ကမ္ဘာ​တစ်ဝန်းလုံးမှာ လူများစွာဟာ ယေဟောဝါသက်သေတွေ ထုတ်ဝေတဲ့ စာပေတွေကို ဖတ်ရှုကြ​ပါတယ်။ သန်းနဲ့ချီတဲ့​သူတွေကတော့ အခု သင်​ဖတ်ရှု​နေ​သလို အီလက်ထရောနစ် ပုံစံ​နဲ့ ဖတ်ရှုကြ​တယ်။ ဒါပေမဲ့ ကျွန်တော်တို့ရဲ့ ပုံနှိပ်​ထုတ်ဝေ​မှု အတိုင်းအတာကို သင် သိမယ်​ဆိုရင် အံ့သြ​သွားပါလိမ့်မယ်။ ၂၀၁၃ ခုနှစ်​က​စပြီး သမ္မာကျမ်းစာ​အခြေပြု စာပေတွေကို ဘာသာစကား ၇၀၀ နီးပါး​နဲ့ ပုံနှိပ်​ထုတ်ဝေ​ပြီး နိုင်ငံနဲ့ နယ်မြေ​ပေါင်း ၂၃၉ မှာ ဖြန့်ဝေ​ပါတယ်။

၁၉၂၀ ပြည့်နှစ် မတိုင်ခင်​တုန်း​ကတော့ အပြင်​ပုံနှိပ်​စက်​တွေ​မှာ​ပဲ ပုံနှိပ်​ခဲ့​ကြတယ်။ ၁၉၂၀ ပြည့်နှစ်​က​စပြီး မဂ္ဂဇင်း​တွေ​နဲ့ စာအုပ်​ငယ်​တချို့ကို နယူးယောက်၊ ဘရွတ်ကလင်​က ငှား​ထားတဲ့ အဆောက်အအုံ​ငယ်​လေးမှာ ရှိတဲ့ ကျွန်တော်တို့ရဲ့ ပုံနှိပ်​စက်​နဲ့ စ​ပုံနှိပ်​ခဲ့​ကြတယ်။ အဲဒါ​လေး​ကနေ စ​လိုက်တာ အခု​ဆိုရင် တောင်အမေရိက၊ မြောက်​အမေရိက၊ အာဖရိက၊ အာရှ၊ ဥရောပ​နဲ့ ဩစတြေးလျ​မှာ ပုံနှိပ်​စက်ရုံ ၁၅ ခု​နဲ့ လုပ်ဆောင်နေ​ကြပါ​ပြီ။

ကျွန်တော်တို့ ပုံနှိပ်​ထုတ်ဝေတဲ့ အရေး​အကြီးဆုံး စာအုပ်​ကတော့ သမ္မာကျမ်းစာ​ပါပဲ။ ၁၉၄၂ ခုနှစ်မှာ အင်္ဂလိပ်​ဘာသာစကားနဲ့ ဂျိမ်း​ဘုရင်​ဘာသာပြန်ကျမ်း​ကို ကျွန်တော်တို့ရဲ့​ပုံနှိပ်​စက်​နဲ့ ပထမဆုံး ပုံနှိပ်​ထုတ်ဝေ​ခဲ့​ပါတယ်။ ယေဟောဝါသက်သေတွေ ဘာသာပြန်​တဲ့ ကမ္ဘာသစ်​ဘာသာပြန်ကျမ်း​ကို တစ်အုပ်လုံး​အနေနဲ့ ၁၉၆၁ ခုနှစ်​ကနေ​စပြီး ပုံနှိပ်​ထုတ်ဝေ​ခဲ့​ပါတယ်။ ၂၀၁၃ ခုနှစ် ရောက်တဲ့အခါ ကမ္ဘာသစ်​ဘာသာပြန်ကျမ်း​ကို ဘာသာစကား ၁၂၁ မျိုးနဲ့ အုပ်ရေ ၁၈၄ သန်း​ကျော် ထုတ်ဝေ​ခဲ့​ပါပြီ။

ထုတ်ဝေတဲ့ စောင်ရေ များတဲ့​အပြင် ကျွန်တော်တို့ ပုံနှိပ်​ထုတ်ဝေတဲ့ ကျမ်းစာတွေ​ဟာ အလွန် ခိုင်ခံ့​ပါတယ်။ အက်​ဆစ် မပါတဲ့ စာရွက်​သားတွေ​ပေါ်မှာ ပုံနှိပ်​တဲ့​အတွက် စာရွက်​အရောင်​က အဝါရောင် မ​သန်း​ဘူး။ အလွန် ခိုင်ခံ့​စွာ ချုပ်​ထားလို့ နေ့တိုင်း အသုံးပြုသည့်​တိုင်အောင် တော​င့်​တောင့်တင်း​တင်း ဆက်ရှိ​နေခြင်း ဖြစ်တယ်။

