည့်အချို့၏စရိုက်များနှင့်လိုက်ဖက်သည့် အမည်များကို ရွေးပေးခဲ့သည်။ ဥပမာ၊ ကိုယ်တော်သည် ရှိမုန်ကို “ကျောက်” ဟုအဓိပ္ပာယ်ရှိသည့် ကေဖဟူသော ဆီးမိုက်အမည်ပေးခဲ့သည်။ ကေဖဟုအဓိပ္ပာယ်ရှိသော ဂရိစကားလုံးမှာ “ပေတရု” ဖြစ်ပြီး ထိုအမည်ဖြင့် သူ့ကိုကောင်းစွာသိလာကြသည်။ (ယောဟန် ၁:၄၂) ထို့ပြင် ယေရှုသည် ဇွဲရှိသောညီအစ်ကိုနှစ်ဦးဖြစ်သည့် ယာကုပ်နှင့်ယောဟန်ကို “မိုးကြိုးသားများ” ဟုအနက်ရှိသည့် “ဗောနေရဂက်” ဟုခေါ်ခဲ့သည်။—မာကု ၃:၁၆၊ ၁၇။

ယေရှု၏တပည့်များလည်း သင့်လျော်သည့်အမည်ပေးသည့်ဓလေ့ကို ဆက်ကျင့်သုံးခဲ့ကြသည်။ ဥပမာတစ်ခုမှာ တမန်တော်များသည် တပည့်တစ်ဦးဖြစ်သူယောသပ်ကို “သက်သာစေခြင်း၏သား” ဟုအနက်ရှိသည့် ဗာနဗဟုအမည်ပေးကြသည်။ ဗာနဗသည် လူများစွာအား ရုပ်ပိုင်းနှင့်ဝိညာဉ်ရေးပိုင်းတွင် သက်သာမှုပေးခြင်းဖြင့် ထိုအမည်နှင့်အညီ အသက်ရှင်ခဲ့သည်။—တမန်တော် ၄:၃၄-၃၇; ၉:၂၇; ၁၅:၂၅၊ ၂၆။

သင့်အမည်၏အရေးပါမှု

ကျွန်ုပ်တို့မွေးဖွားချိန်တွင် ကျွန်ုပ်တို့အားမှည့်ခေါ်သောအမည်ကို ကိုယ်တိုင်ရွေးချယ်ထားခြင်းမဟုတ်ပါ။ သို့သော် ကျွန်ုပ်တို့ရရှိသည့်နာမည်သတင်းမှာမူ ကျွန်ုပ်တို့ပေါ်တွင်သာ မူတည်သည်။ (သု. ၂၀:၁၁) ထို့ကြောင့် ‘ယေရှု ဒါမှမဟုတ် တမန်တော်တွေသာရှိမယ်ဆိုရင် ငါ့ကို ဘယ်လိုနာမည်မျိုး ပေးမလဲ။ ဘယ်နာမည်မျိုးက ငါ့ရဲ့ထင်ပေါ်တဲ့အရည်အသွေး ဒါမှမဟုတ် ငါ့ဂုဏ်သတင်းကို ကောင်းကောင်းဖော်ပြမလဲ’ ဟုသင့်ကိုယ်သင်မေးကြည့်ပါ။

