အဓိကအကြောင်းရင်း နှစ်ခုကို သမ္မာကျမ်းစာမှာ ဖော်ပြထားပါတယ်။ ပထမ၊ လူသားတွေဟာ အံ့ဩစရာကောင်းတဲ့အရာတွေကို လုပ်ဆောင်နိုင်ပေမဲ့လည်း ကမ္ဘာ့ပြဿနာတွေကို ဖြေရှင်းနိုင်စွမ်းမရှိကြဘူး။ ဒုတိယ၊ “တစ်လောကလုံးသည် ဆိုးညစ်သူ” စာတန်မာရ်နတ်ရဲ့ “ဩဇာအောက်တွင် ရှိနေ” တဲ့အတွက် လူ့အကြံအစည်တွေက မအောင်မြင်ခဲ့ကြဘူး။ ဒါကြောင့် ကမ္ဘာ့ငြိမ်းချမ်းရေးရရှိအောင် လူတွေ မလုပ်ဆောင်နိုင်ကြပါဘူး။—ယေရမိ ၁၀:၂၃; ၁ ယောဟန် ၅:၁၉ တို့ကိုဖတ်ပါ။

လူတွေရဲ့ အတ္တစိတ်တွေ၊ ရည်မှန်းချက်ကြီးမှုတွေကြောင့်လည်း ကမ္ဘာ့ငြိမ်းချမ်းရေး မရရှိတာဖြစ်တယ်။ မှန်ရာကိုမြတ်နိုးပြီး အချင်းချင်း ချစ်ဖို့သင်ပေးနိုင်မယ့် ကမ္ဘာ့အစိုးရတစ်ခုကသာ ကမ္ဘာ့ငြိမ်းချမ်းရေးကို ဖော်ဆောင်ပေးနိုင်မှာဖြစ်တယ်။—ဟေရှာယ ၃၂:၁၇; ၄၈:၁၈၊ ၂၂ ကိုဖတ်ပါ။

လူသားအားလုံးကို အုပ်ချုပ်မယ့် အစိုးရတစ်ခုကို တည်ထောင်ပေးမယ်လို့ အနန္တတန်ခိုးရှင် ဘုရားသခင် ကတိပေးထားပါတယ်။ အဲဒီအစိုးရက လူ့အစိုးရတွေကို ဖယ်ရှားပါတော့မယ်။ (ဒံယေလ ၂:၄၄၊ ၄၅) ဘုရားသခင့်သားတော် ငြိမ်းချမ်းရေးမင်းသားဖြစ်တဲ့ ယေရှုဟာ ကမ္ဘာပေါ်ကနေ မကောင်းမှုအားလုံးကို ဖယ်ရှားပြီး လူသားတွေကို ငြိမ်းချမ်းရေးလမ်းစဉ် သင်ပေးပါလိမ့်မယ်။—ဟေရှာယ ၉:၆၊ ၇; ၁၁:၄၊ ၉ ကိုဖတ်ပါ။

အခု ယေရှုရဲ့ ညွှန်ကြားမှုအောက်မှာ ကမ္ဘာတစ်ဝန်းက သန်းနဲ့ချီတဲ့လူတွေဟာ သမ္မာကျမ်းစာကိုအသုံးပြုပြီး လူတွေကို သင့်မြတ်ငြိမ်းချမ်းစွာ နေထိုင်တတ်ဖို့ သင်ပေးနေပါပြီ။ မကြာခင် ကမ္ဘာ့ငြိမ်းချမ်းရေး အစစ်အမှန် ရရှိပါတော့မယ်။—ဟေရှာယ ၂:၃၊ ၄; ၅၄:၁၃ ကိုဖတ်ပါ။