သမ္မာကျမ်းစာကို နားလည်အောင် အကူအညီ​ပေးတဲ့ စာပေတွေကိုလည်း ပုံနှိပ်​ထုတ်ဝေ​ပါတယ်။ ၂၀၁၃ ခုနှစ်​နောက်ပိုင်း ပုံနှိပ်​ထုတ်ဝေ​ခဲ့​တဲ့ အရေအတွက်​တချို့ကို သုံးသပ်​ကြည့်ပါ–

• ကင်းမျှော်စင်​ဟာ ကျွန်တော်တို့ အဓိက ထုတ်ဝေတဲ့ စာစောင် ဖြစ်ပြီး ဘာသာစကား ၂၁၀ ကျော်နဲ့ ပုံနှိပ်​ထုတ်ဝေတဲ့​အတွက် ကမ္ဘာတစ်ခုလုံး​မှာ အ​ဖြန့်ဖြူး​ရ​ဆုံး မဂ္ဂဇင်း​ဖြစ်တယ်။ စာမျက်နှာ ၁၆ မျက်နှာ ပါတဲ့ ကင်းမျှော်စင် မဂ္ဂဇင်း​ကို လစဉ် စောင်ရေ​ပေါင်း ၄၅,၀၀၀,၀၀၀ ခန့် ပုံနှိပ်​ထုတ်ဝေ​ပါတယ်။

• ကင်းမျှော်စင် ရဲ့ တွဲဖက်​မဂ္ဂဇင်း ဖြစ်တဲ့ နိုးလော့! ကို ဒုတိယ​အများဆုံး ထုတ်ဝေ​ပါတယ်။ ဘာသာစကား ၉၉ မျိုးနဲ့ စောင်ရေ​ပေါင်း ၄၄,၀၀၀,၀၀၀ ခန့် ပုံနှိပ်​ပါတယ်။

• စာမျက်နှာ ၂၂၄ မျက်နှာ ရှိပြီး အဖုံး​အ​ပျော့​သားနဲ့ ပုံနှိပ်​ထုတ်ဝေတဲ့ သမ္မာကျမ်းစာ အမှန်တကယ် သွန်သင်ရာ​က ဘာလဲ စာအုပ်ကို စာဖတ်သူ​တွေ သမ္မာကျမ်းစာ အခြေခံ​သွန်သင်ချက်တွေကို အလွယ်တကူ နားလည်​သဘောပေါက်​အောင် ပြင်ဆင်​ပေးထား​တာ ဖြစ်တယ်။ ၂၀၀၅ ခုနှစ်မှာ စ​ထုတ်ဝေ​ခဲ့​တာ ဖြစ်ပြီး အခု​ဆိုရင် ဘာသာစကား ၂၄၀ နဲ့ အုပ်ရေ​ပေါင်း ၂၁၄ သန်း​ကျော် ပုံနှိပ်​ထုတ်ဝေ​ခဲ့​ပါပြီ။

• စာမျက်နှာ ၃၂ မျက်နှာ ရှိတဲ့ ဘုရားသခင့်​စကား နားထောင်ပါ စာစောင်​ကို စာကောင်းကောင်း မဖတ်​တတ်တဲ့​သူတွေ​အတွက် ပြင်ဆင်​ပေးထား​တာ ဖြစ်တယ်။ လှပတဲ့ ရုပ်ပုံတွေ၊ ရုပ်ပုံ​နဲ့​ပတ်သက်ပြီး တိုတိုတုတ်တုတ် ရှင်းပြချက်​တွေ​နဲ့ ကျမ်းစာ​အမှန်တရားကို ရိုးရိုးရှင်းရှင်း တင်ဆက်​ထားပါ​တယ်။ ဘာသာစကား ၄၀၀ ကျော်နဲ့ စောင်ရေ​ပေါင်း ၄၂ သန်း​ကျော် ပုံနှိပ်​ထုတ်ဝေ​ပြီး​ပါပြီ။

ဖော်ပြပါ​စာပေတွေ​အပြင် ယေဟောဝါ​သက်သေတွေဟာ စာအုပ်ကြီး​တွေ၊ စာစောင်​တွေ၊ ဝေစာတွေ အမျိုးမျိုးကို​လည်း ပုံနှိပ်​ထုတ်ဝေတဲ့​အတွက် သမ္မာကျမ်းစာ လေ့လာ​လို​သူတွေ၊ ဘဝပြဿနာ​တွေ​အတွက် ဖြေရှင်းနည်း ရ​လို​သူတွေ၊ ပျော်ရွှင်တဲ့ မိသားစု​ဘဝ ပိုင်ဆိုင်​လို​သူတွေ​အတွက် အကူအညီ ဖြစ်စေ​ပါတယ်။ ၂၀၁၂ ခုနှစ်မှာ၊ ယေဟောဝါသက်သေတွေရဲ့ ပုံနှိပ်​စက်​ကြီး​တွေ​ကနေ မဂ္ဂဇင်း စောင်ရေ​ပေါင်း ၁.၃ ဘီလီယံ​ကျော်၊ ကျမ်းစာအုပ်​နဲ့ စာအုပ်ကြီး​ပေါင်း သန်း ၈၀ ကျော်​ကို ထုတ်ဝေ​ခဲ့​ပြီ။