ထိုမေးခွန်းများကို ကောင်းစွာသုံးသပ်သင့်သည်။ အဘယ်ကြောင့်နည်း။ “ကောင်းသော [“အမည်၊” ကဘ] ကို များစွာသောဥစ္စာထက် သာ၍ရွေးစရာကောင်း၏” ဟုပညာရှိဘုရင်ရှောလမုန်ရေးခဲ့သောကြောင့်ဖြစ်သည်။ (သု. ၂၂:၁) ရပ်ကွက်တွင် ကျွန်ုပ်တို့ နာမည်ကောင်းရှိခြင်းက အလွန်အကျိုးရှိသည်။ သို့သော် ပို၍အရေးကြီးသည်ကား ဘုရားသခင်ရှေ့တွင် ကျွန်ုပ်တို့နာမည်ကောင်းရှိပါက ထာဝရဘဏ္ဍာကို ကျွန်ုပ်တို့ရရှိပါလိမ့်မည်။ အဘယ်ကြောင့်နည်း။ မိမိအားကြောက်ရွံ့သူတို့ကို “စာရင်း” ၌မှတ်သားပြီး ထာဝရအသက်ရှင်ခွင့်အလားအလာကို ပေးမည်ဟု ဘုရားသခင်ကတိပြုထားသောကြောင့်ပင်ဖြစ်သည်။—မာလခိ ၃:၁၆; ဗျာ. ၃:၅; ၂၀:၁၂-၁၅။

[အောက်ခြေမှတ်ချက်]

[စာမျက်နှာ ၁၅ ပါ အကျဉ်းဖော်ပြချက်]

ဘယ်နာမည်မျိုးက ငါ့ဂုဏ်သတင်းကို ကောင်းကောင်းဖော်ပြမလဲ

[စာမျက်နှာ ၁၅ ပါ လေးထောင့်ကွက်/ ရုပ်ပုံ]

ဧမာနွေလကား မည်သူနည်း

ကျမ်းစာပါ ပုဂ္ဂိုလ်အချို့၏အမည်များသည် အနာဂတ်တွင်ဖြစ်မည့်အရာကို ကြိုဖော်ပြပြီး သူတို့ထမ်းဆောင်မည့်လုပ်ငန်းကိုလည်း ဖော်ပြသည်။ ဥပမာ၊ “ကြည့်ရှုလော့။ သတို့သမီးကညာသည် ပဋိသန္ဓေစွဲယူ၍ သားယောက်ျားကိုဖွားမြင်လတ္တံ့။ ထိုသားကို ဧမာနွေလအမည်ဖြင့် မှည့်ရလတ္တံ့” ဟုရေးရန် ပရောဖက်ဟေရှာယကို ဘုရားသခင်ညွှန်ကြားသည်။ (ဟေရှာယ ၇:၁၄) ထိုအမည်မှာ “ဘုရားသခင်သည် ငါတို့နှင့်အတူ ရှိတော်မူ၏” ဟုအဓိပ္ပာယ်ရှိသည်။ ထိုပရောဖက်ပြုချက်၏ ဦးဆုံးပြည့်စုံမှုသည် အစ္စရေးဘုရင်တစ်ပါး သို့မဟုတ် ဟေရှာယ၏သားနှင့် ဆက်နွှယ်မှုရှိသည်ဟု ကျမ်းပညာရှင်အချို့ဆို၏။ သို့သော် ဟေရှာယ၏ပရောဖက်ပြုချက်သည် ယေရှုတွင် အကြွင်းမဲ့ပြည့်စုံကြောင်း ခရစ်ဝင်ကျမ်းရေးသူမဿဲထောက်ပြသည်။—မဿဲ ၁:၂၂၊ ၂၃။

ဧမာနွေလဟူသောအမည်သည် ယေရှုနှင့်သက်ဆိုင်လျှင် ယေရှုသည် ဘုရားသခင်ဖြစ်သည်ဟု ကျမ်းစာသွန်သင်နေခြင်းဖြစ်ကြောင်း အချို့ဆို၏။ သို့သော် ထိုသို့ကောက်ချက်ချပါက ယောဘကို နှစ်သိမ့်ကာ တည့်မတ်ပေးခဲ့သောလူငယ်ဧလိဟုသည်လည်း ဘုရားသခင်ဖြစ်သွားသည်။ အဘယ်ကြောင့်နည်း။ သူ၏အမည်မှာ “သူသည် ငါ၏ဘုရားသခင်ဖြစ်၏” ဟုအဓိပ္ပာယ်ရှိသောကြောင့်ဖြစ်သည်။

