ကနေ့ ကမ္ဘာတစ်ဝန်းလုံးမှာ လူတွေဟာ ပြဿနာပေါင်းစုံနဲ့ ကြုံတွေ့နေရပါတယ်။ နိုင်ငံတချို့မှာ လူအများစုဟာ ဆင်းရဲနွမ်းပါးပြီး ဖိနှိပ်ခံနေရပါတယ်။ နိုင်ငံတချို့မှာကျတော့ လူအတော်များများဟာ လိုအပ်တာထက် ပိုပြီး ပြည့်စုံနေကြပုံရတယ်။ ဒါကြောင့် ကမ္ဘာတစ်ခုလုံးကို အုပ်ချုပ်မယ့် အစိုးရကသာ ကမ္ဘာ့သယံဇာတတွေကို မျှမျှတတ ခွဲဝေပေးနိုင်မှာဖြစ်တယ်။—ဒေသနာ ၄:၁; ၈:၉ ကိုဖတ်ပါ။

ဘယ်သူကမှ ကမ္ဘာကြီးကို အုပ်ချုပ်နိုင်မှာ မဟုတ်တဲ့အတွက် ကမ္ဘာ့အုပ်စိုးရှင်ဆိုတဲ့ အချက်ကို လူတော်တော်များများက လက်ခံကြမှာ မဟုတ်ဘူး။ ဘယ်သူကမှ လူတိုင်းရဲ့ နှစ်သက်လက်ခံမှုကို ရရှိမှာလည်း မဟုတ်ပါဘူး။ ဒါ့အပြင် လူတွေဟာ အခွင့်အာဏာ ရလာပြီဆိုရင် အကျင့်ပျက်တတ်ကြတယ်။ ဒါကြောင့် တစ်ယောက်တည်းကပဲ အာဏာရှင်ဆန်ဆန် အုပ်ချုပ်မယ်ဆိုတဲ့ အယူအဆက မတွေးဝံ့စရာပဲ။—သုတ္တံ ၂၉:၂; ယေရမိ ၁၀:၂၃ တို့ကိုဖတ်ပါ။

ယေဟောဝါဘုရားသခင်ဟာ လူသားတွေကို ထာဝစဉ်အုပ်ချုပ်ဖို့ သားတော်ယေရှုကို ရွေးချယ်ထားပြီးပါပြီ။ (လုကာ ၁:၃၂၊ ၃၃) ယေရှုဟာ ကမ္ဘာမြေကြီးပေါ် အသက်ရှင်ခဲ့တုန်းက ဖျားနာတဲ့သူတွေကို ကုသပေးတယ်၊ စိတ်နှိမ့်ချတဲ့သူတွေကို သွန်သင်ပေးတယ်၊ ကလေးတွေကို အချိန်ပေးပြီး ပေါင်းသင်းတယ်။ (မာကု ၁:၄၀-၄၂; ၆:၃၄; ၁၀:၁၃-၁၆) ဒါကြောင့် လူသားတွေအတွက် အသင့်တော်ဆုံး အုပ်စိုးရှင်က ယေရှုပဲဖြစ်ပါတယ်။ —ယောဟန် ၁:၁၄ ကိုဖတ်ပါ။

ကမ္ဘာမြေကြီးကို ကောင်းကင်ကနေ အုပ်ချုပ်ဖို့ သားတော်ယေရှုကို ဘုရင်အဖြစ် ဘုရားသခင် ခန့်အပ်ပြီးပါပြီ။ (ဒံယေလ ၇:၁၃၊ ၁၄) လူ့အုပ်စိုးရှင်တစ်ယောက်ဟာ နေရာတကာ သွားပြီး အုပ်ချုပ်မှာ မဟုတ်သလို ယေရှုကလည်း လူသားတွေကို အုပ်ချုပ်ဖို့ ကမ္ဘာပေါ် ရှိနေစရာ မလိုပါဘူး။—မဿဲ ၈:၅-၉၊ ၁၃ ကိုဖတ်ပါ။

