သင် သိပါသလား

တမန်တော်ပေါလုကို ဘယ် ‘တရားစီရင်တဲ့နေရာ’ ဆီ ခေါ်ဆောင်သွားခဲ့တာလဲ။

▪ တမန်တော်ပေါလုဟာ လူတွေကို ဘာသာပြောင်းဖို့ အတင်းအကျပ်လုပ်နေတယ်လို့ ကောရိန္သုမြို့မှာရှိတဲ့ ဂျူးတွေက စွပ်စွဲပြီး သူ့ကို တရားစီရင်ဖို့ ဗီမာ (ဂရိစကားလုံးဖြစ်ပြီး “လှေကားထစ်” လို့အဓိပ္ပာယ်ရ) လို့ခေါ်တဲ့ [‘တရားစီရင်ရာနေရာ’] ရှေ့ ခေါ်ဆောင်သွားကြတယ်ဆိုပြီး တမန်တော် ၁၈:၁၂၊ ၁၃ မှာ ဖော်ပြထားပါတယ်။ ရှေးခေတ်က ကောရိန္သုမြို့မှာ မြင့်မားတဲ့ လဟာပြင်စင်မြင့်တစ်ခု ရှိတယ်။ အဲဒီစင်မြင့်က လူအများ တွေ့ဆုံရာ ဈေးတစ်ခုရဲ့အလယ်မှာရှိပြီး မလှမ်းမကမ်းမှာ ဂျူးတွေရဲ့ တရားဟောရာနေရာ ရှိတတ်တယ်။ အဲဒီစင်မြင့်ကို ထားရတဲ့ ရည်ရွယ်ချက်က ပရိသတ်တွေကို စကားပြောတဲ့အခါ အသုံးပြုဖို့ ဖြစ်တယ်။ အပြာရောင်နဲ့အဖြူရောင် ကျောက်သားတွေနဲ့ တည်ဆောက်ထားပြီး အနုစိတ်တဲ့ ပန်းပုလက်ရာတွေနဲ့ ခမ်းနားလှပစွာ တန်ဆာဆင်ထားတဲ့ စင်မြင့်အနားမှာ နားနေခန်း နှစ်ခန်းရှိတယ်။ အဲဒီအခန်းတွေမှာ ရောင်စုံကျောက်တွေနဲ့ စီခြယ်ထားတဲ့ ကြမ်းပြင်ရှိပြီး ကျောက်သားခုံတန်းရှည်တွေလည်း ရှိတယ်။

အဲဒီစင်မြင့်ဟာ [တရားစီရင်ရာနေရာ] လည်း ဖြစ်ပုံရပါတယ်။ အဲဒီနေရာက တမန်တော်ပေါလု အခါယပြည်ရဲ့ ရောမနယ်စားမင်း ဂါလျုန်ရှေ့မှောက် ခေါ်ဆောင်သွားခံခဲ့ရတဲ့နေရာ ဖြစ်တယ်။ အဲဒီနေရာမှာ ရုံးထိုင်အာဏာပိုင်တွေဟာ အမှုအခင်းတွေကို ကြားနာစစ်ဆေးပြီး သူတို့ရဲ့တရားရေးဆုံးဖြတ်ချက်တွေကို စုဝေးရောက်ရှိနေတဲ့ လူအုပ်ကြားသိအောင် ကြေညာပေးကြတယ်။

ဂရိအင်ပါယာအတွင်းရှိ မြို့တွေမှာ လူတွေဟာ စီးပွားရေးကိစ္စမှန်သမျှ ဆောင်ရွက်ဖို့အတွက် စင်မြင့် (ဗီမာ) ရှေ့မှာ တွေ့ဆုံကြတာက သာမန်ပဲ ဖြစ်ပါတယ်။ ဂရိဘာသာစကားနဲ့ရေးထားတဲ့ မဿဲ ၂၇:၁၉ နဲ့ ယောဟန် ၁၉:၁၃ က ယေရှုကို ရုံးတင်စစ်ဆေးခြင်းမှတ်တမ်းမှာ ရောမဘုရင်ခံ ပုန္တိပိလတ်ဟာ လူအုပ်ကို သူ့ရဲ့စင်မြင့် (ဗီမာ) ကနေ စကားပြောခဲ့တယ်လို့ ဖော်ပြထားတယ်။—တမန်တော် ၁၂:၂၁။

ယေရှုရဲ့သေဆုံးပုံက ဂျူးတချို့ကို ဘာကြောင့် ခရစ်ယာန်မဖြစ်လာစေတာလဲ။

▪ အစောပိုင်းခရစ်ယာန်တွေနဲ့ပတ်သက်ပြီး တမန်တော်ပေါလု ဒီလိုဖော်ပြခဲ့တယ်– “ငါတို့မူကား သစ်တိုင်မှာ အတင်ခံခဲ့ရသော ခရစ်တော်၏အကြောင်းကို ဟောပြောကြ၏။ ထိုအကြောင်းအရာသည် ဂျူးတို့အတွက် တိုက်မိ၍ လဲစရာအကြောင်း ဖြစ်၏။ လူမျိုးခြားတို့အတွက်မူကား မိုက်မဲခြင်းဖြစ်၏။” (၁ ကောရိန္သု ၁:၂၃) ယေရှုရဲ့သေဆုံးပုံက ဂျူးတချို့ကို ဘာကြောင့် ခရစ်ယာန် မဖြစ်လာစေတာလဲ။

ယေရှုရဲ့သေဆုံးပုံနဲ့ ပထမရာစုက အရှေ့အလယ်ပိုင်းဒေသမှာ နေထိုင်တဲ့သူတွေရဲ့ ဓလေ့ထုံးစံနဲ့ပတ်သက်ပြီး “အဲဒီခေတ်မှာ ရှက်စရာအကောင်းဆုံးနည်းနဲ့ သေဆုံးခြင်း ဖြစ်တယ်။ ကိုယ့်ယုံကြည်ချက်အတွက် အသေခံတဲ့ ဘယ်လိုသေဆုံးမှုမျိုးကိုမဆို ဂုဏ်ယူစရာအဖြစ် မရှုမြင်ကြဘူး” လို့ ကျမ်းစာအနက်ဖွင့်သူ ဘင် ဝှစ်သရင်တန် ၃ က ဆိုတယ်။ “လူတစ်ယောက်ဟာ ဘယ်လို လူစားမျိုးလဲဆိုတာကို သူ့ရဲ့သေဆုံးပုံက ဖော်ပြတယ်လို့ အဲဒီခေတ်က လူတွေ လက်ခံထားကြတယ်။ ဒါကြောင့် ယေရှုဟာ လူယုတ်မာ၊ နိုင်ငံတော် သစ္စာဖောက်၊ ပုန်ကန်တဲ့ကျေးကျွန်တွေကိုပေးတဲ့ ပြစ်ဒဏ်ကို ခံထိုက်တဲ့သူတစ်ယောက် ဖြစ်ရမယ်လို့ ထင်မှတ်ခဲ့ကြတယ်” ဆိုပြီး ဝှစ်သရင်တန်က ဆက်ပြောတယ်။ အဲဒီလိုနောက်ခံတွေကြောင့် အစောပိုင်းခရစ်ယာန်တွေဟာ ယေရှုရဲ့ သေဆုံးပုံ၊ ရှင်ပြန်ထမြောက်ခြင်းနဲ့ပတ်သက်တဲ့ ကျမ်းစာမှတ်တမ်းတွေကို လုပ်ဇာတ်ခင်းပြီး ရေးသားခဲ့ကြတယ်လို့ပြောတာ ယုတ္တိမရှိဘူး။