ယေရှုသည် မိမိကိုယ်ကိုဘုရားသခင်အဖြစ် တစ်ခါမျှ မမိန့်ဆိုခဲ့ပါ။ (ယောဟန် ၁၄:၂၈; ဖိလိပ္ပိ ၂:၅၊ ၆) သို့သော် ကိုယ်တော်သည် မိမိခမည်းတော်၏အရည်အသွေးများကို အပြည့်ဝဆုံးထင်ဟပ်ခဲ့ပြီး မေရှိယနှင့်ပတ်သက်သည့် ဘုရားသခင်၏ကတိအားလုံးကို ပြည့်စုံစေခဲ့သည်။ (ယောဟန် ၁၄:၉; ၂ ကောရိန္သု ၁:၂၀) ထို့ကြောင့် ဧမာနွေလဟူသောအမည်သည် မိမိကိုဝတ်ပြုများနှင့်အတူ ဘုရားသခင်ရှိကြောင်း သက်သေထူသူ၊ ဒါဝိဒ်မှဆင်းသက်လာသည့်မျိုးနွယ်ဖြစ်သူ မေရှိယအဖြစ် ယေရှု၏အခန်းကဏ္ဍကို ကောင်းစွာဖော်ပြပါသည်။

[ရုပ်ပုံ]

ဧမာနွေလ “ဘုရားသခင်သည် ငါတို့နှင့်အတူ ရှိတော်မူ၏”

[စာမျက်နှာ ၁၅ ပါ လေးထောင့်ကွက်/ ရုပ်ပုံ]

အထူးခြားဆုံးအမည်နာမ

ဘုရားသခင်၏နာမတော်သည် မူရင်းကျမ်းစာတစ်အုပ်လုံးတွင် အကြိမ်ပေါင်း ၇,၀၀၀ ခန့်ပါရှိသည်။ ဤဟေဗြဲအက္ခရာ יהוה လေးလုံးသည် ထိုနာမတော်ကိုကိုယ်စားပြုပြီး ယင်းကို မြန်မာဘာသာစကားဖြင့် “ယေဟောဝါ” ဟုပြန်ဆိုလေ့ရှိသည်။ ထိုနာမတော်၏ထူးခြားချက်ကား အဘယ်နည်း။ မောရှေသည် ယေဟောဝါအား ကိုယ်တော်၏နာမတော်အကြောင်း မေးသောအခါ ကိုယ်တော်က “ငါဖြစ်လိုသမျှအတိုင်း ငါဖြစ်မည်” ဟုပြန်မိန့်ကြားခဲ့သည်။ (ထွက်မြောက်ရာ ၃:၁၄၊ ကဘ) ထို့ကြောင့် ဘုရားသခင်၏နာမတော်က ဘုရားသခင်သည် မိမိရည်ရွယ်ချက်များ ပြည့်စုံလာရန် လိုအပ်သမျှအတိုင်းဖြစ်လာမည်ဆိုသည်ကို အာမခံသည်။ (ဟေရှာယ ၅၅:၈-၁၁) ထို့ကြောင့် ဘုရားသခင်ပေးသောကတိကို အပြည့်အဝယုံကြည်နိုင်ပြီး ယင်းနှင့်အညီအသက်ရှင်နိုင်သည်။ အဘယ်ကြောင့်နည်း။ ကိုယ်တော်၏နာမတော်မှာ “ငါဖြစ်လိုသမျှအတိုင်း ငါဖြစ်မည်” ဟုအဓိပ္ပာယ်ရှိသည့် ယေဟောဝါဖြစ်သောကြောင့်တည်း။

[စာမျက်နှာ ၁၃ ပါ ရုပ်ပုံ]

အာဗြဟံ “လူမျိုးများစွာ၏ အဘ”

[စာမျက်နှာ ၁၃ ပါ ရုပ်ပုံ]

စာရာ “မင်းသမီး”