ကျွန်တော်တို့ရဲ့ ပုံနှိပ်​စက်ရုံ​တွေကို လာရောက်​လည်ပတ်ကြ​တဲ့ ဧည့်သည်တွေ​ဟာ စာပေတွေ ပုံနှိပ်​တဲ့​နေရာမှာ အားသွန်ခွန်စိုက် လုပ်ဆောင်နေ​ကြ​တဲ့​သူတွေကို တွေ့​ပြီး အံ​အား​သင့်​ကြတယ်။ အဲဒီမှာ အလုပ်လုပ်​နေကြ​တဲ့ အမျိုးသား၊ အမျိုးသမီး​အားလုံးဟာ သူတို့ရဲ့ အချိန်တွေ၊ ခွန်အားတွေကို တလိုတလား အသုံးပြု​နေကြပါတယ်။ “ဘုရားသခင့်​အိမ်တော်” လို့ အဓိပ္ပာယ် ရှိတဲ့ ဗေသလ​ကို သူတို့ စ​ရောက်လာ​ချိန်​တုန်း​က ပုံနှိပ်​အလုပ်နဲ့​ပတ်သက်ပြီး ဘာ​အတွေ့အကြုံ​မှ မရှိခဲ့​ကြဘူး။ ဒါပေမဲ့ ဗေသလမှာ လေ့ကျင့်​ပေးမှု​နဲ့ အပြန်အလှန် ဖေးမ​မှု ရှိတဲ့ အလုပ်​ဝန်းကျင်​ကြောင့် အလုပ်​ကျွမ်းကျင်​လာ​ကြပါတယ်။ ဥပမာ၊ အသက် ၂၀ ကျော် လူငယ်လေး​တွေဟာ တစ်​နာရီ​ကို ၁၆ မျက်နှာ ရှိတဲ့ မဂ္ဂဇင်း​စောင်ရေ ၂၀၀,၀၀၀ ပုံနှိပ်​နိုင်တဲ့ မြန်​နှုန်း​မြင့် ပုံနှိပ်​စက်​ကြီး​တွေကို စီမံ​ကိုင်တွယ်​နေကြတာ​ကို မြင်ရ​ပါလိမ့်မယ်။

ကမ္ဘာတစ်ဝန်းမှာ ယေဟောဝါသက်သေတွေ လုပ်ဆောင်နေ​ကြ​တဲ့ အလုပ်တွေကို စေတနာအလျောက် ထည့်ဝင်တဲ့ အလှူငွေ​တွေနဲ့ ထောက်ပံ့​ပါတယ်။ ၁၈၇၉ ခုနှစ်၊ ဩဂုတ်​လထုတ် ဇိအုန်​ကင်းမျှော်စင်၊ အခု​အခေါ် ကင်းမျှော်စင်​ထဲမှာ ဒီလို​ဖော်ပြ​ထားပါ​တယ်– “ဤ ‘ဇိအုန်​ကင်းမျှော်စင်’ ၏ ကျောထောက်နောက်ခံ​မှာ ယေဟောဝါ ဖြစ်ကြောင်း ကျွန်ုပ်တို့ ယုံကြည်​သည်၊ ဤသို့​ယုံကြည်​ထားသောကြောင့် လူ​တို့​ထံ​မှ အထောက်အပံ့​ကို မည်သည့်​အခါ​မျှ တောင်းခံ​မည် မဟုတ်၊ အသနားခံ​မည် မဟုတ်။” အခု​အချိန်မှာလည်း အဲဒီလိုပဲ ကျွန်တော်တို့ ယုံကြည်​လက်ခံ​ထားကြပါ​တယ်။

ဒီ​အလုပ်မှာ ကျွန်တော်တို့ရဲ့ အချိန်တွေ၊ ငွေကြေး​တွေ​နဲ့ ခွန်အားတွေကို ဘာကြောင့် ပုံအပ်ထား​ကြတာလဲ။ အကြောင်းကတော့ ကျွန်တော်တို့ရဲ့ ပုံနှိပ်​စက်​က ထုတ်ဝေ​လိုက်တဲ့ သန်းနဲ့ချီတဲ့ ကျမ်းစာအုပ်​တွေ၊ စာအုပ်တွေ​ထဲ​က ဒါမှမဟုတ် အွန်လိုင်းမှာ တင်ထားတဲ့ စာပေတွေ​ထဲ​က တစ်ခုခုကို သင် ဖတ်တယ်​ဆိုရင် အဲဒီ​စာပေ​ကြောင့် သင်ဟာ ဘုရားသခင်​အကြောင်း ပို​သိလာပြီး ကိုယ်တော်နဲ့ ပို​ရင်းနှီး​လာမယ်လို့ ကျွန်တော်တို့ မျှော်လင့်​လို့​ပါပဲ။