ယေရှုကို အုပ်စိုးရှင်အဖြစ် လူတိုင်း လက်ခံကြမှာလား။ လက်ခံကြမှာ မဟုတ်ပါဘူး။ ကျမ်းစာမှာပါတဲ့ ဖြောင့်မတ်ခြင်းတရားကို သင်ယူတဲ့သူတွေကပဲ လက်ခံကြမှာဖြစ်တယ်။ ယေဟောဝါဘုရားသခင်ဟာ သူခန့်အပ်ထားတဲ့ မေတ္တာတရားရှိပြီး ဖြောင့်မတ်တဲ့ အုပ်စိုးရှင်ကို ငြင်းပယ်သူတိုင်းကို ကမ္ဘာပေါ်ကနေ ဖယ်ရှားပစ်ပါလိမ့်မယ်။—ဆာလံ ၃၇:၉-၁၁ ကိုဖတ်ပါ။

သိုးထိန်းတစ်ဦးဟာ သူပိုင်တဲ့သိုးတွေကို စုသိမ်းသလို ယေရှုလည်း နိုင်ငံအသီးသီးက စိတ်နှိမ့်ချတဲ့သူတွေကို စုသိမ်းပြီး ဘုရားသခင့်မေတ္တာပါလမ်းစဉ်ကို သွန်သင်ပေးနေပါတယ်။ (ယောဟန် ၁၀:၁၆; ၁၃:၃၄) အဲဒီလိုလူတွေဟာ ယေရှုနဲ့ သူ့ရဲ့အုပ်ချုပ်မှုကို ထက်ထက်သန်သန် ထောက်ခံတဲ့သူတွေ ဖြစ်လာကြပါတယ်။ (ဆာလံ ၇၂:၈; မဿဲ ၄:၁၉၊ ၂၀) ကမ္ဘာတစ်ဝန်းမှာ ယေရှုကို သစ္စာရှိရှိ လက်အောက်ခံနေတဲ့ သူတွေဟာ ယေရှု ဘုရင်ဖြစ်ပြီဆိုတဲ့အကြောင်း ကြေညာတဲ့လုပ်ငန်းမှာ အင်တိုက်အားတိုက် ပါဝင်နေကြပါတယ်။—မဿဲ ၂၄:၁၄ ကိုဖတ်ပါ။

မကြာခင်မှာ ယေရှုဟာ သူ့ရဲ့တန်ခိုးကို အသုံးပြုပြီး ယိုယွင်းနေတဲ့ အုပ်ချုပ်မှုအောက်ကနေ လူသားတွေကို လွတ်မြောက်စေပါတော့မယ်။ ယေရှုဟာ ကောင်းကင်မှာ သူနဲ့အတူ ဘုရင်အဖြစ် ကမ္ဘာမြေကြီးကို အုပ်ချုပ်ဖို့ သစ္စာရှိနောက်လိုက်တွေထဲက တချို့ကို ရွေးချယ်ထားပြီး ဖြစ်ပါတယ်။ (ဒံယေလ ၂:၄၄၊ ၄၅; ၇:၂၇) ယေရှုခရစ် အုပ်ချုပ်တဲ့အခါ ကမ္ဘာပေါ်မှာ ဘုရားသခင်နဲ့ဆိုင်တဲ့ အသိပညာ လွှမ်းမိုးသွားမှာ ဖြစ်တယ်၊ ပြီးတော့ လူ့သမိုင်းအစက ပျောက်ဆုံးသွားတဲ့ သာယာလှပတဲ့ မြေကြီးပရဒိသု ပြန်လည်ဖြစ်ပေါ်လာပါလိမ့်မယ်။—ဟေရှာယ ၁၁:၃၊ ၉; မဿဲ ၁၉:၂၈ တို့ကိုဖတ်ပါ။